کوردستان
مەکتەبی سیاسی یەکێتیی نیشتمانیی کوردستان لە ساڵیادی دامەزراندنی شاری سلێمانیدا پەیامێکی بڵاوکردەوە و رایگەیاند، سلێمانی پایتەختی دێرینی بابان، پایتەختی یەکەمین حکومەتی میللی و پایتەختی شۆڕشگێڕی و رۆشنبیری و فەرهەنگی وڵاتەکەمانە، هەرچی لە تواناماندا بێت بۆ خزمەتكردنی سلێمانی پێشكەشی دەكەین.
دەقی پەیامەکەی مەکتەبی ساسیی یەکێتی...
بە شانازیەوە ئیمڕۆ یادی ۲٤۰ ساڵەی بونیادنانی شاری سلێمانی دەكەینەوە كەلەمێژووی کورد وکوردستان و لە هەناوی کۆمەڵی کوردەواریدا، شوێنێکی گەورەو پێشەنگ وجاویدانی هەیە،شاری سلێمانی پایتەختی دێرینی بابان، پایتەختی یەکەمین حکومەتی میللی و پایتەختی شۆڕشگێڕی و رۆشنبیری و فەرهەنگی وڵاتەکەمانە
وێرای پیرۆزباییمان لەگشت خەڵكی شار ،بە ئەركی لێنەبڕاوی خۆمانی دەزانین لەبەرامبەر ئەو متمانە بەردەوامەی كە سلێمانی بە حزبەكەی خۆیان ، یەكێتیی نیشتمانیی كوردستان هەیانە و بە تایبەتی لەخولی ئەمجارەی هەلبژاردنی پەرلەمانی كوردستاندا دووپاتیان کردەوە، هەرچی لە تواناماندا بێت بۆ خزمەتكردنی زیاتر و زیاتری جوانتركردنی سلێمانی پێشكەشی دەكەین
هەمیشە سەوز و ئاوەدان بێت سلێمانی ، هەمیشە گەشاوە بێت سلێمانی شارە حەیاتەکە
مەكتەبی سیاسی
یەکێتیی نیشتمانیی کوردستان
بافڵ جەلال تاڵەبانی سەرۆکی یەکێتیی نیشتمانیی کوردستان لە یادی بنیاتنانی سلێمانی پەیامێکی بڵاوکردەوە و دەڵێت، سازش ناکەین و رێگە بە هیچ سیاسەتێکی چەوت و نادروست نادەین بەرامبەر ئەم شارە جێبەجێبکرێت، سلێمانی لە رۆحماندایە و وەک چاومان دەیپارێزین.
دەقی پەیامەکەی سەرۆک بافڵ...
ئەمڕۆ بە خۆشەویستییەکی زۆر و دڵێکی پڕ لە هیواوە یادی 240 ساڵەی بونیادنانی شاری سلێمانی دەکەینەوە، یادی شارێك دەکەینەوە کە هەموو رۆژێک شانازییەک بۆ مێژووە زێڕین و درەوشاوەکەی تۆماردەکات و دەگەشێتەوە.
ئەمڕۆ لە قووڵایی دڵمانەوە دروود و سڵاو بۆ هەموو ئەو کەسایەتییە سیاسی، رۆشنبیری و کۆمەڵایەتییانە دەنێرین کە بەشێکی گرنگ و کاریگەری مێژووی شارە حەیاتەکە بوون و سلێمانییان کردە سیمبوولی کوردایەتی و دادپەروەری. بە پێزانینەوە یادی ئەو نووسەر و هونەرمەندانەمان دەکەینەوە کە مۆرکی رۆشنبیرییان بە شاری شاران بەخشی و سەری رێز بۆ مێژووی هەوڵدان و پڕ لە بەرهەمیان دادەنەوێنین. بێگومان دڵسۆزی و خۆڕاگریی سلێمانییە سەربەرزەکانیش لەیادناکەین کە سەرباری هەموو دۆخە سەخت و دژوارەکان، کە سەرەڕای هەموو سزا سیاسی و جیاکارییەکان، وەک گۆیژە بەپێوە مانەوە.
