عیراق
ئەمڕۆ پرۆسەی نوێكردنەوەی تۆماری بایۆمەتریی دەنگدان دەستیپێكرد و نەبەرد عومەر سەرۆكی دەستەی هەڵبژاردانەكانی هەرێم لە كۆمسیۆنی باڵای سەربەخۆی هەڵبژاردنەكانی عیراق رایگەیاند؛ لە دایكبووانی ساڵی 2007 یش تۆمار دەكرێن.
نەبەرد عومەر سەرۆكی دەستەی هەڵبژاردانەكانی هەرێم لە كۆمسیۆنی باڵای سەربەخۆی هەڵبژاردنەكانی عیراق، لە كۆنفرانسێكی رۆژنامەوانیدا سەبارەت بە گواستنەوەی شوێنی دەنگدان ئاماژەی بۆ ئەوەكرد، ئەو كەسانەی دەیانەوێت شوێنەكانیان بگوازنەوە، سەردانی بنكەكان بكەن، بێجگە لە خەڵكی كەركوك ، موسڵ ، سەڵاحەدین و ئەنبار. لەبەرئەوەی ئەو شوێنانە سنوری ماددەی 140ن و گواستنەوە نایانگرێتەوە.
لە کۆنگرە رۆژنامەوانییەکەدا وتیشی، ئەو کەسانەی دەیانەوێت شوێنی دەنگدانیان لە پارێزگایەکەوە بۆ پارێزگایەکی تر بگۆڕن یان لە بنکەیەکەوە بۆ بنکەیەکی تر، لەمڕۆوە دەتوانن سەردانی بنکەکانمان بکەن.
راشیگەیاند؛ ئەمساڵ لە دایکبووانی ساڵی 2007 بەشداری هەڵبژاردن دەکەن و دەتوانن لەمڕۆوە ناوی خۆیان تۆماربکەن.
نەبەرد عومەر ئاماژەی بەوەشدا؛ لە هەرێمی کوردستان 173 بنکەمان هەیە و لە هەولێر 53، لە سلێمانی 79 و کەرکوک 41 بنکە،
جەختیشی کردەوە؛ هاووڵاتیان لەمڕۆوە تا یەک مانگ دەتوانن سەردانی بنکەکان بکەن
وەزیری دەرەوەی ئێران، عیراقی لە وردەكاری نامەكەی دۆناڵد ترەمپ سەرۆكی ئەمریكا بۆ وڵاتەكەی ئاگادار كردەوە و وتیشی ئێران وەڵامی نامەكەی داوەتەوە.
لە پەیوەندییەكی تەلەفۆنیدا، فوئاد حسێن وەزیری دەرەوەی عیراق و عەباس عراقچی وەزیری دەرەوەی ئێران، دوایین پێشهاتەكانی غەززە و لوبنان و یەمەنیان تاوتوێ كرد و هەردولا نیگەرانییان سەبارەت بەو پێشهاتانە دەربریوە .
هاوكات عراقچی، لە ناوەرۆكی نامەكەی ترەمپ بۆ تاران ئاگاداركردوەتەوە و دوپاتیشیكردۆتەوە كە حكومەتی ئێران وەڵامی ئەو نامەیە دەداتەوە ، وەزیری دەرەوەی عیراقیش هیوای خواستوە گۆرینەوەی ئەو نامانە هۆكارێك بێت بۆ كردنەوەی كەناڵێك بۆ دیالۆگ لە نێوان هەردوو وڵات.
هەر لەو پەیوەندییە تەلەفۆنییەدا، هەردولا دوپاتیان كردەوە كە پێویستە پەیوەندیی و هەماهەنگی نێوان بەغداد و تاران بەردەوام بێت .
لە ئێستا بەدواوە باجی ساڵانە دەخرێتە سەر ئەکاونتە چالاکەکانی سۆشیاڵ میدیا، کەسە ناودارەکان پێویستە بەپێی رێژەی فۆڵۆوەرەکانیان باج بدەنە حکومەت.
دەستەی راگەیاندن و پەیوەندییەکانی عیراق بڵاویکردەوە، ئامانج لە دانانی ئەم جۆرە باجە، بۆ رێکخستنی کارەکانی کەسە ناودارەکانی ناو تۆڕە کۆمەڵاتییەکانە و پێویستە ئەو بابەتانەی لەلایەن کەسە بەناوبانگەکانەوە بڵاودەکرێتەوە بنەما ئەخلاقییەکان بپارێزن و لەبەرژەوەندی کۆمەڵگە بێت.
