سەرۆککۆمار
ئەمڕۆ سەرۆک کۆماری عیراق لەگەڵ ئەندامانی ئەنجومەنی کۆمیسیارانی کۆمسیۆنی باڵای سەربەخۆی هەڵبژاردنەکان کۆبووەوە و جەختی کردەوە لەسەر ئەوەی، پێویستە کۆمسیۆن بەشێوەی جددی و بێلایەنانە کار بکات و دوور بێت لە دەستوەردان.
ئەمڕۆ چوارشەممە، د. لەتیف رەشید سەرۆک کۆماری عیراق لە کۆشکی بەغداد پێشوازی لە ئەندامانی ئەنجومەنی کۆمیسیارانی کۆمسیۆنی باڵای سەبەخۆی هەڵبژاردنەکان کرد.
لە کۆبوونەوەکەدا سەرۆک کۆمار جەختی لەسەر گرنگی پتەوکردنی کۆڵەکەکانی پرۆسەی دیموکراسی لەوڵاتدا کردەوە، لەڕێگەی کارکردن بۆ ئەنجامدانی هەڵبژاردنی پەرلەمانی بەشێوەیەکی دادپەروەرانە و بێلایەنانە.
د. لەتیف رەشید جەختیشی کردەوە لە مسۆگەرکردنی پرەنسیپی دادپەروەری و دەرفەتی یەکسان لەنێویاندا، هەروەها بەدیهێنانی خواستەکانی گەلی عێراق بۆ سەقامگیری و خۆشگوزەرانی.
لە کۆبوونەوەکەدا سەرۆک کۆمار پیرۆزبایی لە ئەنجومەنی کۆمیسیاران کرد بەبۆنەی دەنگدانی ئەنجوومەنی نوێنەران بۆ درێژکردنەوەی کارەکانی ئەنجومەن بۆ ماوەی دوو ساڵ بۆ دڵنیابوون لەوەی هەڵبژاردنەکان لە وادەی دیاریکراوی خۆیدا وەک مافێکی دەستووری بەڕێوەبچێت.
سەرۆک و ئەندامانی کۆمسیارانیش روونکردنەوەیەکیان سەبارەت بە ئامادەیی کۆمیسیۆن و ئامادەکارییەکانیان بۆ ئەنجامدانی هەڵبژاردن لەکاتی خۆیدا و بەپێی وادەی دەستووری بۆ سەرۆک کۆمار دا و ستایشی رۆڵی سەرەکی سەرۆک کۆماریان کرد لە درێژەدان بە کارەکانی ئەنجوومەنی کۆمیسیاران.
د.لەتیف رەشید سەرۆک کۆماری عیراق، لەگەڵ موسەنا سامەڕائی سەرۆکی هاوپەیمانی عەزم بە ئامادەبوونی ئەندامانی فراکسیۆنی پەرلەمانی هاوپەیامنیەکە کۆبوەوە و ئاماژەیکرد بە پێویستی ئەوەی کە هێزە سیاسییەکان سەرنجیان هەبێت لەسەر یەکخستنی دیدگاکان لە نێوان خۆیاندا.
لە کۆبوونەوەکەدا کە ئەمڕۆ سێشەممە ١٤-١- ٢٠٢٥ بەڕێوەچوو، باس لە بارودۆخی سیاسی و پێشهاتەکانی ئاستی ناوخۆیی و ناوچەیی کرا، هەروەها باسی چۆنیەتی بەهێزکردنی کۆدەنگی سیاسی نێوان لایەنە جیاوازەکان کرا، بە شێوەیەک کە بەشداربێت لە چەسپاندنی سەقامگیری و پێشخستنی چاکسازی بۆ هێنانەدی ویستی هاووڵاتیان.
سەرۆک کۆمار ئاماژەیکرد بە سەقامگیری عیراق لەسەر ئاستی ئەمنی کە کۆڵەکەیەکی گرنگە بۆ گەشەپێدان لە ئاستی ئابووری و کۆمەڵایەتی، ئاماژەیکرد بە پێویستی ئەوەی کە هێزە سیاسییەکان سەرنجیان هەبێت لەسەر یەکخستنی دیدگاکان لە نێوان خۆیاندا و هەروەها تێپەڕاندنی ئەو ئاستەنگانەی کە رێگرن لە گەیشتن بە چارەسەری لۆژیکی و کۆتاییهێنان بە زۆرێک لەو "مەسەلانەی" کە رووبەڕووی عیراق بوونەتەوە.
سەرۆک کۆمار داوایکرد، پەیوەندی و متمانەی بەهێز لە نێوان فراکسیۆنە سیاسییەکان دروست ببێت و لێکتێگەیشتنە نیشتمانییەکانی نێوان لایەنە جیاجیاکان زیاتر بەرەوپێشبچێت لەڕێگەی گفتوگۆیەکی جددی و بەرهەمدار کە بەشدارە لە هێنانەدی سەقامگیری سیاسی، جەختیشیکردەوە لە گرنگی بەهێزکردنی رۆڵی یاسادانان و چاودێریکردنی ئەنجومەنی نوێنەران بۆ بەدواداچوون لەسەر جێبەجێکردنی سیاسەت و بەرنامەکانی حکومەت و باشترکردنی کاری دامەزراوەکانی حکومەت و دڵنیابوون لە پابەندبوون بە یاساکانی ئێستا.
