کوردستان
لە راگەیەندراوێکدا ئەلینا رۆمانۆسکی باڵیۆزی ئەمریکا لە عێراق دەڵێت، نیگەرانن لە بڕیاری پارتی بۆ بایکۆتکردنی ھەڵبژاردنی پەرلەمانی کوردستان، داواش لە حکومەتی عێراق و ھەرێمی کوردستان دەکات دڵنیایی بدەن کە ھەڵبژاردنێکی ئازاد و دادپەروەر و شەفاف و متمانەپێکراو بەڕێوەدەچێت، جەخت لەوەشدەکاتەوە، ھەموو خەڵکی ھەرێمی کوردستان پێویستە دەنگیان ھەبێت لە بڕیاردان لە سەر داھاتوویان.
ھاوکات نێردەی تایبەتی سکرتێری گشتی نەتەوە یەکگرتووەکان، یونامی لە راگەیەندراوێکدا دەڵێت، تێبینیان لەسەر بڕیارەکەی پارتی ھەیە، ھەر وەک چۆن تێبینیان لەسەر بڕیارەکەی مانگی ڕابردووی دادگای فیدڕاڵی ھەبووە. داواش لە ھەموو لایەنەکان دەکات لە بەرژەوەندی خەڵک کاربکەن تاکو بەرەو چارەسەر ھەنگاوبنێن نەک بەرەو چەقبەستووییەکی دیکەی درێژخایەن.
ھەروەھا یونامی دووپاتیشیدەکاتەوە، بەڕێوەچوونی ھەڵبژاردنی ١٠ی حوزەیران لە ھەرێمی کوردستانی زۆر گرنگە.
بەپێی راپۆرتێکی ژووری ئۆپراسیۆن بۆ بەڕێوەبردنی قەیران و کارەسات و بەڕێوەبەرایەتیی گشتیی کەشناسی و بوومەلەرزەزانی ھەرێم، شەپۆلێکی بارانبارین و ھەورەبروسکەی بەھێز سبەینێ لە تەواوی ھەرێمی کوردستان ڕوودەدات.
دەشڵێت، زۆرترین بڕی بارانبارین لە دەڤەری ڕاپەڕین دەبێت کە لە سبەینێوە تا رۆژی چوارشەممە بەردەوامدەبێت و دەگاتە ٨٥ ملیمەتر باران، ھۆشداری ئەوەشدەدات کە بەھۆی بارانی زۆرەوە ئەگەری ڕوودانی لافاو ھەیە.
کەشناسی داواش لە ھاوڵاتییان دەکات ھەتا بۆیان دەکرێت ڕێگە گشتییەکان بەکارنەھێنن و خۆیان بەدووربگرن لە ھەورەبروسکە.
مەکتەبی سیاسی پارتی دیموکراتی کوردستان لە راگەیەندراوێکدا دەڵێت بڕیارەکەی دادگای فیدراڵی لەبارەی یاسای ھەڵبژاردنی پەرلەمانی کوردستانەوە شەش پێشێلکاری زەق و مەترسیداریی دەستوریی تێدایە بۆ لەباربردنی سیستەمی دیموکراسی ھەرێم، ھەوڵدان بۆ گەڕاندنەوەی عێراق بۆ سیستەمی مەرکەزی، کە دیاترینیان فرەبازنەیی و نەھێشتنی کورسی کۆتای پێکھاتەکانە.
دەشڵێت، جگە لەو پێشلکارییە دەستوریانەی لە بڕیارەکانی دادگای باڵای فێدرالی بەرامبەر یاسای ھەڵبژاردن کراون، چەند ڕێکارێکی دیکەی ناتەندروست گیراونەتەبەر کە کۆی پرۆسەی ھەڵبژاردنی خولی شەشەمی پەرلەمانی کوردستان دەخەنە ژێر پرسیاری جدیەوە، لەوانە بێبەشکردنی نزیکەی (٤٠٠) ھەزار دەنگدەر لەدەنگدان، بۆیە بەشداریی ھەڵبژاردنێک ناکەن کە بە نایاسایی و نادەستوری و لە سایەی سیستمێکی سەپێنراودا بەڕێوەبچێت.
