کوردستان
رێکخراوی مافی مرۆڤی ھەنگاو رایگەیاند، سەیوان ئیبراھیمی مامۆستای زمانی کوردی و ئەندامی بەڕێوەبەریی ئەنجوومەنی فەرھەنگی کۆمەڵایەتی"نۆژین"، لەلایەن لقی یەکی دادگای شۆڕشی سنە بە تۆمەتی"دروست کردنی گرووپ بۆ تێکدانی ئاسایش" بە ١٠ ساڵ بەندکردن و بەتۆمەتی"پڕوپاگەندە دژی حکومەت"بە یەک ساڵ بەندکردن، سزا دراوە.
سەیوان ئیبراھیمی، مانگی ئابی رابردوو لە دۆسیەیەکی دیکەدا، لەلایەن دادگای تاوانەکانی شاری سنە بە تۆمەتی "تێکدانی ئاسایشی گشتی"بە یەک ساڵ بەندکردن و دوورخستنەوە و لێدانی ٤٠ قامچی سزادرا، لە مانگی تشرینی دووەمی رابردووش دادگای پێداچوونەوەی سزاکان، سزای بەندکردن و لێدانی قامچیی پەسەندکرد، بەڵام سزای دوورخستنەوەی بۆ بەندیخانەی دێزڵئاوا لە شاری کرماشان ھەڵوەشایەوە.
سەرۆکایەتیی شارەوانیی سلێمانی رونکردنەوەیەکی سەبارەت بە فراوانکردنی گوندەکان بڵاوکردەوە و رایگەیاند، گوندی کۆڵەبی یەکێک نییە لەو ٢٩ گوندەی، سنوورەکانیان بە بڕیاری ئەنجومەنی پارێزگای سلێمانی فراوانکران، تەواوی رووبەری گوندی کۆڵەبی (بێجگە لە پارچە زەوی ژمارە ١١٧) بە زیادەڕەوی دادەنرێت نەوەک بە حەرەمی گوند.
ئاماژەی بۆ ئەوەشکردوە، ھەر خانوویەکی نوێ لەو گوندەدا دروستبکرێت بەھیچ شێوەیەک تاپۆ ناکرێت و شارەوانیش بەرپرس نییە لە ھەر زەرەر و زیانێک لە ئەنجامی دروستکردنی خانووی نوێ بەر ھاووڵاتییان بکەوێت.
لە بەشێکی تری راگەیەنراوەکەدا ھاتووە، خانوەکانی ئەو گوندە بەر یاسای قەدەغەکردنی زیادەڕەوی ژمارە سێ ساڵی ٢٠١٨ دەکەوێت و خانووەکانیان بەپێی یاسای تاپۆکردنی خانووە زیادەڕۆکان مەرجی سەرەکیی تاپۆکردن ئەوەیە خانووەکە پێش ٣١/١٢/٢٠٢٠ دروستکرابێت.
دەقی پەیامەکە...
بەڕێزان ئەنجومەنی خاوەن پێداویستییە تایبەتەکان
بەبۆنەی رۆژی جیھانی خاوەن پێداویستی تایبەتەکانەوە، گەرمترین پیرۆزبایی لەئێوە و ھەموو خاوەن پێداویستیە تایبەتەکان دەکەم.
ئێوەی بوێر و پڕ ھیوا بۆ ژیان واتانکردوە توێژێکی خۆشەویست و رێزلێگیراوی کۆمەڵی کوردەواری بن, لەم ساڵیادەدا دووپاتی دەکەینەوە کە ھیچ ئاستەنگێک نابێتە رێگر لەبەردەم ئیرادە و خواستی ئێوەدا، تەنیا دەبێ لێتان تێبگەین و دەرگاکان زیاتر بەڕووتاندا واڵا بکەین، چونکە باوەڕی تەواومان بەوە ھەیە کە ھەمووان یەکسانین لەماف و ئەرکەکاندا.
