عێراق
سەرۆکی حزبی سیادە داوایکرد ھیچ دانیشتنێکی ئەنجومەنی نوێنەران بۆ ھەڵبژاردنی سەرۆکی ئەنجومەنەکە ئەنجام نەدرێت تا ئەوکاتەی لایەنە سوننەکان رێکدەکەون.
خەمیس خەنجەر سەرۆکی حزبی سیادە لە راگەیەنراوێکدا ئاماژەی بەوەکردووە، لەسەر بنەمای پەیوەندی و لێکتێگەیشتنی نێوان کوتلە سیاسیەکانی عەرەبی سوننی کە لە دوو رۆژی رابردودا ئەنجامدراوە حزبی سیادە ھەڵدەستێت بە بانگھێشتکردنی سەرجەم لایەنە سونیەکان لە بەغداد.
دەشڵێت، ئامانج لەو بانگھێشتە تاوتوێکردنی دۆخی سوننەکان و رێککەوتنە لەسەر دانانی کەسێک بۆ پۆستی سەرۆکی ئەنجومەنی نوێنەران.
داواش دەکات، کۆبونەوەی ئەنجومەنی نوێنەران بۆ دیاریکردنی سەرۆکێک ئەنجام نەدرێت تا ئەوکاتەی سەرجەم سوننەکان رێکدەکەون.
وەزارەتی دەرەوەی پاکستان ھۆشداری دەداتە ھاوڵاتیانی وڵاتەکەی سەبارەت بە گەشتکردنیان بۆ عیراق و دەڵێت، لەمکاتەدا مەترسیدارە.
وەزارەتەکە لە بەیاننامەیەکدا داوای لە ھاوڵاتیانی وڵاتەکەی کردووە خۆیان لە گەشتە ناپێویستەکان بۆ عیراق بەدوور بگرن بەھۆی پەرەسەندنی گرژییەکانی ناوچەکەوە.
وتەبێژی وەزارەتی دەرەوەی پاکستان دەڵێت، بە لەبەرچاوگرتنی پێشھاتەکانی ئەم دواییەی ناوچەکە، ئامۆژگاری ھاووڵاتیانی پاکستان دەکرێت خۆیان لە گەشتکردن بۆ عیراق بەدوور بگرن تا بارودۆخەکان ئاسایی دەبنەوە و کارەکانی ھێڵی ئاسمانی بە تەواوی دەستپێدەکاتەوە.
ئاماژەی بەوەشکردووە، بۆ ھاوکاریکردنی ھاووڵاتیانی پاکستان، وەزارەتی دەرەوە باڵیۆزخانەی پاکستانی لە بەغداد راسپاردووە رێنمایی و پاڵپشتی بۆ ھاووڵاتییەکانیان دابینبکات.
سەرۆکی ھاوپەیمانی عەزم رایگەیاند، بەشداری لە ھیچ دانیشتنێکی ئەنجومەنی نوێنەران ناکەن تاوەکو ھەڵبژاردنی سەرۆکی ئەنجومەنەکە نەکرێتە بەرنامەی کاری دانیشتنەکانەوە.
موسەنا سەمەڕائی بە میدیاکانی راگەیاندووە، ناکۆکییە ناوخۆییەکانی نێوان لایەنە سیاسییەکان ئاستەنگ لە پرسە سەرەکییە نیشتمانییەکان دروستدەکەن، ئەمەش پێویستی بەوە ھەیە کە بە بڕیارێکی یەکگرتوانە چارەسەربکرێن کە خەڵک و گەلەکەشی پشتیوانی لێبکەن.
وتیشی، پێویستە سەرۆکی نوێی ئەنجومەنی نوێنەران ھەڵبژێردرێت، چونکە ئێستا ئەنجومەنەکە پێویستی بە یاسای تۆکمە ھەیە بۆ چارەسەرکردنی ھەڵەکانی پێشوو و جێبەجێکردنی خواستەکانی خەڵک، بۆیە تا ئەو پرسە نەخرێتە بەرنامەی کارەوە بەشداری دانیشتنەکانی ئەنجومەنەکە ناکەن.
