رۆژهەڵاتی ناوەڕاست
دۆناڵد تڕەمپ رایگەیاند، لەرێگای ئوردون و میسڕەوە دانیشتووانی غەززە دەگوازنەوە، دەشڵێت، غەززە پاکدەکەنەوە.
دۆناڵد تڕەمپ سەرۆكی ئەمریكا لە کۆنفرانسێکی رۆژنامەنووسیدا رایگەیاند، بەمەبەستی جێبەجێکردنی پلانی پاککردنەوەی غەززە، لەگەڵ ئوردون و میسڕ قسەی كردووە بۆ گواستنەوەی دانیشتووانی غەززە بۆ ئەو دوو وڵاتە و وڵاتانی دیكەی دراوسێی غەززە.
تڕەمپ غەززەی بە شوێنێکی وێران ناوبرد و وتیشی، دەکرێت ئەو رێکارە کاتی بێت یان درێژخایەن بێت.
لە درێژەی کۆنفرانسەکەدا سەرۆکی ئەمریکا ئەوەشی روونکردەوە، ئۆکرانیاش هەروا جێناهێڵن و پلانی راگرتنی شەڕی ئۆکرانیا و روسیاشیان هەیە، وتیشی، بە زووترین کات لەگەڵ ڤلادیمێر پوتینی سەرۆکی روسیادا قسە دەکات.
ئەوەش لە کاتێکدایە، لەماوەی ١٥ مانگی شەڕی نێوان ئیسرائیل و غەززەدا، بەشێوەیەکی گشتی زۆرینەی دانیشتووانەکەی ئاوارە بوون و رێکخراوەکانی مافی مرۆڤیش ماوەی چەند مانگێکە باس لە قەیرانی خۆراک و مرۆیی دەکەن لەو کەرتەدا، ئەوە جگە لە سەختی دەستڕاگەیشتن بە غەززە و ناردنی هاوکارییەکان.
ماوەی ئاگربەستی نێوان حزبوڵای لوبنان و ئیسرائیل كۆتایی هات و سوپای ئیسرائیل هۆشداری بە لوبنانیەكان دەدات نەگەڕێنەوە بۆ ناوچەكانی باشوری ئەو وڵاتە.
ئەمڕۆ بەپێی ئەو وادەیەی دانرابوو ئاگربەستی نێوان ئیسرائیل و حزبوڵای لوبنانی كۆتایی هات، بەڵام سوپای ئیسرائیل تائێستا لە باشوری ئەو وڵاتە نەكشاوەتەوە.
میدیای لوبنان بڵاویكردەوە، ئیسرائیل هێرشی كردوەتەسەر باشوری لوبنان و پێنج كەس برینداربوون.
بەپێی رێككەوتنی ئاگربەستی نێوانیان دەبێت لەمڕۆوە ئیسرائیل هێزەكانی لە باشووری لوبنان بكشێنێتەوە، بەڵام سوپای ئیسرائیل هۆشداری داوەتەوە خەڵكی لوبنان كە نەگەڕێنەوە بۆ ناوچەكانی باشوری وڵات.
شەوی 27 ی 11 ی 2024 ئاگربەستی نێوان حزبوڵلای لوبنانی و سوپای ئیسرائیل بۆماوەی 60 ڕۆژ چووە بواری جێبەجێكردنەوە.
دوای چەند ڕۆژێک لە رفاندنی لەلایەن گروپێکی چەکدارەوە، لە شاری حومس، رەشا ئەلعەلی ئەکادیمیست و رەخنەگری سوری بە کوژراوی دۆزرایەوە و ئاماژە بە بڕینەوەی پەنجەکانی دەدەن.
ئەکادیمیست و رەخنەگری سووری رەشا ناسر ئەلعەلی، مامۆستای ئەدەبی عەرەبی لە زانکۆی حومس و ئەندامی یەکێتی نووسەرانی عەرەبی، رۆژی دووشەممەی رابردوو لە کاتی گەڕانەوەی بەرەو ماڵەکەی خۆی رفێنراو پاش سێ رۆژ لە بێسەرو شوێن بوونی، ئەمڕۆ تەرمەکەی بە چەند پەنجەیەکی قرتێنراوەوە دۆزرایەوە.
