خۆپیشاندان و دەربڕینی ناڕەزایی لە تورکیا، دژی دەستگیرکردنی ئەکرەم ئیمامئۆغڵو بەردەوامە و سەرۆکی پارتی جەهەپەش داوای ڕاپەڕینی سەرتاسەری دژی دەسەڵات دەکات.

عەلی یەریلکایا، وەزیری ناوخۆی تورکیا ڕایگەیاند کە ئەمڕۆ 37کەسیان بە تۆمەتی بڵاوکردنەوەی بابەتی هاندان بۆ ئاژاوەگێڕی لە تۆڕە کۆمەڵایەتییەکان دەستگیرکردووە.

هاوکات، هەژماری فەرمی ئیمامئۆغڵو لە تۆڕی کۆمەڵایەتی ئێکس داوا لە هاووڵاتیان دەکات بێدەنگ نەبن و دژی ئەو رەوشە بوەستنەوە کە لە تورکیا سەری هەڵداوە.

شایەنی باسە، دەستگیرکردنی ئیمامئۆغڵو لە کاتێکدا دێت کە چاوەڕوان دەکرا لە چەند ڕۆژی داهاتوودا وەک بەربژێری رەسمی پارتی جەهەپە بۆ پۆستی سەرۆک کۆمار و ڕکابەری ئەردۆغان دیاری بکرێت.

دەستگیرکردنی ئیمامئۆغڵو تووڕەیی زۆری هاووڵاتیانی تورکیای لێکەوتووەتەوە و زۆربەیان پێیان وایە بابەتەکە سیاسییە و پەیوەندی بە هەوڵی درێژکردنەوەی وادەی سەرۆکایەتی ئەردۆغانەوە هەیە.

لە بەرانبەریشدا، عومەر چەلیک، وتەبێژی پارتی ئاکپارتی، تۆمەتەکان ڕەتدەکاتەوە و جەخت لە سەروەریی یاسا و سەربەخۆیی کاری دادگاکان دەکاتەوە.

سەرۆک وەزیرانی عیراق لە پیرۆزبایی جەژنی نەورۆزدا، جەختی لەسەر چەمکی خۆشەویستی و یەک چارەنووسی کردەوە.

محەممەد شیاع سوودانی، سەرۆک وەزیرانی عیراق ئەمڕۆ پێنجشەممە، لە پلاتفۆرمی ئێکس پیرۆزبایی جەژنی نەورۆزی لە خەڵکی عیراق و گەلی کورد کرد و رایگەیاند: "جوانترین پیرۆزبایی بۆ گەلی عیراق بە گشتی و گەلی کورد بە تایبەتی، بەبۆنەی جەژنی نەورۆزەوە. عێراقیش لە ئارامی و سەقامگیریدا بێت."

سەرۆک وەزیرانی عیراق لە ئێکس هیوای خواست کە بە هەوڵی برایانەی هەموو نەتەوەکان، داهاتوویەکی گەشتر بۆ عیراق دەست پێبکات.

سوودانی لەم بۆنەیەدا ئاماژەی بەوەش کرد کە جەژنی نەورۆز بیرخەرەوەی خۆشەویستی، یەک چارەنووسی و مێژووی گەورەی گەلانی عیراقە.

بزووتنەوەی حەماس لە وەڵامی هێرشەکانی ئیسرائیل بۆ سەر غەززە، چەند مووشەکێکی ئاراستەی تەلئەبیب کردووە.

ئەمڕۆ پێنجشەممە، بزووتنەوەی حەماس، لە ڕاگەیەنراوێکدا ئاماژەی بەوە کرد کە لە بەرانبەر هێرشەکانی ئیسرائیل و کۆمەڵکوژییەکانی دژی خەڵکی سڤیل لە کەرتی غەززە، چەند مووشەکێکیان بە ئاراستەی تەلئەبیب  هەڵداوە.

لە بەرامبەردا، سوپای ئیسرائیل رایگەیاند کە مووشەکێکیان خستووەتە خوارەوە کە لە غەززەوە ئاراستەی تەلئەبیب کرابوو. هەروەها جەختیان کردەوە کە دوو مووشەکی دیکەش لە چەند ناوچەیەکی دوور کە هیچ هاووڵاتییەکی لێ نەبووە، کەوتوونەتە خوارەوە.

لەلایەکی دیکەوە، بەرگریی شارستانی کەرتی غەززە لە راگەیەنراوێکدا رایگەیاند کە ژمارەی کوژراوانی هێرشە ئاسمانییەکەی ئیسرائیل کە لە بەرەبەیانی رۆژی سێشەممە بۆ سەر کەرتی غەززە دەستی پێکرد، تا ئەمڕۆ بۆ 504کەس بەرزبووەتەوە.

ئەفیغای ئەدرەعی، گوتەبێژی سوپای ئیسرائیل، لە هەژماری خۆی لە تۆڕی کۆمەڵایەتی ئێکس بڵاوی کردەوە کە لە ماوەی چەند سەعاتی رابردوودا هێزەکانی ئیسرائیل ئۆپەراسیۆنێکی زەمینی ئامانجداریان لە ناوەڕاست و باشووری کەرتی غەززە دەست پێکردووە.

بەپێی راگەیاندنەکە، ئامانج لەم ئۆپەراسیۆنە فراوانکردنی ناوچەی ئەمنی نێوان باکوور و باشووری کەرتی غەززەیە