کەشناسیی هەرێم پێشبینییەکانی دوو رۆژی سەرەتای جەژنی رەمەزانی بڵاوکردەوە و دەڵێت، ئەمڕۆ و سبەینێ باران و هەورەتریشقە دەبێت.

کەشناسیی هەرێم رایگەیاند، ئەمڕۆ یەکشەممە، ئاسمان نیمچەهەور بۆ هەورى تەواودەبێت، لە کاتەکانى ئێوارەدا شەپۆلێکى نمەباران و هەورە تریشقە دەست پێ دەکات. لە زۆربەى ناوچەکانى هەرێم بەتایبەت لە کاتەکانی درەنگانى شەودا شەپۆلەکە بەهێزتر دەبێت.

ئاماژەی بەوەشکردووە، سبەینێ دووشەممە، ئاسمانى هەرێم هەوری تەواو دەبێت لەگەڵ بەردەوامبوونى شەپۆلى نمەباران و هەورەتریشقە لە کاتەکانى بەرەبەیانیدا بۆسەر زۆربەى ناوچەکانى هەرێم تاوەکو پێش نیوەڕۆ، پاشان کاریگەرییەکەى تەنها لە ناوچە شاخاوییەکان دەمێنێتەوە و لە شەودا کۆتایی پێدێت.

ئەوەش هاتووە، خێرایی با لەسەرخۆ و مامناوەند دەبێت، لەکاتی بارانباریندا چالاک دەبێت و دەگاتە 30 کیلۆمەتر لە سەعاتێکدا.

کەشناسیی روونیشیکردووەتەوە، پلەکانی گەرما ئەمڕۆ وەک دوێنێ دەبێت، بەڵام سبەینێ 3 بۆ 4 پلەی سیلیزی دادەبەزن.

بەرزترین پلەکانی گەرمای پێشبینیکراو بە پلەی سیلیزی:

هەولێر : 25  پلەی سیلیزی

سلێمانی : 23 پلەی سیلیزی

دهۆک : 25  پلەی سیلیزی

کەرکوک : 27پلەی سیلیزی 

زاخۆ  : 26 پلەی سیلیزی

هەڵەبجە : 21 پلەی سیلیزی

سۆران : 21 پلەی سیلیزی

حاجی ئۆمەران :12 پلەی سیلیزی

گەرمیان : 28 پلەی سیلیزی

سەرلەبەیانی ئەمڕۆ لە گوندى گردەچاڵى سنورى قەزاى بەحرکە ئاگر لە کێڵگەیەکى پەلەوەر کەوتەوە و بەهۆیەوە زیاتر لە 50 هەزار پەلەوەر سوتان.

پەیامنێری کوردسات نیوز باسی لەوەکرد، نزیک کاتژمێر 8ی بەیانی ئەمڕۆ ئاگر لە کێڵگەیەکی پەلەوەر لە گوندی گردەچاڵ لە سنوری قەزای بەحرکە کەوتووەتەوە، کە زیاتر لە 50 هەزار و جوچک و مریشکی تێدا بووە.

باسی لەوەشکرد، بەهۆی ئاگرەکەوە زیانێکی زۆر کەوتووەتەوە و پەلەوەرەکان سوتاون، هەروەها چەندین ئامێریش سوتاون و زیانیان پێگەیشتووە.

ئەوەشی خستە روو، پێنج ئۆتۆمبێلی ئاگرکوژێنەوە و چەند تانکەرێکی ئاو گەیشتوونەتە شوێنی روداوەکە، بەڵام نەتوانراوە ئاگرەکە کۆنتڕۆڵ بکرێت.

وتیشی، ئەگەرچی هۆکاری ئاگرەکە بە تەواوی روون نییە، بەڵام بەپێی وتەی شایەتحاڵەکان، وادەردەکەوێت بەهۆی جگەرەوە ئاگرەکە کەوتبێتەوە.

