دەقی پەیامەکە... 

بەبۆنەی راگەیاندنی ئەنجامە رەسمی و بەراییەکانی ھەڵبژاردنی ئەنجومەنی پارێزگاکان لە عیراق، گەرمترین پیرۆزبایی ئەم سەرکەوتنە گەورەیەی گەلی کوردستان و یەکێتی لە خەڵکی کوردپەروەری ئەو ناوچانە و کەسوکاری شەھیدان و  پێشمەرگە و تێکۆشەران و ھێزە ئەمنییەکان و لاوانی ماندوونەناس و تەواوی رۆڵەکانی ئەم گەلە ستەمدیدەیە و ئەم حزبە قوربانیدەرە دەکەین، پیرۆزبایی لە رۆحی شادی رێبەری گەورەی کوردایەتی مام جەلال دەکەین کە  ھەتاسەر خەمخۆری نەگۆڕی خەڵکی ئەو ناوچە کوردستانییانە بوو.  

ئەم سەرکەوتنەی یەکێتی کە سەرکەوتنی کورد و کوردستانییانی کەرکوک و خانەقین و خورماتوو و مەخمور و شەنگال و یەک بەیەکی خەڵکی ئەو ناوچانە و تەواوی خەڵکی کوردستانە، بەرھەمی کاری دەستەجەمعی یەکێتییانە و رێبەرایەتی و سەرکردایەتییەکی توندوتۆڵ و جیاوازە، وەفای خەڵکی ئەو ناوچانە بوو بۆ مامی رێبەرمان، ھەروەک چۆن زادەی کۆنگرە و خۆڕێکخستنەوەیەکی بە پلان و کارا و سەردەمێکی نوێی مایەی ھیوایە، بەڵام وەک مام فەرمووی: نابێت لەسەر چەپکەگوڵی دەسکەوتەکان خەومان لێ بکەوێت. 

لێرەدا گرنگە سەرکەوتن و دەسکەوتە حزبی و دیموکراسییەکان بۆ دەسکەوتێکی عیراقی و کوردستانی و نیشمانییانە تەرجومە بکەین و برایەتی و پێکەوەھەڵکردن و پێکەوەژیان و کارکردنێکی کاریگەر لەگەڵ پێکھاتە گرنگ و رەسەنەکانی ئەو ناوچانەدا بھێنینە ئاراوە، ھەروەک چۆن گرنگە ئەو سەرکەوتنە ببێتە ھەوێنی ھاوکاری و ھاوخەباتی ھێزە کوردستانییە بەرپرسیارەکان و مایەی کۆکردنەوە و یەکبوونی کودستانییانە و عیراقییانەمان بێت و ببێتە ئیلھامبەخش بۆ بەدەستھێنانی سەرکەوتنی ئاوا بەرچاو لە داھاتووی نزیکی عیراق و ھەرێمی کوردستاندا،  لەپێناوی خزمەتکردنی خەڵکی بەوەفای خۆمان، کە دەرکەوت وێڕای نیگەرانییەکانیان بەڵام لە تەنگانەدا ھەرگیز پشت لە ھێزە رەسەن و خەباتگێڕەکانی خۆیان ناکەن. 

لە جیاتی مەکتەبی راگەیاندن و ھۆشیاری 
یەکێتی نیشتیمانی کوردستان
عیماد ئەحمەد

کەمال محەمەد وەزیری کارەبای ھەرێم بۆ گفتوگۆکردن سەبارەت بە لیژنەی پێوەری زیرەک و چاودێری و بەدواداچوونی سەرپێچییەکان، لەگەڵ بریکار و راوێژکاران و بەڕێوەبەرانی گشتیی کارەبای پارێزگاکان کۆبووەوە، لە کۆبوونەوەکەدا بڕیاردرا ھەڵمەتێکی فراوان بۆ نەھێشتنی سەرپێچییەکان و سزادانی ئەو کەسانە بکرێت کە لە دەرەوەی پێوەری زیرەک کارەبایان ڕاکێشاوە و شوێنەکانیان ئاشکرایە.

ھەروەھا بڕیار لەسەر جێبەجێکردنی یەکسانی لە دابەشکردنی کارەبا لەنێوان پارێزگاکان و بڕیاری کەمکردنەوەی کارەبا بەردەوامەکان درا.

