سەرۆککۆمار
د.لەتیف ڕەشید سەرۆک کۆماری عیراق لەگەڵ ستیڤن چارلز هیگن باڵیۆزی بەریتانیا لە عێراق کۆبووەوە .
لەکۆبوونەوەیەکدا پەیوەندییە دووقۆڵییەکانی نێوان عێراق و بەریتانیا و چۆنیەتی پەرەپێدانیان تاوتوێکرا تاکو بوارە جیاجیاکان بگرێتەوە و سەرۆک کۆمار جەختی لەسەر گرنگی فراوانکردنی ئاسۆی هاریکاری و چالاککردنی هەماهەنگیی دووقۆڵیی لەپرسەکانی بەرژەوەندیی هاوبەشدا کردەوە لەپێناو خزمەتکردنی بەرژەوەندییە باڵاکانی هەردوو وڵاتی دۆست و بەهێزکردنی سەقامگیریی ئەمنی و ئابووری لەناوچەکەدا.
سەرۆک کۆمار ئاماژەی بە سەقامگیریی ئەمنی و سیاسی وڵات کرد و کاریگەرییە ئەرێنییەکانی لەسەر بوارەکانی ئابووری و خزمەتگوزاری و بژێوی ژیان و پەرۆشی عێراق بۆ دامەزراندنی پەیوەندییەکی هاوسەنگ لەگەڵ ژینگەی ناوچەکەی خۆیدا بەگوێرەی بنەماکانی دراوسێیەتی باش و بەشێوەیەک کە ئاسایش و سەقامگیری و سەروەری نیشتمانی خۆی بپارێزێت.
لای خۆیەوە هیگن پەرۆشی وڵاتەکەی بۆ بەهێزکردنی هاوکاری لەگەڵ عێراق لە ئاستە جیاجیاکاندا دووپاتکردەوە و ستایشی هەوڵەکانی عێراقیشی کرد لەسەر ڕێگای پتەوکردنی بنەماکانی ئاشتی لە ناوچەکەدا.
سەرۆك كۆماری عیراق رایگەیاند، پشتیوانی تەواوی مافە رەواكانی ئێزدییەكان و سەرجەم عیراقیەكان دەكات و هیواخوازیشە سەرجەم ئاوارەكان بگەڕێنەوە شوێنەكانی خۆیان.
د.لەتیف رەشید سەرۆك كۆماری عیراق لە پەیامێكدا پیرۆزبایی "جەژنی ئێزی" لە ئێزدییەكانی عیراق و جیهان دەكات.
وتیشی، لەم بۆنەیەدا پشتیوانی تەواوی ئێزدییەكان دەكات بۆ گەیشتن بە مافە رەواكانیان و پاڵپشتی هەر هەوڵێك دەكات بۆ چارەسەركردنی ئەو كێشانەی روبەرویان دەبێتەوە بە تایبەتی گەڕانەوەی سەرجەم ئاوارەكان بۆ سەر ماڵ و حاڵی خۆیان.
دەشڵێت، بە پەرۆشەوە كاردەكەن بۆ دۆزینەوەی چارەنووسی ئەو هاووڵاتییە ئێزدییە رفێنراوانەی تائێستا چارەنوسیان نادیارە.
سەرۆک کۆمار لەگەڵ وەزیری ناوخۆ کۆبووەوە و پێشهاتە ئەمنییەکانیان تاوتوێکرد.
د.لەتیف ڕەشید سەرۆک کۆماری عیراق جەختی لەوە کردەوە کە سەقامگیری ئەمنی بەردی بناغەی گەشەسەندن و سەقامگیریی سیاسی و ئابووری وڵاتە و ئاماژەی بەوەدا کە پاراستنی ئاسایشی هاووڵاتیان ئەرک و بەرپرسیارێتییەکی هاوبەشە و پێویستی بە هاوکاری و هەماهەنگی زیاتر هەیە لەنێوان دامەزراوەو دەزگا ئەمنییەکاندا.