پێش رووداوی رفاندنەکەی، دکتۆر رەشا ناسر ئەلعەلی لە سۆشیال میدیا تۆمەتبار کرابوو بە هێرشکردنەسەر خوێندکارە کچە باڵاپۆشەکانی لە زانکۆی حومس لە سەردەمی دەسەڵاتی پێشودا.
کورتەیەک دەربارەی دکتۆر ڕەشا:
دکتۆر رەشا کچی پارێزەر ناسر ئەحمەد ئەلعەلی بوو کە بە رەخنەگرێکی سەرسەختی رژێمی پێشوی ئەسەد ناسرابوو، یەکێکە لە ئەکادیمیستە دیارەکانی سوریا لە بواری ڕەخنەی ئەدەبیدا، بڕوانامەی بەکالۆریۆسی لە زمانی عەرەبی لە زانکۆی ئەلبەعس لە ساڵی 1997، و بڕوانامەی ماستەر و دکتۆرای لە نوسینی "نوێ-مۆدێرن" لە زانکۆی عەین شەمس لە میسر لە ساڵانی 2004 و 2009 بەدەستهێناوە. دکتۆرە رەشا چەندین بەرهەمی رەخنەیی بڵاوکردوەتەوە، لەوانە " الأنساق الثقافية في مسرح سعد الله ونوس" (2008)، " ثقافة النسق في السرد النسوي المعاصر" (2011) و " تقنيات قراءة السرد الروائي/ ما قبل النص" (2011). 2012). هەروەها توێژینەوە و لێکۆڵینەوەی ئەدەبی لە گۆڤارە بەناوبانگە عەرەبی و جیهانیەکاندا بڵاوکردۆتەوە. د.ڕەشا، بە روانینە ڕەخنەگرانەکەی بۆ دەسەڵات و کۆمەڵگا دەناسرایەوە و وەک شانۆکارێکی دیار لە جیهانی عەرەبیدا ناسرابو.
ڕفاندنی د. ڕەشا ناڕەزایی بەرفراوانی لێکەوتەوە، یەکێتی نووسەرانی عەرەب (بەر لە تیرۆرکردنی) بەیاننامەیەکی بڵاوکردەوە و تیایدا ئیدانەی رفاندنی کردو داوای لە لایەنە پەیوەندیدارەکان کرد رێوشوێنی بەپەلە بگرنەبەر بۆ ئازادکردن و دڵنیابوون لە سەلامەتی.
ئەمڕۆ 2024/1/25 پاش سێ ڕۆژ لە ڕفاندنی، تەرمی د.ڕەشا دۆزرایەوە و ڕاپۆرتە پزیشکییەکان ئاماژەیان بەوەداوە، د.ڕەشا ئەشکەنجە دراوە و سێ پەنجەشی قرتێنراوە.
ئەم ڕوداوە و چەندین ڕوداوی تر لە سوریای نوێدا، گومانی گەورە دەخاتە سەر دونیا بینی ڕژێمی نوێی سوریا و نووسەران و چالاکوانانیش هۆشیاری دەدەن لە بەرتەسکبوونەوەی ئازادی لە وڵاتەکەیان.
وەفدی ئیمڕاڵی ناوەڕۆكی كۆبوونەوەی دووەمیان لەگەڵ ئۆجەلان بڵاوكردەوە
وەفدی ئیمڕاڵی ناوەڕۆكی كۆبوونەوەی دووەمیان لەگەڵ ئۆجەلان بڵاوكردەوە و دەڵێت، ئەنجامی كۆبوونەوەكانیان لەگەڵ لایەنەكان بە ئۆجالان راگەیاندووە.
ئاماژەیان بەوەشکردووە، هەوڵەكانی ئۆجەلان بۆ ئەم قۆناغە بەردەوامە و دوای تەواوبوونی ئامادەكارییەكان بەیاننامەی پێویست بڵاودەكرێتەوە.