بە ئەوپەڕی توانامانەوە پشتگیری و پشتیوانتان دەبین بۆ بەدیھێنانی داخوازی و ئامانجەکانتان.
قوباد تاڵەبانی
جێگری سەرۆکی ئەنجومەنی وەزیران
تەھا جەمال لێپرسراوی دابەشکردنی نەوت لە سلێمانی و دەوروبەری بە کوردسات نیوزی راگەیاند، دابەشکردنی نەوت بەسەر ھاوڵاتیاندا بەردەوامە بە نرخی ١٠٣ ھەزار و ٥٠٠ دینار بۆ ھەر خێزانێک، لە ئێستاشدا لە مەڵبەندی یەک دەستیان بە دابەشکردنی نەوت کردوە.
سەبارەت بە راگرتنی دابەشکردنی نەوتیش ئاماژەی بەوە کرد، بەھۆی ئەوەی حکومەتی عێراق بەڵێنیداوە نەوت بە نرخی ٥٠ ھەزار دینار رەوانەی ھەرێم بکات و بە ھەمان نرخ دابەش بکرێت، ھاوڵاتیان ئامادەنین نەوت بە ١٠٣ ھەزار و ٥٠٠ دینار وەربگرن، کۆمپانیای تایبەتمەندیش ئامێری پێوانەکردنی نەوتی وەرگرتووەتەوە بۆ دووبارە چالاککردنەوەیان، بەو ھۆکارانەش ماوەی دوو رۆژە نەوت لە ناوشاری سلێمانی دابەشنەکراوە.
غازی فەیسەڵ فەرماندەی خۆبەخش لە ھێزی پێشمەرگە لە سنوری مەخمور بە کوردسات نیوزی راگەیاند، شەوی رابردوو لە نێوان گوندی عەلیەڕەش و دووسەرە لەدەشتی قەراجی سەر بە مەخموور، شەڕ لەنێوان سوپای عێراق و تیرۆرستانی داعش روویدا، تیرۆریستان لە گوندێکی دەشتی قەراج لەلایەن ھێزێکی پێشمەرگە و سوپای عێراقەوە گەمارۆدران، ھاوپەیمانانیش بە فڕۆکە بە ئاسمانی ناوچەکەدا دەسوڕێنەوە.
وتیشی، لە ئەنجامی شەڕ و پێکدادانەکەدا سەربازێکی سوپای عێراق کوژراوە و دوو سەربازی تریش برینداربوون، بەپێی زانیارییەکان تیرۆریستێکی داعشیش کوژراوە.
راشیگەیاند، لەلایەن ھێزی پێشمەرگە و سوپای عێراق خێزانێکی کورد لە دەستی تیرۆریستان رزگارکران، کە لە گوندی کۆڵتەپە لەلایەن تیرۆریستانەوە گەمارۆدرابوون.
بەپێی خشتەی دانیشتنەکانی دادگای باڵای فیدراڵی عێراق رۆژی یەکشەممە ٣/١٢/٢٠٢٣ سەبارەت بە سکاڵایەکی نەجیب شەمعون ئەندامی ئەنجومەنی پارێزگای سلێمانی و زیاد جەبار ئەندامی خولی پێنجەمی پەرلەمانی کوردستان کۆدەبێتەوە کە داوایان کردوە، دادگای فیدراڵی بڕیار بدات لەسەر ماددەکانی ١ و ٩ و ١٥ و ٢٢ و ٣٦ لە یاسای ھەڵبژاردنی پەرلەمانی کوردستان، تایبەت بە پێکھاتەکان و دیاریکردنی بازنەکانی ھەڵبژاردن.