دەستەی راگەیاندن ئاشکرایکردووە، هەر کەسێک زیاتر لە 5 ملیۆن فۆلۆوەرسی هەبێت پێویستە ساڵانە یەک ملیۆن دینار باج بدات، ئەگەر لە سێ ملیۆن تاوەکو پێنج ملیۆن فۆڵۆوەرسی بێت ، 850 هەزار دینار باجی بۆ دیاریکراوە.
ئەوەشی خستوەتەڕوو، باجی ساڵانەی ئەکاونتێکی یەک ملیۆن تاوەکو سێ ملیۆن فۆلۆوەرس 650 هەزار دینارە، هەروەها 500 هەزار تاوەکو ملیۆنێک فۆڵۆوەرسیش دەبێت 450 هەزار دینار باج بداتە حکومەت.
ئاماژە بۆ ئەوەشکراوە، هەر کەسێک ژمارەی فۆڵۆوەرەکانی لەنێوان 100 هەزار بۆ 500 هەزار فۆڵۆوەرس بێت باجی ساڵانەی 250 هەزار بۆ 350 هەزار دینارە.
بڕیارە لە سبەینێوە پرۆسەی نوێكردنەوەی تۆماری دەنگدەران بۆ هەڵبژادنی داهاتووی ئەنجومەنی نوێنەرانی عیراق دەستپێبكات.
جومانە غەلای وتەبێژی كۆمسیۆنی باڵای سەربەخۆی هەڵبژاردنەكانی عیراق رایگەیاند، كۆمیسیۆن هەزار و 79 ناوەندی ئامادەكردوە كە پێشوازی لە هاووڵاتیان دەكەن بۆ نوێكردنەوەی داتاكانیان، تۆماركردنی لە دایكبووە نوێیەكانیش پێویستی بە بەڵگەنامەی رەسمی وەك كارتی نیشتمانی و كارتی نیشتەجێبون و كۆبۆنی خۆراك هەیە.
وتیشی، داواكارییەكانی گواستنەوەی شوێنی هەڵبژاردن لە پارێزگایەكەوە بۆ پارێزگایەكی تر، پێویستی بە كارتی نیشتمانی یان ناسنامە و رەگەزنامە هەیە بۆئەوانەی كارتی نیشتمانییان نییە، لە ناوخۆی پارێزگاشدا پێویستی بە كارتی نیشتمانی یان رەگەزنامە هەیە.
رونیشیكردەوە، دەنگدەر دەتوانێت هەر هەڵەیەك راست بكاتەوە كە پێشتر لە كارتی بایۆمەتریەكەیدا هەبووە، بەڵام گۆڕینی ناو پێویستی بە بڕیاری دادگا هەیە و تۆماركردنی داتای ئاوارەكانیش تەنها لە ناو كەمپەكاندا دەبێت.
شاناز ئیبراهیم ئەحمەد خانمی یەکەمی عیراق، پەیامێکی هاوخەمی بۆ کۆچی دوایی کاوە جوتیار بڵاوکردەوە.
دەقی پەیامەکە
بەبیستنی هەواڵى ماڵئاوایی یەکجارەکی هونەرمەند (کاوە ئیبراهیم) ناسراو بە (کاوە جوتیار)، زۆر غەمباربووم.
کاوە جوتیار خزمەتێکی بەرچاوی بەبواری هونەری شانۆ و درامای کوردی کرد لەشاری سلێمانی و لەزنجیرە درامای گەردەلولیشدا بەهەستێکی قوڵەوە ڕۆڵەکەی بەرجەستە کرد.
پرسە و سەرەخۆشی لەخانەوادەکەیان و خێزانی هونەریی گەردەلول ئەکەم و هاوبەشی خەم و پەژارەیانم، خواى گەورە سەبرو ئارامی بەهەموو لایەک ببەخشێت و ئەمە دوایین ناخۆشیمان بێت.
شاناز ئیبراهیم ئەحمەد
کۆمسیۆنی باڵای سەربەخۆی هەڵبژاردنەکانی عیراق رایگەیاند، لە سبەینێوە نوێکردنەوەی تۆماری دەنگدەران دەست پێ دەکات.