ئەوەشیان خستووەتە روو، "بەردەوام دەبین لە تێكۆشان و پەیوەندیەكانمان، هیوای بەشداری بەنرخ لە هەموو بەشەكانی كۆمەڵگا بۆ ئەم قۆناغە دەخوازین".
ئەوەش هاتووە، "هەر كاتێك پێشكەوتن رووبدات رای گشتیی لێ ئاگادار دەكەینەوە، ئەم پرۆسەیە بۆ هەر كەسێك ژیانێكی ئازاد و هاوبەش دەڕەخسێنێت".
راوێژکاری سەرۆک کۆماری ئێران بۆ کاروباری ستراتیژی رایگەیاند، حکومەتی ئێران بڕیاریداوە فشار خستنە سەر ژنان بۆ پۆشینی باڵاپۆشی کەمتر بکاتەوە.
محەمەد جەواد زەریف راوێژکاری سەرۆکی ئێران بۆ کاروباری ستراتیژی لە کۆڕبەندی ئابووری جیهانیی داڤۆس رایگەیاند، ئەگەر لە شەقامەکانی تاراندا بەرێگادا بڕۆیت دەبینیت بەشێکی زۆری ژنان باڵاپۆش نین و یاساکانی باڵاپۆشی جێبەجێ ناکەن، کە ئەوە کارێکی دژ بە یاسایە، بەڵام حکومەت بڕیاریداوە چیتر فشار نەخاتە سەریان.
باسی لەوەشکرد، بڕیاری ئەوەی فشار نەخرێتە سەر ژنان بۆ باڵاپۆشی بە هەوڵی مەسعود پزیشکیان سەرۆک کۆماری نوێی ئێران دراوە و توانیویەتی بەرپرسەکان رازی بکات لەسەر ئەو بابەتە.
ئەوەش لە کاتێکدایە، پێشتریش پزیشکیان باسی لە کارەکانی پۆلیسی رەوشتی ئێران کردووە و ئەوەی خستووەتە روو، کە کار لەسەر جێبەجێکردنی یاسا کۆمەڵایەتییە توندەکان دەکەن.
پۆشینی باڵاپۆشی لە ئێران بە یاسا سەپێنراوە، بەڵام لەم چەند ساڵەی کۆتاییدا مشتومڕ لەسەر ئەو پرسە زۆر بووە و خەڵک ناڕەزایەتی دەردەبڕن بەرامبەر یاسای باڵاپۆشی زۆرەملێ، لە دوای کوشتنی ژینا ئەمینی ٢٢ ساڵیش لە ساڵی ٢٠٢٢، ئەو پرسە وەک بۆمبێک تەقییەوە و لەماوەی ئەو دوو ساڵەی رابردوودا گەنجان و چالاکوانان بەشێوەیەکی بەرچاو دەستیان بە ئەنجامدانی چالاکی و دەربڕینی ناڕەزایەتی کرد لەژێر ناوی 'ژن، ژیان، ئازادی'.
جگە لەوەی کوژرانی ژینا ئەمینی بووە پرسێکی جیهانیی و خۆپیشاندان و ناڕەزایەتی زۆری بەدوای خۆیدا هێنا و بەدوای ئەوەشدا بزووتنەوەی جیھانیی ژن، ژیان، ئازادی سەری ھەڵدائەو و بزووتنەوەکە لە ساڵی ٢٠٢٣ لەلایەن پەرلەمانی ئەورووپاوە وەک کاندید بۆ خەڵاتی ساخارۆڤ ھەڵبژێردران بۆ بەرگریکردن لە ئازادی و مافەکانی مرۆڤ.
وەزیری دەرەوەی سوریا رایگەیاند، كورد جوانی و رووناكی بۆ رەنگاورەنگی گەلی سوریا زیادكردووە و بەیەكەوە وڵات بنات دەنێنەوە.
ئەسعەد حەسەن شەیبانی وەزیری دەرەوەی سوریا لە تۆڕی كۆمەڵایەتی ئێكس رایگەیاند، كورد جوانی و روناكی بۆ رەنگاورەنگی گەلی سوریا زیادكردووە و گەلی كورد لە سوریا روبەڕوی ستەمبوونەتەوە لەلایەن رژێمی ئەسەدەوە.
