کوردستان
ئێوارەی ئەمڕۆ لە قەزای ئاکرێ، ئۆتۆمبێلێک لە منداڵێکی سێ ساڵیدا و لە ئەنجامدا منداڵەکە گیانی لەدەستدا.
نێچیرڤان فەخرەدین، بەرپرسی راگەیاندنی تەندروستی ئاکرێ بە کوردسات نیوزی راگەیاند: ئێوارەی ئەمڕۆ لە ناوندی قەزای ئاکرێ ئۆتۆمبێلێک لە مندالێکیدا و گیانی دەستدا.
بەرپرسی راگەیاندنی تەندروستی ئاکرێ ئاماژەی بەوەشدا: منداڵەکە تەمەنی سێ ساڵە، ناوی 'ئەرژەنگ ئەیاز'ـە و خەلکێ ناوەندی قەزای ئاکرێیە.
لیستی دابەشکردنی موچەی مانگی سێ بڵاوکرایەوە و لە ماوەی سێ رۆژدا سەرجەم وەزارەتەکان موچەی مانگی سێ وەردەگرن.
کەمێک پێش ئێستا وەزارەتی دارایی حکومەتی هەرێمی کوردستان لیستی دابەشکردنی موچەی مانگی سێی بڵاوکردەوە و لە رۆژانی 27 و 28 و 29ــی 3، سەرجەم وەزارەتەکان موچەکانیان وەردەگرن.
وەزارەتی دارایی حکومەتی هەرێم رایگەیاند کە سبەینێ دەست بە دابەشکردنی موچەی مانگی سێ دەکرێت.
لە راگەیەندراوێکدا وەزارەتی دارایی حکومەتی هەرێمی کوردستان رایگەیاند، بڕی 954 ملیار و 880 ملیۆن و 467 هەزار و 779 دینار وەک تەموویلی موچەی مانگی ئازاری موچەخۆران و فەرمانبەران و خانەنشینانی هەرێمی کوردستان، لەلایەن وەزارەتی دارایی حکومەتی فیدراڵەوە خرایە سەر هەژماری بانکی وەزارەتی دارایی و ئابووری هەرێمی کوردستان لە لقی هەولێری بانکی ناوەندی عیراق.
کوردسات نیوز پێشتر رایگەیاندبوو کە پارەی موچەی مانگی سێ بۆ هەرێم نێردراوە، هەروەها وەزارەتی داراییش رایگەیاندووە کە سبەینێ دەست بە دابەشکردنی موچەی مانگی سێ دەکرێت.
پەیامنێری کوردسات نیوز باسی لەوە کرد، سوپای تورکیا بەشێک لە هێزەکانی لە سنوری ئامێدی بەرەو سنورەکانی باکوری کوردستان دوور خستووەتەوە، بەڵام هێشتا نازانرێت ئەو هێزانەی دەکشێنێتەوە یان ئامانجی دیکەی لە پشتەوەیە.
پەیامنێری کوردسات نیوز باسی لەوە کرد، سوپای تورکیا بەشێک لە هێزەکانی لە سنوری ئامێدی بەرەو سنورەکانی باکوری کوردستان دوور خستووەتەوە، بە وتەی هاووڵاتیانی دانیشتووی سنورەکەش، لەماوەی چەند ساڵی رابردوودا ئەمە یەکەمجارە هێزەکانی سوپای تورکیا لەبری زیاتر چوونە ناو شارەکە؛ دوور بکەونەوە.
دانیشتوانی ئەو سنورە باس لەوەدەکەن، بەهۆی بوونی هێزەکانی تورکیاوە، نەیاندەتوانی بچنە سەر بەشێکی زەوییەکانی خۆشیان، یان لە وەرزی بەهار بۆ کۆکردنەوەی گژوگیای بەهارە بچنە بناری شاخەکان، بۆیە ئەگەر دوورکەوتنەوەی ئەو هێزانە کشانەوە بێت، ئەوا دڵخۆشییان دەکات.
