ئەمین بابەشێخ، وتەبێژی یەکێتی نیشتمانی کوردستان کوردسات نیوزی رایگەیاند، بەرنامەمان ھەیە لەدوای راگەیاندنی ئەنجامی کۆتایی ھەڵبژاردنی ئەنجومەنی نوێنەرانی عیراق دەست بە دانوستان و سەردانی لایەنەکان بکەین بە تایبەت لایەنەکانی ھەرێمی کوردستان و ئامانجمانە بە یەک دەنگ و یەک ڕیزی بچینە بەغداد. 

وتەبێژی یەکێتی نیشتمانی کوردستان ئەوەشی ئاشکراکرد، بۆ دانوستان لەگەڵ لایەنەکان ئێمە دەستپێشخەریی خۆمان دەکەین و دەرگاشمان کراوەیە بۆ ھەر لایەنێک سەردانمان بکات.

رەوشی تەندروستی تووشبوانی کۆرۆنا و شوێنی مانەوەی نەخۆش لە نەخۆشخانەکانی ئیدارەی راپەڕین لە حاڵەتێکی خراپدایە و بەڕێوبەرایەتی گشتی تەندروستی سلێمانیش رایگەیاند، د.سەباح نەسرەدین بەڕێوەبەری گشتی تەندروستی سلێمانی سەرجەم ئەمبوڵانسەکانی سەنتەری خێرای ١٢٢ی سلێمانی و نەخۆشخانەکانی سلێمانی خستە حاڵەتی ئامادەباشییەوە بۆ پاڵپشتیکردن و پشتیوانی و ھاوکاری و گواستنەوەی نەخۆشانی کۆرۆنا، لە ئێستاشدا لە رێگەی ئەمبوڵانسەوە توشبووانی کۆرۆنا لە نەخۆشخانەکانی سنووری ئیدارەی راپەینەوە دەگوازرێنەوە بۆ نەخۆشخانەکانی سلێمانی.

فەریبۆرز کەرەمی بەڕێوەبەری رێگەوبان و گواستنەوەی کرماشان بە ئاژانسی ھەواڵی مێھری راگەیاندووە، لە نیوەی یەکەمی ئەمساڵدا، ٦٠ ھەزار و ٥٤١ تۆن کاڵا، لە رێی سێ ھەزار و ٥٥٣ بارھەڵگرەوە لە دەروازەی نێودەوڵەتی پەروێزخانەوەی ھەناردەی ھەرێمی کوردستان کراوە.

ئاماژەی بەوەشکردووە، ھەر لەو ماوەیەدا ١٨٢ ھەزار و ٥٥ تۆن کاڵا لە سنوری پەروێزخانەوە ھاوردەی ئێران کراوە.

بەیانی ئەمڕۆ وەفدەکەی پارتی بە سەرۆکایەتی فازڵ میرانی سکرتێری مەکتەبی سیاسی گەیشتە سلێمانی و لەلایەن بافڵ تاڵەبانی ھاوسەرۆکی یەکێتی پێشوازییان لێکرا و وەفدی یەکێتی و پارتی لە مەکتەبی سیاسی یەکێتی کۆبونەوە و گفتوگۆ لەبارەی میکانیزمی پێکھێنانی کابینەی داھاتووی حکومەتی عێراق و یەکڕیزی کورد لە بەغداد و چەند پرسێکی تر کرا. 

بڕیارە وەفدەکەی پارتی ھەر ئەمڕۆ لە سلێمانی لەگەڵ بزووتنەوەی گۆڕان و حزبی سۆسیالیست کۆببێتەوە.

بڕیاربوو ئەمڕۆ دادگاییكردنی ئومێد بەرۆشكی و بەدەل بەرواری لە دادگای دووی هەولێر بەڕێوەبچێت، بەڵام بەهۆی پشووی رەسمی بە بۆنەی یادی لە دایكبونی پێغەمبەر ئیسلام (د.خ) دادگاییكردنەكە بۆ رۆژی سێ شەممە دواخراوە.
دوێنێش‌ لەسەر سكاڵای پەرلەمانتارێكی پارتی، دادگای هەولێر سزای 6 مانگی تر زیندانیكردنی بەسەر رۆژنامەنوس ئومێد بەروشكی سەپاند و لە هەمانكاتدا لەسەر پێنج سكاڵا تا ئێستا سزای دوو ساڵ و 6 مانگ زیندانیكردنی بۆ دەرچووە.