دەشڵێت، پێكەوە وڵاتێك بونیاددەنێین هەمووان تیایدا هەست بە یەكسانی و دادپەروەری بكەن.
ئەمە یەكەمین جارە دەسەڵاتی نوێی سوریا پەیام بە زمانی كوردی بڵاوبكاتەوە و پێدەچێت پەیوەندی بە دانوستانەكانی ئەمدوایەی نێوان هەسەدە و دەسەڵاتی نوێی سوریاوە بێت.
سەرۆكی ئیسرائیل رایگەیاند، لە قۆناغی داهاتوودا هەلی سەركەوتنی دانوستانەكان هەیە و وڵاتەكەی تائێستاش بە دەست شۆكی هێرشەكەی 7ی ئۆكتۆبەر دەناڵێنێت.
ئیسحاق هێتسۆگ سەرۆكی ئیسرائیل لە كۆڕبەندی داڤۆس لە سویسڕا رایگەیاند، بەرژەوەندی ئەمنی ئیسرائیل بەندە بە داهاتووی غەززەوە و وڵاتەكەی تائێستاش بەدەست شۆكی هێرشەكەی 7ی ئۆكتۆبەری حەماسەوە دەناڵێنێت.
وتیشی، پێویستە پەند لە رابردوو وەرگرن بۆ ئەوەی دڵنیا ببنەوە لەوەی جارێكی تر هێرشی لەو جۆرە دووبارە نەبێتەوە و تیرۆر بەرۆكی ئەفریقا و جیهانی گرتووە و پێویستە روبەڕوی ببنەوە و ئێران و ئەو گروپانەی لێوەی نزیكن سەرچاوەی خراپەن.
راشیگەیاند، لە قۆناغی داهاتوودا هەلێك هەیە بۆ سەركەوتنی دانوستانی ئاگربەست و مێژووی لوبنان و سوریا گۆڕا و ئومێدەوارە مێژووی كەرتی غەززەش ئەمە رووبدات.
ژمارەی گیانلەدەستدان بەهۆی کەوتنەوەی ئاگر لە هۆتێلی ناوچەیەکی گەشتیاریی تورکیا گەیشتە 76 کەس و بۆ ئەمڕۆ ماتەمینی راگەیەنراوە.
بەرەبەیانی دوێنێ سێشەممە، ئاگر لە هۆتێلی ناوچەیەکی گەشتیاری تایبەت بە خلیسکێنە و تەلەفریکی سەر بەفر لە پارێزگای بۆلۆ کەوتەوە و بەهۆیەوە لە سەرەتادا ئەوە راگەیەنرا، 10 کەس گیانیان لەدەستداوە و 32 کەسی دیکە بریندار بوون.
بەهۆی بەردەوامی ئاگرەکە و تەشەنەسەندنی ژمارەی گیانلەدەستدان و بریندارەکان بەرزبووەوە و بەپێی دوایین ئامارەکانی وەزارەتی ناوخۆی تورکیا، تاوەکو ئێستا 76 کەس گیانیان لەدەستداوە، بەڵام هێشتا ژمارەی بریندارەکان راناگەیەنراوە.
عەلی یەرلی کایا وەزیری ناوخۆی تورکیا ئەوەی خستووەتە روو، هێشتا هۆکاری کەوتنەوەی ئاگرەکە دیار نییە، پرسە و سەرەخۆشی خۆشی ئاڕاستەی کەسوکاری سەرجەم قوربانییەکان کرد.
وتیشی، تاوەکو ئێستا نۆ کەس بە گومانی کردنەوەی ئاگرەکە دەستگیر کراون.
دۆناڵد تڕەمپ سەرۆكی ئەمریكا لە دەستپێكی دەستبەكاربوونیدا رایگەیاند، متمانەی بە ئاگربەستی نێوان ئیسرائیل و بزوتنەوەی حەماس نییە.
