لەتیف نێروەیی ئەندامی سەرکردایەتی یەکێتی ئاماژەی بەوەکرد، قوباد تاڵەبانی جێگری سەرۆکی حکومەت لە دەرەوەی وڵاتەو بەشداری کۆبوونەوەی ئەنجومەنی وەزیرانی نەکردووە، ئەو وەزیرانەی یەکێتیش کە بەشداری کۆبوونەوەکەیان کردووە، لەگەڵ دابەشکردنی موچەی فەرمانبەراندا بوون و  دەنگیان بە دواخستنی نەداوە.

دەشڵێت، یەکێتی لەگەڵ دابەشکردنی موچەی فەرمانبەراندایە.

رۆژی چوارشەممەی رابردوو ئەنجومەنی وەزیرانی ھەرێم کۆبووە و سەرچاوەیەک لە کۆبوونەوەکە بە کوردسات نیوزی راگەیاندبوو، لە کۆبوونەوەکەدا بڕیاردراوە مووچەی مانگی شوبات دابەشنەکرێت تاوەکو بەغداد مووچەی ھێزە ئەمنییەکان دەنێرێت.

وەزارەتەکە لە بەیاننامەیەکدا بەهۆی ساڵیادی کیمبارانکردنی ھەڵەبجەوە داوا لە کۆمەڵگەی نێودەوڵەتی دەکات تاوانی کیمیابارانی ھەڵەبجە لەسەر ئاستی جیھانی بە جینۆساید بناسینێ و لە ھەمانکاتدا داوا  لە حکومەتی عێراقیش دەکات ھەرچی زووە قەرەبووی زیانلێکەوتوانی دەستی ڕژێمی پێشوو بکاتەوە.

دەشڵێت، ھەموو ھەوڵێک دەدەن بۆ بە جینۆساید ناساندنی ئەم کەیسە لە سەر ئاستی نێودەوڵەتی و فەراھەمکردنی خزمەتگوزارییەکان.

ناسر کەنعانی، وتەبێژی وەزارەتی دەرەوەی ئێران لە ساڵیادی کیمیابارانی ھەڵەبجەدا لە تۆڕی کۆمەڵایەتی ئێکس نوسیویەتی، کارەساتی کیمیابارانکردنی ھەڵەبجە برینێکە ھەرگیز لەیاد ناکرێت.

دەشڵێت، سەرەڕای قەدەغەکردنی بەکارھێنانی چەکی کیمیایی، بەڵام بەعس بەھۆی ھەندێک لە وڵاتانی رۆژئاواەە توانی چەکی کیمیایی دروستبکات، ئەویش چەندین جار لە دژی خەڵکی بێتاوانی ھەڵەبجەو سەردەشت بەکاریھێنا، لەگەڵ ئەوەشدا زیاتر لە ٣٥٠ جار چەکی کیمیایی لە کاتی شەڕ لەگەڵ ئێراندا بەکارھێناوە.

کەنعانی ئاماژە بەوەشدەکات، ئەو وڵات و حکومەتانە لەو ساڵانەدا ھانی سەدامیاندا بۆ ھێرش و داگیرکردنی ئێران، ئەوە جگە لە پشتیوانی نێودەوڵەتی و سیاسی، ئێستاش بانگەشەی بەرگریکردن لە مافەکانی مرۆڤ دەکەن و ھێرشەکانیان بەرەو ئێران ئاراستە دەکەن و بەرپرسن لە کۆمەڵکوژی زیاتر لە ٣٠ ھەزار کەسی بێتاوان لە غەززە.

بەشی تۆماری تابلۆی ئۆتۆمبێل لە بەڕێوەبەرایەتی ھاتوچۆی ھەڵەبجە ئاگاداری ھاووڵاتیان دەکاتەوە کە ڕۆژی یەکشەممە بەرواری ١٧ی ئازار، دەست بە دابەشکردنی تابلۆی ئۆتۆمبێل دەکرێت کە تایبەتە بە پارێزگای ھەڵەبجە.

