کوردستان
بەڕێوەبەرایەتی گشتیی حەج و عومرەی هەرێم رایگەیاند، عومرەکارێکی کورد لە مەککە کۆچی دوایی کرد، کە ئەمە چوارەم عومرەکاری کوردە لە مانگی رەمەزاندا گیان لەدەست بدات.
بەڕێوەبەرایەتی گشتیی حەج و عومرەی هەرێم رایگەیاند، دوێنی سێشەممە، هاووڵاتی 'ئازاد رەحیم کریم باجەلان' دانیشتووی ئیدارەی سەربەخۆی گەرمیان، دوای بەجێگەیاندنی سونەتی عومڕە دوێنی شەو لە شاری مەککە کۆچی دوایی کرد.
ئاماژەی بەوەشکردووە، ئەم عومرەکارە تەمەنی ٤٨ ساڵە و پێشتر هیچ نەخۆشییەکی نەبووە، بە ئۆتۆمبیلی خۆی گەشتی عومرەی کردووە، بەڵام بە شێوەیەکی کتوپڕ لە شاری مەککە کۆچی دوایی کردووە، هەر لە شاری مەککەش بە خاک سپێردراوە.
ئەوەشی خستووەتە روو، ئەمە دەیەم عومرەکاری کوردستانە، کە لە سەرەتای ئەمساڵەوە لە مەککە گیانیان لەدەستدابێت.
کارەبای سلێمانی نرخی کارەبای موەلیدەی سیتییەکانی بۆ مانگی رابردوو بڵاوکردەوە و بەپێی راگەیەنراوەکە، هەر کیلۆواتێک بە 268 دینار دیاری کراوە.
کارەبای سلێمانی رایگەیاند، ئەمڕۆ چوارشەممە، لیژنەی باڵای دیاریکردنی نرخی کارەباى کۆمەڵگاکانى نیشتەجێبوون (ستییەکان) کۆبوونەوەیەکی ئەنجام دا و تیایدا، نرخی هەرکیلۆواتێکی کارەبای موەلیدەی بە 268 دینار دیاری کرد.
ئاماژەی بەوەشکردووە، هاوكات بۆ ئەو ستییانەش كە تاكە سەرچاوەی كارەبایان موەلیدەیە و كارەبای نشتمانیان نییە نرخی كیلۆواتێک بە 240 دینارە.
داواش دەکات، سەرجەم ستیيەکانی سنوری پارێزگای سلێمانی پابەند بن بە نرخەکەوە، بەپێچەوانەوە ئەگەر زیاتر لەو نرخە وەربگرن رووبەڕووی رێکاری یاسایی دەکرێنەوە.
کەشناسیی هەرێم پێشبینییەکانی کەشوهەوای ئەمڕۆ و سبەی بڵاوکردەوە و باسی لەوەکردووە، پلەکانی گەرما لە بەرزبوونەوە بەردەوام دەبن.
کەشناسیی هەرێم رایگەیاند، ئەمڕۆ چوارشەممە، ئاسمان بەگشـتى نیمچەهەور دەبێت و پلەکانی گەرما 1 بۆ 3 پلەی سیلیزی بەرز دەبنەوە.
ئاماژەی بەوەشکردووە، سبەینێ پێنجشەممە، ئاسمان لە نێوان نیمچەهەور بۆ هەورى تەواودا دەبێت و پلەکانی گەرما 1 بۆ 2 پلەی دیکە بەرز دەبنەوە.
بەرزترین پلەکانی گەرمای پێشبینیکراو بە پلەی سیلیزی:
هەولێر: 27 پلەی سیلیزی
سلێمانی: 24 پلەی سیلیزی
دهۆک: 25 پلەی سیلیزی
کەرکوک: 28 پلەی سیلیزی
زاخۆ: 26 پلەی سیلیزی
هەڵەبجە: 25 پلەی سیلیزی
سۆران: 24 پلەی سیلیزی
حاجی ئۆمەران: 17 پلەی سیلیزی
گەرمیان: 30 پلەی سیلیزی
بافڵ جەلال تاڵەبانی سەرۆكی یەكێتیی نیشتیمانیی كوردستان بە سەردانێك گەیشتە كەركوك و پاڵپشتی خۆی بۆ خەڵك و ئیدارەی شارەكە دوپاتكردەوە، جەختی لەوەش كردەوە، هیچ كات كەركوك جێناهێڵن.
