قوباد تاڵەبانی جێگری سەرۆکی ئەنجومەنی وەزیرانی ھەرێم لە لاپەڕەی تایبەتی خۆی لە تۆڕی کۆمەڵایەتی فەیسبوک نوسیوێتی، بۆ بەرەنگاربوونەوەی لێکەوتەکانی وشکەساڵی، بڕیاری گرتنەبەری کۆمەڵێک رێوشوێنمان دا لە تەرخانکردنی بودجەی تایبەت و گفتوگۆکردن لەگەڵ حکومەتی فیدراڵ و وڵاتانی دراوسێ لەگەڵ ھەوڵدانی مسۆگەرکردنی ئاوی پاکی خواردنەوە بۆ ھاوڵاتیان. 

راشیگەیاندووە، لایەنە پەیوەندیدارەکانم راسپارد بۆ ھەماھەنگی کردن، بەمەبەستی کەمکردنەوەی زیانەکان و پلانی حکومەتم بۆ ڕووبەڕووبونەوەی دیاردەکە خستەڕوو، کە بەشێکیان بۆ ساڵانی ئایندەن لە چەشنی دروستکردنی بەنداوی بچوکی گلدانەوەی ئاو.

سیروان محەمەد سەرۆکی ژووری بازرگانی و پیشەسازی سلێمانی رایگەیاند، بازرگانانی ھاوردەکردنی سوتەمەنی پێیان راگەیاندین نرخی سوتەمەنی لەسەر ئاستی جیھان زیادیکردووە، دابەزینی دیناری عێراقی بەرامبەر دۆلار و زیادبونی رسومات ھۆکارێکی دیکەی بەرزبونەوەی نرخی سوتەمەنیە .

راشیگەیاند، حکومەتی ھەرێمی کوردستان پێویستە پەیوەندیەکانی لەگەڵ حکومەتی ناوەندی زیاد بکات بۆ وەرگرتی ئەو بڕە بەنزینەی چۆن بۆ پارێزگاکانی خواروی عێراق دابین دەکرێت ھەرێمی کوردستان بێ بەش نەبێت لەو بڕە سوتەمەنیە کە نرخی بە ٤٥٠ دینار دیاریکردووە بەمەش نرخ جێگیر دەبێت.

سەرۆکی ژووری بازرگانی و پیشەسازی سلێمانی ئاماژە بەوەشدەکات، پێدانی مۆڵەتی ھاوردەکردنی بەنزین پێشتر لەلای پارێزگاری سلێمانی دەدرا بۆ ھاوردەکردنی سوتەمەنی، بەڵام ئێستا چووەتەوە لای بەڕێوەبەرایەتی سامانە سروشتیەکان، کە بۆ ھەر تۆنێک ١٥ دۆلار تا ٢٥ دۆلار وەردەگرێت وە رسوماتی باجی دەرامەت لە ١٨ ھەزار دینارەوە زیادبووە بۆ ١٨٠ ھەزار دینار ئەمانە ھەموی کاریگەری لەسەر بەرز بونەوەی نرخی بەنزین ھەبووە.

راھی رەھبەر ئەندامی پەرلەمانی کوردستان بە کوردسات نیوزی راگەیاند، حکومەتی ھەرێم راپۆرتی دووەمی لیژنەی باڵای چاکسازیی لەبارەی موچە و دەرماڵە و بەخشین و ئیمتیازاتەکان و خانەنشینی رەوانەی دەستەی سەرۆکایەتی پەرلەمانی کوردستان کرد.

وتیشی، دواتر ئەو راپۆرتە دەدرێت بە ئەندامان و لیژنەکان، ئەو بابەتانەی تایبەت بێت بە ھەر لیژنەیەکەوە، راپۆرتی خۆیانی لەسەر ئامادەدەکەن.

ئەوەش لە کاتێکدایە پێشتر حکومەتی ھەرێم لە راپۆرتی یەکەمدا ھێڵە گشتییەکانی یاسای چاکسازی دیاری کردبوو بۆ ئەوەی کاریان لەسەر بکات، بەڵام بە پێی زانیاریەکان لە راپۆرتی دووەمدا کار بە داتا و زانیاری کراوە.

پەیامنێری کوردسات نیوز رایگەیاند، شەوی رابردوو فرۆکەکانی تورکیا بۆردومانی گوندی کوێستەیان کردوە لە بەرواری باڵا،  دواتر بە شەش ھەلی کۆپتەر ھێزی خۆی لە ناوچەکەدا دابەزاندوە و ئێستا ھێزێکە لەو گوندە جێگیرکراوە. 

