کوردستان
بەپێی کارنامەی کۆبوونەوەکە، ئەنجومەنی نوێنەران خوێندنەوە بۆ چەند پڕۆژەیەک دەکات و دەیانخاتە دەنگدانەوە، لەوانەش دەنگدان لەسەر پڕۆژە یاسای بە پارێزگابوونی ھەڵەبجە.
لە ١٣ی ئازاری ٢٠٢٣، محەمەد شیاع سودانی، سەرۆک وەزیرانی عێراق ڕەشنووسی یاسای بە پارێزگابوونی ھەڵەبجەی پەسەندکرد و رەوانەی ئەنجومەنی نوێنەرانی کرد بە مەبەستی دەنگدان لە سەری.
لەگەڵ ئەوەی بە پارێزگابوونی ھەڵەبجە چەندین بەربەسی لەلایەن پەرلەمانتارانی عێراقەوە بۆ دروست کرا، بەڵام فراکسیۆنە کوردستانییەکان پێداگریی دەکەن لەسەر رەوایەتی بە پارێزگابوونی ھەڵەبجە و تایبەتمەندی پارێزگاکە کە لەسەر ئاستی عێراق سیمبۆلی قوربانیدان و شەھیدی دەستی دیکاتۆریەتی بەعسە.
بەگوێرەی کارنامەی کۆنگرەی پێنجەمی یەکێتی، ئەمڕۆ خوێندنەوە بۆ ئەو سێ ڕاپۆڕتەی لیژنەکانی تایبەتمەندی کۆنگرەکە دەکرێت کە ھێشتا مشتومڕی ئەندامانی کۆنگرەی لەسەرە، لە نێویاندا راپۆڕتی لیژنەی پەیڕەوی ناوخۆ.
تەلار لەتیف وتەبێژی کۆنگرەی یەکێتیی رایگەیاند، لە رۆژی دووەمی پێنجەمین کۆنگرەدا، لیژنەکانی شەھیدان و زیندانیان و کەمئەندامان و پەیڕەو کارەکانی خۆیان تەواو نەکردوو، ئەمڕۆ لە سێیەمین رۆژدا گفتوگۆکانی کۆنگرە بەردەوام دەبێت.
وتیشی ھەر لەمڕۆدا ئەندامانی ئەنجومەنی سەرکردایەتی یەکێتی ھەڵدەبژێردرێن و رێکارەکانی تری کۆنگرە تەواو دەکرێن کەلەرۆژانی رابردوو تەواونەکراون.
بەڕێوەبەرایەتیی بەرگریی شارستانیی دھۆک لە نوسراوێکدا رێنمایی لەبارەی بەکارھێنانی یارییە ئاگرینەکان و سیستەمی ئاگرکوژێنەوە لە شوێنە گشتییەکان بڵاوکردەوە و رایگەیاند، بەھیچ شێوەیەک نابێت یارییە ئاگرینەکان لە ھۆڵەکانی (ئاھەنگگێڕان، شانۆگەری، ھۆتێلەکان، یانە شەوانەکان، باخچە تایبەتەکان و شوێنە گەشتیارییەکان) ھەبێت، بە پێچەوانە ھەر کەسێک پابەند نەبێت، رێکاری توندیی یاسایی بەرامبەری دەگیرێتەبەر.
بەڕێوەبەرایەتیی بەرگریی شارستانیی دھۆک دەشڵێت، پێویستە ھەموو کۆمپانیا و کۆگا بازرگانییەکان و ھۆتێل و یەکەکانی نیشتەجێبوون و بەنزینخانەکان سیستمی ئاگرکوژێنەوەیان تێدا بێت.
ئەو بڕیارانەی بەڕێوەبەرایەتیی بەرگریی شارستانیی دھۆک، دوای ئەوە دێت، شەوی سێشەممە بەھۆی ھەڵدانی یاریی ئاگرین، لە ئاھەنگێکی بوکگواستنەوەدا لە یەکێک لە ھۆڵەکانی حەمدانیە، ئاگر لە ھۆڵەکە کەوتەوە و بەھۆیەوە زیاتر لە ١٠٠ کەس گیانیان لەدەستدا.
