مستەفا کازمی سەرۆک وەزیرانی عیراق ئاشکرایکرد، ھەرچەندە زیاتر لە ١٠ پرۆژەی نیشتەجیبوون لەبەغداو پارێزگاکانی تر لەکاردایە، بەڵام ئاڕاستەی حکومەت ئەوەیە یەک ملیۆن یەکەی نیشتەجێبوونی تر لەسەرانسەری عیراقدا دروست بکرێت .

سەرۆک وەزیرانی عیراق لەمیانی سەردانێکیدا بۆ کۆمەڵگەی نیشتەجێبوونی بەسمایە لەباشووری رۆژھەڵاتی بەغدا رایگەیاند، بەشێوەیەکی جددی پاڵپشتی پرۆژەکانی نیشتەجێکردن دەکەین،  تا دەگاتە یەک ملیۆن یەکەی نیشتەجێبوون لەسەر ئاستی ھەموو عیراق .

کازمی ئاماژەی بەوەشکرد، لەماوەی رابردوودا دەنگماندا لەسەر دروستکردنی کۆمەڵگەی نیشتەجێبوونی رەفیل و ئێستا ئامادەیە بۆ جێبەجێکردن، جگەلەوەش ئێستا ١٠ پرۆژەی تری نیشتەجێبوون لە بەغداو سەرجەم پارێزگاکانی دەست بەجێبەجێکردنیان کراوە .
سەرۆک وەزیرانی عیراق رونیکردەوە، ئێستا ٣٥ ھەزار یەکەی نیشتەجێبوون لە کۆمەڵگەی بەسمایە تەواوکراون و  ئامانجمان ئەوەیە ئەو ژمارەیە بۆ ١٠٠ ھەزار بەرز بکەینەوە.

وەزارەتی کشتوکاڵی عیراق رەتیدەکاتەوە، دەرگای ھاوردەکردنی مریشک و ھێلکەی لەوڵاتانی دەرەوە کردبێتەوە، تەئکیدیش دەکاتەوە کە بەمەرج رێگا بەھاوردەکردنی مریشک لەھەرێمی کوردستانەوە بۆ پارێزگاکانی تری عیراق دەدەن .

(حەمید نایف) وتەبێژی وەزارەتی کشتوکاڵی عیراق رایگەیاند، ئەو ھەواڵانە دوورن لەراستیەوە کە باس لەوەدەکەن حکومەت رێگەی بەھاوردەکردنی پەرلەوەرو ھێلکە دابێت، بەپێچەوانەوە لەپێناو پاڵپشتیکردنی بەرھەمی ناوخۆیی قەدەغەی ھاوردەکردنی پەلەوەر بەردەوامە.

وتەبێژی وەزارەتی کشتوکاڵ روونیکردەوە، بەھۆی بەرزبوونەوەی بەھای دۆلارەوە نرخی عەلەف و سۆیا و چەندین پێداویستی تر گرانبوون و ئەوەش وایکردووە نرخی مریشک و ھێڵکە بەرزبێتەوە
سەبارەت بە ھەماھەنگی و پەیوەندییەکانیان لەگەڵ ھەرێمی کوردستان (حەمید نایف) ئەوەی خستەڕوو، کە وەزارەتی کشتوکاڵ رێگە بە ھاوردەکردنی پەلەوەرو ھێڵکە لە ھەرێمی کوردستانەوە بۆ پارێزگانی تری عیراق دەدات، بەمەرجێک  دەروازە سنوورییەکان بەرووی ئەو دوو بەرھەمەدا دابخات و تەنھا بەرھەمی ناوخۆی ھەناردە بکات نەک بەرھەمی ھاوردەکراوی وڵاتان .

ئەندامێکی لیژنەی ئابووری و وەبەرھێنان لە ئەنجومەنی نوێنەرانی عێراق ڕایگەیاند، حکومەت بە ئامانجی پارێزگاریکردن لە ئابووری وڵات بەھای خستنەڕووی دۆلاری بەرزکردەوە، بەڵام شکستی ھێناوە و کاردانەوەی پێچەوانەی لەسەر ھاوڵاتیان دروست کردووە.

میساق حامدی ئەندامی لیژنەی ئابووری و وەبەرھێنان لە ئەنجومەنی نوێنەرانی عێراق ڕایگەیاند، حکومەت بە ئامانجی باشترکردنی دۆخی ئابووری چەندین ڕێوشێنی پێوستی گرتووەتەبەر، بەڵام ھەوڵەکان کاردانەوەی پێچەوانەی ھەبووە لەسەر ئابووری وڵات و بژێوی ھاولاتیان بە تایبەتی.