دوای تەواوبوونی مانگی رەمەزان و مانگێک لە بەرۆژووبوون، ئاسان نییە بۆ جەستە و گەدە و ریخۆڵەکان راستەوخۆ وەک پێشوو بگەڕێیتەوە سەر خواردنی ژەمەکان، بۆئەوەی توشی هیچ گرفتێک لە سیستمی هەرسدا نەبیتەوە، پێویستە چەند رێنماییەک جێبەجێ بکەیت.

پزیشکەکان ئامۆژگاری رۆژووەوانان دەکەن، بە شێوەیەکی دروست دەست بکەنەوە بە خواردنی ژەمەکان و هەنگاو بە هەنگاو رۆژانە دەست بکەنەوە بە خواردن، بۆئەوەی سیستمی هەرسیان بە چالاکی بمێنێتەوە و دووربێت لە گرفت.

یەکەم و باشترین هەنگاو ئەوەیە، لە رۆژانی جەژندا هەرسێ ژەمەکە نان نەخورێت، یانیش ئەگەر لە ژەمەکاندا نان خورا، ئەوا خواردنی قورس نەخورێت.

بەهۆی ئەوەی بەیانیانی جەژن هاووڵاتیان خواردن ئامادە دەکەن، گرنگە ژەمی نیوەڕۆ خواردنێکی سادە و سوک بێت و هەمان ژەمی بەیانی نەبێت.

هەنگاوێکی دیکەی گرنگ خواردنەوەی ئاوە، لەدوای بەرۆژووبوون و خواردنی ژەمەکان، جەستە پێویستی بە خواردنەوەی بڕێکی باشی ئاوە، بۆئەوەی بتوانێت بە شێداری بمێنێتەوە و کاری گورچیلەکانیش بە دروستی بەڕێوەبچێت و خۆیان پاکبکەنەوە.

هەروەها پێویستە تاوەکو هەست بە برسێتی نەکەن نان نەخۆن، لەبەر ئەوەی لەکاتێکدا هێشتا شەکری خواردنی پێشوو کە هەڵمژراوە لەناو خوێندا هەیە و رێژەی ئەنسۆلین بە بەرزی ماوەتەوە بۆیە گرنگە جەستە ئەوە شی بکاتەوە و رێژەی ئەنسۆلین داببەزێت.

پزیشکەکان هۆکاری تێکچوونی گەدە و ریخۆڵەی بەشێک لە هاووڵاتیان بۆ ئەوە دەگەڕێننەوە، هەندێک جار برسیشیان نییە بەڵام نان و شیرینی دەخۆن، ئەوەش وادەکات لە هەندێک کاتدا توشی ژەهراویبوون ببن. بۆیە باشترین هەڵبژاردنە کە نان نەخۆن تاوەکو بە تەواوی هەست بە برسێتی نەکەن.

مەکتەبی سیاسی یەکێتیی نیشتمانیی کوردستان بە بۆنەی هاتنەوەی جەژنی رەمەزانەوە، بەیاننامەیەکی پیرۆزبایی بڵاوکردەوە.

لە بەیاننامەکەدا هاتووە: "گەرمترین پیرۆزبایی ئاراستەی سەرجەم موسڵمانانی کوردستان و عیراق دەکەین و لە یەزدانی مەزن داواکارین نزا و رۆژوو و گشت سروتە ئایینیەکانی ئەم مانگە پیرۆزە لە گشت لایەک قبوڵ بکات و جەژن ببێتە مایەی خێر و خۆشی."

مەکتەبی سیاسی یەکێتیی نیشتمانیی لە بەیاننامەکەیدا هیوای خواستووە کە "ئەم بۆنە پیرۆزە ببێتە وێستگەی قوڵکردنەوەی لێبوردەیی لەناو گشت پێکهاتەکانی کوردستاندا و هەموان پێکەوە هەوڵەکانمان زیاتر بخەینە گەڕ بۆ دابین کردنی ژیانێکی شایستە بۆ گەلەکەمان."

