کوردستان
ریاز دەڕاڕ ھاوسەرۆکی مەسەدە وتی، بەردەوامی رکابەرییەکانی وڵاتە زلھێزەکان بۆ بەدیھێنانی بەرژەوەندییەکانیان بەربەستن لە بەردەم دیارکردنی ئایندەی سوریا و درێژە بە ململانێکان دەدات.
وتیشی، رەتکردنەوەی ھەنگاوەکانی تایبەت بە چارەسەری ئاڵۆزییەکانی سوریا لە لایەن وڵاتە خاوەن ھەژموونەکانەوە لە سوریا، دەرگای شەڕ و قەیرانەکان بە کراوەیی دەھێڵێتەوە.
دەڕاڕ ئاماژەی بەوەشکرد، یەکڕیزی ھێزەکانی ئۆپوزسیونی سوریا تاکە چارەسەرە بۆ بەدیھێنانی خواستەکانی گەلی سوریا.
ئاشکراشیکرد، مەسەدە بۆ ئەو ئامانجە ھەوڵدەدات کۆنگرەیەک بۆ ھێز و کەسایەتییە دیموکراتخوازەکان رێکبخات.
بە میوانداری بافڵ تاڵەبانی ھاوسەرۆکی یەکێتیی نیشتمانیی کوردستان، وەفدێکی یەکێتیی نیشتمانیی کوردستان و بزوتنەوەی گۆڕان لە دەباشان بۆ تاوتوێکردنی چەند پرسێکی تایبەت بەکاروباری حکومەتی ھەرێم و حکومەتی خۆجێیی سلێمانی کۆبونەوە، ھەردوولا ھاوڕابون کێشەکانی ئێستای ھەرێم و ژیان و گوزەرانی ھاوڵاتیان پێویستی بە ھەماھەنگی زیاتری ھەردوولا ھەیە و پێویستە ھەنگاوی جدی و کرداری بنرێ بۆ چارەسەرکردنی گرفتەکان.
لە کۆبوونەوەکەدا باس لەدوا پێشھات و گۆڕانکارییەکانی عێراق کرا و لەسەر بنەمای رەوشی ھەنوکەیی پلانی داھاتوو بۆ پتەوکردن و رێکخستنەوەی کار و ئەجێندای یەکێتی و گۆڕان گفتوگۆی لەبارەوەکرا، باسیش لەرێکەوتنی یەکێتی و گۆڕان کرا، پێشنیازیش کرا کۆبوونەوەکان بەردەوام بن بۆ سەرخستنی تەواوی رێکەوتنەکەی نێوان یەکێتی و گۆڕان.
دەستەی سەرۆکایەتی ئەنجومەنی بەڕێوەبەری لە ئیدارەی خۆبەڕێوەبەری باکور و خۆرھەڵاتی سوریا لەگەڵ ئەندامانی پێشووی کۆمسیۆنی باڵای ھەڵبژاردنەکانی ھەرێمی جەزیرە و فورات کوبووەوە و رەوشی سیاسی و ئابوری ناوچەکە و میکانیزمی ئەنجامدانی ھەڵبژاردنەکان تاوتوێکران تایبەت بە ئەنجامدانی ھەڵبژاردنەکان کە بڕیارە ئەمساڵ بەڕێوەبچێت و کۆمسیۆنێکی نوێش دروست بکرێت.
بڕیاری ھەڵبژاردنە خۆجییەکان لە گۆنگرەی نوێنەرانی ھەرێمی جەزیرە و فورات لە ٢٥ی تشرینی دووەمی ٢٠٢٠ەوە دەرکرا.
دەقی رونکردنەوەکە...
ڕوونکردنەوەیەک لە قائمقامیەتی قەزای سۆرانەوە
راستی و دروستی رووداوی دۆزینەوەی (سککەی کانزایی) لە گوندی سرێشمەی سەربە ناحیەی خەلیفان لەچەند رۆژی ڕابردوو ، کە بووە ھۆی بڵاوبوونەوەی چەندین زانیاری نا دروست لە ھەواڵ و سوشیال میدیا.. بۆ ئەم مەبەستە بۆ ڕای گشتی ئەو ڕوونکردنەوەیە بڵاودەکەینەوە ..