مەکتەبی سیاسی پارتی جەختیکردوەتەوە، لایەنەکانی ھاوپەیمانی ئیدارەی دەوڵەت دەخاتە بەردەم بەڕپرسیارێتی نیشتمانی لەجێبەجێنەکردنی دەستور و تەواوی خاڵەکانی رێکەوتنی سیاسی و ئیداریی پێکھێنانی کابینەی ئێستای حکومەتی عێراق، بەپێچەوانەوە ناتوانن بەردەوام بن لە پرۆسەی سیاسی دا.
تیمی وەزاری یەکێتیی روونکردنەوەیەکی لەبارەی دابەشکردنی موچە بڵاوکردەوە و دەڵێت، لە دوا کۆبوونەوەی ئەنجومەنی وەزیران، داوایانکرد بەو بڕە پارەیەی کە لە بەغدادەوە ھاتووە دەستبکرێت بە دابەشکردنی مووچە، چونکە بەرەجەژنانە و خەڵک چاوەڕێی ئەو مافەی خۆیەتی وەریبگرێت، لەگەڵ ئەوەش ھەوڵ بدرێت ئەو بەشەی تریش داوا بکرێت لە وەزارەتی دارایی عێراق بینێرێت. بەڵام ھەبوون کە لایەنی سەرەکی حکومەتن؛ لە دژی ئەو بۆچوونەی ئەوان قسەیان کردووە.
تیمی وەزاری یەکێتیی جەختیکردوەتەوە، یەکێتیی بە حزب و تیمی حکومەتەوە، سیاسەتێکی میانڕەوانەی گرتووەتەبەر لەگەڵ لایەنەکانی ھەرێم و عێراق و ھاوسەنگی راگرتووە و ھەرگیز ھەوڵی تێکدانی نێو ماڵی لایەنەکانی ھەرێم و بەغدادی نەداوە لەپێناو پۆستێکی دیاریکراودا. بۆیە ئەوانەی ئەو ھەوڵانە دەدەن، بوونەتە باعیسی رێکنەکەوتن و تێکدانی پەیوەندییەکانی نێوان ھەرێم و بەغداد و دواتر خەڵکی کوردستان دەبنە قوربانی ئەو سیاسەتە ھەڵەیە.
دەشڵێت، بەم رەمەزان و بەرەجەژنانە، خۆزگە لەبری بەیاننامە و لێدوان و تەسریباتی ناڕاست، بە ھەموویانەوە ھەوڵی چارەسەرکردنی ئەو کێشەیەیان بدایە کە زیاد لە ١٠ ساڵە ماف و شایستەی مووچەخۆران دەستەبەر ناکرێت. خەڵکی کوردستان راستە پشووی درێژە بەڵام ناکرێت ئەو پشوودرێژییە لەبەرچاو نەگیرێت و مافەکانیان پەراوێز بخرێت.
.jpg&w=3840&q=75)
سەعدی ئەحمەد پیرە وتەبێژی یەکێتیی نیشتمانیی کوردستان روونکردنەوەیەکی لەبارەی ھەڵبژاردنی پەرلەمانی کوردستان بڵاوکردەوە و دەڵێت، یەکێتیی پابەندە بە وادەی ھەڵبژاردنی پەرلەمانی کوردستان لە ١٠ی حوزیرانی ئەمساڵ وەکو لەلایەن سەرۆکی ھەرێمەوە بڕیاری لەسەر دراوە.
دەشڵێت، یەکێتی رای وایە ھەڵبژاردنی پەرلەمانی کوردستان باشترین ڕێگایە بۆ قووڵکردنەوەی زیاتری دیموکراسی و تێپەڕاندنی ئەم دۆخە ئاڵۆزەی ناوخۆ و ناوچەکە بە گشتی.
سەعدی ئەحمەد پیرە ئاماژەی بەوەشکردووە، چالاککردنەوەی پەرلەمان گرنگە بۆ ئەنجامدانی ئەرکە یاسایی و سەرەکییەکانی و چارەسەرکردنی کێشە و گرفتە فرە رەھەندەکانی کۆمەڵانی خەڵکی کوردستان.
د. عیماد جەمیل سەرۆکی تیمی ڕاگەیاندنی کۆمیسیۆنی باڵای ھەڵبژاردنەکانی عێراق بە کوردسات نیوزی راگەیاند، تائێستا ھیچ داواکارییەکی رەسمی بەدەستی کۆمیسیۆن نەگەیشتووە بۆ دواخستنی ھەڵبژاردن.