لیژنە هاوبەشەکانی قایمقامیەتی رانیە رایانگەیاند تەنیا لەمانگی رەمەزاندا 47 شوێن پسوڵەی سەرپێچیان بۆ کراوە و 33 شوێنی بازرگانی داخراون

کارزان سلێمان، سەرۆکی لێژنە هاوبەشەکانی قایمقامیەتی رانیە ئاماری چالاکییەکانی ئەم لیژنانەی لە ماوەی مانگی پیرۆزی رەمەزاندا خستەرو.

بەپێی لێدوانەکانی کارزان سلێمان، لە ماوەی مانگی رەمەزاندا، لیژنەکان 47 پسوڵەی سەرپێچیان بۆ شوێنە بازرگانییەکان دەرکردووە، هەروەها 420 شوێنیشیان بە شێوەی فەرمی ئاگادار کردووەتەوە.

سەرۆکی لێژنە هاوبەشەکان رایگەیاند کە "33 شوێنی بازرگانیمان بەهۆی سەرپێچی یاساکانەوە داخستووە، هەروەها توانیومانە زیاتر لە 45 تۆن ماددەی خۆراکی بەسەرچوو دەستی بەسەردا بگرین."

کارزان سلێمان ئاماژەی بەوەش کرد، کە بەهۆی مەترسییەکانیان لەسەر ژیانی هاوڵاتیان، "سەرجەم ئەو یارییە ئاگرینانەی کە بەبۆنەی جەژنەوە دەفرۆشرێن" قەدەغە کراون.

لە درێژەی قسەکانیدا، سەرۆکی لێژنەکان ئاشکرای کرد کە "1925 سەردانی شوێنە بازرگانییەکانمان لە ماوەی مانگی رەمەزاندا ئەنجام داوە، بۆ 44 شوێن پسوولەی پێبژاردنمان دەرکردووە کە بەهای گشتییان چوار ملیۆن و 270 هەزار دینار بووە." 

کارزان سلێمان لە کۆتایی لێدوانەکانیدا رایگەیاند کە "چوار شوێنیش بەهۆی سەرپێچی بەردەوامیانەوە روبەروی دادگا کراونەتەوە."

 وەزارەتی کارەبا لە رۆژانی جەژندا 18 تا 20 سەعات کارەبا بە هاووڵاتیان دەدات.

وەزارەتی کارەبای حکومەتی هەرێمی کوردستان لە هەژماری فەیسبوکی رەسمی خۆی رایگەیاندووە، لە رۆژانی جەژنی رەمەزانی پیرۆزدا 18 تا 20 سەعات كارەبا بەهاووڵاتیان دەدرێت.

لە راگەیەندراوەکەشدا هاتووە، لەهەر سێ رۆژی جەژنی رەمەزانی پیرۆز بەپشتبەستن بە نزیكەی 4000 مێگاوات كارەبا رۆژانە 18 تا 20 سەعات كارەبا بەهاووڵاتیان دەدرێت، هاوكات زیاتر لە 7000 كرێكارو فەرمانبەری كارەبا لە بەڕێوەبەرایەتییەكانی كۆنترۆڵی كارەبای هەرێم و كۆنترۆڵی كارەبای پارێزگاكان و وێستگەكانی بەرهەمهێنان و گواستنەوە و دابەشكردنی كارەبا و سیانەكان و پۆلیسی كارەبا لەسەرجەم پارێزگاو ئیدارە سەربەخۆكانی هەرێم بە شێوەی ئیشكگریی لە خزمەتی هاووڵاتیاندا دەبن.

لە پشووی رۆژانی نەورۆزدا ژمارەیەكی زۆری گەشتیار رویان لە رۆژهەڵاتی كوردستان و ئێران كردوە و لێپرسراوێكیش دەڵێت، تەنها لە مەرزی باشماخەوە زیاتر لە 20 هەزار گەشتیار چوونەتە پارێزگای سنە.

