د. شەماڵ جەبار یاوەر، بەڕێوەبەری گشتی دەزگای تەندروستی پێشمەرگە بە کوردسات نیوزی ڕاگەیاند، لە ڕۆژی یەکشەممەوە نەخۆشخانەکە بە ڕووی تووشبووانی کۆرۆنادا دەکرێتەوە و ئەو نەخۆشانەی پێویستیان بە چاودێری چڕ و مانەوەیە دەگوازرێنەوە بۆ نەخۆشخانەی ئاسا.

 

 

وەزارەتی بازرگانی و پیشەسازی هەرێم ئاماژەی بۆ ئەوەكردووە، بەهۆی بڵاوبونەوەی كۆرۆنا جموجوڵە ئابوری و بازرگانییەكان لە تەواوی وڵاتانی جیهان وەستان و داهات و بژێوی ژیانی زۆر كەس و وڵاتی خستوەتە مەترسییەوە، بەڵام لە هەرێمی كوردستان لەگەڵ ئەو رەوشە نالەبارەدا توانراوە بە ڕێكاری توند، درێژە بەكاروباری بازرگانی بدرێت و لەماوەی ئەمساڵدا زیاتر لە 2هەزار و 750 مۆڵەتی بازرگانییان بە بازرگانان داوە، بۆ ئەوەی لە چەندین وڵات كاڵا هاوردە بكەن و گرێبەستی بازرگانی ئەنجام بدەن.
لە بەشێكی تری راگەیەنراوەكەدا هاتووە، یاسای وەبەرهێنانی هەرێم و یاسای بازرگانی دەرفەتی باشی رەخساندوە بۆ وەبەرهێن و بازرگانەكان كەبێنە هەرێمی كوردستان و تواناكانی خۆیان لەڕوی پیشەسازی و بازرگانی وەبەرهێنان و كشتوكاڵ بخەنەگەڕ و بەرهەمی زیادەی چیمەنتۆ و كشتوكاڵ و ئاسن و بەرهەمەكانی تری كوردستان بۆ وڵاتی خۆیان بگوازنەوە لە چوارچێوەی ئاڵوگۆڕی بازرگانی هاوبەش.

 لە چوارچێوەی کۆبونەوەیەکی وەزیری پیشمەرگە و وەفدێکی باڵای راوێژکارانیسەربازی ھاوپەیمانان، وەزیری پێشمەرگە رایگەیاند، بەمەبەستی پڕکردنەوەی بۆ شایی ئەمنی لە ناوچە جێناکۆکەکان و گەڕانەوەی ئارامی و سەقامگیری لەناوچانە، لەگەڵ سوپای عێراق و وەزارەتی بەرگری گەیشتونەتە رێککەوتنی کۆتایی و بەمنزیکانە ئامادەکارییەکان بۆ رۆڵ و ئەرک بینینی ئەو دوو لیوایە تەواو دەکرێت، ئەرکی پاراستنی ناوچە جێناکۆکەکان لە پەلامارەکانی تیرۆریستان جێبەجێ دەکەن.وتیشی، خوازیارن لەبەرامبەر مەترسییە چاوەڕوانکراوەکان، لەگەڵ بەغداد بگەنە رێکەوتنی کۆتایی لەسەر تەواوی گرفت و لەمپەرەکان، تا لەداھاتوودا ئۆپەراسیۆنی ھاوبەش لە ناوچە جێناکۆکەکان ئەنجام بدەن.  

هۆڵەندا نەخشە رێگای پەرەپێدانی كەرتی تایبەت پێشكەش بە قوباد تاڵەبانی دەكات كە ئەوەش كارئاسانی  زۆر بۆ بازرگانان دەكات ، كونسوڵخانەی هۆڵەندا لە هەرێم بە نوێنەرایەتی وڵاتەكەی كارنامەی گەشەپێدانی كەرتی تایبەتی پێشكەش بە قوباد تاڵەبانی جێگری سەرۆكی ئەنجومەنی وەزیران كرد، ناوەڕۆكی بەرنامەكە كار لەسەر گەشەپێدانی كەرتی تایبەت و ئاسانكاریكردن بۆ بازرگانی دەكات لە ڕێگەی بەكارهێنانی ئینتەرنێت و خێراكردنی تۆماركردنی كۆمپانیا بچوكەكان. پرۆژەكەی هۆڵەندا چۆنێتی پاڵپشتی بەگەڕخستنی سەنتەری بەبازاركردنی خاوەنكارە بچوكەكان لەخۆ دەگرێت بۆ ئەوەی خاوەنكارەكان بێبەش نەبن لە دەستەبەری كۆمەڵایەتی و ئەو ئیمتیازاتەی لە كەرتی گشتیدا هەیە،  لە دیدارەكەیاندا لەگەڵ قوباد تاڵەبانی، نوێنەرایەتی هۆڵەندا، پشتیوانی تەواوی خۆیان بۆ ئەنجامدانی چاكسازی ڕیشەیی لە كەرتی تایبەت دووپات كردەوە و ئامادەییان دەربڕی بۆ پێشكەشكردنی هاوكاری لە بەگەڕخستنی پلانەكە لە هەرێمی كوردستان.

