عیراق
بڕیارە لە چەند رۆژی داهاتوودا خشتەی بودجەی گشتی عیراق رەوانەی ئەنجومەنی نوێنەران بكرێت.
مەزهەر محەمەد ساڵح راوێژكاری سەرۆك وەزیرانی عیراق بۆ كاروباری دارایی رایگەیاند، پێشبینی دەكرێت لە چەند رۆژی داهاتوودا خشتەی بودجەی فیدراڵی بۆ ساڵی 2025 كە بەشێكە لە بودجە سێ ساڵییەكە و بە یاسای ژمارە 13ی ساڵی 2023 پەسەندكراوە، بگاتە ئەنجومەنی نوێنەران، ئەوەش لە كاتێكدایە حكومەت دڵنیایی دەدات كە هاوسەنگی لە نێوان خەرجییەكان و وەبەرهێناندا دروست دەكات.
وتیشی، بودجە پشت بە دوو بەشی سەرەكی دەبەستێت، یەكەمیان بەكاربردن كە لە 64% تا 70%ـی كۆی سەرجەم خەرجییەكانی عیراق پێكدێت و موچەی فەرمانبەران و خانەنشینان و چاودێری كۆمەڵایەتی دەگرێتەوە، دووەمیشیان وەبەرهێنانە كە بریتییە لە پشتیوانیكردنی پرۆژەكانی گەشەپێدان و خزمەتگوزاری.
ئاماژەی بەوەشكرد، خەرجی عیراق بە گشتی 200 ترلیۆن دینارە، لەگەڵ كورتهێنان بە رێژی 64 ترلیۆن دینار ئەوەش لە كاتێكدا ئەگەر نرخی بەرمیلێك نەوت بۆ 70 دۆلار یان كەمتر داببەزێت.
سەرچاوەیەکی ئاگادار، هەواڵی گەیشتنی ئەسعەد شەیبانی، وەزیری دەرەوەی سوریا بۆ بەغدای پایتەخت پشتڕاست دەکاتەوە.
وابڕیاربوو ڕۆژی 27ـی مانگی رابردو، ئەسعەد شەیبانی وەزیری دەرەوەی سوریا سەردانی عیراق بکات و لەگەڵ بەرپرسانی باڵای وڵات کۆببێتەوە، بەڵام دواتر بەرپرسانی عیراق رایانگەیاند؛ بەهۆکاری ئەمنی سەردانەکەی شەیبانی دواخراوە.
هیشام ئەلعەلاوی، یاریدەدەری وەزیری دەرەوە، بە ئاژانسە هەواڵیە عیراقییەکانی راگەیاندبو، حکومەتی عیراق بە روی ئیدارەی کاتی سوریادا کراوەیە، نوێنەرەکانیشی بەشداری کۆبوونەوەکانی پاریس و ریازیان کردووە، ئەمەش ئاماژەیە بۆ ئەوەی رێککەوتنێک هەیە بۆ بەشداریکردن لە کۆبوونەوەیەک لە برۆکسل.
بەپێی زانیارییەکانی کوردسات نیوز؛ وابڕیارە ئەسعەد شەیبانی لەبەغداد لەگەڵ بەرپرسانی باڵای عیراق کۆببێتەوە.
وەزیری دادی عیراق رایگەیاند، یاسای لێبوردنی گشتی چووەتە بواری جێبەجێكردنەوە و تا ئێستا 100 سزادراوی گرتووەتەوە.
خالید شوانی وەزیری دادی عیراق لە چاوپێكەوتنێكی تەلەفزیۆنیدا، رایگەیاند، وەزارەتی داد بە تەواوی پابەند بووە بە سەرجەم بڕگەكانی یاسای لێبوردنی گشتی كە ئێستا كەوتووەتە بواری جێبەجێكردنەوە و بەهۆیەوە تائێستا 100 سزادراو بەپێی یاساكە ئازادكراون، كە هەموو مەرجەكانی یاساكەیان تیدابووە.
