پیاوێکی تەمەن ٤٢ ساڵ لە گوندێکی نزیک لە حسێن ئاوا سەر بە پارێزگای سنە لە خۆرھەڵاتی کوردستان، ھاوسەرەکەی و خەسوو و خەزوور و برای ژنەکەی و کەسیکی تریشی کوشتووە و لە دواییشدا کۆتایی بە ژیانی خۆی ھیناوە.

بە پێی ڕاگەیەندراوێکی وەزارەتی تەندروستی، لە ماوەی ٢٤ سەعاتی ڕابردوو لە ھەرێمی کوردستان ٢٧٥٥ کەسی تر توشی ڤایرۆسی کۆرۆنا بوون و ٢٨ توشبووی تری کۆرۆنا گیانیان لە دەستدا و ٧٧٧ توشبووی تری ڤایرۆسەکەش چاکبوونەتەوە.

 

نەبەز ئیسماعیل وتەبێژی وەزارەتی ئەوقاف و کاروباری ئاینی ھەرێم بە کوردسات نیوزی رایگەیاند، سعودیە پێشوازی لە چوونی عومرەکارانی ھەرێم دەکات و وەزارەتیش ئامادەکاریی تەواوی بۆ دەستپێکردنەوەی گەشتەکان کردووە، بەڵام چاوەڕێن دەستەی حەج و عومرەی عێراق ئاگاداریان بکاتەوە. 

وتیشی، ژمارەیەک مەرج و رێنمایی نوێ بۆ ئەنجامدانی عومرە دانراوە، دیارترینیان ئەوەیە عومرەکار دەبێت ھەردوو ژەمەکەی ڤاکسینی کۆرۆنای وەرگرتبێت و تەمەنی لە ١٨ ساڵ کەمتر نەبێت. 
وتەبێژی وەزارەتی ئەوقاف ئاماژەی بۆ ئەوەشکرد، لە ساڵانی رابردوودا زیاتر لە ٢٦ ھەزار کەس لە ھەرێم گەشتی عومرەیان ئەنجام دەدا، بەڵام بەھۆی بڵاوبونەوەی ڤایرۆسی کۆرۆنا لە ماوەی شەش مانگی سەرەتای ئەمساڵدا، تەنھا ٤٩٢ کەس لە ھەرێم گەشتی عومرەیان ئەنجامداوە.

بەڕێوەبەرایەتی ئاو و ئاوەڕۆی ھەولێر رایگەیاند، بەھۆی بارانبارین لە ناوچە شاخاوییەکانی باکوور و ھەرێمی کوردستان و بەرزبوونەوەی ئاستی لێڵبونی ئاوی ڕووباری زێی گەورە، ماوەی سێ رۆژە دابەشکردنی ئاوی خواردنەوە لە ھەولێر بەڕێژەی لە ٦٠% کەمی کردووە. بەڕێوەبەرایەتی ئاو و ئاوەڕۆی ھەولێر وێڕای ئەوەی داوا لە ھاوڵاتیانی شاری ھەولێر دەکات دەست بە ئاوەوە بگرن، دووپاتیشی دەکاتەوە ھەموو ھەوڵێک خستووەتەگەڕ بۆ دابەزاندنی رێژەی لێڵبوونی ئاوەکە و پێشبینی دەکات لە ماوەیەکی کەمدا کێشەی کەمی دابەشکردنی ئاو لە ھەولێر چارەسەر ببێت.

نوسینگەی پارێزگای ھەولێریش رایگەیاندووە، ھاوڵاتیان دڵنیا دەکەینەوە لە دوای چەند سەعاتێکی تر پڕۆژەکانی ئیفراز یەک، دوو، سێ بەکاردەخرێتەوە و ئاو دەگاتەوە ماڵەکانی ھاوڵاتییان، ھەروەھا تەواوی گرفت و کێشانی پڕۆژەی ئاوی قەندیلیش چارەسەرکراوە و پڕۆژەکە دەکەوێتەوەکار.

لیوا قارەمان شێخ کەمال جێگری سەرۆکایەتی ئەرکان بۆ ئۆپراسیۆنەکان لە وەزارەتی پێشمەرگە بە کوردسات نیوزی راگەیاند، ھاوپەیمانی نێودەوڵەتی بە سەرۆکایەتی ئەمریکا لە ساڵی ٢٠١٥ەوە تائێستا ھاوکاری لۆجستی لیواکانی پێشمەرگە دەکات و لەلایەن وەزارەتی بەرگری ئەمەریکاشەوە بودجەیەکی ساڵانە بۆ ھاوکاری پێشمەرگە و سوپای عێراق تەرخانکراوە. 