ئەوانەی لە رابردوودا و بە هەر مەبەستێک دژایەتیی سلێمانییان کردووە و بە هەر هۆکارێک ئەم شارەیان فەرامۆشکردووە، بەداخەوە نە ئاشنای مێژووی شارەکەن و نە دەتوانن لەو رۆحە زیندووە ئازادیخوازەی خەڵکەکەی تێبگەن. راستییەکە و حاشای لێناکرێت سلێمانی تاکڕەوی و نادادی رەتدەکاتەوە، بیرە ئازاد و رۆشنگەرەکەی نایەوێت تەسلیمی ئیرادەیەکی فەرزکراوبێت و دژی خواستەکانی بوەستێتەوە. ئەوەی ئەمڕۆ سلێمانی و خەڵکەکەی پێویستییانە، ئاوەدانی و خزمەتگوزارییە. ئەوەی دەبێت پێشکەشی سلێمانی بکرێت پێویستە زۆر لەوە زیاتر بێت کە بە کوردستانی بەخشیووە و دەیبەخشێت. بۆ ئێمەش کە بەرپرسیارێتیی ژیانی خەڵک و جێبەجێکردنی بەڵێنەکانمان لەسەر شانە، سازش ناکەین و رێگە بە هیچ سیاسەتێکی چەوت و نادروست نادەین بەرامبەر ئەم شارە جێبەجێبکرێت، سلێمانی لە رۆحماندایە و وەک چاومان دەیپارێزین.
بافڵ جەلال تاڵەبانی
سەرۆکی یەکێتیی نیشتمانیی کوردستان
لە گەڕەكی بەكرەجۆی شاری سلێمانی، برایەك لە شیرینی خەودا دوو خوشكی خۆی دەكوژێت و بۆ شوێنێكی نادیار هەڵدێت.
پۆلیسی سلێمانی بە كوردسات نیوزی راگەیاند، تائێستا هۆكاری رووداوەكە ئاشكرانەبووە، لە هەمانكاتیشدا بكوژەكە هەڵهاتووە و هێشتا دەستگیرنەكراوە.
هاوكات سامان نادر بەڕێوەبەری فریاكەوتنی سلێمانی بە كوردسات نیوزی راگەیاند، یەكێك لە كچە كوژراوەكان تەمەنی ٢٢ ساڵە و ئەوی دیكەشیان ١٩ ساڵە.
د.لەتیف رەشید سەرۆک کۆماری عیراق لە ساڵیادی بنیادنانی سلێمانیدا پەیامێکی پیرۆزبایی بڵاوکردەوە و رایگەیاند، سلێمانی قوربانی زۆری لە پێناوی تێكۆشانی نیشتمانی و سەربەستیدا پێشكەش كردوە، دڵنیام وەکو شاری رۆشنبیری و نیشتمانپەروەری هەمیشە بە پێشەنگی دەمێنێتەوەو رۆژ بەڕۆژ بەرەو ئاوەدانی زیاتر و پێشکەوتن دەچێت.
پیرۆزبایی سەرۆك کۆماری عیراق
بە بۆنەی ساڵیادی دامەزراندنی شاری سلێمانی
بەبۆنەی یادکردنەوەی تێپەڕبوونی ٢٤٠ ساڵ بەسەر دروستکردنی شاری (سلێمانی)دا، پیرۆزبایی لە خەڵکی شاری هەڵمەت و قوربانی، پایتەختی رۆشنبیری کوردستان ئەکەم. لەم بۆنەیەدا دروود بۆ رووحی پاکی میری بابان ئیبراهیم پاشا دامەزرێنەری سلێمانی دەنێرم، ئەم شارە هەموو وەختێك شاری نوسەران و ئەدیبان و تێکۆشەران بوە، قوربانی زۆری لە پێناوی تێکۆشانی نیشتمانی و سەربەستیدا پێشکەش کردوە.
