ساڵح موسلیم رایدەگەیەنێت، كورد بەشێكە لە سوریا و هەرگیز جیا نابێتەوە، هۆشداریشدا لە هەوڵەكانی توركیا بۆ تێكدانی رێككەوتنەكەی نێوان كۆبانێ‌ و شەرع.

ساڵح موسلیم هاوسەرۆكی پارتی یەكێتی دیموكراتی (پەیەدە) لە رۆژئاوای كوردستان لە چاوپێكەوتنێكدا هۆشداری دەدات لە هەوڵەكانی توركیا بۆ تێكدانی ئەو رێككەوتنەی لەنێوان مەزڵوم كۆبانێ‌ فەرماندەی هێزەكانی سوریای دیموكرات (هەسەدە) ‌و ئەحمەد شەرع سەرۆكی سوریا بۆ قۆناغی راگوزەر ئیمزاكراوە.

وتیشی، توركیا ئێستا بووەتە هەڕەشە و بەربەست بۆ هەموو رۆژهەڵاتی ناوەڕاست و دەیەوێت زۆرترین ئاستەنگ دروستبكات، بەڵام كاریگەرییەكی ئەوتۆی نابێت.

راشیگەیاند، كورد خەباتی زۆریكردوە و قوربانی زۆریشداوە لەو رێگایە، بۆیە لە ئێستادا بووەتە فاكتەرێكی سەرەكی لە رۆژهەڵاتی ناوەڕاستدا.

ئاماژەی بەوەشكرد، پێشتریش وتویانە "بەشێكین لە سوریا و هەرگیز نەیانویستوە جیاببینەوە".

ساڵح موسلیم ئاشكراشیكرد، لەچەند رۆژی داهاتوودا هەموو حزبە كوردییەكانی سوریا كۆدەبنەوە و كۆنگرە یان كۆنفرانسێك دەبەستن بۆ باسكردن لە داهاتووی كورد لە سوریا.

ئیسرائیل ژمارەی ئەو سەربازانەی راگەیاند کە بەهۆی شەڕی غەززەوە لە رووی جەستەیی و دەروونی؛ بە زەبری جەنگەوە دەناڵێنن و لەئێستادا چارەسەر وەردەگرن.

وەزارەتی بەرگری ئیسرائیل رایگەیاند، نزیکەی 16 هەزار و 500 سەربازیان بەهۆی شەڕی غەززەوە چارەسەر وەردەگرن، کە حەوت هەزار و 300 سەربازیان توشی گرفت یان نەخۆشی دەروونی بوون.

ئەوەشی خستە روو، بە گشتیی ئەو سەربازانەی گرفتی دەروونیان هەیە، بەدەست شۆکی دوای جەنگ، خەمۆکی و دڵەڕاوکێی توندەوە دەناڵێنن.

ئاماژەی بەوەشکردووە، لەئێستادا چەندین تیمی پزیشکی دەروونی و توێژەریی دەروونیان بۆ چارەسەرکردنی سەربازەکان دابین کردووە.

لە 7ی تشرینی یەکەمی ساڵی 2023، دوای ئەوەی حەماس بە زیاتر لە پێنج هەزار موشەک هێرشی کردە سەر ئیسرائیل، جەنگی نێوان ئیسرائیل و حەماس دەستی پێ کرد، بەهۆی شەڕەکەشەوە بەدەر لە ئیسرائیل، لە غەززەش زیاتر لە 50 هەزار کەس کوژراون، کە زۆرینەیان ژن و منداڵن.

سەرۆکی دەزگای گشتی کاروباری مین داوا لە هاووڵاتیان دەکات، ئاگاداری خۆیان بن بۆئەوەی نەبنە قوربانیی روداوی تەقینەوەی مین. دەشڵێت: ساڵانە زۆرینەی ئاماری تەقینەوەی مین بە هاووڵاتیاندا بەهۆی چوونە بۆ گژوگیای بەهارە.

جەبار مستەفا رەسوڵ سەرۆکی گشتی دەزگای کاروباری مین داوا لە هاووڵاتیان دەکەن، بۆ کۆکردنەوەی گژوگیای بەهارە روو لە ناوچە مەترسیدارەکان نەکەن و گیانی خۆیان نەخەنە مەترسییەوە.

ئاماژەی بەوەشکردووە، دەزگاکە رۆژانە لە رێگەی تیمەکانەوە بەو توانایەی هەیە بەردەوامە لە پاککردنەوەی ناوچە پیسبووەکان بە مین.

دەشڵێت، "بەهۆی زۆری رووبەری پیسبوو و تەقەمەنی نەتوانراوە سەرجەم کێڵگە مینەکان پاک بکرێنەوە، بۆیە داواتان لێدەکەم خۆتان مەکەنە قوربانیی گژوگیای بەهارە".

ئەوەشی خستووەتە روو، بەپێی ئاماری ساڵانەی دەزگاکە زۆرینەی قوربانیانی مین و تەقەمەنی، پەیڕەونەکردنی رێنماییەکانە لەلایەن هاوڵاتیانەوە، لەکاتی نزیکبوونەوەیان لە ناوچە مەترسیدارەکان بۆ کۆکردنەوەی گژوگیای بەهارە.

ئەوەش لەکاتێکدایە، ساڵانە لە وەرزی بەهاردا بەشێکی هاووڵاتیانی کوردستان بە مەبەستی کۆکردنەوەی گژوگیا بەهارەییەکان روو دەکەنە شاخە بەرزەکان. بەهۆی بوونی مین لەو ناوچانە و شارەزانەبوونی بەشێکی هاووڵاتییەکانیش لەبارەی ئەو ناوچانەوە، مینیان پێدا دەتەقێتەوە و بەهۆیەوە تاوەکو ئێستا چەندین روداوی گیانلەدەستدان و برینداربوون یان کەمئەندام بوون رویانداوە.

بەیانی ئەمڕۆش، بەهۆی تەقینەوەی مینەوە لە کوێستانەکانی برادۆست، گەنجێک بەناوی محەمەد هەینی تەمەن 28 ساڵ گیانی لەدەستدا و برایەکیشی بریندار بوو. کە لە سەرەتای ئەمساڵەوە ئەوە سێیەم روداوی تەقینەوەی مینە لەو سنوورەدا.

هەرێمی کوردستان چەندین ناوچەی مینڕێژکراوی لێیە، کە لە سەردەمی رژێمی پێشووی عیراقدا ئەو مینانە بە مەبەستی کۆنتڕۆڵکردنی ناوچە جیاوازەکانی کوردستان چێنراون، ئەگەرچی 34 ساڵ بەسەر روخانی رژێمی بەعسدا تێپەڕیوە و لەو ماوەیەشدا حکومەتی هەرێم بەردەوامبووە لە پاککردنەوەی ناوچەکان لە مین، بەڵام هێشتا بەشێکی خاکی کوردستان بە تەواوی لە مین پاکنەکراوەتەوە.