رۆژهەڵاتی ناوەڕاست
مەزڵوم كۆبانێ فەرماندەی گشتی هەسەدە داوا لە ئەحمەد شەرع سەرۆكی قۆناغی راگوزەری سوریا دەكات سەردانی رۆژئاوای كوردستان و ناوچەكانی باكور و رۆژهەڵاتی سوریا بكات.
مەزڵوم كۆبانێ لە چاوپێكەوتنێكدا لەگەڵ پێگەی نۆرس پرێس رایگەیاند، هیوادارن شەرع بتوانێت لەم قۆناغە هەستیارەدا فەرمانرەوایی سوریا بكات و پشتگیری هەسەدەشی بۆ هەر هەوڵێك دوپاتكردۆتەوە كە لە پێناو سەقامگیری و یەكریزی سوریا بدرێت.
هەر لەو چاوپێكەوتنەدا مەزڵوم كۆبانێ ئاشكرایكرد، دیمەشق داوای لێكردون ئەو چەكدارانەی كە بە رەگەز سوری نین لە ریزەكانی هەسەدە دوربخرێنەوە و دۆسیەی ئەمنیش رادەستی دیمەشق بكرێت، بە رادەستكردنی زیندانیكراوانی داعشیشەوە بۆ ئەوەی لە ژێر بەرپرسیارێتی حكومەتی سوریادا بن. هەروەها داوایان لێكراوە دەزگا حكومییەكانی سوریا دوبارە لە ناوچەكانی باكور و رۆژهەڵاتی سوریا دەست بەكار بكەنەوە.
مەزڵوم كۆبانێ رایگەیاندووە، بۆ تاوتوێكردنی ئەو داواكارییانە بە نیازە جارێكی تر سەردانی دیمەشق بكاتەوە .
لە ئیستەنبوڵ 52 كەس دەستگیركران، لە نێویاندا ئەندامانی دەبەپە و هەسەپە و پارتی چەپی سەوز و رۆژنامەنووسیشیان تێدایە.
بەیانی ئەمڕۆ پۆلیسی ئیستەنبوڵ لە ئۆپراسیۆنێكدا چونەتە سەر چەندین ماڵ و پشكنینیان ئەنجامداوە، لەو چوارچێوەیەشدا 52 كەس دەستگیركراون، كە ئەندامانی پارتی هەرێمە دیموكراتییەكان "دەبەپە" و پارتی چەپی سەوز و پارتی سۆسیالیست "هەسەپە" و دوو رۆژنامەنوس لە نێو دەستگیركراوەكاندان.
رێكخراوە مەدەنییەكانیش رایانگەیاندوە، ئەو هەڵمەتی دەستگیركردنە ئیدانە دەكەن، كە حكومەت بیەوێت توركیا بكات بە زیندان.
چوارچێوەی هەماهەنگی رەتیدەكاتەوە دژی بانگهێشتكردنی ئەحمەد شەرع بێت بۆ لووتكەی بەغداد و دەڵێت، پەیوەندییان لەگەڵ سوریا دۆستانەیە.
داخل رازی نوێنەری ئیئتیلافی دەوڵەتی یاسا كە بەشێكە لە چوارچێوەی هەماهەنگی شیعەكان رایگەیاند، بانگهێشتانامەی رەسمییان بۆ ئەحمەد شەرع سەرۆكی سوریا بۆ قۆناغی راگوزەر ناردووە بە مەبەستی بەشداریكرن لە لوتكەی عەرەبی لە بەغداد.
وتیشی، هەموو ئەو هەواڵانەی لە میدیاكان بڵاودەكرێنەوە كە چوارچێوەی هەماهەنگی دژی ئەو بانگهێشنامەیە بێت ، دوورن لە راستیەوە.
ئاماژەی بەوەشكرد، عیراق پەیوەندییەكی دۆستانەی لەگەڵ سوریا هەیە و گۆڕانی كەسایەتییە سیاسییەكانیش كە ئەو وڵاتە بەڕێوەدەبەن، نابێتە هۆی تێكچوونی ئەو پەیوەندییە و وەك خۆی دەمێنێتەوە.
