حكومەتی عیراق بۆ شوێنگرتنەوەی غاز ئێران كە بۆ كارپێكردنی وێستگەكانی كارەبا بەكاریدەهێنێت، بڕی 100 ملیۆن پێ سێجا غازی رۆژانە لە ئیمارات دەكرێت.

ئەحمەد موسا وتەبێژی وەزارەتی كارەبای عیراق رایگەیاند، بەپێی رێككەوتنێك ئیمارات رۆژانە 100 ملیۆن پێ سێجا غاز بە بەغداد دەفرۆشێت، بۆ كارپێكردنی وێستگەكانی كارەبا لە كەركوك و دبس و مەلا عەبدوڵڵا كە دەتوانن 400 مێگاوات كارەبا بەرهەم بهێنن، ئەمەش یارمەتیدەر دەبێت بۆ جێگیركردنی بەرهەمهێنانی كارەبا لە پارێزگای كەركوك.

ئەحمەد موسا وتیشی، ئەو غازەی كە ئێران بۆ عیراقی دابین دەكرد راگیراوە و بەو غازە شوێنەكەی پڕ دەكرێتەوە كە لە ئیماراتەوە هاوردە دەكرێت.

ئاماژەی بەوەشكرد، هاوكات وەزارەتی كارەبای عیراق كار لەسەر گرێبەستێكی دیكە لەگەڵ توركمانستان بۆ دابینكردنی غاز دەكات، گرێبەستەكەش بریتییە لە دابینكردنی 20 ملیۆن پێ سێجا غاز بۆ كارپێكردنی وێستگەكانی بەرهەمهێنانی كارەبا.

بە کڕینی 100 ملیۆن پێ سێجا غازی رۆژانە لە ئیمارات، بەرهەمهێنانی کارەبا 400 مێگاوات زیاد دەکات و بۆ پارێزگای کەرکوک دابیندەکرێت.

مەسعود پزیشكیان سەرۆك كۆماری ئێران سەردانی مۆسكۆی كرد و لەگەڵ ڤلادیمێر پوتن هاوتا روسییەكەی كۆبووەوە.

پوتن لە میانی كۆبوونەوەی لەگەڵ پزیشكاندا رایگەیاند، رێككەوتنی هەمەلایەنەی مۆسكۆ و تاران، بازنەی هاوكارییە ئابوورییە دوو قۆڵییەكان فراوانتر دەكات، هەروەها ئاماژەی بە پڕۆژە هاوبەشەكانی نێوان مۆسكۆ و تاران كرد، لەوانەش پڕۆژەی پەرەپێدانی وێستگە ئەتۆمییەكان و كێڵگەكانی وزە و بەهێزكردنی ژێرخانی كەشتیوانی و گواستنەوە.

لە بەرامبەردا پزیشكیان ئاماژەی بە گرنگی رێككەوتنی هەردوولا كرد، هاوكات بوونی هێزی بیانی لە رۆژهەڵاتی ناوەڕاستدا ئیدانە كرد و وتی، بوونی ئەو هێزانە دەبێتە هۆی ناسەقامگیری لە ناوچەكەدا.

ئاژانسی تاسی روسی بڵاویكردۆتەوە، پزیشكیان و پۆتن رێككەوتنێكیان ئیمزا كردووە كە تایبەتە بە بەرزكردنەوەی هاوكارییەكانی نێوان خزمەتگوزارییە ئەمنی و بەرگری و هاوكاری لە مانۆڕە سەربازییە هاوبەشەكاندا.