وەزارەتی کارەبا راشیگەیاندووە، توانای بەرھەمھێنانی کارەبای بۆ سێ ھەزار و ٤٠٠ مێگاوات بەرزکردووتەوە، لەکاتێکدا خواست لەسەر کارەبا بۆ سەرووی ٦ ھەزار مێگاوات بەرزبووەتەوە.

دەقی پەیامی پیرۆزباییەکەی دامەزراوەی سەرۆک جەلال تاڵەبانی.... 

- بەڕێز کاک بافڵ جەلال تاڵەبانی، سەرۆکی یەکێتیی نیشتمانیی کوردستان
- بەڕێزان ئەندامانی مەکتەبی سیاسیی یەکێتیی نیشتمانیی کوردستان
- بەڕێزان ئەندامانی سەرکردایەتیی یەکێتیی نیشتمانیی کوردستان
- بەڕێزان ئەندامانی مەڵبەندی کەرکوکی تێکۆشەر
- جەماوەری تێکۆشەری شاری کەرکوکی قودسی کوردستان

بەناوی سەرجەم ئەندامانی دامەزراوەکەمانەوە گەرمترین پیرۆزبایی لە ئێوەی تێکۆشەر و ماندوونەناس دەکەین بەھۆی ئەو سەرکەووتنە مەزنەی کە لە ھەڵبژاردنی ئەنجوومەنی پارێزگاکانی کەرکوک و ناوچە دابڕێنراوەکانی کوردستان بە دەستتانھێنا.

ھەروەھا پیرۆزبایی گەرم لە ھەموو ئەندامانی یەکێتیی نیشتمانیی کوردستان دەکەین لە کوردستان و ھەموو شوێنێکی تری ئەم جیھانە، کە بە راستی سەرکەوتنێکی مەزنی مێژوویی گەلەکەمان و یەکێتیی نیشتمانیی کوردستانە لە کەرکوک و ناوچە دابڕێنراوەکانی کوردستان. 

بەمەش یەکێتییەکەی سەرۆک مام جەلال داستانێکی مێژوویی تری تۆمار کرد لە کەرکوکی قودسی کوردستان و شوێنەکانی تر بووە پێشەنگی ھەموو پارتەکانی تر لە کەرکوک لە ھەڵبژاردنی ١٨/١٢/٢٠٢٣ی ئەنجوومەنی پارێزگاکانی عێراقدا.

لەھەمان کاتدا دەستخۆشی لە ھەموو سەرکردە و ئەندامانی یەکێتیی نیشتمانیی کوردستان دەکەین لەسەروو ھەمویانەوە سەرۆکی یەکێتیی نیشتمانیی کوردستان بەڕێز کاک بافڵ تاڵەبانی و ھەموو تیمەکەی کە لەگەڵیدا بوون لە ئەندامانی مەکتەبی سیاسی و مەڵبەندەکان ودامودەزگاکانی یەکێتیی نیشتمانیی کوردستان.

بەڕاستی بەرھەمی ماندووبونەکانتان لەو سەرکەوتنە مەزنەدا خۆی دەبینێتەوە کە بەدەستتان ھێنا، مایەی شانازی ھەموو ئەندامانی یەکێتی و تێکۆشەرانی گەلەکەمانەو جێی خۆیەتی کە بڵێیین ئەم جارەش جەماوەری بە شەرەف و تێکۆشەر و ماندوو نەناسی گەلەکەمان لە کەرکوک سەلماندیان کە رۆڵەی تێکۆشەر و کۆڵەکەی بنچینەیی یەکێتیی نیشتمانیی کوردستانن نەک ھەر لە خەبات و قوربانیدان و ژمارەی شەھیدەکانیان، بەڵکو لە پرۆسەی ھەڵبژاردن  و چوونە سەر سندوقەکانی دەنگدانیشدا پێشڕەو و پێشەنگی  گەلەکەمان و یەکێتیین.

دڵنییام بە ھیممەتی سەرکردە و ئەندامانی یەکێتی و جەماوەرەکەی، یەکێتی دەبێتەوە بە یەکێتییەکەی جارانی سەرۆک مام جەلال.

بەرەو سەرکەوتنی زیاتر لە ھەڵبژاردنەکانی داھاتووی کوردستان و عێراقدا.

بۆ پێشەوە لە ژێر ئاڵای یەکێتیی نیشتمانیی کوردستاندا.

