فەرماندەی هێزی تایبەتی ئەمریكا گەیشتە رۆژهەڵاتی ناوەڕاست بۆ چاودێریكردنی جێبەجێكردنی ئاگربەستی نێوان لوبنان و ئیسرائیل. 

فەرماندەی ناوەندی ئەمریكا ناسراو بە "سێنتكۆم" رایگەیاند، جاسپەر جێفەرز فەرماندەی هێزی تایبەتی ئەمریكا گەیشتوەتە رۆژەهەڵاتی ناوەڕاست و لەگەڵ جۆسێف عەون فەرماندەی سوپای لوبنان كۆبووەتەوە بۆ تاوتوێ كردنی دۆخی ئێستای باشوری لوبنان. 

دەشڵێت، جێفەرز لەگەڵ ئاموس هۆكستاین راوێژكاری سەرۆكی ئەمریكا كاردەكات بۆ چاودێریكردنی میكانیزمی جێبەجێكردنی ئاگربەستی نێوان ئیسرائیل و لوبنان. 

، ئەمریكا سەرۆكایەتی لیژنەیەكی هاوبەش دەكات بۆ چاودێریكردنی دۆخەكە، لیژنەكە لە سوپای لوبنان و ئیسرائیل و هێزی ئاشتی پارێز و فەڕەنسا پێكدێت. 
 

بەڕێوەبەری روانگەی سوری بۆ مافەكانی مرۆڤ دەڵێت، پێشبینی دەكرێت رووداوەكانی حەلەب رێككەوتنێكی نێودەوڵەتی بێت بۆ دەركردنی گرووپە چەكدارەكانی هاوپەیمانی ئێران لە سوریا.

رامی عەبدولڕەحمان بەڕێوەبەری روانگەی سوری بۆ مافەكانی مرۆڤ رایگەیاند، ئەگەر گرووپە چەكدارەكان لە حەلەب بەم شێوەیەی ئێستا بەردەوام بن لە پێشڕەویكردن و كۆنترۆڵكردنی حەلەب و دەوروبەری بەبێ‌ شەڕ و كشانەوەی سوپای سوریا، لە داهاتوویەكی نزیكدا سەرجەم ئەو ناوچانە لە حەلەب و ئیدلب و حەما كۆنترۆڵ دەكەنەوە كە ساڵی ٢٠١٦ لە ژێر دەسەڵاتیاندا بوون و تێستاش بەهۆی شەڕ و پێكدادانەكانەوە زیاتر لە 300 سەرباز و چەكدار و خەڵكی مەدەنی كوژراون.

وتیشی، لەماوەی ٧٢ سەعاتی رابردوودا گروپە چەكدارەكان توانیویانە ٦٥ شار و شارۆچكە و گوند كۆنترۆڵ بكەنەوە و گرنگترینیان شاری سەراقبە.

رامی عەبدولڕەحمان پێشبینی دەكات روداوەكانی حەلەب رێككەوتنێكی نێودەوڵەتی بێت بۆ دەركردنی گرووپە چەكدارەكانی هاوپەیمانی ئێران لە سوریا.

ئێران پشتیوانی بۆ سوپای سوریا دەردەبڕێت و لێپرسراوێكی ئەو وڵاتەش دەڵێت گرووپە چەكدارەكان لە هەڵەیەكی گەورەدان ئەگەر پێیان وابێت دەتوانن رووداوەكانی نەوەدەكان دووبارە بكەنەوە.

عەباس عراقچی وەزیری دەرەوەی ئێران لە پەیوەندییەكی تەلەفونیدا لەگەڵ بەسەم سەباغ وەزیری دەرەوەی سوریا رایگەیاند، چالاكبونەوەی گروپە چەكدارە تیرۆریستییەكان لە سوریا پیلانی ئەمریكا و ئیسرائیلە، بەڵام ئێران بە هەموو شێوەیەك پشتیوانی گەل و حكومەت و سوپای سوریا دەكات لەپێناو بەرەنگاربوونەوەی تیرۆریستان و پاراستنی ناوچەكە و سەقامگیربوونی ئاسایش و ئارامی.

موجتەبا ئەمانی باڵیۆزی ئێرانیش لە لوبنان رایگەیاندووە، ئەگەر گرووپە چەكدارە تیرۆریستییەكان پێیان وابێت دەتوانن رووداوەكانی سەرەتای ساڵانی نەوەدەكانی رابردوو لە حەلەب دووبارە بكەنەوە، لە هەڵەیەكی گەورەدان چونكە حكومەتی ئێستا سوریا زۆر بەهێزە.