بڕیارە لە مانگی ئایاری داهاتوو لوتكەی عەرەبی لە بەغداد بەڕێوەبچێت، وەزارەتی دەرەوەی عیراقیش بانگهێشتمانەی ئاراستەی وڵاتانی بەشدار لەو لوتكەیە دەكات.
وتەبێژی حکومەتی عیراق هۆکاری پیرۆزبایی نەکردن لە حکومەتی نوێی سوریا ئاشکرا دەکات و دەڵێت، چاوەڕوانی سەردانی وەزیری دەرەوەی سوریاین.
باسم عەوادی وتەبێژی حکومەتی عیراق باس لە هۆکاری پیرۆزبایی نەکردنی عیراق لە حکومەتی نوێی سوریا دەکات و ئاماژەی بەوەکردووە، چاوەڕوانی سەردانی ئەسعەد شیبانی وەزیری دەرەوەی سوریان بۆ عیراق و دەیانەوێت کۆببنەوە لەگەڵی و لە کۆبوونەوەکەدا پەیوەندییە دیبلۆماسییەکانی نێوانیان نوێ بکەنەوە.
ئەوەشی خستووەتە روو، فوئاد حسێن وەزیری دەرەوەی عیراق رایگەیاندووە، کە بۆ لوتکەی عەرەبی لە بەغداد، بانگهێشتی سوریاش دەکەن.
باسم عەوادی دەشڵێت، عیراق چاوەڕوانی ئەوەی کردووە کە هەندێک لە وڵاتانی عەرەبی نیگەرانییەکانیان بڕەوێننەوە و حکومەتی نوێی سوریاش بەشێکی دامەزراوە گرنگەکانی بونیاد بنێتەوە بۆئەوەی رۆڵی گونجاوی خۆیان بگێڕن، کە لەماوەی رابردوودا چەند بەرەوپێشچوونێک لەو بارەیەوە هەبوون.
وتەبێژی حکومەتی عیراق دەشڵێت، سەردانی وەزیری دەرەوەی سوریا بۆ بەغداد بەمەبەستی گەیشتنە بە خاڵی لێکتێگەیشتنی گونجاو لەنێوان ئەو دوو وڵاتەدا، بۆئەوەی بە رێز و هەماهەنگییەوە پەیوەندییەکانیانی لەسەر بونیاد بنێن. هەروەها تیایدا چەندین دۆسیەی گرنگ و هەستیار باسدەکەن، کە هەردوو وڵاتەکە گرنگی تایبەتی پێدەدەن.
ئەوەش لەکاتێکدایە، لەناو وڵاتانی عەرەبیدا تاوەکو ئێستا عیراق بەشێوەیەکی رەسمی پیرۆزبایی دامەزراندنی حکومەتی نوێی لە سوریا نەکردووە، کە ئەوەش مشتومڕی دروستکردووە.
مانگی 12ی ساڵی رابردوو، بە فەرمی رووخانی رژێمەکەی بەشار ئەسەد لە سوریا راگەیەنرا، کە بە رووخانی رژێمەکەی بەشار ئەسەد، کۆتایی بە حکومی 53 ساڵەی بنەماڵەی ئەسەد هات لە سوریادا.
ژمارەی ئەو کەسانەی بەهۆی شەڕ لە غەززە گیانیان لەدەستداوە گەیشتووەتە زیاتر لە 48 هەزار کەس و زیاتر لە 111 هەزار کەسیش بریندار بوون.
تەندروستی فەڵەستین رایگەیاندووە، لەماوەی ٢٤ کاتژمێری رابردوودا، تەرمی حەوت فەڵەستینی دەرهێنراونەتەوە لەژێر داروبەردوی خانووە رووخاوەکاندا و بەوەش ژمارەی گیانلەدەستدان لە کەرتی غەززە گەیشتووەتە ٤٨ ھەزار و ٢٧١ کەس.