ترەمپ لە كۆشكی سپییەوە بە رۆژنامەنووسانی راگەیاند، لە جەنگی غەززەدا بزوتنەوەی حەماس لاواز بوو، كەرتی غەززەش بووەتە ناوچەیەكی وێرانەی گەورە كە ژمارەیەكی زۆر دانیشتووانی تێدایە، بۆیە دەبێت بە شێوازێكی جیاواز نوێ بكرێتەوە.
ئاشكراشی كردووە، ئیدارەكەی هاوكار دەبێت لە دووبارە ئاوەدانكردنەوەی غەززەدا.
تڕەمپ نەشیشاردووەتەوە، متمانەی بە بەردەوامبوونی ئاگربەستی نێوان ئیسرایل و بزوتنەوەی حەماس نییە .
ئەوە لەكاتێكدایە، لە رۆژی یەكشەممەوە رێككەوتنی ئاگربەستی غەززە لە نێوان بزوتنەوەی حەماس و ئیسرائیل چووەتە بواری جێبەجێكردنەوە و لە قۆناغی یەكەمیشدا حەماس سێ بارمتەی ئیسرائیلی لە بەرامبەر 90 دەستگیركراوی فەڵەستینیدا ئازاد كرد.
سەرۆك كۆماری ئێران جەختدەكاتەوە كە هەوڵی دروستكردنی چەكی ئەتۆمی نادەن و ئەوەی دەوترێت تەنها پروپاگەندەی رۆژئاوایە.
مەسعود پزیشكیان سەرۆك كۆماری ئێران رایگەیاند، رۆژئاوا ئێستا هەوڵدەدات بە هەموو جیهان بڵێت ئێران بەدوای خاوەندارێتی چەكی ئەتۆمیدا دەگەڕێت، وتیشی، هیچ كەسێك لە ئێراندا بەدوای ئەو بیرۆكەیەوە نییە و هیچ كات تاران هەوڵی دروستكردنی چەكی ئەتۆمی نادات.
ئاماژەی بەوەشكرد ئەمریكا هەوڵی زۆر دەدات بۆ سەپاندنی فۆبیای ئیران بەسەر كۆمەڵگەی نێودەوڵەتیدا و ئەو ستراتیژەی ڕۆژئاواش تەنها تاران ناكاتە ئامانج، بەڵكو روسیاش دەگرێتەوە، ئەوەش بۆ فشارخستنە سەر خەڵك و گۆڕینی بیروبۆچوونیان.
پزیشكیان جەختیشیكردەوە، ئەگەر ئەو وڵاتانەی بەدوای ئازادی و سەربەخۆییدا دەگەڕێن لە یەكڕیز بن و پشتیوانی یەكتر بكەن، ستەمی رۆژئاوا و سیستمی تاك جەمسەریی نامێنێت.
پزیشكانی بێسنوور دەڵێت، 70%ی دانیشتووانی سوریا پێویستیان بە هاوكاری بەپەلەی مرۆیی هەیەو رەوشی تەندروستی خەڵکەکە زۆر مەترسیدارە.
كارلۆس ئاریاس رێكخەری پزیشكیی لە رێكخراوی پزیشكانی بێسنوور لە سوریا رایگەیاند، كاری مرۆیی لە سوریا رووبەڕووی ئاستەنگی گەورە دەبێتەوە، لە كاتێكدا پێداویستییەكانی دانیشتووانەكەشی روو لە زیادبوون دەكات.
وتیشی، زیاتر لە 70%ی دانیشتووانی سوریا هێشتا پێویستیان بە هاوكاری مرۆیی بەپەلە هەیە، لەكاتێكدا تەنها یەك لەسەر سێی بودجەی پێویست دابین دەكرێت بۆ دابینكردنی پێویستییەكان.
ئەو لێپرسراوەی رێكخراوەكە داواشیكرد، بەپەلە قەبارەی ئەو یارمەتییە مرۆییانەی رەوانەی سوریا دەكرێن لەلایەن كۆمەڵگەی نێودەوڵەتییەوە زیاتر بكرێت، چونكە رەوشی تەندروستی خەڵک لە سوریا زۆر مەترسیدارە، بەتایبەتیش لە حەلەب و دیمەشق.