لای خۆیەوە سەرۆکی هاوپەیمانی عەزم پێزانینی خۆی بۆ پێشنیارەکانی سەرۆک کۆمار دەربڕی و جەختی لەوە کردەوە، کە قۆناغی ئێستا پێویستی بە هاریکاری زیاتری لایەنە سیاسییەکان هەیە بۆ چەسپاندنی ئاسایش و سەقامگیری و باشترکردنی خزمەتگوزاریی بۆ هاووڵاتیان.
موسەنا سامەڕائی جەختییشیکردەوە لەسەر گرنگی چەسپاندنی پرەنسیپە نیشتیمانییەکان بۆ بەردەوامبوون لە بنیاتنانەوە و پێشکەوتن بە شێوەیەک کە خزمەت بە بەرژەوەندییەکانی هاووڵاتیان بکات و گەشەسەندن لە هەموو بوارەکان لە وڵاتدا بەدیبێت.
د.لەتیف رەشید سەرۆک کۆماری عیراق، رۆژی سێشەممە لە کۆشکی بەغداد پێشوازیکرد لە وەفدێکی کوتلەی پەرلەمانتارانی سادقوون بە سەرۆکایەتیی د.حەبیب حەلاوی ئەندامی لیژنەی یاسایی پەرلەمان.
لە سەرەتای کۆبونەوەکەدا سەرۆک کۆمار بەخێرهاتنی نوێنەرانی کرد و ئاماژەی بە گرنگی رۆڵی ئەنجومەنی نوێنەران کرد، وەک دەسەڵاتی تایبەت بۆ یاسادانان و گێڕانی رۆڵی چاودێری بەسەر کارەکانی سەرجەم دامودەزگاکانی دەوڵەتدا و بەرپرسیارێتی ئەنجومەنەکەی روونکردەوە لە تەواوکردنی داڕشتنی یاساکان کە لە دەستووردا هاتوون و لە بەرنامەی حکومەتدا هەن، لەوانەش یاسای ئەنجومەنی فیدراڵی کە یاسادانانەکەی ماوەیەکی زۆرە دواکەوتووە.
سەرۆک کۆمار جەختی لەوەکردەوە، کە سەرۆکایەتی کۆمار پشتیوانی لەکارەکانی ئەنجومەنی نوێنەران دەکات و داوای خێراکردنی دەرکردنی ئەو یاسایانە دەکات کە کاریگەری لەسەر ئاسایشی نەتەوەیی عیراق وەک یاسای ئەنجومەنی باڵای ئاو و یاسای گەڕاندنەوەی داهاتی گەندەڵی و ئاماژەی بەوەشدا کە ئەم ساڵی تەمەنی ئەنجومەنی نوینەران دوایین ساڵی ژیانی یاسایی ئەنجومەنی نوێنەرانە و دەبێت دەرکردنی یاساکان تەواو بکات کە ناکرێت دوا بکەون و بەدواداچوون بۆ ئەو پرۆژانەی وەبەرهێنان بکەن، کە لەلایەن وەزارەتەکان و پارێزگاکانەوە پێکشەشکراون و لەبەر رۆشنایی ئەو بودجە داراییە کە بۆیان دابینکراوە.
لای خۆیەوە سەرۆکی کوتلەی پەرلەمانتاری سادقوون سوپاسی سەرۆک کۆماری کرد بۆ رۆڵی لە سازکردنی کۆبونەوەی هەر چوار سەرۆکایەتییەکە و جەختکردنەوەی بەردەوامی لەسەر پێویستی دەرکردنی یاساکان، کە کاریگەری لەسەر ژیانی هاووڵاتیان هەیە و هەروەها جەختی لەسەر پێویستی پاراستنی ئاسایش و ئەو سەقامگیریە کردەوە کە بەدەستهاتوون .
د. لەتیف رەشید سەرۆک کۆماری عیراق، پێشوازی لە نێچیرڤان بارزانی سەرۆکی هەرێمی کوردستان و وەفدی هاوڕێی کرد و پاڵپشتی خۆی بۆ دامەزراندنی پەیوەندییەکی پتەو لە نێوان حکومەتی فیدراڵ و حکومەتی هەرێمی کوردستان دووپاتکردەوە.
لە دیدارێکی دوو قۆڵیدا، کە ئەمڕۆ دووشەممە 13-1-2025 لە کۆشکی بەغداد بەڕێوەچوو، دوایین پێشهاتی سیاسی و ئەمنی و ئابوورییەکان لە گۆڕەپانی ناوخۆ و ناوچەیی تاوتوێ کرا، هاوکات پەیوەندییەکانی نێوان حکومەتی فیدراڵ و حکومەتی هەرێمی کوردستان تەوەرێکی تری کۆبونەوەکە بوو.
لەوبارەیەوە سەرۆک کۆمار گرنگی پەسەندکردنی پرەنسیپی گفتوگۆی نێوان هەردوولا و تێپەڕاندنی خاڵە ناکۆکەکان بەگوێرەی یاسا و دەستوور دووپاتکردەوە ، هاوکات هەوڵەکان بۆ بەرژەوەندی هاووڵاتیان و دەستەبەرکردنی موچەی فەرمانبەران و خانەنشینکراوانی هەرێمی کوردستان، هاوشێوەی براکانیان لە تەواوی عیراق بە کارێکی لە پێشینە دانا، لەلایەکی ترەوە جەختیشیکردەوە لە پاڵپشتی خۆی بۆ دامەزراندنی پەیوەندییەکی پتەو لە نێوان حکومەتی فیدراڵ و حکومەتی هەرێمی کوردستان.