ھەر بەپێی خشتەی دانیشتنەکان، بڕیارە رۆژی دووشەممە ٤/١٢/٢٠٢٣ دادگای فیدراڵی، سەبارەت بە سکاڵایەکی "نەجاح حەسەن ئیبراھیم" کاندیدی ھەڵبژاردنی ئەنجومەنی پارێزگای کەرکوک کۆببێتەوە، کە لە سکاڵاکەیدا داوایکردووە، کۆمیسیۆنی ھەڵبژاردن پابەند بکرێت بە دواخستنی ھەڵبژاردنی ئەنجومەنی پارێزگاکان لە پارێزگای کەرکوک تا ئەو کاتەی وردبینی لە لیستی تۆماری دەنگدەراندا دەکرێت.
مامۆستایان و فەرمانبەرانی ناڕازیی لە کۆنفرانسێکی رۆژنامەنوسیدا راینگەیاند، داوا دەکەن بەغداد راستەوخۆ مووچەکانیان بۆ خەرج بکات و مووچەکانی پێشووتریشیان بۆ قەرەبوو بکاتەوە، ھاوکات داواش دەکەن وانەبێژان دابمەزرێندرێن.
ئاماژەیان بەوەشکرد، تا جێبەجێکردنی داواکارییەکانیان لە خۆپیشاندان بەردەوام دەبن، لەو چوارچێوەیەشدا رۆژی یەکشەممە لە سلێمانی و ھەڵەبجە و شارەزوور و ئیدارەی راپەڕین خۆپیشاندانی فراوان ئەنجامدەدەن.
ئەوەشیان خستەڕوو، وەفدێکیان لەگەڵ حکومەتی عێراق گفتوگۆی کردووە و بەمزوانەش بەمەبەستی گەیاندنی داواکارییەکانیان سەردانی بەغداد دەکەنەوە.
لای خۆشیانەوە خزمانی جحیش ستایشی ھەوڵ و کۆششەکانی یەکێتی و ئاراس محەمەد ئاغا_یان کرد و رایانگەیاند، وەک ھەمیشە لە خزمەتی رێبازەکەی سەرۆک مام جەلالدا دەبن و یەکێتی بەحزبی خۆیان دەزانن، پشتگیری و پشتیوانی خۆیان بۆ لیستی ھاوپەیمانیی _ یەکێتی خەلکی نەینەوا و کاندیدانی دووپاتکردەوە .
ھەمان رۆژ ئاراس محەمەد ئاغا لەبارەگای کۆمیتەی ئازادی عەیاچیە، چاویکەوت بە ژمارەیەک کادر و ئەندام و لایەنگرانی یەکێتی، لە کۆبوونەوەیەکدا ئاراس محەمەد ئاغا جەختی لە گرنگی و بایەخی ھەڵبژاردنی ئەنجومەنی پارێزگای نەینەوا کردەوە و وتی، "پێویستە ھەموومان بەجۆش و خرۆشێکی زۆر کاربکەین بۆ سەرخستنی ھاوپەیمانیەکەمان چونکە تاکە لیستە دەتوانێت مافە رەواکانی دانیشتوانی نەینەوا بەدەستبھێنێت".
لەمیانی وتەیەکیدا شاڵاو کۆسرەت رەسول باسی لە ھەڵبژاردنی ئەنجومەنی پارێزگای کەرکووکی کردو داوای کرد، ھەموو کەرکووکییەکان بەشداری دەنگدان بکەن و پارێزگاری لە ناسنامەی کوردستانی بوونی کەرکووک بکەن.
شاڵاو کۆسرەت رەسول وتیشی، کەرکووکییەکان شاھێدن کە چۆن لە رۆژانی سەخت یەکێتی فریادڕەسی کەرکووکییەکان بووە، بۆ داھاتووش ھەر یەکێتی دەتوانێ خزمەتی شارەکە و خەڵکە تێکۆشەرەکەی بکات.
لەکۆتایی قسەکانیدا شاڵاو کۆسرەت رەسول داوای کرد لەرۆژی دەنگدان بە گڕوتینەوە بەشداری بکەن و دەنگ بە کاندیدانی لیستی ١٤٢ی "ھاوپەیمانی کەرکووک ھێزو ئیرادەمانە بدەن".
