کوردستان
نێچیرڤان بارزانی سەرۆکی هەرێمی کوردستان پەیامێكی هاوخەمی بۆ رووداوی تەقینەوەكەی خورماتوو بڵاوكردەوە و رایگەیاند، ئەو كردەوە تیرۆریستییە ئەوە دەسەلمێنێت كە تیرۆر هێشتا مەترسییەكی راستەقینەیە و هەڕەشە لە ئارامی و سەقامگیریی عیراق و هەرێم و ناوچەكە بەگشتی.
دەقی پەیامەکەی سەرۆکی هەرێم...
پرسه و سه‌ره‌خۆشیی قووڵم ئاراسته‌ی خێزان و كه‌سوكاری شه‌هیدانی ئه‌مڕۆی كرده‌وه تیرۆرستییه‌كه‌ی سنووری خورماتوو ده‌كه‌م كه له كاتی ئه‌ركدا و له ئه‌نجامی ته‌قینه‌وه‌ی بۆمبێكی چێنراو به ئۆتۆمبیلی لیوایه‌كی هاوبه‌شی پێشمه‌رگه و سوپای عێراقدا، سێ پله‌دار شه‌هید بوون. له خوای مه‌زن داواكارم گیانیان به به‌زه‌یی و میهره‌بانیی خۆی شاد بكات و ئارامی و دڵنه‌وایی به هه‌مووان ببه‌خشێت. هاوسۆز و هاوخه‌میانین و هیوای سه‌لامه‌تی و زوو چاكبوونه‌وه بۆ برینداران ده‌خوازین.
ئه‌م كرده‌وه تیرۆرستییه ئه‌وه ده‌سه‌لمێنێت كه تیرۆر هێشتا مه‌ترسییه‌كی ڕاسته‌قینه‌یه و هه‌ڕه‌شه له ئارامی و سه‌قامگیریی عێراق و هه‌رێمی كوردستان و ناوچه‌كه به‌گشتی و سه‌ر و ماڵی هاووڵاتییان به‌تایبه‌تی له ناوچه‌كانی ماده‌ی 140 ده‌كات. بۆیه جه‌خت له به‌رده‌وامی و پته‌وكردنی زیاتری هه‌ماهه‌نگی و هاریكاریی هاوبه‌شی پێشمه‌رگه و سوپای عێراق و هێزه‌كانی هاوپه‌یمانان بۆ به‌ره‌نگاربوونه‌وه و تێكشكاندنی تیرۆرستان ده‌كه‌ینه‌وه.
عیماد ئەحمەد رایگەیاند، پرسی سەرژمێری پەیوەست نییە بە هیج حزب و لایەنێکەوە بەڵکو بۆ ئێمەی کورد بابەتێکی نەتەوەیی و نیشتمانیی و شەڕی دیموکراسیانەمانە لە پێناو پاراستنی خاک و زمانەکەمان.
عیماد ئەحمەد، لێپرسراوی مەکتەبی راگەیاندن و هوشیاری لەبارەی گرنگی پرۆسەی سەرژمێری و بەشداری کورد و کاریگەریی لەسەر داهاتووی پرۆسەی سیاسی لە عیراق رایگەیاند، پرۆسەی سەرژمێری گشتی بۆ عیراق گرنگە بە تایبەت لەم قۆناغەدا بۆ کورد چارەنووسسازە بۆیە ئەرکی هەمووانە بە گڕوتینی کوردانەمانەوە بەشداری بکەین و سەریبخەین تا بتوانین پێگەی کورد بەهێزتر بکەین و هاوسەنگی هێز لە عیراق بە شێوەیەک رێکبخەینەوە کە لەبەرژەوەندی هەرێمەکەمان و پاراستنی مافەکانماندا بێت.