بەهەزاران لە رۆڵەکانی لە شێرە ژنان و کوڕانی گیانی خۆیان فیدای سەربەستی و ئازادی کردوە، سلێمانی شاری داهێنان و خۆشەویستی و هونەر و ئازایەتی بوە، بەهەق خەڵکەکەی رۆشنبیر و روخۆش و نیشتمانپەروەرن، لەم یادەدا ئەرکی هەموو لایەکمانە خزمەتی شارەکە بکەین، ، دووبارە پیرۆزە.
د.لەتیف رەشید
سەرۆك کۆماری عیراق
سەرۆك وەزیرانی عیراق دڵنیاییداوە بە لێپرسراوانی باڵای هەرێم كە سێ موچەی ئەمساڵی موچەخۆران نافەوتێت و هەفتەی داهاتووش موچەی مانگی دە رەوانەی هەرێم دەكرێت.
سەرچاوەیەكی نزیك لە سەرۆك وەزیرانی عیراق بە میدیاكانی عیراقی راگەیاندوەو، كە سودانی لەمیانەی كۆبوونەوەكانی دوێنێی لەگەڵ لێپرسراوانی هەرێم دڵنیایداوە لەوەی كە موچەی مووچەخۆران بۆ سێ مانگی كۆتایی ئەمساڵ نافەوتێت و رەوانە دەكرێت.
ئاماژەی بەوەشكردووە، وەزارەتی دارایی عیراق داوای لە وەزارەتی درایی هەرێم كردووە بەزووترین كات داهاتی نانەوتی مانگەكانی ئەیلول و تشرینی یەكەم رەوانەی بەغداد بكات.
ئەو سەرچاوەیە راشیگەیاندووە، چەندین كێشە لە لیستی موچە هەبووە، بەڵام لەئێستادا چارەسەركراوە و بڕیارە هەفتەی داهاتوو بەغداد پارەی موچە بۆ مانگی دە رەوانەی هەرێم بكات.
سودانی رۆژی چوارشەممە سەردانی هەرێمی كوردستانی كرد و لەگەڵ بافڵ جەلال تاڵەبانی سەرۆكی یەكێتی و لێپرسراوانی دیكەی باڵای هەرێم كۆبووە و جەختیكردەوە لەسەر چارەسەكردنی كێشەكانی نێوان هەرێم و بەغداد بە تایبەت پرسی موچە.
كۆمەڵەی پیشەسازی نەوتی كوردستان پێشوزای لە بڕیارەكەی حكومەتی عیراق دەكات و ئامادەیی نیشاندا بۆ دەستپێكردنەوەی گفتوگۆكان بۆ هەناردەكردنەوەی نەوتی هەرێم.
كۆمەڵەی پیشەسازی نەوتی كوردستان كە بە ئەپیكۆر ناسراوە لە راگەیەندراوێكدا ئاماژەی بەوەكردووە، پێشوازی لە پێشنیاری ئەنجومەنی وەزیرانی عیراق دەكات بۆ هەمواركردنەوەی مادەی ١٢ی یاسای بودجە كە تایبەتە بە دیاریكردنی نرخی دەرهێنان و گواستنەوەی نەوتی هەرێم.
پێشیوایە دەكرێت بوارێكی تەواو لەئێستادا هەبێت بۆ جێبەجێكردنی داواكارییەكانی پێشوویان كە پەیوەندییان بە مەرجە بازرگانییەكان و گەرەنتی پارەدان بۆ هەناردەكردنی ڕابردوو و داهاتووی نەوتی كوردستانەوە هەیە لەڕێگەی بۆری نەوتی عێراق _ توركیاوە. ئامادەیی خۆیشی نیشانداوە بۆ دەستپێكردنەوەی گفتوگۆكان لەگەڵ لێپرسراوانی باڵای حكومەتی عیراق و هەرێمی كوردستان پێش دەستپێكردنەوەی هەناردەی نەوت.