دواتر، کۆبونەوەیەکی فراوان بەڕێوەچوو کە وەفدی یاوەری نێچیرڤان بارزانی ئامادەیبوون، کە لەو کۆبونەوەدا سەرۆک کۆمار ئاماژەیکرد بە گرنگی سەردانەکانی نێوان حکومەتی فیدراڵی و حکومەتی هەرێمی کوردستان بۆ گەیشتن بە لێکتێگەیشتنی هاوبەش و پتەوکردنی بناغەی دیالۆگی بنیاتنەر و کاریگەر لە نێوان هەردوولا بۆ چارەسەرکردنی کێشە و ناکۆکیەکان و دەستەبەرکردنی بەرژەوەندی هاووڵاتیان، بە ئاماژەدان بە پێویستی بەهێزکردنی هاریکاری و هەماهەنگی نێوان هەردوولا کە کاریگەریی راستەوخۆی هەیە لەسەر چارەسەرکردنی کێشە هاوبەشەکان و گرنگیدان بە بیناسازی و ئاوەدانکردنەوە و گەشەپێدان پڕۆژەکان لە وڵاتدا.
لە بەرانبەردا سەرۆکی هەرێمی کوردستان جەختیکردەوە، کە گەیشتن بە چارەسەرێک بۆ مەسەلەی موچەی فەرمانبەرانی هەرێم و لێکتێگەیشتنی بەردەوام یارمەتیدەردەبێت بۆ پتەوکردنی پەیوەندییەکانی نێوان حکومەتی فیدراڵی و حکومەتی هەرێم، هەروەها چڕکردنەوەی هەوڵەکان بۆ چارەسەرکردنی کێشە هەڵپەسێردراوەکان، هاوکات سوپاس و پێزانینی خۆی بۆ سەرۆک کۆمار دەربڕی بۆ وردبینی و بەدواداچوون و پەرۆشی بۆ دامەزراندنی بناغەی پەیوەندی نێوان بەغداد و هەولێر و لەپێناو بەرژەوەندی عیراق بە گشتی.
د.لەتیف رەشید سەرۆک کۆماری عیراق، لە کۆشکی بەغداد پێشوازی لە عەلی ئەلحبحاب باڵیۆزی کۆماری لوبنان لە عیراق کرد.
لە سەرەتای دیدارەکەدا، باڵیۆز سڵاوی سەرۆک کۆماری لوبنان ژەنەراڵ جۆزێف عەونی گەیاندە سەرۆک کۆمار و هیوای سەرکەوتن و خۆشگوزەرانی بۆ گەلی عیراق و بەردەوامی پێشکەوتن و خۆشگوزەرانی خواست.
سەرۆک کۆمار ئەلحبحابی راسپارد سڵاو و پیرۆزبایی بگەیەنێتە جۆزێف عەونی بەبۆنەی هەڵبژاردنی وەک سەرۆک کۆماری لوبنان و هیوای سەرکەوتن و سەقامگیری و ئاشتی زیاتری بۆ گەلی لوبنان خواست.
سەرۆک کۆمار پەرۆشی عیراقی بۆ پتەوکردنی پەیوەندییە دووقۆڵییەکان و پتەوکردنی هاوکاری و کاری هاوبەش دووپاتکردەوە لەپێناو بەرژەوەندی هەردوو گەلی برا و بەشێوەیەک کە یارمەتیدەر بێت بۆ بەدیهێنانی ئاشتی بۆ گەلانی ناوچەکە.
هەروەها سەرۆک کۆمار پشتیوانی عیراقی بۆ لوبنان و گەلی برا دووپاتکردەوە لەپێناو زاڵبوون بەسەر هەلومەرجی قۆناغی ئێستادا و پتەوکردنی ئاسایش و سەقامگیریی و پاراستنی سەروەری و یەکپارچەیی خاکی خۆی.
لە بەرانبەردا باڵیۆزی لوبنان ئاماژەی بەسووربوونی وڵاتەکەی کرد بۆ پتەوکردنی پەیوەندییەکان لەگەڵ عیراق و فراوانکردنی ئاسۆی هاوکاری به شێوەیەک خزمەت بە بەرژەوەندییه هاوبەشەکان بکات، هەڵوێستی عیراقیشی لە پشتیوانی لەگەلی لوبنان بەرزنرخاند کە ئازارەکانی جەنگی لەسەرکەم دەکاتەوە.
بڕیارە سبەینێ سەرۆك كۆماری عیراق و سەرۆكی هەرێمی كوردستان لە بەغداد كۆببنەوە.
بڕیارە سبەینێ نێچیرڤان بارزانی سەرۆكی هەرێمی كوردستان لە بەغداد لەگەڵ د.لەتیف رەشید سەرۆك كۆماری عیراق كۆببێتەوە بۆ گفتوگۆكردن لەسەر رەوشی سیایی عیراق و ناوچەكە و تاوتێكردنی كێشەكانی نێوان هەرێم و بەغداد.
بڕیاریشە سەرۆكی هەرێمی كوردستان لەگەڵ لێپرسراوانی لایەنە سیاسییەكانیش كۆببێتەوە.