سەرۆک بافڵ جەلال تاڵەبانی رایگەیاند: کەرکوک دەکەین بە پاکترین، جوانترین، ئارامترین شار لە هەموو عیراق
سەرۆک بافڵ وتیشی: پارێزگارێکمان بۆ ئێوە ناردووە کە خزمەتی هەموو پێکهاتەکان بکات
ئاماژەی بۆئەوەشکرد: دەبێت کەرکوک ببێتە نمونەی شاری پێکەوە ژیان .
دانیشتنی ئەنجومەنی نوێنەرانی عیراق بەهۆی تەواونەبوونی رێژەی یاسایی دواخرا و دەنگدان لەسەر بە پارێزگابوونی هەڵەبجە خرایە سبەینێ
ئیمان ئامێدی ئەندامی ئەنجومەنی نوێنەرانی عیراق بە کوردسات نیوزی راگەیاند: بەهۆی تەواونەبوونی رێژەی یاسای دانیشتنی پەرلەمان دواخرا بۆ سبەینێ بەهەمان کاری دانیشتنەوە، ئاماژەی بەوەشکرد، دەنگدان لەسەر بەپارێزگابوونی هەڵەبجە کە بڕگەی یەکەمی دانیشتنەکەیە کەوتوەتە سبەینێ.
وتیشی: خەڵکی هەڵەبجە شەهید قوربانی زۆریان داوە بۆیە پێوسیتە هەڵەبجە بکرێتە پارێزگا و خزمەتی ئەو شارە بکرێت.
دوای زیاتر لە 12 ساڵ چاوەڕوانی هەڵەبجەییەكان بریاربوو ئەمشەو دەنگدان لەسەر بەپارێزگابوونی و هەڵەبجە بدرێت، بەڵام بەهۆی تەواونەبوونی رێژەی یاسای دانیشتنەکە دواخرا.
سەندیکای دەرمانسازانی کوردستان، بڕیاریدا بە راگرتنی " د.کۆچەر ئیسماعیل " بۆ ماوەی سێ مانگ لە پیشەی دەرمانسازی بە تۆمەتی فێڵکردن لە هاووڵاتیان.
سەندیکای دەرمانسازانی کوردستان لە راگەیەنراوێکردا بڵاویکردەوە، دوا بەدوای نوسراوی لقی سەندیکای دەرمانسانی لقی هەولێر، سەبارەت بە کۆمەڵێک دەرمانخانە کە دەرمانیان بەسەر هاوولاتیان ساغکردوەتەوە، سەندیکا بڕیاریدا بۆ ماوەی سێ مانگ د.کۆچەر ئیسماعیل خاوەنی ئەو دەرمانخانانە، لە پیشەی دەرمانسازی رابگرێت.
ئاماژەی بەوەشکردووە، بڕیاردراوە تاوتوێی لێسەندنەوەی ناسنامەی سەندیکای دەرمانسازی لە ناوبراو کراوە، بەهۆی پێشێلکردنی چەند بڕگەیەکی یاسایی.
دوای ئەوەی نامەیەکی دەنگی د.کۆچەر ئیسماعیل خاوەنی کۆمەڵێک دەرمانخانە لە هەولێر بڵاوبوەوە و تێیدا بە کارمەندەکانی دەوت "دەرمان و کەرەستەی پزیشکی بەسەر هاووڵاتیان ساغبکەنەوە"، سەندیکای دەرمانسازان بۆ ماوەی سێ مانگ خاوەنەکەی سڕکرد.
بەڕێوەبەرایەتی هاتووچۆی زاخۆ رایگەیاند، لە 15ی نیسانی داهاتووەوە كامێراكانی تیژڕەوی خاڵ بۆ خاڵ لەسەر رێگای سەرەكی دهۆك - زاخۆ دەخرێنەكار.
