کوردستان
لە رۆژانی ٢٠ و ٢١ی ئەم مانگە، كە بەهۆی سەرژمێرییەوە قەدەغەی هاتووچۆ رادەگەیەندرێت، بەڵام جوڵەی بازرگانی و گەشتیاری لە هەردوو دەروازەی پەروێزخان و باشماخ ئاسایی دەبێت.
راگەیاندن و پەیوەندییەكانی كۆمەڵگای دەروازەی نێودەوڵەتی پەروێزخان ئاگاداری هاووڵاتیان دەكات ڕۆژانی چوارشەممە و پێنجشەممە، جوڵەی بازرگانی و گەشتیاری لە دەروازەكەوە ئاسایی دەبێت و سەرجەم بنكەكانی ناو دەروازەكە لە ئەركدا دەبن بۆ راییكردنی مامەڵەی هاووڵاتیان.
هاوكات بەڕێوەبەرایەتی كۆمەڵگای دەروازەی نێودەوڵەتی باشماخ رایگەیاندووە، لە رۆژانی ٢٠ و ٢١ و ڕۆژانی دوایی، هاتووچۆ لە دەروازەكە ئاسایی دەبێت و سەرجەم فەرمانگەكان لە ئەركدا دەبن بۆ خزمەتی هاووڵاتیان.
بەپێی رێنماییەكانی وەزارەتی ناوخۆی هەرێم، لە سەعات ١٢ی شەوی ١٩ لەسەر ٢٠ تا سەعات ١٢ی شەوی ٢١ لەسەر ٢٢ی تشرینی دووەم قەدەغەی هاتوچۆ ڕادەگەیەندرێت و هاتنە دەرەوە و هاتوچۆی ناوشارەكان و نێوان شارەكان سنوردار دەبێت و تەنها فڕۆكەخانە و دەروازە نێودەوڵەتییەكان كراوە دەبن.
ئەندامێكی ئەنجومەنی پارێزگای كەركوك رایدەگەیەنێت، هەر بژمێرێك ناوی هەر ماڵ و كەسێك بە بیانووی جیاوازەوە تۆمارنەكات ڕاستەوخۆ سزا دەدرێت.
د. ئەحمەد كەركوكی لە بەیاننامەیەكدا دەڵێت، هەر بژمێرێك ناوی هەر ماڵ و كەسێك بە بیانووی جیاوازەوە تۆمارنەكات ڕاستەوخۆ بەبڕیاری پارێزگاری كەركوك لەكارەكەی دووردەخرێتەوە.
جەخت لەوەشدەكاتەوە، فۆنتی كوردی بۆ ئایپادی دەستی بژمێرەكان زیادكراوە لەپێناوی نووسینی ناوە كوردییەكان وەك خۆی، بەپێویستیشی دەزانێت هەموو كوردێكی ڕەسەن هەست بە بەرپرسیارێتی بكات و بگەڕێتەوە بۆ شارەكەی خۆی و ناوی خۆیان لە سەرژمێری تۆمار بكەن.
كۆمیسیۆن سەرجەم تانەكانی لەسەر ئەنجامی هەڵبژاردنی پەرلەمانی كوردستان رەتكردەوە
كۆمسیۆنی هەڵبژاردنەكان سەرجەم تانەكانی لەسەر هەڵبژاردنی پەرلەمانی كوردستان رەتكردەوە و چاوەڕواندەكرێت هەفتەی داهاتوو ئەنجامی هەڵبژاردن پەسەند بكرێت.
جومانە غەلای وتەبێژی كۆمسیۆنی باڵای سەربەخۆی هەڵبژاردنەكانی عیراق رایگەیاند، دەستەی دادوەری هەڵبژاردنەكان سەرجەم ئەو تانانەی رەتكردووەتەوە كە سەبارەت بە ئەنجامی هەڵبژاردنی پەرلەمانی كوردستان ئاراستەی كۆمسیۆن كرابوون.
پێشتر سەرچاوەیەك لە كۆمیسیۆنی هەڵبژاردنەكان بە كوردسات نیوزی راگەیاندبوو، وەڵامی سەرجەم تانەكان لەلایەن دەستەی دادوەرییەوە رەوانەی كۆمیسیۆن كراونەتەوە، دوای تەواكردنی رێوشوێنەكان و بەراوردكردنی لەگەڵ ئەنجامی هەڵبژاردن، هەفتەی داهاتوو ئەنجامی هەڵبژاردن پەسەند دەكرێت و رەوانەی سەرۆكایەتی هەرێم دەكرێت، بۆ ئەوەی رۆژی كۆبوونەوەی پەرلەمان دەستنیشانبكرێت.