د. لەتیف رەشید سەرۆک کۆماری عیراق پێشوازیکرد لە عەتوان عەتوانی سەرۆکی لیژنەی دارایی پەرلەمان و گرنگی چارەسەری ڕیشەیی و جددی لە چوارچێوەی دەستوور سەبارەت بە کێشە هەڵپەسێردراوەکانی نێوان حکومەتی فیدراڵی و حکومەتی هەرێمی کوردستان دوپاتکردەوە.
لە میانی دیدارەکەدا ئەمڕۆ یەکشەممە 12-1-2025 لە کۆشکی بەغداد بەڕێوەچوو، باس لە ئاستەنگە ئابوورییەکانی بەردەم وڵات و چۆنیەتی چارەسەرکردنیانکرا، لەوبارەیەوە سەرۆک کۆمار ئاماژەیکرد بە پێویستی کاراکردنی ڕۆڵی چاودێریی لیژنەی دارایی و بەدواداچوونکردن بۆ رێکخستنی میکانیزمەکانی خەرجکردنی باجی دارایی بۆ دامەزراوەکانی دەوڵەت بە شێوەیەکی دادپەروەرانە و گونجاو، هەروەها باس لە چۆنیەتی مامەڵەکردن لەگەڵ ئەو دامەزراوانە کرا بە پێی یاسا و ڕێساکانی کارپێکراو بە شێوەیەک کە خزمەت بە بەرژەوەندیی گەلی عێراق و گەلەکەی بکات.
سەرۆک کۆمار گرنگی چارەسەری ڕیشەیی و جددی لە چوارچێوەی دەستوور سەبارەت بە کێشە هەڵپەسێردراوەکانی نێوان حکومەتی فیدراڵی و حکومەتی هەرێمی کوردستان دوپاتکردەوە بە شێوەیەک کە مافی هاوڵاتیان بپارێزێت بە فەرمانبەران و خانەنشینەوە لە سەرتاسەری وڵاتدا.
سەرۆک کۆمار جەختیکردەوە لەسەر سەقامگیری ئابووری و ئەمنی و دابینکردنی ژیانێکی شایستە بۆ هاووڵاتیان و چڕکردنەوەی هەوڵەکان بە ئاراستەی کارکردن بۆ بەرەنگاربوونەوەی گەندەڵی و داخستنی ئەو بوارانەی کە گەندەڵی دروست دەکات و ڕەخساندنی دەرفەتی کار بۆ بێکاران بە دەستپێکردنی پرۆژەکانی وەبەرهێنان و گەشەسەندنی ناوچەکان، جگە لە چارەسەرکردنی دۆسییەی گرێبەست و کرێکارانی لە دامەزراوەکانی دەوڵەتدا.
لای خۆیەوە عەتوانی سوپاس و پێزانینی خۆی بۆ سەرۆک کۆمار دەربڕی بۆ ڕێنماییە بەنرخەکانی و پەرۆشی بۆ دەستەبەرکردنی مافەکانی هەموو هاووڵاتیان، هاوکات باسی لە هەوڵەکانی لیژنەکە و پلانە ستراتیژییەکان بۆ سەرۆک کۆمار کرد لەبارەی دابینکردنی پێداویستییەکان بۆ هاووڵاتیان.
د. لەتیف رەشید سەرۆک کۆماری عیراق، بە تەلەفون لەگەڵ جۆزێف عەون قسەی کرد بەبۆنەی هەڵبژاردنی وەک سەرۆک کۆماری لوبنان.
لە میانەی پەیوەندییە تەلەفۆنییەکەدا، سەرۆک کۆمار هیوای خواست سەرۆک جۆزێف عەون لە ئەرکەکانی سەرکەوتوبێت و گەلی لوبنانی براش سەقامگیری و پێشکەوتن و خۆشگوزەرانی زیاتری بۆ بەدیبێت.
سەرۆک کۆمار ئاماژەیکرد بە گرنگی پتەوکردنی پەیوەندیی نێوان هەردوو وڵات و پەرەپێدانی هاریکاری و هەماهەنگیی هاوبەش بە شێوەیەک کە خزمەت بە بەرژەوەندی هاوبەشی گەلانی عێراق و لوبنان بکات.
جەختیشیکردەوە لە هەڵوێستی پتەوی عیراق بەرامبەر لوبنان لە پاڵپشتیکردنی هەموو هەوڵەکان کە ئاسایش و ئۆقرەیی و سەروەری و یەکپارچەیی خاک و بەرژەوەندی گەلەکەی دەپارێزێت.
لە بەرانبەردا سەرۆک کۆماری لوبنان سوپاس و پێزانینی خۆی بۆ پەیوەندیی تەلەفۆنیی و هەڵوێست و ویستەکانی سەرۆک لەتیف جەمال رەشید دەربڕی و جەختیکردەوە لە پەرۆشی خۆی بۆ پتەوکردنی پەیوەندییەکانی نێوان هەردوو وڵات و گەلانی برا کە بەرژەوەندی هاوبەش دەپارێزێت.
لە چوارچێوەی سەردانەکەیدا بۆ پارێزگای واست، د.لەتیف رەشید سەرۆک کۆماری عیراق بە یاوەری محەمەد جەمیل ئەلمەیاحی پارێزگاری واست و ژمارەیەک لە بەڕێوەبەران و بەرپرسانی ئەمنی پارێزگاکە سەردانی بەنداوی کوتی کرد.