هەروەها دەڵێت هاوڕایە لەگەڵ پێشنیازەكەی سەرۆك وەزیرانی عیراق و هەرێم بۆ دەستپێكردنەوەی هەناردەكردنی نەوت كە سودی بۆ هەموو خەڵكی عیراق هەیە.
هەفتەی رابردوو ئەنجومەنی وەزیرانی عیراق پێشنیارێكی بۆ هەمواركردنەوەی مادەی ١٢ لە یاسای بودجە پەسەند كرد كە تیایدا بڕی ١٦ دۆلار دیاریكراوە بۆ تێچوی بەرهەمهێنان و گواستنەوەی هەر بەرمیلێك نەوتی هەرێم، لەكاتێكدا پێشتر بە ٢٠ دۆلار دیاریكرابوو.
باڵیۆز د. محەمەد سابیر سەرۆکی دامەزراوەی جەلال تاڵەبانی لە یادی بنتیاتنانی شاری سلێمانیدا پەیامێکی بڵاوکردەوە و رایگەیاند، سلێمانی شارێکی جیاواز لە هەموو شارەکانی دیکەی عیراق و داهێنانی لە هەموو شتێکدا کردووە بۆ خزمەتی خۆی و بووەتە پێشەنگ، شارێك كە هەرگیز سەپاندنی نادادی، جەور و ستەمی قبووڵ نەكردووە دژی وەستاوەتەوە.
دەقی پەیامەکەی...
پیرۆزبایی دامەزراوەی سەرۆک جەلال تاڵەبانی بەبۆنەی ۲٤۰هەمین ساڵڕۆژی یادی دامەزراندنی شاری سلێمانییەوە
لە ٢٤۰هەمین ساڵڕۆژی یادی بنیاتنانی شاری سلێمانیی خۆشەویستدا، جوانترین و گەرمترین پیرۆزبایی لە خۆمان و تاک بە تاکی خەڵکی سەربەرزی شاری هەڵمەت و قوربانی، پایتەختی رۆشنبیریی کوردستان، شاری بابان و شاری شۆڕشی شێخی نەمر دەکەین.
سلێمانی؛ لانکەی شۆڕشگێڕان، مەڵبەندی زیندووی ئازادیخوازان، رووناکبیران و هونەرمەندان بووە و دەبێت، کەلتوورێکی تایبەت بە خۆی هەیە، مێژوویەكی پڕشانازی لە خزمەتكردن بە رۆشنبیران و ئەدەب و فەرهەنگ تۆماركردووە و داگیرسێنەری مەشخەڵی بزاوتی رۆشنبیری، مەعریفی و رەسەنایەتییە.
شاری شاران؛ شارێك كە هەرگیز سەپاندنی نادادی، جەور و ستەمی قبووڵ نەكردووە دژی وەستاوەتەوە و هەمیشە لە پێشەوەی خەبات بووە، نەوەکانی لە شۆڕش، راپەڕین، بزووتنەوەی كوردایەتیدا و وەستانەوە دژی هەموو بەرهەڵستکارییەک و دەنگ دلێر و بێدەنگ نەبوون.
سلێمانی شارێکی جیاواز لە هەموو شارەکانی دیکەی عیراق و داهێنانی لە هەموو شتێکدا کردووە بۆ خزمەتی خۆی و بووەتە پێشەنگ، لەم بۆنە پیرۆزەدا هیوای گەشەكردنی بەردەوام، پێشڕەوی و ئاوەدانی و خزمەتکردنی زیاتر بۆ ئەم شارە پڕ لە جوانییە دەخوازین.
سلێمانی یادت پیرۆز، هەمیشە پڕ یاد و یاوەری جوان بیت.