هێشتا بە روونی نازانرێت سوپای تورکیا هێزەکانی کشاندووەتەوە یان تەنها جوڵەیان پێدەکات و لە دواتردا پلانی دیکەی دەبێت، بەڵام ئەوەی کە هەیە ئەوەیە، ماوەی چەند ساڵێکە بەشێکی هێزەکانی لە سنوری ئامێدی و چەند گوندێکی دیکەی سنوری پارێزگای دهۆک جێگیر کردووە، بە جۆرێک لە ئامێدی خاڵە سەربازییەکانی چەند سەت مەترێکی کەم لە ماڵی هاووڵاتییانەوە دوور بوون.
بەپێی زانیارییەكانی كوردسات نیوز، لە ئێستادا سوپای توركیا لە ناوچەكانی دێرەلوك و گوهەرزێ و چەند ناوچەیەكی دیكەی زنجیرە چیای مەتینا بە ئاڕاستەی باكوری كوردستان رۆیشتوون.
لە ئێستادا بەهۆی ئەوەی پرسی پرۆسەی ئاشتیی لە ئارادایە و لەلایەکی دیکەوە ماوەی تەنها چوار مانگە کۆتایی بە حوکمی بەشار ئەسەد هاتووە لە سوریادا، هەروەها گۆڕانکاری لە چەند پرسێکی سیاسیدا رویانداوە و دۆخی رۆژهەڵاتی ناوەڕاستیش بەگشتی جیاوازە لە ساڵانی رابردوو، بۆیە فشارێکی نێودەوڵەتی بە گشتیی لەسەر وڵاتانی رۆژهەڵاتی ناوەڕاست و بەتایبەت تر ئەو وڵاتانە هەیە کە شەڕ یان مشتومڕی سیاسییان تێدایە.
ئەگەرچی بەهۆی ئەو رووداوانەی لەو دواییانەدا لە تورکیا روویان داوە ئەویش بەدەر نییە لەو فشارانە، بەڵام لە رووی پرسەکانی پەیوەست بە هەرێمی کوردستانەوە، بەڵام هێشتا تورکیا بۆردومانەکانی لە چەند ناوچەیەکی ناو خاکی هەرێمی کوردستان بەردەوامە، بۆیە ئەو جوڵەیەی بە سەربازەکانی کردووە لە سنوری ئامێدی، هێشتا نا روونە و هۆکارەکەی دیار نییە.
سەرچاوەیەک لە وەزارەتی دارایی فیدڕاڵ بە کوردسات نیوزی راگەیاند: بڕی زیاتر لە 954 ملیار دینار خرایە سەر هەژماری بانکی وەزارەتی دارایی هەرێم.
پەیامنێری کوردسات نیوز راگەیاند، بەغداد موچەی مانگی سێی رەوانەی هەرێم کرد و بڕیارە لە ئەمرۆوە یاخود سبەینێ دەست بەدابەشکردنی موچە بکرێت.
هاوکات سەرچاوەیەکیش لە وەزارەتی دارایی هەرێم بە کوردسات نیوزی راگەیاند: ئەمڕۆ لیستی موچە رادەگەیەنرێت و دەست بە دابەشکردنی موچە دەکرێت.
جێگەی ئاماژەیە بەشێکی زۆری خانەنشینانی هەرێم لە بەیانی ئەمڕۆوە لە بەردەم بانکەکانی هەرێم لە چاوەڕوانی خەرجکردنی موچەکانیان.
سەرۆک بافڵ: بە سیاسەتی چەپکە گوڵەکەی مام ئیدارەی کەرکوک دەدەین و خزمەتی دەکەین
بافڵ جەلال تاڵەبانی، سەرۆکی یەکێتیی نیشتمانیی کوردستان دوایی سەردانی کردنی شاری کەرکوک لە تۆڕی کۆمەلاتیەتی فەیسبووک راگەیەنراوێکی بڵاوکردوەتەوە و دەڵێت: جەخت لە پاراستنی پێکەوەژیانی ئاشتییانە لە کەرکوک و پابەندبوون بە زامنکردنی مافی هەمووان دەکەینەوە.