راشیگەیاند، میكانیزمێك هاتووەتە كایەوە بۆ كەمكردنەوەی قەرەباڵغی لە زیندانەكاندا و پێویستە لە عیراق ستانداردە جیهانییەكانی تایبەت بە مافەكانی مرۆڤ بۆ زیندانییەكان و خێزانەكانیان جێبەجێ بكرێت.
وەزارەتی كشتوكاڵی عیراق رایدەگەیەنێت، لە حەوت بەروبومی خۆراكیدا گەیشتوونەتە خودبژێوی و 13 بەرهەمی تریش هەناردە دەكەن.
محەمەد غوزاعی وتەبێژی وەراەرتی كشتوكاڵی عیراق رایگەیاند، لە چوارچێوەی هەوڵە بەردەوامەكانی حكومەتدا بۆ پەرەپێدانی كەرتی كشتوكاڵ، لە بەرهەمهێنانی حەوت بەروبوومی خۆراكیدا گەیشتوونەتە ئاستی خودبژێوی و 13 بەرهەمیش هەناردەی دەرەوەی عیراق دەكرێن، كە بریتین لە خورما و تەماتە و پەتاتە و كاڵەك و شوتی، لەگەڵ بەرهەمی تر.
لەبارەی كەمی ئاویش، وتەبێژی وەراەرتی كشتوكاڵی عیراق رایگەیاند، وەزارەتەكەی پشتی بەستووە بە پلانی نوێی كشتوكاڵی كە خۆی دەبینێتەوە لە چاندنی زەوییە بیابانەكان، پشتبەستن بە ئاوی بیرەكان، و پەرەپێدانی جۆری نوێی بەروبووم كە پێویستیان بە بڕێكی زۆر ئاو نییە، ئەوەش جگە لە پەرەپێدانی شێوازە كشتوكاڵە مۆدێرنەكان كە بەشدارن لە كەمكردنەوەی بەكارهێنانی ئاو.
سەرۆك وەزیرانی پێشووتری عیراق رایدەگەیەنێت، هەڵبژاردنی داهاتووی ئەنجومەنی نوێنەران لە 25ی تشرینی دووەمی ئەمساڵ تێپەڕ ناكات.
حەیدەر عەبادی سەرۆك وەزیرانی پێشووتری عیراق رایگەیاند، بەڕێوەبردنی عیراق دوای 2003 بەهۆی بوونی گروپە تیرۆرستییەكان و گەندەڵی دارایی، ئاسان نەبووە و پێویستە حكومەت بیر لە كەمكردنەوەی خەرجییەكان بكاتەوە بۆئەوەی كێشەی كورتهێنانی بودجە چارەسەر ببێت.
وتیشی، تائێستا كاتێك دانەنراوە بۆ گۆڕانكاری لە یاسای هەڵبژاردن، هەڵبژاردنی داهاتووی ئەنجومەنی نوێنەرانی عیراق لە 25ی 11ی ئەمساڵ تێپەڕناكات و ئەنجام دەدرێت.
عەبادی دەشڵێت، كەمی رێژەی بەشداریكردنی هاووڵاتیان لە هەڵبژاردندا بە مانای ئەوە دێت كە خەڵكی بێهیوابوون لە گەندەڵی و بەڕێوەبردنی دەوڵەت، داواشی لە موقتەدا سەدر رێبەری رەوتی نیشتیمانی شیعە كرد، بەشداری هەڵبژاردنی داهاتوو بكات.
د. لەتیف رەشید، سەرۆک کۆماری عیراق ئەمڕۆ سەردانی مەرجەعی گەورەی ئایینی ئایەتوڵڵای گەورە شێخ محەمەد ئیسحاق فەیازی کرد لە نەخۆشخانە، کە سەردانی نەخۆشخانەی کردبوو بۆ پشکنینی تەندروستی.