لەکۆبوونەوەیەکدا دۆسیەی ئەمنی و ڕێوشوێنەکانی بۆ کۆنتڕۆڵکردنی سنوورەکان و ڕووبەڕووبوونەوەی مەترسیەکان له دوای پێشکەوتنەکانی ناوچەکە تاوتوێکران و باس لە هەوڵەکانی وەزارەت و دامودەزگاکانی بۆ کۆنتڕۆڵکردنی ئاسایشی ناوخۆ کران.
سەرۆک کۆمار ئاماژەی بەوەدا کە سەرۆکایەتی کۆمار لەسەر بنەمای ڕۆڵی خۆی لە بەرەوپێشبردنی دادپەروەری و جێبەجێکردنی پرەنسیپەکانی دەستوور و یاسا یارمەتیدەر بووە لە ئازادکردنی نزیکەی 15 هەزار دەستگیرکراو کە حوکمەکەیان بەسەرچووە و تەئکیدی لەسەر گرنگی پەیڕەوکردنی پێوەرەکانی مافەکانی مرۆڤ لە گرتووخانە و بەندیخانەکاندا کردووە.
سەرۆک کۆمار داوای هەوڵی هاوبەشی کرد بۆ کەمکردنەوەی دیاردەی بڵاوبوونەوەی ماددە هۆشبەرەکان لە کۆمەڵگادا
و پەرەپێدانی کاری هاوبەش بۆ ئاگادارکردنەوەی هەموو گروپەکان لە مەترسییە کۆمەڵایەتییەکانیان.
لای خۆیەوە وەزیری ناوخۆ پشتیوانی بەردەوامی جەنابی سەرۆک کۆماری بۆ وەزارەت و کادرەکانی بەرزنرخاند و هەوڵەکانی وەزارەتی ناوخۆی بۆ پەرەپێدانی پلان و ستراتیجی ئەمنی خۆی ڕوونکردەوە بۆ ئەوەی بتوانێت لەگەڵ ئاستەنگەکانی ئێستادا بگونجێت و ئاسایش لە سەرانسەری وڵاتدا بەهێز بکات.
سەرۆک کۆماری عیراق، ئەمڕۆ بەشداریکرد لە ئاهەنگی رۆژی جیهانی زمانی عەرەبی کە بە سەرپەرشتی سەرۆکی نێردەی نەتەوە یەکگرتووەکان (یۆنامی) لە عێراق محەمەد ئەلحەسان و بە ئامادەبوونی ژمارەیەک کەسایەتی سیاسی و دیپلۆماسی و رۆشنبیری بەڕێوەچوو.
د.لەتیف رەشید سەرۆک کۆماری عیراق جەختی لەسەر گرنگی ئەم جۆرە کۆڕبەندانە و پێویستی پاراستنی زمانی عەرەبی وەک یەکێک لەو شەش زمانە زیندووەی نەتەوە یەکگرتووەکان کرد و ئاماژەی بە پێویستی بەهێزکردنی پەیوەندی نێوان هەموو زمانە خۆجێییەکان کرد بۆ پەرەپێدانی دیالۆگ و ئاڵوگۆڕی کەلتوور.
لای خۆیەوە محەمەد ئەلحەسان خۆشحاڵی خۆی بە بەشداریکردنی سەرۆک کۆمار لە مەراسیمەکەدا دەربڕی و ئاماژەی بەوەدا کە سەردانی جەنابی سەرۆک کۆمار یەکەمین سەردانی سەرۆک کۆمارە بۆ بارەگای نێردەی یونامی لە عیراق.
سەرۆک کۆماری عیراق لە کۆشکی بەغداد پێشوازی لە رێباز حەملان بریکاری وەزارەتی دارایی کرد و لە دیدارێکدا لایەنە دارایی و ئابوورییەکانی وڵات و پێویستی بەرەوپێشچوونی پرۆسەی چاکسازی ئابووری تاوتوێکران.
لە سەرەتای دیدارەکەدا د.لەتیف رەشید سەرۆک کۆماری عیراق پیرۆزبایی لە رێباز حەملان کرد بەبۆنەی وەرگرتنی پۆستە نوێیەکەی وەک بریکاری وەزارەتی دارایی و هیوای سەرکەوتنی بۆ خواست لە ئەرکەکانیدا.