بافڵ جەلال تاڵەبانی، سەرۆکی یەکێتیی نیشتمانیی کوردستان بە یاوەری د. هاوڕێ شێخ دارۆ، ئەندامی مەکتەبی سیاسی و جەلال شێخ ناجی، سەرۆکی ئاژانسی پاراستن و زانیاری/زانیاری سەردانی شاری کەرکوکی کرد و لەلایەن رەفعەت عەبدوڵا، ئاسۆ مامەند و رزگار حاجی حەمە، ئەندامانی مەکتەبی سیاسی و رێبوار تەها، پارێزگاری کەرکوک و ژمارەیەک لە ئەندامانی سەرکردایەتی و هەڤاڵانی یەکێتییەوە بە گەرمی پێشوازیلێکرا.
لە یەکەم وێستگەی سەردانەکەیدا بۆ کەرکوک، سەرۆک بافڵ جەلال تاڵەبانی کە مەبەست لێی بەدواداچوون بوو بۆ جێبەجێکردنی بەڵێنەکانی یەکێتی و دانانی پارێزگار کە لە کاتی هەڵبژاردندا بە کەرکوکییەکان درابوو لە بارەگای مەکتەبی سیاسی لەگەڵ زانایان و مامۆستایانی پایەبەرزی ئایینیی کەرکوک کۆبووەوە.
سەرۆک بافڵ رۆڵی بەرچاوی زانایان و مامۆستایانی ئایینی بەرز نرخاند لە پاراستنی بەهابەرزەکان و ئاشتی کۆمەڵایەتی و بەهێزکردنی گیانی برایەتی و رایگەیاند، یەکێتی هەمیشە بە چاوی رێز و پڕبەهاوە لە مامۆستایانی ئایینی دەڕوانێت کە لە بوارە جیاجیاکاندا خزمەت دەکەن و بەشێکی گرنگن لە هۆشیارکردنەوەی کۆمەڵگە.
بافڵ جەلال تاڵەبانی ستراتیژی یەکێتی لە کەرکوک روونکردەوە و گوتی، لەم شارە خۆشەویستە ستراتیژمان بەشداریی هەموو نەتەوە و پێکهاتەکانە لە بەڕێوەبردندا و جەخت لە پاراستنی پێکەوەژیانی ئاشتییانە لە کەرکوک و پابەندبوون بە زامنکردنی مافی هەمووان دەکەینەوە.
هەر لە درێژەی سەردانەکەیدا بۆ کەرکوک، سەرۆکی یەکێتیی نیشتمانیی کوردستان سەردانی ناوشار و چەند شوێنێکی جیای کرد و چاویکەوت بە کەرکوکییەکان و گەنجانی شارەکە و لە نزیکەوە گفتوگۆی لەگەڵدا کردن لەبارەی ئیدارەی نوێ و خزمەتگوزاری لە شارەکە و پێداویستی خەڵک و ئەو کێشانەی کە رووبەڕوویان دەبێتەوە.
سەرۆک بافڵ بە کەرکوکییەکانی گوت، بە سیاسەتی چەپکە گوڵەکەی مام ئیدارەی کەرکوک دەدەین و خزمەتی دەکەین، هەر بۆیە ئیدارەی نوێ و پارێزگار لە ماوەیەکی کەمدا توانییان لە هەموو رووەکانەوە خزمەتی بەرچاوی شارەکە بکەن و حکومەتی خۆجێییان خستە خزمەت خەڵکی خۆشەویستی کەرکوک.
بافڵ جەلال تاڵەبانی لە درێژەی قسەکانیدا سوپاسی رێبوار تەها، پارێزگاری کەرکوکی کرد و پشتیوانی خۆی بۆ دووپاتکردەوە و گوتی، لای ئێمە کەرکوک قودسی کوردستانە و هەر بەوجۆرە دەمێنێتەوە، هەمیشە خزمەتکردنی کەرکوک کاری لەپێشینەمانە، چونکە کەرکوکییەکان شایەنی هەموو خزمەتێکن.
بەڕێوەبەرایەتی گشتیی حەج و عومرەی هەرێم رایگەیاند، عومرەکارێکی کورد لە مەککە کۆچی دوایی کرد، کە ئەمە چوارەم عومرەکاری کوردە لە مانگی رەمەزاندا گیان لەدەست بدات.
