وەزیری نەوتی عیراق: هەرێمی كوردستان رۆژانە 286 هەزار بەرمیل نەوت بەرهەمدەهێنێت
٢٤ی ئازاری ٢٠٢٥
وەزیری نەوتی عیراق دەڵێت، لە یاسای بودجەدا 16 دۆلار بۆ بەرهەمهێنانی بەرمیلێك نەوتی هەرێمی كوردستان تەرخانكراوە.
حەیان عەبدولغەنی وەزیری نەوتی عیراق لە چاوپێكەوتنێكی تەلەفزیۆنیدا لەبارەی نەوتی هەرێمی كوردستان رایگەیاند، وەزارەتی نەوتی عیراق دەسەڵاتی بەرهەمهێنانی نەوتی لە هەرێمی كوردستان نییە، لە یاسای بودجەشدا 16 دۆلار بۆ بەرهەمهێنانی هەر بەرمیلێك نەوتی هەرێم دیاریكراوە.
وتیشی، بە رێكخراوی ئۆپیكیان وتووە لە ئێستادا هەرێمی كوردستان رۆژانە 286 هەزار بەرمیل نەوت بەرهەمدەهێنێت.
وەزیری نەوت لەو چاوپێكەوتنەدا باسی لەوەشكرد، هەناردەی نەوت بۆ بازاڕەكانی ئەفریقا تاوتوێ دەكەن، لە ئێستاشدا لە 70%ـی نەوتی عیراق بۆ بازاڕەكانی ئاسیا هەناردە دەكرێن، دەرگاش كراوەیە بۆ كۆمپانیاكانی ئەمریكا بە مەبەستی وەربەرهێنان لە كەرتی نەوتی عیراق.