لە میانەی سەردانەکەدا، ستافی پزیشکی نەخۆشخانە کورتەیەکیان لەسەر بارودۆخی تەندروستی ئایەتوڵڵا و هەوڵەکان بۆ چارەسەرکردنی خستەڕوو بۆ سەرۆک کۆمار. سەرۆک کۆمار هیوای چاکبوونەوەی خێرا و بەردەوامی بۆ ئایەتوڵڵا خواست، هاوکات رۆڵی بەرچاوی مەرجەعی گەورەی ئایینی بەرزنرخاند لە چەسپاندنی بەهاکانی میانڕەوی و لێبوردەیی و بەهێزکردنی یەکێتی نیشتمانی.
لە لایەکی دیکەوە، بنەماڵە و تیمی پزیشکی کە سەرپەرشتی چاودێریکردنی ئایەتوڵڵا شێخ محەمەد ئیسحاق فەیاز دەکەن، پێزانینی خۆیان بۆ سەردانەکەی سەرۆک کۆمار دەربڕی و ئاماژەیان بەوە کرد، کە ئەم سەردانە رەنگدانەوەی گرنگیدانی بەڕێزیانە بۆ زانایان و سیمبولەکانی گەل.
تیمی پزیشکی دڵنیاییان دا کە تەندروستی ئایەتوڵڵا بەهۆی چاودێری پزیشکی بەردەوام بەرەو باشتر دەچێت.
د. لەتیف رەشید سەرۆك كۆماری عیراق لە كۆشكی بەغداد پێشوازیكرد لە وەفدێكی "پارتی سەرحی نیشتمانی" بە سەرۆكایەتی دكتۆر مستەفا كوبەیسی سكرتێری گشتی پارتەكە
لەكۆبوونەوەیەكدا دوایین پێشهاتەكان و رەوشی سیاسی و چۆنیەتی بەرەوپێشبردنی پێشكەوتن لەبوارە جیاجیاكاندا تاوتوێكرا و سەرۆك كۆمار تەئكیدیكردەوە لە پێویستی بەرزكردنەوەی ئاستی هەماهەنگی نێوان هەموو لایەنەكان و كاركردن بۆ یەكخستنی دیدگاكان لەپێناو پاراستنی سەقامگیریی سیاسی و ئەمنی لەوڵاتدا بەمەبەستی خزمەتكردنی خواستەكانی سەرجەم هاووڵاتیان بۆ پێشكەوتن و خۆشگوزەرانی
هەروەها پێشهاته هەرێمی و نێودەوڵەتییەكان تاوتوێكران.
هەردولا جەختیان له سەر یەكڕیزیی هەڵوێستی عێراق كردەوه، هەر لەو كۆبونەوەیەدا جەخت لە گرنگیی ئەنجامدانی هەڵبژاردنی ئەنجومەنی نوێنەران له وادەی خۆیدا كرایەوە
حكومەتی عیراق لە بارەی موچەی موچەخۆرانی ئەمساڵەوە دڵنیایی دەدات و دەڵێت، پارەی پێویست مسۆگەر كراوە بۆ موچە و بودجەی بەكاربردن.
باسم عەوادی وتەبێژی حكومەتی عیراق رایگەیاند، ساڵی رابردوو بودجەی گشتی 212 ترلیۆن دینار بووە، لەو بڕە 156 ترلیۆن دیناری خەرجكراوە، 90 ترلیۆن دینار لە بودجە بۆ موچە و 40 ترلیۆن بۆ بودجەی بەكاربردنی وەزارەتەكان و 27 ترلیۆن دیناریش بۆ پڕۆژەكانی وەبەرهێنان بووە.
دەشڵێت، ساڵی رابردوو تەنیا 12 ترلیۆن دینار لە بودجە گشتی ماوەتەوە، كە بودجەی وەبەرهێنانە.
بۆ موچەی ئەمساڵیش عەوادی وتی، پارەی پێویست بۆ موچەی موچەخۆران و بودجەی بەكاربردن مسۆگەر كراوە.