پەیامنێری کوردسات نیوز رایگەیاند، ئێوارەی ئەمڕۆ فڕۆکە جەنگییەکانی تورکیا گوندەکانی سنووری بەرواری بالایان بۆردومانکرد، سەرەڕای ئەوەی ژمارەیەکی زۆر ھاوڵاتی مەدەنی بۆ گەشت و سەیران ئەمڕۆ ڕوویان لەو سنورە کردبوو.
ئەوەشی خستەڕوو، تائێستا زیانەکانی بۆردومانەکە دیارنییە و بۆردومانەکان ترس و دڵەڕاوکێ لای دانیشتوانی قەزاکە دروستکردووە و زۆرینەی شوێنە گەشتیارییەکانی ناوچەکە مەترسی بۆردومانکردنیان لەسەرە.
ئەوەش لەکاتێکدایە، ماوەی چەندین مانگە تورکیا بە بەردەوامی سنوری قەزای ئامێدی بوردومان دەکات، بەتایبەتی ھەردوو زنجیرە چیای مەتینا وگارە، جگەلەوەش، ئەو وڵاتە چەندین بنکەی سەربازی لەچیای مەتینا دروستکردووە.
نێچیرڤان بارزانی لە پەیامێکدا بڵاویکردەوە، بە توندی ئیدانەی ئەو ھێرشە تیرۆرستییە دەکەن کە شەوی ڕابردوو بە بۆمبی چێنراو و دەسڕێژ لە ناوچەی عومرانیەی سنوری قەزای شارەبان لە پارێزگای دیالە ئەنجامدرا و بووە ھۆی شەھیدبوونی چەندین ھاووڵاتی و برینداربوونی چەندانی دیکە.
دەشڵێت، ئەو ھێرش و پەلامارە تیرۆرستییانە، مەترسی لەسەر ئاسایش و سەقامگیریی وڵات دروستدەکەن و ئەو راستییە دەسەلمێنن کە تیرۆر ھێشتا ھەڕەشە و ئاڵنگارییەکی جددییە و دەبێت ھەموو ھێز و توانایەک بە ھاوکاری و ھەماھەنگیی زیاتری سوپای عێراق و پێشمەرگە و ھێزە ئەمنییەکان و بە پشتگیریی ھاوپەیمانیی نێودەوڵەتی، بۆ بەرەنگاربوونەوەیان بخەرێنەگەڕ.
جەختیشیکردەوە لەوەی، نەخۆشخانەکانی ھەرێمی کوردستان بۆ ھەموو ھاوکارییەکی پزیشکی بۆ برینداران و بەرکەوتووان، ئامادەن.
وەزارەتی کارەبای ھەرێم بڵاویکردەوە، بەھۆی گرفتێکی تەکنیکی کوژانەوەی گشتی لە سیستمی کارەبای ھەرێم روویداوە، ئاماژەی بەوەشدا، ئێوارەی رۆژی پێنجشەممە بەھۆی گرفتێکی تەکنیکییەوە تەواوی یەکەکانی بەرھەمھێنانی کارەبای ھەرێم کوژانەوە، بەڵام تیمەکانی وەزارەت دەستبەجێ کێشەکەیان چارەسەرکرد.
بەڵام بۆ جاری دووەم لە سەعات یەکی شەو کوژانەوەی گشتی روویدا و ئێستا تیمەکانی کارەبای ھەرێم سەرقاڵی ئاساییکردنەوەی دۆخەکەن و بەمنزیکانە چارەسەر دەکرێت.