باڵیۆز د. محەمەد سابیر
سەرۆکی دامەزراوەی سەرۆک جەلال تاڵەبانی
۱٤ی ۱۱ی ٢٠٢٤
دەستەی ئاماری هەرێم ناوی كارمەندانی گرێبەستی وەك بژمێر بۆ ئەنجامدانی پرۆسەی سەرژمێری گشتی دانیشتوانی هەرێمی كوردستان راگەیاند كە نزیكەی ١٩ هەزار كەس ناویان گەڕاوەتەوە.
بەپێی راگەیەندراوێكی دەستەی ئاماری هەرێمی کوردستان، ٦١ هەزار دەرچووی زانكۆ و پەیمانگە بەشێوەی ئۆنلاین لە هەرێمی كوردستان فۆڕمی بوون بە بژمێریان پڕكردووەتەوە.
ئاماژە بەوەشکراوە، زیاتر لە ١٩ هەزار دەرچوو ناوەكانیان گەڕاوەتەوە و بژمێرەكانیش لەسەر بنەمای پێداویستی و شوێنی جوگرافی و قەرەباڵغی دانیشتووان و شوێنی نیشتەجێبوونی خۆیان لەسەر ئاستی گەڕەك یان گوند دەستنیشانكراون.
ئاماری هەرێم ئەوەشی خستەڕوو، ئەو كارمەندانەی ناوەكانیان دەرچووە پێویستە پەیوەندی بە شوێنەكانیان بكەن بۆئەوەی لەكاتی دیاریكراودا لە هۆڵەكانی راهێنان ئامادەبن، لەئەگەری ئامادەنەبوونیش ئەوا شوێنەكانیان بەدەرچوویەكی دیكە پڕ دەكرێتەوە.
لەدوای دیدار و كۆبوونەوەكانی لە هەولێر، ئێوارەی ئەمڕۆ سەرۆكی وەزیرانی عیراق سەردانی سلێمانی دەكات و لەگەڵ سەرۆكی یەكێتی كۆدەبێتەوە و تاوتوێی تەوتین و پێكهێنانی حكومەت دەكەن.
محەمەد شیاع سودانی سەرۆك وەزیرانی عیراق لە فڕۆكەخانەی نێودەوڵەتی سلێمانی لەلایەن قوباد تاڵەبانی جێگری سەرۆكی حكومەتی هەرێم پێشوازی لێدەكرێت و دواتر سەردانی مەزاری سەرۆك مام جەلال دەكات.
بڕیارە دواتریش، سودانی سەردانی دەباشان بكات و لەگەڵ بافڵ جەلال تاڵەبانی سەرۆكی یەكێتی كۆببێتەوە.
بەپێی زانیاریەكانی كوردسات نیوز، لە كۆبوونەوەكەدا سەرۆك بافڵ و سودانی تاوتوێی موچە و بەبانكیكردنی موچەی موچەخۆرانی هەرێم و پێكهێنانی كابینەی نوێی حكومەتی هەرێم و پەیوەندییەكانی هەولێر و بەغداد دەكەن.
لە چوارچێوەی سەردانەكەیدا بۆ هەرێمی كوردستان، محەمەد شیاع سودانی سەرۆك وەزیرانی عیراق لەگەڵ نێچیرڤان بارزانی سەرۆكی هەرێم كۆبووەوە و جەختیانكردووە لەسەر دوورخستنەوەی وڵات لە لێكەوتەكانی ململانێی هەرێمی.
بەپێی راگەیەندراوێكی سەرۆكایەتی هەرێمی كوردستان، لە كۆبونەوەكەدا ئەنجامەكانی هەڵبژاردنی پەرلەمانی كوردستان و هەنگاوەكانی پێكهێنانی كابینەی نوێی حكومەتی هەرێم و پەیوەندییەكانی هەولێر ـ بەغداد، هەروەها دوایین پێشهاتەكانی ناوچەكە، تاوتوێكراون.
