نوسینگەی بنیامین ناتانیاهۆ، سەرۆک وەزیرانی ئیسرائیل ئەمڕۆ رایگەیاند کە ناتانیاهۆ سبەی یەکشەممە بەرەو واشنتن بەڕێ دەکەوێت و لەگەڵ گەیشتنی، کۆبوونەوەیەک لەگەڵ دۆناڵد ترەمپ، سەرۆکی ئەمەریکا ئەنجام دەدات.

بەپێی راگەیەنراوی فەرمی سەرۆکایەتیی حکوومەتی ئیسرائیل، لەم کۆبوونەوەیەدا هەردوولا تاوتوێی سەپاندنی باجی گومرگی و هەڕەشەکانی ئێران دەکەن.

هاوکات، پێگەی ئاکسیۆسی ئەمەریکی ئاشکرای کردووە کە سەردانەکەی ناتانیاهۆ بۆ واشنتن تەوەری سەرەکیی سەردانەکە، بەرنامە ئەتۆمییەکەی ئێرانە، لەگەڵ پرسی شەڕی غەززە و دەستپێکردنەوەی کردە سەربازییەکانی ئیسرائیل بۆ سەر ئەو کەرتە.

پێگەی ئاکسیۆس هەروەها ئاماژەی بەوەش کردووە کە ناتانیاهۆ دەیەوێت لەبارەی چۆنییەتی هێرشکردنە سەر پێگە ئەتۆمییەکانی ئێران لەگەڵ ترەمپ ڕێک بکەوێت لە ئەگەری شکستهێنانی دانوستانەکان.

شایانی باسە، ئەمە دووەم سەردانی ناتانیاهۆیە بۆ ئەمەریکا لەوەتەی دۆناڵد ترەمپ دووبارە بووەتەوە سەرۆک. 

ئەنجوومەنی وەزیرانی عیراق لە دانیشتنێکی نائاساییدا، کە بە سەرۆکایەتی محەممەد شیاع سوودانی بەرێوەچو، رایگەیاند؛ چوار هەنگاوی گرنگ دژ بە سیاسەتی پێناسی گومرگی ترەمپ دەگرنە بەر. 

بەپێی راگەیەندراوێک کە، ئەمڕۆ شەممە  سەرۆکایەتی ئەنجوومەنی وەزیران بڵاویکردوەتەوە، ئەنجوومەنی وەزیران چوار ڕێکاری دەرکردووە کە جەخت لە پەرەپێدانی پەیوەندییە بازرگانییەکان و قووڵکردنەوەی هاوکارییە ئابوورییەکان دەکات لەگەڵ ویلایەتە یەکگرتووەکانی ئەمەریکا.

لە رێکاری یەکەمدا، عیراق پلانی داناوە بۆ "پێشخستن و پەرەپێدانی پەیوەندییە بازرگانییە هاوبەشەکان، لە میانی کردنەوەی دەروازە و دەرچە بۆ دابەشکەر و دەزگا بازرگانییە ئەمەریکاییەکان، چالاککردنی دەزگا بازرگانییە عیراقییەکان، و مامەڵەی بازرگانیی راستەوخۆ لە نێوان سێکتەرە هاوشێوەکانی نێوان عیراق و ئەمەریکا".

سەبارەت بە رێکاری دووەم، حکومەتی عیراق جەختی کردووەتەوە لەسەر "پەرەپێدانی خزمەتگوزاریی بانکی لە نێوان کەرتی بانکی و دارایی لە عیراق و ئەمەریکا، بە شێوەیەک کە بەدیهێنانی بەرژەوەندیی ئابووریی هاوبەش مسۆگەر بکات".

رێکاری سێیەم بریتییە لە پێکهێنانی "تیمێکی دانوستانکار لەگەڵ لایەنی ئەمەریکی بۆ پێداچوونەوە بە بنەماکانی پەیوەندیی بازرگانی لەگەڵ ئەمەریکا، بە ئامانجی باشترکردنی، و دڵنیابوون لە بونیاتنانی پەیوەندیی هاوسەنگی ئابووری و بازرگانیی کە گەرەنتی بەرژەوەندی هاوبەشی نێوان هەردوولا بکات".

لە ڕێکاری چوارەمدا، داوا لە وەزارەتەکانی دەرەوە، دارایی و بازرگانی کراوە "لەگەڵ لایەنە پەیوەندیدارەکانی دیکە، گفتوگۆیەک لەگەڵ هاوتا ئەمەریکاییەکان بکەن بۆ دڵنیابوون لە بەهێزی پەیوەندییە بازرگانییەکان و چاودێریکردنی بازاڕە داراییەکان".

رۆژی پێنجشەممە، دۆناڵد ترەمپ، سەرۆکی ئەمەریکا بڕیاری سەپاندنی باجی گومرگی بەسەر 180 وڵات ئیمزا کرد. 

بەڕێوەبەرایەتی بەرگری شارستانی ئیدارەی سەربەخۆی سۆران هۆشداری داوە بە هاووڵاتیان سەبارەت بە بەردەوامی شەپۆلی بارانبارین و مەترسی بارینی تەرزە لە ناوچەکە لە رۆژانی داهاتوودا.

لە راگەیەندراوێکدا کە وێنەیەکی گەیشتووە بە کوردسات نیوز، بەڕێوەبەرایەتی بەرگری شارستانی هۆشداری داوە کە "شەپۆلی باران بارین و تەرزە کۆتایی نەهاتووە و ئەگەری بەردەوامبوونی هەیە، بەتایبەتی لە سنووری ئیدارەی سەربەخۆی سۆران".

لە راگەیەندراوەکەدا هاتووە: "تەواوی هێزەکانمان لە ئامادەباشیدان بەمەبەستی رووبەڕووبوونەوەی هەر رووداوێکی لەناکاو." هەروەها چەند رێنماییەکی گرنگیش بۆ هاووڵاتیان دەرکراوە بۆ پاراستنی ماڵ و موڵکیان لە زیانی ئەگەری بارینی تەزرە.

بەپێی ڕاگەیەندراوەکە، داوا لە هاووڵاتیان دەکرێت:

- کەلوپەل و ڕۆشنایی ماڵەکانیان داپۆشن
- خاوەن ئۆتۆمبێلەکان ئۆتۆمبێلەکانیان ببەنە گەراج ئەگەر هەیانبێت
- یاخود ئۆتۆمبێلەکانیان داپۆشن بە کەلوپەلی پێویست

بەڕێوەبەرایەتی بەرگری شارستانی جەختی کردۆتەوە کە ئەم هەنگاوانە بۆ ئەوەیە هاووڵاتیان "دووچاری زیانی ماددی نەبن".

بەپێی زانیارییەکانی کوردسات نیوز، لە ماوەی ڕۆژانی رابردوودا، بارانێکی بەخوڕ و تەزرە بارین لە سنووری ئیدارەی سەربەخۆی سۆران بووەتە هۆی زیانگەیاندن بە ژمارەیەک ئۆتۆمبێل و خانووی هاووڵاتیان، بەتایبەتی لە ناوچەکانی سۆران، خەلیفان و سیدەکان.

بەریوەبەرایەتی کەشناسی هەرێمی کوردستانیش پێشبینی دەکات لە سنووری ئیدارەی سۆران و ناوچەکانی دەوروبەری شەپۆلی خراپی کەشوهەوا بۆ ماوەی 48 سەعآتی داهاتوو بەردەوام بێت.