ئاماژەی بەوەشکردووە، هەر لەو ماوەیەدا پێنج برینداری دیکە گەیەندراونەتە نەخۆشخانەکانی کەرتی غەززە و بەوەش ژمارەی بریندارەکان بۆ ١١١ ھەزار و ٦٩٣ کەس بەرزبووەوە.
لە تشرینی یەکەمی ساڵی 2023ـەوە دوای ئەوەی حەماس بە زیاتر لە پێنج هەزار موشەک هێرشی کردە سەر ئیرائیل، شەڕی نێوان ئیسرائیل و حەماس دەستی پێکرد.
سەرەڕای هەوڵەکان و فشارە نێودەوڵەتییەکان بۆ راگرتنی جەنگ، بەڵام تەنها ئاگربەست راگەیەنراوە، لەدوای دەستبەکاربوونەوەی تڕەمپیشەوە هەوڵەکان بۆ راگرتنی جەنگچڕتر کراونەتەوە.
وەزیری دەرەوەی ئەمریكا و سەرۆك وەزیرانی ئیسرائیل، تاوتوێی چۆنێتی جێبەجێكردنی پلانەكەی ترەمپیان بۆ راگواستنی خەڵكی غەززە كرد و باسیان لە هەماهەنگی زیاتری سەربازی و دبلۆماسیکرد لە ئایندەدا.
بنیامین ناتانیاهۆ سەرۆك وەزیرانی ئیسرائیل و ماركۆ رۆبیۆ وەزیری دەرەوەی ئەمریكا كۆبوونەوە، لە دوای كۆبوونەوەیان لە تەلئەبیب لە كۆنگرەیەکی رۆژنامەنوسیدا رایانگەیاند، تاوتوێی چۆنێتی جێبەجێكردنی پلانەكەی ترەمپیان بۆ راگواستنی خەڵكی غەززە كردوە، هاوكات، ناتانیاهۆ رایگەیاند، ئەگەر حەماس سەرجەم بارمتەكان ئازاد نەكات ئەوا لەگەڵ ترەمپ دەزانین چیدەکەین، دەرگای دۆزەخ بەروویاندا دەكەینەوە.
وەزیری دەرەوەی ئەمریكاش وتی، رێگا نادەن حەماس نە لە رووی سیاسی و نە سەربازی كەرتی غەززە بەرێوەببات، ئاماژەی بەوەشكرد، ئێران سەرچاوەی ناسەقامگیری رۆژهەڵاتی ناوەراستە و هەرگیز رێگانادەن ببنە خاوەنی چەكی ئەتۆمی.
رۆبیو جەختی لەوەشكردوە، واشنتۆن پشتیوانی لە پێكهێنانی حكومەتێكی بەهێز دەكات لە سوریا، بەو مەرجەی نەبێتە سەرچاوەی هەڕەشە بۆ دراوسێكانی و ناوچەكە.
شەوی رابردوو وەزیری دەرەوەی ئەمریكا بە سەردانێك گەیشتە ئیسرائیل و دوای تەلئەبیب سەردانی سعودیە و ئیماراتیش دەكات بۆ تاوتوێكردنی پلانەكەی ترەمپ بۆ راگواستنی خەڵكی غەززە.
بەرپرسی فەرمانگەی راگەیاندنی حکومەتی فەلەستین لە غەززە بڵاویکردەوە، رەتکردنەوەی ئیسرائیل و رێگەنەدان بە چوونە ژوورەوەی کەرەڤانە و کەرەستە پێویستەکان، خۆدزینەوەیەکی ئاشکرایە لە رێککەوتن و ئاگربەست.
سەلامە مەعروف جەختی لەوە کردەوە کە ئەم رەتکردنەوەیە نوێنەرایەتی "پەیامێکی ئاشکرا" دەکات بۆ شکستی ڕێککەوتنەکە، ئاماژەی بەوەشکرد، کە حەماس پابەندبوونی خۆی پشتڕاست دەکاتەوە بۆ ئاگر بەست، بە شەرتێک، ئیسرائیل پابەند بێت بە رێککەوتنەکەوە.