بەڕێوەبەرایەتی گشتیی حەج و عومرەی هەرێم رایگەیاند، دوێنی سێشەممە، هاووڵاتی 'ئازاد رەحیم کریم باجەلان' دانیشتووی ئیدارەی سەربەخۆی گەرمیان، دوای بەجێگەیاندنی سونەتی عومڕە دوێنی شەو لە شاری مەککە کۆچی دوایی کرد.
ئاماژەی بەوەشکردووە، ئەم عومرەکارە تەمەنی ٤٨ ساڵە و پێشتر هیچ نەخۆشییەکی نەبووە، بە ئۆتۆمبیلی خۆی گەشتی عومرەی کردووە، بەڵام بە شێوەیەکی کتوپڕ لە شاری مەککە کۆچی دوایی کردووە، هەر لە شاری مەککەش بە خاک سپێردراوە.
ئەوەشی خستووەتە روو، ئەمە دەیەم عومرەکاری کوردستانە، کە لە سەرەتای ئەمساڵەوە لە مەککە گیانیان لەدەستدابێت.
کارەبای سلێمانی نرخی کارەبای موەلیدەی سیتییەکانی بۆ مانگی رابردوو بڵاوکردەوە و بەپێی راگەیەنراوەکە، هەر کیلۆواتێک بە 268 دینار دیاری کراوە.
کارەبای سلێمانی رایگەیاند، ئەمڕۆ چوارشەممە، لیژنەی باڵای دیاریکردنی نرخی کارەباى کۆمەڵگاکانى نیشتەجێبوون (ستییەکان) کۆبوونەوەیەکی ئەنجام دا و تیایدا، نرخی هەرکیلۆواتێکی کارەبای موەلیدەی بە 268 دینار دیاری کرد.
ئاماژەی بەوەشکردووە، هاوكات بۆ ئەو ستییانەش كە تاكە سەرچاوەی كارەبایان موەلیدەیە و كارەبای نشتمانیان نییە نرخی كیلۆواتێک بە 240 دینارە.
داواش دەکات، سەرجەم ستیيەکانی سنوری پارێزگای سلێمانی پابەند بن بە نرخەکەوە، بەپێچەوانەوە ئەگەر زیاتر لەو نرخە وەربگرن رووبەڕووی رێکاری یاسایی دەکرێنەوە.
کەشناسیی هەرێم پێشبینییەکانی کەشوهەوای ئەمڕۆ و سبەی بڵاوکردەوە و باسی لەوەکردووە، پلەکانی گەرما لە بەرزبوونەوە بەردەوام دەبن.
کەشناسیی هەرێم رایگەیاند، ئەمڕۆ چوارشەممە، ئاسمان بەگشـتى نیمچەهەور دەبێت و پلەکانی گەرما 1 بۆ 3 پلەی سیلیزی بەرز دەبنەوە.
ئاماژەی بەوەشکردووە، سبەینێ پێنجشەممە، ئاسمان لە نێوان نیمچەهەور بۆ هەورى تەواودا دەبێت و پلەکانی گەرما 1 بۆ 2 پلەی دیکە بەرز دەبنەوە.
بەرزترین پلەکانی گەرمای پێشبینیکراو بە پلەی سیلیزی:
هەولێر: 27 پلەی سیلیزی
سلێمانی: 24 پلەی سیلیزی
دهۆک: 25 پلەی سیلیزی
کەرکوک: 28 پلەی سیلیزی
زاخۆ: 26 پلەی سیلیزی
هەڵەبجە: 25 پلەی سیلیزی
سۆران: 24 پلەی سیلیزی
حاجی ئۆمەران: 17 پلەی سیلیزی
گەرمیان: 30 پلەی سیلیزی
بافڵ جەلال تاڵەبانی سەرۆكی یەكێتیی نیشتیمانیی كوردستان بە سەردانێك گەیشتە كەركوك و پاڵپشتی خۆی بۆ خەڵك و ئیدارەی شارەكە دوپاتكردەوە، جەختی لەوەش كردەوە، هیچ كات كەركوك جێناهێڵن.
