بە پێی ڕاگەیەندراوێکی وەزارەتی دەرەوەی عێراق، لە کۆبوونەوەیەکی نێوان وەزیرانی دەرەوەی عێراق و تورکیا کە لە بولگاردی پایتەختی سربیا بەڕێوەچووە، عێراق داوایکردووە تورکیا کۆت و بەندەکانی پێدانی ڤیزا لەسەر عێراقییەکان کەمبکاتەوە بە تایبەت دوای ئەوەی لە ماوەی ڕابردوودا تورکیا کۆت و بەندەکانی زیاد کرد و کارکردنی بە لێکتێگەیشتنی نێوان ھەردوو وڵات بۆ پێدانی ڤیزا ھەڵپەسارد.

داواشکراوە تورکیا ڕێکارەکانی پێدانی ڤیزا خێراتر بکات بۆ ئەو عێراقییانەی خواستی ئەوەیان ھەیە سەردانی تورکیا بکەن.

ڕوبا فەلاح ئەندامی تیمی ڕاگەیاندنی تەندروستی، لە وەزارەتی تەندروستیی عێراق ڕایگەیاند، دوور نیە لە کۆتایی ئەمساڵ یان سەرەتای ساڵی داھاتوو، شەپۆلی چوارەمی ڤایرۆسی کۆرۆنا لە عێراق بڵاوببێتەوە، ئەوەش بەھۆی بەربڵاوی ڤایرۆسەکە لە جیھان و بوونی چەندین جۆری گۆڕاوی کۆرۆنا.

وتیشی، ٢١٪ی کەسانی پێگەشتوو و سەروو ١٨ ساڵ لە عێراق، ڤاکسینی کۆرۆنایان وەرگرتووە و ئامانجیان ئەوەیە تاکۆتایی ئەمساڵ ڕێژەکە بگەیەننە ٢٠ ملیۆن کەس، کە تا ئێستا زیاتر لە ٥ ملیۆن و ٢٩ ھەزار کەس لە سەرتاسەری عێراق و ھەرێمی کوردستان، ڤاکسینی کۆرۆنایان وەرگرتووە.

كۆمسیۆنی باڵای سەربەخۆی هەڵبژاردنەكانی عێراق رایگەیاند، بەپێی ئەنجامی 94%ی وێستگەكانی هەڵبژاردن، ئاستی بەشداری لە تەواوی عێراق گەیشتۆتە 41% و 9 ملیۆن و 77 هەزار و 779 كەس دەنگیانداوە و لەدەنگدانی تایبەت 16 سكاڵا و لە دەنگدانی گشتیش 58 سكاڵا تۆماركراوە. 

بەپێی ئەو ئامارە لەسەر ئاستی پارێزگاگانی هەرێم، رێژەی بەشداریكردن لە هەڵبژاردن لە سلێمانی 37% و هەولێر 46% و لە دهۆكیش 54% بووە، لە پارێزگاكانی عێراقیش، لە "بەغداد" بە هەردوو بەری رەسافە و كەرخ 65% و لە كەركوك 44% و لە بەسرە 40%  و لە سەڵاحەدین 48% و نەینەوا 42% و دیالە 46% و لە ئەنباریش 43% بووە، لە پارێزگاكانی تری عێراقیش رێژەی دەنگدان لەنێوان 41% بۆ 44%دا بووە.

كۆمسیۆن راشیگەیاندووە، دوای ئەنجامدانی جیاكردنەوەی دەنگەكانی چەند وێستگەیەك بە دەستی و ئەلیكترۆنی، دەنگەكان 100% هاوتا بوون. 

"ئیبراھیم جابری" بەڕێوەبەری نوسینگەی موقەدا سەدر رایگەیاندوە، بەپێی ئەنجامە بەراییەکانی ھەڵبژاردن، رەوتی سەدر سەرکەوتنی گەورەی بەدەستھێناوە و ئەمجارەش لەسەر ئاستی عێراق دەبێتەوە بە یەکەم و گەورەترین کوتلەی پەرلەمانیی دروست دەکات، پێشبینیشی کردوە ببنە خاوەنی ٨٠ کورسیی ئەنجومەنی نوێنەران. 
شەوی رابردوو لە دوای کۆتاییھاتنی پرۆسەی ھەڵبژاردن، کۆمسیۆنی باڵای ھەڵبژاردنەکان رایگەیاند، لە ماوەی ٢٤ سەعاتدا ئەنجامی رەسمی رادەگەیەنن.

