ڕێکخراوی پشتیوانی لە ژنانی ئێزدی ڕایگەیاندووە، کچێکی ڕزگارکراوی ئێزدی بە ناوی (زیری مەتو شڤان) لەدایکبووی ساڵی ١٩٩٦ کە لە ساڵی ٢٠١٤ لەلایەن تیرۆریستانەوە داعشەوە لە ناوچەی تەل قەسەبی شەنگال ڕفێنراوە و لە چەند ڕۆژی ڕابردووشدا لە شاری دێرەزووری سوریا دۆزراوەتەوە و ئەمڕۆش لە ڕێوڕەسمێکدا لە شەنگال ڕادەستی کەسوکارەکەی دەکرێتەوە.

لە ساڵی ٢٠١٤ تیرۆریستانی داعش زیاتر لە ٦ ھەزار کچ و ژنی ئێزدییان ڕفاند و تا ئێستاش چارەنووسی زیاتر لە دوو ھەزار کەسیان نادیارە.

وەفدێکی سەرۆکایەتی ھەرێم و سەرۆکایەتی پەرلەمانی کوردستان و لیژنەی پێشمەرگە لە پەرلەمانی کوردستان، بۆ تاوتوێکردنی پڕۆژە یاسای بەخشینی مەدالیای ڕێزلێنان و شکۆمەندی کۆبوونەوە.

فەوزی ھەریری سەرۆکی دیوانی سەرۆکایەتی ھەرێمی کوردستان ڕایگەیاند، ھیوادارن ئەو پڕۆژە یاسایە، کە بۆ بەخشینی مەدالیای ڕێزلێنانە بە ھەر کەسێک کە لە بوارەکەی خۆی خزمەتی کردبێت، پەسەند بکرێت.

لە بەرامبەردا سەعید ھەریری ئەندامی لیژنەی پێشمەرگە لە پەرلەمانی کوردستان، بە کوردسات نیوزی ڕاگەیاند، تێبینیان لەسەر پڕۆژە یاساکە، چونکە ئەو کەسانە ناگرێتەوە کە لە ڕابردوودا خزمەتیان کردووە.

د. ئارام محەمەد قادر وەزیری خوێندنی باڵا و توێژینەوەی زانستی ڕایگەیاند، "ئامادەکارییەکان بۆ پێشوازیکردن لە ساڵی نوێی خوێندن دەستپێکردووە و پڕۆسەی خوێندن لە زانکۆ و پەیمانگەکانی ھەرێمی کوردستان لە دوای یەکی ئەیلول بە پێی ساڵنامەی زانکۆیی، بە پلان و بەرنامەی گونجاو دەستپێدەکات".

"د. عەبدوڵا ئەحمەد" جێگری بەڕێوەبەری گشتی تەندروستی سلێمانی بە کوردسات نیوزی ڕاگەیاند، بەھۆی زیادبوونی مەترسییەکانی ڤایرۆسی کۆرۆنا لە ھەرێم، ئەڵمانیا لە ڕێگەی کونسوڵخانەکەیەوە ھاوکار بووە لە دروستکردنی نەخۆشخانەیەکی نوێی تایبەت بە نەخۆشییە گوازراوەکان لە سلێمانی.

وتیشی، نەخۆشخانەکە پێکھاتووە لە ١٠٠ قەرەوێڵە و ٣٨یان بۆ چاودێری چڕ دابین دەکرێت، ڕوونیشیکردەوە، لە مانگی ١١ی ٢٠٢٠وە دەستکراوە بە دروستکردنی نەخۆشخانەکە و بیناکەی تەواوکراوە، لە ئێستادا چاوەڕێن ئامێر و دەرمان و پێداویستییەکانی تر دابین بکرێت و لە مانگی داھاتووەوە دەست بکرێت بە وەرگرتن و چارەسەرکردنی نەخۆش.

"بەشدار حەسەن" پارێزەری گیراوانی بادینان دەڵێت، "شێروان شێروانی" و ھاوڕێکانی لە دوای ئەوەی کران بە شاھید بەسەر "بەدەل بەرواری" و "ئومێد بەرۆشکی" و تۆمەتەکانیان ڕەتکردەوە، ئەشکەنجە دراون و ڕەوشیان باش نیە. دەشڵێت، پێویستە ئەو گیراوانە لە زیندانی ئاسایش نەمێنن و بگوازرێنەوە بۆ چاکسازی گەوران.