سەرۆك كۆماری عیراق لەچاوپێكەوتنێكیدا لەگەڵ رۆژنامونووسێكی ئەمریكی باس لە دواین پێشهات و گۆڕانكارییە سیاسی و ئەمنییەكانی عیراق و ناوچەكە دەكات و دەڵێت دەتوانن رۆڵێكی گرنگییان هەبێت بۆ نێوەندگیری لە نێوان تاران و واشنتۆن.
تیم كۆنستنتین رۆژنامەنووس لە رۆژنامەی واشنتۆن تایمزی ئەمریكی گفتوگۆیەكی لەگەڵ لەگەڵ د.لەتیف رەشید سەرۆك كۆماری عیراق بڵاوكردووەتەوە كە لە گەشتێكیدا بۆ بەغداد ئەنجامی داوە.
سەرۆك كۆمار لەسەرەتادا مێژووی پڕ لە كێشەی عیراقی باسكردوە لە سەردەمی دیكتاتۆریەتەوە تا سەرهەڵدان و كۆتاییهێنان بە گروپی تیرۆریستی داعش، دەشڵێت، لە ئێستادا كاری لەپێشینەیان پاراستنی بەرژەوەندی و ئاسایش و سەقامگیری عیراقە.
وتیشی، رێز لە هەموو دراوسێكانیان دەگرن و پەیوەندییەكی باشیان لەگەڵیان هەیە بە وڵاتانی ناوچەكەشەوە.
د.لە تیف رەشید دەڵێت، بەپێی دوایین سەرژمێری دانیشتووان، ژمارەی دانیشتووانی عیراق گەیشتووەتە (46) ملیۆن كەس، كە 60٪یان لە دوای ساڵی 2003 لەدایكبوون، ژمارەیەكی زۆر دەرچووش هەن، بەشێوەیەك رەنگە لە هەموو وڵاتێكی تر زیاتر بێت، ئەمەش بەهۆی ژمارەی زانكۆكان و ئەو كەشە ئەكادیمیەی لە عیراق رەخساوە.
لەبارەی رەوشی ناوچەكە سەرۆك كۆمار دەڵێت، دەتوانن رۆڵێكی گرنگ لە ناوچەكەدا ببینن و هەوڵیانداوە بۆچوونەكانی ئێران و سعودیە لەیەكتر نزیك بكەنەوە كە سوودی بۆ هەمووان هەیە، جگە لەوەش عێراق دەتوانێت رۆڵێكی گرنگی نێوەندگیری لە نێوان واشنتۆن و تاراندا هەبێت.
لەبارەی دواین پێشهات و گۆڕانكارییەكانی سوریاش، د.لەتیف رەشید رایگەیاندووە، ئێستا سوریا ئیدارەیەكی نوێی هەیە، هیوادارن حكومەتی داهاتوو رەنگدانەوەی ئیرادەی گەلەكەی بێت، جا لە رێگەی هەڵبژاردنەوە بێت یان لە رێگەی ئەو هەنگاوە دیموكراسیانەی كە پێویستە بنرێن و هەموو لایەنەكان بەشداربن لە حكومەتدا.
سەرۆك كۆمار دەشڵێت، عیراق مێژوویەكی دەوڵەمەندی هەیە و دەگەڕێتەوە بۆ 6 یان 7 هەزار ساڵ لەمەوبەر، كە یەكەم یاسا و سیستمی ئاودێری، كشتوكاڵ، دروستكردنی كۆشك لە عێراق هەبووە، جگە لە زانست و بیركاری و نامە نووسراوەكان كە هەموویان لە عیراقەوە دەستیان پێكردووە، لەگەڵ ئەوەشدا عێراق شوێنی هەموو ئایینەكان بووە.
لەبارەی پەیوەندییەكانی واشنتۆن و بەغدادیش سەرۆك كۆمار دەڵێت، پێویستە پەیوەندییەكان باشتر بن لە رێگەی گفتگۆی نێوان وەفدی باڵای هەردوولاوە كە لە بەغداد بێت یان واشنتۆن، وتیشی، هانی سەرۆكی ئەمریكا دەدەن بەڵێنەكەی بۆ پاراستنی ئارامی لە جیهان و رۆژهەڵاتی ناوەڕاست جێبەجێ بكات كە ئەوەش بەبێ كۆتاییهێنان بە شەڕ و ململانێكان لە ناوچەكەدا كارێكی ئاسان نابێت، بە تایبەتیش ئاڵۆزییەكانی ئێستای سوریا، فەلەستین، لوبنان، یەمەن، سودان و سۆماڵیش.