دەشڵێت، ئەو ھاوڵاتیانەی ئۆتۆمبێلی ھەولێر، دھۆک، سلێمانییان ھەیە، دەتوانن لە بەڕێوەبەرایەتیەکانی خۆیان داواکاری پێشکەشبکەن بە مەبەستی تۆمارکردن لە بەڕێوەبەرایەتی ھەڵەبجە.

ئاماژە بەوەشدەکات، ھەر ھاووڵاتیەک خواستی کڕینی ژمارەی نایابی ھەیە، دەتوانێت داواکاری پێشکەش بکات کە لە ژمارە  ١٠٠٠- ٢٣وە دەستپێدەکات تا ژمارە ٩٩٩٩- ٢٣ کە نرخیان دوو ملیۆن دینارە.

رێكخراوی هەنگاو بۆ مافی مرۆڤ بڵاویكردەوە، سەرلەبەیانی رۆژی پێنجشەممە، هێزە چەكدارەكانی ئێران لە سنووری نەوسوودی رۆژهەڵاتی كوردستان دەسترێژی گوللەیان لە دوو كاروانی كۆڵبەران كردووە و بەهۆیەوە سێ كۆڵبەری خەڵكی جوانڕۆ و شاهرۆخ وەلیانە و شاری داڵاهۆ برینداربوون.

ئەوەشی خستەڕوو، رۆژی چوارشەممەش، هێزە چەكدارەكانی ئێران لە بانە دەسترێژی گوللەیان لە كۆڵبەرێكی تەمەن 20 ساڵی خەڵكی گوندی چۆمان كردووە و برینداریانكردووە، كە هیچ كەلوپەلێكی كۆڵبەری پێنەبووە، هەروەها هەر لەم هەفتەیەدا، لە سنووری شارەكانی سنە و داڵاهۆ و مەریوان، لەلایەن هێزە چەكدارەكانی ئێرانەوە بە ئەشكەنجە و دەسترێژی گوللە سێ كۆڵبەری دیكە برینداركراون.

رێكخراوی هەنگاو راشیگەیاندووە، سەرەتای ئەم هەفتەیە، لە ئەنجامی دەسترێژی گوللەی هێزە چەكدارەكانی ئێران لە مەریوان، بۆ سەر ئۆتۆمبێلێكی كۆڵبەران، دوو كۆلبەر گیانی لەدەستداوە و كۆڵبەرێكی دیكەش برینداربوون.

لە رۆژی پێنجی ئەم مانگەوە، کۆمیسیۆنی باڵای ھەڵبژاردنەکانی عێراق، دەرگای خۆتۆمارکردنی بۆ ناوی کاندیدانی سەربەخۆ و پارتەکان و ھاوپەیمانێتییەکان کردووەتەوە و تا ئەمڕۆ سەعات ٢ی پاش نیوەڕۆ پڕۆسەکە بەردەوام دەبێت.

فەرھاد ئەسعەد لێپرسراوی بەشی تۆماری قەوارە سیاسییەکان لە ئۆفیسی ھەولێری کۆمیسیۆن بە کوردسات نیوزی رایگەیاند، لە پێنجی ئەم مانگە تائێستا ٦٥ کاندیدی سەربەخۆ ناوی خۆیان تۆمارکردووە و تەنھا ٢٣ کاندید فۆڕمەکەیان گەڕاندووەتەوە و خۆیان تۆمارکردووە. ھەروەھا زیاتر لە ٣٥ حزب فۆڕمیان پڕکردووەتەوە و تەنھا ١٨ لایەن و حزب فۆڕمەکانیان گەڕاندووەتەوە.

وتیشی، ئەمڕۆ یەکەم ھاوپەیمانی بەناوی سەردەمەوە لە ھەولێر تۆمارکراوە کە لەنێوان لایەنەکانی پارتی رەنجدەرانی کوردستان و یەکێتیی نەتەوەیی دیموکراتی کوردستان و پارتی پارێزگاران پێکھێنراو.