لە کۆبوونەوەکەدا لایەنە دارایی و ئابوورییەکانی وڵات و پێویستی بەرەوپێشچوونی پرۆسەی چاکسازی ئابووری تاوتوێکران بۆ دەستەبەرکردنی باشترین خزمەتگوزاری بۆ هاووڵاتیان و بەدیهێنانی گەشەپێدانی بەردەوام.
هەروەها بودجەی فیدراڵی بۆ ساڵی ٢٠٢٥ و بڕگەکانی تاوتوێکرا و گرنگی دانانی ئەولەویەت و دیدگای کارکردن بۆ زۆرترین سەرچاوە و کەمکردنەوەی خەرجیەکان باسی لێوەکرا، جەخت لە پێویستی پەرەپێدانی کەرتی بانکی و باشترکردنی ئەدای بانکە حکومی و ئەهلییەکان کرایەوە بەشێوەیەک کە سەقامگیری ئابووری بەهێز بکات.
سەرۆک کۆماری عیراق سەردانی باڵەخانەی نوێی دادگای فیدڕاڵی کرد و رایگەیاند: ئەزموونی دیموکراسی لە عیراقدا سەرەڕای تەمەنی کورت ئەنجامی باشی بەدەستهێناوە کە ئێمە شانازی پێوە دەکەین.
ئەمڕۆ چوارشەممە، د. لەتیف رەشید سەرۆک کۆماری عیراق سەردانی باڵەخانەی نوێی دادگای فیدڕاڵی عیراقی کرد و پیرۆزبایی باڵەخانە نوێیەکەی لێکردن، لە کۆبوونەوەی لەگەڵیاندا جەختی کردەوە لەسەر گرنگی رۆڵی دادگا لە چوارچێوەی کاری دەستووری و بەهێزکردنی هاوکاری هاوبەش لەنێوان دامەزراوە جۆراوجۆرەکانی دەوڵەتدا لەپێناو چەسپاندنی پرەنسیپی سەروەری یاسا.
ئاماژەی بەوەشکرد، "ئەزموونی دیموکراسی لە عیراقدا سەرەڕای تەمەنی کورت ئەنجامی باشی بەدەستهێناوە، کە ئێمە شانازی پێوە دەکەین، بەهێزکردنی دیموکراسی پێویستییەکی بەپەلەیە بۆ رێگریکردن لەتاکڕەوی لەبڕیاردان و ڕێبازە دیکتاتۆرییەکاندا".
لە راگەیانراوی دوای سەردانەکەدا ئەوە خراوەتە روو، "سەرۆک کۆمار ئاماژەی بە کارەکانی سەرۆکایەتی کۆمار کرد و پەرۆشی بۆ جێبەجێکردنی دەستوور و پابەندبوون بە بڕگەکانی نیشان دا کە وەک بەڵگەنامەیەکی گەلی عێراقە و مافەکانیان مسۆگەر دەکات".
سەرۆک کۆمار ئەوەشی روونکردەوە، پێشێلکردنی دەستوور پێشێلکردنی مافەکانی خەڵکە.
هاوکات، د. لەتیف رەشید سەرۆک کۆماری عێراق جەختی لەسەر پێویستی کاری یەکخراوی نێوان دامەزراوەکانی دەوڵەت کردەوە بۆ بەشداریکردن لە جێبەجێکردنی بەرنامەی کارەکانیان و جێبەجێکردنی پێداویستییەکانی هاووڵاتیان لەڕێگەی سوودوەرگرتن لە پسپۆڕی لە بوارەکانی یاسادانان و جێبەجێکردندا، هەروەها دڵنیابوون لەوەی کە یاسا سەروەری ڕەهای هەبێت لە هەموو کارەکاندا بەتایبەت لە بواری پاراستنی سامانی گشتی و بەرەنگاربوونەوەی گەندەڵی بە هەموو شێوەکانی و لە هەر لایەکەوە بێت.
لای خۆیەوە دادوەر ئەلعمەیری تەئکیدی لەسەر پابەندبوونی دادگا بە ڕاپەڕاندنی ئەرک و ئەرکە دەستوورییەکانی بەوپەڕی پرۆفیشناڵیی و سەربەخۆییەوە کردەوە و ستایشی رۆڵی سەرۆک کۆماری کرد وەک پارێزەری دەستوور و پەرۆشی بۆ بەهێزکردنی سەربەخۆیی دەسەڵاتی دادوەری و جیاکردنەوەی دەسەڵاتەکان .