لە کۆبوونەوەکەدا  باڵیۆزی بەریتانیا پشتیوانی تەواوی وڵاتەکەی دووپاتکردەوە بۆ پرۆسەی چاکسازی لە ھەرێمی کوردستان و رایگەیاند لەمەودوا بە تایبەت لە نزیکەوە ھاوکاری ھەرێمی کوردستان دەکات بۆ چاکسازی لە بوارەکانی دادگەری و کارگێڕیدا. 

لەم چوارچێوەیەشدا قوباد تاڵەبانی گۆڕانکارییەکان و چاکسازییەکانی ئەمدواییەی بۆ شاندی میوان ڕوون کردەوە، ئەوانیش لای خۆیانەوە پاڵپشتی تەواوی خۆیان بۆ ھەنگاوەکانی جێگری سەرۆک وەزیران دەربڕی و گفتیان دا لەمەولا زیاتر لە پەیوەندیدا بن بۆ پشتیوانیکردنی ھەنگاوەکانی چاکسازی.  

لەبارەی ھەڵبژاردنەکانی داھاتووی عێراقیشەوە، ھەردوولا ھاوڕابوون لە بەڕێوەچوونی ھەڵبژاردنەکان لە وادەی دیاریکراوی خۆیدا و جەختیان کردەوە دەبێت پرۆسەیەکی پاک و بێگەردبێت.

محەمەد حەسیب بەڕێوەبەری نەوت و کانزاکانی سلێمانی بە کوردسات نیوزی راگەیاند : بەھۆی کەمکردنەوەی ئەو بڕە بەنزینەی لە ئێرانەوە ھاوردەی پارێزگای سلێمانی دەکرێت نرخی ھەر لیترێت بەنزین لە سلێمانی ٢٥ دینار زیادی کردووە  رەتیشی کردەوە، جێگیرکردنی ھێز لە دەوازە سنورییەکانی پارێزگای سلێمانی ھۆکار بێت بۆ زیادبونی نرخی بەنزین بەڕێوەبەری نەوت و کانزاکانی سلێمانی راشگەیاند: بۆ چارەسەرکردنی ئەو کێشەیە نوسینگەی جێگری سەرۆکی حکومەت و پارێزگاری سلێمانی ھاتوونەتە دەنگ  و لەھەوڵی چارەسەرکردنی کێشەکەدان.

ئاماژەی بۆ ئەوەشکرد کونسوڵگەری کۆماری ئیسلامی ئێران لە سلێمانی لە کێشەکە ئاگادار کراوەتەوە بۆ ئەوەی لە ماوەیەکی کەمدا ئەو کێشەیە چارەسەر بکرێت و بڕی پێویستی بەنزین ھاودەبکرێت بەمەش نرخی بەنزین لە سلێمانی دەگەڕێتەوە دۆخی پێشووتر .

 لە ئێستاشدا نرخی یەک لیتر بەنزینی نۆرماڵ بە ٨٠٠ دینار و موحەسەن بە ٨٥٠ دینار و بەنزینی سوپەر بە ٩٢٥ دینار دەفرۆشرێت.

جەلال نوری سەرپەرشتیاری ئیدارەی گەرمیان لە کۆنفرانسێکی رۆژنامەوانیدا رایگەیاند، لەسەر راسپاردەی قوباد تاڵەبانی جێگری سەرۆکی حکومەتی ھەرێم ھێزەکان ئۆپراسیۆنی ئاسایشی سلێمانی، لە دەروازەکانی باشماخ و پەروێزخان و چەند خاڵێکی تری گومرگی جێگیر دەکرێن بە مەبەستی رێگریکردن لە قاچاخچێتی و یاساشکێنی. 

وتیشی، ھێزەکەی ئاسایش لە ئەرکی خۆیان بەردەوام دەبن تا ئەو کاتەی بە تەواوی دەروازە سنوورییەکان کۆنترۆڵ دەکرێن.

بەپێی راگەیەندراوێکی وەزارەتی دەرەوەی عێراق، لە کۆبونەوەیەکی وەزیرانی دەرەوەی عێراق و سعودیە، پەیوەندییەکانی بەغداد و ریاز و رێگەکانی پتەوکردنی پەیوەندییەکان تاوتوێ کراوە و وەزیری دەرەوەی عێراق نامەیەکی بانگھێشتنامەی کازمی داوەتە وەزیری دەرەوەی سعودیە تا ئاراستەی شا سەلمانی بکات بۆ بەشداریکردن لە لوتکەی وڵاتانی دراوسێی عێراق کە بڕیارە کۆتایی ئەم مانگە لە بەغداد بەڕێوەبچێت. 