پێشتریش، ئەندازیار غالب بەڕێوەبەری کۆنترۆڵ و گەیاندنی کارەبای سلێمانی بڵاویکردەوە، لە سەعات چواری بەیانی ئەمڕۆوە و بەھۆکارێکی نادیار، کوژانەوەی گشتی لە تۆڕی کارەبای ھەرێمی کوردستان روویداوە. وتیشی، لە ناو شاری سلێمانی ھیچ شوێنێک کارەبای نییە و لایەنی پەیوەندیدار لە ھەوڵی چارەسەرکردنی کێشەکەدان.
نیوەرۆی ئەمڕۆ ئاراس محەمەد ئاغا ئەندامی ئەنجومەنی سەرکردایەتی و سەرۆکی ھاوپەیمانیی یەکێتی خەڵکی نەینەوا لەگەڵ شێخ مەھدی شێخ ئەحمەد بەرزەنجی راوێژکاری دەزگای ھەڵبژاردن و ژمارەیەک کادری دەڤەرەکە، سەردانی ھەردوو تەکیای شێخ ئیسماعیل ولیانی لە ناحیەی روڤیا ، تەکیای شێخ عەبدالعزیز گەیلانی لە قەزای ئاکرێ کرد.
ھاوکات لەلایەن شێخ وریا بەرزەنجی رابەری تەریقەتی قادری ولیانی لە کوردستان و عیراق و جیھان و بەشێک لە خزمانی شێخی بەرزنجی پێشوازی کران، ھاوکات لە وتەیەکیدا ئاراس محەمەد ئاغا رایگەیاند، سوپاسی پێشوازی گەرمی شێخانی بەرزەنجی کرد و جەختی لەپەرەپێدانی ئەم پەیوەندییە کردەوە کە ھەمیشە شێخانی بەرزەنجی و تەکیەکانیان رۆڵی گرنگیان ھەبووە و بەشێک بوون لە پەرەپێدانی پێکەوەژیان و بەھێزکردنی پەیوەندی کۆمەڵایەتی لە ھەرێمی کوردستان.
وەزارەتی تەندروستی ھەرێم لە رۆژی جیھانی ئایدزدا راگەیەنراوێکی بڵاوکردەوە و ئاماژەی بۆ ئەوەکردوە، لە ھەرێمی کوردستان لە پڕۆگرامی کۆنتڕۆڵکردندا لەماوەی ١٠مانگی ڕابردوو، ٥٩٨ ھەزار تێستی پشکنینی خوێن بۆ دۆزینەوەی ڤایرۆسی HIV ئەنجام دراوە، بەتایبەتی بۆ کەسانی بیانی پێش پێدانی مۆڵەتی نیشتەجێبوون و پشکنینی پێش ھاوسەرگیری و کرێکاری شوێنە گەشتیارییەکان و ڕاگیراو و حوکمدراوانی ناو چاکسازییەکان و نەخۆشانی گورچیلەی درێژخایەن و سیل و ھەوکردنی جگەر و تالاسیمیا.
ئاماژەی بەوەشکردووە، لە دەرەنجامی پشکنینەکاندا، ٧٢ حاڵەتی نوێ دەستنیشانکراوە کە بەشی ھەرە زۆریان ھاووڵاتییانی بیانی و ھاووڵاتییانی دەرەوەی ھەرێمی کوردستانن و کاری پێویست بەرامبەریان ئەنجامدراوە، تووشبووانی بیانیش گەڕاونەتەوە وڵاتانی خۆیان و ھەموو حاڵەتەکانی نوێ و ساڵانی ڕابردووی دانیشتووی ھەرێمیش لەژێر چاودێری تەندروستی و خۆپارێزی دان.
وەزارەتی تەندروستی ھەرێم جەختی کردوەتەوە، لە ھەرێمی کوردستان بە بەراورد بە وڵاتانی جیھان، کەمتریین تووشبووی ئەو ڤایرۆسە تۆمارکراوە بە ھۆکاری سەرەکی پابەندبوون بە بەھا کۆمەڵایەتی و کەلتوری و ئاینی و پتەوی بەرنامەکانی پەتازانی لە ھەرێمی کوردستان.