بەڕێوەبەرایەتی هاتوچۆی ئیدارەی سەربەخۆی زاخۆ لە راگەیەنراوێكدا بڵاویكردەوە، لە 15ی نیسانی داهاتووەوە كامێراكانی تۆماركردنی سەرپێچی تیژڕەویی خاڵ بۆ خاڵ لەسەر شەقامی سەرەكیی دهۆك بۆ زاخۆ و تونێلی گەلی زاخۆ بۆ فلكەی سحێلا دەكەونە كار.
ئاماژە بەوەشكراوە، خێرایی رێگەپێدراو بۆ ئۆتۆمبێلی تایبەت 100 كیلۆمەتر لە سەعاتێكدا و خێرایی بارهەڵگریش 80 كیلۆمەتر لە سەعاتێكدا لەسەر ئەو رێگایە دیاریی كراوە.
هاتوچۆی زاخۆ داوا لە شۆفێران دەكات بۆ پاراستنی ژیانیان پابەندی رێنماییەكانی هاتووچۆ بن.
وەزارەتی پێشمەرگە لە راگەیەنراوێکدا وەڵامی ئەو قسانەی وەستا رەسوڵ دەداتەوە کە لە بەرنامەی پرسی رۆژ لە کوردسات نیوز کردویەتی و رەتیدەکاتەوە.
دەقی راگەیەنراوەکەی وەزارەتی پێشمەرگە.....
لە چەند رۆژی ڕابردوودا لە بەرنامەیەکی تەلەفیزیۆنیدا لە کەناڵی کوردسات بەرێز وەستا رەسوڵ، چەند لێدوانێکی بێ بنەما و ناڕاستی بڵاوکردۆتەوە ئێمە لەم راگەێیندراوەدا بە پێویستی دەزانین راستیەکان روون بکەینەوە بۆ ڕای گشتی و هێزی پێشمەرگەی کوردستان
تەنها لە پێناو دەرخستنی بەرێوەچوونی کاروبارەکانی وەزارەتی پێشمەرگە وەڵامی ئەوچەواشەکارییە دەدەینەوە.
١- دەربارەی پلەبەرزکردنەوەی ئەفسەرانی فەرماندەیی هێزەکانی حەفتا، وەزارەتی پێشمەرگە بە یەک لیست ساڵانە لە مانگی ئادار و ئەیلولدا سەرجەم خشتەکانی پلەبەرزکردنەوە ئامادەدەکات و ئاڕاستەی ئەنجومەنی وەزیرانی دەکات.(ساڵانی پێشوو پلەبەرزکردنەوەی ئەفسەران بۆ ماوەی چەند ساڵ ڕاگیرابوو و ئەفسەرانی هێزی پێشمەرگە بێبەشبوون لە مافی پلەبەرزکردنەوەیان) بە هەوڵی تیمی باڵای وەزارەت توانراوە کاری جددی لەسەر خشتەکانی پلەبەرزکردنەوەی ئەفسەران بکرێت بە کۆی گشتیی لە ساڵی ٢٠١٩وە تا ئەمڕۆ زیاتر لە ٢٠ خشتەی پلەبەرزکردنەوەی ئەفسەران کە لەوەو پێش کەڵەکەببون و نەکرابوون لە وەزارەت، توانراوە پلەکانیان بەرزبکرێتەوە و پلەیی شایستەی خۆیان وەربگرن. لە ئێستاشدا چەند خشتەیەکی پلەبەرزکردنەوەی ئەفسەران ڕەوانەی ئەنجومەنی وەزیران کراوەو کارەکانیان تەواوبووە چاوەروانین بەم نزیکانە بگەرێنەوە وەزارەتی پێشمەرگە. بەم هەنگاوە بەردەوامانە توانیومانە دۆخی پلەبەرزکردنەوەی ئەفسەران لە وەزارەتی پێشمەرگە بخەینەوە سەر راستەڕێی یاسایی و ئاسایی خۆی.