بەپێی پێشبینییەکانی کەشناسی عیراق، لەسەرەتای مانگی داھاتووەوە شەپۆلێکی بارانبارین عیراق و ھەرێمی کوردستان دەگرێتەوە و ماوەی چەند رۆژێک بەردەوامدەبێت.
بەڕێوەبەرایەتی کەشناسی عیراق لە راگەیەنراوێکدا ئاماژەی بەوەکردووە، پێشبینیدەکرا لەماوەی چەند رۆژی رابردوودا باران چەند ناوچەیەک بگرێتەوە، بەڵام بەھۆی ھەڵکردنی رەشەباوە ئەگەری بارانبارینی کەمکردەوە.
دەشڵێت، بەپێی پێشبینییەکان لەسەرەتای مانگی داھاتووەوە شەپۆلی بارانبارین سەرجەم شارەکانی عیراق و ھەرێمی کوردستان دەگرێتەوە و چەند رۆژێک بەردەوامدەبێت.
پێشتریش ھەژار سدیق شارەزایی کەشناسی لە لێدوانێکدا بۆ کوردسات نیوزی رایگەیاندبوو، پێشبینیدەکرێت لە کۆتایی ئەم مانگە و سەرەتای مانگی مانگی داھاتوو، شەپۆلێکی بارانبارین سەرتاسەری ھەرێمی کوردستان بگرێتەوە.
رۆژی یەکشەممەی داھاتوو ئەنجومەنی نوێنەرانی عیراق دەنگ لەسەر پڕۆژەیاسای ھەڵوەشاندنەوەی بڕیاری رژێمی بەعس بۆ گەڕاندنەوەی خاوەندارێتی زەوی و موڵک بۆ خاوەنەکانیان لەسنوری کەرکوک دەدات.
ئەنجومەنی نوێنەرانی عیراق خشتەی دانیشتنی رۆژی یەکشەممەی بڵاوکردەوە، بەگوێرەی خشتەکە لە دانیشتنەکەدا چەند پڕۆژەیاسایەک دەخرێنە دەنگدانەوە.
لە بڕگەی یەکەمی دانیشتنەکەدا، ئەنجومەنی نوێنەران دەنگدەدات لەسەر پڕۆژەیاسای گەڕانەوەی خاوەندارێتی زەوی و موڵک بۆ خاوەنەکانیان و ھەڵوەشاندنەوەی بڕیارەکانی رژێمی بەعس کە لەنێوان ساڵانی ١٩٧٥ بۆ ١٩٧٩ دەری کردبوون و بەھۆیەوە بەشێکی زۆر لە زەوییەکانی جوتیارانی کورد و تورکمان لەسنووری کەرکووک و ناوچە کوردستانییەکانی دەرەوەی ئیدارەی ھەرێم لەلایەن عەرەبە ھاوردەکانەوە دەستیبەسەردا گیراوە.
لە بڕگەی دووەمی دانیشتنەکەدا، ئەنجومەنی نوێنەران ھەمواری یاسای باری کەسێتی ساڵی ١٩٥٩ دەخاتە دەنگدانەوە کە لە ماوەی رابردوودا لەنێوان لایەنە سیاسییەکان مشتومڕێکی زۆری لەسەر بوو، ھەروەھا دەنگدەدات لەسەر پڕۆژە یاسای لێبوردنی گشتی بۆ بەندکراوانی سونە.
بە پاڵپشتی و چاودێری د.لەتیف رەشید سەرۆكکۆمار ، کتێبخانەی یەکێتیی گشتیی ئەدیبان و نوسەران لە عێراق بەناوی ئەدیب و شاعیری کۆچکردو ئەلفرێد سەمعان کرایەوە .