بەپێی ماددەی ٣ لە پەیڕەوی ناوخۆی پەرلەمانی كوردستان، لە دوای پەسەندكردنی ئەنجامی كۆتایی هەڵبژاردن و لە ماوەی ١٠ رۆژدا لەسەر بانگهێشتی سەرۆكی هەرێم یەكەم دانیشتنی پەرلەمان بەڕێوەدەچێت.
هەڵبژاردنی خولی شەشەمی پەرلەمانی كوردستان لە ٢٠ی تشرینی یەكەمی ٢٠٢٤ بەڕێوەچوو، ٢٤ سەعات دوای ئەنجامدانی هەڵبژاردن ئەنجامی بەراییەكان راگەیەنرا، هەروەها لە ٣٠ی تشرینی یەكەم ئەنجامی كۆتایی راگەیەنرا. دواتر ٤١ تانە لە سەرجەم بازنەكان لەسەر ئەنجامی هەڵبژاردن تۆماركرا، كە ٢٥ تانەی لە سلێمانی و ١٢ لە هەولێر و ٣ لە دهۆك و تانەیەكیش لە هەڵەبجە تۆماركران.
لیژنەی باڵای دیداری یەکێتی بە سەرپەرشتی قوباد تاڵەبانی، سەرپەرشتیاری لیژنەکە ئەمڕۆ دووشەممە لە دەباشان کۆبووەوە.
کۆبوونەوەکە پاڵپشت بە پەیڕەوی ناوخۆی یەکێتی پەسندکراوی کۆنگرەی پێنجەم و راسپاردەی دواکۆبوونەوەی مەکتەبی سیاسی ئەنجامدرا.
هاوکات ئامانجی سەرەکی کۆبوونەوەکە باسکردن بوو لەبارەی ئامادەکارییەکان بۆ ئەنجامدانی دووەمین دیداری یەکێتیی نیشتمانیی کوردستان کە بڕیارە لە ساڵی داهاتوودا بەڕێوەبچێت.
لە کۆبوونەوەکەدا قوباد تاڵەبانی، ئاماژەی بەوەدا کە یەکێتی وەک حزبێکی چالاک و خاوەن پێگەیەکی گرنگ لە هەرێمی کوردستان و عێراق و ناوچەکە، هەموو کات ئامادەکاری دەکات بۆ قۆناغ و ئەگەرە جیاوازەکان، ئێستاس لەپاش ئەنجامدانی هەڵبژاردنەکانی پەرلەمانی کوردستان کە ئەگەر و گۆڕانکاریی بەڕێوەیە وەک نەریتێکی یەکیەتییانە ئامادەکاری بۆ بەڕێوەچوونی دیدارەکە دەکەن.
دیداری ئەمجارەی یەکێتی لەسەر بنەمای سیاسەتەکانی یەکێتی لەبوارە جیاجیاکاندا، بە ئامادەبوونی نوێنەرانی هەموو چین و توێژەکان ئامادەکاری بۆ قۆناغی داهاتوو دەکات، لەپێناو باشتر خۆڕێکخستنەوە و خۆگونجاندنی زیاتر لەگەڵ پێویستییەکان و خزمەتکردنی کۆمەڵانی خەڵکی کوردستان.
لە ناوچەی پیشەسازی كەلار تایەی ئۆتۆمبێل بە كرێكارێكدا تەقیەوە و بەهۆیەوە گیانیلەدەستدا.
عەلی جەمال قدووری وتەبێژی پۆلیسی گەرمیان رایگەیاند، نیوەڕۆی ئەمڕۆ شەمە لە ناوچەی پیشەسازی قەزای كەلار لە كاتی گۆڕینی تاییەی ئۆتۆمبێلێكی بارهەڵگردا بە كرێكاری دوكانەكەدا بەناوی ئالان احمد كریم لەدایكبووی ٢٠٠٣ دانیشتووی گەڕەكی كەلاری كۆن تەقیەوە و بەهۆیەوە گیانیلەدەستدا
وتیشی، لەئێستادا تەرمەكەی ڕەوانەی پزیشكی دادی قەزای كەلار كراوە و شۆفێری ئۆتۆمبێلەكە و خاوەنی دوكانەكە بە بڕیاری دادوەر و بەپێی ماددەی ٤١١ دەستبەسەركراون.