لە وەزارەتی پێشمەرگە بۆ پلەبەرزکردنەوەی ئەفسەران کۆمەڵێک بنەما و مەرج و ڕێنمایمان داناوە کە لەو چوارچێوەیەدا ئەفسەران پلەیان بەرزدەبێتەوە وەکو تر هیچ ئەفسەرێک لە دەرەوەی رێنمایی و مەرجە یاساییەکان و بەبێ پایە، شایستەی پلەبەرزکردنەوەی جێبەجێ ناکرێت. بەمەش کۆتایی بە پلەبەرزکردنەوەی بەلێشاو و نایاسایی و ناسەربازیی هاتووە لە وەزارەتی پێشمەرگەدا.
٢- دەربارەی ڕاگرتنی نوسراوەکانی هێزەکانی حەفتا لە ناو بەشە کارگێرییەکانی وەزارەتی پێشمەرگە، رایدەگەیەنین ئەم بابەتە دوورە لە ڕاستی نوسراوەکانی هێزەکانی حەفتا کاری یاسایی خۆیی لەسەردەکرێت هەر نوسراوێکیان هەبێت لە چوارچێوەی یاسا و رێنماییەکاندا جێبەجێ دەکرێت و کراوە.
٣- دەربارەی جیاوازی لە پێدانی ئازووقە بۆ فیرقەی یەک و دوو لێرەوە رایدەگەیەنین؛ هیچ جیاکاریەکی بنەڕەتی لە وەزارەتی پێشمەرگە بوونی نیە، هێزی پێشمەرگەی کوردستان لە سەرجەم ماف و شایستەکانیان یەکسانن و بەبێ هیچ جیاوازییەک ئەوەی لەبەردەستی وەزارەتی پێشمەرگەدا بێت بەسەر هەموو یەکە سەربازییەکانی وەزارەتی پێشمەرگەدا دابەشکراوە.
٤- بەرێز وەزیری پێشمەرگە، پارێزەری ماف و شایستەکانی هێزی پێشمەرگەی کوردستانەو جێبەجێکارێکی سەرسەختی پرۆسەی چاکسازی و یەکخستنەوە و رێکخستنەوەی هێزی پێشمەرگەی کوردستانە لە چوارچێوەی وەزارەتی پێشمەرگەدا، لەگەڵ دەستبەکاربوونی هەتاکو ئەمڕۆ بەردەوام سەرپەرشتی پرۆسەی چاکسازی و هەنگاوەکانی یەکخستنەوەی پێشمەرگە دەکات، پێداگرە و ویستی جددیی و ئیرادەیەکی نیشتیمانی بەهێزی هەیە بۆ سەرخستنی پرۆسەی چاکسازی و دامەزراندنی ژێرخانی سەربازی هێزی پێشمەرگەی کوردستان و بنیاتنانی ناوچەکانی سەرکردایەتی و فیرقەکان لە چوارچێوەی وەزارەتی پێشمەرگەدا. بە چادێری و بەدواداچوونی بەردەوامی بەرێز وەزیری پێشمەرگە توانراوە پرۆسەی چاکسازی قۆناغی زۆرباش ببڕێت و ببێت بە بنەما و بەرنامەی کارکردن لە وەزارەتی پێشمەرگە و یەکخستنەوە و رێکخستنەوەی هێزی پێشمەرگە ببێتە واقع و دەرئەنجامی زۆرباش بەدەست بهێنرێت.
ئێستا وەزارەتی پێشمەرگە لە قۆناغێکی بەهێز و سەرکەوتوودایە وەک یەک تیمی پێکەوەیی کاردەکەین بۆ گەیشتن بە ئامانجە باڵاکانی هێزی پێشمەرگەی کوردستان و بنیاتنانی سوپایەکی یەکگرتووی کوردستانی. پێویستیشمان بە پشتیوانی و پاڵپشتیهەمووان هەیەو دەبێت هاوکارمان بن لەو ئەرکە سەختەی پێمان سپێردراوە نەک سەنگەری دژایەتیمان لێ بگرن. دەبوو بەرێز وەستا رەسوڵ، بە ویژدان و روحیەتێکی بەرپرسانە باسی لە بەرەوپێشووچوونەکانی وەزارەتی پێشمەرگە و ئەو دەستکەوتانە بکردایە نەک لە کەناڵێکی ڕاگەیاندن دژی وەزارەتی پێشمەرگە و ئەو دەستکەوتانە کە بۆ هێزی پێشمەرگەی کوردستان بەدەست هاتوون قسەبکەن.