کۆمسیۆنی باڵای سەربەخۆی هەڵبژاردنەکانی عیراق رایگەیاند، سبەینێ سێشەممە، 25ی ئازار، نوێکردنەوەی تۆماری دەنگدەران دەست پێ دەکات و بۆماوەی مانگێک بەردەوام دەبێت.
ئاماژەی بەوەشکردووە، نوێکردنەوەی تۆماری دەنگدەران تەواوی عیراق دەگرێتەوە و لەرێگای یەکەکانی تۆمارکردنی بایۆمێترییەوە ئەنجام دەدرێت.
ئەوەش هاتووە، پرۆسەکە هەریەک لەم خاڵآنە لەخۆ دەگرێت:
1.تۆمارکردنی بایۆمتری دەنگدەر بۆ یەکەمجار و بەتایبەت بۆ لەدایکبووانی ساڵی 2007.
2.گواستنەوەی ناوەندی دەنگدان.
3.راستکردنەوەی ناو یان ھەر ھەڵەیەکی دیکە لە زانیاری دەنگدەر.
4.سڕینەوەی ناوی مردووان.
5.تۆمارکردنی کارمەندانی ھێزە ئەمنیەکان.
6.تۆمارکردنی ئاوارەی پارێزگاکان.
وەزارەتی دادی عیراق رایگەیاند، دوای چوار ساڵ لە داخستنی، مانگی داهاتوو زیندانی چەمچەماڵ دەکەنەوە و لە ئێستادا سەرقاڵی نۆژەنکردنەوەی زیندانەکەن.
موراد ساعدی بەڕێوەبەری بەشی راگەیاندن لە وەزارەتی دادی عیراق رایگەیاندووە، دوای تەواوبوونی نۆژەنکردنەوەی زیندانی چەمچەماڵ بە نوێترین ستانداردە نێودەوڵەتییەکان، مانگی داهاتوو زیندانەکە دەکەنەوە و دەیانەوێت لە رێگای ئەو زیندانەوە قەرەباڵغی چاکسازییەکانی چەند شارێکی عیراق کەم بکەنەوە.
ئاماژەی بەوەشکرد، ماوەی چەند ساڵێکە ئەو زیندانە بەکارنەهاتووە، بۆیە وەزارەت بڕیاریداوە بەوەی نۆژەنی بکاتەوە، لە چوارچێوەی نۆژەنکردنەوەکەشدا کامێرای چاودێری بۆ سەرجەم زیندانەکە و ژوورەکان دادەنرێت و هۆڵی تایبەت بە وەرزشکردن و چەندین پێداویستی دیکەی ژیانکردنی تێدا دادەنرێت.
ئەوەشی خستە روو، نوێترین تەکنەلۆژیاکان لە زیندانەکەدا بەکاردەهێنن و فێننکەرەوە و هەواگۆڕکێی گونجاوی بۆ دابین دەکەن، دەشڵێت، "سەرجەم پێداویستییەکانی شوێنێکی شیاو بۆ ژیانکردنی تێدا دابین دەکەن".
موراد ساعدی باسی لەوەشکردووە، ئەو زیندانیانەی دەگوازرێنەوە بۆ زیندانە نۆژەنکراوەکەی چەمچەماڵ، ئەوانەن کە بە چەند تاوانێکی دیاریکراو سزادراون، لەوانەش ئەو تاوانانەی مەترسی لەسەر ئاسایش و سیستمی گشتی دروست دەکەن.
وتیشی، سزادراوەکان لە هەریەک لە پارێزگاکانی سەڵاحەدین، نەینەوا و کەرکوکەوە دەبرێنە زیندانی چەمچەماڵ و ئاسانکاری دەکرێت بۆ کەسوکاریشیان کە سەردانیان بکەن.
ماوەی چەند ساڵێکە عیراق هەوڵدەدات فشار و قەرەباڵغی سەر زیندانەکان کەم بکاتەوە، نۆژەنکردنەوەی زیندانی چەمچەماڵیش لە چوارچێوەی ئەو هەوڵانەدایە.
زیندانی چەمچەماڵ یەکێکە لە سەربازگە گەورەکانی رژێمی پێشووی عیراق، لە ساڵی 2007 دا کرا بە زیندانی فیدڕاڵی.
زیندانەکە جێگای نزیکەی چوار هەزار زیندانیی دەبێتەوە، بڕیاریشە مانگی داهاتوو زیندانەکە بکرێتەوە.