د.لەتیف رەشید، لە کۆشکی بەغداد پێشوازی لە وەفدێکی دامەزراوەی ئەوروپا بۆ دیالۆگ و گەشەپێدان کرد و جەختیلەوەکردەوە کە عێراق لەدوای سەرکەوتنی بەسەر تیرۆریستاندا لەئێستادا لە ئاستە جیاجیاکاندا پێشکەوتنی بەرچاو بەخۆیەوە دەبینێت.
لە دانیشتنێکدا د.لەتیف رەشید سەرۆک کۆماری عیراق، جەختیلەوەکردەوە کە عێراق لەدوای سەرکەوتنی بەسەر تیرۆریستاندا لەئێستادا لە ئاستە جیاجیاکاندا پێشکەوتنی بەرچاو بەخۆیەوە دەبینێت، بە تایبەتی پەیوەندییەکانی لەگەڵ یەکێتی ئەوروپا و جیهان و چێژوەرگرتن لە سەقامگیریی ئەمنی و سیاسی و ئابووری و ئەزموونی دیموکراسی خۆی.
سەرۆک کۆمار تیشکی خستەسەر هەوڵەکانی سەرۆکایەتی کۆمار لە رێگای بەرەوپێشبردنی مافە مەدەنی و دەستووری و مرۆییەکان لە عیراقدا لەڕێگەی بەشداریکردنی لە پێشکەشکردنی پێشنیاری یاساکانی پەیوەندیدار بە ژیانی هاووڵاتیان بۆ ئەنجومەنی نوێنەران بۆ پەسەندکردن و بەدواداچوونی بەردەوامی میکانیزمەکانی جێبەجێکردنی بنەما سەرەتاییەکانی مافەکانی مرۆڤ کە بووە هۆی ئازادکردنی هەزاران دەستگیرکراو و کە حوکمەکەیان تەواو کردووە.
لای خۆیەوە ئەندامانی وەفدی دامەزراوەی ئەوروپا بۆ دیالۆگ و گەشەپێدان سوپاس و پێزانینی خۆیان بۆ سەرۆک کۆمار و تێڕوانینە بە نرخەکانی دەربڕی و تەئکیدیان لەسەر پەرۆشی ڕێکخراوەکە کردەوە بۆ فراوانکردنی ئاسۆی هاوکاری لەگەڵ عیراق بەشێوەیەک کە پەیوەندییەکان پتەوتر بکات لەگەڵ یەکێتی ئەوروپا لە هەموو ئاستەکاندا.
د.لەتیف رەشید سەرۆک کۆماری عیراق، رۆژی یەکشەممە ١٥ـی ١٢ـی ٢٠٢٤، لە بەغداد پێشوازی کرد لە محەمەد ئەلحسان نوێنەری سکرتێری گشتی نەتەوە یەکگرتووەکان لە عیراق.
لەکۆبوونەوەیەکدا تاوتوێی بارودۆخی گشتی عیراق و دوایین پێشهاتەکانی گۆڕەپانی ناوچەکە کرا و بەتایبەتی پێشهاتەکانی سوریا و هەوڵەکان بۆ گەیشتن بەچارەسەر بۆ قۆناغی گواستنەوە کە گەرەنتی یەکڕیزی و سەقامگیریی سوریا و مافەکانی گەلەکەی بکات .
سەرۆک کۆمار پێویستی رۆڵی نێردەی نێودەوڵەتی لەپشتیوانیکردن لەسەقامگیری و گەشەپێدان لەعیراق و ڕووبەڕووبوونەوەی ئاڵنگاریەکانی ئێستادا ڕوونکردەوە .
هەروەها جەختی لەسەر گرنگی تێڕوانینی رێبەری باڵا عەلی سیستانی کردەوە لەبەر رۆشنایی گفتوگۆی سەرۆک وەزیران لەگەڵ نوێنەری سکرتێری گشتی نەتەوە یەکگرتووەکان و پەرۆشی بۆ سەقامگیری عیراق و دوورخستنەوەی لە گرژییە ناوچەییەکان.