"ئاری جەلال"سەرۆکی دەزگای لوتکە بۆ کاروباری ئاوارە و پەنابەران بە کوردسات نیوزی راگەیاند، لە چەند رۆژی رابردوودا نزیکەی ٦٠ کۆچبەری ھەرێمی کوردستان کە خەڵکی سلێمانی و رانیە و قەڵادزێن لە شاری ئیزمیر لە تورکیا دەستگیرکران، لەبەرئەوەی ئەو کۆچبەرانە خۆیان بە خەڵکی سوریا ناساندوە، لەلایەن تورکیاوە رادەستی ھێزەکانی بەرەی نوسرە لە عەزاز کراون.

وتیشی، نوسینگەی "قوباد تاڵەبانی"جێگری سەرۆکی حکومەت لەو پرسە ئاگادار کراوەتەوە، لە ھەوڵدان بۆ ئەوەی لەگەڵ لایەنە پەیوەندیدارەکان، ئەو کۆچبەران بۆ ھەرێمی کوردستان بگەڕێنرێنەوە.

دەقی پەیامەکە :

خەمێکە کە ھەرگیزاو ھەرگیز بە تێپەربوونی رۆژگار ناڕەوێتەوە ، برینێکە ھەتا دێت قوڵتر ئەبێت و ئاسەوارەکەی ڕۆژ داوای ڕۆژ زەقتر ئەبێتەوە ..!!
چۆن تەبا و یەک ڕیز ئەبین و چۆن برینە قوڵەکانمان سارێژ ئەبن ئەگەر ھێنانی دەبابەی دوژمن بۆ ناو ماڵی کورد و شکاندنی شکۆی پەرلەمان و لەناوبردنی خەونی گەلە خێر لەخۆ نەدیوەکەمان و گولەباران کردنی خەڵکانی بێتاوان و بڕینی زمانی کەریم عوسمانی ھونەرمەند و بێسەروشوێن کردنی ھاشمی جیھاز و ھەموو ھاشم و کەریمەکانیتر و لە سێدارەدانی دەیان سەرکردەی ئۆپۆزسیۆنی عێراقی کە لەژێر سایەی یەکێتیدا ھەولێر ببووە پەناگەیەکی ئارام بۆیان (تاکو لێیەوە دژی بەعس و زۆرداری خەبات بکەن) لەلایەن پارتییەوە بەقارەمانێتی و داستان بەخەڵکی کوردستان و ھەولێر بفرۆشرێتەوە ..؟!
شورەییە لەکاتێکدا کە ھێشتا ئێسک و پروسکی سەدان پێشمەرگە و خەڵکی بێتاوان نەدرابێتەوە بەکەسوکارییان ، بکەرانی ئەو خیانەتە ساڵانە بێنەسەر شاشەی تەلەفزیۆنەکان و شانازی بکەن بە ٣١ ی ئابێکەوە کە باوک و برا و ژن و کچ و کوڕی بینەرانییان تێدا شەھید و بێسەروشوێن کردبێت ..!!

ئەوپەری شەرمەزارییە شانازی بەشەرعییەت وەرگرتن لە لوولەی ئەو دەبابە و چەکانەوە بکرێت کە ١٨٢ ھەزار ھاووڵاتی بێتاوانیان ئەنفال کرد ، لەو ڕژێمەی پێنج ھەزار ژن و منداڵی بێتاوانی لەھەڵەبجە شەھید کرد ، لەو ھێزەی ھەزاران گوندی کوردستانی وێران کرد ..!!