لە مەراسیمی کردنەوەی کتێبخانەکەدا لە بارەگای یەکێتیی ئەدیبان و نوسەران، سەرۆك کۆمار چاوی بە ئەدیب و نوسەرانی عەرەب کەوت، لە کۆشکی بەغدادیش بە ئامادەبونی ژمارەیەك لە نوسەرانی عێراقی، پێشوازی لێکردن.
سەرۆكکۆمار بەخێرهاتنی لە ئەدیبان و نوسەرانی عەرەب کرد و جەختیکردەوە کە عێراق و عێراقییەکان رێز و پێزانینیان بۆ نوسەرانی وڵاتانی عەرەبی هەیە، ئاماژەیکرد بۆ بایەخی کاراکردنی پەیوەندی نێوان رۆشنبیران، بەشێوەیەك کە رۆڵی رۆشنبیران لە گەشەسەندنی کۆمەڵایەتی و کولتوریدا پەرەپێبدات.
ئاماژەیکرد بە پێویستی چالاککردنی میکانیزمی هاوئاهەنگی و هاریکاری لەگەڵ کتێبخانە و زانکۆ رەسەنە نێودەوڵەتییەکان و فراوانکردنی ئاسۆی هاریکاری لەگەڵیان بۆ ئاڵوگۆڕی شارەزایی زانستی.
هەروەها سەرۆكکۆمار باسی لە پێشهاتەکانی ناوچەکە کرد، بە تایبەتی بە ئامانجگرتنی بەردەوامی کەسانی بێ تاوان لە فەڵەستین و لوبنان. جەختیشیکردەوە لەسەر پاڵپشتی و پشتیوانیی عێراق بۆ براکانی لە بەیروت و غەزە. هەروەها ئاماژەی بەوەشکرد، کە ئەو بارودۆخە و جەنگەکان، کاریگەری نێگەتیڤ دەکەنەسەر رەوتی رۆشنبیری و ئەدەبی.
سەرەتای رێوڕەسمەکە بە لێدانی سرودی نیشتمانی دەستیپێکرد، دواتر سەرۆكکۆمار وتەیەکی پێشکەشکرد و ئاماژەی بەوەدا، ئێمە گەلێکین هەر لە سەرەتاوە بایەخمان بۆ کتێب و کتێبخانە، بایەخێکی گرنگ بوە لە قۆناغە جۆراوجۆرەکانی شارستانیەت، کە وڵاتەکەمان بە درێژایی مێژوو پێیدا تێپەڕیوە.
دوای راگەیەندراوەكەی هێزە سوننەكان، چوارچێوەی هەماهەنگی شیعەكان رایدەگەیەنێت، ئەنجومەنی نوێنەرانی عیراق لە دانیشتنی داهاتوویدا سەرۆكی ئەنجومەنەكە هەڵدەبژێرێت.
عەلی بەنداوی ئەندامی چوارچێوەی هەماهەنگی رایگەیاند، زۆرینەی پەرلەمانتارانی چوارچێوە و كوتلە سیاسییەكانی دیكە سورن لەسەر یەكلاكردنەوەی پرسی سەرۆكی ئەنجومەنی نوێنەران، دەشڵێن رەوشەكە بە ئاڕاستەیەكی دروستدا دەڕوات بۆ یەكلاكردنەوەی ئەو بابەتە.
وتیشی، رێككەوتن هەیە لەسەر ئاستی هێزە سیاسییەكان تاوەكو كەسێكی نیشتمانی هەڵبژێرن، هیچ ئاستەنگێكی گەورەش لەبەردەم ئەو پرسەدا نەماوە، جەختیشی كردەوە لەوەی لە دانیشتنی داهاتوودا سەرۆكی ئەنجومەنی نوێنەران دەستنیشان دەكرێت.
ئەو لێدوانەی ئەندامەكەی چوارچێوە دوای ئەوە دێت پێشتر، شەش هێزی سوننی رێككەوتن لەسەر دوو رێگە بۆ پڕكردنەوەی ئەو پۆستە، یەكەمیان پشتیوانیكردنی مەحمود مەشهەدانیە و رێگەی دووەمیش پێشكەشكردنی كاندیدێكی نوێیە.