سەرچاوەیەك لە وەزارەتی دارایی عیراق رایگەیاند، ناردنی پارەی موچە لە بەغدادەوە بۆ هەرێم دەكەوێتە دوای پرۆسەی سەرژمێری گشتی دانیشتووان.
سەرچاوەیەك بە كوردسات نیوزی راگەیاند، تا ئێستا هیچ بڕیارێكیان بەدەستنەگەیشتووە بۆ رەوانەكردنی پارەی موچە بۆ هەرێم
وتیشی، رەوانەكردنی موچە بۆ هەرێم دەكەوێتە دوای پڕۆسەی سەرژمێری.
ئەمڕۆ زیاتر لە مانگێك بەسەر دابەشكردنی موچەی مانگی نۆی فەرمانبەراندا تێپەڕی و تا ئێستا وادەی دابەشكردنی موچەی مانگی ١٠ نادیارە.
نرخی بەنزین و غاز و نەوت لە هەرێمی كوردستان بەرزبووەوە، نرخی لیترێك بەنزینی نۆرماڵ گەیشتە ٩٥٠ دینار و موحەسەنیش گەیشتە هەزار و ١٥٠ دینار.
پەیامنێری كورسات نیوز رایگەیاند: نرخی بەنزین ٢٥ بۆ ٥٠ دینار بەرزبوەتەوە و نرخی بەنزینی نۆرماڵ لە ٩٢٥ دینارەوە بووەتە ٩٥٠ و بەنزینی موحەسەن بووەتە ١١٥٠ هەزار دینار.
پەیامنێری كوردسات وتیشی نرخی یەك لیتر غاز لە ٤٥٠ دینارە بووە بە ٥٠٠ دینار و نرخی یەك لیتر نەوتیش لە ٧٠٠ دینارەوە بوەتە ٧٢٠ دینار.
بەرزبونەوەی بەهای سوتەمەنییەكان لە كاتێكدایە وەزارەتی سامانە سروشتییەکان لە ١٠ـی مانگی نۆی ئەمساڵ رایگەیاند نرخی بەنزین لە هەرێمی كوردستان دادەبەزێت.
دژی دانانی قەیوم خۆپیشاندان و ناڕەزایەتیی لە باكووری كوردستان بەردەوامە و هاوسەرۆكی دەمپارتیش دەڵێت، ئەگەر دەسەڵات راستگۆیە بۆ پڕۆسەی ئاشتیی لە توركیا با دەرگای زیندانی ئیمراڵی بكاتەوە.
تولای حاتەم ئۆغۆلاری هاوسەرۆكی گشتی پارتی یەكسانی و دیموكراسیی گەلان "دەم پارتی" لە گردبوونەوەی و ناڕەزایەتیی دیموكراسی و ئازادی لە ئێلح رایگەیاند، ئەگەر دەسەڵات لە توركیا پێداگرە لەسەر پڕۆسەی چارەسەریی پێویستە دەرگای ئیمرالی بكاتەوە بۆ ئەوەی عەبدوڵا ئۆجالان پەیامی ئاشتیی رابگەیەنێت.
وتیشی، كورد ٤٠ ساڵە بۆ ئاشتی و برایەتی و دیموكراسی تێدەكۆشێت، لە بەرامبەردا دەسەڵات لە توركیا ویستی كورد سەركوت بكات بەڵام لەوەشدا سەركەوتو نەبوون.
هاوسەرۆكی دەمپارتی باسی لەوەشكرد، بە دانانی قەیوم لە باكووری كوردستان و توركیا دەستبەسەر مافی دەنگدان و هەڵبژاردنەكاندا گیراوە، ئەوەش دەبێتە هۆكارێك بۆ دروستبوونی فاشییم بۆیە پێویستە ناڕەزایەتییەكان دژی قەیوم و فاشیزم بەردەوام بێت.
بە مەبەستی رێگریكردن لە كۆچبەران، بەریتانیا بە نیازە پارە بداتە هەرێمی كوردستان و توركیا و ڤێتنام.
رۆژنامەی تایمزی بەریتانی بڵاویكردەوە، حكومەتی بەریتانیا دانوستانی لەگەڵ توركیا و ڤێتنام و بەرپرسانی هەرێمی كوردستانی عیراق دەستپێكردووە، بۆ پێدانی پارە پێیان بە ئامانجی كەمكردنەوەی رۆیشتنی كۆچبەران بەرەو بەریتانیا.