دەقی راگەیەنراوەکەی شاناز ئیبراھیم ئەحمەد خانمی یەکەمی عێراق...
تا ئێستاش توندوتیژی دژی کچان و ژنان بەربڵاوترین پێشێلکاری مافی مرۆڤە لە جیھاندا و بارودۆخەکەش جیاوازی نییە لە عیراقدا، کە چەندین حاڵەتی توندوتیژی دژبە ژنانی بەخۆیەوە بینیوە و ئەمەش بەڕوونی بەرجەستەی ئەو پێشێلکاری و تاوانە دڕندانانەیە، کە ژنانی ئێزدی و پێکھاتەکانی دیکەش لەسەردەستی چەتە تیرۆریستییەکانی داعش تووشی بوون.
بڕوامان بەوە ھەیە، کە گۆڕانکاری لە فێرکردنەوە دەستپێدەکات بە دانانی کلتوری مافەکانی مرۆڤ لە پرۆگرامەکانی خوێندن لە قۆناغی سەرەتاییەوە تا زانکۆ و رونکردنەوەی کاریگەرییەکانی توندوتیژی و لێکەوتە کۆمەڵایەتییەکانی، ھەروەک عیراق بەشداریی کردوە لە ھەڵمەتی جیھانی بۆ ھۆشیارکردنەوە و بەرەنگاربونەوەی توندوتیژی دژی ژنان، لەڕێگەی ئەنجامدانی بۆنە و چالاکییەکان لە سەرانسەری وڵاتدا.
دیاردەی ھاوسەرگیریی خوار تەمەنی یاسایی و زۆرەملێی کچان دیاردەیەکی نەرێنی و ناشارستانییە و نامۆیە بە کۆمەڵگەی ئێمە، کە بە رەسەنایەتی و شارستانی و ھۆشیاری ناسراوە. بەڕێز سەرۆک کۆمار دکتۆر لەتیف جەمال رەشید و منیش بە توندی دژی ھاوسەرگیری کچانی خوار تەمەنی یاسایی و ھاوسەرگیریکردنی زۆرەملێ و ھەموو جۆرەکانی توندوتیژی خێزانی دەوەستینەوە، ھەروەھا ئەم بابەتەم لەگەڵ وەزیری داد و لایەنە پەیوەندیدارەکان جوڵاندوە و بەردەوامیش دەبم لە ھەوڵەکان بۆ گرتنەبەری رێوشوێنی پێویست بۆ کەمکردنەوەی ئەو دیاردانە.
ئەو پرسە تەنھا لە ئاستی ھاوسەرگیری خوار تەمەنی یاسایی و ھاوسەرگیری زۆرەملێدا نەوەستاوە، بەڵکو ھەندێک لە ھەلپەرستان، بازرگانی بە کچانی تەمەن ١٢ ساڵانەوە دەکەن. ئامارە بەردەستەکان ورد نین، ھۆکارەکەشی ئەوەیە کە ژمارەیەک لە ژنان خۆیان لە قسەکردن لەسەر ئەو بابەتانە بەدوور دەگرن، کە بەرکەوتەیان لەگەڵی دەبێت بە ھۆکاری کۆمەڵایەتی یان ھەستکردن بە ترس لە ھەڵوێستی کۆمەڵگە، بەڵام زۆرێکیان باسیان لە ئازارەکانیان کردوە و چیرۆکە ئازاربەخشەکانی خۆیان و خراپ مامەڵەکردن لەگەڵیان، گێڕاوەتەوە.