رێکەوتی ٠٤/٠٦/٢٠٢١ لەلایەن ھاوڵاتییەک لە گوندی سرێشمە بەناوی (ر) لەکاتی کارکردنی لە پارچە زەویەک گۆزەیەک دەردەکەوێت و بەھۆی ئامێری (حەفارە) گۆزە دەشکێت، ھەر لەلایەن ھەمان ھاولاتییەوە پارچە سککە کانزاییەکان کۆ دەکرێنەوە، دوای سێ ڕۆژ پارچە سکەکان کە (٢٠٤) پارچە بوون ڕادەستی ئەنجومەنی ئاسایش دەکات ..
لەسەر فەرمانی بەڕێز وەزیری ناوخۆو ئەنجومەنی ئاسایش، بۆ بەدواداچوون لەم کەیسە لەلایەن قائمقامیەتی قەزای سۆران لیژنەیەکی لێکۆلینەوە کە پێکھاتبوون لە ھەریەک لە نوێنەرانی (قائمقامیەتی سۆران، ب. ئاسایشی سۆران، ب. پۆلیسی سۆران، ب. شوێنەواری سۆران) لەژێر چاودێری قائمقامی سۆران دروست بوو ، دوای سەردانی مەیدانی و لێکۆلینەوەو بەدوا داچوونێکی زۆر لەلایەن لیژنەوە، کە بەردەوام لە پەیوندی دابوون، بەھاوکاری خەڵکی گوندو ھاوولاتی ناوبراو (٢٦٤) پارچە سککەی کانزایی تریش لەھەمان شوێن دۆزرانەوە، تێکڕای ئەو پارچە سککانە لەژێر دەستی لیژنە دایە (٤٦٨) پارچە سککەی دۆزراوەن و ڕادەستی بەڕێوەبەرایەتی شوێنەواری سۆران دەکرێت.
ھەروەھا بەڕێوەبەرایەتی شوێنەواری سۆران لە ڕێگای کەسانی پسپۆرو شارەزا بەردەوام دەبێت بۆ لێکۆڵینەوەی شوێنی دۆزینەوەی ئاسەواری ناوچەکەو مێژووی ئەو پارچە سککانە..
وێڕای دەست خۆشی بۆ لیژنەو ھاوڵاتی خاوەن زەوی و دانیشتوانی گوندی سرێشمە کە ھاوکاری لیژنەبوون بۆ پاراستنی ئەو پارچە ئاسەوارانەو پاراستنی شوێنەکە. بۆ ڕای گشتیش رایدەگەیەنین تێکڕای ئەو پارچە سککانەی دۆزراونەتەوە ڕادەستی لیژنە کراوە (٤٦٨) پارچەن و بەپێی زانستە سەرەتاییەکان دراوی کۆنن، ھەروەھا ئەو پارچە ڤیدیۆو وێنانەی لە سۆشیال میدیا بڵاوبوونەتەوە، دوورو نزیک پەیوەندی بەو ڕووداوەوە نیەو شێوەو پێکھاتەشیان جیاوازە .
لە داھاتووشدا زانیاری زیاتر لەسەر مێژووی ئاسەوارو پارچە دۆزراوەکان بە فەرمی لەلایەن بەڕێوەبەرایەتی شوێنەواری سۆران بڵاودەکرێنەوە .
لەگەڵ ڕێزماندا ...
قائمقامیەتی قەزای سۆران
١٣/٠٦/٢٠٢١
لە کۆبوونەوەکەدا ھەڵوەستە لەسەر خراپی ڕەوشی کارەبا و پیسی شار دەکرێت. چاوەڕوانیش دەکرێت لە ئەنجامی کۆبوونەوەکەدا پەیامێک ئاڕاستەی حکومەتی عێراق و ئیدارەی خۆجێی کەرکوک بکرێت بۆ چارەسەرکردنی کێشە خزمەتگوزاریەکانی شارەکە.