ئەو پەرلەمانتارە ئاماژەی بەوەشکردووە، بەھۆی ھەڵەی سیاسەتی دارایی حکومەتەوە ئێستا عێراق نقومی قەرزی دەرەکی بووە.

دابەزینی بەھای دیناری عێراقی بەرامبەر دۆلاری ئەمریکی دوای ئەوە دێت کە لە سەرەتای گفتوگۆکان لە بارەی پڕۆژە یاسای بودجەی ٢٠٢١، بانکی ناوەندی بەھای دیناری عێراقی بەرامبەر دۆلار دابەزاند بۆ ١٤٦٠ دینار بۆ ھەر دۆلارێکی ئەمریکی.

دوای ئەوەی لە سنوری پارێزگای ھەولێر ژمارەیەک پرۆژەی وەبەرھێنان پابەند نەبوون بە تەواوکردنی کارەکانیان و، بەشێکی دیکەشیان بەپێی کوالیتی بڕیار لێدراو کارەکانیان تەواو نەکرد و گرفتی بۆ دەستەی وەبەرھێنانی کوردستان دروست کرد، دەستەی وەبەرھێنان ژمارەیەک رێنمایی و رێکاری دارایی گرتەبەر.

لەو بارەیەوە عەزیز سعید رەشید بەریوەبەری گشتی وەبەرھێنانی سلێمانی وێڕای پشت راستکردنەوەی ئەو بابەتە ، بە کوردسات نیوزی راگەیاند، ئێمە وەک دەستەی وەبەرھێنانی سلێمانی سەرەڕای ئەوەی کەمترین دۆسیەی دواکەوتن و کەمتەرخەمیمان لە پرۆژەکاندا ھەیە، بەڵام پێشتر کۆمەڵێک رێنماییمان گەڵاڵەکرد، بە مەبەستی دیاریکردنی ئەرک و مافی وەبەرھێنەران و سەرۆکی دەستەش لە ئەنجومەنی وەزیران خستویەتیەڕوو ، چاوەڕێی گشتاندنی ئەو رێنماییە تازانەین.

گەڵاڵەکردنی ئەم رێنماییانەی وەبەرھێنان دوای ئەوە دێت، کە پێشتر چوار بڕیاری٥٨٤ و  ٥٨٥ و ٥٨٦ و ٥٨٧ یان ھەبووە، کە تیایدا وەبەرھێن پابەند دەکات بە دانانی بڕێک پارە وەک گرەنتی لەلای دەستەی وەبەرھێنان، ئەگەر ھاتوو پرۆژەکەی لە وادەی خۆیدا تەواو نەکرد یاخود بەپێی مەرجە بڕیار لێدراوەکان نەبوو، لەو بڕە پارەیەی دایناوە سزا بدرێت.

بەپێی ئامارێکی گێڵگە پەلەوەرییەکانی ھەرێم لە ئەنجامی بڵاوبوونەوەی نەخۆشیەک لەناو کەرتی پەلەوەری ھەرێم، بەرێژەی٧٥٪ ی جوچک و مریشکی کێڵگەکانی لە ھەرێمی کوردستان بەرز کردووەتەوە، ئەوەش زیانێکی زۆری بۆ خاوەن کێڵگە پەلەوەرییەکان و ئابووری کوردستان دروستکردووە. 

دکتۆر ئاری سەلاحەدین بەرێوەبەری ڤێتێنەری سلێمانی رایگەیاند، ئەم نەخۆشیە ھۆکاری زۆربوونی مردنی مریشک دەگەڕێتەوە بۆ نەخۆشی   ئای بیو، نیوکاسڵ، گەمبۆرۆ، کە ھەمان نەخۆشییەکانی ساڵی رابردووە، بەڵام ئەمساڵ زۆر خێراتر بڵاوبووەتەوە. 

خاوەن کێڵگە پەلەوەرییەکانیش داوا دەکەن لایەنە پەیوەندیدارەکان ھاوکاریان بکەن، چونکە نەخۆشییەکەی ئەمساڵ زۆر تووندو تیژترە و ئەم کێشەیە چارەسەر نەکەن سامانی پەلەوەری لە ھەرێم روو لەناوچون دەکات.