ئاماژە بەوەشكراوە، ئیڤێت كوپەر، وەزیری ناوخۆی بەریتانیا لە گفتوگۆدایە لەگەڵ ژمارەیەك حكومەت، لەنێویاندا حكومەتی كوردستان و توركیا و ڤێتنام، سەبارەت بە هاوكاری و رێككەوتنی ئەمنی، كە دەكرێت پێش كۆتایی ئەمساڵ كۆتایی پێبهێنرێت.
لای خۆیەوە، كەیر ستارمەر سەرۆك وەزیرانی بەریتانیا لە كاتی رۆیشتنی بۆ بەشداریكردن لە لوتكەی ٢٠ لە بەرازیل بە رۆژنامەنووسانی راگەیاند، كارێكی دروستە بۆ بەریتانیا كە خەڵك لە جێهێشتنی وڵاتەكانیان پەشیمان بكاتەوە چونكە هەندێك جار بۆ پەڕینەوەیان لە كەناڵی ئینگلیز ژیانی خۆیان دەكەنە مەترسیەوە.
وتیشی، حكومەت پلانی هەیە بۆ رووبەڕووبوونەوەی ئەو باندە تاوانكاریانەی كە بەشدارن لە قاچاخچێتی بە خەڵك.
هەپەگە رایگەیاند، لە زاپ و مەتینا دوو سەربازی توركیا كوژراون، وەزارەتی بەرگری توركیاش دەڵێت، هەشت گەریلای پەكەكەی لە باكوری سووریا و عیراق گیانیان لەدەستداوە.
ناوەندی ڕاگەیاندن و چاپەمەنیی هێزەكانی پاراستنی گەل- هەپەگە رایگەیاند، گەریلاكانی یەژاستار و هەپەگە لە ڕۆژانی ١٥ و ١٦ ی ئەم مانگە پێنج چالاكییان لە دژی سوپای توركیا لە سنوری ئامێدی و رۆژئاوای زاپ و مەتینا ئەنجامداوە، لە ئەنجامدا دوو سەربازی سوپای توركیا كوژراون، كە یەكێكیان فەرماندەیەكی سەربازییە، هەروەها هێلیكۆپتەرێك و حەفارەیەك تێكشكێنراون.
هاوكات وەزارەتی بەرگریی توركیا رایگەیاند، لە ناوچەكانی لقی زەیتون و كانی ئاشتی لە باكوری سووریا چوار گەریلای پەكەكە و یەپەگە، گیانیان لە دەستداوە، لە ناوچەی چنگ-قفڵیش چوار گەریلای دیكە گیانیان لە دەستداوە.
بەپێی پێشبینییەكان سبەی شەو شەپۆلێكی باران بارین روو لە ناوچە جیاجیاكانی هەرێمی كوردستان دەكات و لە سنوری دهۆكیش بەفر دەبارێت.
بەشی پێشبینی لە بەڕێوەبەرایەتیی گشتیی كەشناسیی و بوومەلەرزەزانی سەر بە وەزارەتی گواستنەوە و گەیاندنی هەرێم بڵاویكردەوە، سبەینێ دووشەممە، ئاسمان نیمچە هەور دەبێت پاشان لەكاتەكانی دوای نیوەرۆ دەگۆڕێت بۆ هەوری تەواو وە لەگەڵ بارانبارین لەكاتەكانی شەودا.
راشیگەیاندوە، لە سنوری پارێزگای دهۆك ئەگەری بەفربارین هەیە لەهەندێك لە ناوچە شاخاوییەكان.
لیژنەی باڵای ئەمنی تایبەت بە سەرژمێریی گشتی دانیشتووان لە هەرێمی كوردستان دەڵێت لە رۆژانی قەدەغەی هاتوچۆدا پێویستە هاوڵاتییان لەماڵەكانیان بمێننەوە، نانەواخانە و سۆپەرماركێتەكانیش بە سنورداری رێگە بە كردنەوەیان دەدرێت.