عیماد ئەحمەد راشیگەیاند، ئەم پرسە لە ناوچە دابڕێندراوەکانمان و ناوچە کوردستانییەکانی دەرەوەی ئیدارەی هەرێم بۆ کورد زۆر گرنگترە چونکە پەیوەستە بە پرسی کورد و خاک و نەتەوەوە بۆیە لەپێناو ئایندەی کوردبوونمان لەو سنورانە ئەرکمانە پەرۆشانە بەشداری تێدابکەین و سەنگی کورد بە سەربەرزییەوە دەربخەین چونکە ئەم هەنگاوە پشتیوانێکی باش دەبێت بۆ پاراستنی ناسنامەکانمان و کوردستانی بوونمان و رێگرکردن لەو بیرە شۆڤێنییانەی مەرامیانە ئارامی و پێکەوەژیان بخەنە مەترسییەوە لەورووە داوای لەهەموو ئەو کەسانەش کرد کە نیشتەجێی پارێزگاکانی هەرێمن و خەڵکی ناوچە دابڕێندراوەکانن ئەم چەند رۆژە بگەڕێنەوە خاکی باوباپیرانیان و بەشداری سەرژمێری بکەن و بوونی خۆیان بسەلمێن لەپێناو پارێزگاریکردن لە کوردستانی بوونی ناوچەکانمان و بەهێزترکردنی پێگەی کورد چونکە دڵنیاین تا دەنگی کورد دلێر تر و بەهێزتربێت ئارامی و ئاسایش زیاتر لەو سنورانە پارێزراوتردەبێت و ئەو کەلتووری برایەتی و پێکەوەژیانەشی کەلەنێوان هەموو نەتەوەو پێکهاتەکاندا هەیە پارێزراوتر دەبێت.
روونشیکردەوە پرسی سەرژمێری پەیوەست نییە بە هیج حزب و لایەنێکەوە بەڵکو بۆ ئێمەکورد بابەتێکی نەتەوەیی و نیشتمانیی و شەڕی دیموکراسیانەمانە لە پێناو پاراستنی خاک و زمانەکەمان بۆیە داوا دەکەین لە هەموو لایەنە کوردستانییەکان بە یەکگرتووی کاربکەن بۆ سەرخستنی ئەم پرسە بە ویستی گەلەکەمان.
قوباد تاڵەبانی دوای ئەوەی لە میانەی ئۆپراسیۆنێکدا بۆمبێکی چێندراو بە ئۆتۆمبێلێکی لیوا هاوبەشەکان لە سنوری خورماتوودا تەقییەوە پەیامێکی هاوخەمی بڵاوکردەوە و رایگەیاند، بە دڵنیاییەوە تۆڵەی شەهیدبوونی ئەم سێ پێشمەرگە قارەمانەمان دەکەینەوە.
دەقی پەیامەکەی قوباد تاڵەبانی...
بەداخەوە جارێکی تر دەستی تیرۆر گەشتە خوێنی رۆڵە قارەمانەکانمان و سێ پێشمەرگەی گیانفیدامان شەهیدبوون و سیانی تریش بریندار بوون.
لە دڵەوە سەرەخۆشی ئاراستەی بنەماڵە و کەسوکارە سەربەرزەکانیان و هاوسەنگەرانیان دەکەم و هیوای چاکبوونەوەی خێراش بۆ بریندارەکان دەخوازم.
وەکچۆن هەموو جارێک دوای شەهیدبوونی رۆڵەیەکی گەلەکەمان، پێشمەرگە و هێزە ئەمنییەکانمان گورزی کوشەندە و جەرگبڕتر لە تیرۆریستان دەوەشێنن، بە دڵنیاییەوە دوای شەهیدبوونی ئەم سێ پێشمەرگە قارەمانەشمان، هێزەکانمان تۆڵەی خوێنی پیرۆزیان دەکەنەوە.
وەزارەتی پێشمەرگە لەبارەوی ڕووداوی تەقینەوەی بۆمبێکی چێندراو بە ئۆتۆمبێلێکی لیوا هاوبەشەکان لە سنوری پەڵکانە ڕاگەیەندراوێکی بڵاوکردەوە و رایانگەیاند، ڕووداوەکە لە ئەنجامی کێوماڵکردنی ناوچەیەکی بەرفراوانی ئاسایشی هاوبەش بووە.
وەزارەتی پێشمەرگەی هەرێم راشیگەیاند، بەداخەوە، سەرلەبەیانی ئەمڕۆ سەعات نۆ لە سنوری خورماتوو، بۆمبێكی چێندراو بە كاروانی ئۆتۆمبێلەكانی فەرماندەی فەوجی سێی لیوای یەکی هاوبەشی پێشمەرگە و سوپای عیراق تەقییەوە.