له میانەی سەردانەکەیدا سەرۆک کۆمار گوێی لە زانیاریەکان لەبارەی پێکهاتەو توانای بەنداوی کوت گرت و بەدواداچوونی بۆ کارەکانی چاکسازی و نۆژەنکردنەوەو بەردەوامی دان کرد و گوێی له روونکردنەوەی تێروتەسەلی ئەندازیارانی بەرپرسی بەنداوەکه گرتوو سەبارەت بەپلان و ڕێوشوێنەکانی پاراستن و بەردەوام بوونی بەنداوەکه و کارکردن بۆ پەره پێدانی کارەکانیان هانیدان.
سەرۆک کۆمار ستایشی هەوڵەکانی کادران و ئەندازیارانی بەرپرسی بەنداوەکەی کردو جەختیلەوە کردەوە، کە دڵسۆزی بۆ کارکردن بەرهەمی دەبێت بۆ واست و داهاتووی خەڵکەکەی.
لەچوارچێوەی سەردانەکەی د.لەتیف رەشید، سەرۆک کۆماری عیراق بۆ پارێزگای واست، ئەمڕۆ تاجە گوڵینەیەکی لەسەر مۆنۆمێنتی کوردانی فەیلی لەپارێزگاکە دانا.
پاشان سەرۆک کۆمار بۆ ڕێزلێنان لە گیانی شەهیدانی کوردی فەیلی و شەهیدانی عێراق، سورەتی فاتیحای خوێند.
دواتر سەرۆک کۆمار چاویکەوت بە کەسوکاری شەهیدان و لە وتەیەکدا ئاماژەیکرد بۆ رەسەنایەتی پێکهاتەی فەیلی کە یەکێکە لە پێکهاتە سەرەکییەکانی گەلی عێراق کە قوربانی زۆریان داوە لە رێگەی خەبات دژی زوڵم و ستەمی رژێمی دیکتاتۆریدا.
لەو مەراسیمەدا محەمەد جەمیل مەیاحی پارێزگاری واست و ئەندامانی وەفدی یاوەری و ژمارەیەک لە بەرپرسانی پارێزگاکە ئامادەبوون.
لەمیانەی سەردانەکەیدا بۆ پارێزگاری واست ، د.لەتیف رەشید سەرۆک کۆماری عیراق ئەمڕۆ، لە هۆڵی ئیدارەی خۆجێیەتی پارێزگاکە، لەگەڵ کەسایەتی و سەرۆک هۆزەکانی واست کۆبووەوە و ئاماژەی بە گرنگی بەرزکردنەوەی هۆشیاری کۆمەڵایەتی و پەرەپێدانی بەهاکانی پابەندبوون بە یاسا و بەشداریکردن لە پاراستنی ئاسایشی کۆمەڵگە کرد.
لەدیدارەکەدا سەرۆک کۆمار ووتەیەکی پێشکەش کرد کە تیایدا جەختی لە ڕۆڵی گرنگی هۆزەکان لە پشتیوانی دەوڵەت و چەسپاندنی دەوڵەتی یاسا و پتەوکردنی بناغەکانی ئاسایش و سەقامگیری کردەوە.
هەروەها سەرۆک کۆمار ئاماژەی بە گرنگی بەرزکردنەوەی هۆشیاری کۆمەڵایەتی و پەرەپێدانی بەهاکانی پابەندبوون بە یاسا و بەشداریکردن لە پاراستنی ئاسایشی کۆمەڵگە، جەختکردنەوە لە بەها ئەخلاقی و کلتووری و ئایینییەکان کە یارمەتیدەرن لە بەرەنگاربوونەوە و نەهێشتنی گەندەڵی، بەم شێوەیە هاوکار دەبێت لە گەیشتن بە گەشەپێدانێکی هەمەجۆر لە پارێزگای واستی ئازیز و لە هەموو شارەکانی عێراق.
لە ووتەکەیدا سەرۆکی ئەنجومەنی پارێزگای واست، عەلی حسێن سلێمان، بەخێرهاتنی سەرۆک کۆماری کرد و سەردانەکەی بۆ شارەکەیانی بە بۆنەیەکی گرنگ ناوبرد و پاڵپشتی سەرۆک کۆماری بۆ حکومەتە خۆجێیەکان لە پارێزگا جیاوازەکانی عێراق و هەوڵە بەردەوامەکانی بۆ دەستەبەرکردنی ژیانێکی شایستە بۆ هەموو گەلی عێراق بەرز نرخاند.
لە بەرانبەردا ئەمیری هۆزەکانی زوبەیدی عەرەبی، شێخ مەعد مەزهر ئەلسەمەرمەد، خۆشحاڵی و شانازیی ڕۆڵەکانی واستی بە بەشداریکردنی سەرۆک کۆمار لەخۆشی و ئاهەنگەکانیاندا بەم بۆنە تایبەتەوە دووپاتکردەوە، هاوکات جەختی لەپ شتگیری هۆزەکان بۆ ئاسایش و سەقامگیری عێراق کردەوە و ئاماژەی بە پەرۆشیان کرد بۆ هەموو ئەو هەوڵانەی کەدەدرێن بۆ پەرەپێدانی پارێزگاکە و باشترکردنی خزمەتگوزارییەکان لە هەموو بوارەکاندا.
ئەمەی خوارەوە دەقی وتارەکەی سەرۆک کۆمارە:
ئامادەبوانی بەڕێز
سڵاوی خودای گەورەتان لێبێت.