جگە لەوەش بۆردومانی چەند ناوچەیەکی تری سەر بە ئامێدی کردووە .

لە راگەیەندراوێکی وەزارەتی تەندروستی ھەرێمی کوردستاندا ھاتووە، بەیانی ئەمڕۆ ٢٥ی نیسانی ٢٠٢١ وەزیری تەندروستی ھەرێم پەیوەندی بە وەزیری تەندروستی عێراقەوە کردووەو لە بارەی رووداوی سوتانی نەخۆشخانەی ئیبن خەتیب لە بەغداد.

لە راگەیەندراوەکەدا ئاماژە بەوەشکراوە، د. سامان بەرزنجی وەزیری تەندروستی ھەرێم ئامادەیی وەزارەتی تەندروستی ھەرێمی کوردستانی پیشانداوە بۆ بە ھاناوەچوونی ھەر پێداویستیەک و ھاوکاریکردنی تیمەکانی پزیشکی و ئامادەباشی وەرگرتنی نەخۆش لە نەخۆشخانەکانی ھەرێمی کوردستان.

لە نووسراوێکی ئازاد محەمەد ئەمین سەرۆکی ئەنجومەنی پارێازگای سلێمانی ھاتووە، ئاگاداری سەرجەم ئەندامانی ئەنجومەنی پارێزگای سلێمانی بکەنەوە، رۆژی سێ شەممە ٢٧ی نیسانی ٢٠٢١ لە ھۆڵی کۆبوونەوەکان ئامادەبن بە مەبەستی ئەنجامدانی ٦٢ ھەمین کۆبوونەوەی ئەنجومەنەکە.

ئاماژەبەوەشکراوە، کارنامەی کۆبوونەوەکە تایبەت دەبێت بە دەنگدان لەسەر پەسەندکردنی پێکھێنانی ئەنجومەنی نوێی شارەوانی سلێمانی (پلە نایاب) و دەنگدان لەسەر پێشنیازی زیادکردنی دوو ئەندام بۆ ئەنجومەنی شارەوانی سلێمانی.

بەپێی راگەیەندراوێکی وەزارەتی تەندروستی ھەرێم، لە ماوەی ٢٤ سەعاتی رابردوو لە ھەرێمی کوردستان  ٨٤٣ کەسی تر تووشی ڤایرۆسی کۆرۆنا بوون و ١٥ توشبووی تری کۆرۆنا گیانیان لەدەستدا و ٧٩٤ توشبووی تری ڤایرۆسەکە چاکبوونەتەوە.

ڕاگەیاندراوی (٢٤) کاتژمێری تایبەت بە نەخۆشی ڤایرۆسی کۆڕۆنای نوێ   COVID١٩                         ژمارە (٤٢٤)

١. پشکنین: (٦١٣٩ پشکنینی نوێ) 
• (٢٠٢٧) ھەولێر
• (١٤٤٠) سلێمانی
• (٢١١١) دھۆک
• (١٢٩) ھەڵەبجە
• (٤٣٢) گەرمیان
• (٠) ڕاپەڕین
 
٢. تووشبوو: (٨٤٣ تووشبووی نوێ)
• (٢٨٣) ھەولێر
• (٣٣٠) سلێمانی
• (١٦٠) دھۆک
• (١١) ھەڵەبجە
• (٥٩) گەرمیان
• (٠) ڕاپەڕین

٣. چاکبوون: (٧٩٤ چاکبوون)
• (١٠٨) ھەولێر
• (٣١٥) سلێمانی
• (٢٨٧) دھۆک
• (٨) ھەڵەبجە
• (٦٧) گەرمیان
• (٩) ڕاپەڕین
 
٤. مردن: (١٥ مردن)
• (٢) ھەولێر
• (٤) سلێمانی
• (٦) دھۆک
• (٠) ھەڵەبجە
• (٣) گەرمیان
• (٠) ڕاپەڕین 