دەشڵێت، بەهۆی روداوەكەوە عەقید روكن سامان سابر سلێمان فەرماندەی فەوج و عەقید محەمەد رەزا كەریم ئەفسەری ئەندازەی فیرقەی نۆی سوپای عیراق و شەریف ئەحمەد شەهیدبوون، هەروەها سێ سەربازیش برینداربوون.
لە راگەیەنراوەكەدا هاتووە، روداوەكە لە ئەنجامی كێوماڵكردنی ناوچەیەكی بەرفراوانی ئاسایشی هاوبەش بووە.
لە سنوری خورماتوو بۆمبێكی چێندراو بە ئۆتۆمبێلێكی لیوا هاوبەشەكان تەقییەوە، بەهۆیەوە دوو فەرماندەو سەربازێكی هێزەكانی پێشمەرگە شەهیدبوون.
پەیامنێری كوردسات نیوز رایگەیاند، بەیانی ئەمرۆ بۆمبێكی چێندراو لە تەنیشت بیرەنەوتی پەلكانە لە سنوری خورماتوو بە ئۆتۆمبێلێكی لیوا هاوبەشەكان تەقییەوە و بەهۆیەوە دوو فەرماندەو شۆفێرێكی هێزەكانی پێشمەرگە كە پلەی سەربازی هەبووە شەهیدبوون.
وتیشی، ئەو دوو عەقیدەی كە شەهیدبوون ناویان عەقید سامان سابیرە فەرماندەی فەوجی سێی لیوای ٢٠ هاوبەشە و خەڵكی سەرگەرانە، ئەوی تریشیان عەقید محەمەدە ئەندازیاری فەوجەكە بووە.
پەیامنێری كوردسات نیوز راشیگەیاند، هەر بەهۆی تەقیینەوەكە دوو كەسی تریش برینداربوون و رەوانەی نەخۆشخانەی كەركوك كراون بۆ وەرگرتنی چارەسەر، وتیشی تەقینەوەكە بەهۆی تەقینەوەی بۆمبێكەوە رویداوە كە لەسەردەمی داعشدا لەو ناوچانەدا چێندراون.
یاسین مەحمود ئەندامی ئەنجومەنی پارێزگای سەڵاحەدین بە كوردسات نیوزی راگەیاند، ئەو هێزە لە كاتی چونیان بۆ ئەنجامدانی ئۆپراسیۆن لەو ناوچەیەدا بۆمبیان پیادا تەقیەوەتەوە و سێ ئەندامیان شەهید بوون و هیوادارن لە داهاتوودا ئۆپراسیۆن بكرێت بۆ كۆنتڕۆڵكردنی ئەو ناوچانە.
سەرپەرشتیاری کەرکوک-سەڵاحەدینی یەکێتیی نیشتمانیی کوردستان رایدەگەیەنێت، پرۆسەی سەرژمێری ئێجگار گرنگ و چارەنووسسازە، بە تایبەتیش بۆ کەرکوک و ناوچە جێناکۆکەکان.
ئاسۆ مامەند سەرپەرشتیاری کەرکوک-سەڵاحەدینی یەکێتیی نیشتمانیی کوردستان لە پەیامێکدا دەڵێت، وەک ئاگادارن کە بڕیار وایە لە رۆژانی ٢٠و ٢١ی ١١ی ٢٠٢٤ پرۆسەی سەرژمێری گشتیی لە کەرکوک و ناوچە جێناکۆکەکان و تەواوی پارێزگاکانی عیراقدا بەڕێوەبچێت کە ئەم پڕۆسەیە بۆ میللەتەکەمان ئێجگار گرنگ و چارەنووسسازە، بە تایبەتیش بۆ کەرکوک و ناوچە جێناکۆکەکان، چونکە لە لایەک ناسنامە و داهاتووی ئەو ناوچانە دیاریدەکات، لە لایەکی تریشەوە ئایندەی تاک بە تاک و خێزان بە خێزانی دانیشتووانی کەرکوک و ناوچە جێناکۆکەکانی لەسەر بەندە.
ئاماژەی بەوەشکردووە، "لەو سۆنگەیەوە دەبێت هەموومان بەبێ جیاوازیی و بەو پەڕی پەرۆشی و هەستی کوردایەتییەوە لەم سەرژمێرییەدا بەشداریی بکەین و ناوی خۆمان و خێزانەکانمان تۆمار بکەین".