جێگەی شانازییە سەردانی ئەم پارێزگایە دەکەم، کەلەدڵی هەموو عێراقیەکاندا خۆشەویستە، وچاوم بەنوخبەیەکی خەڵکە بەڕێزەکەی دەکەوێت لەوانە پێاوماقوڵی هۆزەکان و کەسایەتییە بەڕێزەکانی.
ئەمڕۆ لە شارێکی بەخشندە کۆدەبینەوە کە کاریگەری لەسەر مێژووی عێراق هەیە و ڕۆڵەکانی و پێاوماقوڵی هۆزەکانی ڕۆڵێکی بەرچاویان بینیوە لەقۆناغە جۆراوجۆرەکانی مێژوودا و شانبەشانی تەواوی هاونیشتمانیانی وڵات بەشدارییەکی چالاکانەیان کردووە لەڕووبەڕووبوونەوەی ئاستەنگەکانی مێژووی هاوچەرخدا.
لەلای هەمووان ئاشکرایە کە هۆزەکانی عێراق دەتوانن ڕۆڵێکی گەورە بگێڕن لەپاڵپشتیکردنی دەوڵەت و چەسپاندنی سەروەری یاسا و دامەزراندنی بناغەی ئاسایش و سەقامگیری. هەروەها پێویستە ڕۆڵی هۆزەکان و قوربانییەکانیان وەبیر بهێنرێتەوە کەشارەکانی عێراق و ئەم پارێزگا بەڕێزەیش ڕۆڵەکانیان لەپێناو نیشتمان و بەرگری لە خاکەکەی کردە قوربانی بەتایبەتی لەکاتی هێرشە تیرۆریستییەکانی داعش بۆ سەر وڵات.
هەروەها جەخت لەگرنگی ڕۆڵی هۆزە بەڕێزەکانمان دەکەینەوە لە پتەوکردنی پێکەوەژیانی ئاشتەوایی کۆمەڵایەتی، لەکاتێکدا بەپەرۆش و بایەخێکی زۆرەوە بەدواداچوون بۆ کۆنفرانس و کۆڕبەندی هۆزەکان دەکەین، کەدەستپێشخەری ئەرێنی لەخۆ دەگرێت و یارمەتیدەرە بۆ بەهێزکردنی یەکڕیزی نیشتمانی لەنێوان گەل و پاراستنی مافەکانی هاووڵاتیان. ئەمە بەڵێنی ئێمەیە بۆ ئێوە، هۆزەکانمان، براکانمان و ڕۆلەکانمان.
ئامادەبوانی بەڕێز
پێویستە هەموومان پێکەوە کار بکەین لەپێناو پتەوکردنی ئاسایش و سەقامگیریی وڵات وپاراستن وفەرامۆش نەکردنی دەستکەوتە نیشتمانییەکان و خواستەکانی هاووڵاتیان لەدابینکردنی خزمەتگوزاری و باشترکردنی بارودۆخی ژیانیان و دەستەبەرکردنی ئایندەیەکی گەش و خۆشگوزەران بۆ ڕۆڵە و نەوەکانی داهاتوو لەڕێگەی پشتیوانیکردن و پەرەپێدانی دامەزراوەکانی فێرکردن لە کۆمەڵگەدا و پەرەپێدانی پرۆگرامەکان و پلانی ستراتیژی بەشێوەیەک کەیارمەتیدەر بێت بۆ باشترکردنی واقیعی فێرکردن و کلتووری و مەعریفی لەوڵاتدا.
دوپات لە گرنگی ڕۆڵی ئێوە دەکەینەوە لەبرەودان بە هۆشیاری کۆمەڵایەتی و پەرەپێدانی بەهاکانی پاراستن و پابەندبوون بە یاسا و بەهێزکردنی ئاسایشی کۆمەڵگە و هەروەها نەهێشتنی گەندەڵی وەک دیاردەیەک کە دەتوانرێت بنبڕ بکرێت لەڕێگەی هۆشیاری کۆمەڵگەوە و جەختکردنەوە لەبەها ئەخلاقی و کلتووری و ئایینییەکان کەیارمەتیدەرن لەبە رەنگاربوونەوەی گەندەڵی و ڕۆڵی ئێوە لەپاڵپشتیکردنی بەرنامەی حکومەت لەبەرەنگاربوونەوەی گەندەڵی لەهەموو بوارەکاندا یارمەتیدەرە لەبەهێزکردنی بوارەکانی ئابووری و خزمەتگوزاری بەجۆرێک کە هاوکار بێت لەبەدیهێنانی گەشەپێدانی گشتگیر لەپارێزگاکەتان و لە شارەکانی عێراقدا بەگشتی.
کارەساتی ماددە هۆشبەرەکان لەسەر کۆمەڵگەکەمان هەڕەشەیەکی جددیە بۆ سەر ڕۆڵەکانی گەلەکەمان بەتایبەتی گەنجان، بۆیە پێویستە هەوڵەکانمان وهەوڵی هۆزە بەڕێزەکانیش یەکبخەین بۆ بەرەنگاربوونەوە و بەرگریکردنی کۆمەڵگەکەمان لەو مەترسیانە.