گەلی کورد گەلێکی پەرتەوازە و تەنیا و خاوەن دوژمنە ، بۆیە پێویستە پشت بەستن بەدوژمنان لەپێناو بەدەستھێنانی خواست و ئارەزووە تایبەتەکان تەحریم و تەجریم بکرێت و بەتاوانی نیشتمانی لەقەڵەم بدرێت ، گوێ لەئازار و ھاواری یەک نەگرتن غەدر بێت ، ھەست بەبرسێتی و نەھامەتی خەڵک نەکردن شەرمەزاری بێت ، خیانەت بەشانازی لەقەڵەم دان کفر بێت ، داوای لێبوردن لەخاک و گەل و نیشتیمان نەکردن ناپاکی بێت و رێگریکردن لەدووبارە بوونەوەی ٣١ ئاب ئامانجی ھەمووان بێت و بەدیھێنانی خەونی گەلەکەمان خەونی ھەمووان بێت ..!!                      

ھەزاران سڵاو لە گیانی پاکی سەرجەم شەھیدانی ٣١ی ئاب و دەستی غەدر و خیانەت ..
نەفرەت لە شەڕی ناوخۆ و کوشتنی کورد بە دەستی کورد ..   

 قایمقامەتی سلێمانی راگەیەنراوێکی سەبارەت بە سەردانەکانیان بۆ نانەواخانە و سەمونخانەکان لە مانگی ئابدا بڵاوکردەوە و ئاشکرایکرد، لەو مانگەدا بەشێوەیەکی بەردەوام سەردانی نانەواخانە و سەمونخانە و ھەموو ئەو شوێنانە کراوە کەکاری ھەویر دەکەن. راشیگەیاندووە، ٤٤ پسوڵەی سەرپێچی تۆمارکراوە، ٣٧ پسوڵەی ئاگادارکردنەوەش بۆ نانەواخانەکان کراوە کە پابەندی مەرج و رێنماییەکانی کارکردن نەبوون، لەکاتی دوبارەکردنەوەیدا روبەڕوی رێکاری یاسایی دەکرێنەوە.
لە بەشێکی تری راگەیەنراوەکەدا ھاتووە، بەھۆی دوبارەکردنەوەی سەرپێچییەوە نانەواخانەیەک داخراوە و دەستیش بەسەر ٧٠ سینی و ٥٣ تاوڵەی نەشیاو بۆ برژاندنی سەمون و ١٩٢ کیلۆ سۆدە و بڕێک خورما و ھەویری خراپدا گیراوە.

ئاری ئەحمەد بەڕێوەبەری گشتی ئاو و ئاوەڕۆی ھەرێم بە کوردسات نیوزی راگەیاند، ئەمساڵ حکومەتی ھەرێم دووجار بودجەی بۆ چارەسەری کێشەی کەمئاوی ھەولێر تەرخانکردوە، لە قۆناغی یەکەمدا ملیارێک و ٥٠٠ ملیۆن دینار و لە قۆناغی دووەمیشدا ٩٢٥ ملیۆن دینار، بڕیارە ملیارێک و ٢٥٠ ملیۆن دیناری تریش لە مانگەکانی ئاب و ئەیلول و تشرینی یەکەم خەرج بکرێن. 

پەیامنێری کوردسات نیوزیش لە ھەولێر رایگەیاند، پێشتر ٣٥%ی دانیشتوانی ھەولێر بە تانکەر ئاویان دەکڕی، دوای چارەسەری کیشەی کەمئاوی چەند گەڕەکێکیش، بەڵام بەتەواوی کێشەکان چارەسەر نەکراوە و لە ئێستادا زیاتر لە ١٠ گەڕەک ئاوی پێویستیان بۆ دابین نەکراوە و بە تانکەر ئاو دابەشدەکرێت.

جەبار یاوەر ئەمینداری گشتی وەزارەتی پێشمەرگە لەبارەی دروستکردنی دوو لیوای ھاوبەش لە نێوان پێشمەرگە و سوپای عێراق رایگەیاند، سەرقاڵی دانانی میکانیزمی دامەزراندنی ئەو دوو لیوایەن. 

وتیشی، داعش وەک دەوڵەت ناوی نەماوە، بەڵام وەک رێکخراوێکی تیرۆرستی جیھانی ھەر ماوە و لە ماوەی سێ ساڵ و حەوت مانگی رابردودا ھەزار و ١٢٠ کردەوەی تیرۆریستی ئەنجامداوە و تەنھا لە حەوت مانگی ئەمساڵیشدا ١٣٤ پەلاماری  لە ناوچە دابڕێنراوەکان ئەنجامداوە و تائێستاش مەترسییە بۆ سەر عێراق و ھەرێم و سوریا. 