جەختی لەوەشکردەوە، کۆمسیۆن پابەندە بە ئەنجامدانی ھەڵبژاردن لەوادەی دیاریکراوی خۆیدا و لەئێستاشدا گەیشتوون بە قۆناغی کۆتایی ئامادەکارییەکان و سوورن لەسەر بەڕێوەچوونی ھەڵبژاردن لە وادەی دیاریکراوی خۆیدا.
باسی لەوەشکرد، لە رۆژان داھاتوودا وۆرکشۆپ بۆ کارمەندانی کۆمسیۆن دەکرێتەوە لە ھەرێمی کوردستان، ئەوەش دەبێتە دوایین قۆناغی ئامادەکارییەکان، دوای تەواوکردنی لیستی کاندیدەکان.
نەبەز ئەعدولحەمید قائیمقامی ھەولێر لە راگەیەندراوێکدا ئاماژەی بەوەکردووە، لە میانی بەدواداچوون و چاودێریکردنی لێژنەکانی پشکنین و چاودێری بەنزینخانەکان، ١٣ بەنزینخانە لە ھەولێر داخراون و سزادراون.
دەشڵێت، داخستنی بەنزینخانەکان بەھۆی فرۆشتنی بەنزینی کوالێتی خراپ و پابەندنەبوونیان بەڕێنماییەکانەوە بووە و لە سەرەتای ئەم مانگە تا ١٧ی ئادار پشکنین بۆ ١٦٨ بەنزینخانە کراوە و ئەو ١٣ بەنزینخانە لە پشکنین دەرنەچوون.
ڤێدانت پاتێل لە کۆنگرەیەکی رۆژنامەوانیدا رایگەیاند، ھەڵوێستی نەگۆڕی ئەوان ئەوەبووە کە ھەمیشە پشتیوانی لە ئەنجامدانی ھەڵبژاردنی ئازاد و شەفاف دەکەن بە بەشداری سەرجەم لایەنەکان.
راشیگەیاند، ئەوان لە نیگەرانی کوردەکان تێدەگەن بەرامبەر بە بڕیارەکانی دادگای فیدڕاڵی، بەڵام پێمانوانییە بایکۆتکردنی ھەڵبژاردن خزمەت بە ھەرێمی کوردستان و گەلی کورد و عێراق بە گشتی بکات.
لە کۆبوونەوەکەدا، ھەریەک لە نوێنەرانی (وەزارەتی خوێندنی باڵا و توێژینەوەی زانستی، وەزارەتی پەروەردە, وەزارەتی شارەوانی و گەشتوگوزار، وەزارەتی ئەوقاف و کاروباری ئایینی، وەزارەتی کاروباری شەھیدان و ئەنفالکراوان، فەرمانگەی ڕێکخراوە ناحکومییەکان) بەشدار بوون، وەزیری رۆشنبیری و لاوان تیشکی خستەسەر گرنگی پڕۆژەی دامەزراندنی ئەو ناوەندە نیشتمانییە و کارکردنی زیاتر بۆ جێبەجێکردنی دەقی یاسای ژمارە (١)٢٠٢٢ی پەرلەمانی کوردستان، "یاسای پاراستنی بەڵگەنامەی نیشتمانی لە ھەرێمی کوردستان – عێراق"، کە ئەرکی دامەزراندنی ناوەندەکەی بە وەزارەتی ڕۆشنبیری و لاوان سپاردووە.
وتیشی، پێویستە لەسەر بنەمای ستانداردی نێودەوڵەتی کار بۆ بنیاتنانی ئەو ناوەندە و ڕێکارەکانی کۆکردنەوە و پاراستنی بەڵگەنامەکان بکرێت، لە سەرەتاوە دەبێت بینای ناوەندەکە تایبەتمەند بێت بەو بوارە و ھەموو ڕێکارێکی پیویست بگیرێتە بەر بۆ پاراستنی ئەرشیڤ و بەڵگەنامەکان.
بە گوێرەی بڕگەی یەکەمی ماددەی پێنجەمی یاساکە، وەزیری رۆشنبیری و لاوان سەرۆکایەتی ئەنجومەنێک دەکات بۆ ڕێکخستن و پلاندانان بۆ جێبەجێکردنی پڕۆژەکە و نوێنەری لایەنە پەیوەندیدارەکان تێیدا ئەندامدەبن.