نوێنەری تایبەتی سكرتێری گشتی نەتەوە یەكگرتووەكان رایگەیاند، عیراق پێگەی سەرەكی خۆی لە ناوچەكە هەیە و پشتیوانی لە هەڵوێستەكانی لە جەنگی غەززە دەكات.
محەمەد حەسەن نوێنەری تایبەتی سكرتێری گشتی نەتەوە یەكگرتووەكان لە عیراق، رایگەیاند، عیراق وڵاتێكی سەرەكییە لە ناوچەكەدا و پێگەی ناوچەیی و نێودەوڵەتیی خۆی وەرگرتوەتەوە، وتیشی ستایشی پێگەی حكومەت دەكەن بۆ هەوڵەكانی بۆ دامەزراندنی سەقامگیری و باشتركردنی ژێرخانی ئابوری وڵاتەكەی.
راشیگەیاند، عیراق و نەتەوە یەكگرتووەكان پەیوەندیەكی مێژوی و قوڵیان هەیە، بەو پێیەی عیراق یەكێكە لە وڵاتانی ئەندامی دامەزرێنەری رێكخراوی نێودەوڵەتی نەتەوە یەكگرتوەكان، ئاماژەی بەوەشكرد، نەتەوە یەكگرتووەكان پارێزەری عیراق نییە، بەڵام پشتیوانی لە هەوڵویستی عیراق دەكات بۆ داواكردنی ئاگربەست لە غەززە.
د.لەتیف رەشید سەرۆک کۆماری عیراق لە کۆشکی بەغداد پێشوازی لە یان سانیدۆڤ باڵیۆزی چیک لە عێراق کرد و رایگەیاند، عێراق بەڕووی کۆمەڵگەی نێودەوڵەتیدا کراوەیە و بەردەوام لە ھەوڵدایە بۆ بەرزکردنەوەی ئاستی پەیوەندییە دیپلۆماسییەکانی لەگەڵ ھەموولایەک لەسەر بنەمای رێزگرتن و بەرژەوەندی ھاوبەش
لە دیدارەکەدا، چۆنیەتی بەرەوپێشبردنی پەیوەندییە دوو قۆڵییەکان و ئامادەکارییە بەردەوامەکان بۆ سەردانی داھاتووی سەرۆک کۆماری چیک بۆ بەغداد تاووتوێکران و سەرۆک کۆمار تەئکیدیکردەوە، کە عێراق پێشوازی لەو سەردانە دەکات بۆ پەرەپێدانی پەیوەندییە دووقۆڵییەکان و فراوانکردنی چوارچێوەی ھاریکاریی لە چەندین بواردا، بەشێوەیەک کە خزمەت بە بەرژەوەندییە ھاوبەشەکان بکات و پاڵپشتی ئابوریی ھەردوو وڵاتی دۆستبکات.
سەرۆک کۆمار روونیکردەوە، عێراق بەڕووی کۆمەڵگەی نێودەوڵەتیدا کراوەیە و بەردەوام لە ھەوڵدایە بۆ بەرزکردنەوەی ئاستی پەیوەندییە دیپلۆماسییەکانی لەگەڵ ھەموولایەک لەسەر بنەمای رێزگرتن و بەرژەوەندی ھاوبەش.
ھەروەھا تەئکیدیکردەوە، کە سەقامگیریی ئەمنی و سیاسی و ئابوریی لە عێراقدا، زەمینەیەکی لەباری بۆ وەبەرھێنانی جۆراوجۆر رەخساندوە بەتایبەتی لەبوارەکانی ئاوەدانکردنەوە و تەندروستی و گەشتیاری و تەکنەلۆژیا و پەرەپێدانی ژێرخانی ئابوری و خزمەتگوزارییەکان.