لای خۆیەوە ئەلحسان پابەندبوونی نەتەوە یەکگرتووەکانی دووپاتکردەوە بۆ پاراستنی بەردەوامی ئەو دەستکەوتانەی لەعیراقدا بەدەستهاتوون لەئاستی ئاسایش و گەشەپێدان و هەوڵدان بۆ بەهێزکردنیان.
د.لەتیف ڕەشید سەرۆک کۆماری عیراق لەگەڵ د. رەمەزان ئەبو جەناح جێگری سەرۆک وەزیران و وەزیری تەندروستی لیبیا کۆبووەوە.
لە کۆبوونەوەیەکدا پێشکەوتنەکانی گۆڕەپانی ناوچەکە بەتایبەتی بارودۆخی سوریا تاوتوێکرا و جەخت لەوە کرایەوە کە پێویستە ڕێز لە هەڵبژاردنەکانی گەلی سوریای بگیرێت و بەدوای چارەسەری سیاسیدا بگەڕێن کە کۆتایی بەنەهامەتییەکانی بهێنێت و یەکڕیزی و سەروەری سوریا بپارێزێت.
لای خۆیەوە جێگری سەرۆک وەزیران و وەزیری تەندروستی لیبیا تەئکیدی لەسەر پەرۆشی وڵاتەکەی کردەوە بۆ پتەوکردنی پەیوەندییە دووقۆڵییەکان لەگەڵ عێراق و گەیشتن بە چارەسەرێک کە پاڵپشتی ئاسایش و سەقامگیری ناوچەکە بکات.
سەرۆک کۆماری عێراق پیرۆزبایی لە هەڵبژاردنی بەغداد دەکات، کە وەک پایتەختی گەشتوگوزاری عەرەبی بۆ ساڵی ٢٠٢٥ دیاری کراوە، دەشڵێت، "ئەمە داوامان لێدەکات، هەوڵی زیاتر بدەین بۆئەوەی بەغداد بکەینە جوانترین و رەونەقترین شار".
دکتۆر لەتیف رەشید سەرۆک کۆماری عێراق راشیگەیاندووە، "هەڵبژاردنی بەغداد وەک پایتەختی گەشتوگوزاری عەرەبی، داوا لە هەموومان دەکات هەوڵی زیاتر بدەین بۆ ئەوەی بەغداد بکەینە جوانترین و ڕەونەقترین شار، چونکە خاوەنی ئەو میراتی شارستانی و کەلتووریەیە کە جیهانی بە بۆن و بریسکەی ڕووناک کردووەتەوە".
ئەوەشی خستووەتە روو، "سوپاس و ستایشی ئەو هەوڵانە دەکەین کە لە ئەنجامی هەڵبژاردنی بەغداد وەک پایتەختی گەشتوگوزار بەدی کرا و هیوای سەرکەوتن بۆ هەمووان دەخوازین".
ئەمڕۆ میدیاکانی عێراق بڵاویانکردەوە، کە رێکخراوی عەرەبی بۆ گەشتوگوزار، بەغدادی وەک پایتەختی گەشتوگوزاری عەرەبی بۆ ساڵی ٢٠٢٥ هەڵبژاردووە.
د. لەتیف رەشید سەرۆک کۆماری عیراق پێشوازیکرد لە هەڵۆ عەسکەری وەزیری ژینگە، لە سەرەتای دیدارەکەدا، سەرۆک کۆمار بە بۆنەی وەرگرتنی پۆستی وەزیری ژینگە پیرۆزبایی لە وەزیر کرد، هیوای سەرکەوتنی بۆ خواست لە راپەڕاندنی ئەرکەکانی و لە خزمەتکردنی عیراق و گەلەکەی.
هەر لەو دیدارەدا پلان و ستراتیژییەکانی وەزارەتی ژینگە بە ئامانجی پاراستن و باشترکردنی دۆخی ژینگەیی وڵات تاوتوێ کرا، لەوبارەیەوە سەرۆک کۆمار ئاماژەیکرد بە پێویستی بەردەوامبوونی هەوڵەکان بۆ ڕووبەڕووبوونەوەی دیاردەی گۆڕانی کەشوهەوا و لێکەوتە نەرێنییەکانی لەسەر ژیان بە گشتی.