سوپاس و پێزانینی خۆم بۆ ئامادەبووانی بەڕێز دووپات دەکەمەوە و خۆشحاڵی خۆم دەردەبڕم بە دیدارتان و سەردانی ئەم شارە بەڕێزە کەشایەنی هەموو سەرنجی ئێمەیە و جەخت لەوە دەکەینەوە کە دەرگاکانی سەرۆکایەتی کۆمار کراوەیە بەڕووی ئێوە و هەموو عێراقییەکاندا بۆ ئەوەی گوێتان لێ بگرن و پشتیوانیتان بکەن و کێشەکانتان چارەسەر بکەن کە ڕووبەڕووتان دەبنەوە .
سڵاوی خودای گەورەتان لێبێت.
د. لەتیف رەشید سەرۆک کۆماری عیراق و بافڵ جەلال تاڵەبانی سەرۆکی یەکێتیی نیشتمانیی کوردستان لە بەغداد کۆبوونەوە.
لە کۆبوونەوەکەدا باس لە دۆخی عیراق و مووچەی مووچەخۆرانی هەرێمی کوردستان کرا و داواشکرا چیتر ماف و شایستەداراییەکانی هەرێمی کوردستان تێکەڵی ململانێ و ناکۆکییەکان نەکرێت.
لە درێژەی کۆبوونەوەکەدا، گفتوگۆ لە بارەی گرنگی سەقامگیری سووریا و ناوچەکە کرا و سەرۆک بافڵ رایگەیاند، "پێویستە مافی هەموو لایەنێک لە سوریا پارێزراوبێت بە تایبەت گەلی کورد، بۆ پاراستنی سەقامگیری ناوچەکەش گرنگە کە لەگەڵ هاوپەیمانان هەماهەنگ و هاریکار بین".
لە کۆتاییدا بافڵ جەلال تاڵەبانی ئاماژەی بەوە کرد، "لەگەڵ هەموو ئەو گۆڕانکارییانەی ناوچەکەی گرتووەتەوە پێویستە سەرکردە و لایەنە سیاسییەکان لە بەغدا هەماهەنگ بن لە گفتووگۆی بنیادنەرانە بۆ سەقامگیری ناوچەکە لەگەڵ پابەندبوون بە دەستووری عیراق".
د.لەتیف رەشید سەرۆک کۆماری عیراق رۆژی پێنجشەممە 9ـی 1ـی 2024، لە بەغداد پێشوازیکرد لە موحسین مەندەلاوی جێگری یەکەمی سەرۆکی ئەنجوومەنی نوێنەران و لەکۆبوونەوەکەدا دوایین پێشهاته سیاسیی و ئەمنی و ئابوورییەکان لەسەر گۆڕەپانی ناوخۆیی و نێودەوڵەتی تاوتوێکران .
هەروەها چۆنیەتی فراوانکردنی چوارچێوەی هەماهەنگی و هاریکاری نێوان سەرۆکایەتی کۆمار و ئەنجوومەنی نوێنەران تاوتوێکران بەمەبەستی یاسادانان و پەسەندکردنی ئەو یاسایانەی کە ڕاستەوخۆ کاریگەری لەسەر ژیانی هاوڵاتیان هەیە.
لە کۆبوونەوەکەدا هەوڵەکانی حکومەت لەسەر ئاستی خزمەتگوزاری تاوتوێ کرا و ئاماژە بە گرنگی پاڵپشتیکردنی پرۆسەی ئاوەدانکردنەوە و نۆژەنکردنەوە و پەرەپێدانی ژێرخانی ئابووری کرا بەمەبەستی بەدیهێنانی خواستەکانی هەموو خەڵک بۆ ژیانێکی سەقامگیر لەبواری ئەمنی و ئابووریدا.
ئەمڕۆ چوارشەممە لە کۆشکی بەغداد سەرۆکایەتییەکان کۆبونەوەیەکیان ئەنجامدا کە تیایدا د.لەتیف رەشید سەرۆک کۆماری عیراق و د. مەحمود ئەلمەشهەدانی سەرۆکی ئەنجومەنی نوێنەران و فائق زێدان سەرۆکی ئەنجومەنی باڵای دادوەری ئامادەبوون .
لە کۆبونەوەکەدا گفتوگۆ لەبارەی ئامادەکارییەکان بۆ هەڵبژاردنی پەرلەمانی 2025 و پێویستی دابینکردنی پێداویستی لۆجستی و تەکنیکی بۆ کۆمیسیۆنی باڵای سەربەخۆی هەڵبژاردنەکان کرا.
سەبارەت بە کاروباری دارایی و مەسەلەی جووڵەی پارە و دارایی وەزارەت و پارێزگاکان لە بودجەی وەبەرهێنان و بودجەی پەرەپێدانی هەرێمەکان تاوتوێ کرا و جەخت لەسەر پێویستی جێبەجێکردنی پابەندییە داراییەکانی دامەزراوەکان و وەزارەتەکان کرایەوە و پەیڕەوکردنی ستانداردەکانی کۆنتڕۆڵ و پێداچوونەوە بە خەرجییەکان بۆ پاراستنی سامانی گشتی و کەمکردنەوەی گەندەڵی .