باڵیۆزد. محەمەد سابیر ئیسماعیل 

سەرۆکی دامەزراوەی سەرۆک جەلال تاڵەبانی 

بیژەن مۆساڤار ڕەحمانی سەرۆکی جێبەجێکاری کۆمپانیای "دی ئێن ئۆی"ی نەوت و غازی نەرویژی لە راگەیەنراوێکدا رایگەیاند، سەرەڕای وەستانی ھەناردەکردنی نەوتی ھەرێمی کوردستان لە رێگەی بەندەری جەیھانی تورکیاوە، تەنانەت لەگەڵ دابەزینی نرخی فرۆشی ناوخۆیی بۆ نیوە ، بەڵام داھاتێکی باش گەڕاوەتەوە بۆ کۆمپانیاکەیان ئەوەش لە رێگای فرۆشتنی بەرھەمەکانیان بە وەبەرھێنەری ناوخۆی.

راشیگەیاند، لە ئێستادا رۆژانە بەرھەمھێنانی نەوت لە کێڵگەی تاوکێ لەبەرزبونەوەدایە و گەیشتۆتە نزیکەی ٩٠ ھەزار بەرمیل نەوت لە رۆژێکدا، وە ھەر بەرمیلێکیان بە ٣٠ دۆلار فرۆشتووە.
ئاماژەی بەوەشکرد، کۆمپانیاکەیان بۆ ساڵی ٢٠٢٤ پلانی ھەیە بۆ ھەڵکەندی بیرێکی تر لە ناحیەی بەعشیقە لە سنوری پارێزگای نەینەوا .

دەقی پەیامەکە... 

ھاووڵاتیانی ئازیز و خۆشەویستی گەرمیان ، کەسوکاری سەربەرزی شەھیدان و قوربانیان ھەڤاڵانی یەکێتی و دەنگدەرانی دڵسۆز و نیشتیمانپەروەر،  لەگەڵ تەواوبوونی  پرۆسەی دەنگدان و بەشداریکردنی ئێوەی ئازیزدا لەم پرۆسە دیموکراسی و ئازادەدا، بە پێویستمان زانی لێرەوە لە شاری کەرکوکی قودسی کوردستانەوە، ھەڵوێستی بەرز و  پیرۆزتان بنرخێنین.

مامی گەورە و ڕابەرمان فەرموویەتی،" کلیلی چارەسەری کێشەی کورد کەرکوکە و ھەتا کوردێک مابێت کەرکوک شاری کوردستانە "، لەژێر ڕۆشنایی ئەو وتەیەی سەرکردە و ڕابەری نەتەوەکەماندا ئێمە لە مەڵبەندی گەرمیان پشتیوانی و سەپۆرتی سەرخستنی پرۆسەی ھەڵبژاردنی کەرکوک و خانەقین و خورماتوو ناوچە کوردستانییەکانی دەرەوەی ئیدارەی ھەرێم)_مان کرد و بەچڕی کارمان لەسەر ھاندانی خەڵک بۆ بەشداری لەو ھەڵبژاردنەدا کرد و بۆ ئەو مەبەستەش ھەمو ڕێووشوێنێکی پێویستمان گرتەبەر.

لە ئێستاشدا ھەڤاڵی سەرۆک و بەشێکی زۆر لە ئەندامانی مەکتەبی سیاسی و سەرکردایەتی یەکێتی لە شاری کەرکوکی قودسی کوردستانین، لێرەوە چاوەڕوانی سەرکەوتنی گەورە و بەدەستھێنانی ئەنجامی چاوەڕوانکراوو و گەورەین بۆ گەلەکەمان .

پشت بەخودا و بە پاڵپشتی ئێوەی جوامێر و ئازا و کوردپەروەر سەردەکەوین و ئاشتی و ئارامی لەشاری کەرکوکی ھەمیشە سەوز ئەچەسپێنین و یاسا دەگەڕێنینەوە بۆ خەڵکەکەی.

جارێکی تر سوپاسی بەشداری و ئامادەبونتان دەکەم، سوپاس بۆ ھەریەکێکتان کە لەپێناو گەشتن بە ئامانجە نەتەوەیی و نیشتیمانیەکانماندا دەستتان لەسەر برینەکانتان دانا و دەنگتان دا بۆ ئەوەی جارێکیتر کەرکوک نەکەوێتەوە بەر ڕقی شۆڤێنیستە داگیرکەرەکان.