ئەو رۆژنامەنووسە ئەمریكییە دەڵێت، لە بەشێكی گفتوگۆكەیدا لەگەڵ سەرۆك كۆمار لە بارەی دەسەڵاتی دادوەری لە عیراق گفتوگۆیان كردووە و د.لەتیف رەشید وتویەتی، ئەگەر بە وردی تەماشای دەسەڵاتی داوەری بكرێت، گۆڕانكارییەكان بەدی دەكرێن كە بە شێوەیەكە بەراورد ناكرێت لەگەڵ ساڵانی رابردوودا، بەڵام هێشتا كێشەیان هەیە، لەگەڵ ئەوەشدا ئازادی، قسەكردن، مافی مرۆڤ، نەتەوەیی، رەوشی ئایینەكان لەعیراق لە زۆر وڵات باشترە.
د.لەتیف رەشید لە كۆتایی گفتوگۆكەیدا ئەو رۆژنامەنووسە ئەمریكییە، لەبارەی پەیوەندییەكانی عیراق و وڵاتانی رۆژئاوا، رایگەیاندووە، پەیوەندییان لەگەڵ رۆژئاوا بۆ ماوەیەكی زۆر لەسەر ئاسایش بووە، بەڵام لە ئێستادا گۆڕاوە بۆ بواری وەبەرهێنان و ئابوری، چەندین كۆمپانیای گەورە لە كەرتی وزە لە عیراق لە بواری پترۆكیمیایی و نەوتدا چالاكن و لە عیراق وەبەرهێنان.
كاروانێكی تری خێزانە عیراقییەكانی كەمپی هۆل كە پێكهاتوون لە 161 خێزان گەڕێنرانەوە و لە كەمپی جەدعە لە پارێزگای نەینەوا جێگیر دەكرێن.
لە چوارچێوەی هەماهەنگی نێوان ئیدارەی خۆبەڕێوەبەریی باكور و رۆژهەڵاتی سوریا و لیژنەی كۆچ و كۆچبەرانی ئەنجومەنی نوێنەرانی عیراق، 161 خێزانی عیراقی كە پێكهاتوون لە 607 كەس، لە كەمپی هۆل لە پارێزگای حەسەكەوە گەڕێندرانەوە بۆ عیراق و لە كەمپی جەدعە لە پارێزگای نەینەوا جێگیر دەكرێن.
ئەوەش شەشەمین كاروانی گەڕانەوەی خێزانە عیراقییەكانە لە سەرەتای ئەمساڵەوە، 23هەمین كاروانیشە كە لەساڵی 2022ەوە تائێستا گەڕێنراونەتەوە.
د.لەتیف رەشید سەرۆک کۆماری عیراق، کۆمەڵێک کتێبی بەنرخ و سەرچاوەی توێژینەوەی ئەکادیمی پێشکەش بە زانکۆی تکریت کرد.
ئەمەش لەمیانەی سەردانێکی د.عەدنان ئیبراهیم شارەزا لە سەرۆکایەتی کۆمار هات دوای کۆبوونەوەی لەگەڵ سەرۆکی زانکۆ د. وعد مەحمود ڕەوف و ژمارەیەک لە مامۆستایانی زانکۆکە.
د.عەدنان ئیبراهیم سڵاوی سەرۆک کۆمار د. لەتیف رەشیدی ئاراستەی مامۆستایان و خوێندکارانی زانکۆ کرد و هیوای بەردەوامی و سەرکەوتنی بۆ خواستن لەخزمەتکردنی پرۆسەی گەشەپێدان و خۆشگوزەرانی لەولاتدا.