لیژنەی باڵای ئەمنی تایبەت بە سەرژمێری چەند بڕیارێكی لەبارەی پرۆسەی سەرژمێری دەركرد و داوا لە هاووڵاتیان دەكات، بە راستی و دروستی داتاكانی خۆیان لە پرۆسەی سەرژمێری تۆمار بكەن، سەبارەت بە هاووڵاتیانی ناوچە كوردستانییەكانیش كە بە ناوچەكانی ماددەی ١٤٠ ناسراون، دەڵێت ئەوانەی دەتوانن شوێنی مانەوە دابین بكەن، لپێویستە بگەڕێنەوە زێدی خۆیان بۆ ئەوەی لە ڕۆژانی ١٧ تاوەكو ١٩ی تشرینی دووەم تۆمار بكرێن و لە ڕۆژانی ٢٠-٢١ی مانگیشدا داتاكانیان پشت ڕاستبكرێتەوە، لەو ناوچانە كە زێدی خۆیانە تۆمار بكرێن.
لیژنەكە دەشڵێت، هەر هاووڵاتییەك بەهەر هۆكارێك لە ئێستادا لە هەرێم نییە، پێویستە خانەوادەكەی بەڵگەنامەكانی پێشكەش بە بژمێرەكان بكەن.
لە بەشێكی تری راگەیەنراوەكەدا هاتووە، لە رۆژانی ٢٠ و ٢١ی مانگ قەدەغەی هاتوچۆی گشتی رادەگەیەنرێت، تەنیا تیمەكانی پۆلیس و ئاسایش و هاتوچۆ و بەرگری شارستانی و تیمەكانی تەندروستی و راگەیاندن و نانەواخانە و سۆپەرماركێتەكان بە سنورداری كراوە دەبن، فرۆكەخانە و دەروازەنێودەوڵەتییەكانیش بۆ گەشتیاری و جوڵەی بازرگانی كراوەدەبن.
جێگری پارێزگاری سلێمانی بەرەسمی داوا لە بانكی ناوەندی دەكات موچەی مووچەخۆرانی سنووری پارێزگای سلێمانی بە بانكی بكات، بەپێی بڕیارەكەی دادگای فیدراڵی.
شاهۆ عوسمان جێگری پارێزگاری سلێمانی لە نوسراوێكدا چواری ئەم مانگە ئاڕاستەی بانكی ناوەندی كردووە، داوای لە بانكی ناوەندی كردووە بڕیارەكەی دادگای فیدراڵ تایبەت بە بانكیكردنی مووچەی مووچەخۆرانی هەرێم جێبەجێبكات و مووچەی مووچەخۆرانی سنووری سلێمانی بە بانكی بكات.
هەروەها، لە نووسراوەكەدا جێگری پارێزگاری سلێمانی داوای لە بانكی ناوەندی كردووە، بانكە فیدراڵییە پەیوەندیدارەكان راسپێردرێت رێوشوێنەكانیان دەستپێبكەن بۆ بە بانكیكردنی مووچەی موچەخۆرانی سلێمانی.
شۆڕش ئیسماعیل وەزیری پێشمەرگە رایگەیاند، بەرەبەیانی ئەمڕۆ لە ناوچەی دووزخورماتوو لە کاتی کێوماڵکردنی مۆڵگەکانی تیرۆریستاندا، بۆمبێکی چێنراو بە ئۆتۆمبێلێکی سەربازی فەوجی ٣ی لیوای ١ی هاوبەشی نێوان وەزارەتی پێشمەرگە و سووپای عیراقدا تەقییەوە. کە بەداخەوە عقید روکن سامان سابر سلێمان، فەرماندەیی فەوجی سێ و عقید ئەندازیار محمد رەزا کریم ئەفسەری ئەندازەی فیرقەی ٩ی سووپای عێراق و ن.ڤ شریف احمد محمد، لەو رووداوە تیرۆریستیەدا شەهیدبوون.
وتیشی، پرسە و سەرەخۆشی خۆمان ئاڕاستەی خانەوادەی سەربەرزیان و هاوڕێ و هاوسەنگەرانیان دەکەین. لە پەروەردگاری میهرەبان داواکارین، گیانیان بە میهرەبانی و بەزەیی خۆیی شادبکات و سەبووری و دڵئارامیش ببەخشێت بە خانەوادە و هاوسەنگەران و ئێمە و هەموو کوردستانیان. هەروەها هیوایی زوو چاکبوونەوە و تەندروست باشی بۆ بریندارانیش دەخوازین.
راشیگەیاند، خەڵکی کوردستان دڵنیا دەکەنەوە هێزی پێشمه‌رگه له‌ئاماده‌باشی تەواودایە بۆ پاراستنی خەڵک و خاکی کوردستان و لەناوبردنی تیرۆر و تیرۆریستان.