بۆ پێشەوە بەرەو سەرکەوتن

سالار مەحمود
ئەندامی سەرکردایەتی و لێپرسراوی مەڵبەندی گەرمیان
١٨_١٢_٢٠٢٣

سەعدی ئەحمەد پیرە وتەبێژی یەکێتیی نیشتمانیی کوردستان لە کۆنفرانسێکی رۆژنامەوانیدا رایگەیاند، ھەڵبژاردن لە پارێزگای کەرکوک بۆ یەکێتی درێژە پێدەری سیاسەتی سەرۆک مام جەلالە، کێبڕکێ لەو پارێزگایە لەسەر خاکە.

وتیشی، ھیوادارن ئەنجامە رەسمییەکان زیاتر بن و لە رێگەی ئەنجومەنێکی لێھاتوو دەستێوەردانی دەرەکی سارێژ بکەن.

بافڵ جەلال تاڵەبانی، سەرۆکی یەکێتی نیشتیمانی کوردستان لە پەیامێکدا ئاماژەی بەوەشکردوە، داوا لە سەرجەم ھاونیشتمانییان دەکات روو لە سندووقەکانی دەنگدان بکەن و بەشداریی بەرفراوانیان ھەبێت و، مافی دیموکراسیی خۆیان پەیڕەو بکەن و دەنگ بۆ بونیادنانی داھاتوویەکی گەشتر بدەن.

ئەوەشی خستوەتەڕو، ئەمڕۆ رۆژێکی گرنگە و دەنگ بدەن، شانازییەکی تر بۆ مێژووە درەوشاوەکەتان تۆمار بکەن و رۆڵەکانی داھاتوو پێویستیان بە دەنگی ئێوەیە، دڵنیاشم لە ئاست ئەو بەرپرسیارێتییە نەتەوەیی، ئەخلاقی و مێژووییەدا دەبن.

لەبارەی ئاستەنگییەکانیش، سەرۆکی یەکێتی دەڵێت، دەزانم خاڵەکانی پشکنین و وێستگەکانی دەنگدان قەرەباڵغن، بەڵام تکایە پشوودرێژبن، بە ئارامییەوە مامەڵە بکەن و وەک ھەمیشە دڵسۆزی و خۆڕاگریی خۆتان بسەلمێنن.

پەیامی وەزیری پێشمەرگە بۆ ڕۆژی ئاڵای کوردستان... 

ئاڵای کوردستان، شوناس و شکۆی نەتەوەییمان.

ئاڵای کوردستان، ھێمای شۆڕشە ڕزگاریخوازە یەک بەدوای یەکەکانی نەتەوەیی کورد بووە. مێژوو و خەباتی نەتەوەییمان شاھیدی شوناس و ئاڵامانە. بۆ یەکەمین جار لە ٢٢ی کانوونی دووەمی ١٩٤٦ لەڕێوڕەسمی ڕاگەیاندنی کۆماری کوردستان بە ڕابەرایەتی پێشەوای نەمر ( قازی محەمەد) لە گۆڕەپانی چوارچرای شاری مەھاباد بەفەرمی ئاڵای کوردستان بەرز ڕاگیرا و بوو بە ڕەمزی کۆماری کوردستان و خەڵکی کوردستان.

ئاڵای کوردستان، سیمبولی نەتەوەیی کوردە. گەلی کورد لە پێناو پاراستن و بەرزڕاگرتنی ئاڵاکەیدا دەیان ھەزار شەھید و قوربانی بەخشیوە. فیداکاری و قارەمانێتی ھێزی پێشمەرگە لە ڕابردوو و ئێستا و داھاتووشدا بۆ پاراستنی خاک و ئاڵای کوردستان لە دەستی داگیرکەران و دووژمنانی گەلەکەمان ،لەبیرناکرێت. ئەرکێکی مێژوویی و نیشتیمانی ھەموومانە، پارێزەری ئاڵا و خاکی کوردستان بین لە پێناو کوردستانێکی ئارام و سەربەخۆ.

دروود بۆ ڕووحی پاکی سەرجەم شەھیدانی گەلەکەمان
شەکاوە بێت ئاڵای کوردستان

شۆڕش ئیسماعیل
وەزیری پێشمەرگەی حکومەتی ھەرێمی کوردستان 
١٧ی کانوونی یەکەمی ٢٠٢٣

دەقی پەیامەکەی ئەنجومەنی پشتیوانی یەکێتی...