لای خۆیەوە سەرۆکی زانکۆ سوپاس و پێزانینی خۆی دەربڕی بۆ دەستپێشخەرییەکەی سەرۆک کۆمار و پەرۆشی بۆ پاڵپشتیکردنی پرۆسەی خوێندن لەزانکۆکاندا و دابینکردنی پێداویستییەکانی توێژەران و خوێندکاران.
كۆمسیۆنی هەڵبژاردنەكانی عیراق رایگەیاند، رۆژی شەممەی داهاتوو نوێكردنەوەی تۆماری بایۆمەتری دەنگدەران دەستپێدەكاتەوە بۆ هەڵبژاردنی داهاتووی ئەنجومەنی نوێنەران، لە دایكبووانی ساڵی 2007 یش مافی دەنگدانیان دەبێت.
كۆمسیۆنی باڵای سەربەخۆی هەڵبژاردنەكانی عیراق بڵاویكردەوە، لە چوارچێوەی ئامادەكارییەكانیان بۆ هەڵبژاردنی داهاتووی ئەنجومەنی نوێنەران، كە بڕیارە كۆتایی ئەمساڵ بكرێت، دەستیانكردووە بە نوێكردنەوەی بەرنامەكانی ئامێری پەنجەمۆر و چارەسەركردنی كێشەی نەخوێندنەوەی پەنجەمۆری دەنگدەران، هاوكات ئەنجامدانی گرێبەستێك لەگەڵ كۆمپانیایەكی پشكنین بۆ پشكنینی ئامێرەكان.
ئەوەشی خستووەتەڕوو، كاردەكەن بە ئاڕاستەی زیادكردنی وێنەی دەنگدەر بۆ سەر كاتی دەنگدان، بۆ كەمكردنەوەی كێشەی نەخوێندنەوەی پەنجەمۆری دەنگدەر.
كۆمسیۆن راشیگەیاندووە، رۆژی شەممەی داهاتوو 15ـی ئەم مانگە، نوێكردنەوەی تۆماری دەنگدەران دەستپێدەكات و لە دایكبووانی ساڵی 2007 یش مافی دەنگدانیان دەبێت و دەتوانن سەردان بكەن بۆ ناو تۆماركردن.
حكومەتی عیراق رەزامەندی لەسەر دامەزراندنی كۆمپانیای نیشتمانی بە هاوبەشی لەگەڵ كۆمپانیای ڤۆدافۆن مۆبایل نیشاندا.
حكومەتی عیراق لە كۆبوونەوەی ئەمڕۆیدا رەزامەندی نیشاندا لەسەر دامەزراندنی كۆمپانیای مۆبایلی نیشتمانی بە هاوبەشی لەگەڵ كۆمپانیای ڤۆدافۆن و بانكی بازرگانی عیراق.
هەیام یاسری وەزیری پەیوەندییەكانی عیراق ئاماژەی بەوە كرد، وەزارەت بەردەوامە لە تەواوكردنی ئامادەكارییە تەكنیكییەكان بۆ پڕۆژەكە لەگەڵ كۆمپانیای ڤۆدافۆنی نێودەوڵەتی كە بڕیارە لە چەند مانگی داهاتوودا جێبەجێ بكرێت.
بەوتەی خۆی، كۆمپانیاكە تەكنەلۆژیای نەوەی پێنجەم بەكاردەهێنێت كە تیایدا پەیوەندییە نێودەوڵەتیەكانیش لەخۆی دەگرێت كە بەشێك لە داهاتەكەی بۆ خانەنشینانە.
د.لەتیف ڕەشید سەرۆک کۆماری عیراق کارنامەی ژمارەیەک باڵیۆزی نانیشتەجێی وەرگرت کە پیکهاتون لە کۆماری زیمبابۆی و کۆماری ئەلبانیا و کۆماری قوبرس.
