بە پێی نوسراوێکی سەرۆکی پەرلەمانی کوردستان کە ئاڕاستەی سکرتارییەتی یەکێتی مامۆستایانی کوردستان کراوە، پڕۆژەی یاسای "پارێزبەندی مامۆستایان"لەلایەن دەستەی سەرۆکایەتی پەرلەمانەوە ئاراستەی حکومەتی ھەرێم کراوە بۆ راوەگرتن، لەلایەن حکومەتەوە پڕۆژەکەش رەتکراوەتەوە، بەبیانووی ئەوەی لە رەشنووسی یاسای وەزارەتی پەروەردەدا مافەکانی مامۆستایان جێگەی کراوەتەوە.

"عەبدولواحید محەمەد"سەرۆکی یەکێتی مامۆستایانی کوردستانیش بە کوردسات نیوزی راگەیاند، لەبەر ئەوەی لە رابردوودا کۆمەڵێک رووداوی نەخوازراو بەرامبەر بە مامۆستایان کراوە، دەستپێشخەریەیان کردوە و پڕۆژە یاسای پارێزبەندی مامۆستایانیان داوە بە پەرلەمان.

وتیشی، لە خولی رابردوو خوێندنەوەی بۆ کراوە و کۆمەڵێک رێکاریش گیراوەتەبەر، بەڵام ئێستا ئەنجومەنی وەزیران پڕۆژە یاساکەی رەتکردۆتەوە.
جەختی لەوەشکردەوە، جارێکی تر نوسراو بۆ سەرۆکایەتی پەرلەمان دەکەنەوە بۆ ئەوەی مافی مامۆستایان پارێزراو بێت و پڕۆژەکە بکرێت بەیاسا.

‎ھاوکات ئەوەش خراوەتەوە ڕوو، لیژنەی دیاریکردنی نرخی موەلیدە ئەھلییەکانی سلێمانی نرخی کارەبای موەلیدە ئەھلییەکانی بۆ مانگی (شەش) دیاریکرد،  بەوەش لەسەر بنەمای نرخی سوتەمەنی لە ‌بازاڕەکانی ھەرێم و سەعاتەکانی کارکردن دیاریکراوە.

‎باس لەوەشکراوە ، بە پێی کۆنووسی کۆبونەوەکە کارکردن و تەرخانکردنی کارەبا لەلایەن موەلیدە ئەھلییەکانەوە بۆ ھاوڵاتیان لە مانگی (شەش)دا لەنێوان (٢٢٠) بۆ (٢٢٥) سەعاتدا بووە،‌ بەمەش نرخی یەک ئەمپێڕکارەبای موەلیدەی ئەھلی لە ناوشاری سلێمانی بۆ ئەو مانگە لە نێوان (٩) ھەزار بۆ (٩) ھەزار و پێنج سەد دیناردا دەبێت، ھەربۆیە بەھۆی جیاوازی کارپێکردنی موەلیدەکان لەگەڕەکێک بۆ گەڕەکێکی دیکە، نرخی ئەمپێڕێک کارەبای موەلیدە لە گەڕەکێک بۆ گەڕەکێکی دیکە جیاواز دەبێت.

بەڕێوەبەرایەتی گشتی کەشناسی و بومەلەرزەزانی ھەرێمی کوردستان پێشبینییەکانی کەشوھەوای ئەمڕۆ و سبەینێی بڵاوکردەوە و رایگەیاند، ئەمڕۆ بەرزترین پلەی گەرمای تۆمارکراو لە ھەولێر ٤٢ پلە، لە سلێمانی ٤٣ پلە، لە دھۆک ٤١ پلە و لە پارێزگاکانی کەرکوک و ھەڵەبجەش ٤٣ پلە دەبێت.
ئاماژەی بەوەشکردووە کە سبەی دووشەممە پلەی گەرما لە ناوچەکانی ھەرێم چەند پلەیەک دادەبەزێت، بەشێوەیەک کە بەرزترین پلە گەرما لە ھەولێر ٤١ پلە، لە سلێمانی ٤٢، لە دھۆک ٤١، لە کەرکوک ٤٣ و لە پارێزگای ھەڵەبجەش ٤٢ پلە دەبێت.