سودانی ستایشی بەشداریی بەرفراوانی هاووڵاتیانی هەرێمی كوردستانی لە پرۆسەی هەڵبژاردندا كردووە و هەردوولاش جەختیانكردووەتەوە لەسەر گرنگیی بەهێزكردنی میكانیزمەكانی هەماهەنگی هاوبەش و پێویستی چارەسەركردنی دۆسیە هاوبەشەكانی هەولێر و بەغداد لەڕێی دیالۆگی بیناتنەر و پابەندبوون بە دەستوری عێراقەوە. هەروەها هاوڕابوون لەسەر گرنگیی بەردەوامبوونی گفتوگۆ بۆ بەهێزكردنی هاوكاری و پەرەپێدانی پەیوەندییەكانی نێوانیان.
لە تەوەرێكی دیكەی كۆبوونەوەكەدا، پێشهاتەكانی ڕۆژهەڵاتی ناوەڕاست و كاریگەرییەكانی لەسەر عێراق تاوتوێكراون و هەردوولا جەختیانكردووەتەوە لەسەر پێویستیی دوورخستنەوەی وڵات لە لێكەوتەكانی ململانێی هەرێمی و كاری هاوبەش بۆ پاراستنی ئاسایش و سەقامگیری.
لە دوایی هەولێر، دوانیوەڕۆی ئەمڕۆ سودانی سەردانی سلێمانی دەكات و قوباد تاڵەبانی لە فڕۆكەخانەی نێودەوڵەتی سلێمانی پێشوازی لێدەكات و دواتر لەگەڵ سەرۆكی یەكێتی لە دەباشان كۆدەبێتەوە.
دادگای فیدراڵی عیراق بۆ بڕیاردان لەبارەی سكاڵایەكی تایبەت بە زەوی جوتیارانی كورد لە سنوری داقوق و سەرگەڕان لە كۆبوونەوەدایە.
ئەمڕۆ ١٣یەمین و كۆتا دانیشتنی دادگای فیدراڵی لەبارەی هەڵوەشانەوەی بڕیارەكانی ئەنجومەنی سەركردایەتی شۆڕش كە بە قیادە سەورە ناسراوە، بۆ یەكلاییكردنەوەی زەوی جوتیارانی كورد لە داقوق و سەرگەڕان بەڕێوەدەچێت.
پەیامنێری كوردسات نیوز رایگەیاند، كۆبوونەوەی دادگا بەردەوامی هەیە بۆ بڕیاردان لەسەر نادەستووریبوونی بڕیاری ئەنجومەنی سەورە لە ساڵی ١٩٧٧كە تایبەتە بە زەوتكردنی زەوی جوتیاران لەچەند پارێزگایەك لەنێویشاندا كەركوك.
وتیشی، نوێنەری جوتیارانی هەردوو سنوری سەرگەڕان و داقوقی سەر بە پارێزگای كەركوك لە دانیشتنەكە ئامادەن.
پێشتر جوتیارانی سەرگەڕان و داقوق دوو سكاڵایان لە دادگای فیدڕاڵی تۆماركردبوو بۆ هەڵوەشاندنەوەی هەردوو بڕیاری پێشووی بەعس كە بەهۆیەوە ٨٤ هەزار دۆنم زەوی لە جوتیارانی كورد وەرگیراوەتەوە و عەرەبی هاوردە جێیان گرتوونەتەوە.
محەمەد شیاع سودانی سەرۆك وەزیرانی عیراق گەیشتە هەولێری پایتەختی هەرێمی كوردستان و لەگەڵ لێپرسراوانی باڵای هەرێم تاوتوێی پرسەكانی موچە و بودجە و پێكهێنانی حكومەت دەكات.
بەیانی ئەمڕۆ سودانی لەڕێی فرۆكەخانەی نێودەوڵەتی هەولێرەوە گەیشتە هەرێمی كوردستان و لەلایەن سەرۆكی حكومەت و بەشێك لە وەزیرەكانەوە پێشوازی لێكرا.