دوای ئەوەی لە کۆتایی مانگی ١٢ی ٢٠٢٠ بانکی ناوەندی عێراق بەھای دیناری عێراقی لە بەرامبەر دۆلاری ئەمریکی دابەزاند بۆ ١٤٥٠ دینار.

لە بەیانیەوە بەھای دۆلار رووی لە دابەزین کردووەو ،  ١٠٠ دۆلاری ئەمریکی بەرامبەر ١٤٨ ھەزار و ٧٥٠ دیناری عێراقی مامەڵەی پێوەکرا.

دابەزینی بەھای دۆلاری ئەمریکی بەرامبەر دیناری عێراقی دوای ئەوە دێت لە چەند رۆژی رابردوو ھەر ١٠٠ دۆلارێکی ئەمریکی ١٥١ ھەزاری تێپەڕاند، لە بەرامبەردا بانکی ناوەندی عێراق بڕیاریدا، ھەفتانە ٣٠٠ ھەزار دۆلار بۆ بانکەکان دابین بکات و، ھەرچی پشکی کۆمپانیاکانی ئالوێری دراویشە بەپێی ریزبەندی پۆلێنکراویان کە لە (ئەی و بی و سی) پێکھاتوون بڕی دۆلاری بەردەستیان بۆ زیادبکات .

رێکخراوی ئۆپیک ئاشکرای کردووە، لە دوو مانگی رابردوودا ئاستی بەرھەمھێنانی نەوتی وڵاتانی ئۆپیک ٤٤٥ ھەزار بەرمیلی رۆژانە زیادیکردووە .

رێکخراوی وڵاتانی ھەناردەکاری نەوت، کە بە ئۆپیک ناسراوە لە نوێترین راپۆرتیدا رایگەیاندووە، لە مانگی ئاداری ٢٠٢١دا ئاستی بەرھەمھێنانی نەوتی وڵاتانی ئۆپیک ٢٥ ملیۆن و ١٨ ھەزار بەرمیلی رۆژانە بووە، بەڵام لە مانگی ئایاردا بە تێکڕا ئاستی بەرھەمھێنانی نەوتی ولاتانی رێکخراوی ئۆپیک بۆ ٢٥ ملیۆن و ٤٦٣ ھەزار بەرمیلی رۆژانە بەرزبووەتەوە .

راپۆرتەکە رونیکردووەتەوە، لە کۆی ١٣ وڵاتی ئەندامی رێکخراوی ئۆپیک ھەشت وڵاتیان لەمانگی ئایاردا بەرھەمھێنانی نەوتیان زیادیکردووە و پێنجیان کەمیکردووە .

باسی لەوەشکردووە، سعودیە لە پلەی یەکەمدا ھاتووە و لەو ماوەیەدا رۆژانە ٣٤٥ ھەزار بەرمیل بەرھەمھێنانی زیادکردووە .

ئەو زیادبوونەش ھاوکاتە لەگەڵ بوژانەوەی بازاڕەکانی جیھان و زیادبوونی خواست لە سەر سوتەمەنی و دواین رێککەوتنی وڵاتانی ئۆپیک پڵەس  بۆ زیادکردنی ئاستی بەرھەمھێنانی نەوت، کە بریارە قۆناغ بەقۆناغ ئاستی بەرھەمھێنانی نەوت بەرزبکەنەوە و تا کۆتایی مانگی تەمموزی ئەمساڵ ٢ ملیۆن و ١٠٠ ھەزار بەرمیلی زیاتر بخەنە بازاڕەوە .

دوای ھەشت ساڵ لە نەبوونی یاسای بودجەی گشتی لە ھەرێمی کوردستان، سەرەنجام بڕیاردرا حکومەتی ھەرێم بۆ ساڵی دارایی ٢٠٢١ یاسای بودجەی ھەبێت، بەڵام خەریکە شەش مانگ لە ساڵی داراییەکەی تێپەڕدەبێت، تا ئێستا ڕەشنووسی بودجەی ٢٠٢١ی ھەرێم لە بینای ئەنجومەنی وەزیرانەوە نەگەیشتووە بە پەرلەمانی کوردستان.

"پەری نوری" بەڕێوەبەری گشتی بودجە لە وەزارەتی دارایی و ئابووری ھەرێم بە کوردسات نیوزی ڕاگەیاند، لە ١١ی ئایاری ئەمساڵەوە پڕۆژەیاسای بودجە لە وەزارەتی داراییەوە ڕەوانەی ئەنجومەنی وەزیران کراوە و ماوەی زیاتر لە مانگێکە لیژنەی باڵای بودجە لە حکومەت کاری لەسەر دەکات.