سبەینێ دادگایکردنی بەشێکی تری لە چالاکوانانی بادینان بەرێوەدەچێت و کەسوکارەکانیشیان داوای پشتگری لە خەڵکی کوردستان دەکەن لە راگەیەنراوێکدا کەسوکاری بەشێک لە دەستگیرکراوانی بادینان داوا لە ھەموو فراکسیۆنەکانی پەرلەمانی کوردستان و رێکخراوەکانی مافی مرۆڤ و پارێزەر و یاساناس و چالاکوانانی مەدەنی و ھاوڵاتیان بە گشتی کراوە، کە ھەڵوێستیان بەرامبەر بە دادگاییکردنەکە ھەبێت، بە تایبەتی لە کاتێکدا کە رێگریی لە پارێزەران کراوە ئامادەی دانیشتنی دادگاییەکە بن، ھەر بۆیە داواکارن پشتیوانی لە راگیراوەکانیان بکرێت بەو پێیەی لەسەر دۆسیەیەکی گشتی رووبەرووی ئەو رەوشە بوونەتەوە.

مەھدی شوشتەری سەرکونسوڵی ئێران لە سلێمانی رایگەیاندوە، ھاتووچۆی ھاوڵایانی ئێران لە خاڵە سنوورییەکانەوە بۆ ھەرێمی کوردستان تا ئەم دواییانە قەدەغە بوە، بەڵام ئێستا رێگە پێدراوە، ئەوەشی ئاشکرا کردوە، کە تەنیا ئەو ھاوڵاتییانە دەتوانن سەردانی ئێران بکەن، کە ڤیزای بازرگانی و دەرمانی و خوێندکاری و خێزانییان ھەیە و وەک رابردوو مۆڵەتیان پێ دەدرێت، وتیشی ڤیزای گەشتیاری بە ھاوڵاتیانی عێراق نادرێت.

بە پێی ڕاگەیەندراوێکی وەزارەتی تەندروستی، لە ماوەی ٢٤ سەعاتی ڕابردوو لە ھەرێمی کوردستان ٧٤٦ کەسی تر تووشی ڤایرۆسی کۆرۆنا بوون و چوار توشبووی تری کۆرۆنا گیانیان لە دەستدا و ٤٨١ تووشبووی تری ڤایرۆسەکەش چاکبوونەتەوە.

ڕاگەیاندراوی ( ٢٤ ) کاتژمێری تایبەت بە نەخۆشی ڤایرۆسی کۆڕۆنای نوێ   COVID١٩               ژمارە ( ٤٩٤ )  
١. پشکنین: ( ٨٥٥٤ پشکنینی نوێ)
• ( ٣٠١٥) ھەولێر
• ( ٢٤٧٣) سلێمانی
• ( ٢٣١٤) دھۆک
• ( ٤٣) ھەڵەبجە
• ( ٥٩٨) گەرمیان
• ( ١١١) ڕاپەڕین

٢. تووشبوو: ( ٧٤٦ تووشبووی نوێ)
• ( ٣١٣) ھەولێر
• ( ٢٧٢) سلێمانی
• ( ١٠٢) دھۆک
• ( ١٠) ھەڵەبجە
• ( ٤٤) گەرمیان
• ( ٥) ڕاپەڕین

٣. چاکبوون: ( ٤٨١ چاکبوون)
• ( ١٠٥) ھەولێر
• ( ٢٢٢) سلێمانی
• ( ١٤٧) دھۆک
• ( ١) ھەڵەبجە
• ( ٦) گەرمیان
• ( ٠) ڕاپەڕین

٤. مردن: ( ٤ مردن)
• ( ٣) ھەولێر
• ( ٠) سلێمانی
• ( ١) دھۆک
• ( ٠) ھەڵەبجە
• ( ٠) گەرمیان
• ( ٠) ڕاپەڕین 