رۆژی ٨ی ١٢ی ساڵی رابردوو بە رەسمی رووخانی رژێمی بەشار ئەسەد راگەیەنرا و لەو کاتەشەوە سوریا چووەتە قۆناغێکی نوێوە، بەدەر لەوانەش لە چەند ناوچەیەکی سنووری سوریا هێشتا شەڕ و پێکدادان لەنێوان گروپە چەکدارەکان و هێزەکانی سوریادا بەردەوامە، لە رۆژئاوای کوردستانیش بە هەمان شێوە گروپە هاوپەیمانەکانی تورکیا لە هێرشکردنە سەر هاوڵاتیانی مەدەنی ناوچەکە بەردەوامن.
فەرماندەی گشتیی هەسەدە دەڵێت، ئامانجی هێزەكەیان تێكەڵبوونە لەگەڵ سوپای نوێی سوریا، بەبێ ئەوەی هەوڵی دامەزراندنی پەرلەمان و حكومەتێكی جیاواز بدەن.
مەزلوم كۆبانێ فەرماندەی گشتیی هێزەكانی سوریای دیموكرات 'هەسەدە' رایگەیاند، ئامانجی هێزەكانیان روونە و دەیانەوێت ببنە بەشێك لە سوپای نوێی سوریا بەبێ ئەوەی بیر لە دامەزراندنی حكومەت و پەرلەمانی جیاواز بکەنەوە، جەختیشی لە گرنگی بوونی هێزەكانی ئەمریكا لە سوریا كردەوە بۆ لێكنزیككردنەوەی تێڕوانینی لایەنە جیاوازەكان.
ئەو لێدوانەی مەزڵوم كۆبانێ لەدوای ئەوە دێت، مەرهەف ئەبو قەسرە وەزیری بەرگری سوریا رایگەیاندبوو، لەگەڵ ئەوەدان دۆسیەی هەسەدە چارەسەر بكرێت، بەڵام نابێت هەسەدە لەناو سوپای نوێی سوریا وەك هێزێكی جیاواز مامەڵەی لەگەڵ بكرێت.
وەزیری بەرگری سوریا جەختیشی لەسەر پێویستی یەكخستنی سەرجەم هێزە چەكدارەكان كردەوە بە سەركردایەتی وەزارەتی بەرگری.
بڕیارە ئەمڕۆ ئاگربەست لە غەززە دەست پێ بکات؛ ئیسرائیل هۆشداری دەدات
بڕیارە کاتژمێر ٤ی پاشنیوەڕۆی ئەمڕۆ ئاگربەست لە غەززە دەست پێ بکات و سوپای ئیسرائیل رایگەیاندووە، حەماس پابەندی رێککەوتنەکە نییە.
بڕیارە ئەمڕۆ یەکشەممە، ١٩ی ١ی ٢٠٢٥، دوای ١٥ مانگ لە جەنگ، قۆناغی یەكەمی ئاگربەست لە غەززە بە ئاڵوگۆڕی ژمارەیەك بارمتە و زیندانیی دەست پێ بکات.
ئاگربەستەکە کاتژمێر ٤ی پاشنیوەڕۆ دەچێتە بواری جێبەجێکردنەوە، لەگەڵ ئەوەشدا وتەبێژی سوپای ئیسرائیل رایگەیاندووە، حەماس تاوەکو ئێستا پابەندی ئاگربەست نییە و لە هێرشەکانی بەردەوامە.
هۆشداریش دەدات، ئەگەر بەو جۆرە بەردەوام بن لەسەر هێرشەکانیان، ئەوانیش ئامادە نین هێرشەکانیان رابگرن.
ئەوەشی خستووەتە روو، تاوەکو ئێستا حەماس ناوی بارمتەکانی بۆ ئازادکردن رادەست نەکردووە.