لای خۆیەوە باڵیۆز سانیدۆڤ پەرۆشی وڵاتەکەی بۆ بەھێزکردنی بنەماکانی دۆستایەتی و ھاریکاری لەگەڵ عێراق دوپاتکردەوە و ھیوای خواست سەردانی سەرۆک کۆماری وڵاتەکەی بۆ عیراق بەرھەمداربێت و یارمەتیدەربێت بۆ پتەوکردنی پەیوەندییە دووقۆڵییەکانی نێوان ھەردوو وڵات.
دادگای فیدراڵی عیراق سكاڵایەكی سەبارەت بە كەمكردنەوەی نرخی بەرمیلێك نەوت لە ١٠٤ هەزار دینارەوە بۆ ٣٠ هەزار دینار رەتكردەوە كە لە هەرێم بەسەر هاووڵاتیاندا دابەشدەكرێت.
ئەمڕۆ دادگای فیدراڵی لەسەر سكاڵایەكی تایبەت بە هەرێمی كوردستان كۆبووەوە، كە لەلایەن ١٠٢ هاووڵاتی هەرێمەوە تۆماركرابووو تیایدا داواكرابوو رێوشوێنەكانی وەزارەتی نەوتی فیدراڵ و سەرۆك وەزیرانی عیراق لەبارەی دیاریكردنی نرخی نەوتی سپی بۆ پارێزگاكانی هەرێم بە ٥٠٠ دینار بۆ هەر لیترێك بە نادروست لەقەڵەم بدرێت. هەروەها وەزارەتی نەوتی فیدراڵ لە دابینكردنی نەوتی سپی جیاوازی نەكات لەنێوان پارێزگاكانی عیراق و هەرێمی كوردستان و نەوتی سپی بە ١٥٠ دینار بۆ هەر لیترێك، بۆ پارێزگاكانی هەرێم دابینبكرێت كە دەكاتە ٣٠ هەزار دینار بۆ هەر بەرمیلێك.
بەڵام دادگای فیدراڵی رایگەیاند، هیچ نادروستییەك لە بڕیاری سەرۆك وەزیرانی عیراقدا نییە و ئەو دۆسییەیەش لە تایبەتمەندی دادگاكە نییە.
سەرۆكایەتی كۆمار داوای رێزگرتن لە ئەنجامی هەڵبژاردنی پەرلەمانی كوردستان دەكات و داواش لە لایەنە سیاسییەكان دەكات بۆ پێكهێنانی حكومەتی نوێ كۆببنەوە.
سەرۆكایەتی كۆمار لە راگەیەندراوێكدا ئاماژەی بەوەكردووە، بەبۆنەی سەركەوتنی هەڵبژاردن پیرۆزبایی لە گەلەكەیان لە هەرێمی كوردستان و تەواوی حزب و لایەنە سیاسییەكان دەكات كە بەشدارییان لەو پڕۆسە دیموكراسییە گرنگەدا كردووە و ئەو پیشەییبوون و دەستپاكییە بەرزەی كە كۆمیسیۆنی هەڵبژاردنەكان لە بەڕێوەبردنی پڕۆسەی هەڵبژاردنەكاندا نیشانیداوە بەرزدەنرخێنێت.
داواش لە سەرجەم لایەنەكان دەكات لەسەر مێزی گفتوگۆ كۆببنەوە بە ئامانجی پێكهێنانی حكومەتی نوێ لەسەر ئەو بنەمایەی كە خزمەتكردنی "گەل" لە پێش هەموو كارەكانیەوە بێت و كاربكات بۆ پتەوكردنی پڕۆسەی بونیادنان و ئاوەدانكردنەوە و بوژانەوەی ئابوری و بەدیهێنانی گەشەپێدانی بەردەوام .