لەکۆبونەوەکەدا باس لە دواکەوتنی پێشکەشکردنی چەند پڕۆژە یاسایەکی گرنگ کرا کە لەلایەن سەرۆکایەتیی کۆمارەوە ئامادەکرابوو بۆ دانیشتنەکانی ئەنجوومەنی نوێنەران و جەخت لەسەر پێویستی کاری هاوبەش و هەماهەنگی لەنێوان سەرۆکایەتی کۆمار و ئەنجومەنی نوێنەران کرایەوە بۆ ئەوەی پڕۆژە یاسا دواکەوتووەکان بخەنە بەرنامەی دانیشتنەکانی ئەنجومەنەوە بەهۆی پەیوەندییان بە بەرژەوەندیی و کاری هاوڵاتیانەوە.
کۆبونەوەکە جەختی لەسەر پێویستی پشتیوانی حکومەت کردەوە لە تەواوکردنی بڕگەکانی بەرنامەکەی لەڕێگەی بەرزکردنەوەی ئاستی خزمەتگوزاری و باشترکردنی بارودۆخی ژیانی هاووڵاتیان و پاڵپشتیکردنی ئابووری عێراق و هاندانی کەرتی تایبەت بەشێوەیەک کە یارمەتیدەر بێت لەبەدیهێنانی گەشەپێدانی گشتگیر.
سەبارەت بە پەرەسەندنەکانی ناوچەکە تەئکیدیان لەسەر پتەوکردنی ئاسایش و ئاشتی و سەقامگیری ناوچەکە و گرنگی پشتیوانیکردنی هەوڵ و تەقەلا نێودەوڵەتییەکان کردەوە بۆ کۆنترۆڵکردنی قەیرانەکان و دۆزینەوەی چارەسەری کێشە و گرفتەکان لەڕێگەی دیالۆگی بنیاتنەرەوە کە ئاشتی و ئاسایشی نێودەوڵەتی بەهێز بکات.
ئەمڕۆ د. لەتیف رەشید سەرۆک کۆماری عیراق لە کۆشکی بەغدا لەگەڵ خالید شوانی وەزیری دادی عیراق کۆبووەوە و لە کۆبوونەوەکەدا باسیان لە پلان و هەوڵەکانی وەزارەت کرد بۆ گرنگیدان به دۆخی گرتووخانەکان و میکانیزمی کارکردن له دامودەزگا دادوەریەکان.
لە کۆبوونەوەکەدا د.لەتیف رەشید سەرۆک کۆمار، جەختی لەسەر پێویستی بەردەوامبوونی کارکردن و هەماهەنگی نێوان لایەنەکانی لیژنەی هاوبەش بۆ ئازادکردنی ئەو دەستگیرکراوانەی که سزاکانیان بەسەر بردووە و یان سزاکانیان لەلایەن دادگای هەڵوەشێنراوەتەوە.
سەرۆک کۆمار ئاماژەی بەوەدا، "پێویستە میکانیزمەکانی پەیوەندی و هەماهەنگی لەنێوان فەرمانگەکانی وەزارەتی داد و لایەنە پەیوەندیدارەکانی دیکەدا کارا بکرێت، بەمەبەستی ئاسانکاری بۆ هاوڵاتیان بۆ پێداچوونەوە بە فەرمانگەکانی وەزارەت و تەواوکردنی مامەڵەکانیان دوور لە رۆتین و بەشێوەیەک کە مافەکانیان بپارێزرێت".
هاوکات، وەزیری داد سوپاسی سەرۆک کۆماری کرد بۆ پشتیوانیکردنی وەزارەتەکە و پەرۆشی بۆ دانانی بناغەی دادپەروەری، هەروەها جەختکردنەوە لەسەر بەرەنگاربوونەوەی گەندەڵی و باشترکردنی بارودۆخی زیندانەکان و پێداچوونەوە بە ئەرک و کارەکانی وەزارەت و پلانەکانی داهاتووی بەمەبەستی جێبەجێکردنی پرەنسیپەکانی دادپەروەری و دەستپاکی.
د.لەتیف ڕەشید، سەرۆک کۆماری عیراق کارنامەی باڵیۆزانی نوێی وڵاتانی، کوەیت، ژاپۆن، کۆماری ئەرمەنستان، وەرگرت
لەمیانەی دیدارێکدا، د.لەتیف رەشید لەگەڵ باڵیۆزە نوێیەکان جەختی لەسەر پەرۆشی عێراق بۆ بونیادنانی پەیوەندییەکی هاوسەنگ و دروستکردنی پردی هاریکاری لەگەڵ وڵاتانی جیهان و هەوڵی بەردەوامیشی بۆ چەسپاندنی ئاسایش و سەقامگیری و ئاشتی لەناوچەکەدا دووپاتکردەوە.
سەرۆک کۆمار هەروەها ستایشی پەیوەندییە بەهێزەکانی نێوان عێراق و دەوڵەتی کوەیت و ژاپۆن و ئەرمەنستان و ئەو پێشکەوتنە بەردەوامەی کرد کە لەئاستە جیاجیاکاندا بەخۆیەوە دەبینن و هاوکات هیوای سەرکەوتنی بۆ باڵیۆزە نوێیەکان خواست لەئەرکە دیپلۆماسییەکانیاندا.
لەلای خۆیانەوە باڵیۆزە نوێیەکان سووربوونی خۆیان دووپاتکردەوە بۆ کارکردن لەپێناو پتەوکردنی پەیوەندییەکانی نێوان وڵاتەکانیان و عێراق بەشێوەیەک کە خزمەت بە بەرژەوەندییە هاوبەشەکان بکات و هاوکاری و کاری هاوبەش لەبوارە جیاجیاکاندا پەرە پێبدات.