بە بەشداری ٦٠٠ ئەندام دووەم رۆژی پێنجەمین کۆنگرەی یەکێتیی نیشتمانیی کوردستان بە دروشمی نوێگەری لە کاردا کۆدەنگی لە بڕیاردا بەردەوامە، بڕیارە ئەمڕۆش ئەو شەش لیژنەیەی راسپێدراون تەواوی ئەو راپۆرتانەی خراوەتە بەردەست کۆمسیۆنی ئامادەکاری کۆنگرە گفتوگۆی لەسەر بکەن، لەنێو کارەکانیشدا پەیڕەوی ناوخۆیی یەکێتی تاوتوێبکرێت، لەگەڵ ئەو راپۆرتانەی پەیوەندییان بە ژیان و گوزەرانی ھاووڵاتیانەوە ھەیە.
ھەروەھا کۆمسیۆنی ئامادەکاری کۆنگرە راپۆرتێک سەبارەت بە گۆڕانکارییەکانی پەیڕەوەی ناوخۆ دەخاتەڕوو بۆ ئەوەی لە داھاتوودا خزمەتی زیاتری کادرانی ئۆرگانە جیاوازەکانی یەکێتی بکات.
ھاوکات لە رۆژی یەکەمی کۆنگرەش بە کۆی دەنگی ئەندامان، بافڵ جەلال تاڵەبانی بە سەرۆکی یەکێتی ھەڵبژێردرایەوە، کۆسرەت رەسوڵ عەلی و ھێرۆ ئیبراھیم ئەحمەدیش لە پای رۆڵ و پێگە و ماندووبوونیان لە مێژووی یەکێتی وەک سیمبولی باڵای یەکێتی دیاریکران.
د.ھەڤاڵ ئەبوبەکر پارێزگاری سلێمانی رایگەیاند، لەگەڵ ھاتنی وەرزی پاییزدا، دڵنیاتاندەکەینەوە، کە فەرمانگە پەیوەندیدارە حکومییەکان لە ھەموو بوارەخزمەتگوزارییەکاندا بەردەوامن لە ئەرکی دڵسۆزانەی خۆیان و چاودێریی و بەدواداچوونی پێویست و بەردەوام بۆ ھەموو بوارە خزمەتگوزارییە گشتییەکان دەکەن و ڕێکاری یاسایی پێویست دەگرنەبەر.
پارێزگای سلێمانی داوا لە ھاوڵاتیان دەکات پشکنینی دڵنیایی تەواو بۆ سیستمی غازو شۆڤاژو ھەرجۆرە سوتەمەنیی و وزەیەکی تر کە لەماڵەکاندا بەکاریان دەھێنن بکەن و ھەروەھا پشکنینی دڵنیایی تەواو بۆ سەری کونج و مەنھۆڵ و ئاوەڕۆی ماڵەکانیان بکەن.
د.ھەڤاڵ ئەبوبەکر دەشڵێت، لەبوونی ھەرکێشە و ناتەواوییەک لەو بوارانەی باسکران، لە کۆڵان و گەڕەکەکاندا پەیوەندیی بەفەرمانگەی پەیوەندیدارەوە بکەن.
بەپێی ئەو زانیاریانە لە فەرمانگەی تەندروستیی کەرکوکەوە بە کوردسات نیوز دراوە، شەوی چوارشەممە لەسەر پێنجشەممە، لە ئاھەنگێکی بوک گواستنەوەدا لە قەزای حەویجە، زیاتر لە ١٠٠ کەس دوای خواردنی نانی ئێوارە، ژەھراویبوون و رەوانەی نەخۆشخانە کراون.
بەپێی زانیارییەکان، ھۆکاری ژەھراویبوونی ئەو کەسانە خواردنی تێکچوو بووە و سەرجەمی ئەو کەسانەی ژەھراویبوون، چارەسەریان بۆ کراوە و نەخۆشخانەیان بەجێھێشتووە.