"واین مارۆتۆ" وتەبێژی ھێزەکانی ھاوپەیمانیی نێودەوڵەتی ڕایگەیاند، لە چوارچێوەی ھاوپەیمانی نێودەوڵەتی دژ بە داعش، بە بڕی ٣ ملیۆن دۆلار چەک و پێداویستی سەربازییان ڕادەستی ھێزی پێشمەرگەی کوردستان کردووە، جەختیشیکردووەتەوە، پابەندن بە ڕێککەوتن و ھاوکارییەکانیان لەگەڵ ھاوبەشەکانیان لە شەڕی تیرۆریستانی داعشدا.
ڕاشیگەیاندووە، ئەو چەکانەی ڕادەستی ھێزەکانی پێشمەرگە کراون، لە چوارچێوەی بەرنامەی سندوقی ڕاھێنان و پڕچەککردندان کە لە ساڵی ٢٠١٤ەوە دامەزراوە و لە بودجەی وەزارەتی بەرگری ئەمریکا "پنتاگۆن" بۆ ئەو ناوچانەی کێشەیان لەسەر دابینکراوە.
وتەبێژی ھێزەکانی ھاوپەیمانیی نێودەوڵەتی ئاماژەی بۆ ئەوەشکردووە، لە ماوەی ١٠ ڕۆژی یەکەمی مانگی حوزەیراندا ١٣ ئۆپراسیۆنیان لە عێراق و سوریا دژی داعش ئەنجامداوە، ڕێگریشیان لە ٣ کردەوەی تیرۆریستی کردووە.
بەڕێوەبەرایەتی ئاسایشی سلێمانی لە ڕاگەیەنراوێکدا ئاماژەی بۆ ئەوەکردووە، دوای ئەوەی ڕۆژی ھەینی ھاووڵاتیەک لە گەڕەکی ڕزگاری شاری سلێمانی کوژراو و ئۆتۆمبێلەکەشی دزرا و تاوانباری تاوانەکەش ھەڵھات و ئۆتۆمبێلەکەی بەرەو خوارووی عێراق بردبوو.
لە بەشێکی تری ڕاگەیەنراوەکەدا ھاتووە، ھێزەکانی ئاسایش بە فەرمانی دادوەر بە پێی ماددەی ٤٠٦ لە یاسایی سزادانی عێراقی و بە سەرپەرشتی دەزگای ئاسایشی ھەرێم و بە ھەماھەنگی پۆلیسی پارێزگای سلێمانی و ھێزەکانی بەرێوەبەرایەتی ئاسایشی کەرکوک و دەزگای ئاسایشی نیشتمانی عێراق ژووری ئۆپراسیۆنە ھاوبەشەکان، دەستبەسەر ناسنامەی تۆمەتبارەکەدا گیراوە کە لەدایکبووی ساڵی ١٩٩٨ی تکریتە.
ھاوکات ھێزەکانی ئاسایش توانیوانە تاوانبارەکە دەستگیر بکەن و دەست بەسەر ئۆتۆمبێلە دزراوەکەشدا بگرن، جەخت لەوەشکراوەتەوە، لە ئۆپراسیۆنێکی ھاوبەشدا لەسەر زانیارییەکانی ئاسایشی سلێمانی لەلایەن تیمێکی ھاوبەشەوە لە ماوەی کەمتر لە ٢٤ سەعاتدا تاوانبارەکە دەستگیر بکەن، لە ئێستاشدا لێکۆڵینەوە لە دۆسیەکە بەردەوامە.
وەزارەتی بازرگانی عێراق، بڕیاریداوە بە وەرگرتنی گەنمی جوتیارانی عێراق و ھەرێمی کوردستان بۆ ساڵی ٢٠٢١، بەڵام جوتیارانی سنوری پارێزگای دھۆک ئاماژە بۆ ئەوە دەکەن، تا ئێستا بەغداد بڕی وەرگرتنی گەنم و نرخی وەرگرتنی گەنمی جوتیارانی پارێزگای دھۆکی دیاری نەکردووە.
ھاوکات جوتیاران چاوەڕوانن حکومەتی عێراق رەزامەندی لەسەر وەرگرتنی بەرھەمی گەنمی ئەمساڵی جوتیاران بدات.