وەزارەتی تەندروستی ھەرێمی کوردستان لە راگەیەنراوێکدا ئاماژەی  بۆئەوەکردووە، بەیانی ئەمڕۆ وەزیری تەندروستی ھەرێمی کوردستان سەردانی رانیە و چوارقوڕنەی کردووە بە مەبەستی بەدواداچوونی رەوشی نەخۆشانی کۆرۆنا لە نەخۆشخانەی ژیان و دابینکردنی پێداویستییەکانیان.

بەھۆی بەردەوامی بەرزبوونەوەی ئامارەکانی توشبوون و گیانلەدەستدان بە کۆرۆنا و نەمانی شوێن بۆ داغڵبوونی نەخۆش لە نەخۆشخانەکانی ئیدارەی راپەڕین، بەڕێوەبەرایەتی گشتی تەندروستی ڕاپەڕین ھۆشداری دەداتە ھاوڵاتیان و داوایان لێدەکات گیانی خۆیان و کەسوکاریان بپارێزن. 

وەفدەکەی پارتی بە سەرۆکایەتی فازڵ میرانی سکرتێری مەکتەبی سیاسی گەیشتە مەکتەبی سیاسی یەکێتی و لەلایەن بافڵ تاڵەبانی ھاوسەرۆکی یەکێتی پێشوازییان لێکرا. 

لە کۆنفرانسێکی رۆژنامەوانیشدا ھەردوولا جەختیان کردەوە ناوەڕۆکی کۆبونەوەکە بۆ یەکڕیزی و پاراستنی مافە دەستوورییەکان بووە لە بەغداد و باسی ھیچ پۆستێک نەکراوە. 

ئەمین بابە شێخ وتەبێژی یەکێتیش رایگەیاند، یەکێتی بەرنامەی خۆی ھەیە دوای راگەیاندنی کۆتایی ئەنجامی ھەڵبژاردنی ئەنجومەنی نوێنەرانی عێراق دەست بە دانوستان و سەردانی لایەنەکان بکات.

وەفدەکەی پارتی بە سەرۆکایەتی فازڵ میرانی سکرتێری مەکتەبی سیاسی سەردانی گۆڕانی کرد و لەلایەن رێکخەری ژوورەکانی توێژینەوەی سیاسی و رۆژنامەوانی و پەرلەمانی بزوتنەوەکە پێشوازیان لێکرا. ناوەڕۆکی کۆبونەوەکەی پارتی و گۆڕان تایبەت بوو بە رەوینەوەی نیگەرانییەکان و لێکتێگەیشتن و توندوتۆڵکردنی پەیوەندییەکان و یەکڕیزی کورد. 

بڕیارە وەفدەکەی پارتی لەگەڵ یەکگرتوو و کۆمەڵی دادگەری و سۆسیالیستیش کۆببێتەوە.

سدیق جەدید ئیسلامی جێگری سەرۆکی زانکۆی زانستە پزیشکییەکانی سنە رایگەیاند، تا ئێستا ٣١ کەس لە پارێزگای سنە توشی نەخۆشی کەڕوی رەش بوون کە لەو ژمارەیە ١٦یان لە نەخۆشخانەکان خەوێندراون و چوار کەسیشیان گیانیان لەدەستداوە.

ئاشکراشیکرد، ھەرچەندە نەخۆشی کەڕوی رەش نەخۆشییەکی جددیە و زیاتر ئەو کەسانە توشی دەبن کە سیستمی بەرگریان لاوازە، بەڵام لە کەسێکەوە بۆ کەسێکی تر ناگوازرێتەوە.