سەرۆک بافڵ جەلال تاڵەبانی رایگەیاند: کەرکوک دەکەین بە پاکترین، جوانترین، ئارامترین شار لە هەموو عیراق
سەرۆک بافڵ وتیشی: پارێزگارێکمان بۆ ئێوە ناردووە کە خزمەتی هەموو پێکهاتەکان بکات
ئاماژەی بۆئەوەشکرد: دەبێت کەرکوک ببێتە نمونەی شاری پێکەوە ژیان .
دانیشتنی ئەنجومەنی نوێنەرانی عیراق بەهۆی تەواونەبوونی رێژەی یاسایی دواخرا و دەنگدان لەسەر بە پارێزگابوونی هەڵەبجە خرایە سبەینێ
ئیمان ئامێدی ئەندامی ئەنجومەنی نوێنەرانی عیراق بە کوردسات نیوزی راگەیاند: بەهۆی تەواونەبوونی رێژەی یاسای دانیشتنی پەرلەمان دواخرا بۆ سبەینێ بەهەمان کاری دانیشتنەوە، ئاماژەی بەوەشکرد، دەنگدان لەسەر بەپارێزگابوونی هەڵەبجە کە بڕگەی یەکەمی دانیشتنەکەیە کەوتوەتە سبەینێ.
وتیشی: خەڵکی هەڵەبجە شەهید قوربانی زۆریان داوە بۆیە پێوسیتە هەڵەبجە بکرێتە پارێزگا و خزمەتی ئەو شارە بکرێت.
دوای زیاتر لە 12 ساڵ چاوەڕوانی هەڵەبجەییەكان بریاربوو ئەمشەو دەنگدان لەسەر بەپارێزگابوونی و هەڵەبجە بدرێت، بەڵام بەهۆی تەواونەبوونی رێژەی یاسای دانیشتنەکە دواخرا.
سەندیکای دەرمانسازانی کوردستان، بڕیاریدا بە راگرتنی " د.کۆچەر ئیسماعیل " بۆ ماوەی سێ مانگ لە پیشەی دەرمانسازی بە تۆمەتی فێڵکردن لە هاووڵاتیان.
سەندیکای دەرمانسازانی کوردستان لە راگەیەنراوێکردا بڵاویکردەوە، دوا بەدوای نوسراوی لقی سەندیکای دەرمانسانی لقی هەولێر، سەبارەت بە کۆمەڵێک دەرمانخانە کە دەرمانیان بەسەر هاوولاتیان ساغکردوەتەوە، سەندیکا بڕیاریدا بۆ ماوەی سێ مانگ د.کۆچەر ئیسماعیل خاوەنی ئەو دەرمانخانانە، لە پیشەی دەرمانسازی رابگرێت.
ئاماژەی بەوەشکردووە، بڕیاردراوە تاوتوێی لێسەندنەوەی ناسنامەی سەندیکای دەرمانسازی لە ناوبراو کراوە، بەهۆی پێشێلکردنی چەند بڕگەیەکی یاسایی.
دوای ئەوەی نامەیەکی دەنگی د.کۆچەر ئیسماعیل خاوەنی کۆمەڵێک دەرمانخانە لە هەولێر بڵاوبوەوە و تێیدا بە کارمەندەکانی دەوت "دەرمان و کەرەستەی پزیشکی بەسەر هاووڵاتیان ساغبکەنەوە"، سەندیکای دەرمانسازان بۆ ماوەی سێ مانگ خاوەنەکەی سڕکرد.
بەڕێوەبەرایەتی هاتووچۆی زاخۆ رایگەیاند، لە 15ی نیسانی داهاتووەوە كامێراكانی تیژڕەوی خاڵ بۆ خاڵ لەسەر رێگای سەرەكی دهۆك - زاخۆ دەخرێنەكار.
بەڕێوەبەرایەتی هاتوچۆی ئیدارەی سەربەخۆی زاخۆ لە راگەیەنراوێكدا بڵاویكردەوە، لە 15ی نیسانی داهاتووەوە كامێراكانی تۆماركردنی سەرپێچی تیژڕەویی خاڵ بۆ خاڵ لەسەر شەقامی سەرەكیی دهۆك بۆ زاخۆ و تونێلی گەلی زاخۆ بۆ فلكەی سحێلا دەكەونە كار.