دوای كۆبوونەوەی لەگەڵ سەرۆكی حكومەت و سەرۆكی هەرێم و لایەنە سیاسییەكان، سودانی سەردانی سلێمانی دەكات و لە دەباشان لەگەڵ بافڵ جەلال تاڵەبانی سەرۆكی یەكێتیی نیشتیمانیی كوردستان كۆدەبێتەوە.
ئامانجی سەردانەكەی سودانی بۆ هەرێمی كوردستان، تاوتوێی دەرئەنجامی هەڵبژاردنی پەرلەمانی كوردستان و پێكهێنانی كابینەی دەیەمی حكومەتی هەرێمی كوردستانە لەگەڵ لایەنەكان.
تەوەرێكی تری كۆبوونەوەكانی سودانی و لایەنەكان، پەیوەندییەكانی هەولێر و بەغداد و پرسەكانی موچە و بودجە و دەستپێكردنەوەی هەناردەی نەوتە، هاوكات تاوتوێی پەیوەندییەكانی نێوان یەكێتی و پارتییش دەكرێت.
سودانی لە هەولێر لەگەڵ عەلی باپیر و سەرۆكی پارتی كۆدەبێتەوە و لە سەعات چوار دەگاتە سلێمانی و لەلایەن قوباد تاڵەبانییەوە لە فڕۆكەخانەی نێودەوڵەتی سلێمانی پێشوازی لێدەكرێت و بەرەو دەباشان بەڕێدەكەوێت.
ئەمڕۆ ناوی زیاتر لە ١٥ هەزار كەس وەك بژمێر بۆ پڕۆسەی سەرژمێری گشتی رادەگەیەنرێت كە پێشتر فۆڕمی دامەزراندنیان پڕكردبووەوە.
شوان جەبار یاریدەدەری سەرۆكی ژووری ئۆپراسیۆنی سەرژمێری گشتی دانیشتوان لە هەرێمی كوردستان بە كوردسات نیوزی راگەیاند، بە ئەگەرێكی زۆرەوە ئەمڕۆ ناوی بژمێرەكان رادەگەیەنرێن و زۆربەی كێشە تەكنیكییەكانیش لەوبارەیەوە چارەسەركراون.
پێشتر نزیكەی ٦١ هەزار دەرچووی زانكۆ و پەیمانگەكان فۆڕمیان بۆ كارمەندی بژمێر لە پڕۆسەی سەرژمێری دانیشتوان پڕكردبووەوە كە تەنها زیاتر لە ١٥ هەزار كەس ناویان رادەگەیەنرێت.
بڕیارە لە رۆژانی ٢٠ و ٢١ی ئەم مانگەدا سەرژمێری گشتی دانیشتوان لە عیراق و هەرێمی كوردستان ئەنجامبدرێت و دوای شەش هەفتە ئەنجامەكەی رابگەیەنرێت جگە لە ناوچە جێناكۆكەكان.
قائیمقامی چەمچەماڵ رایدەگەیەنێت، ژمارەیەك خاوەن موەلیدە لەسەر كوژاندنەوەی كارەبا لە هاووڵاتیان دەستگیركراون و ژمارەیەكی دیكەشیان خۆیان رادەستدەكەن.
رەمك رەمەزان قائیمقامی چەمچەماڵ بە كوردسات نیوزی راگەیاند، شەوی رابردوو لەلایەن هێزە ئەمنییەكانەوە بەشێك لەخاوەن موەلیدەكان دەستگیركراون و ژمارەیەكیشیان خۆیان پەیوەندیانكردووە و خۆیان رادەستی یاسا دەكەن.
وتیشی، ناوی تەواوی خاوەن موەلیدەكان دراوە بەهێزە ئەمنییەكان، هەر خاوەن مۆلیدەیەكیش خۆی رادەست نەکات، دەستگیر دەكرێت و توندترین سزا دەدرێت.