پێشتریش مستەفا کازمی بۆ ھەمان مەبەست بانگھێشتنامەی ئاراستەی رەجەب تەیب ئەردۆغان سەرۆکی تورکیا و شێخ نەواف ئەحمەد سەباح میری کوەیت کردوە.

ئەمڕۆ ١٤ ساڵ بەسەر کۆچی دوایی سەرکردە و فەرماندەی تێکۆشەری رۆژگارە سەختەکان کاک جەبار فەرمان تێدەپەڕێت. بەڵام یاد و یادەوەری ئەو فەرماندە تێکۆشەرە ھەر لەگەڵماندایە و بەڕێزەوە یادی ئەو مێژووە پڕ لە خەبات و تێکۆشانە دەکەینەوە.


بۆ ئێمە فیلەتەنەکەی یەکێتیی نیشتمانیی کوردستان تەنھا کەسایەتییەکی نیشتمانپەروەر و شۆڕشگێڕ نەبوو، بەڵکو قەڵایەک بوو لە ورە و خۆڕاگری. سەرمەشقی خەبات و ھەوڵدان بوو لەپێناو نیشتمانەکەی.



ئەمڕۆ یەکێتییەکان بەڕێزەوە یادی کاک جەبار فەرمان دەکەنەوە و ماندوونەناسانە بەرێگا پیرۆزەکەی ئەودا لەپێناو کورد و کوردستان ھەنگاودەنێن. یەکێتی نوێ بەرامبەر خوێنی شەھیدان بەرپرسیار دەبێت و بەخزمەتکردنی کەسوکاری سەربەرزی شەھیدان و خەڵکی خۆشەویستی کوردستان، رۆحی شەھیدان شاد دەکەین.



ھەزاران سڵاو لە رۆحی کاک جەبار فەرمان و سەرجەم شەھیدانی کوردستان

بافڵ تاڵەبانی 
ھاوسەرۆکی یەکێتیی نیشتمانیی کوردستان

دەقی پرسەنامەکە...

بەڕێزانمان لە خانەوادەی کوردپەروەر مام عەبدوڵا حاجی ئیبراھیم دەربەندی 
بە خەمێکی قووڵەوە ھەواڵی ماڵئاوایی تێکۆشەری دێرین عەبدوڵا حاجی ئیبراھیم دەربەندی جێگری لێپرسراوی مەڵبەندی رێکخستنی سۆران-مان پێگەیشت.

بۆ ئەم کۆستە ھاوخەمی قوڵی خۆمان ڕادەگەیەنین و خۆمان بە ھاوبەشی ئەم خەمە دەزانین.

مام عەبدوڵا جگەلەوەی پێشمەرگەیەکی قارەمان و تێکۆشەر و دۆستی دێرینی سەرۆک مام جەلال بوو، بنەماڵەکەشی لەپێناو کوردستان قوربانی زۆریان داوە و لەو پێناوەشدا جگە لە کوڕ و برا، چەندین شەھیدیان بەخشیووە.

لەدەستدانی تێکۆشەرێکی وەک مام عەبدوڵا لە دڵەوە خەمباری کردین و ھیوای سەبووری بۆ کەسوکار و خانەوادە سەربەرزەکەی دەخوازین.

بافڵ تاڵەبانی 
ھاوسەرۆکی یەکێتیی نیشتمانیی کوردستان

بێگەرد تاڵەبانی  وەزیری کشتوکاڵ و سەرچاوەکانی ئاو بە کوردسات نیوزی راگەیاند، لە کۆبونەوەیاندا لەگەڵ قوباد تاڵەبانی جێگری سەرۆکی حکومەت، ئامادەیی وەزارەتەکەی نیشانداوە بۆ دابینکردنی زیاتر لە ١٠٠ ھەزار نەمام بەمەبەستی سەوزکردنی شەقام و شۆستەکانی سلێمانی. 

وتیشی، ھەوڵەکان بەردەوام دەبن بۆ ھێشتنەوە و فراوانترکردنی روبەری سەوزایی لەھەرێمی کوردستان.

ئیسماعیل عەلی ئاغا وتەبێژی دەروازەی نێودەوڵەتی باشماخ لە کۆنفرانسێکی رۆژنامەوانیدا رایگەیاند، سەرجەم ئەو بەشانەی لە دەروازەی باشماخن لە ماوەی رابردوودا بە ئەرکی خۆیان ھەستاون و بۆ لەمەودواش کە ئەو ھێزەی ئاسایش جێگیرکراوە، یارمەتیدەرێکی باش دەبن بۆ رێگری لە قاچاخچێتی و کاری نایاسایی و رێکارەکانیش توندتر دەکرێنەوە.