دەقی راگەیەندراوەکە.. 
قوباد تاڵەبانی جێگری سەرۆکی حکومەت لەڕێگەی پەیوەندی تەلەفۆنیەوە لەگەڵ بەڕێوەبەری گشتی تەندروستی ڕاپەڕین ئامادەیی خۆی دەربڕی بۆ دابینکردنی پێداویستیەکانی تەندروستی ڕاپەڕین.

بەڕێز قوباد تاڵەبانی جێگری سەرۆکی حکومەتی ھەرێمی کوردستان لەڕێگەی پەیوەندی تەلەفۆنیەوە لەگەڵ د.. دیار ابراھیم رمچان بەڕێوەبەری گشتی تەندروستی ڕاپەڕین ئامادەیی خۆی دەربڕی بۆ دابینکردنی پێداویستیەکانی کەرتی تەندروستی سنوری ئیدارەی ڕاپەڕین.

بەشی ڕاگەیاندن و پەیوەندیەکان
ب. گ. ت. ڕاپەڕین

لە دیدارێكدا بافڵ تاڵەبانی وێڕای دەربڕینی هاوخەمی و سەرەخۆشی بۆ خانەوادەی كۆچكردوو پێیڕاگەیاندن ئەو رووداوە دڵتەزێنە مایەی نیگەرانی قوڵی بووە، چونكە گەنجێك لەپێناو بژێوی ژیانی ئەركی سەرشانی خۆی بەجێدەگەیاند و بەشداربووە لەپاراستنی ئارامی شار، بەڵام بەداخەوە بەوشێوە نامرۆڤانەیە ژیانی گەنجێك كە لەسەرەتای تەمەنیدابوو كوژێنرایەوە و دڵنیایكردنەوە ئەنجامدەرانی ئەم تاوانانە بەهیچ شێوەیەك مایەی لێخۆشبوون نین.
بافڵ تاڵەبانی روونیشیكردەوە پشتگیری لەهیچ تۆمەتبارێك ناكات و رێگاش نادات یاساشكێنان بەناوی هەر پاساوێكەوە داڵدەبدرێن، لە یەكێتیش هەر كەسێك لە هەر پلەو پۆست و بەرپرسیارێتییەكدا بێت و تێوەگلابێت بە یاساشكێنی، بەتوندترین شێوە رووبەڕووی دەبینەوە و راپێچی بەردەم دەسەڵاتی دادوەری دەكەن، چونكە هیچ كەسێك نابێت لەسەروو یاساوە بێت و ئەو ئارامییەی هەیە پارێزگاری لێدەكەن و بە كردەوەش سەلماندوویانە ئارامی و ئاسایش لایان هێڵی سوورە.
بافڵ تاڵەبانی وتیشی لەمەودوا یەكێتی پارێزەری پاراستنی مافخوراوان دەبێت و داكۆكیكاری سەرسەختی جێبەجێكردنی بڕیارەكانی دادگاكانیش دەبین و ئەم نیەتە ئەركی ئێمەیە وە جێبەجێی دەكەین.

"نوری مەحمود"وتەبێژی یەکینەکانی پاراستنی گەل" یەپەگە " راگەیاند، روسیا ھەنگاوێکی بەرچاوی بۆ رەوشی سوریا نەناوە، بەر لە بەرژەوەندیی گەلی سوریا، بەرژەوەندیی خۆی لەبەرچاو دەگرێت، مەترسیی و پێشبینی ئەوەش دەکرێت ھاوشێوەی عەفرین ڕێککەوتنێک بکرێت.
وتیشی، حکومەتی دیمەشق لەبەرامبەر ئەو بەرپرسیاریێتیەدا نییە، ناتوانێت بڕیاریکی سەربەخۆ بدات و نایەوێت چارەسەریی بۆ رەوشی سوریا فەراھەم بێت، چونکە حکومەتی سوریا لەژێر کاریگەری بەرژەوەندی روسیا و ئێران مامەڵە دەکات.
ھاوکات ھێزەکانی سوریای دیموکراتی"ھەسەدە"ش رایگەیاند، لەماوەی شەش مانگی ڕابردوودا، تورکیا ٣٠٦ ھێرشی  بە چەکی قورس کردووەتە سەر ناوچەکانی عەین عیسا و گرێسپی و تل تەمر و زرگان و ڕێگای ئێم فۆر و چەندین ناوچەی جیاجیای باکوور و ڕۆژھەڵاتی سوریا، ھەروەھا ١٦ ھێرشی ئاسمانیشی ئەنجامداوە.