سەرۆک کۆمار لەمیانەی دیدارەکەیدا لەگەڵ باڵیۆزە نوێیەکان بەجیا هەوڵی عیراقی بۆ پەرەپێدانی پەیوەندییەکانی و پەرەپێدانی هاوکاری دووقۆڵیی لەگەڵ وڵاتەکانیان دوپاتکردەوە بەشێوەیەک کە خزمەت بە بەرژەوەندییە هاوبەشەکان بکات و ئاماژەی بەوەدا کە پەرۆشی بۆ دامەزراندنی پەیوەندییەکی هاوسەنگ لەسەر بنەمای بەهێزکردنی هاوکاری لەبوارە جیاجیاکاندا و کارکردن بۆ زاڵبوون بەسەر ناکۆکی و گرژییەکانی ناوچەکە لەڕێگەی دیالۆگ و هەماهەنگی هاوبەشەوە لەپێناو بەرقەرارکردنی ئاشتی و ئاسایشی نێودەوڵەتی بەپێویست دەزانین.
لە بەرامبەردا باڵیۆزەکان سوپاسی سەرۆک کۆماریان کرد بۆ ئاسانکاری بۆ جێبەجێکردنی ئەرکەکانیان و خواستی وڵاتەکانیان بۆ بەهێزکردنی پەیوەندییەکان لەگەڵ عێراق دەربڕی هیوایان خواست گەشەکردنی پەیوەندیەکان هەموو بوارە جیاجیاکان بگرێتەوە.
وەزارەتی سەرچاوەكانی ئاوی عیراق دڵنیایی دەدات لە رەوینەوەی وشكەساڵی و دەشڵێت، تەنیا لەم چەند رۆژەدا 200 ملیۆن مەتر سێجا ئاو كۆكراوەتەوە.
وەزارەتی سەرچاوەكانی ئاوی عیراق لە راگەیەنراوێكدا ئاماژەی بەوەكردووە، ئەم بارانەی لە چەند رۆژی رابردوودا باریووە بڕێكی زۆر باش بووە و 200 ملیۆن مەتر سێجا ئاوی باران لە بەنداوەكان و پۆندەكاندا كۆكراوەتەوە.
وەزارەتی سەرچاوەكانی ئاو دڵنیایی دەدات لە پاراو بوونی زەوییە كشتوكاڵی و بێستانەكان و چەند زۆنگاوێكی باشوری عیراقیش ژیاونەتەوە كە بەهۆی گۆڕانكاری كەشوهەواوە وشك بوون.
دەشڵێت، بڕێكی بەرچاو ئاوی باران كۆكراوەتەوە كە دەتوانرێت لە وەرزی هاویندا بۆ پرۆژە كشتوكاڵیەكان بەركاربێت و كار دەكەن بۆ باشكردنی ژێرخانی ئاو و بگەنە ئاستی خودبژێوی.
وەزیری پەیوەندییەكانی عیراق رایگەیاند، كۆمپانیایەكی نوێی پەیوەندی لە عیراق دادەمەزرێنێت.
هەیام یاسری وەزیری پەیوەندییەكانی عیراق رایگەیاند، یاداشتنامەیەكی لێكتێگەیشتنیان لەگەڵ كۆمپانیای ڤۆدافۆن ئیمزا كردووە و بە بەشداریی چەند لایەنێك كۆمپانیایەكی نوێی پەیوەندیكردن لە عیراق دادەمەزرێنن.
وەزیری پەیوەندییەكانی ئاماژەی بەوەشكرد، تیمێكی هاوبەش لە نێوان وەزارەت و شارەزایانی كۆمپانیای ڤۆدافۆن پێكهێنراوە و كار لەسەر جێبەجێكردنی پڕۆژەكە دەكەن.
ئەمەش لە كاتێكدا دێت، پیشووتر دەستەی پەیوەندییەكان و راگەیاندنی عیراق بڕیاریدا خزمەتگوزاری ئینتەرنێتی كۆمپانیای كۆڕەك تیلیكۆم و پەیوەندیكردنی بە هێڵەكانی تر رابگرێت،ئەوەش بەهۆی نەدانی قەرزەكانی و بەردەوامی سەرپێچیەكانی لە پارێزگاكانی عیراق.