ئاماژەی بەوەشکرد، ئەم هەڵوێستەی ئیسرائیل "بۆ هەموو جیهانی ئاشکراکرد ئەو لایەنە کێیە کە رێگری لە رێککەوتنەکە دەکات"، داواشی لە ناوبژیوانانکرد بەپەلە دەستوەردان بکەن و فشار بخەنە سەر ئیسرائیل بۆ جێبەجێکردنی ئەرکەکانی.
وتیشی: ئەو بارودۆخە کارەساتبارەی ژیانی دانیشتوانی کەرتی غەززەی گرتووەتەوە، نیشانی دەدات کە، لەوە زیاتر بەرگەی دواخستنی پێداویستییە تەندروستیەکان و ئەو پەناگە و پێداویستییە مرۆییانە ناگرن کە دەبوو بگاتە دەستیان.
بەرپرسی فەرمانگەی ڕاگەیاندنی حکومەتی فەلەستین داوای لە ناوبژیوانان و کۆمەڵگەی نێودەوڵەتی کرد بەرپرسیارێتی خۆیان لە ئەستۆ بگرن و بەپەلە بەدەم هاووڵاتی
ساڵح موسلیم ئەندامی دەستەی سەرۆكایەتی پەیەدە دەڵێت، هەموو گەلانی سوریا سیستەمێكی فیدراڵیزمی هاوشێوەی بەڕیتانیایان دەوێت لە سوریا.
ساڵح موسلیم، ئەندامی دەستەی سەرۆكایەتی پەیەدە لە چاوپێكەوتنێكی رۆژنامەوانیدا رایگەیاند، چاوەڕوانی ئەوە لە ئەحمەد شەرع سەرۆك كۆماری سوریا بۆ قۆناغی راگوزەر دەكەن، بە راستی سەرۆك بێت و كار بۆ تەواوی گەلانی سوریا بكات.
ئەوەشی خستەڕو، ئەو گروپە هاوپەیمانانەی توركیا كە هێرش دەكەنە سەر كوردانی سوریا، هاوبەشی ئەحمەد شەرعن و راگرتنی ئەو هێرشانە لە ئەستۆی ئەوە، هەرچەندە راگرتنی ئەو گروپانە بۆ ئەحمەد شەرع ئەركێكی سەختە.
ساڵح موسلیم ئاماژەی بەوەشدا، هەموو گەلانی سوریا داوای سیستەمێكی فیدراڵیزمی هاوشێوەی بەڕیتانیا لە سوریا دەكەن، كە سیستەمەكە بەپێی ناوچەكان بگۆڕێت، جەختیشیكردەوە، دەیانەوێت بەشێك بن لە كۆنفرانسی دیالۆگی نیشتمانی سوریا، بەڵام ئەگەر بەشداری كۆنفرانسەكە نەكەن، پابەندی بڕیارەكانیشی نابن.
لە بۆردوومانێكی ئیسرائیلدا لە باشوری لوبنان سەركردەیەكی حزبوڵا كوژرا.
میدیاكانی لوبنان بڵاویانكردەوە، شەوی رابردوو لە باشوری لوبنان ئیسرائیل ئۆتۆمبێلێكی كردوەتە ئامانج و بەهۆیەوە سەركردەیەكی حزبوڵا كوژرا و چوار كەسی تریش برینداربوون.
حزبوڵای لوبنانی لە راگەیەنراوێكدا ئیسرائیلی تۆمەتبار كرد بە پێشێلكردنی رێككەوتنی ئاگربەست لە لوبنان.
هاوكات، سوپای ئیسرائیل رایگەیاند، لە باشوری لوبنان سەركردەیەكی دیاری حزبوڵای لوبنانی كە لێپرسراوی یەكەی ئاسمانی گروپەكە بووە كراوەتە ئامانج و كوژراوە.
دەشڵێت، ئەو سەركردەیەی حزبوڵا پێشێلی رێككەوتنی كردووە و رۆڵی هەبووە لە ئاڕاستەكردنی فڕۆكەی بێفڕۆكەوان بۆ ناو خاكی ئیسرائیل.