ئاماژە بەوەشكراوە، خێرایی رێگەپێدراو بۆ ئۆتۆمبێلی تایبەت 100 كیلۆمەتر لە سەعاتێكدا و خێرایی بارهەڵگریش 80 كیلۆمەتر لە سەعاتێكدا لەسەر ئەو رێگایە دیاریی كراوە.
هاتوچۆی زاخۆ داوا لە شۆفێران دەكات بۆ پاراستنی ژیانیان پابەندی رێنماییەكانی هاتووچۆ بن.
وەزارەتی پێشمەرگە لە راگەیەنراوێکدا وەڵامی ئەو قسانەی وەستا رەسوڵ دەداتەوە کە لە بەرنامەی پرسی رۆژ لە کوردسات نیوز کردویەتی و رەتیدەکاتەوە.
دەقی راگەیەنراوەکەی وەزارەتی پێشمەرگە.....
لە چەند رۆژی ڕابردوودا لە بەرنامەیەکی تەلەفیزیۆنیدا لە کەناڵی کوردسات بەرێز وەستا رەسوڵ، چەند لێدوانێکی بێ بنەما و ناڕاستی بڵاوکردۆتەوە ئێمە لەم راگەێیندراوەدا بە پێویستی دەزانین راستیەکان روون بکەینەوە بۆ ڕای گشتی و هێزی پێشمەرگەی کوردستان
تەنها لە پێناو دەرخستنی بەرێوەچوونی کاروبارەکانی وەزارەتی پێشمەرگە وەڵامی ئەوچەواشەکارییە دەدەینەوە.
١- دەربارەی پلەبەرزکردنەوەی ئەفسەرانی فەرماندەیی هێزەکانی حەفتا، وەزارەتی پێشمەرگە بە یەک لیست ساڵانە لە مانگی ئادار و ئەیلولدا سەرجەم خشتەکانی پلەبەرزکردنەوە ئامادەدەکات و ئاڕاستەی ئەنجومەنی وەزیرانی دەکات.(ساڵانی پێشوو پلەبەرزکردنەوەی ئەفسەران بۆ ماوەی چەند ساڵ ڕاگیرابوو و ئەفسەرانی هێزی پێشمەرگە بێبەشبوون لە مافی پلەبەرزکردنەوەیان) بە هەوڵی تیمی باڵای وەزارەت توانراوە کاری جددی لەسەر خشتەکانی پلەبەرزکردنەوەی ئەفسەران بکرێت بە کۆی گشتیی لە ساڵی ٢٠١٩وە تا ئەمڕۆ زیاتر لە ٢٠ خشتەی پلەبەرزکردنەوەی ئەفسەران کە لەوەو پێش کەڵەکەببون و نەکرابوون لە وەزارەت، توانراوە پلەکانیان بەرزبکرێتەوە و پلەیی شایستەی خۆیان وەربگرن. لە ئێستاشدا چەند خشتەیەکی پلەبەرزکردنەوەی ئەفسەران ڕەوانەی ئەنجومەنی وەزیران کراوەو کارەکانیان تەواوبووە چاوەروانین بەم نزیکانە بگەرێنەوە وەزارەتی پێشمەرگە. بەم هەنگاوە بەردەوامانە توانیومانە دۆخی پلەبەرزکردنەوەی ئەفسەران لە وەزارەتی پێشمەرگە بخەینەوە سەر راستەڕێی یاسایی و ئاسایی خۆی.
لە وەزارەتی پێشمەرگە بۆ پلەبەرزکردنەوەی ئەفسەران کۆمەڵێک بنەما و مەرج و ڕێنمایمان داناوە کە لەو چوارچێوەیەدا ئەفسەران پلەیان بەرزدەبێتەوە وەکو تر هیچ ئەفسەرێک لە دەرەوەی رێنمایی و مەرجە یاساییەکان و بەبێ پایە، شایستەی پلەبەرزکردنەوەی جێبەجێ ناکرێت. بەمەش کۆتایی بە پلەبەرزکردنەوەی بەلێشاو و نایاسایی و ناسەربازیی هاتووە لە وەزارەتی پێشمەرگەدا.