مەنسور مێهرزاد بەڕێوەبەری گەشتیاریی و كاری دەستیی پارێزگای سنە رایگەیاند، تەنها لە  پشوەكانی نەورۆز و لە ماوەی 12 رۆژدا، 22 هەزار و 486 كەس لە هەرێمی كوردستان و شارەكانی عیراقەوە لە رێگەی مەرزی باشماخەوە رویان لە رۆژهەڵاتی كوردستان و شارەكانی ئێران كردوە.

بە وتەی مێهرزاد هاتنی گەشتیاران لە رێگەی مەرزی باشماخەوە بە رێژەی 38% بەراورد بە ساڵی رابردوو زیادیكردوە و ئەوەش ئاماژەیەكە بۆئەوەی لە ئەمساڵدا ژمارەی گەشتیاران بۆ رۆژهەڵاتی كوردستان و شارەكانی ئێران بەشێوەیەكی بەرچاو بەرز دەبێتەوە.

کارکردن لە شەقامی 100 مەتری سلێمانی بەردەوامە و تێکردنی کۆنکرێت لە یەکتربڕی ژمارە 11ی شەقامەکە دەستیپێکرد.

سەرۆکایەتی شارەوانی سلێمانی ئەم وێنانەی بڵاوکردوەتەوە: سەعات سێی سەر لەبەیانی تێکردنی کۆنکرێت لە یەکتربڕی ژمارە یانزەی شەقامی 100 مەتری دەستیپێکرد.

ئاماژەی بەوەشکردوە، یەکتربڕەکە دەکەوێتە تاسڵوجە دەبێتە گەورەترین یەکتربڕ لە شاری سلێمانی کە بەشێوەی دایڕێکشناڵ دیزاین کراوە بە سێ ئاستی بەرزی، لە چوار پرد پێکهاتووە (A,B,C,D).

شارەوانی سلێمانی راشیگەیاندوە، پردی D کە لە ئاڕاستەی سلێمانی بۆ کەرکوک گەڕانەوەیە بۆ ئاڕاستەی سلێمانی، بەدرێژایی ١٠٥ مەتر و پانی ١٤ مەتر.

ئەوەشی خستوەتەڕوو، دوای چێککردنەوەی هەموو لایەنە تەکنیکی و ئەندازیاریەکانی لە رۆژی هەینیدا، ئەمشەو لە 29ی 3 لە سەعات 3ی شەو دەستکرا بە تێکردنی کۆنکرێت، کە سەروو 1000 مەتر سێجا دەبێت و نزیکەی ١٢ سەعات دەخایەنێت.

شەقامی 100 مەتریی سلێمانی حەوت یەکتربڕ، پێنج ئەندەرپاس، یەک ئۆڤەرپاس.

ئەپیكۆر رایدەگەیەنێت: وەزارەتی نەوتی عیراق ئامادە نییە گفتوگۆ لەسەر چارەسەركردنی كێشەكانی هەناردەكردنەوەی نەوتی هەرێم بكات.

كۆمەڵەی پیشەسازیی نەوتی كوردستان ناسراو بە "ئەپیكور" لە رایگەیەنراوێكدا ئاماژەی بەوەكردوە، كۆمپانیا نێودەوڵەوتییەكانی نەوت و حكومەتی هەرێم بە نیازێكی پاكەوە لەگەڵ حكومەت و نوسینگەی سەرۆك وەزیرانی عیراق، دەستیان بە گفتوگۆ كرد بۆ گەیشتن بە بڕیارێكی تایبەت بە دەستپێكردنەوەی هەناردەی نەوتی هەرێمی كوردستان كە گونجاوبێت، لەگەڵ رێككەوتنە یاساییەكان و بودجەی عیراق، بەڵام بۆیان رونبووەتەوە، وەزارەتی نەوتی عیراق ئامادەنییە گفتوگۆ لەسەر چارەسەرێك بكات و رێز لە گرێبەستی كۆمپانیاكان بگرێت.