سەرۆک کۆمار جەختیکردەوە لە گرنگی چارەسەرکردنی دیاردەی دەردراوی غاز و بۆنی زیانبەخش کە کاریگەری لەسەر کوالێتی هەوای بەغدای پایتەخت هەیە و کارکردن بۆ سنووردارکردنی بڵاوبوونەوەیان، ئاماژەیکرد بە پێویستی بەردەوامی هاوکاری و هەماهەنگی نێوان وەزارەت و ئەمانەی بەغداد و تەواوی لایەنە پەیوەندیدارەکان بۆ بەدواداچوون و چاودێریکردنی هەموو جۆرە سەرپێچیەک کە زیان بە دۆخی ژینگەیی دەگەیەنن.
لای خۆیەوە وەزیری ژینگە هەنگاوەکانی وەزارەتی ژینگەی بۆ بەرەنگاربوونەوەی پیسبوون و هەروەها پلانەکانی ئێستا و داهاتوو بۆ ڕووبەڕووبوونەوەی گۆڕانی کەشوهەوا و کەمی ئاو ڕوونکردەوە بە شێوەیەک کە دۆخی سروشتی ژینگەیی لە وڵاتدا مسۆگەر بکات.
د.لەتیف رەشید سەرۆک کۆماری عیراق رۆژی هەینی ٦-١٢-٢٠٢٤ لە کۆشکی سەلام لەبەغداد پێشوازی کرد لە بەسام سەباغ وەزیری دەرەوە و کۆچبەرانی سوریا و وەفدی یاوەری کەلەدیدارەکەدا فوئاد حسێن جێگری سەرۆک وەزیران و وەزیری دەرەوە ئامادەبوو .
لە کۆبوونەوەکەدا تاوتوێی پێشهاتەکانی ئەم دواییەی سوریا و کاریگەرییەکانی لەسەرتاسەری ناوچەکە کرا و سەرۆک کۆمار پەرۆشی عیراقی بۆ بەدیهێنانی ئاسایش و سەقامگیری لە سوریا دووپاتکردەوە بەشێوەیەک کە یەکپارچەیی و سەلامەتی گەلەکەی بپارێزێت و هۆشداریشی دا لە ئاکامەکانی ئەم رووداوە ئەمنیانە کە پێویستی بە رێوشوێنی بەپەلە هەیە بۆ پاراستنی ئاشتی و ئاسایشی نێودەوڵەتی.
سەرۆک کۆمار هەڵوێستی عیراقی بۆ پشتیوانی لە یەکڕیزی و سەروەری دەوڵەتی سوریا دووپاتکردەوە و پشتیوانی لە هەر دەستپێشخەرییەک کرد کە ببێتە هۆی گەیشتن بە چارەسەرێک کە ژینگەیەکی سەلامەت و سەقامگیر بۆ هەموو خەڵکی سوریا دەستەبەر بکات و ئاماژەی بەوەشکرد کە عێراق هەموو هەوڵەکانی خۆی تەرخان دەکات بۆ گەیشتن بە چارەسەرێک کە پشتگیری ئاسایش و سەقامگیری ناوچەکە بکات.
لای خۆیەوە وەزیری دەرەوەی سوریا جەختی لەوە کردەوە کە ڕووداوەکانی ئێستای سوریا هەڕەشەن بۆ سەر سەقامگیری و ئاشتی و سوپاسی هەڵوێستەکانی عێراقی کرد لە پشتیوانی سوریا .
وەزیری دەرەوەی سوریا باسی ئەو پەیوەندی و ڕاوێژانەی کرد کە لەسەر ئاستی هەرێمایەتی و نێودەوڵەتی بەڕێوە دەچن بەمەبەستی دۆزینەوەی چارەسەر بۆ دۆخی سوریا و تەئکیدیشی لەسەر گرنگی هەماهەنگی و هاوکاری هاوبەش کردەوە بەشێوەیەک کە یارمەتیدەر بێت بۆ بەدیهێنانی ئاشتی و ئاسایش بۆ گەلانی ناوچەکە.
