78 ساڵ تێپەڕ دەبێت بەسەر لەسێدارەدانی قازی محەمەد دامەزرێنەری یەكەم كۆماری كوردستان، ئەو كۆمارەی یەكێكە لە گەورەترین رووداوەكانی مێژووی هاوچەرخی كورد، كەتیایدا بۆ یەكەمجار لەمێژووی نوێدا، كورد توانی كۆمارێكی سەربەخۆ دابمەزرێنێت، ئەگەرچی تەمەنی كۆمارەكە كەمبوو، بەڵام توانی فەرمانڕەوای ناوچەكانی ژێر دەسەڵاتی بكات و دامودەزگاكانی حكومەت دابمەزرێنێت و بە ئازادی گۆڤارو رۆژنامە دەربكات و هەوڵی بە كوردیكردنی خوێندن بدات.

قازی محەمەد كوڕی قازی عەلی لە یەكی ئایاری 1893 لە شاری مەهاباد لەدایكبووەو لەمنداڵییەوە خولیایەكی زۆری بۆ زانست و فێربوونی زمانەكان هەبووە، جگەلە فارسی و عەرەبی، ئینگلیزی و فەرەنسی و روسی زانیوەو كەسایەتییەكی كۆمەڵایەتی بووە، بەردەوام لەنێو زانایان و كەسایەتییە نیشتمانپەروەرو سەرۆك هۆزەكاندا بووە.

لە چلەكانی سەدەی رابردوو لەبەر گرنگیدانی بە زانست و مەعریفەی خەڵك بەرپرسیارێتی فەرمانگەی فەرهەنگ و ئەوقافی مەهابادی وەرگرتووە،  دوای مردنی باوكی بە قازی ( دادوەر)ی شار هەڵبژێردراوە، هەر لە سەردەمی ئەودا یەكەم قوتابخانەی كچان لە مەهاباد كراوەتەوە.

دوای سەرهەڵدانی راپەڕینێكی جەماوەری لە ساڵی 1941  و كۆنترۆڵكردنی زۆربەی ناوچە كوردییەكان ، لە شاری مەهاباد لیژنەیەك لە كەسایەتی و سەرۆك هۆزەكان دەسەڵاتی ناوچەكەیان گرتە دەست و پارتێكی سیاسی بەناوی كۆمەڵەی ژیانەوەی كوردستان ( ژێ‌ كاف) دامەزراو قازی محەمەد بەسكرتێری پارتەكە هەڵبژێردرا.

لە ئەیلولی 1945 قازی محەمەد و هاوڕێكانی بۆ بەدەستهێنانی پشتیوانی سەردانی تەبرێزیان كردو لەگەڵ كونسوڵی یەكێتی سۆڤیەت كۆبوونەوە، لەوێش ئاگاداركرانەوە كە پارتی دیموكراتی ئازەربایجان دەستی بەسەر پارێزگای تەبرێزدا گرتووە، قازی محەمەدیش هەمان هەوڵەكانی دەستپێكردو دوای چەند مانگێك لە دامەزراندنی حزبی دیموكراتی كوردستان لەسەر بنەمای كۆمەڵەی ژیانەوە، لە رۆژی 22ی كانونی یەكەمی 1945 بەئامادەبوونی جەماوەرێكی زۆر و نوێنەرانی هەر چوارپارچەی كوردستان كۆماری كوردستانی راگەیاند و حكومەتێك لە سەرۆك وەزیران و 13 وەزارەت پێكهێنرا.

دوای 11 مانگ لە تەمەنی كۆمار لە 26ی ئاداری 1946 بەهۆی گوشاری ئەمریكاو رۆژئاوا، یەكێتی سۆڤیەت لە باكوری ئێران كشایەوەو سوپای حكومەتی پەهلەوی ئێران لە21ی ئاداری 1946 دەستی گرت بەسەر شاری تەبرێزدا و كۆماری ئازربایجانی رووخاند، دواتریش پەلاماری ناوچە كوردییەكانی داو لە 15ی كانوونی یەكەم دەستیگرت بەسەر شاری مەهاباددا، ئەوەش دوای ئەوەی قازی محەمەد لەنێوان پاراستنی گیانی خەڵك و بەرگریكردن لەكۆمارەكەی بڕیاری شەڕنەكردنی هەڵبژاردو رایگەیاند،(من خۆم فیدای خەڵكی دەكەم و هیچكات وەك سەرانی ئازربایجان ناكەم، تا وڵاتەكەم لە خوێندا شەڵاڵ بێت و هەزاران كەس بەكوشت بچن). دواجار لە دادگایەكی نادادپەروەرانی سەربازی، بەتاوانی گۆڕین و دەستكاریكردنی نەخشەی وڵاتی ئێران و راگەیاندنی سەربەخۆیی و سازكردنی نەخشەی كوردستانی گەورە‌ بە لكاندنی كوردستانی ئێران و عێراق و توركیا و سووریاو دانانی ئاڵای تایبەت بۆ كوردستان بەرەبەیانی رۆژی 31 ئاداری 1947 قازی محەمەد و سەدری قازی و سەیفی قازی لە مەیدانی چوارچرای شاری مەهاباد لەسێدارە دران.

لە ناحیەی مەنسێهرا لە پارێزگای خەیبەرپختونخوا لە پاکستان گوندێک هەیە کە پەیوەندی پتەوی نێوان شوێنکەوتووانی مەزهەبی سونە و شیعە لەخۆدەگرێت.

 

ئەم راپۆرتە لە بی بی سی وەرگیراوە 

 

ئەم مزگەوتە کۆکەرەوەی دوو مەزهەبی دژبەیەکی ئیسلامە کە 'سونە' و 'شیعە'ـن، لەبەرئەوەی هەردوو مەزهەبەکە ئەو مزگەوتە بۆ پەرستش بەکاردەهێنن.

 

پەرستشەکان بەجۆرێکە، گروپێک پەرستش ئەنجام دەدات و گروپی دوای 15 خولەک دێن پەرستشی خۆیان ئەنجام دەدەن؛ لە بنەڕەتدا مزگەوتەکە تایبەتە بە شیعەکان، بەڵام پارەی کارەبا و پێداویستییەکانی دیکە پێکەوەدەدەن.

 

بانگ لە مزگەوتەکەدا بەپێی نوێژەکان دابەشکراوە، شیعەکان بۆ نوێژی بەیانی و نیوەڕۆ و عەسر بانگ دەدەن، سونەکانیش بۆ نوێژی ئێوارە و خەوتنان بانگ دەدەن.

 

لە مانگی رەمەزاندا سونەکان چەند خولەکێک پێش شیعەکان بەرنابگ دەکەنەوە، لە گوندی 'پیرا' مزگەوتی دیکە هەیە، بەڵام مزگەوتی ناوەندی گەورەترینە.

گوندەکە پێنج هەزار کەسی تێدایە، مەزهەبیان جیاوازە و پێکەوە بە ئاشتی دەژین، لە شادی و ناخۆشی یەکدیدا پێکەوەن، گۆڕستانەکەیان هاوبەشە و هاوسەرگیریش لەنێوان پەیڕەوانی دوو مەزهەبەکەدا ئەنجام دەدرێت.

 

محەمەد سدیق خۆی سونەیە و هاوسەرەکەی شیعەیە، دەڵێت، "بەویستی خۆم لەگەڵ کچێکی شیعەدا هاوسەرگیریم کرد، بەڵام بۆ رازیکردنیان زۆر هەوڵمدا، هەوڵدانەکەشم بەهۆی جیاوازی مەزهەبییەوە نەبوو، بەڵکو رازیکردنی بنەماڵەکان بۆ هاوسەرگیرییەکی عاشقانە کارێکی ئاسان نییە".

 

ئاماژەی بەوەشداوە، "18 ساڵ بەسەر هاوسەرگیریەکەماندا تێدەپەڕێت، بەڵام لەگەڵ هاوسەرەکەمدا بە جیا پەرستشی خۆمان ئەنجام دەدەین".

 

ئەمجەد حسێن شاهـ دانیشتویەکی دیکەی گوندەکەیە، دەڵێت، "هەدنێک دایک و باوک هەن لە گوندەکەدا کە پەیڕەوی مەزهەبێکن بەڵام منداڵەکانیان پەیڕەوی مەزهەبێکی دیکەن، چونکە خەڵکی ئێرە دەزانن بابەتی مەزهەب شتێکە پەیوەندی بە تاکەکانەوە هەیە".

 

سەید مەزهەر عەلی پەیرەوی مەزهەبی شیعەیە دەڵێت، "خێزانی زۆر هەیە لە گوندەکەدا کە ژنەکە سونەیە و پیاوەکە شیعەیە، هەندێک خێزانی دیکە هەن بە پێچەوانەوە، هەروەها هەندێک خێزان هەن کوڕێکیان سونەیە و براکەی شیعەیە، لە هەندێک خێزانی دیکەدا باوک سونەیە و کوڕەکانی شیعەن".