وەزارەتی نەوتی عیراق رایگەیاند، بەپێی ئەو رێككەوتنەی لەگەڵ كۆمپانیای بریتش پەتڕۆلیەم كراوە بەرهەمهێنانی نەوت تاكو ساڵی 2029 دەگەیەننە زیاتر لە شەش ملیۆن بەرمیل لە رۆژێكدا.
باسم محەمەد خزیر بریكاری وەزارەتی نەوتی عیراق رایگەیاند، وەزارەت هەوڵدەدات ئاستی بەرهەمهێنانی نەوت و غاز زیاد بكات و ئامانجیانە لە ساڵانی 2028 و 2029 رۆژانە بەرهەمهێنان بگەیەننە زیاتر لە شەش ملیۆن بەرمیل.
دەشڵێت، وەزارەت كاردەكات بۆ بەدیهێنانی ئامانجەكانی لە رێگەی كۆمپانیا نەوتیەكان كە بەدوای نەوتدا دەگەڕێن و لە ئێستادا كار لەسەر پرۆژەی پەرەپێدانی غاز دەكەن لە باشوری عیراق.
وتیشی، لە كەركوكیش لەگەڵ كۆمپانیای بریتش پەتڕۆلیەم پەرە بە چوار كێڵگەی نەوتی دەدەن و لە چەند رۆژی داهاتوودا گرێبەستی كۆتایی ئیمزا دەكرێت و دەست بە كارەكانیان دەكەن، بەم هەنگاوەش ئاستی بەرهەمهێنانی نەوت بە گشتی زیاد دەكات.
ئەنجومەنی پارێزگای دیالە بە زۆرینەی دەنگ سەرۆكی ئەنجومەنی لە پۆستەكەی دوورخستەوە.
پەیامنێری كوردسات نیوز باسی لەوەکرد، دوورخستنەوەی عومەر كروی سەرۆكی ئەنجومەنی پارێزگای دیالە پەیوەندی بە ناشەفافیەت هەیە لە گرێبەستی پرۆژەكاندا.
هەروەها نزار لێهبی بە سەرۆکی نوێی ئەنجومەنی پارێزگای دیالە دەستنیشانکرا.
نوێ دەکرێتەوە..
سودانی گرێبەستێكی لەگەڵ كۆمپانیایەكی چینی ئیمزاكرد بۆ دروستكردنی شارێكی پزیشكی لە زیقار كە چەندین پسپۆڕیی جیاجیای تێدایە.
نوسینگەی محەمەد شیاع سودانی سەرۆك وەزیرانی عیراق لە راگەیەنراوێكدا ئاماژەی بەوەكردووە، سودانی گرێبەستێكی بە بەهای 490 ملیار دینار لەگەڵ كۆمپانیایەكی چینی ئیمزاكردووە، بە مەبەستی دروستكردنی شارێكی پزیشكی لە پارێزگای زیقار و بەمزوانەش پرۆژەكە دەكەوێتە بواری جێبەجێكردنەوە.
دەشڵێت، ئەو شارە پزیشكییە 13 دامەزراوەی پزیشكی سەربەخۆ و حەوت نەخۆشخانە كە لە 700 قەرەوێڵە پێكدێن لە خۆدەگرێت، بۆ پسپۆڕییەكانی مندڵان و ژنان و نەخۆشییەكانی خوێن و شێرپەنجە و هەناوی و فریاگوزاری خێرا.
وتیشی، هەر لەو شارە پزیشكییەی زیقار كۆمەڵگەی كیلینكی پزیشكیی و توێژینەوەی زانستی و بانكی خوێن و تیشك و شوێنی مانەوەی پزیشكی تێدایە و رووبەڕی پرۆژەكەش 93 دۆنمە.
سودانیش رایگەیاندووە، حەوت نەخۆشخانە لە پارێزگاكانی تر دەكەنەوە و پرۆژەی بە نیشتیمانیكردنی كەرتی تەندروستی و دەرمان جێبەجێ دەكەن.
راوێژكاری دارایی سودانی دەڵێت، بەهۆی بە ئەلیكترۆنیكردنی حكومەت پێشبینی دەكرێت ئەمساڵ داهاتی نانەوتی گەشەی زیاتر بكات.