ئاماری گشتی:
کەڕەنتین ھاوڵاتی ٢١٨٧١ (٢١٨٧١ دەرچوو)
پشکنین ١٥٩٨٣٤٣ (٥٥٩٧٦٧ ھەولێر، ٣٦٢٨٤٥ سلێمانی، ٦٦٤٦٧١ دھۆک، ١١٠٦٠ ھەڵەبجە)
تووشبوون ١٤٦٠٣١ (٤٧٧٩١ ھەولێر، ٤٣٦١٢ سلێمانی، ٥١٢٢٦ دھۆک، ٣٤٠٢ ھەڵەبجە)
چاکبوون ١٢٢٨٢٩ (٤٠٥١٨ ھەولێر، ٣٥١١٣ سلێمانی، ٤٤١٥٨ دھۆک، ٣٠٤٠ ھەڵەبجە)
لەژێر چارەسەر ١٩٢٤٣ (٦١٨٩ ھەولێر، ٦٦٦٣ سلێمانی، ٦١٧٣ دھۆک، ٢١٨ ھەڵەبجە)
مردن ٣٩٥٩ (١٠٨٤ ھەولێر، ١٨٣٦ سلێمانی، ٨٩٥ دھۆک، ١٤٤ ھەڵەبجە)

بۆ زانیاری زیاتر سەردانی داشبۆردی حکومەتی ھەرێمی کوردستان بکەن لەم لینکە (https://gov.krd/coronavirus/dashboard/).

وێڕای دەستخۆشی بۆ پزیشکان و کارمەندانی تەندروستی و ھەموو تیمەکانی پزیشکی کە لە ئەرکدان، جەخت دەکەینەوە ھاووڵاتیان پابەندبن بە ڕێنماییەکانی تەندروستی و دورکەوتنەوە لە شوێنی قەڵەبالغ و دانانی ماسک و وەرگرتنی ڤاکسین، وە لەکاتی پێویستدا پەیوەندی بکەن بە ھێڵی گەرمی ژمارە (١٢٢). 

 وەزارەتی تەندروستی       
حکومەتی ھەرێمی کوردستان    
٢٥ی نیسان ٢٠٢١

دڵشاد عومەر بەڕێوەبەری گشتیی پەروەردەی سلێمانی، بە کوردسات نیوزی راگەیاند، داوایان لە وەزارەتی پەروەردە کردووە خوێندکارانی قۆناغە ناکۆتاییەکان بە شێوەیەکی ئارەزوومەندانە دەست بکەنەوە بە خوێندنی ناوپۆل، ھاوشێوەی وەرزی یەکەم کە چۆن خوێندکاران دەچوونە ھۆڵەکانی خوێندن. 

ئاماژەی بەوەشدا، پێشنیازەکە لەڕێگەی وەزیری پەروەردەوە ئاڕاستەی لیژنە باڵای ڕووبەرووبوونەوە کۆرۆنا کراوە. 

رونیکردەوە، بە پێی پێشنیازەکە خوێندکار و بەخێوکەرەکەی سەرپشک بن لە نێوان بەردەوامبوون لە خوێندنی ئەلیکترۆنی یان گەڕانەوە بۆ ناوپۆل، ھەردوو بژاردەکەش ئارەزوو مەندانەیە زۆرە ملێی نییە. 

باسی لەوەشکرد، لە چاوەڕوانیدان کە لەم ھەفتەیەدا بڕیاردان لەسەر ئەو پێشنیازە یەکلایی بێتەوە. 

قوباد تاڵەبانی جێگری سەرۆکی ئەنجومەنی وەزیرانی ھەرێم دەڵێت، بەخەم و پەژارەیەکی قووڵەوە ھەواڵەکانی کارەساتی ئاگرکەوتنەوەی نەخوشخانەی ئیبن خەتیبمان بیست لە بەغدا، لەناخی دڵمانەوە پرسە و سەرەخۆشی ئاراستەی کەسوکاری قوربانییەکان دەکەین و ھیوای چاکبوونەوەی خێراش بۆ برینداران دەخوازین، سەرجەم توانا تەندروستییەکانی ھەرێمی کوردستانیش دەخەینە خزمەتی ڕزگاربووان. 

قوباد تاڵەبانی راشیگەیاندووە، متمانەمان بە لێکۆڵینەوە فەرمییەکان ھەیە بۆ دیاریکردنی ھۆکاری کەموکوڕییەکان و دیاریکردنی کەمتەرخەمییەکان و چەسپاندنی دادگەریی بۆ ئەوەی ڕووداوی ناخۆشی ھاوشێوە دووبارە نەبنەوە لە داھاتوو.