ئاماژەی بەوەشکرد، جمجوڵ و مەترسییەکانی گرووپی تیرۆریستی داعش و تاریکپەرستان هێشتا کۆتایی نەهاتووە، بە تایبەت لەو ناوچانەی کە بۆشایی ئەمنین لە نێوان هێزی پێشمەرگە و سووپای عیراقدا.
وتیشی، هێزی پێشمەرگەی کوردستان گیانفیدایانە ساز و ئامادەیە بۆ تێکشکاندنی تیرۆریستان و، لە کێوماڵکردنی ئەو ناوچانە بە هاوکاری سووپای عیراق بەردەوام دەبێت.
عیماد ئەحمەد ئەندامی مەکتەبی سیاسی رایگەیاند، پرۆسەی سەرژمێری گشتی لەعێراق پرۆسەیەكی گرنگ و چارەنوسسازە بۆ گەلەکەمان تایبەت بۆ كەركوك و ناوچە جێناكۆكەكان، چونكە پرۆسەكە هەنگاوێكە بۆ دیاریكردنی شوناسی كوردستانیبوونی كەركوك و ناوچە دابڕێندراوەكان، بۆیە پێویستە هەموومان وەك ئەركێكی نیشتمانی و پیرۆز بەشداری لەم پرۆسەیەدا بكەین
راشیگەیاند، ئەركە لەسەر هەموو خێزانێك و تاك بەتاكی كەركوكییەكان و خەڵكی ناوچە دابڕێندراوەكان كە ئاوارەی هەرشارێكن بگەڕێنەوە زێدی خۆیان، بۆ ئەوەی كوردستانیبوونی كەركوك و ناوچەدابڕێندراوەكان بسەلمێنین.
ئاماژەی بەوەشکرد، كوردستانیبوونی كەركوك بەندە بە گەڕانەوەی تۆی كەركوكی و دانیشتوانی ناوچە دابڕێندراوەكانی تر، ئەمەش ئەركێكی پیرۆزی نەتەوەی و نشتیمانییە و ئایندەی میللەتەكەمان دیاری دەكات.
وتیشی، وەك مام دەڵێت كەركوك قودسی كوردستانە و تا كوردێك مابێت و دەست لەكەركوك و ناوچەی كەركوك هەڵناگرێت
بافڵ جەلال تاڵەبانی، سەرۆکی یەکێتیی نیشتمانیی کوردستان پەیامێكی هاوخەمی ئاڕاستەی خانەوادەی ئەو پێشمەرگانەی کە لە سنوری خورماتوو شەهیدبوون کرد و رایگەیاند، دڵنیاییان دەدەینێ تۆڵەی ئەم شەهیدانە لە ئەستۆی ئێمەیە و ناهێڵین خوێنی رژاوی رۆڵەکانمان بەهەدەر بڕوات.
دەقی پەیامەکەی سەرۆک بافڵ...
شەهیدبوونی فەرماندە عەقید روکن سامان سابیر لە هێزەکانی پێشمەرگە و عەقید محەمەد رەزا و قارەمان شەریف سەرباز لە هێزەکانی سوپای عیراق لەکاتی ئۆپراسیۆنێکی سەربازیی هاوبەشدا بۆ پاراستنی ئاسایش و سەقامگیریی کوردستان کۆستێکی گەورەیە و لەدڵەوە نیگەرانیکردین.
بۆ ئەم خەمە گەورەیە پرسە و هاوخەمیی قووڵی خۆمان ئاڕاستەی کەسوکار و بنەماڵە سەربەرزەکانیان، هاوڕێ و هاوسەنگەرانیان دەکەم و هاوبەشی ئەم ماتەمە گەورەیەم. دڵنیاییان دەدەینێ تۆڵەی ئەم شەهیدانە لە ئەستۆی ئێمەیە و ناهێڵین خوێنی رژاوی رۆڵەکانمان بەهەدەر بڕوات. هەروەها هیوای زوو چاکبوونەوەش بۆ بریندارەکان دەخوازم و هیوادارم بەزووترین کات بە سەلامەتی بگەڕێنەوە ناو کەسوکارەکانیان.
خوای گەورە شەهیدەکانمان بە بەهەشتی بەرین شادبکات و سەبووری و ئارامی بەهەموولایەک ببەخشێت.
دڵسۆزتان
بافڵ جەلال تاڵەبانی