ئاماری گشتی:
کەرەنتین ھاوڵاتی ٢١٨٧١ (٢١٨٧١ دەرچوو)
پشکنین ٢١٤٩٢٧٤ (٧٤٣٨٥٧ ھەولێر، ٥٢٦١٩٨ سلێمانی، ٨٦٣٠٩٥ دھۆک، ١٦١٢٤ ھەڵەبجە)
تووشبوون ١٨٨٣٣٠ (٥٦٥٦٧ ھەولێر، ٦٢٠٢٥ سلێمانی، ٦٥٩٥١ دھۆک، ٣٧٨٧ ھەڵەبجە)
چاکبوون ١٧٥٩٣٧ ( ٥٣٧٢٥ ھەولێر، ٥٥٩٩٢ سلێمانی، ٦٢٦٠٨ دھۆک، ٣٦١٢ ھەڵەبجە)
لەژێر چارەسەر ٧٨٨٩ (١٦٢٥ ھەولێر، ٣٩٦٢ سلێمانی، ٢٢٧٨ دھۆک، ٢٤ ھەڵەبجە)
مردن ٤٥٠٤ (١٢١٧ ھەولێر، ٢٠٧١ سلێمانی، ١٠٦٥ دھۆک، ١٥١ ھەڵەبجە)

بۆ زانیاری زیاتر سەردانی داشبۆردی حکومەتی ھەرێمی کوردستان بکەن لەم لینکە (https://gov.krd/coronavirus/dashboard/).

وێڕای دەستخۆشی بۆ پزیشکان و کارمەندانی تەندروستی و ھەموو تیمەکانی پزیشکی کە لە ئەرکدان، جەخت دەکەینەوە ھاووڵاتیان پابەندبن بە ڕێنماییەکانی تەندروستی و دورکەوتنەوە لە شوێنی قەڵەبالغ و دانانی ماسک و وەرگرتنی ڤاکسین، وە لەکاتی پێویستدا پەیوەندی بکەن بە ھێڵی گەرمی ژمارە ( ١٢٢ ). 

 وەزارەتی تەندروستی       
حکومەتی ھەرێمی کوردستان    
٤ی تەمووز ٢٠٢١

ئەنجومەنی باڵای ئابووری ھەرێمی کوردستان لەبارەی پەرەپێدانی رەوشی ئابووری و رێکخستنەوەی داھاتی گشتی و بژێوی ھاووڵاتیان کۆبۆوە، بەپێی راگەیەنراوێکی کۆبونەوەکەش رێکخستنەوەی باج و رسومات و میکانیزمی کۆکردنەوەی باجەکان تاووتوێکراوە و بڕیاردراوە قوباد تاڵەبانی جێگری سەرۆکی حکومەت، سەرپەرشتی پرۆسەی رێکخستنەوەی باج و رسومات بکات.

جەختیشکراوەتەوە، حکومەت ھیچ باجێکی زیاد نەکردووە، بەڵکو تەنھا شێوازی کۆکردنەوەی باجەکانی رێکخستووەتەوە و ئەو باجانەی پێشتر بە پێی یاسا دانراون، کۆیان دەکاتەوە.

ئاماژە بەوەشکراوە، لەپێناو کارئاسانیکردن بۆ وەبەرھێنەران و نەھێشتنی رۆتین، بڕیاردرا دابەزاندنی دەسەڵاتەکانی تایبەت بە کەرتی وەبەرھێنان و مۆڵەتدان بە پرۆژەکانی وەبەرھێنان، بۆ پارێزگاکان و ئیدارە سەربەخۆکان.

دەقی پەیامەکە...
بەڕێزان یاریزانان و ستافی یانەی وەرزشی نەورۆز 

بەبۆنەی گەیشتنتان بە خولی نایابی عێراق، بەگەرمی پیرۆزبایی ئاراستەی یاریزانان و ستافی یانەی وەرزشی نەورۆز دەکەم و ھیوای سەرکەوتنی زیاترتان بۆ بە ئاوات دەخوازم. 