لە بەرامبەریشدا حەماس باس لەوەدەکات، دواکەوتنی نوی بارمتەکان بەهۆی کێشەی تەکنیکییەوەیە، بەڵام هیچ باس لە هۆکاری بەردەوامی هێرشەکان ناکات.
لەگەڵ ئەوەشدا، لە ئێستادا لە غەززە بەهۆی راگەیاندنی ئاگربەستەوە خەڵک لەسەر شەقامەکان ئاهەنگ دەگێڕن.
رێککەوتن بۆ گەیشتن بە ئاگربەست رۆژی چوارشەممەی رابردوو لەلایەن وڵاتانی نێوەندگیرەوە لە دەوحە راگەیەنرا، لە قۆناغی یەكەمیدا ١١٠ زیندانی فەڵەستینی كە سزای هەتاهەتاییان بەسەردا سەپێنراوە و لە بەرامبەر ٩ زیندانی نەخۆش و برینداری ئیسرائیل لە یەك كاتدا ئازاد دەكرێن.
دوێنێ دوای ئەوەی لە کۆنفرانسێکی رۆژنامەنووسیدا جۆ بایدنی سەرۆکی ئەمریکا ئاگربەستی نێوان غەززە و ئیسرائیلی راگەیاند، لەوکاتەشدا رۆژنامەنووسێک لێی پرسی: گەیشتن بە ئاگربەست ئازایەتی کێ بوو؟.
دوای ١٥ مانگ لە جەنگی نێوان غەززە و ئیسرائیل شەوی رابردوو ئاگربەستی نێوان ئەو دوو وڵاتە راگەیەنرا، ئەوەش مشتومڕی لەناو پارتە سیاسییەکانی ئەمریکادا دروستکردووە کە کێ هۆکاری گەیشتن بووە بە ئاگربەست، ئیدارەی بایدن کە تەنها چوار رۆژی ماوە؟ یانیش ئیدارەکەی ترەمپ کە لە چوار رۆژی داهاتوودا دەستبەکار دەبێت؟
لەکاتی راگەیاندنی ئاگربەستی غەززەدا جۆ بایدن رایگەیاند، گەیشتن بە ئاگربەست دوای هەوڵ و ماندووبوونەکانی تیمەکەی دێت، بەتایبەت دوای ئەوەی لە مانگی ئایاری ساڵی رابردوودا پێشنیازی ئاگربەستی کردبوو. لەکاتی ئەو قسانەدا یەکێک لە رۆژنامەنووسەکان لێی پرسی: راگەیاندنی ئاگربەست ئازایەتی کێ بوو؟، بایدن بە پێکەنینەوە وتی: "ئەمە گاڵتەیە؟".
هاوکات، لە وتاری ماڵئاواییدا بایدن ئەوەی خستەروو، "لە کابینەکەی مندا تیمەکەم هەوڵی زۆریان بۆ ئەو پرسە داوە و گفتووگۆی جددیان لەسەر کردووە، جێبەجێکردنیشی بەشێوەیەکی بەرچاو دەکەوێتە سەر ئیدارەی داهاتووی ئەمریکا، بۆیە داوام لە تیمەکەم کردووە بە تەواوی ئەو پرسە بۆ ئیدارەی داهاتوو رون بکەنەوە".
لە بەرامبەر ئەو قسانەی بایدنیشدا، دۆناڵد ترەمپی سەرۆکی هەڵبژێردراوی ئەمریکا کە بڕیارە لە ٢٠ی مانگدا دەستبەکار بێت رایگەیاندووە، راگەیاندنی ئاگربەست لە غەززە ئازایەتی ئەو بووە و دەڵێت، "ئاگربەستی غەززە بەبێ سەرکەوتنی من لە هەڵبژاردنەکانی ئەمریکادا رووی نەدەدا، ئەمەش ئاماژەیە بۆئەوەی کە ئیدارەکەم بەدوای ئاشتیدا دەگەڕێت و دانوستان و رێککەوتن دەکات بۆ دڵنیابوون لە سەلامەتی ئەمریکییەکان و هاوپەیمانەکانیان".