هاوکات ئاسۆ مامەند داوا لە ئاوارەکانی دانیشتووی ناوچەکانی هەرێمی کوردستان دەکات، بۆ ئەوەی مافی کەرکوکی بوون لەدەست نەدەن بە زوویی بگەڕێنەوە کەرکوک و شوێنەکانی خۆیان و بەشداریی لەم پرۆسە چارەنووسسازەدا بکەن، چونکە ئەم سەرژمێرییە شوێنی سەرجەم سەرژمێرییەکانی پێشوو دەگرێتەوە بە سەرژمێری ساڵی ١٩٥٧ـەوە، بۆیە پەلە بکەن و بگەڕێنەوە زێدی باوک و باپیرتان و ناوی خۆتان تۆمار بکەن.
خزمەتگوزاری بیمەی تەندروستی بۆ هێزەكانی پێشمەرگە دابیندەكرێت و هەر پێشمەرگەیەكی بەشداربووی خزمەتگوزاییەكە ٧٠٪ـی خەرجی بۆ دەگەڕێنرێتەوە.
فەرمانگەی میدیا و زانیاری حكومەتی هەرێم لە راگەیەندراوێكدا بڵاویكردووەتەوە، خزمەتگوزاری بیمەی تەندروستی بۆ هێزەكانی پێشمەرگە دابیندەكرێت، كە سیستەمێكە لە رێگەیەوە هەر پێشمەرگەیەك لەكاتی نەخۆشی و چارەسەردا، بەشێك لە تێچووی چارەسەرەكەی لە نەخۆشخانە حكومی و تایبەتەكان بۆ دەگەڕێنرێتەوە.
هاوكات، د.رەزا ئیسماعیل، بەڕێوەبەری كاروباری پزیشكی گشتی پێشمەرگە رایگەیاند، لەرێگەی لیژنەی تایبەتمەندی پزیشكییەوە بڕیار لەسەر جۆری نەخۆشی و چارەسەری پێشمەرگە دەدرێت و دواتر رێگەپێدانی پێشوەختەی بۆ سوودمەندبوون لە خزمەتگوزارییەكە بۆ دەكرێت.
ئەوەشی خستەڕوو، ئەو پێشمەرگانەی رێگەپێدانی پێشوەختەیان هەیە تاكو لە ٧٠٪ـی تێچووی چارەسەرەكەیان بۆ دەگەڕێتەوە، ئەو پێشمەرگانەشی رێگەپێدانی پێشوەختەیان نییە، لە رێگەی لیژنەی تایبەتمەندی پزیشكییەوە بەدواداچوون بۆ دۆسییەكەی دەكرێت و تاكو لە ٢٥٪ـی تێچووی چارەسەرەكەیان بۆ دەگەڕێنرێتەوە.
بافڵ جەلال تاڵەبانی سەرۆکی یەکێتیی نیشتمانیی کوردستان، پرسەنامەیەک ئاڕاستەی تێکۆشەر و پێشمەرگەی دێرین جەمال مەلاهۆمەری دەکات و دەڵێت، "بەداخێكی زۆرەوە هەواڵی کۆچی دوایی کاک ئامانجی کوڕتانم پێگەیشت، بۆ ئەم خەمە گەورەیە پرسە و هاوخەمیی قووڵی خۆمان ئاڕاستەی ئێوەی سەربەرز و خزمانی زەنگەنە دەكەم".
دەقی پرسەنامەکە...
هەڤاڵی تێکۆشەر و پێشمەرگەی دێرین کاک جەمال مەلاهۆمەری
بەڕێزان لە خزمانی زەنگەنە
بەداخێكی زۆرەوە هەواڵی کۆچی دوایی کاک ئامانجی کوڕتانم پێگەیشت. بۆ ئەم خەمە گەورەیە پرسە و هاوخەمیی قووڵی خۆمان ئاڕاستەی ئێوەی سەربەرز و خزمانی زەنگەنە دەكەم كە نموونەی باڵای خەبات و تێكۆشانن لەپێناو كوردستان.
لەخوای گەورە داواكارم كۆچكردوو بە بەهەشتی بەرین شادبكات و سەبووری بەهەموولایەك ببەخشێت.
دڵسۆزتان
بافڵ جەلال تاڵەبانی
سەرۆکی یەکێتیی نیشتمانیی کوردستان
بەڕێوەبەرایەتی كەشناسی عیراق رایگەیاند، شەپۆلێكی باران بارین روو لە عیراق دەكات و بەشێكی هەرێمی كوردستان دەگرێتەوە و پلەكانی گەرما زیاتر نزمدەبنەوە.