بە پێکھێنانی "ناوەندی بەڵگەنامەی نیشتمانی ھەرێمی کوردستان – عێراق"، ھەرێمی کوردستان دەبێتە خاوەنی ناوەندێکی نیشتمانی بۆ کۆکردنەوەی بەڵگەنامە و دەستنووس و پاراستنی ئەرشیڤی کوردستان.
سەعدی ئەحمەد پیرە وتەبێژی یەکێتی بە کوردسات نیوزی راگەیاند، مەکتەبی سیاسی یەکێتی بۆ تاوتوێکردنی دوایین رەوشی ھەرێم و عێراق و بڕیارەکەی پارتی بۆ بەشدارینەکردن لە ھەڵبژاردنی پەرلەمانی کوردستان کۆدەبێتەوە.
وتیشی، دوای کۆبوونەوەی مەکتەبی سیاسی ھەڵوێستی خۆیان لەبارەی بڕیارەکەی پارتی رادەگەیەنن.
عەمار حەکیم سەرۆکی رەوتی حیکمەی نیشتمانی رایگەیاند، نیگەرانە لە بڕیاری بایکۆتکردنی پارتی بۆ بەشدارینەکردن لە ھەڵبژاردنی پەرلەمانی کوردستان لە مانگی حوزەیران.
حەکیم داوا لە مەسعود بارزانی سەرۆکی پارتی دەکات، بە بڕیاری بایکۆتکردنی ھەڵبژاردندا بچێتەوە و ھەڵوێستی بگۆڕێت لەپێناو قوربانی عێراقییەکان بۆ دیموکراسی.
بافڵ جەلال تاڵەبانی سەرۆکی یەکێتیی نیشتمانیی کوردستان لە رێوڕەسمێکدا دەسپێک و ستراتیژی نوێی کۆمەڵەی خوێندکارانی کوردستانی ئاشکراکرد و رایگەیاند، پێشتر بەڵێنیان بە خوێندکارانی کوردستان دابوو لەگەڵیان دەمێننەوە و پاڵپشت و ھاوکاریان دەبن، لەو چوارچێوەیەشدا لەمەودوا خۆی سەرپەرشتی کارەکانی کۆمەڵەی خوێندکارانی کوردستان دەکات و پێکەوە دەتوانن کاری گەورەتر بکەن و داھاتوویەکی پرشنگدار بونیادبنێن.
روونیشیکردەوە، لەماوەی رابردوودا لەسەر داوا و پێشنیازی خوێندکاران و لەپێناو بونیادنانەوەی بەشێوازێکی نوێ، کارەکانی کۆمەڵەی خوێندکارانیان راگرت، ئێستاش بە تێگەیشتن لە رەوشی ھەرێم و پێویستییەکانی گەنجان، کارەکانی کۆمەڵەکە دەستپێدەکاتەوە و دەبێتە سەکۆیەکی گرنگ و کاریگەر بۆ بەرگریگردن لە مافەکانی خوێندکاران.
وتیشی، کۆمەڵەی خوێندکاران بە رەھایی نوێگەر و سەردەمییانە دەبێت، دوور لە ھەموو بەرژەوەندییەک و بەبێ گوێدانە ئینتیمای حزبی و سیاسی درێژە بە کارەکانی دەدات و لەخزمەت کەرتی پەروەردە و خوێندنی باڵا دەبێت.
ڕاپۆڕتی کەشناسی بۆ ڕۆژەکانی ١٨-١٩-/٠٣-٢٠٢٤
بەگوێرەی دوایین پێشبینیەکانی ئەمرۆ ئاراستەو کاریگەری شەپۆلی باران بارین
بەم شێوەیە دەبێت:
ھاتنی کاریگەری شەپۆڵێکی باران بارینی بەھێز بۆ سەر ناوچەکەمان
ڕۆژی دووشەممە ڕێکەوتی ١٨-٣-٢٠٢٤ سەرەتا باران بارین بە شێوەی نمە بارانی لەسەرخۆ لە کاتە جیاجیاکان لەسەر ھەندێ ناوچە دەبارێت زۆربەی کاتەکان ئاسمان ھەوری تەواو دەبێت و پلەکانی گەرما بە نزیکەی ١-٣ پلە نزم دەبێتەوە . سنووری پارێزگای دھۆک بارانی زیاتر دەبێت بە تایبەت لە کاتەکانی شەودا .