د. لەتیف رەشید سەرۆک کۆماری عیراق پێشوازی لە عەباس عەراقچی وەزیری دەرەوەی کۆماری ئیسلامی ئێران و وەفدی هاوڕێی کرد و ئاماژەی بە پێویستی چڕکردنەوەی هەوڵەکان بۆ بەدیهێنانی ئاسایش و سەقامگیری ناوچەکە و پاراستنی یەکڕیزی و سەروەری سوریا و سەلامەتی گەلەکەی کرد.
لە میانی دیدارەکەدا کە ئەمڕۆ هەینی 6-12-2024 لە کۆشکی سەلام لە بەغداد بەڕێوەچوو و فواد حسێن جێگری سەرۆک وەزیر و وەزیری دەرەوە ئامادەی بوو، باس لە پێشهاتی سیاسی و ئەمنی گۆڕەپانی ناوچەکە کرا، بەتایبەت پێشهاتی ئەمنی ئەم دواییەی سوریا و کاردانەوەی لەسەر دۆخی ناوچەکە.
سەرۆک کۆمار ئاماژەیکرد بە پێویستی چڕکردنەوەی هەوڵەکان و هەماهەنگی هاوبەش بۆ بەدیهێنانی ئاسایش و سەقامگیری ناوچەکە و پاراستنی یەکڕیزی و سەروەری سوریا و سەلامەتی گەلەکەی، هاوکات جەختیکردەوە لە گرنگی بەردەوامی راوێژ و هەماهەنگی بە شێوەیەک کە ئاشتی لەسەر ئاستی ناوچەیی و نێودەوڵەتی بپارێزێت، هەروەها دانانی پلانێکی گونجاو بۆ ڕێگریکردن لە کاردانەوەی زیاتری ڕووداوەکان لە ناوچەکەدا.
سەرۆک کۆمار هەڵوێستی عێراقی دووپاتکردەوە بۆ پشتیوانیکردن لە ئۆقرەی و سەقامگیری لە ناوچەکە و هەوڵەکان بە ئاراستەی ڕێگریکردن لە فراوانبوونی بازنەی ململانێکان، ڕوونیشیکردەوە کە پێشهات و ڕووداوەکانی سوریا و کاردانەوەیان لەسەر ناوچەکە بە گشتی تێڕامان و سەرنجی وردی پێویستە، ئاماژەشییکرد بە ڕۆڵی بەردەوامی عێراق لە سەرخستنی ئاشتی و ئاسایشی نێودەوڵەتی.
لای خۆیەوە عەباس عەراقچی وەزیری دەرەوەی ئێران ستایشی هەوڵەکانی عێراقی کرد بۆ کۆتاییهێنان بە ململانێکان و هێورکردنەوەی دۆخەکە بە شێوەیەک کە خزمەت بە گەلانی ناوچەکە و سەقامگیری ئەمنی و سیاسی و ئابوورییان بکات.
سەرۆك كۆماری عیراق لە بەغداد لەگەڵ میری ئێزدییەكان كۆبووەوە و داوای دەستەبەركردنی مافی ئێزدییەكان و گەڕانەوەی ئاوارەكان دەكات بۆ ناوچەكانی خۆیان.
د. لەتیف رەشید سەرۆك كۆماری عیراق لە كۆشكی بەغداد، چاوی كەوت بە میر حازم تەحسین بەگ، میری ئێزدییەكان لە عیراق و جیهان.
لە دیداردەكەدا پێشهاتە سیاسی و ئەمنییەكان تاوتوێكران، جگە لە هەوڵەكان بۆ گەڕانەوەی ئاوارەكان بۆ ناوچەكانی خۆیان و دابینكردنی پێداویستییەكانیان.
هەر لە دیدارەكەدا باس لە پێشهاتەكانی دۆخی ئەمنیی ناوچەكە كراو سەرۆك كۆمار ئاماژەی بە پێویستی گرتنەبەری ڕێوشوێنی پێویست بۆ روبەڕوبوونەوەی هەر هەڕەشەیەك بۆ سەر ئاسایش و سەلامەتی عیراق و هاووڵاتیانی كرد.