ئێران لە پەیوەندی ناڕاستەوخۆدایە لەگەڵ ئیدارەی نوێی سوریا و بۆ یەكەمجاریش لەدوای كەوتنی ئەسەدەوە پەیامی لە دیمەشقەوە پێگەیشتووە.
محەمەد رەزا شێبانی نوێنەری تایبەتی وەزیری دەرەوەی ئێران بۆ كاروباری سوریا رایگەیاند، تێڕوانینی تاران بۆ پێشهاتەكانی سوریا و گەڕاندنەوەی پەیوەندییەكانی لەگەڵ دیمەشق، تێڕوانینێكی پێشوەختەیە بۆ داهاتوو.
وتیشی، بە وردی بەدواداچوون بۆ پێشهاتەكانی سووریا دەكەن و دژایەتی وڵاتەكەشی بۆ هەر دەستوەردانێكی دەرەكی لە سوریا دووپاتكردەوە، جەختیشیكردەوە، پەیامێكی نوێیان لە دیمەشقەوە پێگەیشتووە بۆ ئاسایی كردنەوەی پەیوەندییەكانیان.
ئێران كە هاوپەیمانێكی نزیكی بەشار ئەسەد بوو لە سوریا، لەدوای كەوتنییەوە لە 8ی كانوونی یەكەمی 2024، تاران هەموو جۆرە پەیوەندییەكی دیبلۆماسی لەگەل دیمەشقدا پچڕاندووە.
دژی رێگریی لە نیشتنەوەی فڕۆكەیەكی ئێران، لایەنگرانی حزبوڵا لە پایتەختی لوبنان خۆپیشاندانیان كرد و هێرشیشیانكردە سەر هێزەكانی ئاشتیپارێز.
شەوی هەینی لایەنگرانی حزبوڵای لوبنان لە نزیك فڕۆكەخانەی بەیروت دژی رێگریی لە نیشتنەوەی فڕۆكەیەكی ئێران خۆپیشاندانیان كرد و خۆپیشاندانەكەش توندوتیژیی لێكەوتەوە.
میدیاكانی لوبنان بڵاویانكردوە لایەنگرانی حزبوڵا وەك پشتیوانیی لە ئێران رێگای سەرەكیی فڕۆكەخانەی بەیروتی پایتەختیان داخستوە و هێرشیانكردوەتە سەر ئۆتۆمبێلی هێزەكانی ئاشتی پارێز و سوتاندویانە و ئەندامێكی هێزەكە برینداربووە.
سەرۆك وەزیرانی لوبنان: ئیدانەی هێرشەكانی سەر هێزەكانی ئاشتی پارێز لە بەیروت كرد و سوپاسی رۆڵی ئەو هێزانەی كرد لە وڵاتەكەی.
لوبنان لەم هەفتەیەدا گەشتێكی ئاسمانی ئێرانی ڕاگرت دوای ئەوەی سوپای ئیسڕائیل تارانی تۆمەتبار كرد بە بەكارهێنانی فڕۆكەی مەدەنی بۆ گواستنەوەی پارە بە قاچاخ بۆ بەیروت تاوەكو حزبوڵا پڕچەك بكات.
ئێرانیش وەك كاردانەوەیەك بەو كارە ڕێگەی نەدا فڕۆكە لوبنانییەكان لە تاران بنیشنەوە كە بۆ گواستنەوەی ژمارەیەك هاوڵاتی لوبنانی گەشتیكردبوو.
هەسەدە رایگەیاند، هەر كۆنفرانسێكی نیشتمانی لە سوریا بەبێ بەشداری كورد بكرێت، پابەندی ئەنجام و بڕیارەكانی نابن.
دوای ئەوەی پێكهێنانی لێژنەی ئامادەكاری بۆ كۆنفرانسی دیالۆگی نیشتمانی سوریا راگەیەنرا كە هیچ كوردێكی تیدا بەشدار نییە، ساڵح موسلیم ئەندامی سەرۆكایەتیی پارتی یەكێتی دیموكرات رایگەیاند، ئەو لیژنەیەی كە پێكهێنراوە نوێنەرایەتی یەك رەنگ دەكات و تەنها بۆ دڵخۆشكردنی هەندێك لایەنی دەرەكی پێكهێنراوە.