کۆنگرەی نەتەوەیی کوردستان "کەنەکە" لە ڕانییە، دیالۆگێکی کراوە سەبارەت بە ڕەوشی ئێستای کوردستان و مەترسییەکان و لەشکرکێشی و داگیرکارییەکانی تورکیا لە ھەرێمی کوردستان ئەنجام دەدات، بڕیارە لەو دیالۆگەدا "کەنەکە" ھەموو ئەو بابەتانە بخاتەڕوو کە مەترسی لەسەر ڕەوشی ھەرێمی کوردستان دروستکردووە.
ماوەیەکە نرخی بەنزین و سوتەمەنی لە ھەرێمی کوردستان بەرزبووەتەوە، بە شێوەیەکی گشتی نرخی یەک لیتر بەنزین نزیکەی ٢٠٠ دینار زیادیکردووە، لە بەنزینخانەیەک بۆ بەنزینخانەیەکی تریش جیاوازی ھەیە.
شۆفێرانیش بە گشتی و شۆفێرانی ئۆتۆمبێلی کرێ بە تایبەتی نیگەرانن لە بەرزبوونەوی نرخی بەنزین و نزمی کوالیتییەکەی داواش دەکەن حکومەت و لایەنە پەیوەندیدارەکان چارەسەری ئەو گرفتە بکەن.
"مەھدی شوشتەری" سەرکونسوڵی کۆماری ئیسلامی ئێران لە سلێمانی ڕایگەیاند، لە چوارچێوەی یارمەتیدان بۆ پەرەپێدانی پەیوەندییە ئابووری و بازرگانییەکانی ئێران و ھەرێمی کوردستان و ناساندنی توانا ھەناردەکارییەکانی ئێران، دووەمین پێشانگای تایبەتی کۆماری ئیسلامی ئێران لە ٢٢ تا ٢٦ی حوزەیرانی ٢٠٢١ بە بەشداری زیاتر لە ١٠٠ کۆمپانیای باوەڕپێکراو لە ناوەندی پێشانگەی نێودەوڵەتی سلێمانی بەڕێوەدەچێت.
ئاماژەی بۆ ئەوەشکرد، ئەو کۆمپانیانە لە ١٥ گروپی جیاوازی کاڵا و خزمەتگوزارییەکانی وەک مەوادی خۆراکی و وشکە و فەرش و ئامێر و کاری دەستی و جلوبەرگ و پیشەسازی بینا و پێداویستی ناوماڵ و پزیشکی و پێداویستی ئۆتۆمۆبێل و ئامێری بەخێوکردنی ئاژەڵ و باڵندە و پیشەسازی چاپ بەشداری دەکەن، نوێترین کاڵا و توانا ھەناردەکارییەکانی خۆیان نمایش دەکەن.
بە پیێ میدیاکانی رۆژئاڤا چەکدارەکانی سەر بە تورکیا لە دوو حەفتەی رابردوودا شەش کەس لە گوندی دێرسوانی سەر بە ناوچەی شەران و گوندی مەسیکای سەر بە ناوچەی جندرێسی ھەرێمی عەرفینیان رفاندووە. ھەروەھا دوای وەرگرتنی پارە رفێنراوەکان ئازادکراون.
لە لایەکی تروەوە چەکدارەکان ھاوڵاتی بە ناوی عەلی عارف خەلکی گوندی قیبار کە زیاتر لە سێ سال و سێ مانگ بوو لە لای چەکدارەکان زیندانیکراوبو لە ھەشتی ئەم مانگە ئازادکرا.
دەقی پەیامەکە...
ئەمڕۆ یادی لەدایکبوونی یەکێک لە ژنە پێشمەرگە تێکۆشەر و خەباتگێڕەکانی کۆڕی خەبات و ئەرشیفێکی دەوڵەمەندی شۆڕش و سەرکردەیەکی کاریگەری کوردستان و عێراق دەکەینەوە. یادی لەدایکبوونی دایکێک دەکەینەوە کە گەنجێتی لە شاخ بەسەربرد و دوای راپەڕینیش باوەشی بۆ منداڵان و گەنجانی کوردستان کردەوە و شەڕی بۆ مافەکانی مرۆڤ و پێکەوەژیان و لێبووردەیی دەکرد.