بەپێی ئاژانسی هەواڵی ئەسۆشێتید پرێسی ئەمریکی ،  لەزاری بەرپرسانی هەواڵگری عێراقەوە بڵاویانکردوەتەوە، زوبەیعی بەرپرسی یەکەمی تەقینەوەکەی کەرادەیە کە بووە هۆی کوژرانی نزیکەی 300 کەس و برینداربوونی 250 کەسی دیکە.  
لەبارەی ئۆپەراسیۆنی دەستگیرکردنەکەیەوە، ئاژانسە ئەمریکییەکە ئەوەی گواستوەتەوە، زوبەیعی هاوڵاتییەکی عێراقییەو لەئۆپراسیۆنێکی ئاڵۆزدا بەهاوکاری لەگەڵ وڵاتێکی دراوسێ کە ناوی نەهێنراوە دەستگیرکراوە، ئەوەش دوای چەند مانگێک لە چاودێریکردنی بەشێوەیەکی وورد و دوو رۆژ لەمەوبەر گواستراوەتەوە عێراق.
زوبەیعی  29 ساڵ سەر بە رێکخراوی قاعیدە بووەو لە زیندانی کروبەر لای ئەمریکییەکان زیندانی بووە تا ساڵی 2008، پاشان لە زیندانی ئەبوغرێب لەساڵی 2013 هەڵهاتوە و پەیوەندیکردوە بە داعشەوە.  
بەشێک لە کردەوە تیرۆرستییەکانی بە وتەی شارەزای هەواڵگری و ئاسایش(فاچل ابو رغیف) :
- تەقینەوەکەی کەرادە
- تەقینەوەکەی بازاری عەرەبیی
- تەقاندنەوەی باڵەخانەی پارێزگای بەغداد
 - بەرپرسی تیرۆرکردنەکانی کەرخ بووە
- بەرپرسی سوپای عەسر بووە
- بەرپرسی کەتیبەی بیلاوی
- بەرپرسی تەقینەوەکان بووە
- بەرپرسی گروپە تیرۆرستییەکانی ناوچەی موتبیجە بووە
- بەرپرسی گروپە تیرۆرستییەکانی دیالە بووە
-  بەرپرسی گواستنەوەی خۆکوژەکان بووە
  - بەرپرسی لەسێدارەدانی هاوڵاتیانی بێتاوان بووە
-  چەندین بۆمب و تەقینەوەی لە ساڵەکانی ٢٠١٦ و ٢٠١٧ گواستوەتەوە.
-  بەرپرسی گواستنەوەی ئۆتۆمبیلە بۆمب ڕێژکراوەکان بووە

سەرچاوە: پەڕەی فەرمی دژەتیرۆر لە تۆڕی كۆمەڵایەتی فەیس بووك

 بەهۆی دانەمەزراندنیان ماوەی چەند رۆژێكە مامۆستایانی وانەبێژ لە زۆربەی شار و شارۆچكەكانی هەرێم بایكۆتی هۆڵەكانی خوێندنیان كرد و گردبونەوە، دواتر وەزارەتی دارایی و ئابووری رایگەیاند، بە مەبەستی چارەسەركردنی كێشەی مامۆستایانی وانەبێژ وەزیری دارایی و وەزیری پەروەردە و سەرۆكی دیوانی ئەنجومەنی وەزیران لە دیوانی وەزارەتی دارایی و ئابووری كۆبونەوە و ڕێككەوتن لەسەر ئەوەی كێشەی مامۆستایانی وانەبێژ چارەسەری كۆتایی بۆ بدۆزنەوە، بڕیاردرا لە داهاتوویەكی نزیكدا بە میكانیزمێكی نوێ چارەسەری كێشەی مامۆستایانی وانەبێژی بكرێت.