بۆ کەسوکاری شەهیدە سەربەرزەکان _کەم ئەندامانی سەنگەر _ پێشمەرگە قارەمانەکان _زیندانیانی سیاسی خۆڕاگر و رێکخستنە دێرینەکان هەوادار و لایەنگرانی یەکێتی رۆژی ٢٠٢٣/١٢/١٨ رۆژی بەدیهێنانی ئاواتی شەهیدەکانمانە رۆژی وەلامدانەوەی ماندوبوونی پێشمەرگە قارەمانەکانە رۆژی چەسپاندنی قانونە رۆژی بەدەست هێنانی مافی هەموو لایەکە قوربانتان بم هیمەت بکەن بۆ سەر سندوقی دەنگدان بۆ بەدەست هێنانی ئاواتی میللەتەکەمان چونکە سەرکەوتنی کورد و یەکێتی لەو هەلبژاردنە کۆتای هێنانە بە دەسەلاتی نادادی کۆتای هێنانە بە بیرو باوەری شۆڤێنی گەرانەوەی ناوچە دابراوەکانە بۆ باوەشی کوردستان هیمەت بکەن خۆشەویستانی رێبازی رەوانشاد مام جەلال مامی گەورەمان کە دەیگوت هەتا کوردێک مابێت دەست لە بستێک خاکی کوردستان هەلناگرێت 
دەبا هەموومان بەوەفا بین بۆ خوێنی شەهیدان کە داوا دەکەن درێژە بە رێبازەکەیان بدەین و نەکەن رێبازەکەمان وونکەن 

لەگەل رێزی
ئەنجومەنی پشتیوانی یەکێتی نیشتیمانی کوردستان

حاجی مەسیفی 
سکرتێر ئەنجومەنی پشتیوانی یەکێتی نیشتیمانی کوردستان

سەرۆکی ھەرێم لە میانی وتارێکدا بەبۆنەی رۆژی ئاڵای کوردستانەوە وتی، با خۆری سەر ئاڵاکەمان ببێتە ھەوێنی ھیوا بۆ گەیشتن بە مافی چارەی خۆنووسین، وتیشی، ئاڵای کوردستان ئاماژەیە بۆ یەک نیشتمان  و بە قوربانیدان نەخشێندراوە.

نێچیرڤان بارزانی داواشیکرد، بە بەرزکردنەوەی ئاڵا دووبەرەکییەکان تێبپەڕێنن و رێزی جیاوازییەکانی یەکتری بگیرێت، تاکو نیشتمانێک دروست بکرێت بۆ ھەموو ئەوانەی تێیدا دەژین.

دەقی پەیامەکەی...

ئاڵای کوردستان، رەمزی شکۆو شانازی ھەموو کوردێکە، ساڵەھایە خەبات دەکەین و قوربانی دەدەین لەپێناو شەکانەوەی ئەم ئاڵایە.

لە ھەموو سەردەمە جیاوازەکان، لە بەرامبەر رژێمە دیکتاتۆرەکان و داگیرکەران، پێشمەرگە بە خوێن بەرگری کردووە لە خاک و ئاڵای پیرۆزی کوردستان، ھەزاران شەھیدمان داوە لەم پێناوەو خەبات بەردەوامە لە پێناو خاک و شەکانەوەی ئەم ئاڵا پیرۆزە.

ئەمڕۆ، دەرفەتێکی زێڕین ھاتۆتە پێش بۆ دانیشتوانی کەرکووک و خانەقین، شەنگال و دوزو سەرجەم ناوچە کوردستانییەکان، بە چوونە سەر سندوقەکانی دەنگدان رۆحی شەھیدان شاد بکەن و ئاڵای کوردستان بشەکێننەوەو کوردستانی بوونی کەرکووک دووپات بکەنەوە.

لەم رۆژە پیرۆزەدا، ھەموومان دەست لەسەر سینگ بەرامبەر گڵکۆی سەربەرزی شەھیدان و لەپێناو ھەمیشە شەکانەوەی ئاڵای پیرۆزی کوردستان خەبات دەکەین تا دواسات بۆ گەیشتن بە ئاوات و ئامانجەکانمان.


کۆسرەت رەسول عەلی

دەقی پەیامەکەی سەرۆکی یەکێتی....

دەست لەسەر دڵ بەرامبەر ئاڵای کوردستان دەوەستین و بە ئەوپەڕی وەفادارییەوە یادی ھەموو ئەو شەھیدانە دەکەینەوە کە لەپێناو سەرفرازیی کورد و شەکانەوەی ئاڵاکەماندا گیانی خۆیان بەختکرد.