وتیشی، ئەگەر بێت و بە شێوەیەكی دادپەروەرانە مامەڵە لەگەڵ كوردەكان نەكرێت ئەوە ئەوان پابەندی ئەنجام و بڕیاری هیچ كۆنفرانسێك نابن.
هاوكات، فەرهاد شامی، بەڕێوەبەری راگەیاندنی هێزەكانی سوریای دیموكرات هەسەدە ئاماژەی بەوەکرد، هەر كۆنفرانسێك لە سوریا كە هێزەكانی هەسەدە یان ئیدارەی خۆسەر بەدەر بكات، نیشتیمانی و یەكگرتوو نابێت و مەبەست لێی دووبارەكردنەوەی سیاسەتەكانی پێشوو و دوورخستنەوەی بەشێك پێكهاتەكانە لە سوریا.
ئەمە لەكاتێكدایە، سەرەڕای پێكهێنانی لیژنەیەكی حەوت كەسی بۆ ئامادەكاری بەستنی كۆنفرانسی نیشتمانی لەلایەن سەرۆكایەتی سوریا، تاوەكو ئێستا هیچ وادەیەك بۆ ئەنجامدانی كۆنفرانسەكە دیارینەكراوە.
واشنتن: ئامادەین بۆ وەرگرتنی هەر پێشنیازێكی عەرەبی سەبارەت بە غەززە
ئەمریكا ئامادەیی دەردەبڕێت بۆ وەرگرتنی هەر پێشنیازێكی عەرەبی سەبارەت بە داهاتووی غەززە و ئاوەدانكردنەوەی.
ماركۆ رۆبیۆ وەزیری دەرەوەی ئەمریكا رایگەیاند، بەو پێیەی زۆرێك لە وڵاتانی جیهان لە نێویاندا وڵاتانی عەرەبی پێشنیازەكەی دۆناڵد ترەمپ سەرۆكی ئەمریكایان سەبارەت بە ئاوەداكردنەوەی كەرتی غەززە رەتكردەوە، لە ئێستادا واشنتنن ئامادەیە بۆ وەرگرتنی پێشنیازی نوێ و باشتر سەبارەت بە داهاتووی ئەو كەرتە.
وتیشی، هیوادارن ئەوان بیرۆكەی باشیان هەبێت و جێگای سەرنجی تڕەمپ بێت.
رۆبیۆ راشیگەیاند، هەموو ئەو وڵاتانە باس لەوە دەكەن كە چەندە گرنگی بە فەڵەستینییەكان دەدەن، بەڵام هیچ كامیان ئامادەنین وەریانبگرن، هیچیشیان بۆ غەززە نەكردووە.
پیشتر، دۆناڵد تڕەمپ سەرۆكی ئەمریكا رایگەیاندبوو دانیشتوانی غەززە دەگوازیتەوە بۆ وڵاتانی دراوسێ بە تایبەتیش بۆ ئوردن و میسر، وتیشی، ئەگەر پابەند نەبن ئەوە هاوكاریەكانی وڵاتەكەی بۆ ئەو دوو وڵاتە رادەگرێت.
لە ئەمریکا 350 حاخام رایانگەیاند، دژی پلانەکەی دۆناڵد ترەمپن لەبارەی راگواستنی فەڵەستینییەکان لە غەززە و دەست بەسەرداگرتنی بەسەر غەززە.
ئەو 350 حاخامە بە ئیمزاکردنی بەیاننامەیەک کە لە رۆژنامەی "نیویۆرک تایمز" بڵاوکراوەتەوە رایانگەیاندووە، دژی پلانەکەی سەرۆکی ئەمریکا، دۆناڵد ترەمپن لەبارەی راگواستنی فەڵەستینییەکان لە غەززە و دەست بەسەرداگرتنی غەززدا.