 

لە جەژنی قورباندا بنەماڵە شیعە و سونەکان پێکەوە ئاژەڵەکان دەکڕن و قوربانی دەکەن، سەید سەجاد حسێن کازمی، بانگخوازی سوننەیە و دەڵێت: کاتێک یادی لەدایک بوونی محەمەد پێغەمبەری ئیسلام (د.خ) دەکەن، شوێنکەوتوانی شیعەش بەشداری دەکەن، هەروەها لە مانگی موحەڕەمدا سونەکان بەشداری لە مەراسیمی ماتەمینی شیعەکان دەکەن.

 

نزیکەی 100 ساڵ پێش ئێستا، زۆرینەی دانیشتوانی گوندی پیرە سونە بون و حەزێکی بەهێزیان بۆ سۆفیگەری هەبوو، هەموویان نەوەی دامەزرێنەری گوندەکە بوون کە ناوی 'سەید شا محەمەد' بوون، بەڵام نەوەکانی دواتری سەید محەمەد شا، بوونە شیعە و لەئێستادا بنەماڵەکە هەموویان شیعەن. 

 

دۆناڵد ترەمپ باجی زیاتر بەسەر هاوردەكردنی ئۆتۆمبێل و دەرمان بۆ ئەمریكا دەسەپێنێت، وڵاتانی هەناردەكار نیگەرانن و دەڵێن، بێ وەڵام نابن.

دۆناڵد ترەمپ سەرۆكی ئەمریكا رایگەیاند، رێژەی  %25 باج لەسەر هەموو ئەو ئۆتۆمبێلانە زیاد دەكەن كە لە وڵاتانەوە هاوردە دەكرێت، هاوكات باجی سەر هاوردەكردنی دەرمان و داریش زیاد دەكات.
سەرۆكی ئەمریكا، هەر لە كاتی بانگەشەوە رایگەیاند، كە باجی زیاتر بەسەر هاوردەی وڵاتاندا بۆ ئەمریكا  دەسەپێنێت، هاوكات لە كاتی دەستبەكاربونیەوە بە چەند قۆناغێك دەستكردووە بە زیادكردنی ئەو باجانەوە ئەوەش كاردانەوەی نێودەوڵەتی و ناخۆیشی لێكەوتوەتەوە.
ترەمپ ئاماژەی بەوەداوە، باجە نوێكان لە 2ی نیسانەوە دەچێتە بواری جێبەجێكردن، بەڵام ئەو كۆمپانیانە ناگرێتەوە كە كارگەكانیان لە ناوخۆی ئەمریكادا كاردەكەن.

وەكو پاساوێكیش بۆ بڕیارەكەی وتی، ئەگەر لە خولی یەكەمی سەرۆكایەتییەكەیدا باجی لەسەر هاوردەكردنی پۆڵا نەسەپاندایە، ئێستا ئەو كەرتە لە ئەمریكا مایەپووچ دەبوو، بەڵام ئێستا گەشە دەكات.

لەبەرانبەردا حكومەتی ژاپۆن رایگەیاند، ئەو باجە زیادانەی ئەمریكا جێگەی نیگەرانییە و هۆشداریدا لەوەی كە كاریگەری لەسەر پەیوەندییە بازرگانییەكانی نێوان هەردولا و ئابووری جیهانیش دەبێت.

هاوكات ئۆرسۆلا ڤۆندەر لاین سەرۆكی كۆمسیۆنی یەكێتی ئەوروپا نیگەرانی لە بڕیارەكەی ترەمپ دەربڕی و رایگەیاند، لە گفتوگۆكدان بۆ دۆزینەوەی چارەسەر و پاراستنی بەرژەوەندییە ئابوییەكانیان. 

لە لایەكی دیكەشەوە، لولا دا سیلڤا، سەرۆكی بەرازیل رایگەیاند، وڵاتەكەی ناتوانێت بێدەنگ  بێت لە بەرانبەر بڕیارەكەی دۆناڵد ترەمپ، بۆیە ئەو رێگایە دەگرنەبەر كە پێیان وایە سودی بۆ وڵاتەكەی دەبێت.

هاوكات، كۆمەڵەی بەرهەمهێنەرانی ئۆتۆمبێلی ئەمریكی لە راگەیەنراوێكدا هۆشداریدا لەوەی ئەو باجانەی كە لەلایەن دۆناڵد ترەمپەوە سەپێنراوە نابێت ببێتە هۆی بەرزبوونەوەی نرخ، ئاماژەیان بەوەشكردووە،  زۆر گرنگە ئەو باجانە بە شێوەیەك جێبەجێ بكرێن كە نرخەكان بۆ بەكاربەران بەرز نەبێتەوە.

ئەمە لەكاتێكدایە كە بەپێی ئامارەكان ساڵی رابردوو ئەمریكا سێ ملیۆن و 700 هەزار ئۆتۆمبێلی لە ژاپۆن و ئەوروپا و كۆریای باشوور هاوردە كردووە. 

دوای كاردانەوەكانیش لەبەرامبەر بڕیارە نوێكەی، دۆناڵد ترەمپ لە تۆڕی كۆمەڵایەتی تروس سۆشیاڵەوە هەڕەشەی نوێی كرد و رایگەیاند، ئەگەر یەكێتی ئەوروپا لەگەڵ كەنەدا دەست تێكەڵ بكات بۆ ئەوەی زیانی ئابوری بە ئەمریكا بگەیەنن، ئەوا باجی گەورەتر لەوەی ئێستا دەدەن و باجی زیاتر لەوەیان بەسەردا دەسەپێنن كە پلانیان بۆ داناوە.

بڕیارە رۆژی پێنج شەممە وەفدێكێ ئەمریكا بە سەرۆكایەتی  مایك واڵتز، ڕاوێژكاری ئاسایشی نیشتمانی و ئۆشا ڤانس، هاوسەری جەی دی ڤانس، جێگری سەرۆكی ئەو وڵاتە  سەردانی گرینلاند بكەن، سەردانەكە لەكاتێكدایە كە لە 11 ی ئادار هەڵبژاردنی حكومەتی گرینلاند ئەنجامدرا و ئۆپۆزسیۆن سەركەوتنی بەدەستهێنا.

سەبارەت بە سەردانەكە میوت ئیگید سەرۆك وەزیرانی ماوە بەسەرچوی گرینلاند وتی دەبێت ڕێز لە یەكڕیزی و دیموكراسی بگیرێت بەبێ هیچ دەست تێوەردانێكی دەرەكی، ئەمریكییەكانیش بە ڕوونی ئاگاداركراونەتەوە كە ناتوانرێت هیچ كۆبوونەوەیەك ئەنجام بدرێت تا حكومەتی نوێ دەستبەكاردەبێت.

لەبەرانبەریشدا حكومەتی دانیمارك سەردانەكە بە نەشیاو ناودەبات چونكە لە كاتێكدایە كە حكومەتی گرینلاند پێكنەهێنراوە.

لای خۆیەوە دۆناڵد ترامپ سەرۆكی ئەمریكا لە كۆتایی كۆبوونەوەی بەرپرسانی ئیدارەكەی لە كۆشكی سپی سەبارەت بە سەردانەكە وتی ئەمە هەنگاوێكی دۆستانەیە نەك بێزاركەر، وتیشی سەردانەكە لەسەر بانگهێشتی گرینلاند ئەنجام دەدرێت.

لەدوای هەڵبژاردنی بە سەرۆكی ئەمریكا دۆناڵد ترەمپ بانگەشەی كڕینەوەی گرینلاندی كرد لە دانیمارك و ئاماژەی بەوەكرد ئەو دوورگەیە بەهۆی هەڵكەوتەی جوگرافیی و ئەو كانزا بەنرخانەی كە تێیدایە، گرنگی ستراتیژیی هەیە و خاوەندارێتی و كۆنترۆڵكردنی پێویستییەكی ڕەهایە بۆ ئاسایشی نیشتمانی ئەمریكا. لەهەمانكات نیگەرانی خۆی دەربری لە پەرەسەندنی هەژمونی چین و ڕوسیا لە ناوچەكەدا. هاوكات ترەمپ بەكارهێنانی هێزی سەربازی یان ئابووری بۆ ڕازیكردنی دانیمارك بۆ ڕادەستكردنی گرینلاند ڕەتنەكردەوە.

ئەمە لەكاتێكدایە دەسەڵاتدارانی گرینلاند هەر باسێكیان بۆ چوونە سەر ئەمریكا ڕەتدەكەنەوە و جەخت لەوەدەكەنەوە كە داهاتووی دوورگەكە تەنها لەلایەن دانیشتوانەكەیەوە دیاری دەكرێت.

هەروەها مێت فرێدرێكسن سەرۆك وەزیرانی دانیمارك ڕایگەیاند، گرینلاند بەشێكە لە شانشینی دانیمارك و زەوییەكانمان و بۆ فرۆشتن نییە.

گرینلاند، گەورەترین دوورگەی جیهانە و هەرێمێكی ئۆتۆنۆمیەو سەر بە دانیماركە ژمارەی دانیشتووانەكەی تەنها 57 هەزار كەسە.