 

ئاماژەی بۆ ئەوەشکرد، کشانەوەی ھێزە شەڕکەرەکانی ئەمریکا لە عێراق، کاریگەری لەسەر ناردنی ھاوکارییەکانی ھاوپەیمانان بۆ ھێزەکانی پێشمەرگە نابێت و ھاوکارییەکان بەردەوام دەبن.

بەڕێوەبەرایەتی گشتی دژە تیرۆری ئاژانسی پاراستن و زانیاری / زانیاری لە راگەیەنراوێکدا ئاماژەی بەوەکردووە، دەزگاکەیان ھێزی بەرجەستەکردنی سەروەریی یاسا و راپێچکردنی تاوانبارانە بۆ بەردەم یاسا، لە ھەر شوێنێک تاوانباران خۆیان حەشار بدەن و بیانەوێت لە لێپرسینەوە و سزادان ھەڵبێن، راپێچی بەردەم یاسایان دەکەن.

راشیگەیاندوە، دژە تیرۆر خۆی بە دوور گرتووە لە ململانێ سیاسییەکان، بەڵام ھەندێک کەس و تاقم بۆ مەرامی سیاسی، ناو و لۆگۆی دژە تیرۆر بەکار دەھێنن،  رێگە بە چەواشەکاریی لەوجۆرە نادەن، لێکۆڵینەوەیان دەستپێکردووە و ھەر کەس و تاقمێک تێوەگلابن، رووبەڕوی یاسایان دەکەنەوە.

پەیامنێری کوردسات نیوز رایگەیاند، بەرەبەیانی ئەمڕۆ فڕۆکە جەنگییەکان چیای کوڕەژریان بۆردومانکرد، کە دوو کیلۆمەتر لە سەنتەری ناحیەی شیلادزێ دوورە. 

وتیشی، فڕۆکە  جەنگییەکان بەبەردەوامی بە ئاسمانی ناوچەکەدا دەسوڕێنەوە.

دوێنێش بەمەبەستی ئارامی لە ناوچەکە، بەتایبەت ئەو گوندانەی رۆژانە لەلایەن سوپای تورکیاوە بۆردومان دەکرێت، ھێزێکی پاسەوانی سنوری عێراق خالێکی سەربازییان لە نێوان گوندەکانی"ھرور و چەولک و کێستە" لە سنوری ناحیەی کانی ماسێ دانا، دواتریش فڕۆکە جەنگییەکانی تورکیا گوندەکانی سنوری بەرواری باڵایان بۆردومان کرد.

وتیشی، رۆژانە ئاماری مەترسیداری کۆرۆنا لە دھۆک تۆمار دەکرێت، پێویستە ھاووڵاتیان پابەندی رێنماییەکانی تەندروستی بن.

تیمی پارێزەرانی بەدەل بەرواری چالاکوانی بادینان لە نامەیەدا بۆ سەرۆک و ئەندامانی دادگای تاوانی دووی ھەولێر داوا دەکەن، بەھۆی ئەوەی ماوەیەکی زۆر ماوە بۆ رۆژی دادگایکردنەکەی، لە ئێستاشدا رەوشی تەندروستی باش نییە و کێشی دابەزیووە، بڕیاربدەن بەپێشخستنی دادگایکردنەکەی بەدەل بەرواری بۆ رۆژێکی تر.

بەپێی زانیارییەکانی کوردسات نیوزیش لە ئێستادا، سەرۆکی دادگای تاوانی دووی ھەولێر داوای بۆچونی ئەندامەکانی کردووە بۆ پێشخستنی دادگاییکردنەکەی.

بەدەل بەرواری لە ١٥ی ئایار ٢٠٢٠، لە پارکی ئازادی شاری دھۆک بەبیانوی رێکخستنی خۆپیشاندانی مامۆستایان دەستگیرکرا، ٢٩ی تەمموزی ٢٠٢١ یش یەکەم دادگایی بەڕێوەچوو، رۆژی ٣٠ ی ئەیلولی ٢٠٢١ یش بۆ دادگایکردنی دووەمی دیاریکراوە.

بە پێی ڕاگەیەندراوێکی وەزارەتی تەندروستی، لە ماوەی ٢٤ سەعاتی ڕابردوو لە ھەرێمی کوردستان ٣٢٢٠ کەسی تر تووشی ڤایرۆسی کۆرۆنا بوون و ١٤ تووشبووی تری کۆرۆنا گیانیان لە دەستدا و ٧٥٤ تووشبووی تری ڤایرۆسەکەش چاکبوونەتەوە.