مەزهەر محەمەد ساڵح راوێژكاری سەرۆك وەزیرانی عیراق بۆ كاروباری دارایی رایگەیاند، بە ئەلیكترۆنیكردنی حكومەت و دامەزراوەكانی و كۆكردنەوەی داهات بەشێوەی دیجیتاڵی لە ساڵی 2024ەوە، كاریگەری زۆری هەبووە لەسەر زیادكردنی داهات بەتایبەتیش داهاتی نانەوتی.
وتیشی، لە ساڵی رابردوودا داهاتی باج زیاتر لە شەش تریلیۆن دینار بەرزبووەتەوە، ئەوەش ئاماژەیەكە بۆ بەهێزكردن و بەرزكردنەوەی گەشەی داهات لە رێگەی ئەو سیستمەوە.
دەشڵێت، بە ئەلیكترۆنیكردنی حكومەت هەنگاوێكە بۆ پاڵپشتیكردنی گەنجینەی دەوڵەت و زیادبوونی داهاتی نانەوتی و پێشبینی دەكرێت ئەو داهاتە لە ئەمساڵدا زیاتر ببێت.
سەرۆک وەزیرانی عیراق لە پیرۆزبایی جەژنی نەورۆزدا، جەختی لەسەر چەمکی خۆشەویستی و یەک چارەنووسی کردەوە.
محەممەد شیاع سوودانی، سەرۆک وەزیرانی عیراق ئەمڕۆ پێنجشەممە، لە پلاتفۆرمی ئێکس پیرۆزبایی جەژنی نەورۆزی لە خەڵکی عیراق و گەلی کورد کرد و رایگەیاند: "جوانترین پیرۆزبایی بۆ گەلی عیراق بە گشتی و گەلی کورد بە تایبەتی، بەبۆنەی جەژنی نەورۆزەوە. عێراقیش لە ئارامی و سەقامگیریدا بێت."
سەرۆک وەزیرانی عیراق لە ئێکس هیوای خواست کە بە هەوڵی برایانەی هەموو نەتەوەکان، داهاتوویەکی گەشتر بۆ عیراق دەست پێبکات.
سوودانی لەم بۆنەیەدا ئاماژەی بەوەش کرد کە جەژنی نەورۆز بیرخەرەوەی خۆشەویستی، یەک چارەنووسی و مێژووی گەورەی گەلانی عیراقە.
شاناز ئیبراهیم ئەحمەد خانمی یەکەمی عیراق، پەیامێکی هاوخەمی بۆ کۆچی دوایی ئامینەی جۆڵا بڵاوکردەوە .
دەقی پەیامەکە
بەبیستنی هەواڵى ماڵئاوایی یەکجارەکی خاتوو (ئامینە ئەحمەد ئیسماعیل) ناسراو بە(ئامینەی جۆڵا)، زۆر غەمباربووم.
بەکۆچی دوایی خاتوو ئامینەی جۆڵا، سلێمانی کەسایەتیەکی دیار و ژنێکی زەحمەتکێش و بەسەلیقە و دەستڕەنگینی لەدەستدا کە بە بەرهەمە شیرینیە دەستکرد و خۆماڵییەکانی مۆرک و ڕەسەنایەتی شاری سلێمانی ناساندبوو.
پرسە و سەرەخۆشی لەخانەوادەکەیان ئەکەم و هاوبەشی خەم و پەژارەیانم، خواى گەورە سەبرو ئارامی بەهەموو لایەک ببەخشێت و ئەمە دوایین ناخۆشیمان بێت.
شاناز ئیبراهیم ئەحمەد
د. لەتیف رەشید سەرۆک کۆماری عیراق بەبۆنەی هاتنەوەی جەژنی نەورۆزەوە پەیامێکی بڵاوکردووەتەوە و رایگەیاندووە، "داگیرساندنی مەشخەڵی نەورۆز هێمای قارەمانێتی و ڕزگاربوون و تێکۆشان و سەرکەوتنی مافە بەسەر ناهەقدا و هەروەها مژدەی ڕۆژێکی نوێ و سەرەتای ساڵی نوێی کوردییە".
دەقی پەیامەکە
بەبۆنەی هاتنەوەی جەژنی نەورۆزەوە گەرمترین پیرۆزبایی ئاراستەی گەلی کوردمان و سەرجەم پێکهاتەکانی گەلی عێراق دەکەین و هیوادارین ئەم بۆنە بە چاکە و خۆشی و بەرەکەتەوە بگەڕێتەوە بۆ گەلەکەمان خۆشی باڵ بکێشێ بە سەرتاسەری وڵاتدا .