بەڕێوەبەرایەتی كەشناسی عیراق لە راگەیەنراوێكدا ئاماژەی بەوەكردووە، ئەمڕۆ بەهۆی هاتنی بارستە هەوایەكی سارد لە دەریای ناوەڕاستەوە هەورێكی چر لە رۆژئاوای وڵات دروست دەبێت و پێشبینی دەكرێت بارانی مامناوەند ببارێت.
دەشڵێت، بەرەبەیانی سبەینێ باران لە موسڵ و هەولێر و دهۆك و چەند ناوچەیەكی هەرێم دەبارێت و رەشەبا هەڵدەكات و تەم دروست دەبێت.
هاوكات، دەستەی كەشناسی هەرێمیش رایگەیاند، ئەمڕۆ و سبەینێ ئاسمان لە نێوان ساماڵ و پەڵە هەور دەبێت.
لە پارێزگای بەدلیسی باكوری كوردستان بۆ ماوەی دوو رۆژ هەموو جۆرە خۆپیشاندان و چالاكییەك قەدەغە دەكرێت.
پارێزگاری بەدلیس رایگەیاند، رۆژانی شەممە و یەكشەممە بۆ ماوەی دوو رۆژ چالاكی مەدەنی و هەموو جۆرە خۆپیشاندان و گردبونەوەیەك قەدەغەیە، هەروەها هەموو جۆرە بڵاوكراوەیەكی میدیایی و كەمپینی مانگرتن و دانانی سەكۆی بانگەشە قەدەغەدەكرێت.
ئاماژەی بۆ ئەوەشكردووە، قەدەغەكردنی خۆپیشاندان و چالاكی بۆ پارێزگاریكردنە لە ماف و ئازادییەكانی كەسانی دیكە.
ئەوەش لە كاتێكدایە مانگی رابردوو بە بڕیاری وەزارەتی ناوخۆی توركیا چەند سەرۆك ئاشەوانییەك لە شارەكانی باكوری كوردستان لە كارەكانیان دوور خرانەوە و قەیوم لە شوێنەكانیان دانرا، بەوهۆیەشەوە لە زۆربەی شارەكان گردبونەوەی و نارەزایەتی و خۆپیشاندان ئەنجام درا.
خولی چوارەمی دەرچوونی خوێندكارانی كۆلیژی سەربازیی قەڵاچوالان بەڕێوەدەچێت و سەرۆكی هەرێمی كوردستانیش بەشداری تێدا دەكات.
ئەمڕۆ ١٦ی تشرینی دووەم، نێچیرڤان بارزانی سەرۆكی هەرێمی كوردستان لە ئاهەنگی دەرچووانی خولێكی نوێی خوێندكارانی كۆلێژی سەربازیی قەڵاچوالان بەشداریدەكات و لە ئاهەنگەكەدا سەرۆكی هەرێم وتارێك پێشكەش دەكات.
ساڵانە دەرچووانی كۆلێژی سەربازیی زاخۆ و كۆلێژی سەربازیی قەڵاچوالان، لە بەردەم سەرۆكی هەرێمی كوردستاندا سوێندی یاسایی دەخۆن و بڕوانامەی سەربازییان پێ دەدرێت.
بڕیارە رۆژانی ٢٠ و ٢١ـی ئەم مانگە سەرژمێری گشتی لە تەواوی عیراق و هەرێمی كوردستان ئەنجامبدرێت، شارەزایەكی بواری سەرژمێریش چەندین زانیاری و رێنمایی گرنگ لەبارەی پرۆسەكەوە دەخاتەڕوو.
هاوڕێ تۆفیق، شارەزای بواری سەرژمێری، لە روونكردنەوەیەكدا لەبارەی پرۆسەكەوە دەڵێت، ماوەی رۆژانی سەرژمێری ١٥ رۆژە، رۆژانی ٢٠ و ٢١ـی ئەم مانگەش كە كراون بە پشووی رەسمی و قەدە‌غەی هاتوچۆ، لەو دوو رۆژەدا تیمەكانی ژمێركار ژمارەی خەڵك و خێزان تۆمار دەكەن، ١٣ رۆژەكەی تریش، تەواوی زانیاری فۆرمی ئەلیكترۆنی سەرژمێری تۆمار دەكەن.