بەدەستھێنانی ئەو سەرکەوتنە گەورەیە بۆ یانەی نەورۆز مایەی شانازییە بۆ شارە حەیاتەکە و بەم بۆنەیەشەوە پیرۆزبایی لە ھاندەرانی یانەکە و وەرزشدۆستانی سلێمانی دەکەم.
 ئەم دەستکەوتەی یانەی نەورۆز دەرەنجامی مەشق و ھەوڵی بەردەوام و رکابەریی توندی وەرزشی بووە، ھیواخوازم ئێوە و یانەکانی دیکەی کوردستان  لەسەرکەوتندابن و بەردەوام بن لەبەدەستھێنانی نازناو و دەستکەوتی زیاتر .

قوباد تاڵەبانی
جێگری سەرۆکی ئەنجومەنی وەزیران

ھۆگر عەزیز وتەبێژی پۆلیسی ھەولێر بە کوردسات نیوزی راگەیاند، دوو تۆمەتباریان دەستگیرکردووە کە یەکێکیان نھۆمی سەرەوەی خانووەکەی بە کرێ داوە و بە ھاوکاری کەسی دووەم دزییان لە کرێچییەکەیان کردووە و شەش دەفتەر دۆلار و پێنج ملیۆن دیناریان دزیوە و لەناو تایەی ئۆتۆمبێل شاردبوویانەوە. 

ئاماژەی بۆ ئەوەشکرد، دزییەکەیان بە جۆرێک کردووە کاتێک کرێچییەکەیان لە ماڵ نەبووە، چوونەتە نھۆمی دووەم و دزییان لە ماڵەکەی کردووە و دواتر خاوەن ماڵەکەش وا خۆی پێشانداوە کە ئەویش دزی لێکراوە، بەڵام دواتر پۆلیس لێکۆڵینەوەی کرد و ئاشکرا بووە کە خاوەن ماڵ دزییەکەی کردووە و سکاڵاکەشی بۆ شاردنەوەی دزییەکەی بووە.

وەزارەتی کارەبای ھەرێم رایگەیاند، دوو گرێبەست  بۆ جێبەجێکردنی دوو پرۆژەی کارەبا لە پارێزگای سلێمانی ئیمزا کراوە، پرۆژەی یەکەم بۆ بەستنی ھێڵی ١٣٢ کەی ڤی لە نێوان بازیان و رانیە بە درێژایی ١٠٥ کیلۆمەتر و بە بڕی ٣١ ملیار و ٦٠٠ ملیۆن دینار لەماوەی ٣٦٥ رۆژدا جێبەجێ دەکرێت. 

پرۆژەی دووەمیش بۆ بەستنی ھێڵی ١٣٢ کەی ڤی لە نێوان تانجەرۆ و سەیدسادق بە دووری ٥٥ کیلۆمەتر و بەبڕی ١٧ ملیار و ٢١٠ ملیۆن دینار لەماوەی ٢٢٠ رۆژدا جێبەجێ دەکرێت.

وەزارەتی کارەبا لە راگەیەنراوێکدا ئاماژەی بەوە کردوە، تیمی تایبەت بە سەرپێچییەکانی سەر پێوەری زیرەک دەستبەکاربووە و جۆر و شوێنی سەرپێچییەکانیش بە شێوەی ئۆنلاین لە رێگەی سیستمی داتا سەنتەرەوە دەستنیشان دەکرێت، لە ھەر شوێنێک دەستکاری سندووقی پێوەری زیرەک بکرێت، جۆر و شوێنی سەرپێچییەکە بۆ داتا سەنتەر دەگوازرێتەوە.

راشیگەیاندووە، لەبەرئەوە داوا لە ھاوبەشانی کارەبا دەکات بۆئەوەی روبەڕوی سزای یاسایی و دارایی نەبنەوە، دەستکاری پێوەری زیرەک نەکەن.

ئومێد خۆشناو پارێزگاری ھەولێر بۆ دەربازبوون لە قەیرانی کەمبوونەوەی ئاوی خواردنەوە لە پارێزگاکە داوای ھەڵمەتی نیشتیمانی دەکات و راشیدەگەیەنێت، گرفتەکە ئەگەر ناچاریان بکات تەنانەت شوێنەکانی شتنی ئۆتۆمبێلیش رادەگرن. 