کۆمسیۆنی باڵای سەربەخۆی ھەڵبژاردنەکانی عێراق رایدەگەیەنێت، ١١٩ سکاڵا لە دەنگدانی تایبەت و گشتییدا تۆمارکراوە و لە ١٠ رۆژدا ئەنجامی سکاڵاکان یەکلایی دەکرێنەوە، سەرۆکی لیژنەی ئەمنی ھەڵبژاردنەکانیش دەڵێت، ٢٠٠ سەرپێچیکاریان لە رۆژی ھەڵبژاردندا دەستگیر کراون.

جەلیل عەدنان سەرۆکی ئەنجومەنی کۆمسیارانی عێراق، لە کۆنفرانسێکی رۆژنامەواندا رایگەیاند، لە دەنگدانی تایبەت ٢٥ سکاڵا و لەدەنگدانی گشتی ٩٤ سکاڵا تۆمارکراون و ماوەی سێ رۆژ لەبەردەم لایەنە سیاسیەکاندایە بۆ تانەدان لە ئەنجامەکانی ھەڵبژاردن، وتیشی، ئەنجامی ژماردنەوەی دەستی و ئەلکترۆنی دەنگەکان، ١٠٠% ھاوتا بووە.

ھاوکات عەبدولئەمیر شەمەری سەرۆکی لیژنەی ئەمنی ھەڵبژاردنەکان رایگەیاند، پلانی ئەمنی پاراستنی پڕۆسەی ھەڵبژاردن سەرکەوتوو بووە و ٢٠٠ سەرپێچیکاریان دەستگیرکردووە.

دوای دەرکەوتنی ئەنجامی بەرایی ھەڵبژاردنی پێشوەختی عێراق و بەدەستھێنانی ٧٣ کورسی لەلایەن رەوتی سەدرەوە، موقتەدا سەدر رێبەری رەوتی سەدر، رایگەیاند، گەلی عێراق و چاکسازی بەسەر داگیرکاری و گەندەڵیدا سەرکەوتن و لە ئەمڕۆوە ھیچ شوێنێک بۆ گەندەڵی و گەندەڵکاران نامێنێت، وتیشی، چاوەڕێی شۆڕشی چاکسازی دەکات و رێگەش بە بوونی میلیشیا و چەک لە دەرەوەی دەسەڵاتی دەوڵەت نادەن. 

جەلیل عەدنان سەرۆکی کۆمیسیۆنی باڵای ھەڵبژاردنەکانی عێراق لە کۆنفرانسێکی رۆژنامەوانیدا رایگەیاند، دەنگی ھاوڵاتیانی عێراق ئەمانەتێکی گەورەیە و پاراستومانە و زانیارییەکان لە رای گشتی و راگەیاندنەکان ناشارینەوە.

وتیشی، ھیوادارین راگەیاندنی ئەنجامەکان جێی رەزامەندی شەقامی عێراقی بێت.

ئاماژەی بەوەشکرد، لە ھەموو ناوەندەکان نوێنەری لایەنەکان و سندوقی سکاڵا ھەبووە و لێکۆڵینەوە لە تەواوی سکاڵاکان دەکەین.

ئاشکراشیکرد، ئەنجامی بەشداریکردنی دەنگدان لە چەند سەعاتی داھاتوودا رادەگەیەنرێت و نەتەوە یەکگرتووەکان بە راپۆرتێک ھەڵسەنگاندن بۆ ھەڵبژاردنەکە دەکات.

کۆمسیۆنی باڵای سەربەخۆی ھەڵبژاردنەکانی عێراق ھەموو ئامادەکارییەکی بۆ ئەنجامدانی ھەڵبژاردنی پێشوەخت تەواوکردوە، رۆژی یەک شەممە پرۆسەکە بەڕێوەدەچێت و سەعات ٧ی بەیانی بنکەکانی دەنگدان بە رەووی دەنگدەراندا دەکرێنەوە، بەپێی بڕیارەکانی کۆمسیۆنیش سەعات ٦ی ئێوارە سندوقەکانی دەنگدان دادەخرێن.

(جومان غەلای) وتەبێژی کۆمسیۆنی باڵا رایگەیاند: لە پرۆسەی ھەژمارکردنەوەی دەنگەکان بە دەست لە (سەدا سەد) ھاوتابووە لەگەڵ ھەژمارکردنەوەی دەنگی ئەلکترۆنی.
لەلایەکیتریشەوە لە شەوی رابردووە ھێزێکی زۆر لە ناوچەی سەوز بڵاوە پێکراون بۆ رێگری کردن لە ھەرگردبوونەوەی جەماوەری دوای راگەیاندنی ئەنجامی سەرەتایی ھەڵبژاردنەکان، بەپێی زانیاری بەشێک لە میدیا عێراقییەکانیش، لە دەنگدانی تایبەت دەوڵەتی یاسا و رەوتی سەدڕی لە پارێزگاکانی باشور و ناوەراست زۆرینەی دەنگەکانیان بەدەستھێناوە.