ھێرۆ ئیبراھیم ئەحمەد بەتەنیا دایک نەبوو بۆ ئێمە، بەڵکو بەو رۆشنبیرییە فراوانەی لە مامۆستا ئیبراھیم ئەحمەدەوە وەریگرتبوو وەک مامۆستایەک وانەکانی ئازادی، مافی مرۆڤ، یەکترقبوڵکردن و دیموکراسی فێردەکردین.
لە ھێرۆ خانەوە فێری ماندوونەناسی و ھەوڵدان بووین لەپێناو ئامانجە باڵاکان و خزمەتکردنی کوردستانەکەمان.
ھێرۆ خان زۆرباش لە گرنگی کایەی رووناکبیری و رۆژنامەنووسی تێگەیشتبوو، ھەربۆیە ھەمیشە پاڵپشت و ھاندەرێکی سەرسەختی ھونەرمەند، رۆشنبیر و رۆژنامەنووسان بوو. کارەکانیشی لەو بوارانەدا بۆ ھەمیشە بە درەوشاوەیی دەمێنێتەوە و مێژوو بە شانازییەوە باسی دەکات.
ئەمڕۆ کە یادی خاتوو ھێرۆی دایک و ژنە شۆڕشگێڕ دەکەینەوە، بەڵێن دەدەین بە پەندوەرگرتن لە مێژووی پڕشانازی ئەو ژنە سەرکردەیە بەردەوامبین لە خزمەتکردنی خەڵکی خۆشەویستی کوردستان و پاراستنی یەکێتییەکەی مام. ھاوکار و ھاندەری ھونەرمەند، رۆشنبیر و رۆژنامەنووسان بین. گیانی تەبایی و یەکترقبوڵکردن زیندوو بکەینەوە و پێکەوە دەستلەناودەست لەپێناو سەربەرزی کوردستان و خەڵکەکەی کار بکەین.
تەمەنت درێژ و سایەوسێبەرت ھەمیشە بەسەرمانەوە بێت خاتوو ھێرۆ ئیبراھیم ئەحمەد.
بافڵ تاڵەبانی
ھاوسەرۆکی یەکێتیی نیشتمانیی کوردستان
ئەمڕۆ شەممە ١٢ی٦ی٢٠٢١، لاھور شێخ جەنگی ھاوسەرۆکی یەکێتیی نیشتمانیی کوردستان لە شاری سلێمانی پێشوازی کرد لە ھانس ئاکربووم کونسوڵی گشتیی ھۆڵندا لە ھەرێمی کوردستان و کۆڵۆنێڵ یان تین ھۆڤ راوێژکاری سەربازیی لە کونسوڵخانەی ھۆڵندا لە ھەرێم.
لە دیدارەکە لاھور شێخ جەنگی تەئکیدی لە ھەڵوێستەکانی کردەوە بۆ چارەسەرکردنی کێشەکانی نێوان حکومەتی ھەرێم و بەغدا لەسەر بنەمای دەستوور و پابەندبوونی ھەردوولا بە ڕێککەوتنەکانی نێوانیان.
ھاوکات ئامادەیی یەکێتیی نیشتمانیی کوردستانی بۆ چاکسازی و یەکخستنی ھێزی پێشمەرگە دووپات کردەوە بە ڕەچاوکردنی بنەمای ھاوسەنگی، ڕاشیگەیاند: بوونی یەک ھێزی نیشتمانیی پڕچەک و مەشقپێکراو بۆ ئێستا و داھاتووی کوردستان گرنگە و بە ھەموو شێوەیەک پشتیوانی دەکەین. لەو ڕووەشەوە پێزانینی پێشکەش بە ھێزەکانی ھاوپەیمانی نێودەوڵەتی کرد کە لەو پێناوەدا ھەنگاوی گرنگیان ناوە.
لە بەشێکی تری دیدارەکدا ئاماژە بە مەترسییەکانی سەرھەڵدانەوەی چەکدارانی داعش کرا و جەخت لە بەردەوامی یٔۆپەراسیۆنە ھاوبەشەکانی نێوان سوپای عێراق و ھێزی پێشمەرگە کرایەوە بۆ دوورخستنەوەی مەترسیی سەرھەڵدانەوەی یٔەو خانە نوستووانەی داعش.