پێگەی ئاگوس میدیا تایبەت بە کاروباری وزە لە راپۆرتێکدا لە زاری لێپرسراوێکی عێراقییەوە کە ناوەکەی ئاشکرانەکردەوە بڵاویکردەوە، ھێشتا ئەگەری دەستپێکردنەوەی ھەناردەی نەوتی ھەرێمی کوردستان بۆ تورکیا ئاڵۆزە، چونکە چارەسەری بابەتی قەرەبووی دارایی لەنێوان تورکیا و عێراق لەئارادا نییە.
ئەو لێپرسراوە عێراقییە ئاماژەی بەوەشداوە، بابەتەکە لۆجستی نییە، بەڵکو پەیوەندی بە پابەندە داراییەکانەوە ھەیە و تورکیا ناتوانێت قەرەبوو بداتەوە بە عێراق بەپێی ئەو بڕیارەی دەرکرابوو، بۆیە بابەتەکە ئاڵۆزە.
زیاتر لە شەش مانگ بەسەر راگرتنی ھەناردەی نەوتی ھەرێمی کوردستان تێپەڕیووە، کە لە رۆژی ٢٥ی ئاداری ئەمساڵ دادگای ناوبژیوانیی نێودەوڵەتیی لە پاریس، سکاڵایەکی لە بەرژەوەندیی حکومەتی عێراق دژی تورکیا یەکلاکردەوە و بەھۆیەوە ھەناردەی نەوتی ھەرێمی کوردستان بۆ تورکیا راگیرا، زیانی ئەو راگرتنەش بە ٦ ملیار دۆلار بۆ عێراق و ھەرێم مەزەندە دەکرێت.
ئیڤان فایەق وەزیری کۆچ و کۆچبەرانی عێراق، لە میانی سەردانی بۆ قەزای حەمدانیە، بریندارەکانی رووداوەکەی شەوی سێشەممە بەسەرکردەوە و لە کۆنفرانسێکی رۆژنامەوانییدا رایگەیاند، بریندارانی رووداوەکەی حەمدانیە بە پێنج یان ١٠ ملیۆن دینار قەرەبوو دەکرێنەوە.
وتیشی، بەشی یەکەمی بریندارەکان لە نەخۆشخانەکانی نەینەوا و پارێزگاکانی دیکە لە ھەرێمی کوردستان، بۆ وەرگرتنی چارەسەر رەوانەی تورکیا دەکرێن.
شەوی سێشەممە لە ئاھەنگێکی بوکگواستنەوەدا لە یەکێک لە ھۆڵەکانی قەزای حەمدانیە، بەھۆی ھەڵدانی یاریی ئاگرینەوە، ئاگر لە ھۆڵەکە کەوتەوە و بەھۆیەوە زیاتر لە ١٠٠ کەس گیانیانلەدەستدا.
دەقی پەیامەکە...
بەناوی خوای گەورە و میهرەبان
بەڕێز سەرۆک بافڵ جەلال تاڵەبانی
سڵاوێکی شۆڕشگێڕانەی گەرم
سەرۆک بافڵ جلال تاڵەبانی سەرۆکی یەکێتیی نیشتمانیی کوردستان، پیرۆزبایی گەرمی خۆمانتان ئاڕاستە دەکەین بە بۆنەی سازدانی پێنجەمین کۆنگرەی حیزبە تێکۆشەرەکەمان و هەڵبژاردنەوەتان بە سەرۆکی حیزبی شەهیدان.
پڕ بەدڵ هیواخوازین لە سەرۆکایەتیکردنی یەکێتییەکەماندا وەک چۆن لە پێشتردا سەرکەوتوو بوون، هیواخوازین لە ئایندەشدا سەرکەتووبن و لەسەر ڕێبازەکەی جەنابی مام، رۆحی شاد بێت بەردەوام بن، وەک لای بەڕێزتان ئاشکرایە خزمەتکردنی یەکێتییەکان بە تایبەتی و کۆمەڵانی خەڵکی کوردستان بە گشتی، بووەتە پێویستییەکی گرنگی ئەم قۆناغەی یەکێتییەکەمان، کە پێویستە کاری جددی لەسەر بکرێت.