 

لە ھەڵمەتێکدا شارەوانی سلێمانی ھەستاوە بە تازەکردنەوە و بۆیاخ کردنی شەقامەکان و ھەڵمەتەکەش ‌شەقامی بازنەیی مەلیک محمود ‌دەگرێتەوە لەگەل پاکردنەوەی شەقام و بلوارەکان و چاکردنەوەی نافورەکان.

ھاوکات بۆردی بەرێوەبەرایەتی باخچەکان ھەستاون بە ‌ناشتنی (نەمام و دار) لە شەقامی دەروازەی شاری سلێمانی بە ‌پێی ئەودەرخستەی بۆی کراوە سەرجەم ئەودارانەی وشک بووە (‌ دار و نەمامی) تازە لە ‌شوینی دەنێژریت.

بە پێی ڕاگەیەنراوەکە ئەو جوانکارییەی کە ‌بۆ شاری سلێمانی ئەنجام دەریت سەرجەم شەقامە سەرەکییەکان دەگریتەوە ھەر لە شەقامی تاسلوجە سلێمانی و تا ناو شار، بە تەواو بوونی ئەم پڕۆژەیە سلێمانی سیمایەکی جوانی دەبێت.

بافڵ تاڵەبانی ھاوسەرۆکی یەکێتی و قوباد تاڵەبانی لەگەڵ ژمارەیەک سەرۆک عەشیرەت و کەسایەتی کۆمەڵایەتی کۆبوونەوە و لە کۆبوونەوەکەدا بافڵ تاڵەبانی ڕایگەیاند، یەکێتی بە ڕێزێکی زۆرەوە لە مێژووی خەبات و قوربانیدانی عەشیرەتەکانی کوردستان دەڕوانێت و ئەوان داینەمۆی شۆڕش و پێشەنگی گیانفیدایی بوون لە پێناو کوردستان و یەکێتییەکەی مام، ئێمە ئەو مێژووە درەوشاوەیەی ئێوە لەبیرناکەین.

لە بارەی گۆڕانکارییەکانی نێو یەکێتییەوە بافڵ تاڵەبانی وتی، ھەر بڕیارێک درابێت لە پێناو چاکسازی و بەرژەوەندی گشتیدا بووە و خەڵکی خۆشەویستی سنووری سلێمانی و ھەرێمی کوردستان سوودمەندی یەکەم دەبن و ئاشکراشیکرد، گۆڕانکارییەکان بەردەوام دەبن و دەمانەوێت ژینگەیەکی لەبار و ئارام بۆ خەڵکەکەمان دەستەبەر بکەین و خزمەتگوزاری زیاتر پێشکەش بکەین.

جەختیشیکردەوە نابێت ھیچ کەسێک لە سەروو یاساوە بێت و پێویستە ھەمووان ھەست بە ئارامی و سەلامەتی بکەن و پاراستنی بەرژەوەندییە نەتەوەیی و نیشتمانییەکان بە ئەرکی خۆمان دەزانین.

بافڵ تاڵەبانی ئاماژەی بۆ ئەوەشکرد وەک چۆن لە ڕابردوودا ھاوکار و پشتیوانی یەکێتی بوون، داواتان لێدەکەین ئێستاش بە ھەمان ڕۆحییەتەوە لەگەڵمان بن و پێکەوە ھەنگاو بەرەو سەرکەوتن بنێین.

دڵنیاییشی دایە ئامادەبووان کە چیتر دەستەگەری و کارکردن لە پێناو بەرژەوەندی شەخسی قبوڵ ناکەین. لێدان لە سەروەری یاسا و سیخووڕیکردن بەسەر کەسایەتییە سیاسی و کۆمەڵایەتییەکان و خەڵکەوە بنبڕ دەکەن و ھیچ کەسێکیش نابوورن و ڕادەستی دادگای دەکەن.

لای خۆشیانەوە سەرۆک عەشیرەت و کەسایەتییە کۆمەڵایەتییەکان ڕایانگەیاند، ئێمە لە ڕابردوودا پشتیوانی یەکێتی و سەرۆک مام جەلال بووین، لە داھاتووشدا ھەروا دەبین.

داواکارین یەکێتی بە ھەمان ڕۆحییەتی مام-ەوە بەردەوام بێت لە خەبات و لەناو خەڵکدا بێت. پشتیوانتان دەبین بۆ چاکسازی و ھەمووان پێکەوە بە ئاڕاستەی ژیانێکی ئارام ھەنگاو دەنێین و بەھا باڵاکانی کوردەواری دەپارێزین.