راگەیەنراوەکەیان لەژێر ناوی "ترەمپ داوای دەرکردنی ھەموو فەڵەستینییەکان لە غەززە دەکات. جولەکەکان دەڵێن نەخێر بۆ پاکتاوی نەژادی"، لە رۆژنامەی "نیویۆرک تایمز" بڵاوکردووەتەوە.
رۆژی 4ی ئەم مانگە سەرۆکی ئەمریکا، دۆناڵد ترەمپ رایگەیاندبوو، پلانی ھەیە، لەوەی دوای راگواستنی فەڵەستینییەکان لە کەرتی غەززە، دەست بەسەر غەززەدا بگرن.
هاوسه‌رۆكی كه‌جه‌كه رایگه‌یاند، ئۆجه‌لان نامه‌یه‌كی بۆ ناردوون و تیایدا هه‌نگاوێكی گرنگی بۆ چاره‌سه‌ریی پرسی كورد و دیموكراسیی له توركیا ده‌ستپێكردوه كه پێویسته پشتیوانیی بكرێت.
جه‌میل بایك، هاوسه‌رۆكی كۆما جڤاكێن كوردستان - كه‌جه‌كه له چاوپێكه‌وتنێكی ته‌له‌ڤیزیۆنیدا سه‌باره‌ت به تێپه‌ڕبوونى 26 ساڵ به‌سه‌ر ده‌ستگیركردنی عه‌بدوڵا ئۆجه‌لان، رێبه‌ری زیندانیكراوى پارتی كرێكارانی كوردستان- په‌كه‌كه رایگه‌یاند، ئۆجه‌لان خوازیاره پرسی كورد له باكوری كوردستان و توركیا به یاسایی و سیاسیی چاره‌سه‌ر بكرێت، به‌ڵام تا له زیندان ئازاد نه‌كرێت پڕۆسه‌ی ئاشتی له باكوری كوردستان و توركیا سه‌ركه‌وتو نابێت.
وتیشی، هه‌نگاوه‌كانی ئۆجه‌لان پرسی كوردی به بنه‌ما وه‌رگرتوه، به‌ڵام هه‌ندێك لایه‌نی توركیا تا ئێستاش خوازیاری به‌رده‌وامى شه‌ڕن و كه‌سانی خه‌یانه‌تكاریش ده‌یانه‌وێت به ناوی به‌ره‌نگاربونه‌وه‌ی كورده‌وه به‌رژه‌وه‌ندییه‌كانی خۆیان بپارێزن
سەرۆكایەتی سوریا رەتیدەكاتەوە دانوستانەكانیان لەگەڵ هەسەدە كۆتایی هاتبێت .
دوای ئەو هەواڵانەی سەبارەت بە كۆتاییهاتنی دانوستانەكانی نێوان هەسەدە و دەسەڵاتی راگوزەری سوریا بڵاوكراوەیەوە، سەرۆكایەتی سوریا راگەیەندراوێكی لەوبارەیەوە بڵاوكردەوە و تێیدا رەتیكردەوە دانوستانەكانیان لەگەڵ هەسەدە كۆتایی هاتبێت و دوپاتیشكراوەتەوە كە ئەو هەواڵانەی لەوبارەیەوە بڵاوكراونەتەوە ، هیچ بنەمایەكیان نیە .
هەفتەی رابردوو ئەحمەد شەرع سەرۆكی سوریا دوپاتیكردەوە كە دانوستانەكانیان لەگەڵ هەسەدە بەردەوام دەبێت، چونكە ئامانجیانە هەموو گروپە چەكدارەكان لە چوارچێوەی سوپای سوریادا یەكبخەنەوە .
تا ئێستاش چەند جارێك فەرماندەكانی هەسەدە رایانگەیاندووە، ئامادەن بچنە ناو سوپای سوریاوە بەڵام بۆ ئەو هەنگاوە چەند مەرجێكیان هەیە و تا بە تەواوی دەستوری نوێ دانەرێژرێت و شێوە و پێكهاتەی سوپا روون نەبێتەوە ، ئامادە نین چەك دابنێن .