دڵنیاین خەڵكی نیشتمانپەروەری کوردستان و هێزی پێشمەرگەی کوردستان زۆر لەوە هۆشیارتر و بەرچاوروونترن کە بروا بەو چەواشکارییە نابەرپرسانەیە بکەن کە بەمەست بڵاودەکرێنەوە.
نوسینگەی رۆژنامەوانی وەزیری پێشمەرگە
٢٥ـی ئاداری ٢٠٢٥
ئەمڕۆ باڵیۆزی ژاپۆن و وەزیری دەرەوەی عیراق رێکەوتننامەیەکیان واژۆ کرد بۆ تەرخانکردنی 700هەزار دۆلار (نزیکەی ملیارێک دینار) بۆ پڕۆژەی مۆزەخانەی سلێمانی.
د. بڕیار رەشید، ئەندامی ئەنجومەنی نوێنەرانی عیراق، لایخۆیەوە بڵاویکردەوە؛ ئەمڕۆ یەکێک لە هەوڵەکانمان کە لەسەرەتای دەستپێکی خولی پەرلەمانیمان هەوڵمان بۆدا، گەیشتە ئەنجام .
لای خۆشیەوە، باڵیۆزخانەی ژاپۆن لە عیراق بڵاویکردەوە؛ باڵیۆزی ژاپۆن، ئیندۆ و فوئاد حسێن، وەزیری دەرەوەی عیراق، ئیمزا و یاداشتیان ئاڵوگۆڕ کرد سەبارەت بە پڕۆژەی باشترکردن و پاراستن و نۆژەنکردنەوەی مۆزەخانەی سلێمانی.
د. لەتیف رەشید سەرۆک کۆماری عیراق سەردانی مەکتەبی راگەیاندن و هۆشیاری یەکێتیی نیشتمانیی کوردستانی و بنکەی ژینی کرد.
لە دیدارەکەدا گفتوگۆ لەسەر گۆڕانکاری و پێشهاتەکان کراو تەئکید لەسەر گرنگی بەردەوام دیالۆکی نیشتمانیی لە نێوان لایەنەکان کرایەوە بۆ چارەسەرکردنی کێشەکان و پاراستنی سەقامگیریی سیاسی لە وڵاتدا .
د . لەتیف جەمال رەشید سەرۆک کۆماری عیراق، وێڕای ئەوەی سوپاس و پێزانینی دەربڕی بۆ میدیای یەکێتی و راگەیاندنکارانی یەکێتی کە پیشەییانە لەگەڵ روداوەکاندا بون، رایگەیان: دۆخەکە وادەخوازێت میدیا بەرپرسیارانە لەگەڵ گۆڕانکارییەکاندا مامەڵە بکەن و هاوکاربن بۆ سەرخستنی پرۆژەی چاکسازی و زیاتر خزمەتکردنی خەڵک و وڵاتەکەمان.
لەبەرانبەردا عیماد ئەحمەد سوپاسی سەرۆک کۆماری کرد کە پەرۆشانە لە خەمی چارەسەرکردنی کێشەکان و لێکنزیکردنەوەی لایەنەکان و پاراستنی مافی هەموولایەک بووە و رونیکردەوە، میدیای یەکێتی وەک هەمیشە هاوکارو پشتیوان دەبێت بۆ سەرخستنی هەوڵە نیشتمانییەکان و گەیشتن بە ئامانجە باڵاکان بە ویستی خەڵک و زیاترخزمەتکردنییان .
هەر لەو دیدارەدا عیماد ئەحمەد دووپاتی لە سیاسەتی هاوسەنگی یەکێتی بۆ کۆی هاوکێشەکان کردەوە و رایگەیاند: پابەند بە بڕیاری سەرۆکایەتی و سەرکردایەتی، بە ستراتیژێکی نیشتمانیی هەنگاوە سیاسییەکان دەنێین و بۆ هەموو پرسەکان هاوبەشێتی و شەراکەتی حەقیی دەکەینە بنەماو هەنگاوەکانیشمان لە خزمەتی گشتی و بەهێزکردنی قەوارەی هەرێم دەبێت .