ئەمڕۆ رێکەوتی (٤/٨/٢٠٢١) بە سەرپەرشتی ھاوسەرۆک ھەڤاڵ بافڵ تاڵەبانی ، مەکتەبی سیاسی یەکێتیی نیشتمانیی کوردستان لە سلێمانی، کۆبووەوە.
لە کۆبوونەوەکەدا چەند تەوەرێکی بواری حزبی و ھەڵبژاردنەکان تاووتوێکران.
کۆبوونەوە وێڕای گفتوگۆی لەسەر چارەسەری بەپەلە و یەکێتییانەی گرفتە ناوخۆییە حزبییەکان و دیاری کردنی رێوشوێنی دروست بۆیان لەناویشیاندا پاراستنی ئارامی و ھێمنی ھەرێمی کوردستان بە شاری سلێمانیشەوە ،تەئکید لەسەر بەگەڕخستنی توانای ماددی و مەعنەوی مەکتەب و دەزگاکانی یەکێتیی کرایەوە بەرەو ھەڵمەتێکی پڕ جۆش و خرۆشی پێکەوەیی و دیموکراتییانە بۆ سەرخستنی لیستی ھاوپەیمانی کوردستان کە لیستی ھاوبەشی بزوتنەوەی گۆڕان و یەکێتییە لە ھەڵبژاردنی داھاتوی ئەنجومەنی نوێنەرانی عێراقدا.
مەکتەبی سیاسی گشت مەکتەب و مەڵبەندەکان و ئۆرگانەکانی یەکێتیی راسپارد کە ھاوشانی ئۆرگانەکانی بزوتنەوەی گۆڕانی ھاوپەیمان پەیوەستی میحوەر و بازنەکانی ھەڵبژاردن بن، کە ئەرکی ھەرە لە پێشینەیانە بۆ سەرخستنی کاندیدەکانی ھاوپەیمانی کوردستان لە ھەموو بازنەکانی ھەڵبژاردندا، چونکە سەرکەوتنی ھاوپەیمانی کوردستان ئاسۆیەکی روون و نوێ لەبەردەم گەلی کوردستان دەکاتەوە بۆ پەرەپێدانی خەباتی پەرلەمانی و دیموکراتی و  لەپێناو چارەسەرکردنی کێشەکانی ھەرێمی کوردستان و حکومەتی فیدڕاڵ بە کێشەی ناوچە جێناکۆکەکانەوە کە  ھەر بە بژاردەی گفتوگۆ و رێوشوێنی سیاسی دەگەیەندرێتە ئەنجام.

پەیامنێری کوردسات نیوز لە رۆژئاڤای کوردستان رایگەیاند، بەھۆی بۆردومانی تۆپخانەکانی سوپای تورکیا لە گوندی سەفاویە لە ڕۆژھەڵاتی شارۆچکەی عەین عیسای سەر بە کانتۆنی گرێ سپی، چوار ئەندامی یەک خێزان گیانیان لەدەستداوە کە یەکێکیان تەمەنی ١٢ ساڵە و دایک و منداڵیکی ھەمان خێزانیش بە قورسی بریندارن و رەوانەی نەخۆشخانە کراون.

ژووری ئۆپراسیۆنی پارێزگای هەولێر لە راگەیەندراوێكدا بڵاویكردەوە، رەوشی تەندروستی شارەكە مەترسیدارە و زنجیرە نوێی ڤایرۆسی كۆرۆنا لە هەڵكشاندایە، داواشی لە هاووڵاتیان كرد پابەندی رێنماییە تەندروستییەكان بن بەتایبەت بەستنی دەمامك، لەمڕۆشەوە تەواوی هێزەكانی ناوخۆ و تیمەكانی قائیمقامیەت و شارەوانییەكان چاودێری و بەدواداچوونی سەرجەم شوێنە گشتییەكان چڕ دەكەنەوە و هەر كەسێك پابەند نەبێت و دەمامك بەكارنەهێنێت رێكاری یاسایی لەبەرامبەردا دەگیرێتەبەر. 
هەر بەپێی بریارەكان، دەبێت سەرجەم فەرمانگە و بەڕێوەبەرایەتییەكانی سنوری پارێزگای هەولێر، ڕێنماییە تەندروستییەكان و رێكارەكانی خۆپارێزی جێبەجێبكەن و هەر بەڕێوەبەرایەتی و فەرمانبەرێكیش سەرپێچی لەو بڕیارە بكات، بەڕێوەبەر و بەرپرسانی ئەو فەرمانگەیە روبەڕووی رێكاری یاسایی دەكرێنەوە.