ئاماژەی بەوەشکردووە، ئەو هاووڵاتیانەی لە رۆژانی ٢٠ و ٢١ـی ئەم مانگەدا، لە كاردان و پیشەكانیان ئێشكگرییە، وەكو كەرتەكانی پزیشكی و سەربازیی و ئەمنی و میدیایی، دەتوانن كارتی نیشتمانی خۆیان لای خێزانەكانیان بەجێبهێڵێن و تیمەكانی سەرژمێری تۆماریان دەكەن، هەروەها ئەو هاووڵاتیانەی لە رۆژانی سەرژمێریدا لە دەرەوەی وڵاتن، ئەوانیش دەتوانن كارتی نیشتمانی لای كەسوكاری پلە یەكیان وەك "دایك و باوك و خوشك و برا" دابنێن و لەلایەن تیمەكانی سەرژمێرییەوە تۆماردەكرێن.
روونیشیكردووەتەوە، ئەگەر بە هەر هۆكارێك رۆژانی سەرژمێری هاووڵاتیەك تۆمار نەكرێت، ئەوا مافی وڵاتنامەی لێ وەرناگیرێتەوە، هەروەها ئەو هاووڵاتیانەی لە دەرەوەی وڵاتن پاش سێ مانگی دیكە لە رێگەی كونسوڵخانەی عیراق لە وڵاتان لە سەرژمێرییەكەدا تۆمار دەكرێن.
هاوڕێ تۆفیق داواشیكردووە، ئەو هاوڵاتییانەی خەڵكی كەركوك و ناوچەكانی دیكەی ماددەی ١٤٠ـن لە پرۆسەكەدا بگەڕێنەوە شارەكانی خۆیان بۆ پاراستنی ناسنامەی مێژوویی شارەكانیان.
بەپێی یاسا كارپێكراوەكانی دەستەی ئاماری عیراق، پێویستە پرۆسەی سەرژمێری هەر ١١ ساڵ جارێك ئەنجامبدرێت و تێیدا هاووڵاتی پابەندكراوە بەشداری پرۆسەكە بكات، هەر هاوڵاتییەكیش بەشداری پرۆسەكە نەكات سزای زیندانی و دارایی دەدرێت و سزاكانیش بەم شێوەیەن:
ئەگەر هاووڵاتی رێگریكرد سەرژمێری بكەن، سزای زیندانی دەدرێت بۆ ماوەیەك كە لە سێ ساڵ زیاتر نەبێت و سزای داراییەكەشی لە سێ ملیۆن دینار كەمتر و لە پێنج ملیۆن دینار زیاتر نابێت.
هەروەها، ئەگەر هاووڵاتی زانیاری ناڕاست لە سەرژمێرییەكەدا بخاتەڕوو، سزای زیندانی دەدرێت بۆ ماوەیەك كە لە حەوت ساڵ كەمترنەبێت و سزای داراییەكەشی ، لە پێنج ملیۆن دینار كەمتر و لە ١٠ ملیۆن دینار زیاتر نابێت.
وەزارەتی خوێندنی باڵا ١٠ رۆژ مۆڵەت دەداتە ئەو خوێندکارانەی لە دەرەوەی وڵات دەخوێنن بگەڕێنەوە هەرێمی کوردستان و بەشداری پرۆسەی سەرژمێری گشتی بکەن.
وەزارەتی خوێندنی باڵاو توێژینەوەی زانستی هەرێم لە راگەیەنراوێکدا بڵاویکردەوە، بەمەبەستی ئاسانکاری و رەخساندنی دەرفەت بۆ بەشداری لە پرۆسەی سەرژمێری گشتی دانیشتووان لە هەرێمی کوردستان، بڕیاریاندا بە رێگەپێدان بە خوێندکارانی دەرەوەی وڵات بۆ گەڕانەوە بۆ هەرێم بۆ ماوەی ١٠ رۆژ.
ئاماژەی بۆ ئەوەشکراوە، "لە رێکەوتی ١٦ تاکو ٢٦/ ١١/ ٢٠٢٤، ئەو ماوەیەیان بە ماوەی مانەوە بۆ هەژمار دەکرێت".