ھاوسەرۆک لاھور شێخ جەنگی نیگەرانی خۆی دەربڕی بۆ پەرەسەندنی گرژییەکان کە بەم دواییە لە سەر سنوورەکانی ھەرێم و تورکیا ھاتونەتە ئاراوە، وتیشی: نابێت ڕێگە بدەین سەقامگیری و ئاسایش و ئارامیی ھەرێمی کوردستان بە بیانووی جۆراوجۆر بخرێتە مەترسییەوە، دووپاتی کردەوە گرتنەبەری شەڕ و ڕێگەی سەربازی کێشەکان چارەسەر ناکات، پشتیوانیی ڕێگەی ئاشتی و زمانی دیالۆگین بۆ کۆتاییھێنان بە کێشەکان. وتیشی یٔێمە ڕامانگەیاندووە کە بە ھەموو شێوەیەک دژی شەڕی براکوژین.
لە کۆتایی دیدارەکەدا ھاوسەرۆک لاھور شێخ جەنگی ھەڵبژاردنەکانی داھاتووی عێراقی بە گرنگ زانی، بۆ گۆڕانکاریی ڕاستەقینە و بەدیھێنانی ئامانجەکان و وتی: وەک یەکێتیی نیشتمانیی کوردستان ھانی ھەموو لایەنە کوردستانییەکان دەدەین بێنە ژێر چەتری لیستی ھاوپەیمانی کوردستان کە لە نێوان یەکێتیی نیشتمانیی کوردستان و بزووتنەوەی گۆڕان پێکھێنراوە و لەو ڕێگەیەوە دەتوانرێت یەکدەنگیی کورد لە بەغدا بپارێزین و لە ڕێگەی خەباتی پارلەمانییەوە تەواوی مافەکانی گەلی کورد بە دەست بھێنین.
بافڵ تاڵەبانی ھاوسەرۆکی یەکێتی نیشتمانی کوردستان لە چاوپێکەوتنێکدا لەگەڵ کەناڵی شەرقییە نیوز رایگەیاند، وەک یەکێتی بڕوامان بە چەپکە گوڵەکەی مام جەلالە و ئێمە خوازیارین ھەموان لە یەکڕیزدا کۆببنەوە ورێککەونتێکی رەسمیمان لەگەڵ بزووتنەوەی گۆڕانە ھەیە و ئامادەین رێککەوتن لەگەڵ ھەر لایەنێک بکەین لەگەڵ کارنامەی یەکێتی کۆک بێت.
راشیگەیاند، یەکێتی دوای نەخۆشکەوتنی سەرۆک مام جەلال تووشی کێشەی زۆر بوو، کەسایەتییەکی تری وەک سەرۆک مام جەلال دەرناکەوێتەوە، بەڵام لە ئێستادا من و من و لاھور شێخ جەنگی یەکتر تەواو دەکەین و دۆسیەکانمان دابەش نەکردوە و پێکەوە کارەکان رادەپەڕێنین.
وتیشی، بڕوامان بە عێراق و گەلی عێراق ھەیە و یەکێتی نیشتیمانی کوردستان بۆ عێراق بەرنامەی خۆی ھەیە و یەکێتی بۆ بەغداد و عێراق پێویستە و لەو بروایەداین کە ئەم ھەڵبژاردنە دوور دەبێت لە دەستوەردان ودۆسیەی ھەڵبژاردن دەبێت لە دەستماندا بێت
ئاشکراشیکرد، پەیوەندیان لەگەڵ ئێران دێرینە و زۆرینەی ھێزە سیاسییەکانی عێراقیش ئەو پەیوەندییەیان ھەیە.
لەبارەی پۆستەکانی عێراقەوە رایگەیاند، دەبێت سەرۆکایەتی کۆمار بۆ کورد و یەکێتی نیشتیمانی بمێنێتەوە لەو بروایەداین پۆستی سەرۆک وەزیرانی عێراق بۆ شیعە و سەرۆکی پەرلەمان بۆ سوننەیە.
وتیشی، لە بروایەداین دکتۆر بەرھەم دەتوانێت لەم رەوشە سەختەدا خزمەتی وڵات بکات و ئێمە پشتیوانی لە دکتۆر بەرھەم بۆ خولێکی تری سەرۆکایەتی عێراق دەکەین.