، و لەپاڵ ئەوەش دا حکومەتی ھەرێم، ڕۆژانی ١٨ و ١٩ی تەمووز ، کە دەکاتە رۆژانی یەکشەممە و دووشەممەی ھەفتەی داھاتوو، وەکو پشووی فەرمی ڕادەگەیێنێت.

وەزارەتی پێشمەرگەی ھەرێم ئاشکرای کردوە، پێشکەشکردنی ھاوکارییەکانی ھاوپەیمانی نێودەوڵەتی بۆ ھێزی پێشمەرگە، لە چوارچێوەی پرۆگرامی سندوقی پشیتوانی بۆ مەشق و  پڕچەککرن بەمەبەستی رووبەرووبوونەوەی تیرۆریستانی داعش. ئەوەشی ئاشکرا کردوە، بودجەکە لەلایەن وەزارەتی بەرگری ئەمریکاوە خەرج کراوە و بۆ درێژەدان بە ئۆپراسیۆنەکانی رووبەرووبوونەوەی تیرۆریستانی داعش.

بەڕێوەبەرایەتیی پشکنین و دڵنیاییی جۆری لەوەزارەتی تەندروستی ھەرێمی کوردستان رایگەیاند، ١٥ شوێن کە بریتیبون لە کۆمپانیای دەرمان و کۆگای دەرمان و دەرمانخانە و نۆرینگە و تاقیگەی پزیشکی داخران، بەھۆی پابەندنەبوون بە یاسا و ڕێنمایییەکانی وەزارەتی تەندروستی بەسزای داخستن و پێبژاردن سزادران.
ھاوکات بەڕێوەبەرایەتی گشتی تەندروستی راپەڕینیش رایگەیاند، لە شەش مانگی ڕابردوو ١٥ تۆن خۆراکی ماوەبەسەرچوو لەلایەن لیژنەھاوبەشەکانی چاودێری تەندروستی بازاڕ لەقەزای پشدەر دەستی بەسەرداگیراوەو لەناوبراون، ھەروەھا لەو شەش مانگەشدا ٢٨ شوێن بەھۆی سەرپێچیەوە غەرامە کراون، داھاتی بەڕێوەبەرایەتیەکەش ٣ ملیۆن و ٥٧٢ ھەزار دینار بووە.

گلیزار رەشید جێگری سەرۆکی لیژنەی وزەو سامانە سروشتییەکانی پەرلەمانی کوردستان بە کوردسات نیوزی رایگەیاند، دوای ئەوەی لە ماوەی رابردوو نیگەرانی زۆر ھەبوو لەسەر کوالێتی ئەو بەنزینەی ھاوردەی ھەرێمی کوردستان دەکرا لە ئێستادا بەڵێندراوە بە بەرزکردنەوەی کوالێتی بەنزینی ھاوردە کراو بۆ ھەرێمی کوردستان. 

باسی لەوەشکرد، جگە لەوەش لەلایەن وەزارەتی سامانە سروشتییەکان بەڵێندراو بە کەمکردنەوەی رسومات لە سەر بەنزینی ھاوردەکراو ئەوەش ھۆکارێک دەبێت بۆ دابەزینی نرخی بەنزین، بەڵام نازانین کەمکردنەوەی نرخەکەی چەندە دەبێت.

ئاشکراشیکرد، ھەرێمی کوردستان رۆژانە پێویستی بە سێ ملیۆن بۆ سێ ملیۆن ٥٠٠ ھەزار لیتر بەنزین ھەیە ئەوەش وادەکات بەتەنھا بە بەرھەمی پاڵاوگەکان نەتوانرێت خواستی بەنزین لە ناوخۆ چارەس بکرێت و بۆ ئەوەش بەنزین ھاوردە دەکرێت.

جێگری سەرۆکی لیژنەی وزەو سامانە سروشتییەکانی پەرلەمانی کوردستان جەختی لەوەشکردەوە، دڵنیایی دراوە لەوەی ئەو نرخەی دیاری دەکرێت لەسەرجەم بەنزینخانەکان وەکو یەک بێت و لەلایەن لیژنەیەکەوە چاودێری دەکرێت.