داواشی لە مامۆستایانی ئاینی کرد بەشدار بن لە ھۆشیارکردنەوەی ھاوڵاتیان بۆ دەربازبوون لەو قەیرانە سەختەی بەرۆکی گرتوون.

موخلیس سەلیم بەڕێوەبەری کارگێڕی و یاسایی دەستەی وەبەرھێنەرانی کوردستان بە کوردسات نیوزی راگەیاند، ئەمساڵ پڕۆژەی بەبازاڕکردنی گەنمی جوتیاران کەوتووەتەکار و لە سەرەتای مانگی داھاتووەوە ئاردی سفر بەرھەم دەھێنێت و بە نرخێکی گونجاو دەخرێتە بازاڕەوە. 

راشیگەیاند، بۆ یەکەمجارە لە ھەرێمی کوردستان کارگەی ئاردی سفر دەکەوێتەکار و ھەرچەندە مانگانە ھەرێم پێویستی بە ٢٤ ھەزار تۆن ئاردی سفر ھەیە، بەڵام ئەو کارگانە ٣٥ ھەزار تۆن بەرھەم دەھێنن و ھەناردەی دەرەوەی ھەرێمیش دەکرێت. 

موخلیس سەلیم وتیشی، بۆ گرنگیدان بە بەرھەمی جوتیارانی ھەرێم و پاراستنی ئاسایشی خۆراک، لە داھاتوودا ئاردی جۆ و گەنمەکوتراو و ساوەر و بڕوێش و ژمارەیەک بەرھەمی تری ناوخۆ بۆ ھاوڵاتیان بەردەست دەبێت.

سازگار دڵشاد ئەندامی ئەنجومەنی پارێزگای ھەولێر بە کوردسات نیوزی راگەیاند، بەھۆکاری کەمی ئەندامانی ئەنجومەنی پارێزگا، لیژنەکان لە ١٥ لیژنەوە کەمکراوەتەوە بۆ ١٠ لیژنە و بڕیارە لە رۆژانی داھاتوودا ئەنجومەنی پارێزگای ھەولێر لەبارەی دیاریکردنی سەرۆکی نوێ بۆ لیژنەکان کۆببێتەوە. 

ئاماژەی بۆ ئەوەشکرد، گۆڕانکاری لە پەیڕەوی ناوخۆی ئەنجومەنەکە دەکرێت و بڕیارە جێگر و بڕیاردەری لیژنە نەمێنێت، لە ١٠ لیژنەکەش فراکیسۆنی یەکێتی پۆستی سەرۆکی دوو لیژنەی ئەنجومەنی پارێزگای ھەولێر وەردەگرێت و کاری لیژنەکان چڕتر و چالاکتر دەکرێن.

قوباد تاڵەبانی جێگری سەرۆکی ئەنجومەنی وەزیران راگەیاند، لە کۆبوونەوەی ئەنجومەنی ئابووری، چەند بڕیارێکی گرنگماندا لە پێناو پەرەپێدانی دۆخی ئابووری و ڕێکخستنەوەی داھاتی گشتی و باشترکردنی بژێوی ھاوڵاتیان.

راشیگەیاند، بڕیارماندا کاری باج و رسومات رێکبخەینەوە و پێداچوونەوە بە میکانیزمی کۆکردنەوەی باجەکان بکەین. 

ئاماژەی بەوەشکردووە، ھەروەھا بڕیار درا سیاسەتێک پەیڕەو بکرێت، کە بەرھەمی خۆماڵی بپارێزێت و رێگری لە قۆرخکاری و بەرزبوونەوەی نرخ بگیرێت لەپێناو بەرژەوەندی گشتی و بەکاربەرانی ھەرێمی کوردستان.

قوباد تاڵەبانی وتیشی، لە پێناو کارئاسانیکردنیش بۆ وەبەرھێنەران و نەھێشتنی ڕووتین، بڕیاری ئەوەماندا، دەسەڵاتەکانی تایبەت بە کەرتی وەبەرھێنان ومۆڵەتدان بە پڕۆژەکانی وەبەرھێنان دابەزێنین بۆ پارێزگاکان و ئیدارە سەربەخۆکان.