هەروەها ئاماژە بۆ ئەوەشكراوە، هەڵبژاردن جگە لەوەی مافێكی دەستورییە، هاوكات پایەیەكی بنەڕەتی سیستمی دیموكراسی و جێگای شانازییە بۆ هەموو عیراقییەكان، لەم ڕوانگەیەشەوە سەرۆكایەتی كۆمار داوای ڕێزگرتن لە ئەنجامی هەڵبژاردن و ئیرادەی گەل دەكات و پشتیوانی خۆشی بۆ تەواوكردنی ڕێرەوی دەستوری و دیموكراسی لە هەرێم دووپاتدەكاتەوە بەشێوەیەك كە یەكریزی نیشتمانی پتەوتربكات و خواستەكانی گەل بۆ گەشەپێدان و خۆشگوزەرانی و پێشكەوتن بەدەستبهێنێت.
فڕۆكەی جەنگییەكانی عیراق چەند بۆردوومانێكی بۆ سەر مۆڵگەكانی تیرۆریستانی داعش لە جەبەل بۆر لە پارێزگای كەركوك ئەنجامدا.
سەرچاوەیەكی ئەمنی بڵاویكردەوە، بۆردوومانەكە درەنگانێكی شەوی سێشەممە لەسەر چوارشەممە بووە و ئامانجەكانی بە وردی پێكاوە، هەروەها لەناوبردنی حەشارگەی ئەو تیرۆریستانە لێكەوتووەتەوە، كە هاوكار دەبێت لە كەمكردنەوەی هەڕەشە ئەمنییەكان لە ناوچەكە.
ئەو بۆردوومانە دوای ئەوەدێت كە دوێنێ محەمەد شیاع سودانی سەرۆك وەزیرانی عیراق كوژرانی والی داعش و هەشت گەورە تیرۆریستی دیكەی لە چیای حەمرین راگەیاند، جەختیشیكردەوە لەوەی هیچ شوێنێك بۆ تیرۆریستان لە عیراق نییە.
لیژنەی دارایی ئەنجومەنی نوێنەرانی عیراق رایگەیاند، چاوەڕواندەکرێت سەرەتای ساڵی داھاتوو خشتەی بودجەی ساڵی ٢٠٢٥ بگاتە ئەنجومەنی نوێنەران.
مستەفا کەرعاوی، ئەندامی لیژنەی دارایی ئەنجومەنی نوێنەرانی عیراق رایگەیاند، رێککارە یاساییەکانی ئەنجومەنی وەزیران لەسەر خشتەی بودجەی ٢٠٢٥ تەواوبووە و چاوەڕواندەکرێت سەرەتای ساڵی داھاتوو خشتەی بودجەکە بگاتە ئەنجومەنی نوێنەران و خوێندنەوەی بۆ بکرێت.
ئەوەشی خستەڕوو، لە خشتەی بوودجەی ٢٠٢٤ـدا، جەختکراوەتەوە لەوەی ئەنجومەنی نوێنەران لە خشتە داراییەکانی ناو بودجە پێش کۆتایی ئەمساڵ ئاگاداربکرێتەوە.
ئەو پەرلەمانتارە وتیشی، لە خشتەی بودجەدا، داھاتی نانەوتی بە بڕی ٢٧ ترلیۆن دینار خەمڵێندراوە، بەڵام لەمساڵدا تائێستا داھاتی نانەوتی ھەشت ترلیۆن دیناری تێنەپەڕاندووە و لیژنەی داراییش، داوای لە لایەنە پەیوەندیدارەکان کردووە، کاربکرێت بۆ زیادکردنی داھاتی نانەوتی لە وڵاتدا.
بڕیارە سبەینێ دادگای فیدراڵی لەسەر سکاڵایەکی تایبەت بە ھەرێمی کوردستان کۆببێتەوە، لە سکاڵاکەدا داواکراوە نرخی بەرمیلێک نەوت کە لە ھەرێم بەسەر ھاووڵاتیاندا دابەشدەکرێت لە ١٠٤ ھەزار دینارەوە بۆ ٣٠ ھەزار دینار کەمبکرێتەوە.