هاوکات، بەکارهێنەرانی تۆڕە کۆمەڵایەتییەکانیش بەو پرسانەوە سەرقاڵن و دەڵێن، ترەمپ کاریگەریی لەسەر ئاگربەستی غەززە دروستکردووە، بەوپێیەی لەمێژە لەرێگای تۆڕەکۆمەڵایەتییەکانەوە هەڕەشەی ئەوە دەکات، لە ئەگەری چارەسەرنەبوونی کێشەکاندا رۆژهەڵاتی ناوەڕاست دەکاتە "جەهەنەم".
راوێژكاری ئاسایشی نیشتمانی كۆشكی سپی رایگەیاند، ئەمریكا لە مەترسییە ئەمنییەكانی توركیا تێدەگات، بەڵام ناكرێت بیكاتە بیانوو بۆ هێرشكردنە سەر كوردەكان.
جۆن كیربی راوێژكاری ئاسایشی نیشتمانی كۆشكی سپی لە كۆنفرانسێكی رۆژنامەوانیدا رایگەیاند، واشنتۆن لە نیگەرانییە ئەمنییەكانی توركیا سەبارەت بە پاراستنی سنوورەكانی بە درێژای سوریا تێدەگات.
وتیشی، مافی تەواوی هەیە بەرگری لە وڵاتەكەی بكات لە هەر هەڕەشەك بۆ كۆتایهێنان بەو مەترسیانەش ئەمریكا بەردەوام لەگەڵ ئەو وڵاتە لە دانوستانداین.
كێربی راشیگەیاند، ئەو مەترسیانەی توركیا هەیەتی ناكرێت بیكاتە بیانوو بۆ هێرشكردنە سەر كوردەكانی سوریا، چونكە واشنتۆن هیچ كات نایەوێت سەرنجی هێزەكانی سوریای دیموكرات - هەسەدە بێجگە لە شەڕی داعش بۆ هیچ شتێكی دیكە رابكێشرێت.
ئەوەش لەکاتێکدایە، تورکیا لە سنووری نێووان وڵاتەکەی و سوریادا بەردەوام لەرێگای ئەو گروپە چەکدارانەی هەیەتی لەو ناوچانە هێرشی چەکداری ئەنجامدەدات و لەدوای رووخانی رژێمی بەشار ئەسەد لە ٨ی مانگی رابردووشدا، هێرشەکانی چڕتر کردووەتەوە و هاوڵاتیی مەدەنی ئەو ناوچانەش بە ئامانج دەگرێت، هێزەکانی سوریای دیموکراتیش بەردەوامن لە بەرپەرچدانەوەی ئەو هێرشانە.
وەزارەتی تەندروستیی غەززە رایگەیاند، بەهۆی شەڕی نێوان وڵاتەکەیان لەگەڵ ئیسرائیلدا، تاوەکو ئێستا ٤٦ هەزار و ٦٤٥ کەس گیانیان لەدەستداوە.
وەزارەتی تەندروستیی غەززە رایگەیاند، كۆی گشتی ئەو كەسانەی لە ٧ی تشرینی یەكەمی ٢٠٢٣ـەوە لە غەززە كوژراون، گەیشتووەتە ٤٦ هەزار و ٦٤٥ كەس و زیاتر لە ١٠٩ كەسیش بریندار بوون.
وەزارەتەكە ئاماژەی بەوەشكردووە، تاوەکو ئەم ساتە تەرمی بەشێک لەو کەسانەی بەهۆی بۆردومانەکانەوە گیانیان لەدەستداوە لەژێر داروبەردی خانووە رووخاوەکاندا ماونەتەوە و تیمەکان سەرقاڵی دەرهێنانەوەی تەرمەکان و دۆزینەوەی ناسنامەکەنیانن.
لە شەوی ٧ی ١٠ی ساڵی ٢٠٢٣ حەمماس بە پێنج هەزار موشەک هێرشیکردە سەر ئیسرائیل و ئیسرائیلیش دەستی کرد بە وەڵامدانەوە، لەو کاتەشەوە تاوەکو ئێستا جەنگ لەنێوانیاندا بەردەوامە.