بەڕێوەبەرە گشتیەکەی بودجە لە وەزارەتی دارایی و ئابووری ھەرێم وتیشی چاوەڕوان دەکرێت لە کۆبوونەوەی داھاتووی ئەنجومەنی وەزیران گفتوگۆ لەسەر پڕۆژەیاساکە بکرێت و دوای پەسەندکردنیشی ڕەوانەی پەرلەمانی کوردستان بکەن.

"ئەمەل جەلال" سەرۆکی دەستەی گەشتوگوزاری ھەرێم بە کوردسات نیوزی ڕاگەیاند، لە قۆناغی یەکەمدا ٧٥ دەرچووی بەشی گەشتوگوزار بۆ ھەر سێ پارێزگاکەی ھەرێم لەسەر پیشەی ڕێبەری گەشتیاری ڕادەھێنرێت، بۆ ئەو مەبەستەش لە ھەفتەی داھاتووەوە لە سلێمانی خولێکی ڕاھێنان بۆ ٢٥ دەرچووی زانکۆ و پەیمانگاکان دەکەنەوە و دواتر لە ھەولێر و دھۆکیش دەستپێدەکەن. 

ڕوونیشکردەوە، ڕێبەرە گەشتیارییەکان لەگەڵ ئەو گرووپە گەشتیارییانە دەبن کە دێنە ھەرێم و بە زمانی خۆیان زانیاریی تەواویان لەسەر شوێنە گەشتیاریی و مۆزەخانە و شوێنە مێژووییەکان پێ دەدەن. 

ئەمەل جەلال ڕاشیگەیاند، لە ماوەی چوار مانگی سەرەتای ئەمساڵدا زیاتر لە ٦٠٠ ھەزار گەشتیار سەردانی ناوچە گەشتیارییەکانی ھەرێمی کوردستانیان کردووە، زۆربەشیان گەشتیاری شارەکانی ناوەڕاست و باشووری عێراقن.

لە ڕاگەیەندراوێکی وەزارەتی بازرگانی و پیشەسازی ھەرێمی کوردستاندا ھاتووە، دوای ئەوەی ھاوڵاتیان گلەیی خۆیان گەیاندە وەزارەتەکەیان دەربارەی خراپی بەشە ئاردی ئەم مانگەیان، وەزارەتی بازرگانی و پیشەسازی تیمێکی مەیدانی بۆ تاقیکردنەوەی گەنم و ئاردی سایلۆی ھەولێر ئاڕاستە کرد.

دوای بەدواداچوون و تاقیکردنەوەی گەنم و ئاردەکەی سایلۆی ھەولێر، دەرکەوت کە ئەو ئاردەی لەو گەنمەوە بەرھەم دەھێنرێت ھیچ کێشەیەکی نیە و لەلایەن لیژنەکەوە پەسەند کرا.

مانگانە وەزارەتی بازرگانی بڕی ٩ کیلۆ ئارد بۆ ھەر ھاوڵاتیەک دابین دەکات، بەڵام زیاتر لە مانگێکە ھاوڵاتیان گلەیی لە خراپی دوایین بەشە ئاردی مانگانەیان دەکەن و بە ئاردێکی بێ پێز ناوی دەبەن.

بەرزبوونەوەی نرخی نەوت لە بازاڕەکانی جیھان دوای ئەوە دێت، ھەر یەک لە وڵاتانی چین و ھندو ویلایەتە یەکگرتووەکانی ئەمریکا نزیکەی ھەفتەیەکە خواستیان لەسەر نەوت زیادی کردووە،ئەویش بەھۆی کەمبوونەوەی نەوت لە عەمبارەکانیان و ئاسانکاری لە گرتنەبەری رێکارەکانی گەشتکردنی ھاوڵاتیان ،کە پێشتر بە ھۆی پەتای کۆرۆناوە رێگریەکی توند لەسەرتاسەری جیھان گیرابووەبەر.