بەڕێوەبەرایەتی پۆلیسی پارێزگای ھەولێر رایگەیاند، شەوی رابردوو لە گەڕەکی گەلاوێژ لە ھەولێر، کچێک بەناوی (ا، ر، ح)، لەسەر کێشەی خێزانی لەلایەن باوکییەوە کوژراوە.

ئاماژەی بەوەشکردووە، دوابەدوای رووداوەکە ھێزەکانی بەڕێوەبەرایەتی پۆلیسی پارێزگای ھەولێر گەیشتوونەتە شوێنی رووداوەکە و دەستیان بە لێکۆڵینەوە کردووە.

تیمی پارێزەرانی دەستگیرکراوانی بادینان رایانگەیاند، بەھۆی کەمی کات و زۆری پەڕاوەکە، دادگاییەکە دواخراوە، ھەموو ھەوڵێکیش دەدەن بۆ ئەوەی لە دانیشتنی داھاتوو بێتاوانی تۆمەتباران بسەلمێنن. پێشتر ٥ کەس لەو چالاکوانە بەتۆمەتی سیخوڕی سزای شەش ساڵ زیندانیان لە لایەن دادگای ھەولێرەوە بۆ دەرچوو.

ئەو بڕیارەی دادگاش نیگەرانی ناوخۆ و نوێنەرانی بیانی لە ھەرێم لێکەوتەوە و بە ھەڕەشە بۆ سەر ئازادی رادەربڕین لە قەڵەمیاندا.

لە چوارچێوەی ئاسانکاری و پێشکەشکردنی خزمەتگوزاری بە شێوازی ئۆنلاین بۆ خوێندکارانی ھەرێمی کوردستان، بۆ ئەنجامدانی پرۆسەی گواستنەوە و دابەزین لە نێوان زانکۆ و پەیمانگەکان، وەزارەتی خوێندنی باڵا و توێژینەوەی زانستی ھەرێم لە رێگەی لینکی (www.mhe-studentaffairs.com) پرۆسەی گواستنەوە و دابەزینی خوێندکاران و قوتابیان بۆ ساڵی خوێندنی ٢٠٢١ بۆ ٢٠٢٢ رادەگەیەنێت.

عەباس ئەکرەم وتەبێژی وەزارەتی خوێندنی باڵا و توێژینەوەی زانستی رایگەیاند، بۆ ساڵی خوێندنی ٢٠٢١-٢٠٢٢ بە ھەمان شێوە و بە ئامانجی پێشکەشکردنی باشترین خزمەتگوزاری بە خوێندکاران و قوتابیان، بۆئەوەی لە کاتی پرۆسەی گواستنەوە و دابەزین سەردانی وەزارەت و زانکۆکان نەکەن بەتایبەتی بۆ ئەوانەی لە دەرەوەی شارەکان و پارێزگاکانی تری ھەرێمی کوردستانن، وەزارەت لە رێگەی لینکی (www.mhe-studentaffairs.com) پرۆسەی گواستنەوە و دابەزین بەشێوازی ئۆنلاین بەپێی مەرج و رێنماییەکان دەخاتە بەردەستی خوێندکاران. 

وتیشی، پێویست ناکات ھیچ خوێندکارێک سەردانی وەزارەت و زانکۆکان بکات و پرۆسەکە لە ١١/٧/٢٠٢١ دەستیپێکردووە تا ٢/٩/٢٠٢١ بەردەوام دەبێت.

سەیف بەدر وتەبێژی وەزارەتی تەندروستی عێراق رایگەیاند، وەزارەتی تەندروستی داوای لە فەرمانبەران کردوە ھەفتانە کارتی پشکنینی کۆرۆنا یاخود کارتی وەرگرتنی ڤاکسینیان پێبێت، بەڵام ھیچ بڕیارێک نییە بۆ سزادانی ئەو فەرمانبەرانەی ڤاکسین وەرناگرن و فەرمانبەران بۆ وەرگرتنی ڤاکسینی کۆرۆنا ناچار ناکرێن، چونکە لیژنەی باڵای سەلامەتی نیشتمانی بڕیارێکی لەو جۆرەی نەداوە.