لە دوای هەڵبژاردنی شارەوانییەكانی توركیا لە 31ی ئاداری 2024، تائێستا 13 سەرۆكی شارەوانی لە باكوری كوردستان و توركیا دوورخراونەتەوە و قەیوم لە شوێنەكانیان دانراوە.

وەزارەتی ناوخۆی توركیا بە بیانووی جیاجیا ژمارەیەكی زۆر لە سەرۆكی شارەوانییەكانی لە پۆستەكانیان دوور خستوەتەوە، هەندێكشیان بە تۆمەتی كاری سیاسی یاخود هاوكاریكردنی رێكخراوی قەدەغەكراو یان بوونی گەندەڵی دەستگیركردووە و سزای زیندانیكردنیان بەسەردا سەپێنراوە.

لە دوایین پێشهاتدا، رۆژی 19ی ئەم مانگە وەزارەتی ناوخۆی توركیا ئەكرەم ئیمامئۆغڵو سەرۆكی گەورە شارەوانی ئیستەنبوڵ و محەمەد موراد چەلیك سەرۆكی شارەوانی ناحیەی بەیلیكدوزو لە پۆستەكانیان دوورخستەوە، هەمان رۆژیش قەیوم بۆ شارەوانی شیشلی دانرا.

هەروەها رۆژی 3ی حوزەیرانی 2024 وەزارەتی ناوخۆی توركیا قەیومی لە شوێنی سەرۆكی شارەوانی هەكاری دانا و (محەمەد سیدیدك ئاكیش)ی سەرۆكی شارەوانی دەستگیركرد، لە 5ی حوزەیران سزای 19 ساڵ و 6 مانگ زیندانیكردنی بەسەردا سەپێنرا.

هاوكات ئەحمەد عوزێر، سەرۆكی شارەوانی جەهەپەی ئەسێنیورت، لە 30ی تشرینی یەكەمی 2024 بە تۆمەتی "ئەندامێتی ڕێكخراوێك"دەستگیركرا، جان ئاكسۆی جێگری پارێزگاری ئەستەنبوڵ لە 31ی تشرینی یەكەم وەك قەیوم لە شوێنەكەی دانرا.

لە رۆژی 4ی تشرینی دووەمی 2024یش پۆلیس هەڵیكوتایە سەر گەورەشارەوانی مێردین و شارەوانییەكانی ئێلح و خەلفەتی رەحا، قەیووم لە جێگەی سەرۆك شارەوانییەكان دانرا، 29ی مانگیش هاوسەرۆكی شارەوانی مكسی وان لە ئەركەكەی دوورخرایەوە و قەیوم لە جێگای دانرا، بە تۆمەتی پڕوپاگەندەی رێكخستن سزای سێ ساڵ و 11 مانگ زیندانی بەسەردا سەپێنرا.

هەروەها هاوسەرۆكانی شارەوانییەكانی ئاكدەنیزی مێرسین ( نوریە ئارسلان و هۆشیار ساریلدیز) لە 10ی كانوونی دووەمدا دەستگیر كران و دواتر زیندانی كران، لە 14ی مانگیش قەیوم لە شوێنیان دانرا.

هەروەها بە تۆمەتی “ئەندامبوون لە ڕێكخستن” لە 28ی كانوونی دووەم هاوسەرۆكی شارەوانی سێرت سزای شەش ساڵ و سێ مانگ زیندانی بەسەردا سەپینرا، وەزارەتی ناوخۆش قەیومی لە شوێنەكەی دانا.

هەروەها عەبدوڵا زەیدان هاوسەرۆكی گەورە شارەوانی وان، بە تۆمەتی “یارمەتیدانی ڕێكخستن” دادگایی كرا و سێ ساڵ و نۆ مانگ سزای زیندانی بۆ بڕایەوە، لە 15ی شوباتی 2025 قەیووم لە شارەوانییەكە دانرا.

لە 24ی شوباتی 2025 هاوسەرۆكی شارەوانی قاخزمانی سێرت بە تۆمەتی “ئەندامبوون لە ڕێكخستن” دادگایی كرا و شەش ساڵ و سێ مانگ سزای زیندانی بەسەردا سەپێنرا و قەیوم لە شوێنەكەی دانرا.

حزبە ئۆپۆزسیۆنەكانی توركیاش بەتایبەت دەم پارتی و جەهەپە داوا لە دەسەڵاتدارانی توركیا دەكەن، دەستبەسەراگرتنی شارەوانییەكان رابگرێت، لەبەرئەوەی بە دەنگی خەڵك و بە هەڵبژاردن سەرۆكی شارەوانییەكانیان وەرگرتووە.

توركیا و ئیسرائیل بە دووڵاتی سودمەندبوو لە روخانی بەشار ئەسەد دادەنرێن، بەو پێیەی ئەو گۆڕانكارییە كاریگەری و هەژموونی ئێرانی لە رۆژهەڵاتی ناوەڕاست كەمكردووەتەوە، بەڵام لە دوای شەڕی غەززەوە، ناكۆكییەكانی نێوان ئەنكەرە و تەلئەبیب گوازراوەتەوە بۆ سوریا كە لەسەر زیادبوون و سەپاندنی دەسەڵات و هەژموونیانە لەو وڵاتە.

بەپێی رۆژنامەی یەدیعوت ئەحرونوتی ئیسرائیلیش، بنیامین ناتانیاهۆ سەرۆك وەزیرانی ئیسرائیل بۆ تاوتوێكردنی رەوشی سوریا و زیادبوونی هەژموونی توركیا لەو وڵاتە، لەگەڵ لێپرسراوانی باڵای ئەمنی وڵاتەكەی كۆدەبێتەوە و دەیەوێت بە هەر رێگەیەك بێت رێگری لە نزیكبوونەوەی توركیا و سوریا بكات، بۆیە ئێستا ناتانیاهو بە نیگەرانییەوە چاودێری نزیكبوونەوەی نێوان دەسەڵاتدرانی نوێی سوریا و حكومەتی توركیا دەكات.

ئاماژەی بەوەشكردوە، ناتیانیاهۆ بە روونی بە لێپرسراوانی وڵاتەكەی وتووە نیگەرانە لەوەی بەرەیەكی نوێی ئیسلامیی سوننە بە سەركردایەتی توركیا وەك جێگرەوەی گروپە چەكدارەكانی نزیك لە ئێران، لە سوریا دروستببێتەوە و بەهەمان شێوە ببێتە هەڕەشەیەكی جددی بۆسەر ئیسرائیل بە تێپەڕبوونی كات، ئەوەش بەهۆی پشتیوانییە بەردەوامەكانی رەجەب تەیب ئەردۆغان سەرۆك كۆماری توركیا بۆ دوژمنە سەرسەختەكانی ئیسرائیل وەك بزوتنەوەی حەماس.

ماڵپەری واڵی ئیسرائیلیش بڵاویكردووەتەوە، حكومەتی سوریا لە گفتوگۆدایە بۆئەوەی بنكەیەكی سەربازیی لە ناوچەی تەدمور سەر بە پارێزگای حومس لە بەرامبەر هاوكارییە ئابووری، سەربازیی و سیاسییەكان رادەستی توركیا بكات.

ماڵپەرەكە راشیگەیاندووە، بوونی سەربازیی توركیا لە رۆژهەڵاتی حومس، بووەتە مایەی نیگەرانییەكی جددی بۆ ئیسرائیل و بەهەموو شێوەیەك هەوڵ دەدات رێگری لەو رێككەوتنەی نێوان دیمەشق و ئەنكەرە بكات.

لە لایەكی تریشەوە یولی ئیدلشتاین سەرۆكی لیژنەی كاروباری دەرەوە و بەرگری لە پەرلەمانی ئیسرائیل رایگەیاندووە، پەیوەندییەكانیان لەگەڵ توركیا لە رەوشێكی خراپدایە، بەڵام هەمیشە ئەگەری تێكچوونی زیاتری هەیە.

رۆژنامەی ۆڵ ستریت جۆرناڵی ئەمریكیش دەڵێت، كێبڕكێی ئەو دوو وڵاتە بۆ ئەوەی دەسەڵاتیان لە سوریا زیاتر ببێت كارەكانی ئەمریكا قورستر دەكات، بەو پێیەی هەردوولایان هاوپەیمانی ئەو ئەمریكان و هەردووكیشیان لە رۆژهەڵاتی ناوەڕاست پێگە و كاریگەریی خۆیان هەیە.

ئەحمەد شەرع سەرۆكی سوریاش بۆ قۆناغی راگوزەر دەڵێت، هیچ گرنگییەك بە ململانێی نێوان توركیا و ئیسرائیل نادات، تەنها دەیەوێت سەرنجی لەسەر ئاوەدانكردنەوەی سوریا بێت، بەڵام لەگەڵ پێكهێنانی سوریای نوێدا لە دوای روخانی بەشار ئەسەد، توركیا وەك دەسەڵاتێكی باڵا دیمەشق دەركەوتووە.