وەزارەتی دارایی و ئابووری هەرێمی کوردستان رایگەیاند کە رێکارەکانی ناردنی تەموویلی موچەی مانگی ئازار بۆ موچەخۆران، فەرمانبەران و خانەنشینان تەواو کراوە و سبەینێ پارەکە رەوانەی هەرێم دەکرێت.
بڕی گشتیی موچەکان 945 ملیار و 880 ملیۆن و 467هەزار و779 دینار دەبێت. بەپێی زانیارییەکانی وەزارەتی دارایی، بڕیار وایە سبەی پارەکە بخرێتە سەر هەژماری بانکی وەزارەتی دارایی و ئابووری هەرێمی کوردستان لە لقی هەولێری بانکی ناوەندی عێراق.
وەزارەتی دارایی و ئابووری هەرێمی کوردستان جەخت دەکاتەوە کە هەموو هەوڵەکان بۆ ئاسانکاریی پڕۆسەی دارایی و مووچەکان بەردەوامن.
بەڕێوەبەرایەتی ئاوی کۆیە رایگەیاند؛ بەهۆی تێكەڵ بوونی مادەی زیان بەخش بەئاوی زێیی بچوك، سەرجەم پڕۆژەكانی بەرهەمهێنان و دابین كردنی ئاو لەو سنورە وەستێنران.
زێی بچووك کە سەرچاوەی دابین كردنی ئاوە بۆ سەنتەری قەزای كۆیە و تەق تەق و ناحیەی ئاشتی و بەشێك لە گوندەكان، بەهۆی تێکەڵبوونی چەند مادەیەکەوە پیسبووە.
ئاسۆ مستەفا قائیمقامی تەقتەق بە کوردسات نیوزی راگەیاند خاوەن تەنکەرێکی سوتەمەنی نەوتی رەشی کردۆتە ناو زێی بچووک و بەهۆیەوە ئاوەکە پیسبووەو دابەشکردنی ئاو لە کۆیەو تەقتەق و ناحیەی ئاشتی و بەشێک لە گوندەکانی وەستاوە
وتیشی شۆفێرەکە بە نەزانی ئەو کارەی کردووەو نەیزانیوە زێی بچووک سەرچاوەی ئاوی خواردنەوەی دانیشتووانی سنورەکەیە بۆیە ئەم کارەی کردووە و لە ئێستادا شۆفێری تانکەرەکە لە ناحیەی ئاشتی دەستگیرکراوە.
ئاماژەی بۆ ئەوەکرد وەستانی دابەشکردنی ئاو کاتیەو هەرکاتێک ئاوەکە پاک بۆوە دابەشکردنی دەستپێدەکاتەوە.
وەفدێكی دەم پارتی و دەبەپە لە شاری سلێمانییە و لەگەڵ بەشێك لە لایەنە سیاسییەكانی هەرێمی كوردستان كۆدەبێتەوە.
وەفدێكی پارتی یەكسانیی و دیموكراسیی گەلان"دەم پارتی"و پارتی هەرێمە دیموكراتییەكان"دەبەپە"لە شاری سلێمانییە و بڕیارە لەگەڵ بەشێك لە لایەنە سیاسییەكان و رێكخراوەكان و كەسایەتییەكان كۆببێتەوە.
ئەندامانی وەفدەكە پێكهاتوون لە كەسكین بایندر، هاوسەرۆكی دەبەپە و بەردان ئۆزتورك و ئەبرۆ گونەی، هاوسەرۆكانی پەیوەندییەكانی دەرەوەی دەم پارتی و ساڵحا ئایدەنز، پەرلەمانتاری دەم پارتی لە مێردین و عەدالەت فیدان، بڕیاریشە دوا كۆبونەوەكانیان لە سلێمانی وەفدەكە سەردانی هەولێریش بكەن و درێژە بە كۆبونەوەكانیان بدەن.
سبەینێ كۆنفرانسی دووەمین دیداری یەكێتی لە كەركوك بەڕێوەدەچێت و گفتوگۆ لەسەر روانگە و سیاسەتی یەكێتی دەكرێت.