وتەبێژەکەی وەزارەتی تەندروستی عێراق راشیگەیاندوە، وەزارەتەکەیان ھەڵمەتێکی سنورداری بەکارھێنانی ڤاکسینی کۆرۆنای لە ھەندێک لە دەزگا حکومییەکان بەڕێوەبردوە و دەکرێت لە داھاتوودا ھەڵمەتەکە فراوان بکرێت.

 

لە دیدارێکدا گفتوگۆ لەبارەی پەرەسەندە سیاسییەکانی ھەرێم و عێراق و ناوچەکە کرا و ھەڵبژاردنی پێشوەختەی ئەنجوومەنی نوێنەرانی عێراق تاوتوێ کرا. جەخت لە رەخساندنی زەمینەی لەبار و کەشێکی گونجاو بۆ ئەنجامدانی ھەڵبژاردنێکی پاک و بێگەرد کرایەوە کە ببێتەمایەی سەقامگیری سیاسی و رەزامەندی ھەموولایەنەکان.

بافڵ تاڵەبانی بۆ کۆی ھاوکێشەکان نەخشەڕێگا و ستراتیژی نیشتمانیی و روونی یەکێتی خستەڕوو و یەکخستنی ھێز و توانا و بۆچوونە جیاوازەکانی دووپاتکردەوە بۆ زاڵبوون بەسەر تەحەددییەکان و گەیشتن بەچارەسەری ریشەیی کێشەکان لەنێوان ھەرێم و عێراق.  
لەبارەی ھەرێمی کوردستانەوە سەرۆک بافڵ رایگەیاند، دەمانەوێت ماڵی کورد رێکبخەینەوە و دیدی ھاوبەشمان ھەبێت بۆ پرسەکان. پێکەوە کوردستان بەرەو کەناری ئارامی و سەقامگیری ببەین، بۆ ئەوەش پێویستمان بە برا و ھاوڕێکانمان دەبێت لە ھێزە شیعی و سوننەکان و سەرجەم ھێز و لایەنەکانی تر کە پشتیوانمان بن و پێکەوە وڵاتێکی دامەزراوەیی بونیادبنێن و گیانی لێبوردەیی و پێکەوەژیان ببووژێنینەوە. ئەمەش ئەو سیاسەتەیە کە یەکێتی پەیڕەوی دەکات.
نووسینگەی رۆژنامەوانیی بافڵ تاڵەبانی

حەیدەر عەبادی سەرۆکی ھاوپەیمانیی نەسر سەردانی مەزاری سەرۆک مام جەلالی کرد و تاجەگوڵی لەسەر مەزارەکەی دانا و رایگەیاند، سەرۆک مام جەلال زۆری بەخشی بە عێراق لەدووبارە بونیادنانەوەی حکومەتی نوێ، بۆیە سەرۆک مام جەلال سەرۆکی ھەمووان بوو، ئێمەش ئەرکمانە کە ھەمووان یەک بخەین، بۆیە ھاتونەتە سلێمانیش بۆئەوەی کار لەگەڵ ھەموو عێراقییەکان بکەن.

ئالان حەمە سەعید وەزیری پەروەردەی ھەرێم رایگەیاند، لەساڵی ١٩٧٩وە ئەوە یەکەم قوتابخانەیە لەناحیەی کەڵەک درووست دەکرێت بۆ خوێندکارانی سنورەکە. 

وتیشی، قوتابخانەکە بە بڕی ملیارێک و ٥٠٥ ملیۆن دینار دروستکراوە، بۆ ساڵی خوێندنی داھاتووش ٨٦٠ خوێندکاری ناوچەکە سودی لێ دەبینن.

ئەو کەسانەی لەو خولەدا بەشداربوون بەکالۆریۆسیان ھەیە لە گەشتوگوزاردا کە لە پێناو فراوانکردنی رێبەری گەشتیاریدا بەشداریانکردووە تا ئەو گەشتیارانەی روو لەھەرێمی کوردستان دەکەن لە رێگەی رێبەری گەشتیارییەوە سەردانی شوێنەکان بکەن و مێژوو و شارستانیی و گەشتیاری کوردستانیان بۆ روونبکرێتەوە.