جگە لە قەتەر كە پەیوەندییەكی نزیكی لەگەڵ توركیا هەیە، هاوبەشەكانی تری ئەمریكاش لە ناوچەكەدا بە هەمانشێوە وەك سعودیە و ئیمارات و بەحرەین و ئوردن نیگەرانن لەبارەی زیادبوونی كاریگەرییەكانی توركیا لە سوریای نوێدا و ترسی ئەوەشیان هەیە ئەو نزیكبوونەوەیەی ئەنكەرە و دیمەشق ئاسایشی وڵاتەكانیان تێكبدات.

پرۆژەیاسای دەستەی حەشدی شەعبی كە یەكێكە لەو پرۆژانەی مشتومڕی زۆری لەسەرە و حكومەت و ئەنجومەنی نوێنەرانی عیراق لەسەری ناكۆكن، جارێكی تر خراوەتەوە ناو كارنامەی دانیشتنەكانی ئەنجومەنی نوێنەرانی عیراقەوە. 

تا ئێستا ئەنجومەنی نوێنەران چەند جارێك شكستیهێناوە لە داڕشتنی رەشنووسێك لەبارەی بڕگەكانی پرۆژەیاساكە، بە تایبەتی كە خانەنشینبوونی زیاتر لە سێ هەزار و 500 سەركردەی حەشدی شەعبی لەخۆدەگرێت، لەنێویاندا فالح فەیاز سەرۆكی دەستەی حەشدی شەعبی و ئەوانەی تەمەنی خانەنشینییان تێپەڕاندووە. 

بەهۆی ئەو پرۆژەیاسایەوە هەندێك هێزی دەسەڵاتداری ناو چوارچێوەی هەماهەنگی شیعەكان، دانیشتنەكانی ئەنجومەنی نوێنەرانیان بایكۆتكردووە و بەهۆیەوە نزیكەی دوو مانگە دانیشتنەكان پەكیانكەوتووە، لەسەر ئەوەش رێككەوتوون نەگەڕێنەوە بۆ دانیشتنەكان تا ئەو كاتەی مەرجەكانیان قبوڵ دەكرێت و یاساكە هەموار دەكرێتەوە. 

یەكێك لەو هەموارانەی هێزەكانی ناو چوارچێوەی هەماهەنگی دەیانەوێت لە پرۆژەیاساكەدا بكرێت ئەوەیە، دەسەڵات بدرێتە سەرۆك وەزیرانی عیراق، تەمەنی خانەنشینی بۆ سەرۆكی دەستەی حەشدی شەعبی و بەشێك لە سەركردەكانی تر بۆ پێنج ساڵ درێژ بكاتەوە.

كوتلەی سادیقونیش دەڵێت، پشتیوانی زۆرینەی ئەندامانی ئەنجومەنی نوێنەران هەیە بۆ دیاریكردنی تەمەنی خانەنشینی سەرۆكی دەستەی حەشدی شەعبی لە یاسا نوێیەكەدا.

لە پرۆژەیاساكەدا، حەشدی شەعبی بەستراوەتەوە بە فەرماندەی گشتی هێزە چەكدارەكانەوە كە ئەركیان پارێزگاریكردنە لە سیستمی دەستوری و روبەڕوبوونەوەی تیرۆر.

ئیئتیلافی دەوڵەتی یاساش بە سەرۆكایەتی نوری مالكی دەڵێت، رێككەوتنی سیاسی هەیە پرۆژەیاساكە لە دانیشتنەكانی داهاتووی ئەنجومەنی نوێنەرانی عیراقدا تێبپەڕێنرێت.

بەپێی بودجەی ساڵی 2025ی عیراق، ژمارەی چەكدارانی حەشدی شەعبی بە 238 هەزار چەكدار خەمڵێندراوە و بڕی 2 ملیار و 88 ملیۆن دۆلاریان بۆ تەرخانكراوە.

ئەگەرچی نەورۆز بۆ ماوەی زیاتر لە 65 ساڵ لە قەوقاز قەدەغەكرا، بەڵام جارێكی دیكە ئاهەنگەكانی نەورۆز لە قەوقاز بەڕێودەچوون و دانیشتوانی ئەو وڵاتانە و ژمارەیەك لە كوردانی ئەوێش بە جۆش و خرۆشەوە بەشداریی ئاهەنگەكانی نەورۆز دەكەن.

ساڵی 1926 و لەسەردەمی دەسەڵاتی یەكێتی سۆڤیەت، لە وڵاتانی قەوقاز ئاهەنگ و ئاگری نەورۆز قەدەغە كرا و دوای 65 ساڵ و لەساڵی 1991 دوای ئەوەی نەرۆز لە لایەن نەتەوەیەكگرتوەكانەوە وەك رۆژێكی جیهانی تۆماركرا، جارێكی تر دوای زیاتر لە نیو سەدە ئاگری نەورۆز تروسكایی بۆ مێژویی ئەو وڵاتانە گەڕاندەوە،

بیانوی ئەوكاتی سۆڤیەت بۆ قەدەغەكردنی ئاهەنگەكانی نەورۆز و جەژنی رەمەزان تێچوو و خەرجییەكان بووە.

نەورۆز مێژویەكی دێرینی لەگەڵ وڵاتانی قەوقاز و ژینگەكەیان هەیە و بە ئاهەنگێكی نیشتمانیی ناودەبرێت و لای ئەو كوردانەشی دەستی رۆژگار لەو خاك و وڵاتانە  جێگیری كردون، نەورۆز هێمایەكە  لە بوژانەوە و سەرهەڵدانەوە بۆ ژینگە و مرۆڤ.

نەورۆز لە قەوقاز لە رۆژی 14ی مانگی سێ دەستپێدەكات و بۆ ماوەی 10 رۆژ بەردەوام دەبێت و ئەو 10 رۆژەش هاوكاتە لەگەڵ كردنەوەی ئاگر و ئاهەنگی جەماوەریی و پڕ لە جۆش و خرۆش بەڕێودەچێت.

لە زۆربەی شارەكان لە وڵاتانی قەوقاز لەگەڵ دەستپێكردنی نەرۆز بۆ ماوەی ئەو 10 رۆژە خێمە لە چەند شوێنێك هەڵدەدرێت و هاوشێوەی فێستیڤاڵێك خواردنی خۆماڵیی تایبەت بە قەوقازییەكان پێشكەش دەكرێت و كەلوپەلی كەلتوریش نمایش دەكرێت.

لە دوای ئەوەی نەتەوەیەكگرتووەكان بڕیارەكەی سۆڤیەتی بۆ قەدەغەكردنی نەورۆز لە قەوقاز هەڵوەشاندوە، زیاتر لە 30 ساڵە ئاهەنگەكانی نەورۆز لەو وڵاتانە بە گەرموگوڕیی بەڕێودەچێت و دانیشتوانی ناوچەكەش زۆرینەیان جلی كەلتوریی خۆیان لە رێوڕەسمەكاندا لەبەر دەكەن.

 

لەگەڵ نزیكبوونەوەی وادەی وەڵامدانەوەی نامەكەی دۆناڵد ترەمپ سەرۆكی ئەمریكا لە لایەن ئێرانەوە، جموجۆڵە سەربازییەكانی ئێران و ئەمریكا لە كەنداو زیادیانكردوە، وەزیری دەرەوەی ئێرانیش مەرجەكانی وڵاتەكەی بۆ دانوستان لەگەڵ واشنتۆن ئاشكرا دەكات.

دوای ئەوەی وەزارەتی بەرگریی ئەمریكا (پنتاگۆن) رایگەیاند كەشتییەكی جەنگیی وڵاتەكەی لە زەریای هێمنەوە بۆ كەنداو دەگەڕێنێتەوە و وادەی ئۆپراسیۆنی كەشتییە جەنگییەكانیش لە كەنداو درێژ دەكاتەوە، سوپای پاسدارانی ئێرانیش وەك كاردانەوەیەك بەرامبەر پەیامەكەی پنتاگۆن رایگەیاند، قەڵغانی نوێی موشەكیی رەوانەی سێ دورگەی ئێران لە كەنداو كردوە.

عەلیڕەزا تەنگیسەری یەكێك لە فەرماندەكانی سوپای پاسداران بە میدیاكانی ئێرانی راگەیاندووە، ئەو قەڵغانە موشەكییە لە دورگەكانی نزیك گەروی هورموز لە كەنداو جێگیركراون و دەتوانن ئامانجەكانیان لە دوری 600 كیلۆمەتر بپێكن، هەڕەشەی ئەوەشیكرد كە توانای هێرشكردنە سەر كەشتی و بنكە و قەڵغانی نەیارانی وڵاتەكەیان لە ناوچەكە هەیە.

ئەو جموجۆڵە سەرباییانەی ئێران و ئەمریكا لە كاتێكدایە بڕیارە بەم زوانە تاران وەڵامی نامەكەی ترەمپ بداتەوە كە تێیدا رایگەیاندبوو ئێران تەنها دوو بژاردەی لەبەردەمدایە، ئەویش رێككەوتن یان جەنگ.