یادگار فەتاح بەڕێوەبەری نەوت و کانزاکانی گەرمیان لە کۆنفرانسێکی رۆژنامەوانیدا رایگەیاند، بەمەبەستی پشکنین و چاودێری وردتر و خێراتر بۆ کوالێتی و جۆری بەنزین و سوتەمەنی لە بەنزینخانەکان، تیمێکیان پێکھێناوە و دەسەڵاتیان پێدراوە، ئەگەر ھەر بەنزینخانەیەک سەرپێچی بکات دەست بەجێ دایدەخەن.

ئەحمەد محەمەد وتەبێژی دەستەی ژینگەی ھەرێم لە لێدوانێکدا بە کوردسات نیوزی راگەیاند، کۆبونەوەکە بە ئامادەبوونی ١٤ نوێنەری وەزارەتەکان و نوێنەری پارێزگا و ئیدارە سەربەخۆکان بەڕێوەدەچێت و تیایدا تاوتوێی کەمکردنەوەی مەترسییەکان لەسەر ژینگەی ھەرێم و تەندورستی ھاوڵاتیان دەکرێت.

بەڕێوبەرێتی مەشق و ڕاھێنانی پەروەردەی ھەڵەبجە خولەکانی ڕھێنانی مامۆستایانی دەستپێکردەوە، ئەمەش دوای ئەوە ھات لەساڵی ٢٠١٤ەوە بەھۆی قەیرانی دارایییەوە خولەکان راگیرابوون .

باشبوونی دۆخی ئابووری و گۆڕانکاری لەسیستمی خوێندن ھۆکاربوون بۆ دەستپێکردنەوەی خولەکان، لەئیستادا ٢٠٠ مامۆستا لەسەر پرۆگرامی خوێندنی "کارامەیی و بەھا کۆمەڵایەتیەکان " کە بڕیارە بۆیەکەمجار ئەمساڵ لەپۆلی یەک تا نۆی بنەڕەتی بخوێنرێت راھێنان بە مامۆستایان دەکرێت .

قوباد تاڵەبانی جێگری سەرۆکی ئەنجومەنی وەزیران لە ھەولێر کۆبوونەوەیەکی تایبەتی لەبارەی رێکخستنەوەی سیستمی تەندروستی لە ھەرێم ئەنجامدا و رایگەیاند، دەبێت چاکسازی لە کەرتی تەندروستی بکرێت بەتایبەتی لەبواری دەرماندا.

وتیشی، دەبێت ھاوسەنگی و کێبڕکێ ھەبێت لە نێوان کەرتی گشتی و کەرتی تایبەتی تەندروستی بە شێوازێک کە ھاوڵاتیان تێیدا سوودمەند بن، داواشیکرد وەزارەتی تەندروستی و لایەنە پەیوەندیدارەکان پلانێک دابڕێژن بۆ رێکخستنەوەی دابینکردنی دەرمان لە ھەرێمی کوردستان.

قوباد تاڵەبانی وەزارەتی تەندروستی و وەزارەتە پەیوەندیدارەکانیشی راسپارد کار لەسەر بەگەڕخستنی سیستمی بیمەی تەندروستی لە ھەرێمی کوردستان بکەن بەشێوازێک کەرتی تەندروستی باشتر بێت و خزمەتی باشتر بە ھاوڵاتیان بکات

بەھمەن مورادنیا پارێزگاری سنە لە کۆبوونەوەی لەگەڵ ئەنجومەنی ھەماھەنگی بەرپرسانی پارێزگاکە بۆ کاروباری دارایی و ئابوری رایگەیاند، ھەرچەندە رەوشی پارێزگای سنە لەبواری ژێرخانەوە، بەراورد بە پارێزگاکانی تری ئێران لاوازترە، بەڵام توانیویانە کۆمەڵیک کاری باش و بەرچاو ئەنجام بدەن.

ئاشکراشیکرد، بەپێی ئاماری بەڕێوەبەرایەتی گومرکی سنە، لەماوەی پێنج مانگی رابردوودا، بە بەھای چوار ملیار و ٨٠٠ ملیۆن دۆلار ئاڵوگۆڕی بازرگانی لە سنوری باشماخ ئەنجامدراوە و تا کۆتایی ئەمساڵیش، ئەو ژمارەیە زۆر زیاتر دەبێت.