راشیگەیاندوە، عیراق هەوڵدەدات رێگەیەك بگرێتەبەر، بەشێوەیەكی تاكلایەنە جێگرەوەیەك بۆ چوارچێوە یاساییەكە و گرێبەستە بەركارەكانیان لەگەڵ حكومەتی هەرێم دابنێت، بەڵام تا پابەندبوون لە حكومەتی عیراقەوە نەبێت، ئامادەنین دەست بە هەناردەكردنەوەی نەوت بكەن.

لە چوارچێوەی جێبەجێكردنی پرۆژەی روناكی كاركردنی 600 مۆلیدەی ئەهلی وەستێنراوە و هاووڵاتیانیش نیگەرانن لە زۆری پارەی كارەبا.

وەزارەتی كارەبای هەرێم رایگەیاند، لە درێژەی جێبەجێكردنی پرۆژەی روناكی بۆ دابینكردنی كارەبای 24 سەعاتی، پرۆژەكە بۆ شەش گەڕەكی تری هەولێر دابیندەكرێت.

ئاماژەی بەوەشكردوە، تائێستا لە هەولێر 26 گەڕەك و 346 هەزار هاووڵاتی لە پرۆژەی روناكی سوودمەندبوون، لە سەرتاسەری هەرێمیش 415 هەزار هاووڵاتی كارەبای 24 سەعاتییان بۆ دابینكراوە، كاركردنی نزیكەی 600 مۆلیدەی ئەهلیش لە 35 گەڕەك وەستێنراون.

ئەوەش لە كاتێكدایە بەشێكی زۆری هاووڵاتیانی هەرێمی كوردستان بەهۆی زۆری نرخەكەی، نیگەرانن لە جێبەجێكردنی پرۆژەی روناكی و داوا دەكەن یان پرۆژەكە رابگیرێت، یاخود نرخەكەی كەمبكرێتەوە، بەشێوەیەك لەگەڵ رەوشی دارایی هاووڵاتییان بگونجێت.

بەپێی پێشبینییەکانی کەشناسی رۆژانی یەکشەممە و دووشەممەی جەژنی رەمەزان باران بارین دەستپێدەکات و پلەکانی گەرماش نزمدەبنەوە.

بەڕێوەبەرایەتی گشتی کەشناسی هەرێم بڵاویکردەوە، سبەینێ ئاسمانى هەرێم نیمچە هەور بۆ هەوری تەواو بێت لە گەڵ هاتنى شەپۆلێکى نمە باران  لە کاتەکانى دوای نیوەڕۆدا، پلەکانی گەرماش نزمدەبنەوە.

ئاماژەی بەوەشکردووە، رۆژی دووشەممە نمە بارانى پچڕ پچڕ و هەورە بروسکە بەردەوام دەبێت بەتایبەت لە ناوچە شاخاویەکان و ناوچەکانى گەرمیان و رۆژهەڵاتى هەرێم, و لە دوای نیوەڕۆوە شەپۆلەکە کۆتایی دێت و پلەکانى گەرما (3-5) پلەى سیلیزى نزم دەبێتەوە بە بەراورد بە پلەکانى گەرمى ئەمڕۆ.

داهاتی نا نەوتی ئەم هەفتەیەی سنوری پارێزگاكانی سلێمانی و هەڵەبجە و هەردوو ئیدارەی گەرمیان و راپەڕین زیاتر لە هەشت ملیار و 727 ملیۆن دینار بووە.