لەم بۆنە پیرۆزەدا، دەزگای میدیایی کوردسات بەناوی سەرجەم کارمەندانیەوە پیرۆزبایی گەرمتان ئاڕاستە دەکات و دووپاتی دەکەینەوە، وەک چۆن هەمیشە خزمەتکاری رێبازی پیرۆزی یەکێتیی نیشتمانیی کوردستان بووین، لە سەرجەم بوارەکانیشدا بەردەوام دەبین و کۆڵنادەین، بە هاوکاری و پشتیوانیی ئێوەوە هەمیشە شاشەی کوردسات دەنگ و رەنگی کوردان و یەکێتییەکەمان دەبێت.
دووبارە پیرۆزباییتان لێ دەکەم، هەر شاد و سەرکەوتوو و سەرفرازبن.
دەزگای میدیایی کوردسات
دەقی ڕوونکردنەوەکەی پۆلیسی ھەولێر...
ڕوونکردنەوەیەک بۆ ڕای گشتیی
سەبارەت بەو گرتە ڤیدیۆیەی بڵاوکراوەتەوە لە بارەی ئەو پۆلیسەی لە ڕێورەسمی یادی لە دایکبوونی پێغەمبەری ئیسلام پێشەوای مرۆڤایەتی و فەخری کائینات حەزرەتی محەمەدولمستەفا (دروودی خوای لەسەر بێت) لە سەر قەڵای ھەولێر بە شێوەیەکی ناشایستە مامەڵە لەگەڵ گەنجێک دەکات و پەلاماری دەدات، بەپێویستی دەزانیین بۆ ھەموو لایەکی ڕوونبکەینەوە، لە کاتێکدا کە ژمارەیەکی زۆری ھاوڵاتییانی شاری ھەولێری پایتەخت بە چالاکی و شێوازی جیاواز لەو ڕۆژە پیرۆزەدا خۆشەویستی خۆیان بۆ پێغەمبەری ئیسلام دەردەبڕی لە نێو سەنتەری شار، لە ھەمانکاتدا کۆمەڵێک گەنج لە سەر قەڵاتی ھەولێر بە ئەنجامدانی چەند کردار و ڕەفتارێکی ناشایستە ھاوڵاتیانیان ناڕەحەت و بێزارکردبووە، بۆ کۆنتڕۆڵکردنی ئەو بارودوخە و ئیجرائات وەرگرتن لەگەڵ ئەو گەنجانە پۆلیس ڕەوانەی شوێنەکە کران، بەڵام بەداخەوە لەلایەن یەکێک لە پۆلیسەکان بەشێوازێکی ناشایستە پەلاماری یەکێک لە گەنجەکان درا، لە بەرامبەر ئەو ڕەفتارە نابەجێیە ئەفسەرێک و ئەو پۆلیسە لەلایەن بەڕێوەبەرایەتیەکەمانەوە دەستبەسەرکراون و لیژنەی لێکۆڵینەوەیان لە سەر پێکھێنراوە و بەپێی یاسا مامەڵەیان لەگەڵدا دەکرێت.
ھاوڵاتییان و ھاوشاریانی خۆشەویستی شارەکەمان دڵنیا دەکەینەوە ھیچ کەسێک لە سەرووی یاساوە نییە.
بەڕێوەبەرایەتی پۆلیسی پارێزگای ھەولێر
٢٠٢٣.٩.٢٨
سەرچاوە ئەمنییەکەی عێراق بە ماڵپەری عەرەبی جەدیدی قەتەری راگەیاندووە، لیژنە سەربازییەکەی ئێران سەردانی ئەو ناوچانەی ھەرێمی کوردستان دەکات کە پێشوتر بنکەی حزبەکانی رۆژھەڵاتی کوردستانی لێبووە و ھەڵسەنگاندن بۆ ئاستی پابەندبوونی ھەرێم و بەغداد بە رێککەوتنی ئەمنییان لەگەڵ ئێران دەکات.