دوای ئەوەی کۆمپانیاکانی بواری پەیوەندیەکان ئاشکرایان کرد بە ھۆی دابەزینی بەھای دیناری عێراقی بەرامبەر دۆلاری ئەمریکی زیانیان بەرکەوتووەو تاوتوێی بەرزکردنەوەی نرخی کارتی قسەکردن دەکەن، (ئیقبال ئەل لەھێبی) ئەندامی لیژنەی پەیوەندیەکان لە ئەنجومەنی نوێنەرانی عێراق ئاشکرای کرد، نەک بەرزکردنەوەی زیاتری نرخی کارتی قسەکردن،بەڵکو دژی ئەو نرخەی ئێستاشن کە لەو بازڕدایە و وتی: لەم دواییانەدا نرخی کارتی مۆبایل زۆر بەرزبوونەتەوە کە ھیچ پەیوەندی بە دابەزینی بەھای دینار بەرامبەر بە دۆلارەوە نیە،بەڵکو روتاندنەوەی ھاوڵاتیانەن بۆ ئەو مەبەستەش کۆبوونەوەیکی فراوان رێکدەخەین ھەتا سنورێن بۆ بەرزبوونەوەی نرخی کارتی مۆبایل دابنێن.

سەرەڕای ئەوەی بچوکترین کارتێکی مۆبایل بڕی تەنھا ٥ ھەزار یەکەی تێدایە و بە کارتی ٥ ھەزاری ناوی دەرکردووە،بەڵام لە فرۆشگاکاندا نرخەکەی لەسەر و ٦ ھەزار دینارەوەیە و ئابوری ناسانیش بە سەیرترین نوکتە ھەژماری دەکەن کاتێک دەبیستن کارتێکی ٥ھەزاری بە ٦ ھەزار.

عاسم جیھاد وتەبێژی وەزارەتی نەوتی عێراق سەبارەت بە توانای بەرھەمداری نەوتی عێراق ڕایگەیاند، لە ئێستادا لە توانایاندا ھەیە ڕۆژانە پێنج ملیۆن بەرمیل نەوت بەرھەمبھێنن، بەڵام بەھۆی ڕێکەوتنی ئۆپیک پڵەس و دیاریکردن و سنوردارکردنی ڕێژەی ھەناردەکردنەوە ڕۆژانە بە نزیکەی چوار ملیۆن بەرمیل بەرھەمدەھێنین و لەو بڕەش سێ ملیۆنی ھەناردەی دەرەوە دەکەین .

وتەبێژی وەزارەتی نەوت دەڵێت،  لە ئەگەری زیادکردنی بڕی فرۆشراوی نەوت لە جیھاندا لەلایەن ڕێکخراوی ئۆپیک و ئۆپیک پڵەس لە ئایندەدا پاش توێژینەوەی دۆخی بازاڕی نەوت و خواست لەسەری عێراق پشکی خۆی لەو زیادکردنەدا دەبێت و بڕی ھەناردەی زیاد دەکات و لە ئێستاشدا دووەم گەورەترین بەرھەمھێنی نەوتی خاوە لە پاش سعودیەوە لە ڕێکخراوی ئۆپیک دا .  

بەھای دراوی دیجیتاڵیی بیتکۆین ئەمڕۆ دوشەممە بەھۆی لێدوانێکی ئیلۆن مۆسک، دامەزرێنەری کۆمپانیای تێسلا بۆ بەرھەمھێنانی ئۆتۆمبێلە کارەباییەکان، بە رێژەی ١٠٪ بەرزبوەوە و لەم کاتەدا یەک دراوی بیتکۆین بە زیاتر لە ٣٩ ھەزار دۆلار مامەڵەی پێوەدەکرێت .

بەشێکی سەرەکی لەھۆکاری بەرزبوەنەوەی بیتکۆین دەگەڕێتەوە بۆ بڕیاری کۆمپانیا بەناوبانگ  و ناسراوەکانی جیھان لەبوارەکانی وەبەرھێنان و ئاڵوگۆڕی دراو، کە بڕیاریانداوە مامەڵە بە دراوی بیتکۆین بکەن لەوانەش تێسلا، ماستەر کارد و بی ئێن وای میلۆن .

وەبەرھێنەران پێیانوایە بیتکۆین دواجار دەتوانێت شوێنی خۆی وەک سەرەکیترین دراوی دیجیتاڵی جیھان بکاتەوە و تۆڕی کۆمەڵایەتیی فەیسبوکیش رایگەیاندوە کە دراوی دیجیتاڵی خۆی بەناوی لیبرا دادەمەزرێنێت و  ھاوکات ھەر یەکە لە بانکە ناوەندییەکانی ئەمریکا، سویسرا و چینیش سەرقاڵی دامەزراندنی جۆرێک لە دراوی دیجیتاڵی خۆیانن.