ئۆفیسی سلێمانی کۆمیسیۆنی باڵای ھەڵبژاردنەکانی عێراقیش بە کوردسات نیوزی راگەیاند، تائێستا ١٨ کاندیدی سەربەخۆ و ١٣ پارت تۆمارکراون و ھیچ ھاوپەیمانیەتییەک تۆمارنەکراوە.ھاوکات لە دھۆکیش، تائێستا ١٢ کاندیدی سەربەخۆ تۆمارکراون، بەڵام ژمارەی حزب و لایەنەکان دیار نییە. 

بەشی پێشبینی لە بەڕێوەبەرایەتی گشتی کەشناسی و بوومەلەرزەزانی ھەرێم، کەشی پێشبینیکراوی ٤٨ سەعاتی داھاتووی بڵاوکردووەتەوە و دەڵێت، سبەینێ، ئاسمان نیمچە ھەور دەبێت پاشان دەگۆڕێت بۆ ھەوری تەواو.

دەشڵێت، لە کاتەکانی دوای نیوەڕۆ لە ناوچەکانی باکوور و ڕۆژھەڵاتی ھەرێم بە تایبەت ناوچە شاخاوییەکان نمە باران و بارانی مامناوەند دەبارێت، پاشان لە کاتەکانی شەودا لەسەر بەشێک لە سنووری پارێزگای سلێمانی و ناوچە شاخاویەکان ئەگەری بارانبارین زیاترە.

ھەروەھا ئاماژەی بەوەشکردووە، لە ھەندێک کاتدا خێرای با لە ھەندێک ناوچە چالاک دەبێت بۆ سەروی ٣٥ کیلۆمەتر لە سەعاتێکدا بە تایبەت لە ناوچەکانی پارێزگای سلێمانی و کەرکوک.

بەگوێرەی خشتەی کۆبوونەوەکانی دادگای فیدڕاڵی عێراق، رۆژی ١٧ی ئادار دادگاکە سکاڵایەک تاوتوێدەکات کە لەلایەن نۆ مامۆستا و فەرمانبەری ھەرێمی کوردستان تۆمارکراوە و تیایدا داواکراوە راگرتنی پلەبەرزکردنەوەی فەرمانبەرانی ھەرێم بە نادەستوری لە قەڵەم بدات.

دادگای فیدڕاڵی ٢٥ی شوبات بڕیاردانی لەسەر ھەمان سکاڵا بۆ ١٧ی ئادار دواخست و چاوەڕێدەکرێت لەو دانیشتنەدا بڕیاری کۆتایی لەسەر سکاڵەکە بدات.

رێکخراوی مافەکانی مرۆڤ لە عەفرین لەبارەی رووداوەکە ئاماژەی بەوەکردووە، مشتومڕ لەنێوان خاوەن نانەواخانە و عەرەبێکی ھاوردە دروستبووە و لەئەنجامیشدا مێردمنداڵێکی تەمەن ١٥ ساڵ کوژراوە کە کوڕی خاوەن نانەواخانەکە بووە.

ئەوەشی خستووەتەڕوو، دوای رووداوەکە پۆلیسی عەفرین تۆمەتبارەکەی دەستگیرکردووە و  لێکۆڵینەوەی لە ھۆکاری رووداوەکە دەستپێکردووە.

کەسوکاری ئەو مێردمنداڵە کوردەش بڕیاریانداوە لەبەردەم پۆلیسی عەفرین خۆپیشاندان سازبکەن و داوای تۆڵەسەندنەوە و راگرتنی پێشێلکاری بەرامبەریان دەکەن.

لە ڕاگەیەندراوێکدا ئەنجومەنی شورای ھەرێمی کوردستان دەڵێت، دادگای فیدراڵی خۆی خستووەتە شوێنی دەسەڵاتی یاسادانان، چونکە ھێنانەکایەی دەقی یاسایی لە بڕیاری دادگای فیدراڵی، دەستوەردانە لە تایبەتکارییەکانی دەسەڵاتی یاسادانان.