بڕیارە رۆژی چوارشەممە كۆنفرانسی دووەمین دیداری یەكێتیی نیشتمانی كوردستان لە شاری كەركوك بەرێوەبچێت، لە كۆنفرانسەكەدا لە هەموو سێكتەرەكان گفتوگۆ لەسەر روانگە و سیاسەتی یەكێتی دەكرێت.
پێشتریش كۆنفرانسی یەكێتی لە موسڵ و بادینان و هەولێر و هەڵەبجە و گەرمیان و سلێمانی بەڕێوەچووە، لیژنەی باڵای دووەمین دیداریش لە چوارچێوەی ئامادەكارییەكان هەڵسەنگاندن بۆ ئەنجامی كۆنفرانسەكان دەكات.
ئەوەش لە كاتێكدایە یەكەمین دیداری یەكێتی بەسەر پەرشتی قوباد تاڵەبانی، لە 12ی ئاداری 2022 دەستپێكرد، لە 31ی ئایاری 2022 مۆتایی بە كارەكانی هێنا و سیاسەتی یەكێتی لە بوارە جیاجیاكاندا داڕشت و بووە بنەمایەك بۆ سیاسەتی گشتی یەكێتی.
جێگری سەرۆكی ئەنجومەنی نوێنەرانی عیراق رایگەیاند، دوای زیاتر لە 12 ساڵ چاوەڕوانی هەڵەبجەییەكان سبەینێ دەنگدان لەسەر پڕۆژەیاسای بەپارێزگابوونی هەڵەبجە دەخرێتە بەرنامەی كاری ئەنجومەنی نوێنەرانی عیراقەوە و لایەنە سیاسیەكان رێككەوتوون لە دانیشتنی سبەینێی ئەنجوومەنی نوێنەراندا پڕۆژەیاساكە تێپەڕێنرێت.
شاخەوان عەبدوڵا جێگری سەرۆکی ئەنجومەنی نوێنەرانی عیراق بە کوردسات نیوزی راگەیاند: بۆ سبەینێ پرۆژەی بە پارێزگابوونی هەڵەبجە خراوەتە بەرنامەی کاری پەرلەمانەوە و دەنگی لەسەر دەدرێت.
ئاماژەی بەوەشکرد: لایەنە سیاسیەكان رێككەوتوون لە دانیشتنی سبەینێی ئەنجوومنەی نوێنەراندا پڕۆژەیاساكە تێپەڕێنرێت
هاوکات راگەیاندنی ئەنجومەنی نوێنەرانی خشتەی کاری دانیشتنی سبەینێ ئەنجومەنی نوێنەرانی عیراقی بڵاوکردەوە و بەپێی خشتەکە دەنگدان لەسەر بە پارێزگابوونی هەڵەبجە، یەکەم بڕگەی دانیشتنەکەیە.
بەهای دینار بەرزترین ئاستی لەئەمساڵدا تۆماركرد و ئەمڕۆ لە بازاڕەكانی دراوی هەرێمی كوردستان 100 دۆلاری ئەمریكی بە 146 هەزار و 250 دینار مامەڵەی پێوە كرا.
چەند رۆژێكە لە بازاڕەكانی دراوی هەرێمی كوردستان بەهای دینار رووی لە بەرزبوونەوویە و ئەمڕۆ گەیشتە بەزرزترین ئاستی لە ساڵی 2025دا، ئەمشەویش بەهای 100 دۆلار بەرانبەر بە 146 هەزار و 600 دینارە.
شارەزایان و چاودێرانی ئابووری هۆكاری بەرزبوونەوەی بەهای دینار دەگەڕێننەوە بۆ پرسی رێككەوتنی هەرێم و بەغداد و نزیكبوونەوە لە هەناردەكردنەوەی نەوتی هەرێم، ئەوەش بەشێوەیەكە كاتێك پرسی هەناردەكردنەوەی نەوت دەوروژێنرێت، بەهای دینار بەرانبەر دۆلار لە بازاڕەكانی دراوی هەرێم بەرز دەبێتەوە.