رۆژی سێ شەم : دوای زیادبوون و بەھێز بوونی کاریگەری ئەم شەپۆڵەی روو لە ناوچەکەمان دەکات , لە ئەنجامی کاریگەری یەکگرتنی دوو نزمە پاڵەپەستۆی (دەریای ناوەڕاست و دەریای سوور), باران بارین بەشێوەی بارانی مامناوەند و باران بارینی بەلێزمە و ھەورە تریشقە بەدرێژای ڕۆژی سێ شەممە سەرجەم ناوچەکەمان دەگرێتەوە .
بڕی باران بارینی پێشبینیکراو لەگەڵ کاتی دابارین بە جیاوازی ناوچەکەمان بەم شێوەیە دەبێت :
سەرەتا دەستپێکی باران بارین لە پارێزگای دھۆک دەبێت لە کاتەکانی شەوی دووشەم لەسەر سێ شەم وە بە درێژای کاتەکانی ڕۆژی سێ شەم باران بارینی بەڵێزمە سەرجەم ناوچە شاخاوییەکان و سنووری پارێزگای دھۆک وە بەشێک لە ناوچە شاخاوییەکان . بڕی باران بارینی پێشبینیکراو لەم سنوورە بەم شێوەیە دەبێت بە گوێرەی دوایین پێشبینیەکانی ئەمڕۆ ڕێکەوتی ١٧-٣-٢٠٢٣ ڕۆژی یەک شەممە :
سەنتەری شاری دھۆک سەرووی ٦٠ ملم
ناوچە شاخاوییەکان بە تایبەت ناوچە سنووریەکان (ئاکرێ شیلادزە چمانکێ ئامیدی ) سەرووی ٧٠ ملم
ئیدارەی سەربەخۆی زاخۆ لە نێوان (٤٥- ٦٥) ملم دەبێت .
دوای درێژبوونەوەی کاریگەری ئەم شەپۆڵە بۆ سەرجەم ناوچە جیاجیاکانی ھەرێم بڕی دابارین بۆ رۆژی سێ شەم لە ناوچەکانی تر بەم شێوەیە دەبێت :
سنووری پارێزگای ھەولێر: سەنتەری شار زیاترلە ٤٠ ملم دەبێت وە ناوچە شاخاوییەکانی سنووری پارێزگای ھەولێر لە سەرووی ٦٠ ملم دەبێت .
ئیدارەی سەربەخۆی سۆران بڕی بارانی پێشبینیکراو لە سەرووی ٦٠ ملم دەبێت .
سنووری پارێزگای سلێمانی وە ئیدارەی گەرمیان بەشێک لە پارێزگای ھەڵەبجە زۆربەی کات لە کاتەکانی دوای نیوەڕۆ و ئێوارە باران بارینی بە ڵێزمەی دەبێت بارانی پێشبینیکراوی لە ماوەی کاریگەری ئەم شەپۆڵە بەم شێوەیە دەبێت :
سنووری پارێزگای سلێمانی و ناوچە شاخاوییەکانی (٤٥-٧٥) ملم دەبێت .
ئیدارەی سەربەخۆی گەرمیان لە (٣٥-٤٥) ملم دەبێت .
پارێزگای ھەلەبجە و ناوچە شاخاوییەکانی (٢٥-٣٥) ملم دەبێت .
ئیدارەی سەربەخۆی ڕاپەڕین : بە درێژای ماوەی دەستپێکی شەپۆڵەکە باران بارینی دەبێت وە بڕی بارانی پێشبینیکراو بۆ ئەم سنوورە لە نێوان (٦٥-٨٥) ملم دەبێت .
تێبینی / ئەگەری تەزرە بارین و ھەورە تریشقە ھەیە لە کاتە جیاجیاکان و ھەندێ ناوچە لەگەڵ زیاد بوونی خێرای با بۆ سەرووی ٢٥ کم لە کاتژمێرێکدا .
کاریگەری ئەم شەپۆڵە لە ڕۆژی چوار شەممە لاواز دەبێت لە کاتەکانی دوای نیوەڕۆی ھەمان ڕۆژ کۆتای دێت .