٢- دەربارەی ڕاگرتنی نوسراوەکانی هێزەکانی حەفتا لە ناو بەشە کارگێرییەکانی وەزارەتی پێشمەرگە، رایدەگەیەنین ئەم بابەتە دوورە لە ڕاستی نوسراوەکانی هێزەکانی حەفتا کاری یاسایی خۆیی لەسەردەکرێت هەر نوسراوێکیان هەبێت لە چوارچێوەی یاسا و رێنماییەکاندا جێبەجێ دەکرێت و کراوە.
٣- دەربارەی جیاوازی لە پێدانی ئازووقە بۆ فیرقەی یەک و دوو لێرەوە رایدەگەیەنین؛ هیچ جیاکاریەکی بنەڕەتی لە وەزارەتی پێشمەرگە بوونی نیە، هێزی پێشمەرگەی کوردستان لە سەرجەم ماف و شایستەکانیان یەکسانن و بەبێ هیچ جیاوازییەک ئەوەی لەبەردەستی وەزارەتی پێشمەرگەدا بێت بەسەر هەموو یەکە سەربازییەکانی وەزارەتی پێشمەرگەدا دابەشکراوە.
٤- بەرێز وەزیری پێشمەرگە، پارێزەری ماف و شایستەکانی هێزی پێشمەرگەی کوردستانەو جێبەجێکارێکی سەرسەختی پرۆسەی چاکسازی و یەکخستنەوە و رێکخستنەوەی هێزی پێشمەرگەی کوردستانە لە چوارچێوەی وەزارەتی پێشمەرگەدا، لەگەڵ دەستبەکاربوونی هەتاکو ئەمڕۆ بەردەوام سەرپەرشتی پرۆسەی چاکسازی و هەنگاوەکانی یەکخستنەوەی پێشمەرگە دەکات، پێداگرە و ویستی جددیی و ئیرادەیەکی نیشتیمانی بەهێزی هەیە بۆ سەرخستنی پرۆسەی چاکسازی و دامەزراندنی ژێرخانی سەربازی هێزی پێشمەرگەی کوردستان و بنیاتنانی ناوچەکانی سەرکردایەتی و فیرقەکان لە چوارچێوەی وەزارەتی پێشمەرگەدا. بە چادێری و بەدواداچوونی بەردەوامی بەرێز وەزیری پێشمەرگە توانراوە پرۆسەی چاکسازی قۆناغی زۆرباش ببڕێت و ببێت بە بنەما و بەرنامەی کارکردن لە وەزارەتی پێشمەرگە و یەکخستنەوە و رێکخستنەوەی هێزی پێشمەرگە ببێتە واقع و دەرئەنجامی زۆرباش بەدەست بهێنرێت.
ئێستا وەزارەتی پێشمەرگە لە قۆناغێکی بەهێز و سەرکەوتوودایە وەک یەک تیمی پێکەوەیی کاردەکەین بۆ گەیشتن بە ئامانجە باڵاکانی هێزی پێشمەرگەی کوردستان و بنیاتنانی سوپایەکی یەکگرتووی کوردستانی. پێویستیشمان بە پشتیوانی و پاڵپشتیهەمووان هەیەو دەبێت هاوکارمان بن لەو ئەرکە سەختەی پێمان سپێردراوە نەک سەنگەری دژایەتیمان لێ بگرن. دەبوو بەرێز وەستا رەسوڵ، بە ویژدان و روحیەتێکی بەرپرسانە باسی لە بەرەوپێشووچوونەکانی وەزارەتی پێشمەرگە و ئەو دەستکەوتانە بکردایە نەک لە کەناڵێکی ڕاگەیاندن دژی وەزارەتی پێشمەرگە و ئەو دەستکەوتانە کە بۆ هێزی پێشمەرگەی کوردستان بەدەست هاتوون قسەبکەن.