ماڵپەری شەفافیەت كە چاودێری داهاتی نانەوتی پارێزگاكانی سلێمانی و هەڵەبجە و ئیدارە سەربەخۆكانی راپەڕین و گەرمیان دەكات، بڵاویكردەوە، داهاتی نانەوتی ئەم هەفتەیە لە رۆژی 22ی مانگ  تاوەكو ئەمڕۆ، زیاتر لە هەشت ملیار و 727 ملیۆن دینار بووە، رێژەی  88%ی داهاتەكە بەشێوەی نەختینە و رێژەی 12%  ش بەشێوەی چەك بووە.

ئاماژەی بەوەشكراوە، داهاتەكە بەراورد بە هەفتەی رابردوو، زیاتر لە 18 ملیار دینار كەمیكردووە كە لەو هەفتەیەدا داهاتی نانەوتی 26 ملیار دینار بووە.

ماڵپەڕی شەفافیەت هەفتانە داهاتی هەر شەش گەنجینەكەی سنوری پارێزگای سلێمانی ئاشكرا دەكات كە لە رێگەی دام و دەزگاكانی حكومەتەوە كۆدەكرێنەوە و بۆ رای گشتی ئاشكرا دەكرێت.

 

کەشناسیی هەرێم پێشبینییەکانی کەشوهەوای ئەمڕۆ و سبەینێی بڵاوکردەوە و بەپێی پێشبینییەکان، نمەباران دەبارێت.

کەشناسیی هەرێم رایگەیاند، ئەمڕۆ هەینی، ئاسمان ساماڵ و پەڵەهەور دەبێت و لە ناوچە سنورییەکانى پارێزگاى هەولێر هەندێکجار دەگۆڕێت بۆ نیمچەهەور، پلەکانی گەرماش 1 بۆ 2 پلەی سیلیزی بەرز دەبنەوە.

ئاماژەی بەوەشکردووە، سبەینێ شەممە، ئاسمان بە گشتى ساماڵ و پەڵەهەور دەبێت. لە ناوچە شاخاوییە سنورییەکانى هەردوو پارێزگاى هەولێر و دهۆک هەندێک کات دەگۆڕێت بۆ هەورى تەواو لەگەڵ کەمێک نمەباران ، پلەکانی گەرماش زیاتر بەرز دەبنەوە بە 1 بۆ 2 پلەی سیلیزی.

بەرزترین پلەکانی گەرمای پێشبینیکراو بە پلەی سیلیزی:

هەولێر : 29  پلەی سیلیزی

سلێمانی : 27 پلەی سیلیزی

دهۆک : 29  پلەی سیلیزی

کەرکوک : 30 پلەی سیلیزی 

زاخۆ  : 30 پلەی سیلیزی

هەڵەبجە : 25 پلەی سیلیزی

سۆران : 28 پلەی سیلیزی

حاجی ئۆمەران :9 پلەی سیلیزی

گەرمیان : 32 پلەی سیلیزی

لە روداوێکی هاتوچۆدا لە هەولێر کەسێک گیانی لەدەستدا و 12 کەسی دیکە بریندار بوون، کە سەرجەمیان یاریزان بوون.

روداوەکە لەدوای سەعات 3ی بەرەبەیانی ئەمڕۆ لەرێگای قەلاتگەی سەر بە شارۆچکەی سێبیران لە سنوری پارێزگای هەولێر رویداوە.

بەپێی زانیارییەکانی کوردسات نیوز، دوو ئۆتۆمبێل کە یەکێکیان لە جۆری تۆیۆتا- پیک ئەپ و ئەوەی دیکە لە جۆری مازدا بووە، هەردووکیان لە یاری تۆپی پێ بوون گەڕاونەتەوە، لە رێگادا کۆنتڕۆڵیان لەدەستداوە و وەرگەڕاون.

لە روداوەکەدا کەسێک بەناوی عەلی سەفین گیانی لەدەستداوە و 12 سەرنشینی دیکە بریندار بوون، کە برینی دووانیان سەختە.