ئاماژەی بەوەشکردوە، لیژنەکە لەگەڵ بەرپرسانی حکومەتی ھەرێم و حکومەتی عێراقیش کۆدەبێتەوە بەمەبەستی جێبەجێکردنی تەواوی خاڵەکانی رێککەوتنی ئەمنی ھاوبەش، بەتایبەت ئەوەی پەیوەندی ھەیە بە رادەستکردنی داواکراون لەلایەن دادگای ئێرانەوە.
پەیامنێری کوردسات نیوز لە ئیدارەی سۆران رایگەیاند، روداوەکە ئێوارەی ئەمڕۆ پێنجشەممە لەکاتی خاوێنکردنەوەی کۆگایەکی چەک لە سپیلک رویداوە و تیایدا گولە ھاوەنێک تەقییوەتەوە، کە بەھۆیەوە سێ پێشمەرگە برینداربوون.
ئاماژەی بەوەشکرد، دوای روداوەکە بریندارەکان رەوانەی نەخۆشخانەی خەلیفان کراون و دواتریش بۆ چارەسەری پێویست بۆ نەخۆشخانەکانی ھەولێر گوازراونەتەوە.
د.بڕیار رەشید، ئەندامی ئەنجومەنی نوێنەرانی عێراق لە فراکسیۆنی یەکێتی بە کوردسات نیوزی راگەیاند، ھەردوو بانکی رافیدەین و رەشید رەزامەندییان دەربڕیووە لە پارێزگای سلێمانی لق بکەنەوە و حکومەتی فیدراڵیش لەسەر ئەم بابەتە رەزامەندی دەربڕیووە، بەڵام حکومەتی ھەرێم رەتیکردووەتەوە لقی ئەو دوو بانکە لە پارێزگای سلێمانی بکرێنەوە.
ئەوەشی خستەڕوو، حکومەتی ھەرێم ھۆکاری رەتکردنەوەی لقی ئەو دوو بانکەی لە پارێزگای سلێمانی ئاشکرانەکردووە، بەڵام دیارە لایەنێک لەناو حکومەتی ھەرێم رێگرە لە کردنەوەی لقی ئەو دوو بانکە.
ئەو ئەندامەی ئەنجومەنی نوێنەران راشیگەیاند، فشار لەسەر حکومەتی ھەرێم ھەیە تاکو رەزامەندبێت لەسەر کردنەوەی لقی بانکەکانی رافیدەین و رەشید لە پارێزگای سلێمانی.
دادگای لێکۆڵینەوەی موسڵ راگەیەندراوێکی لەبارەی رووداوەکەی حەمدانیە بڵاوکردەوە و ئاماژەی بەوە کردووە، لە یەکەم ساتی دوای رووداوەکەوە دادوەری لێکۆڵینەوە سەردانی شوێنی رووداوەکەی کردووە و وتەی لە نۆ شایەتحاڵ وەرگرتووە و بەپێی ماددەی ٣٤٢/ ١ و ٢ و ٤ لە یاسای سزادانی عێراقیش فەرمانی دەستگیرکردنیان بۆ چەند کەسێک دەرکرد کە پێکھاتبوون لە خاوەنی ھۆڵەکە و سەرپەرشتیارەکەی، دواتر ئەو کەسانە لە ھەولێر خۆیان رادەستی ھێزە ئەمنییەکان کرد و رەوانەی موسڵ کراونەتەوە بۆئەوەی لە رووی یاساییەوە وتەیان لێوەربگیرێت.
راشیگەیاندووە، ھۆکاری سەرەکی ئاگرکەوتنەکە یارییە ئاگرینەکان و کەرەستەکانی ناو ھۆڵەکە بووە کە زۆربەیان پلاستیک بوون و بە زوویی ئاگریان گرتووە و دەرگای تایبەت بە حاڵەتی کتووپڕی ھۆڵەکەش زۆر بچووک و دوور بووە و ئەو کەسانەی لەناو ھۆڵەکە بوون نەیانتوانیوە پێی بگەن.