ھاوکات لە سەردانەکەیدا قوباد تاڵەبانی لەگەڵ شاناز ئیبراھیم ئەحمەد کارگێڕی مەکتەبی سیاسی یەکێتی گەلەرییەکی تایبەتی بەسەرکردەوە کەپرۆژەیەکی نیشتمانی گرنگ و خەونی مامۆستا ئیبراھیم ئەحمەد بووە و دەستخۆشی کردنەوەی گەلەرییەکەی لەخاتوو شاناز کرد و کۆکردنەوەی نمونەی خاکی پیرۆزی (٣٠٠) شارو ناوچەی جیاجیای کوردستانی بەھەوڵێکی گرنگ زانی کەلەرێگەیەوە پەیامی سەرەکی گەلەرییەکە ((زەڕەیەک خاکی وەتەن نادەم بەقەسری قەیسەری)) دەچەسپێت، کەئەمەش یٔەو دێڕەیە کەمامۆستا ئیبراھیم ئەحمەد زۆر سەرسامی بوو .

قوباد تاڵەبانی وتیشی ، لەم گەلەرییەدا ھەست بەبۆن و بەرامەی نیشتمانپەروەری و شۆرشگێڕی و پیرۆزییەکانی گەلی کوردستان دەکەم، دڵخۆشم کە ئاواتەکانی مامۆستا ئیبراھیم ئەحمەد دەبینم دێنەدی، ئەو مامۆستای کوردایەتی و پێشەنگی رووناکبیری نمونەی خۆڕاگری بوو، خەباتی بێ ووچانی بۆ ئازادی و رزگاری کوردستان بوو.

لەبەرامبەرداو لەمیانی بەسەرکردنەوەی بەشەکانی گەلەرییەکەدا، شاناز ئیبراھیم ئەحمەد ڕایگەیاند، ئەم گەلەرییە نمونەی خاکی پیرۆزی چەند ناوچەیەکی کوردستانی لەخۆگرتوە کەلەم گەلەرییەدا یەکیانگرتووە و ھەریەکە و ڕەنگ و بۆنێکی جیاوازی تایبەت بەخۆی ھەیە، وتیشی ئەمە ئەو خاکە پیرۆزەیە کەدوژمنانی گەلی کورد چەندین ساڵە شەڕی لەسەر دەکەن.

ئەم بەسەرکردنەوەیەی قوباد تاڵەبانی بۆ گەلەری خاکی کوردستان، لەچوارچێوەی دیدارێکیدا بوو لەگەڵ خاتوو شاناز ئیبراھیم ئەحمەد لە نووسینگەی تایبەتی لە شاری سلێمانی.

دەقی پەیامەکە : 

بەوپەڕی خەمباری و نیگەرانیەوە ھەواڵی روودانی ئاگرکەوتنەوەکەی نەخۆشخانەی ئیبن خەتیبی شاری بەغدامان بیست، پرسەو سەرەخۆشی و ھاوخەمی خۆم ئاراستەی کەسوکاری قوربانییەکان دەکەین و ھیوای زوو چاکبوونەوە بۆ بریندارەکان دەخوازین، بۆ چارەسەرکردنی بریندارەکان و ھەر پێداویستییەکی تر ئامادەی ھەموو ھاوکارییەکین و دەرگای نەخۆشخانەکانی ھەرێمی کوردستان کراوەیە.

لاھور شێخ جەنگی ھاوسەرۆکی یەکێتی نیشتیمانی کوردستان لە پەیامەکەیدا ڕایگەیاندووە، ٤٧ ساڵ لەمەوبەر شاری قەڵادزێی خۆڕاگر و زانکۆی سلێمانی لە ‌لایەن فڕۆکە مەرگچێنەکانی ڕژێمی لەناوچووی بەعسەوە بە چەکی قەدەغەکراوی نێودەوڵەتیی (ناپاڵم) بۆمباباران کران و ژمارەیەکی زۆر لە خەڵکی مەدەنی و بێ دیفاعی قەڵادزێ و خوێندکاران و مامۆستایان و فەرمانبەرانی زانکۆی سلێمانی کە ئەو کات لە قەڵادزێ بوو شەھید و برینداربوون، دواتر لە ھەشتەمین ساڵیادی بۆردوومانەکەشدا خۆپیشاندانێکی گەورەی جەماوەرییان ئەنجامدرا و لەلایەن ئەمن و ئیستخباراتەکانی بەعسەوە بە گولـلە وەڵامدرانەوە و لە ئەنجامدا دوو ژنی قارەمان شەھیدبوون و دەیانی تریش برینداربوون و سەدان کەسیش زیندانی کران.