دڵنیاین خەڵكی نیشتمانپەروەری کوردستان و هێزی پێشمەرگەی کوردستان زۆر لەوە هۆشیارتر و بەرچاوروونترن کە بروا بەو چەواشکارییە نابەرپرسانەیە بکەن کە بەمەست بڵاودەکرێنەوە.
نوسینگەی رۆژنامەوانی وەزیری پێشمەرگە
٢٥ـی ئاداری ٢٠٢٥
ئەمڕۆ باڵیۆزی ژاپۆن و وەزیری دەرەوەی عیراق رێکەوتننامەیەکیان واژۆ کرد بۆ تەرخانکردنی 700هەزار دۆلار (نزیکەی ملیارێک دینار) بۆ پڕۆژەی مۆزەخانەی سلێمانی.
د. بڕیار رەشید، ئەندامی ئەنجومەنی نوێنەرانی عیراق، لایخۆیەوە بڵاویکردەوە؛ ئەمڕۆ یەکێک لە هەوڵەکانمان کە لەسەرەتای دەستپێکی خولی پەرلەمانیمان هەوڵمان بۆدا، گەیشتە ئەنجام .
لای خۆشیەوە، باڵیۆزخانەی ژاپۆن لە عیراق بڵاویکردەوە؛ باڵیۆزی ژاپۆن، ئیندۆ و فوئاد حسێن، وەزیری دەرەوەی عیراق، ئیمزا و یاداشتیان ئاڵوگۆڕ کرد سەبارەت بە پڕۆژەی باشترکردن و پاراستن و نۆژەنکردنەوەی مۆزەخانەی سلێمانی.
د. لەتیف رەشید سەرۆک کۆماری عیراق سەردانی مەکتەبی راگەیاندن و هۆشیاری یەکێتیی نیشتمانیی کوردستانی و بنکەی ژینی کرد.
لە دیدارەکەدا گفتوگۆ لەسەر گۆڕانکاری و پێشهاتەکان کراو تەئکید لەسەر گرنگی بەردەوام دیالۆکی نیشتمانیی لە نێوان لایەنەکان کرایەوە بۆ چارەسەرکردنی کێشەکان و پاراستنی سەقامگیریی سیاسی لە وڵاتدا .
د . لەتیف جەمال رەشید سەرۆک کۆماری عیراق، وێڕای ئەوەی سوپاس و پێزانینی دەربڕی بۆ میدیای یەکێتی و راگەیاندنکارانی یەکێتی کە پیشەییانە لەگەڵ روداوەکاندا بون، رایگەیان: دۆخەکە وادەخوازێت میدیا بەرپرسیارانە لەگەڵ گۆڕانکارییەکاندا مامەڵە بکەن و هاوکاربن بۆ سەرخستنی پرۆژەی چاکسازی و زیاتر خزمەتکردنی خەڵک و وڵاتەکەمان.
لەبەرانبەردا عیماد ئەحمەد سوپاسی سەرۆک کۆماری کرد کە پەرۆشانە لە خەمی چارەسەرکردنی کێشەکان و لێکنزیکردنەوەی لایەنەکان و پاراستنی مافی هەموولایەک بووە و رونیکردەوە، میدیای یەکێتی وەک هەمیشە هاوکارو پشتیوان دەبێت بۆ سەرخستنی هەوڵە نیشتمانییەکان و گەیشتن بە ئامانجە باڵاکان بە ویستی خەڵک و زیاترخزمەتکردنییان .
هەر لەو دیدارەدا عیماد ئەحمەد دووپاتی لە سیاسەتی هاوسەنگی یەکێتی بۆ کۆی هاوکێشەکان کردەوە و رایگەیاند: پابەند بە بڕیاری سەرۆکایەتی و سەرکردایەتی، بە ستراتیژێکی نیشتمانیی هەنگاوە سیاسییەکان دەنێین و بۆ هەموو پرسەکان هاوبەشێتی و شەراکەتی حەقیی دەکەینە بنەماو هەنگاوەکانیشمان لە خزمەتی گشتی و بەهێزکردنی قەوارەی هەرێم دەبێت .