سەرۆکایەتی کۆماری سوریا بڵاویکردەوە، ئیمانوێل ماکرۆن لە پەیوەندییەکی تەلەفۆنیدا بەبۆنەی دەستبەکار بوونی وەک سەرۆککۆماری قۆناغی راگوزەر لە سوریا، پیرۆزبایی لە ئەحمەد شەرع کرد و بانگێشتی وڵاتەکەی کرد.

سەرۆکایەتی کۆماری سوریا لە بەیاننامەیەکدا ئاماژەی بەوەکردووە، ئەحمەد شەرع پەیوەندییەکی تەلەفۆنی لەلایەن هاوتا فەرەنسیەکەیەوە، ئیمانوێل ماکرۆن پێگەیشتووە و تیایدا بەبۆنەی "دەستبەکاربوونی لە پۆستی سەرۆکایەتیی سوریا و ڕزگارکردنی وڵات لە ڕژێمی ئەسەد" پیرۆزبایی لێکردووە.

هەروەها ماکرۆن "پشتیوانی تەواوی خۆی بۆ قۆناغی راگوزەری لە سوریا دەربڕیوە، جەختی لەسەر "هەوڵەکانی وڵاتەکەی بۆ هەڵگرتنی سزاکانی سەر سوریا و ڕەخساندنی بوار بۆ گەشەکردن و بوژانەوە" کردووەتەوە.

 
بەگوێرەی بەیاننامەکە، "هەردوو سەرۆک لەسەر بەرەوروبوونەوەی ئاڵنگارییە ئەمنیەکان و پێویستی کارکردنی پێکەوەیی بۆ پاراستنی ئاسایش و سەقامگیری لە سوریا هاوڕابوون" و لە کۆتاییدا ماکرۆن بانگهێشتنامەیەکی پێشکەش ئەحمەد شەرع کرد بۆ وڵاتەکەی.

سەرۆککۆماری عیراق د.لەتیف جەمال ڕەشید، ئەمڕۆ چوارشەممە لەگەڵ سەید عەمار حەکیم سەرۆکی ڕەوتی حیکمەی نیشتمانی کۆبووەوە و بارودۆخی گشتی وڵات و پێشهاتە ناوچەیی و نێودەوڵەتییەکانیان تاوتووێکرد.

لە میانی دیدارەکەدا جەخت لە پاراستنی سەروەری خاکی عیراق کرایەوە لە ناو گۆڕانکارییە ناوچەیی و ئەو ئاڵەنگارییە نێودەوڵەتییانەی کە ڕووبەڕووی وڵات دەبنەوە.

تیشک خرایە سەر، پێویستی یەکخستنی هەوڵ و دیدگا و کاری هاوبەشی نێوان هێزە سیاسییەکان بۆ بەهێزکردنی پرۆسەی دیموکراسی و رووبەڕووبوونەوەی ئەو ئاڵەنگارییانەی کە رووبەڕووی وڵات دەبنەوە.

هەر لەو دیدارەدا جەخت لەسەر پێویستی پابەندبوون بە دەستوور و یاسا لە پێناو پاراستنی سەقامگیری ئەمنی و سیاسی و خزمەتکردنی خەڵک و بەدیهێنانی دادپەروەری کرایەوە.

ئەنجومەنی وەزیرانی هەرێم وەزارەتی سامانە سروشتییەكانیشی راسپارد، لە زووترین كاتدا، هەناردەكردنەوەی نەوتی هەرێم لەلایەن سۆمۆ دەستپێبكاتەوە.

ئەنجومەنی وەزیرانی هەرێمی كوردستان كۆبووەوە، بەپێی راگەیەنراوی كۆبونەوەكەش، لە پێناو گرەنتیكردنی مووچەی سەرجەم مانگەكانی ساڵی 2025 و نەهێشتنەوەی هیچ پاساو و بیانوویەك بۆ رێگری لە جێبەجێكردنی رێككەوتنەكە، بڕیاری پەسەندكردنی سەرجەم ئەو پێشنیازانە دراوە كە لە كۆبوونەوەكەدا خراونەتەڕوو. 

هەر لە كۆبوونەوەكەدا بڕیاریدا بە پەسەندكردن و پابەندبوونی بە میلاكی سەرجەم مووچەخۆرانی هەرێم بۆ ساڵی 2025 بەپێی ئەو ژمارە و خەرجییانەی لە كۆبوونەوەكە خرانەڕوو، بڕیاریشدرا بە پەسەندكردنی رێكاری گواستنەوەی خانەنشینانی پێشمەرگە و سەربازیی و هێزەكانی ئاسایشی ناوخۆ و شایستەكانی كەسوكاری شەهیدان و ئەنفالكراوان بۆ سەر بەڕێوەبەرایەتی گشتیی خانەنشینی لە وەزارەتی دارایی هەرێم.

ئەنجومەنی وەزیران وەزارەتی سامانە سروشتییەكانیشی راسپارد، لە پەیوەندی بەردەوامدا بێت لەگەڵ وەزارەتی نەوتی عیراق و كۆمپانیای سۆمۆ و كۆمپانیا نەوتییە بەرهەمهێنەرەكان لە هەرێم، تا لە زووترین كاتدا، هەناردەكردنەوەی نەوت لە لایەن سۆمۆوە دەستپێبكاتەوە و داهاتەكەشی بخرێتەوە خزمەتی خەزێنەی گشتیی عیراق.

وەزارەتی دارایش راسپێردرا، بە ناردنی بەشی گەنجینەی عیراق لە داهاتی ناوخۆ بۆ مانگی یەكی ئەمساڵ بۆسەر ئەژماری وەزارەتی دارایی عیراق لە چەند ڕۆژی داهاتوودا.