لاھور شێخ جەنگی ئاماژەی بەوەشکردووە، لە ساڵی ١٩٨٩ش لەلایەن ڕژێمی بەعسەوە خەڵکی قەڵادزێی دوو جار شەھید ‌بە زۆرە ملێ ڕاگوێزران بۆ ئۆردوگاکان لە ھەولێر و سلێمانی، دواتر بە پیلانی بەعس و بێبەزەییانە شارەکەیان کاول و وێران کرا و لەگەڵ زەویدا یەکسان کرا.

ڕاشیگەیاندووە، ئەم تاوانە دڕندە و نامرۆڤانەیەی ڕژێمی لەناوچوو ھاوشێوەی تاوانەکانی تری ئەنفال و کیمیایبارانکردن بوو کە لە چوارچێوەی جینۆسایدکردن و لەناوبردنی گەلی کورد ئەنجامیدا تەنھا لەبەر ئەوەی ناسنامەی کوردبوونیان ھەڵگرتبوو.

جەختیشیکردووەتەوە، یەکێتیی بەردەوام دەبێت لە خزمەتکردن بە قەڵادزێ و پشدەر و بتوێن، داواکارن حکومەتی عێراقیش قەرەبووی مادی و مەعنەوی کەسوکاری سەربەرزی شەھیدان و زیانلێکەوتووان بکاتەوە و لایەنە پەیوەندیدارەکانی حکومەتی ھەرێمیش ئاوەدانی و خزمەتگوزاریی زیاتر پێشکەش بەو ناوچەیە بکەن.

چەند ڕۆژێکە نرخی بەنزین لە بەنزینخانەکان بەرزتربووەتەوە و لە ئێستادا نرخی لیترێک بەنزینی نۆرماڵ ٦٥٠ دینار و لیترێک بەنزینی موحەسەن ٧٠٠ دینار و لیترێک بەنزینی سوپەریش ٧٧٥ دینارە.

شۆفێرانیش نیگەرانن لە بەرزبوونەوەی نرخی بەنزین، داوا دەکەن حکومەت ڕێگە لە زیادکردنی نرخی بەنزین بگرێت.

وەزارەتی ناوخۆی ھەرێم ڕایگەیاند، لە کۆبوونەوەیەکدا لەگەڵ بەڕێوەبەری گشتی گومرگ و بەڕێوەبەری گشتی ھاتووچۆ، چەند ڕێنماییەکی نوێ بۆ ھاوردەکردنی ئۆتۆمبێل دەرکراوە، بە پێی ڕێنماییەکان، ئۆتۆمبێلی بەکارھاتوو کە ھاوردەی ھەرێمی کوردستان دەکرێت، دەبێت ژێرئاوکەوتوو و سوتاو و بڕاوە نەبێت و شاسیش بڕاوە یان لەحیمکراو نەبێت و ھەردوو ئێرباگی شوفێر و تەنیشتی شوفێر کار بکات.

ئاماژە بەوەشکراوە، ڕێگە پێدراوە ١٠ مۆدێل کەمتر لە مۆدێلی ڕێگە پێدراو ھاوردە بکرێن، بڕی ملیۆنێک و ٥٠٠ ھەزار دیناریش وەک ڕسومات وەردەگیرێت، ھاوکات بەڕێوەبەرایەتی گشتی گومرگ لیستی تەعریفەی ئۆتۆمبێلەکانی خوار مۆدێلی ڕێگەپێدراو دیاری دەکات.

قوباد تاڵەبانی جێگری سەرۆکی حکومەتی ھەرێم لە ھەژماری خۆی لە تۆڕی کۆمەڵایەتی ئینستاگرام وێنەی خۆی و ھاوسەرەکەی بڵاوکردووەتەوە کە ڤاکسینی کۆرۆنا وەردەگرن و لە پەیامێکی ھاوپێچی وێنەکاندا لە دوای خواستنی ھیوای لەشساغی بۆ ھاونیشتیمانیان، داوای لە ھاوڵاتیان کردووە کە دوودڵ نەبن لە وەرگرتنی ڤاکسینی کۆرۆنا و ژیانی خۆشەویستانیان بپارێزن.

قوباد تاڵەبانی ڕاشیگەیاندووە، "با ئەرکی سەرشانی پزیشک و کارمەندانی تەندروستی قورستر نەکەین" .