عەباس عراقچی وەزیری دەرەوەی ئێرانیش رایگەیاند، بەرنامە ئەتۆمییەكەی وڵاتەكەی پێشكەوتنی زۆری بەخۆیەوە  بینیوە و ناكرێت هاوشێوەی ساڵی 2015 یان 2018  دانوستان لەگەڵ ئەمریكا و وڵاتانی رۆژئاوا بكەن، ئەگەر ئەمریكا سیاسەتی بەرامبەر تاران نەگۆڕێت.

وتیشی، تاران دانوستان رەتناكاتەوە، بەڵام هەڵوێستەكانی واشنتۆن و رەوشی ئێستای نێوان ئێران و ئەمریكا ئەگەری دەستپێكردنەوەی دانوستانی راستەوخۆی لە نێوان هەردوو وڵاتدا لاوازكردوە، بەڵام وەڵامی نامەكەی ترەمپ دەدرێتەوە.

وەزیری دەرەوەی ئێران جەختیشیكردەوە، وڵاتەكەی خوازیاری جەنگ نییە و هەوڵ دەدەن رەوشی وڵاتەكەیان و ئاسایشی نیشتیمانییان لە رێگەی دیپلۆماسییەوە بپارێزن.

 

دوای بڕیارێكی دۆناڵد ترەمپ، 15ی ئادار زیاتر لە هەزار و 300 فەرمانبەری دامەزراوەی میدیایی دەنگی ئەمریكا نێردرانەوە ماڵەوە. لە 83 ساڵی رابردوودا ئەمە یەكەم جارە دامەزراوەكە كە بە زیاتر لە 50 زمان لەوانەش كوردی پەخشی دەكرد بەو شێوەیە كپ دەكرێت.

لە سەردەمی ئیدارەی جۆن كەنەدی سەرۆكی پیشووتری ئەمریكا، ئاژانسی ئەمریكی بۆ گەشەپێدانی نێودەوڵەتی (یو ئێس ئەید) تەرخانكراوە بۆ دابینكردنی كۆمەك و هاوكاری بیانی كە بەهاكەی ساڵانە 20 ملیار دۆلار تێدەپەڕێنێت. بەڵام دۆناڵد ترەمپی سەرۆكی ئەمریكا بە ڕاوێژ لەگەڵ ئیلۆن مەسك دەوڵەمەندترین پیاوی جیهان، دەستیداوەتە هەڵمەتی بچووككردنەوەی هێزی مرۆیی حكومەتی ئەمریكا و كەمكردنەوەی خەرجیەكان بە داخستن و هەڵوەشاندنەوەی دەیان دەزگا و دامەزراوەی سەر بە حكومەتی وڵاتەكە، سەرەكیترینیشیان ئاژانسی ئەمریكی بۆ گەشەپێدانی نێودەوڵەتییە.

هەفتەی رابردوو دۆناڵد ترەمپ لە بڕیارێكدا (ئاژانسی ئەمریكی بۆ میدیای جیهانی) لەكارخست كە سەرپەرشتی دەنگی ئەمریكا و رادیۆی ئەوروپای ئازاد و رادیۆی ئاسیای ئازادی دەكرد. رادیۆی ئەوروپای ئازاد پەخشی بۆ وڵاتانی ڕۆژهەڵاتی ئەوروپا لەوانە روسیا و ئۆكراین دەكرد و رادیۆی ئاسیای ئازادیش بڵاوكراوەكانی بۆ وڵاتە ئاسیاییەكانی وەك چین و كۆریای باكوور بوون. دوای بڕیارەكەی ترەمپ پاڵپشتی داراییان لەدەست دا.

بڕیارەكانی ترەمپ كاریگەری راستەوخۆی كردووەتە سەر زیاتر لە دوو ملیۆن و 300 هەزار فەرمانبەری حكومەتی ئەمریكا، تاكو ئێستاش زیاتر لە 100 هەزاریان لەسەر كار لابراون. هەروەها ٪83ی كۆمەكی بیانی لەلایەن ئەمریكاوە راگیراوە.

دەنگی ئەمریكا گەورەترین و كۆنترین دامەزراوەی میدیایی نێودەوڵەتی ئەمریكایە كە لە بنەڕەتدا لە گەرمەی جەنگی دووەمی جیهانی بۆ پاڵپشتیكردنی هاوپەیمانان لە  بەرپەرچدانەوەی پڕوپاگەندەی نازییەكان دامەزرا. لەدوای ئەو كاتەوە هەتا 15ی ئاداری ئەمساڵ بەردەوام بوو لە پەخش و رۆڵێكی بەرچاوی گێڕاوە لە گەیاندنی زانیاری و هەواڵ بەو ناوچانەی جیهان كە ئازادی راگەیاندن بوونی نییە یان سنووردارە، بەتایبەت وڵاتانی وەك چین و ئەفغانستان كە لەلایەن حكومەتەوە بڵاوكراوەكانیان  سنوردار كراوە و هاووڵاتیان جگە لە میدیای حكومی، دەستیان بە هیچ میدیایەكی تری سەربەخۆ ناگات.

لە عیراقدا ژمارەیەك میدیا لەلایەن ئاژانسی ئەمریكی بۆ میدیای جیهانی سەرپەرشتی دەكران و بودجەیان  بۆ تەرخان دەكرا، لەوانە كەناڵی حوڕە و رادیۆی سەوا و دامەزراوەی عیراق حوڕ، لە دوای بڕیارەكەی دۆناڵد ترەمپ بودجەی هەموویان بڕا و لەكاركردن وەستان.

دوای بەدواداچوونی كوردسات نیوز دەركەوت، ئەو كارمەندانەی دەنگی ئەمریكا كە لە هەرێمی كوردستان و عیراق و رۆژهەڵاتی ناوەڕاست بە گرێبەست كاریان بۆ دەنگی ئەمریكا دەكرد، بەبێ هیچ ئاگاداركردنەوەیەكی رەسمی دوای بڕیارەكانی سەرۆكی ئەمریكا كارەكانیان لەدەستداوە و چیتر ناتوانن بەردەوامی بە ڕۆڵیی میدیایی خۆیان بدەن.

لیژنەی داكۆكی لە ئازادیی رۆژنامەنووسی و مافی رۆژنامەنووسانی سەر بە سەندیكای رۆژنامەنووسانی كوردستان، لەسەر بڕیارەكان هاتەدەنگ  و نیگەرانی دەربڕی لەبارەی داخستنی دەنگی ئەمریكا و میدیاكانی تری هەرێم و عیراق كە لەلایەن بەرنامەكانی ئەمریكاوە پاڵپشتیدەكران.

 لیژنەكە داوای كرد پێداچوونەوە بە بڕیارەكاندا بكرێت و بژێوی ئەو كەسانەی كاریان بۆ ئەو دامەزراوانە دەكرد بە هەند وەربگیرێت.

دەنگی ئەمریكا و دەزگاكانی تر كە داخران لە سەرانسەری جیهاندا بینەر و بیسەرێكی بێشوماریان هەیە، بەتایبەت لەو وڵاتانەی ئازادیی راگەیاندن سنوردارە. چالاكوانان و میدیاكاران و نوسەران ترسیان لێ نیشتووە پەكخستنی ئەو دامەزراوانە كاریگەریی خراپی لەسەر ئازادی و مافی مرۆڤ هەبێت، بەتایبەت لەو وڵاتانەی تەنیا راگەیاندنەكانی حكومەت و دەسەڵات بڵاوكراوەیان هەیە.

"رۆژی جیهانی ئاو ( World Water Day)"

رۆژی جیهانی ئاو لە 22ی ئاداری هەموو ساڵێکدا بەڕێوەدەچێت بە ئامانجی تیشک خستنە سەر گرنگی ئاوی شیرین و پێشخستنی بەڕێوەبردنی بەردەوامی سەرچاوەکانی. ئەم رۆژە وەک ئیلهامبەخشێکە بۆ هۆشیارکردنەوەی خەڵک سەبارەت بە بابەتەکانی پەیوەست بە ئاو و فێرکردنی خەڵک لەسەریان و هاندانیان بۆ ئەنجامدانی کارێک کە بتوانێت گۆڕانکاری دروست بکەن و گۆڕانکاری لەو بابەتانەدا بهێنێتە ئاراوە.

بیرۆکەی بەرزڕاگرتنی رۆژی جیهانی ئاو لە ساڵی 1992 لە کاتی کۆنفرانسی نەتەوە یەکگرتووەکان بۆ ژینگە و گەشەپێدان لە شاری ریۆ دی جانیرۆی بەرازیل سەریهەڵدا، دواتر کۆمەڵەی گشتی نەتەوە یەکگرتووەکان لەو ساڵەدا بڕیارێکی پەسەند کرد بۆ دیاریکردنی رۆژێک بۆ ڕۆژی جیهانی ئاودا، یەکەم ڕۆژی جیهانی ئاو لە ساڵی 1993 بەڕێوەچوو و لەو کاتەوە هەموو ساڵێک پرسێکی دیاریکراوی پەیوەست بە ئاوەوە دەستنیشان دەکرێت بۆ تیشک خستنە سەری و هۆشیارکردنەوەی خەڵک دەربارەی.