 

کارەبای سلێمانی ئاماری قەرزی کارەبای نیشتمانی هاوبەشانی چەمچەماڵی راگەیاند و ئاماژەی بەوەکردووە، لە کۆی 53 هەزار و 237 هاوبەش، نزیکەی 41 هەزاریان قەرزارن.

کارەبای سلێمانی رایگەیاندووە، لە سنوری بەڕێوەبەرایەتییەكانی دابەشكردنی كارەبای چەمچەماڵ 53 هەزار و 237 هاوبەشی كارەبا هەن، کە هاوبەشی ماڵان، بازرگانی، پیشەسازی، کشتوکاڵی و حکومین. لە کۆی ئەو ژمارەیەش 47 هەزار و 302'یان هاوبەشانی ماڵانن.

ئەوەشی خستووەتە روو، لە ئێستادا 40 هەزار و 924 هاوبەش قەرزاری کارەبان و بەشی زۆریان رێژەی قەرزەکانیان لەنێوان 100 هەزار بۆ 500 هەزار دیناردایە.

بەپێی ئامارەکەی کارەبای سلێمانی بڵاویکردووەتەوە، هەشت هەزار و 422 هاوبەش کەمتر لە 100 هەزار دینار قەرزارن، ئەوانەشی لەنێوان 100 هەزار بۆ 500 هەزار دینار قەرزان زۆرینەن و ژمارەیان 15 هەزار و 983 هاوبەشە.

ئەوەش هاتووە، 12 هەزار و 304 هاوبەشی کارەبا قەرزەکانیان لەنێوان 100 هەزار بۆ یەک ملیۆن دیناردایە، هەروەها چوار هەزار و 122 هاوبەشیش یەک بۆ دوو ملیۆن دینار قەرزارن.

لە ئامارەکەدا، ئەوانەی قەرزەکانیان زیاترە لە دوو ملیۆن دینار 93 هاوبەشن، کە 92'یان لەنێوان دوو بۆ 10 ملیۆن قەرزارن و تەنها یەک هاوبەش سەروو 10 ملیۆن قەرزارە.

 

کەشناسیی هەرێم پیشبینییەکانی کەشوهەوای بۆ ئەمڕۆ و سبەینێ بڵاوکردەوە و ئاماژەی بەوەکردووە، ئاسمان بە گشتی پەڵەهەور بۆ نیمچەهەور دەبێت و پلەکانی گەرما بەرز دەبنەوە.

کەشناسیی هەرێم لە راگەیەنراوێکدا پێشبینییەکانی کەشوهەوای بۆ ئەمڕۆ و سبەینێ راگەیاند و ئاماژەی بەوەکردووە، ئەمڕۆ پێنجشەممە ئاسمان بە گشتى پەڵەهەور بۆ نیمچەهەور دەبێت و پلەکانی گەرما کەمێک بەرز دەبنەوە بەراورد بە تۆمارەکانی دوێنێ .

هاوکات سەبارەت بە کەشوهەوای سبەینێ رایگەیاند، ئاسمان لە نێوان پەڵەهەور بۆ نیمچەهەور دەبێت و لە ناوچە شاخاوییە بەرزەکان بۆ هەورى تەواو دەگۆڕێت، پلەکانی گەرماش بەراورد بە تۆمارەکانی ئەمڕۆ بەرزدەبنەوە .

ئەوەشی خستەڕوو، بەرزترین پلەکانی گەرمای پێشبینیکراو بە پلەی سیلیزی بەم شێوەیە دەبێت:

هەولێر: 27 پلەی سیلیزی

سلێمانی: 25 پلەی سیلیزی

دهۆک: 26 پلەی سیلیزی

کەرکوک: 28 پلەی سیلیزی

زاخۆ :27 پلەی سیلیزی

هەڵەبجە: 25 پلەی سیلیزی

سۆران: 24 پلەی سیلیزی

حاجی ئۆمەران: 16 پلەی سیلیزی

گەرمیان: 29 پلەی سیلیزی