هەروەها جەختی لە گرنگی زیادكردنی هەوڵەكان بۆ زامنكردنی مافەكانی هەموو عیراقییەكان و ئێزیدییەكان بەتایبەتی كردەوە، بەو پێیەی ئەوان بەشێكی جەوهەری و دانەبڕاون لە گەلی عێراق.
لای خۆیەوە میر حازم تەحسین بەگ خۆشحاڵی خۆی دەربڕی بە پاڵپشتییەكانی سەرۆك كۆمار بۆ ئێزدییەكان.
سەرۆك كۆماری عیراق لەگەڵ وەزیری دەرەوە كۆبووەوە و جەختیكردەوە، لە هێوركردنەوەی گرژییەكانی سوریا و سنوورداركردنی دەستدرێژی و تاوانەكان بۆ سەر گەلی فەڵەستین.
سەرۆكایەتی كۆماری عیراق بڵاویكردەوە، د.لەتیف رەشید سەرۆك كۆماری عیراق لە بەغداد پێشوازیكرد لە فوئاد حسێن وەزیری دەرەوە و لە كۆبوونەوەكەدا، رووداو و پێشهاتەكانی باكووری سوریا و هەوڵەكان بۆ هێوركردنەوەی گرژییەكانی ناوخۆی ئەو وڵاتە تاوتوێكرا.
لای خۆیەوە، سەرۆك كۆمار ئاماژەی بە گرنگی چڕكردنەوەی هەوڵەكان دا بۆ هێوركردنەوەی گرژییەكانی سوریا و وتی، فراوانبوونی گرژییەكانی ناوچەكە لە بەرژەوەندی سەقامگیری بارودۆخەكە نابێت، داواشیكرد سنوورێك بۆ تاوان و دەستدرێژییەكانی سەر گەلی فەڵەستین دابنرێت.
لەبەرامبەردا، وەزیری دەرەوە هەوڵ و رێوشوێنە دیپلوماسییەكانی وەزارەتی دەرەوەی عیراقی لەسەر ئاستی هەرێمی و نێودەوڵەتی خستەڕو، بۆ دۆزینەوەی رێگەچارەیەك بۆ گرژییەكانی ناوچەكە، بەجۆرێك خزمەت بەئاسایشی و سەقامگیری ناوچەكە بكات.
سەرۆك كۆماری عیراق و هادی عامری كۆبوونەوە و جەختیانكردەوە لەسەر پێویستی چڕكردنەوەی هەوڵە نێودەوڵەتییەكان بۆ كۆتاییهێنان بە شەڕ و گرژییەكانی سوریا.
سەرۆكایەتی كۆماری عیراق بڵاویكردەوە، د.لەتیف رەشید سەرۆك كۆماری عیراق لە بەغداد پێشوازیكردووە لە هادی عامری ئەمینداری گشتی رێكخراوی بەدر و لە كۆبوونەوەكەدا، دوایین پێشهاتە سیاسی و ئەمنییەكان لەسەر ئاستی نێوخۆیی و نێودەوڵەتی لەنێویاندا دۆخی سوریا تاوتوێكرا.
هەر لە كۆبوونەوەكەدا، جەختكرایەوە لەسەر پێویستی چڕكردنەوەی هەوڵە نێودەوڵەتییەكان بۆ كۆتاییهێنان بە شەڕ و گرژییەكانی سوریا و دەستبەركردنی ئاسایش و سەقامگیری بۆ گەلی ئەو وڵاتە و ناوچەكە بە گشتی.
لە بەشێكی تری كۆبوونەوەكەدا، تیشكخرایە سەر بارودۆخی گشتی وڵات و بەردەوامی پشتیوانیكردنی حكومەتی فیدراڵ لە جێبەجێكردنی كارنامە وزارییەكەی و هاوكات پاڵپشتیكردنی داڕشتن و دانانی یاساكان بۆ پێشكەشكردنی خزمەتگوزاری بە گەلی عیراق بە سەرجەم پێكهاتە و مەزهەبەكانیەوە.