‏‎ئەرکی ھەموولایەکمانە پێکەوە لەژێر سایەی ئاڵا پیرۆزەکەماندا بە رۆحێکی نیشتمانی و کوردانەوە کار بۆ بونیادنانی داھاتوویەکی گەشتر، قووڵکردنەوەی گیانی تەبایی و پێکەوەژیان و بڵاوکردنەوەی پەیامی ئاشتی بکەین، بێگومان ئەمە تەنیا رێگەیە تاوەکو بتوانین رۆحی شەھیدانمان شاد بکەین و وەڵامی دڵسۆزی و خۆڕاگریی خەڵکە خۆشەویستەکەمان بدەینەوە.

‏‎دروود بۆ رۆحی شەھیدان
‏‎بەرز و شەکاوە بێت ئاڵای کوردستان
‏‎بافڵ جەلال تاڵەبانی 
‏‎سەرۆکی یەکێتیی نیشتمانیی کوردستان

دەقی پەیامەکەی مەکتەبی سیاسی یەکێتی....

١٧ دیسەمبەری ھەموو ساڵێک رۆژی شەکانەوەی ئاڵای کوردستانە، لەم رۆژە شکۆمەندە  سەری رێز و وەفا دادەنوێنین لە ئاست گلکۆی ھەموو شەھیدانی کورد و کوردستان، ئەوانەی لەپێناو بەرز راگرتنی ئەم ئاڵا پیرۆزە گیانی خۆیان کردە قوربانی ، سڵاوی ئەمەک و وەفاداری دەنێرین بۆ ھەموو پێشمەرگەی کوردستان و زیندانی سیاسیی و تێکۆشەرانی کوردستان.

لە پێناو شەکانەوەی ئەم ئاڵایە، کە ھێمای خۆراگری و یەکێتیی گەلەکەمانە، پێویستە ھەموو لایەنە سیاسیەکان و خەڵکی کوردستان لەدەوری ئامانجە باڵاکان و بەرژەوەندییە گشتیەکان ھاودەنگ و ھاوھەڵوێستن بن، تا بە یەکێتیی و یەکگرتوویی پارێزگاری لە ئەزمون و قەوارەی ھەرێمی کوردستان بکەین.
 

وەزارەتی خوێندنی باڵای ھەرێم رایگەیاند: لەسەر ڕاسپاردەی د. ئارام محمد قادر، وەزیری خوێندنی باڵا و توێژینەوەی زانستی و لە پێناو بەشداری کردن لە ھەڵبژاردنی ئەنجومەنی پارێزگاکان بڕیاردرا بە  دواخستنی ھەر وانە یاخود تاقیکـردنەوەیەک لە رۆژانی ١٧ و ١٨ ئەم مانگە. 

ئاماژەی بەوەشکردوە، وانە و تاقیکردنەوەکان لە رۆژانی دواتر قەرەبودەکرێنەوە بۆ خوێندکارانی دانیشتوی ناوچە کوردستانییەکانی دەرەوەی ئیدارەی ھەرێم.

وەزارەتی خوێندنی باڵا دەشڵێت: لەو دوو رۆژەدا لە سەرجەم مامۆستا و فەرمانبەر و قوتابیان و خوێندکارانی کە دەنگیان دەکەوێتە ناوچە کوردستانییەکانی دەرەوەی ئیدارەی ھەرێم بە نەھاتوو ھەژمار ناکرێن.

دەقی پەیامەکە...

بەڕێز شێخ مشعل  ئەحمەد جابر ئەلصباح
ئەمیری دەوڵەتی کوەیت 
بەڕێزان گەلی کوەیت

بەداخ و پەژارەیەکی زۆرەوە هەواڵی کۆچی دوایی شێخ نەواف ئەحمەد جابر ئەلصباح-م بیست کەدوای ژیانێکی پڕ لەدەستکەوت بۆ خزمەتکردنی گەلی کوەیت گیانی سپارد.

پرسە و سەرەخۆشی خۆم ئاراستەی خێزانی ئال صباح و گەلی کوەیت دەکەم، لەپەروەردگاری مەزن داواکارین بەسۆز و میهرەبانی خۆی لەکۆچکردوو خۆشبێ، و بەبەهەشتی بەرینی شاد بکات و سەبوری  کەسوکارو گەلی کوەیت بەگشتی بدات. 


إنا لله وإنا إليه راجعون


قوباد تاڵەبانی 
جێگری سەرۆکی ئەنجومەنی وەزیرانی هەرێمی کوردستان