دەشڵێت، دادگای فیدراڵی پابەندنەبووە بە سکاڵای داواکار، بەجۆرێک داواکار داوای ھەڵوەشاندنەوەی ١١ کورسی کۆتاکانی نەکردووە، بەڵکو داوای دووبارە دابەشکردنەوەی کردووە، ئەمەش پێشێلکردنێکی ڕوونە.

ئەنجومەنی شوورا باسی لەوەشکردووە، دادگای فیدراڵی لە ھەندێک لە بڕیارەکانیدا کەوتۆتە ھاودژی بوون، کاتێک بڕیاریداوە بە ھەڵوەشاندنەوەی کورسی کۆتاکان.

ئەنجومەنی شورای ھەرێم دوپاتیکردووەتەوە کە ئەم ئاراستەیەی دادگای فیدراڵی، دەبێتە مایەی چەندین لێکەوتەی نەخوازراو چ لە لایەنی یاسایی بێت یان لەلایەنی سیاسی یان کۆمەڵایەتی.

بەھمەن قادر وتەبێژی بەنزینخانەکانی سلێمانی بە کوردسات نیوزی ڕاگەیاند، ئێوارەی ئەمڕۆ ھەر سێ جۆرەکەی بەنزین ٢٥ دینار لە نرخەکەیان دادەبەزێت، کە ھۆکارەکەی بۆ زۆری ڕێژەی بەنزین و کەمی خواست لەسەر بەنزین دەگەڕێتەوە لە سلێمانی.

ئاماژەی بەوەشدا، بەنزینی نۆرماڵ لە ٨٥٠ دینارەوە دەبێتە ٨٢٥ دینار و موحەسەنیش لە ١٠٧٥ دینارەوە دەبێتە  ١٠٥٠ دینار و بەنزینی سۆپەریش لە ١٢٢٥ دینارەوە دەبێتە ١٢٠٠ دینار.

ئاژانسی "میھر"ی ئێرانی بڵاویکردەوە، لە رێوڕەسمەکانی چوارشەممە سووریدا تائێستا، ٢٣ حاڵەتی گیانلەدەستدان تۆمارکراوە و دوو ھەزار و ١١٤ کەسیش برینداربوون، کە ھەزار و ٦١٦یان رەوانەی نەخۆشخانە کراون و برینی ٤١٣یان قورسە، ھەروەھا ١٥٢ کەسیان کەمئەندامبوون و ٧٠٠ کەسیش زیان بەر چاویان کەوتووە. 

رێوڕەسمی چوارشەممە سووری، رێوڕەسمێکی مێژووی ئێرانە، لە دوایین شەوی چوارشەممەی پێش نەورۆز بەڕێوەدەچێت و لە شەقام و گۆڕەپانەکان و شوێنە بەرزەکان ئاگردەکرێتەوە و خەڵک باز دەدات بەسەریدا. ساڵی رابردووش لەو رێوڕەسمەدا ٢٧ کەس گیانیان لەدەستدا و زیاتر لە چوار ھەزار کەسیش برینداربوون.

فەرمانگەی میدیا و زانیاری بڵاویکردەوە، کۆبوونەوەکەی ئەنجومەنی وەزیرانی ھەرێم لە سێ تەوەر پێکھاتووە، لە تەوەری یەکەمدا باس لە سەردانی وەفدی حکومەتی ھەرێمی کوردستان بە سەرۆکایەتی سەرۆکی ئەنجومەنی وەزیران بۆ ئەمریکا دەکرێت و کۆبوونەوە و دیدارەکان لە کۆشی سپی و کۆنگرێس و وەزارەتی دەرەوە و پنتاگۆن و وەزارەتی گەنجینەی ئەمریکا، دەخرێنەڕوو.  

لە تەوەری دووەمدا، راپۆرتی دەستەی دەسپاکی سەبارەت بە جێبەجێکردنی ستراتیژی نیشتمانی روبەڕوبوونەوەی گەندەڵی لە ھەرێمی کوردستان دەخرێتەڕوو. 