ئێوارەی سێشەممە خاوەن موەلیدەكانی چەمچەماڵ زیاتر لە سەعاتێك كارەبایان لە هاووڵاتیان كوژاندەوە و مانگرتنیان راگەیاند، بە پاساوی كەمی نرخی موەلیدە، بەو هۆیەشەوە لەسەر سكاڵای قائیمقامی چەمچەماڵ فەرمانی دەستگیركردن بۆ خاوەن موەلیدەكان دەركرا.
ئەندامێكی فراكسیۆنی یەكێتی لە ئەنجومەنی نوێنەران رایگەیاند، سەرۆك وەزیرانی عیراق بەڵێنی بە فراكسیۆنی یەكێتی داوە قسەی جدی لەگەڵ حكومەتی هەرێم بكات بۆ بە بانكیكردنی موچەی فەرمانبەران.
كاروان یاروەیس ئەندامی فراكسیۆنی یەكێتی لە ئەنجومەنی نوێنەران رایگەیاند، هەفتەی رابردوو وەفدی یەكێتی لەگەڵ سەرۆك وەزیرانی عێراق كۆبوونەتەوە، سەبارەت بەجێبەجێكردنی بڕیاری دادگای باڵای فیدراڵی بۆ تەوتینی موچە گفتوگۆیان كرد، یاداشتی فراكسیۆنی یەكێتی و ئیمزای سەرۆكی چوار فراكسیۆنی كوردستانی و ١٣٨ پەرلەمانتاری عیراقیان پێشكەشكردوە.
ئاماژەی بۆ ئەوەشكردوە، سەرۆك وەزیرانی عیراق بەڵێنیدا لەژێر رۆشنایی ئەو یاداشتە و ئیمزای پەرلەمانتاران و پێداگری یەكێتی، لەگەڵ حكومەتی هەرێم قسەی جدی بكات بۆ چارەسەركردنی كێشەكە و لەبارەی تەوتینەوە بگەن بە چارەسەرێك، كە هەموولایەك رازی ببن و پێچەوانەی بڕیاری دادگاش نەبێت.
بەهۆی كوژاندنەوەی موەلیدە ئەهلییەكانەوە بۆ ماوەی زیاتر لە سەعاتێك، قائیمقامی چەمچەماڵ بڕیاری دەستگیركردنی بۆ خاوەن موەلیدەكان دەركرد.
ئەندازیار ئەردەڵان محەمەد بەڕێوەبەری دابەشكردنی كارەبای چەمچەماڵ بە كوردسات نیوزی راگەیاند، پلانی كارەبا بەپێی وەرزەكان لەلایەن وەزارەتی كارەبای هەرێمەوە گۆڕانكاری بەسەردادێت، لەم وەرزەدا بەپێی رێنمایی دەبێت موەلیدە ئەهلییەكان لە شەواندا كارەبا بدەنە هاووڵاتیان، ئەوەش نیگەرانی خاوەن مولیدەكانی لێكەوتووەتەوە و مانیانگرتووە.
وتیشی، بەوهۆیەوە هاوڵاتییان لەسەعات ٥ـی ئێوارە تا سەعات ٦ و ١٥ خولەك بێ كارەبا بوون و دوای ئاگاداركردنەوەی كارەبای سلێمانی كارەبای نیشتمانی بۆ چەمچەماڵ گەڕاوەتەوە و كێشەكە بە كاتی چارەسەر كراوە.
قائیمقامیەتی قەزای چەمچەماڵیش رایگەیاندوە، لەسەر سكاڵای قائیمقامیەتی چەمچەماڵ و بە بڕیاری دادوەر، فەرمانی دەستگیركردن بۆ خاوەنی مۆلیدەكانی چەمچەماڵ دەركرا، لەبەرئەوەی ئێوارەی ئەمڕۆ كارەبای مۆلیدەیان كوژاندوەتەوە، بە بڕیاری دادوەر فەرمانی گرتن بۆ سەرجەم خاوەنی مۆلیدەكان دەركراوە.