بەپێی خشتەی کۆبوونەوەکانی، بڕیارە سبەینێ دادگای فیدراڵی لەسەر سکاڵایەکی تایبەت بە ھەرێمی کوردستان کۆببێتەوە، کە لەلایەن ١٠٢ ھاووڵاتی ھەرێمەوە تۆمارکراوە و تێیدا داواکراوە، رێوشوێنەکانی وەزارەتی نەوتی فیدراڵ و سەرۆک وەزیرانی عیراق لەبارەی دیاریکردنی نرخی نەوتی سپی بۆ پارێزگاکانی ھەرێم بە ٥٠٠ دینار بۆ ھەر لیترێک بە نادروست لەقەڵەمبدرێت.
ھەروەھا لە سکاڵاکەدا داواکراوە، وەزارەتی نەوتی فیدراڵ لە دابینکردنی نەوتی سپی جیاوازی ناکات لەنێوان پارێزگاکانی عیراق و ھەرێمی کوردستان و نەوتی سپی بە ١٥٠ دینار بۆ ھەر لیترێک، بۆ پارێزگاکانی ھەرێم دابینبکرێت کە دەکاتە ٣٠ ھەزار دینار بۆ ھەربەرمیلێک.
ئەوەش لەکاتێکدایە، وەزارەتی سامانە سروشتییەکانی ھەرێم نرخی بەرمیلێک نەوت بە ١٠٤ ھەزار دینار بەسەر ھاووڵاتییاندا دابەشدەکات.
د.لەتیف رەشید، سەرککۆماری عیراق پێشوازیکرد لە یاسر مالیکی سەرۆکی فراکسیۆنی دەوڵەتی یاسا لە ئەنجومەنی نوێنەران.
لە میانی دیدارەکەدا، سەرۆكکۆمار جەختیکردەوە لە پێویستی یەکخستنی هەوڵەکان بۆ یەکلاییکردنەوەی هەڵبژاردنی سەرۆکی ئەنجومەنی نوێنەران لەپێناو بەهێزکردنی رۆڵی یاسادانان و چاودێریکردن، هەروەها پەسندکردنی یاساکان کە کارئاسانی دەکەن بۆ حکومەت لە چەسپاندنی ئاسایش و سەقامگیری و هەوڵەکانی بە ئاراستەی باشترکردنی خزمەتگوزارییەکان.
لای خۆیەوه سەرۆکی فراکسیۆنی دەوڵەتی یاسا لە ئەنجومەنی نوێنەران جەختیکردەوە له گرنگی کارکردن بۆ پاڵپشتیکردنی ئەو پڕۆژە یاسایانەی دەبنەهۆی باشترکردنی دۆخی ئابووری و خزمەتگوزارییەکان بە ئامانجی پەرەپێدانی ئاستی ژێرخانی ئابوری و دەستەبەرکردنی باشترین خزمەتگوزاری بۆ هاووڵاتیان و کۆمەڵگە.
مقاوەمەی ئیسلامی لە عیراق رایگەیاند، ئەمڕۆ بە فڕۆكەی بێفڕۆكەوان دووجار هێرشیانكردووەتە سەر دوو ئامانج لە ئیسرائیل.
مقاوەمەی ئیسلامی لە عیراق لە راگەیەنراوێكدا ئاماژەی بەوەكردووە، ئەمڕۆ بە درۆن هێرشیانكردووەتە سەر شاری تەبریا و پێگەیەكی سەربازی دیكە لە ئیسرائیل. دەشڵێت، ئەو هێرشە وەڵامێكە لە دژی بۆردومانكردنی خەڵكی فەڵەستین و لوبنان.
ئاماژەی بەوەشكردووە، لەكاتی بەردەوامبوونی هێرشەكانی ئیسرائیل بۆ سەر غەززە و لوبنان ئەوانیش لە هێرشكردنە سەر ئیسرائیل بەردەوامدەبن، تائێستاش ئیسرائیل هیچ زانیاریەكی لەبارەی ئەو هێرشانە بڵاونەكردوەتەوە.