سنوردانان بۆ دیاردەی توندوتیژی دژی ژنان پێویستی بە ھەوڵی زیاتر و کاری ھاوبەش لەگەڵ لایەنە پەیوەندیدارەکاندا ھەیە، لەکاتێکدا یاسای دژە بازرگانیکردنی ساڵی ٢٠١٢ کاری زۆرەملێ و ھەندێک جۆری بازرگانیکردن بە تاوان دەزانێت و ھەندێک چوارچێوە یاساییەکەی ھێشتا پێویستی بە نوێکردنەوە ھەیە، جێبەجێکردنی یاساکە وەک گەورەترین ئاڵنگاری دەمێنێتەوە، بەوپێیەی زۆرترین ھەوڵ دەکەوێتە ئەستۆی وەزارەتی ناوخۆ، بەوەی تاوانباران دەستنیشان بکات و دەستگیریان بکات، بەشێکی دیکەی بەرپرسیارێتییەکە دەکەوێتەئەستۆی دەسەڵاتی دادوەری بۆ دادگاییکردنیان و جێبەجێکردنی توندترین سزاکان، جگە لە رۆڵی دامەزراوە پەروەردەییەکان و رێکخراوەکانی کۆمەڵگەی مەدەنی لە پاراستنی مافەکانی ژنان و دڵنیابوون لە جێبەجێکردنی ئەم پەیامە مرۆییە.
ھەروەھا بنبڕکردنی توندوتیژی دژی ئەم توێژە، بەرپرسیارێتییەکی کۆمەڵایەتی و ئەخلاقییە، لەگەڵ پێدانی رۆڵی راستەقینەی خۆیان شانبەشانی برا پیاوەکان و متمانەکردن بە تواناکانیان و یارمەتیدانیان لە ئاشنابون بە مافە مرۆییەکانیان و دادپەروەری لەگەڵیان و پشتیوانی و گرنگیدان بەوانەی توندتیژییان بەرامبەر کراوە، بۆئەوەی تێکەڵاو بکرێنەوە بە کۆمەڵگە.
بە شانازییەوە سڵاو لە ھەڵوێستی قارەمانانەی ژنانی عیراق دەکەین، کە قوربانیدان و بەخشین لەپێناو ژیانێکی مرۆییانەی پرشنگدار بڵاودەکەنەوە.
سڵاو بۆ ھەموو ئەو ژنانەی لەپێناو ئازادی و یەکسانی و ئاشتیدا تێکۆشان.
خانمی یەکەم
شاناز ئیبراھیم ئەحمەد
دەستەی دەروازە سنووریەکانی عێراق لە راگەیەنراوێکدا بڵاویکردەوە، لە دەروازە سنوورییەکانی عێراق لیژنەیەکی باڵا پشکنین بۆ ئەو بارھەڵگرانە دەکات، کە ھاتوچۆ بە دەروازە سنوورییەکاندا دەکەن و ھەر بارھەڵگرێک مەترسیداربێت رێگە بە تێپەڕبوونی نادرێت.
ئەوەشی خستەڕوو، ئەو بارھەڵگرەی باسی لێودەکرێت لە بەندەری ئوم قەسر، چەکی ئەمریکی بۆ ھەرێم رەوانەکردووە، دوای پشکنین دەرکەوتووە، بارھەڵگرەکە چەکی بارکردووە و سەربە وەزارەتی بەرگری بووە، بە بڕیاری دادوەر رێگە بە تێپەڕبوونی نەدراوە و گەڕێندراوەتەوە بۆ بەندەرەکە، راشیگەیاند، رێوشوێنی یاسایی بەرامبەر دەنگۆیانە دەگرنەبەر دژیان بڵاوکراوەتەوە.
ئەوەش لەکاتێکدایە، پێشتر، عالیە نوسێف ئەندامی ئەنجومەنی نوێنەرانی عێراق، ھەولێک بۆ بەقاچاخبردنی چەکی ئەمەریکی بۆ ھەرێمی کوردستان پووچەڵکراوتەوە، کە بە پاساوی ماددەی کیمیایی ھەوڵیانداوە لە بەندەری ئوم قەسرەوە بۆ ھەرێم ڕەوانەی بکەن.