ئاهەنگ و بۆنە جیهانییەکانی دیکە سەریان هەڵداوە بۆ جەختکردنەوە لەسەر گرنگی جێبەجێکردنی بەڕێوەبردنی دروستی ئاو و شێوازەکانی پاکوخاوێنی. ئەم هەوڵانە بەشدارییەکی بەرچاویان هەیە لە کەمکردنەوەی هەژاری و گەشەپێدانی ئابووری و بەردەوامیی ژینگەیی، نموونەی ئەم جۆرە روداوانە بریتین لە ساڵی نێودەوڵەتی هاوکاری ئاو لە ساڵی 2013 و یەکەی نێودەوڵەتی بۆ کارکردن سەبارەت بە ئاو بۆ گەشەپێدانی بەردەوام لە ساڵی 2018 تا 2028.

گرنگی رۆژی جیهانی ئاو

لەگەڵ زیادبوونی ژمارەی دانیشتوانی جیهان، خواست لەسەر ئاویش بەرز دەبێتەوە، ئاو شتێکی بنەڕەتییە بۆ ژیان، نەک تەنها بۆ شکانی تینوێتی و پاراستنی تەندروستی، بەڵکو بۆ پشتیوانیکردن لە گەشەپێدانی ئابووری و کۆمەڵایەتی، و رەخساندنی هەلی کار. ئەمەش گرنگی ئاهەنگگێڕان بۆ رۆژی جیهانی ئاو دەخاتە روو و بۆ هۆشیارکردنەوەی خەڵک سەبارەت بە بەکارهێنانی ئاو بە شێوەیەکی بەرپرسیارانەتر و هاوسەنگکردنی پێداویستییەکانی ئاوی کۆمەڵگا لە هەمان کاتدا دڵنیابوون لە هاوکاری بۆ ئەو کەسانەی کە ناتوانن دەستیان پێی بگات.

چەند زانیارییەک دەربارەی ئاو:

-لەسەدا 71 گۆی زەوی لە ئاو پێک دەێت

-تەنها ٪3 ـی ئاوی سەر زەوی بۆ خواردنەوە دەبێت

-لە٪60 ـی لەشی مرۆڤ لە ئاو پێکهاتووە

-مرۆڤ رۆژانە پێویستی بە 2-3 لیتر ئاو هەیە بیخواتەوە

-ئاوی گەرم خێراتر دەیبەستێت وەک لە ئاوی سارد

ئاوی ژێر زەوی رێژەی 90 لە سەد زیاتری ئاوی سازگاری گۆی زەوی پێک دێنێت و بۆ خواردنەوە و کاری رۆژانەی ماڵان و ئاودێری و کۆمەڵێک بواری دیکە بەکار دەهێندرێت ، ئەو ئاوە لە ماوەی سەدان و هەزاران ساڵ لە شێوەی حەوزی جیاجیا لە چینەکانی خوارەوەی زەوەی کۆبۆتەوە ، لەم سەردەمەدا کە خواست لەسەر ئاو و بەکارهێنانی زۆر زیادی کردووە و بە فیڕۆدانیش بە تایبەت لە وڵاتە دواکەوتووەکان زۆرە ، جێگرتنەوەی بوونەوەی ئاوی ژێر زەوی لەچاو بەکار هێنانی زۆر زۆر کەمترە ، بۆیە مەترسیەکی گەورە لەسەر بڕی ئاوی ژێر زەوی دروست بووە ، بۆیە نەتەوە یەکگرتووەکان لەو بارەیەوە هۆشداری دەدات لەوەی ئاوی سازگار لە مەترسیەکی گەورە دایە و لەوەیە چەندین کارەساتی مرۆیی روبدات و کێشەی گەورە لەسەر پرسی ئاو لە نێوان چەندین دەوڵەتانی دنیا هەیە و لە داهاتووش هی دیکە دروست دەبێت .

 هەرێمی کوردستان دەوڵەمەندە بە ئاوی ژێر زەوی ، بەڵام بە هۆی کەم سوود بینین لە ئاوی روبارەکان یان ئاوی سەر زەوی ، وە لێدانی هەزاران بیر بە شێوەیەکی یاسایی و نازانستی بۆ بەرژەوەندی تایبەتی ، وای کردووە ئاستی ئاوی ژێر زەوی لە هەموو ناوچەکانی کوردستان زۆر دابەزێت ، هەروەها بە هۆی ماددەی پیسکەر و زیانبەخش لە زۆر جێگە ، مەترسیەکی گەورە لەسەر ئاوی ژێر زەوی ئەو سەروەتە نیشتمانیە گرانبەهایە دروست کردووە.

ئەو چالاکییانەی کە دەتوانرێت لە رۆژی جیهانی ئاودا ئەنجام بدرێت: 

- دروستکردنی تابلۆی سەرنجڕاکێش و ڕەنگاوڕەنگ، دانانیان لە سەر رووی سینک و حەوزی دەست شۆرەکانی ناو ماڵ و قوتابخانەکان بە مەبەستی بیربخستنەوەی خەڵک کە دوای دەستشۆردن یان شوشتنی ددانەکانیان ئاوی بەلوعەکە بگرنەوە.

-هاندانی ئەندامانی خێزان و خوێندکاران بۆ بەشداریکردن لە چالێنجێک بۆ تەواوکردنی ژەمەکانیان و هەڵگرتنی پاشماوەکانیان بۆ دواتر بۆ کەمکردنەوەی بەفیڕۆدانی خۆراک، ئەمەش لە بەرانبەردا دەتوانێت یارمەتیدەر بێت لە کەمکردنەوەی بڕی ئەو ئاوەی کە لە بەرهەمهێنانی خۆراکدا بەکاردەهێنرێت.

-هۆشیارکردنەوەی خەڵک سەبارەت بە بەکارهێنانی باشتری ئاو و گەڕان بەدوای رێگەی زیادە بۆ پاراستنی سەرچاوەکانی ئاو.

-چالێنجێک رێکبخە کە بەشداربووان سەتڵێک ئاو لەسەر سەریان هەڵبگرن و مەودایەکی دوور بە پێ بڕۆن، ئەم چالاکییە ئامانجی یارمەتیدانی خەڵکە بۆ ئەوەی لە ملیۆنان کەس تێبگەن، بەتایبەتی منداڵان، کە دەبێت چەند میلێک بە پێ بڕۆن بۆ گەیشتنیان بە سەرچاوەیەکی ئاو و وە هەڵگرتنی بۆ ماڵەوە.

ئەكرەم ئیمامئۆغڵو كە  ساڵی 1971 لە شارۆچكەی ئاكچە ئاباد، سەر بە پارێزگای ترابزۆن لەدایك بوە و خوێندنی بەشی بازرگانیی لە ئیستەنبول تەواو كردووە، هەر لەو شارەش ماوەتەوە و  وەكو خۆشی دەڵێ، دوای تەواكردنی خوێندن خواردنگەیەكی لە ئیستانبوڵ كردوەتەوە و رەجەب تەیب ئەردۆغانیش بە رێككەوت روی لە خواردنگەكەی كردوە، بەڵام پارەی ئەو كفتەیەی نەداوە كە خواردویەتی، ئەوەش بووەتە بەشێك لە مێژویی پەیوەندییەكانی نێوان ئەو دوو سیاسەتمەدارە .

ئیمامئۆغڵو لە ساڵی 2014 كە بوە سەرۆكی شارەوانیی  بەیلەكدوزو، سەر بە ئیستەنبوڵ دەستی بە كاری سیاسیی كرد،  بەڵام هەر زوو بوە ركابەرێكی بەهێزی بیناڵی یەڵدرم دۆستی دێرینی ئەردۆغان، دواجار شكستی بەو كاندیدەی پارتی داد و گەشەپێدان ئاكەپە هێنا و ساڵی 2019 بەوە سەرۆكی شارەوانیی گەورەی ئیستەنبوڵ.

ئەگەرچی ئاكەپە وەك پارتی دەسەڵاتدار ئەنجامی یەكەم هەڵبژاردنی لە ئیستەنبوڵ رەتكردەوە و هەڵبژاردنەكانیش دوبارە كرایەوە، بەڵام جارێكی دیكە ئیمامئۆغلو سەركەوتنی گەورەی بەرامبەر دۆستە دێریینەكەی ئەردۆغان بەدەست هێنا.

سەركەوتنەكەی ئیمامئۆغڵو بە گەورەترین گورزی مێژویی دژی ئاكەپە و ئەردۆغان لەقەڵەم دەدرێت بە تایبەت كە لە توركیا هەر پارتێكی بەهێز، گرەوی لەسەر بەدەستەوە گرتنی دەسەڵاتی ئیستانبوڵە، چونكە بەدەستەوە گرتنی ئەو شارە هەنگاوێكە بۆ بەدەستهێنانی پۆستی  سەرۆك كۆماری توركیا.

