عیراق چەند لیوایەكی رەوانەی سنورەكانی لەگەڵ سوریا كرد، وەزیری بەرگریش دەڵێت سوپا ئامادەیه سنوور و ئاسمانی عیراق لەهەر هەڕەشەیەك بپارێزێت.

سەرچاوەیەكی ئەمنی عیراق رایگەیاند، ٥ لیوای سوپا و حەشدی شەعبی له سنووری عیراق و سوریا جێگیركراون.

هاوكات سابت محەمەد عەباسی وەزیری بەرگری عیراق رایگەیاند، سوپا ئامادەیه سنوور و ئاسمانی عیراق لەهەر هەڕەشەیەك بپارێزێت و ڕێگە نادەن هیچ تیرۆریست و تێكدەرێك دزە بكاتە ناو خاكی عیراق.

ئەم لێدوانەی وەزیری بەرگری عیراق لەكاتێكدایە، گرژییە ئەمنییەكان لە سوریا و سنووری عیراق زیادیكردووە، دوای ئەوەی گروپی چەكداریی تەحریر شام بەشێكی حەلەبی كۆنتڕۆڵكرد.

لای خۆیەوە، لیوا یەحیا ڕەسوڵ وتەبێژی فەرماندەی هێزە چەكدارەكانی عیراق رایگەیاند، سنووری عیراق لەگەڵ سوریا بەتەواوی پارێزراوە، بەتایبەتی لە ناوچەكانی باكوری ڕۆژهەڵاتی سوریا، وتیشی هێزەكانی سنوور جگە لە فڕۆكەی بێ فڕۆكەوان و كامێرای گەرمیی، نوێترین چەك و كەلوپەلی سەربازییان پێیە.


 

فەرماندەی هێزی تایبەتی ئەمریكا گەیشتە رۆژهەڵاتی ناوەڕاست بۆ چاودێریكردنی جێبەجێكردنی ئاگربەستی نێوان لوبنان و ئیسرائیل. 

فەرماندەی ناوەندی ئەمریكا ناسراو بە "سێنتكۆم" رایگەیاند، جاسپەر جێفەرز فەرماندەی هێزی تایبەتی ئەمریكا گەیشتوەتە رۆژەهەڵاتی ناوەڕاست و لەگەڵ جۆسێف عەون فەرماندەی سوپای لوبنان كۆبووەتەوە بۆ تاوتوێ كردنی دۆخی ئێستای باشوری لوبنان. 

دەشڵێت، جێفەرز لەگەڵ ئاموس هۆكستاین راوێژكاری سەرۆكی ئەمریكا كاردەكات بۆ چاودێریكردنی میكانیزمی جێبەجێكردنی ئاگربەستی نێوان ئیسرائیل و لوبنان. 

، ئەمریكا سەرۆكایەتی لیژنەیەكی هاوبەش دەكات بۆ چاودێریكردنی دۆخەكە، لیژنەكە لە سوپای لوبنان و ئیسرائیل و هێزی ئاشتی پارێز و فەڕەنسا پێكدێت. 
 

بەڕێوەبەری روانگەی سوری بۆ مافەكانی مرۆڤ دەڵێت، پێشبینی دەكرێت رووداوەكانی حەلەب رێككەوتنێكی نێودەوڵەتی بێت بۆ دەركردنی گرووپە چەكدارەكانی هاوپەیمانی ئێران لە سوریا.

رامی عەبدولڕەحمان بەڕێوەبەری روانگەی سوری بۆ مافەكانی مرۆڤ رایگەیاند، ئەگەر گرووپە چەكدارەكان لە حەلەب بەم شێوەیەی ئێستا بەردەوام بن لە پێشڕەویكردن و كۆنترۆڵكردنی حەلەب و دەوروبەری بەبێ‌ شەڕ و كشانەوەی سوپای سوریا، لە داهاتوویەكی نزیكدا سەرجەم ئەو ناوچانە لە حەلەب و ئیدلب و حەما كۆنترۆڵ دەكەنەوە كە ساڵی ٢٠١٦ لە ژێر دەسەڵاتیاندا بوون و تێستاش بەهۆی شەڕ و پێكدادانەكانەوە زیاتر لە 300 سەرباز و چەكدار و خەڵكی مەدەنی كوژراون.

وتیشی، لەماوەی ٧٢ سەعاتی رابردوودا گروپە چەكدارەكان توانیویانە ٦٥ شار و شارۆچكە و گوند كۆنترۆڵ بكەنەوە و گرنگترینیان شاری سەراقبە.

رامی عەبدولڕەحمان پێشبینی دەكات روداوەكانی حەلەب رێككەوتنێكی نێودەوڵەتی بێت بۆ دەركردنی گرووپە چەكدارەكانی هاوپەیمانی ئێران لە سوریا.