داگیرساندنی مەشخەڵی نەورۆز هێمای قارەمانێتی و ڕزگاربوون و تێکۆشان و سەرکەوتنی مافە بەسەر ناهەقدا و هەروەها مژدەی ڕۆژێکی نوێ و سەرەتای ساڵی نوێی کوردییە.
لەگەڵ هاتنەوەی جەژنی نەورۆزدا پەیامی نیشتمانی خۆمان دووپات دەکەینەوە و داوا لە سەرجەم هێزە سیاسییەکان دەکەین یەکڕیزی نیشتمانی بەهێز بکەن و کۆڵەکەکانی سیستەمی دیموکراسی پتەو بکەن و پاراستنی ئازادییەکان و مافەکانی مرۆڤ و دەستکەوتەکان و پشتیوانیکردن لە دامەزراوە دەستوورییەکان و دەزگاکانی یاسادانان و دادوەری و جێبەجێکردن بکەنە پێشەنگی کاریان و بەوەش بەشداری لە بەرەوپێشبردنی پرۆسەی گەشەپێدان لە وڵاتدا بکەن.
جارێکی تر نەورۆز پیرۆزە له ئێوەو خەڵکی سەرتاسەری جیهان
هەموو ساڵێک بەخۆشی و شادی بۆ هەموو لایەک
د. لەتیف جەمال ڕەشید
سەرۆک کۆمار
فەرماندەی ئۆپراسیۆنە هاوبەشەكانی عیراق كوژرانی دوو تیرۆریستی داعشی لە خورماتوو راگەیاند.
فەرماندەی ئۆپراسیۆنە هاوبەشەكانی عیراق لە راگەیەندراوێكدا بڵاویكردۆتەوە ، هێزەكانی دەزگای هەواڵگری سەربازی لە ناوچەی پەڵكانەی سەر بە خورماتوو بۆسەیەكیان بۆ 4 تیرۆریستی داعش داناوە كە پیلانی هێرشیان هەبووە و لە رووبەروبونەوەكانیشدا دووان لە تیرۆریستەكان كوژراون كە یەكێكیان خۆكوژ بووە و بە پشتێنە بۆمبرێژكراوەكەی خۆی كوژراوە، هاوكات دوو تیرۆریستەكەی تریش برینداركراون .
ئاماژە بۆ ئەوەشكراوە، بۆ رێگریكردن لە دوبارە بونەوەی پیلانی هاوشێوە و بۆ ئاشكراكردنی هەر شانەیەكی نوستوی داعش لە ناوچەكەدا ، ئۆپراسیۆنی گەڕان لە ناوچەكە بەردەوام دەبێت.
شانەی راگەیاندنی ئەمنی عیراق رایگەیاند، کەمێک پێش ئێستا کۆمەڵێک چەکداری رێکخراوی تیرۆریستی داعش لەسەر رێگای خورماتوو - کفری، لە نزیک کارگەی گەچ، کەوتنە بۆسەیەکی هێزەکانمانەوە و دوو چەکداریان کوژرا.
بەپێی سەرچاوەیەکی ئەمنی کە نەیویست ناوی ئاشکرا بکرێت، چەکدارانی داعش لە ناوچەی پەلکانەوە هاتوون و کەوتونەتە بۆسەیەکی سوپای عیراقەوە.
لە راگەیەندراوەکەی شانەی ئەمنی عیراقدا هاتووە؛ یەکێک لە چەکدارەکان خۆی تەقاندووەتەوە و ئەویتریش کوژراوە و دوانیشیان هەڵهاتوون، ئاماژە بەوەشدراوە هێزەکانیان لە کێوماڵکردنی ناوچەکە بەردەوامن.
هێزەکانی سوپای عێراق لە ماوەی رابردوودا زنجیرەیەک ئۆپەراسیۆنی سەربازییان ئەنجام داوە بۆ پاککردنەوەی ناوچەکانی نێوان خورماتوو و کفری، بەڵام بەهۆی سروشتی ناوچەکەو هەبوونی ئەشکەوت و پەناگەی زۆر، هێشتا چەکدارانی داعش لەو ناوچەیە ماونەتەوە.