كورد رۆڵی سەرەكیی هەبوو لە سەركەوتنی ئیمائۆغڵو بە تایبەت كە ژمارەی دەنگدەرانی و دانیشتوانی كورد لەو شارە گەورەیە زۆر بەرچاوە و رەنگە بگاتە 25٪ سەرجەم دەنگەكان.

ئیمامئۆغڵو لەو رۆژەوەی بووەتە سەرۆك شارەوانیی ئیستەنبوڵ بە بەردەوامی روبەڕوی دۆسیە و تۆمەتی وەك بەرتیل و گەندەڵی كراوەتەوە، بەڵام دۆسیەی ئەمجارەی قورسترە لەسەرجەم دۆسیەكانی رابردو چونكە داواكاریی گشتی توركیا تۆمەتباری كردوە بە سەركردایەتی گروپی تاوانكاری و گەندەڵی دارایی و پشتیوانیكردن لە تیرۆر.

دەستگیركردنەكەی سەرۆك شارەوانیی ئیستەنبوڵ گەورەترین ناڕەزایەتیی و كاردانەوەی لە شارە گەورەكان و بە تایبەت ئەنكەرەی پایتەخت لێكەوتەوە كە ئەوەش بەرفراوانترین ناڕەزایی مێژوی توركیایە كە لە دوای هەوڵی كودەتاكەی ساڵی 2016ی توركیا رویدابێت.

جەهەپە وەك گەورەترین پارتی ئۆپۆزسیۆنی توركیا دەستگیركردنی ئیمامئۆغڵوی بە كودەتا دژی دەستوری وڵات ناوهێناوە و پارتی یەكسانی و دیموكراسی گەلان دەمپارتی داوای دەستبەجێ ئازادكردنیان كردوە و هاوكاتیش وڵاتانی ئەڵمانیا و فەرەنسا ئیدانەی دەستگیركردنەكەیان كردوە.

ئیمام ئۆغلو كە بە ركابەری سەرەكیی سەرۆك كۆماریی داهاتوی توركیا بەرامبەر كاندیدی ئاكەپە لەقەڵەم دەدرێت روبەڕوی قورسترین تۆمەتی مێژوی سیاسیی بوەتەوە و ئێستاش كورد بەهۆی ململانێی جەهەپە و ئاكەپە رەنگە جارێكی دیكە ببێتەوە قوربانیی و ساڕێژكردنی برینە مێژوییەكەی و دەسپێكردنەوەی پرۆسەی ئاشتیی دوابكەوێت.

لە چوارچێوەی هەڵكوتانە سەر ماڵان و دەستگیركردنی سیاسەتمەداران لە توركیا، ئەكرەم ئیمامئۆغڵو سەرۆكی گەورەشارەوانی ئیستەنبۆڵ لەسەر پشكی جەهەپە و رەسوڵ ئەمراح شاهان سەرۆكی شارەوانی شیشلی و محەمەد موراد چالك سەرۆكی شارەوانی بەیلیكدوزو، لەلایەن پۆلیسی توركیاوە دەستگیركران، فەرمانی دەستگیركردنیش بۆ 100 كەسی تر لە گەورەشارەوانی ئیستەنبۆڵ دەركرا.

داواكاری گشتی ئیستەنبوڵ، ئەكرەم ئیمامۆغڵوی بە تۆمەتی گەندەڵی و هاوكاریكردنی پەكەكە و كەجەكە و دروستكردنی بڕوانامەی ساختە دەستگیركردوە، وەك سەرۆكی رێكخراوێكی رێخستنی تاوانیش ناساندویەتی، رۆژێك پێش دەستگیركردنەكەشی لەلایەن زانكۆكەیەوە بڕوانامەكەی لێوەرگیراوەتەوە.

لە دژی كاردانەوە و ناڕەزاییەكانیش پارێزگاری ئیستەنبوڵ هەموو جۆرە كۆبوونەوە و خۆپیشاندان و راگەیەنراوێكی رۆژنامەوانی تا 23ـی ئەم مانگە قەدەغەكرد، لەو چوارچێوەیەشدا وێستگەی میترۆی تەقسیم و هەندێك شەقامی سەرەكی ئیستەنبوڵ داخران.

دەوڵەت باخچەلی سەرۆكی گشتیی مەهەپەش لەبارەی دەستگیركردنی ئیمامئۆغڵو دەڵێت، دەبێت بە ئارامی لەو ئیرادە دادوەریە بڕوانرێت كە لەبارەی سەرۆكی گەورەشارەوانی ئیستەنبوڵ دەكرێت، بەڕێزەوە پێشوازی لەهەر بڕیارێك بكرێت كە یاسا دەیدات.

بەڵام هاوسەرۆكانی پارتی یەكسانی و دیموكراتی گەلان "دەم پارتی" دژی دەستگیركردنی ئیمامئۆغڵون و دەڵێن، بابەتەكە كودەتایە دژی یاسا و ئیرادەی خەڵك.

تولای هاتیمئۆغلاری رایگەیاندوە، ئەو دەستگیركردنە شەرمەزارییەكی گەورەیە و لە مێژوی توركیادا لەبیر ناكرێت، تونجەر باقرخانیش دەڵێت، دەستگیركردنەكە هێرش و كودەتایەكی ئاشكرایە بەرامبەر دیموكراسی و ئیرادەی گەل و پێویستە دەسەڵات بچێتە سەر رێگەی راست و هەموو دەستگیركراون ئازاد بكات.

بەپێی لێكۆڵینەوەكانی سەرۆكایەتی داواكاری گشتیی كۆماری ئیستەنبوڵیش لە بارەی ئەكرەم ئیمامئۆغڵو، لێكۆڵینەوەكان بۆ دەستگیركردنی 99 گومانلێكراوی تریش بەتۆمەتی "بوونە بەڕێوەبەری ڕێكخراوی تاوانكاری و ئەندامبوون لە رێكخراوی تاوانكاری و بەرتیل وەرگرتن و بەرتیلدان و بەدەستهێنانی زانیاری كەسی بە نایاسایی و ساختەكاری" بەردەوامە.

لە دژی دەستگیركردنی ئیمامئۆغلو و ئەندامانی تری جەهەپەش لە ناوچەی موغلای سەر بە ئیستەنبوڵ، گردبوونەوەیەك رێكخرا، دواتر لەلایەن پۆلیسەوە هێرشیان كرایە سەر و پێنج كەس دەستبەسەركران.

وەزیری دادی توركیاش دەڵێت، پێویستە ئەوە روون بێت كە لە لەدەوڵەتی یاسادا ئەگەر بانگەشەی تاوانێك هەبێت، ئەو شوێنەی بەرگری تێدا دەكرێت شەقامەكان نین، بەڵكو دەسەڵاتی دادوەرییە.

ئەوەش لە كاتێكدایە ئەكرەم ئیمام ئۆغڵو، لە 22ـی شوباتی رابردوو وەك كاندیدی پارتی گەلی كۆماری "جەهەپە" فۆڕمی كاندیدبوونی بۆ هەڵبژاردنی سەرۆك كۆماری توركیا پڕكردەوە و داواكارییەكەی پێشكەش بە یاریدەدەری سەرۆكی گشتی جەهەپە بۆ كاروباری هەڵبژاردن كرد، بڕیاریشە لە 23ی ئادار لە هەڵبژاردنی ناوخۆیی حزبەكەیدا بەرەسمی بۆ كاندیدی سەرۆك كۆماری توركیا دیاری بكرێت كە بڕیارە لە ساڵی 2028 بەڕێوەبچێت.

بۆ جارێكی تر دیمەنەكانی شڵەژاوی و وێرانكاری لە غەززە دەستیپێكردەوە، ئەوەش لە دوای ئەوەی ئیسرائیل كۆتایی بە ئاگربەست هێنا و بە چڕی بۆردومانەكانی بۆ سەر كەرتەكە دەستپێكردەوە.

بۆردومانەكانی ئیسرائیل كە سەدان كوژراو و برینداری لێكەوتەوە، جارێكی تر دڵەراوكێی لای فەلەستینیەكان دروستكردەوە، نەخۆشخانەكانی غەززە هەرزوو پر بونەوە لە بریندار و فشارێكی زۆریان لەسەر دروست بوو، دانیشتوانی كەرتەكەش سەرلەنوێ كەوتنەوە دڵەراوكێ.

بەپێی ئامارێكی نوسینگەی كاروباری مرۆیی سەر بە نەتەوەیەكگرتوەكان، لە بۆردومانەكانی بەرەبەیانی 18ـی ئاداردا، زیاتر لە 400 كەس كوژراون كە لەو ژمارەیە 170 یان منداڵ و 80 یان ژنن.

