د.لەتیف رەشید سەرۆک کۆماری عیراق، ئەمڕۆ لە بەغداد پێشوازیکرد لە شاخەوان عەبدوڵڵا جێگری سەرۆکی ئەنجومەنی نوێنەران .

لە دیدارەکەدا بارودۆخی سیاسی و ئابووری وڵات تاوتوێ کرا، هاوکات  باس لە چۆنیەتی پەرەپێدانی ئاستی هەماهەنگی نێوان سەرۆکایەتی کۆمار و ئەنجومەنی نوێنەران کرا، بۆ یاسادانان و دەرکردنی یاسا گرنگەکان بە شێوەیەک کە ویستی گەل بۆ خۆشگوزەرانی و سەقامگیری بەدیبهێنێت.

سەرۆک کۆمار جەختیکردەوە، کە قۆناغی ئێستا پێویستی بە چەسپاندنی بناغەکانی هاریکاریی هاوبەش هەیە لە نێوان هەموو هێز و پێکهاتە نیشتمانییەکان، بۆ بەدیهێنانی سەقامگیری سیاسی و ئەمنی لە عیراق و رووبەڕووبوونەوەی ئاستەنگی ئیقلیمی و نێودەوڵەتیی.

لای خۆیەوە شاخەوان عەبدوڵڵا سوپاس و پێزانینی خۆی بۆ هەوڵەکانی سەرۆک کۆمار لە پتەوکردنی یەکڕیزی نیشتمانی دەربڕی و جەختیکردەوە، لەسەر پەرۆشی ئەنجومەنی نوێنەران بۆ بەجێگەیاندنی ئەرکە نیشتمانییەکانی لە بەرزترین ئاستی بەرپرسیارێتی.

سەرۆكی لوبنان كابینەی نوێی حكومەتی وڵاتەكەی بە بەشداری 24 وەزارەت و بە سەرۆكایەتی نەواف سەلامی سەرۆك وەزیران ئیمزا كرد.

سەرۆكایەتی كۆماری لوبنان پێكهێنانی حكومەتی نوێی لە 24 وەزیر بە سەرۆكایەتی نەواف سەلام راگەیاند و دەڵێت، حكومەتی نوێ چاكسازییە ئابورییەكان جێبەجێ دەكات، سەرۆك وەزیرانی نوێش جەختی لەسەر چاكسازی و گێڕانەوەی متمانەی هاووڵاتیان كردەوە.

دەشڵێت، لوبنان بڕیارنامەی 1701ی نەتەوە یەكگرتوەكان جێبەجێ دەكات، كە لە ساڵی 2006 كۆتایی بە شەڕی پێشوی حزبوڵا و ئیسرائیل هێنا، بۆیە هیوادان لەم كابینە نوێیەدا حكومەتێكی چاكسازی و رزگاری بێتە ئاراوە.

ئەمەش لەكاتێكدایە حكومەتی لوبنان دوای زیاتر لە سێ هەفتە گفتوگۆ لەگەڵ لایەنە سیاسییەكانی وڵاتەكە پێكهێنرا و پۆستەكانی حكومەتیش بەپێی سیستمی پشك دابەشكراون.

مەكتەبی سیاسی یەكێتیی نیشتمانیی كوردستان كۆبووەوە، وتەبێژی یەكێتی دەڵێت، لە چەند رۆژی داهاتوودا كۆبوونەوەی ئەنجومەنی سەركردایەتی بەردەوام دەبن بۆ تاوتوێكردنی چەند بابەتێك.

سەعدی ئەحمەد پیرە وتەبێژی یەكێتی نیشتمانی كوردستان بۆ كوردسات نیوز راگەیاند، لە كۆبوونەوەی مەكتەبی سیاسیدا چەند بابەتێكی گرنگی رێكخراوەیی و جێبایەخی كاری سیاسی، لەگەڵ بابەتە چارەنوسسازەكانی هەرێم و عیراق و ناوچەكە تاوتوێكران، بە تایبەت پرسی سەفەرەكەی بافڵ جەلال تاڵەبانی بۆ دەرەوە.

وتیشی، لە چەند رۆژی داهاتوودا ئەنجومەنی سەركردایەتی بە سەرپەرشتی سەرۆك بافڵ كۆدەبێتەوە، تەوەرێكی كۆبوونەوەكان بریتییە لە هەڵسەنگاندن بۆ ئەو ئەنجامانەی كە هەردوو وەفدی دانوستانكاری یەكێتی و پارتی پێیگەشتوون بۆ پێكهێنانی كابینەی نوێی حكومەتی هەرێم.

باسی لەوەشكرد تەوەرێكی دیكەی كۆبونەوەكان بریتییە لە مانگرتنی مامۆستایان و فەرمانبەرانی سلێمانی، هەروەها تاوتوێی هەوڵەكانی نێوان هەرێم و بەغداد بۆ چارەسەركردنی كێشەی موچە دەكرێت.