تەوەری سێیەمیش بریتییە لە خستنەڕووی ھەنگاو و رێکارەکانی ئەمدواییەی وەزارەتی دارایی و ئابوری و وەزارەت و لایەنە پەیوەندیدارەکانی حکومەتی ھەرێم، سەبارەت بە مووچەی مووچەخۆران، لەبەر رۆشنایی دواپێشھات و گۆڕانکارییەکان.

سەرچاوەیەک لە کۆبوونەوەکەی ئەنجومەنی وەزیران بە کوردسات نیوزی راگەیاند، لە کۆبوونەوەی ئەمڕۆی ئەنجومەنی وەزیرانی ھەرێم بڕیاردراوەمووچەی مانگی شوبات دابەشنەکرێت تاکو بەغداد مووچەی ھێزە ئەمنییەکان دەنێرێت.

راشیگەیاند، لە رۆژانی داھاتوو وەفدێکی حکومەتی ھەرێم بۆ پرسی مووچە دەچێتەوە بەغداد.

رۆژی ١٢ی ئەم مانگە وەزارەتی دارایی حکومەتی ھەرێم رایگەیاندبوو، داوایان لە عێراق کردبوو بەبێ جیاوازی تەواوی موچەی فەرمانبەران بنێرێت، بەڵام عێراق تەنھا بڕی ٥٦٠ ملیار و ٢١٧ ملیۆن دیناری تەمویل کردووە کە کە دەکاتە رێژەی تەنھا ٥٩٪ی مووچە و ٤١٪ی مووچەخۆران بێبەشکراون.

دەشڵێت، کورتھێنانی موچە بۆ مانگی شوبات بە نزیکەی ٣٩٠ ملیار دینارە.  

بڕیارە ئەمڕۆ، دەرگای پێشکەشکردنی لیستی کاندیدەکان بۆ ھەڵبژاردنی پەرلەمانی کوردستان بکرێتەوە و تا رۆژی ٢٢ی ئەم مانگە بەردەوام دەبێت. 

لەو پڕۆسەیەدا، دەبێت سەرۆکی حزب یاخود سەرۆکی لیست لەوکاتەی ناوەکان پێشکەشدەکەن ئامادەبن و ئیمزای بکەن، ھەر حزبێکیش بیەوێت جیابێتەوە لە ھاوپەیمانییەک، دەبێت لەو ماوەیەدا جیابوونەوەکەی رابگەیەنێت. 

لەلایەکی دیکەوە، رۆژی ١٤ی ئادار کۆتا وادەیە بۆ وەرگرتنی ناوی کاندیدە سەربەخۆکان و کاندیدی حزب و ھاوپەیمانێتییەکان. کۆمسیۆنی باڵای ھەڵبژاردنەکانی عێراق رایگەیاندبوو، تائێستا لە ھەولێر و سلێمانی و دھۆک ٢٤ کاندیدی سەربەخۆ ناوی خۆیان بۆ بەشداریکردن لە ھەڵبژاردنی پەرلەمانی کوردستان تۆمارکردووە و ھیچ ھاوپەیمانێتییەکیش تۆمارنەکراوە.

ئەنجومەنی باڵای فەتوای ھەرێم لە راگەیەندراوێکدا سەبارەت بە رێژەی سەرفیترە و فیدیە و زەکات ئاماژەی بەوەدا، بڕی سەرفیترە بۆ ھەر کەسێک لە ئەمساڵدا لانیکەم دوو ھەزار و ٥٠٠ دینار دەبێت، ھەروەھا بڕی فیدیەی بەرۆژۆنەبوون بۆ ھەر رۆژێک دوو ھەزار و ٥٠٠ دینار دەبێت.

ئەوەشی خستووەتەڕوو، بڕی ٢ ملیۆن و ١٠٠ ھەزار دیناری عێراقی زەکاتی لێدەکەوێت، واتە ھەر کەسێک بڕی ٢ ملیۆن و ١٠٠ ھەزار یان زیاتری ھەبێت و ساڵی بەسەردا سوڕابێتەوە، دەبێت بڕی ٪٢.٥ی لەو پارەیە بە زەکات بدات بە ھەژار و کەمدەرامەتان.