دەشڵێت تەنها چوار نەخۆشخانە لە ناوچەكە بە تەواوی لە كاردان و 22 نەخۆشخانەی تر تەنها بەشێكیان كار دەكات و 17 نەخۆشخانەش لەكار كەوتون، هەموو ئەوانەش فشارێكی گەورەیان لەسەر نەخۆشخانەكانی غەززە دروستكردوە كە بە وتەی بەرێوەبەری نەخۆشخانەی شیفا رەوشەكە كارەساتبارە .  

 

بەرەبەیانی رۆژی چوارشەممە دوو كەشتیوانەكەی ناسا دوای 286 رۆژ لە گیرخواردنیان لە بۆشایی ئاسمان، دەگەڕێنرێنەوە سەر زەوی و لە بنكەی ئاسمانی فلۆریدا دەنیشنەوە.

رۆژی هەینی رابردوو ئاژانسی ناسا و كۆمپانیای سپەیس ئێكسی ئەمریكی، تیمێكی 10 كەسییان بە كەشتی سپەیس ئێكس دراگۆن، رەوانەی بۆشایی ئاسمان كرد بۆ گەڕاندنەوەی (بوچ ویلمۆر و سونی ویلیامز)ی كەشتیوان كە ماوەی زیاتر لە 9 مانگە گیرییان خواردووە و ناتوانن بگەڕێنەوە سەر زەوی.

ئەمە دووەم هەوڵی ناسایە بۆ گەڕاندنەوەی ئەو دوو كەشتیوانە، هەوڵی پێشووتر لە 12ی ئادار بوو، بەڵام بەهۆی لەكاركەوتنی سیستمی هایدرۆلیكی كەشتییەكە هەوڵەكە شكستی هێنا.

لە 5ی حوزەیرانی 2024، ویلمۆر و ویلیامز گەیشتنە وێستگەی نێودەوڵەتی بۆشایی ئاسمان و دەبوو تەنیا بۆ ماوەی كەمتر لە 10 ڕۆژ لەوێ بمێننەوە، بەڵام گەڕانەوەیان دواخرا، دوای ئەوەی بەهۆی دزەكردنی هیلیۆم و كێشەی پاڵنەرەوە، كەشتیەكە كێشەی تێكەوت.

كەشتییەكە دوای چەند هەفتەیەك لە هەوڵدان بۆ چاككردنی، بەبێ ویلیامز و ویلمۆر گەڕێندرایەوە بۆ سەر زەوی، بەڵام بەهۆی دواكەوتنی كاری تەكنیكییەوە، گەڕانەوەی دوو كەشتیوانەكە لەنێو كەپسولە گیرخواردووەكە تا ئێستا دواكەوتووە.

گیرخواردنی ئەو دوو كەشتیوانە، دوای سێ جار هەوڵدانی ناسا هات بۆ رەوانەكردنیان بۆ بۆشایی ئاسمان، بە كەشتی بۆینگ ستار لاینەر.

دوو هەوڵی پێشووی ناسا بۆ ناردنی ئەو دوو كەشتیوانە ئەمریكییە بەر لە رەوانەكردنیان هەڵوەشێندرابوویەوە، بەڵام لە هەوڵی سێیەمدا سەركەوتنی بەدەستهێنا و كۆمپانیای بۆینگ ئەركی گەشتەكەی لەئەستۆگرت.

ئەگەرچی گیانی دوو كشتیوانەكە كەوتووەتە مەترسییەوە و تا ئێستا ناسا شكستی هێناوە لە گەڕاندنەوەیان، بەڵام دۆناڵد ترەمپ سەرۆكی ئەمریكا و ئیلۆن مەسك خاوەنی كۆمپانیای سپەیس ئێكس بابەتەكەیان بە سیاسی كردووە و پێیانوایە دوو كەشتیوانەكە لەلایەن ئیدارەی پێشووی بایدنەوە لە بۆشایی ئاسمان بەجێهێڵدراون.

گیرخواردنی تیمەكەی ناسا لە بۆشایی ئاسمان یەكەمجار نییە، لە رابردووشدا پێنج گەشتی تری ئاسمانی لە كاتی گەڕانەوەیان شكستیان هێناوە و بۆ ماوەی زیاتر لە 300 رۆژ ماونەتەوە، بەڵام درێژترینیان گەشتی ئاسمانی فرانك ڕوبیۆ بوو لە ئەیلولی 2023 كە 371 رۆژی خایاند.

گوێدرێژ و درۆن، ئاڕاستەی ململانێ سەربازییەكانی ئۆكراین و روسیا دەگۆڕن، هەردوولا هەوڵ دەدەن تەكنیكی جیاواز لە شەڕەكەدا تاقی بكەنەوەو زیانەكان لەسەر خۆیان كەمبكەنەوە.

وەفدێكی باڵای ئۆكراین بە سەرۆكایەتی زیلینسكی و وەزیری دەرەوە لە جەددەی سعودیەن بۆ گفتوگۆكردن لەگەڵ ئەمریكا سەبارەت بە كۆتاییهێنان بە شەڕی سێ ساڵەی لەگەڵ روسیا.

ئەم كۆبوونەوەیە گرنگترین و رەنگە دوایین هەوڵی ئۆكراین بێت لە دوای دیدارە توندەكەی زیلینسكی و ترەمپ لە كۆشكی سپی لە 28ی شوباتی رابردوو بۆ چاككردنەوەی پەیوەندییە دیبلۆماسیەكانی نێوانیان، لە هەمانكاتدا كیێڤ هێرشێكی درۆنی گەورەی كردە سەر مۆسكۆ كە خۆی لە 330 درۆنی خۆكوژدا بینییەوە.

روسیاش لە وەڵامی هێرشە درۆنیەكەی ئۆكراین، 12 شارۆچكە و زیاتر لە 100 كیلۆمەتر چوارگۆشەی لە ناوچەی كورسك كۆنترۆڵ كرد.

بەپێی راپۆرتەكان، روسیا لەم دواییانەدا ئەسپ و گوێدرێژی لە شەڕی دژی ئۆكراین بەكارهێناوە بۆ گواستنەوەی كەرەستەو پێداویستی سەربازی و تەنانەت گواستنەوەی سەربازانیش.

راپۆرتەكان دەڵێن، سوپای روسیا دەیەوێت سەرنجی درۆنەكانی ئۆكراین لەسەر خۆی دووربخاتەوە كە بە ئاسانی دەتوانن ئۆتۆمبێلی زرێپۆش و جوڵاو لە نزیك هێڵەكانی پێشەوەی شەر دەستنیشان بكەن و بیانكەنە ئامانج.

پەنابردنی مۆسكۆ بۆ گوێدرێژ كە وەك فریادڕەس بۆ ئەم قۆناغە لێكدەدرێتەوە، لەكاتێكدایە شەڕەكە لە ئاستێكی تەقلیدییەوە گۆڕٍاوە بۆ ئاستێكی تەكنەلۆژیای بەرز كە تیایدا فڕۆكەی بێفڕۆكەوان و لەیزەر و ئامێرە ئەلیكترۆنیەكانی تەشویش و هاك كردن باڵادەستن تیایدا.

بەكارهێنانی ئەسپ لە جەنگەكاندا دەگەڕێتەوە بۆ دەوروبەری ساڵی 1500ی پێش زایین، كاتێك بۆ ڕاكێشانی گالیسكەو دابینكردن و گواستنەوەی كەرەستەی سەربازی بەكاردەهێنرا.

هەر لەوبارەیەوە رۆژنامەی وۆڵ ستریت جۆرناڵ دەڵێت، هێزە تایبەتەكانی ئەمریكا لە سەرەتای داگیركردنی ئەفغانستاندا گوێدرێژ و ئەسپیان بەكارهێناوە.

رۆژنامەكە بەگێڕانەوە لە سەربازە ئۆكراینییەكان دەڵێت، بۆ یەكەمجار سەربازە روسەكانیان بە سواری گوێدرێژەوە بینیوە، تووشی شۆك بوون، چونكە هیچ كات پێشبینی ئەوەیان نەكردووە، هەرچەندە پێشتر بە ماتۆڕ سكیل چەندین هەوڵی لەوشێوەیەیان پوچەڵ كردووەتەوە.

لە كاتێكدا كە روسەكان ئەسپ و گوێدرێژ بەكاردەهێنن، سوپای ئۆكراین عەرەبانەی دەستی بەكاردەهێنێت بۆ گواستنەوەی دار و پێداویستی سەربازی و تەنانەت بریندارەكانیش بەدرێژایی چەندین كیلۆمەتر، ئەویش بەهەمانشێوە بۆ لابردنی سەرنجی تانك و درۆنەكانی روسیایە.

رۆژنامە ئەمریكیەكە دەڵێت، سوپای روسیا مانگی رابردوو تووشی كێشە بووە لە دابینكردنی تەقەمەنی و كەرەستە و خۆراك بۆ هەندێك لە بەرەكانی شەڕ و لەبەر ئەم هۆكارەش پەنای بۆ بەكارهێنانی گوێدرێژ بردووە بۆ گواستنەوەی خزمەتگوزارییە لۆجستییەكان.