شارەزایەكی كەشناسی رایدەگەیەنێت، پێشبینی دەكرێت كەشێكی ناجێگیر لە ١٧ تاوەكو ٢٠ـی مانگ روو لە هەرێم و عیراق بكات و شەپۆلێكی باران بارینی مامناوەند زۆربەی ناوچەكان بگرێتەوە.
هەڤاڵ سدیق شارەزای كەشناسی بە كوردسات نیوزی راگەیاند، پێشبینی دەكرێت لە ١٧ تاوەكو ٢٠ـی ئەم مانگە كەشی هەرێمی كوردستان و عیراق ناسەقامگیر بێت و شەپۆلێكی باران مامناوەندی سەرتاسەری سەرجەم ناوچەكان بگرێتەوە.
دەشڵێت، شەپۆلی بارانبارینەكە لە دهۆكەوە دەستپێدەكات و رۆژی دووشەممە بارستە هەوایەكی سارد لە ئەوروپا و روسیاوە روو لە هەرێم دەكات و لە ناوچە شاخاوییە بەرزەكان بەفر دەبارێت.
هاوكات، كەشناسی عیراقیش رایگەیاند، شەپۆلێكی بارانبارین لە رۆژئاوا و باشووری عیراقەوە دەستپێدەكات و پلەكانی گەرما دادەبەزن و لە ناوچە شاخاوییەكانی هەرێمی كوردستان بەفر دەبارێت.
داهاتی نانەوتی ئەم هەفتەیەی سنوری پارێزگاكانی سلێمانی و هەڵەبجە زیاتر لە ١٢ ملیار دینارە و بەراورد بە هەفتەی رابردوو دوو ملیار دینار زیادیكردووە.
ماڵپەری شەفافیەت كە چاودێری داهاتی نانەوتی پارێزگاكانی سلێمانی و هەڵەبجە و ئیدارە سەربەخۆكانی ڕاپەڕین و گەرمیان دەكات بڵاویكردەوە، داهاتی نانەوتی ئەم هەفتەیە لە ٩ تا ١٤ی مانگ، زیاتر لە ١٢ ملیار و ٤٠٢ ملیۆن و ٢٢٦ هەزار دینار بووە كە ٨٥%ی نەختینە و ١٥%ی بەشێوەی چەك بووە.
ئەوەشهاتووە، داهاتەكە بەراورد بە هەفتەی رابردوو، بەڕێژەی ٥١% واتە بەبڕی دوو ملیار دینار زیاتر بووە.
بەپێی ماڵپەرەكە، داهاتی نانەوتی سنوری پارێزگاكانی سلێمانی و هەڵەبجە لەسەرەتای ئەمساڵەوە تائێستا، زیاتر لە ٨٠٦ ملیار و ٦٤٦ ملیۆن دینار بووە، بەراورد بە هەمان ماوەی ساڵی رابردوو ٤١% كەمیكردووە.
فەرمانگەی میدیا و زانیاری هەرێم رایگەیاند، پشوی رۆژانی ١٥ تا ٢٣ی ئەم مانگە تەنیا ئەو فەرمانبەر و خوێندكارانە دەگرێتەوە كە خەڵكی ناوچەكانی ماددەی ١٤٠ی دەستورن.
فەرمانگەی میدیا و زانیاری بڵاویكردەوە، پشووی رەسمی بەهۆی ئەنجامدانی سەرژمێری، لە رۆژی ١٥ تاوەكو ٢٣ی ئەم مانگە تەنیا بۆ فەرمانبەرانی راژەی شارستانی و سەربازی و ئاسایشی ناوخۆ و خوێندكاران دەبێت لە گشت قۆناغەكانی خوێندن لە قوتابخانە و زانكۆكان، كە خەڵكی ناوچەكانی ماددەی ١٤٠ی دەستوری عیراقن.
دەشڵێت، ئەم پشووە جگە لە رۆژانی ٢٠ و ٢١ی مانگی ١١ فەرمانبەرانی هەرێمی كوردستان ناگرێتەوە كە خەڵكی ناوچەكانی ماددەی ١٤٠ی دەستوور نین.
ئەو رونكردنەوەیەش دوای ئەوە دێت پێشتر حكومەتی هەرێم بۆ خەڵكی ناوچەكانی ماددەی ١٤٠ی دەستور ٩ رۆژ پشووی راگەیاند.