بەرێوەبەرایەتی گشتی کەشناسی و بوومەلەرزەزانی – بەشی پێشبینی ٢٠٢٤/٠٣/١٧
پارێزگای ھەولێر لە کۆبونەوەیەکدا لەبارەی ڕەوشی کەشوھەواو و پێشبینیەکانی کەشناسی و دوای ھەڵسانگدن بۆ ڕەوشەکە، بڕیاردرا سەرجەم قائیمقام و بەڕێوەبەری ناحییەکان، لە سنووری خۆیان ژوورێکی ئۆپراسیۆن پێکبھێنن و لە ئامادەباشی تەواودابن بۆ ڕوودانی ھەر ئەگەرێکی نەخوازراو و چارەسەرکردنی ئەو گرفتانەی دەبنە ھۆکار و مەترسی دروستبوونی لافاو.
بەڕێوەبەرایەتییەکانی ئاوەڕۆ و ئاودێریش، بەردەوام دەبن لە پاککردنەوەی ڕێرەوەکانی ئاوی سروشتی باران و ئاوی قورس و کەند و سەرجەم مەنھۆڵەکان و ئاوەڕۆکان، سەرۆکایەتی شارەوانیش لەگەڵ تیمەکانی لە ئامادەباشی و ھەماھەنگی یەکتردابن بۆ ھەر ئەگەر و پێشھات و رووداوێکی چاوەڕوان نەکراو.
ھاوکات داوای لە ھاووڵاتییانیش کردووە ھەماھەنگ و ھاوکاری تیمەکان بن و پابەندی رێکار و رێنماییەکان بن و لەحاڵەتی بارانبارینی زۆر نزیکی ڕووبار و ئەو شوێنانە نەبنەوە کە ئاستی ئاوییان بەرز دەبێتەوە.
پەیامنێری كوردسات نیوز رایگەیاند، فەرمانبەرانی هەریەكە لە بەڕێوەبەرایەتی هاتوچۆی سلێمانی و دادنووسی سلێمانی دژی دواكەوتن و دابەشنەكردنی مووچەكانیان بایكۆتی دەوامیان راگەیاند و داواكارن بە زووترینكات مووچەی مانگی شوبات دابەشبكرێت.
بایكۆتی ئەو فەرمانبەرانە لە كاتێكدایە، ماوەی چەند رۆژێكە وەزارەتی دارایی عێراق نزیكەی 600 ملیار دیناری خستووەتە سەر هەژماری وەزارەتی دارایی هەرێم بۆ دابەشكردنی مووچەی مانگی شوباتی فەرمانبەران، بەڵام وەزارەتی دارایی هەرێم بە پاساوی ئەوەی ئەو بڕە پارەیە كەمە و بەشی مووچەی تەواوی مووچەخۆرانی هەرێم ناكات، دابەشكردنی مووچەی مانگی شوباتی بۆ كاتێكی نادیار دواخستووە.
مەسرور بارزانی سەرۆکی حکومەتی ھەرێمی کوردستان، لەگەڵ وەفدێکی ئەنجومەنی بەڕێوەبردنی بانکی بەغداد و بانکی ئوردنی کوەیتی و سەرۆکی ئەنجومەنی بەڕێوەبردنی بانکی بەغداد کۆبووەوە و گفتوگۆ لەبارەی دەرفەتەکانی ئەنجامدانی کار و پڕۆژەی ھاوبەش لەگەڵ حکومەتی ھەرێمی کوردستان کرا لە پێناو پێشخستنی سیستمی بانکی و پەرەپێدانی ئابووری لە عێراق و ھەرێمی کوردستان.
لە بەشێکی تری کۆبوونەوەکەدا سەرۆکی حکومەتی ھەرێم ئاماژەی بۆ چاکسازییەکانی حکومەتی ھەرێم لە بواری سیستمی بانکی و بەدیجیتاڵکردنی خزمەتگوزارییەکان و پارەدانی ئەلیکترۆنی و بەردەوامبوونی پڕۆژەی ھەژماری من کرد و رایگەیاند، لەپەیوەندیدایە لەگەڵ سەرۆک وەزیرانی عێراق و پارێزگاری بانکی ناوەندی لەبارەی چەند دەستپێشخەرییەکی پەیوەندیدار بە پێشخستنی سیستمی بانکی بە ھەماھەنگی و بەپێی مەرج و ڕێنماییەکانی بانکی ناوەندیی عێراق.