پەیامنێری کوردسات نیوز رایگەیاند، لە گوندی لاجای سنووی ناحیەی شەمامک لە پارێزگای ھەولێر، بەھۆی کێشەیەکی کۆمەڵایەتی کۆنەوە، شەڕەتەقە لەنێوان دوو بنەماڵەدا ڕوویداوە، کە ھەردووکیان لە یەک عەشیرەتن.

ئەوەشی خستەڕوو، دوو بنەماڵەکە بە چەکی قورس ڕووبەڕووی یەکبوونەتەوە و لەئاکامی شەڕەکەشدا کەسێک برینداربووە.

پەیامنێری کوردسات نیوز وتیشی، ھێزە ئەمنییەکانی ھەولێر لێکۆڵینەوەیان دەستپێکردووە لەبارەی شەڕەکەوە، بەڵام تا ئێستا ھیچ رونکردنەوەیەکیان لەو بارەیەوە نەداوە.

وەزارەتی دارایی لە گشتاندنێکدا کە ئاڕاستەی تەواوی وەزارەتەکان و فەرمانگەکانی نەبەستراو بە وەزارەتەکانی کردووە ئاماژەی بەوەکردووە، لە رێگەی لیژنەیەکەوە، ھەڵسەنگاندن بۆ ئەو بڕوانامانە دەکات کە بەبێ مۆڵەتی خوێندن بەدەستھاتوون، لە ڕووەکانی زانستی و کارگێڕی و دارایی و یاساییەوە.

وەزارەتی دارایی ھاوپێچ لەگەڵ گشتاندنەکەدا دوو فۆڕمی زانیاری رەوانەی وەزارەت و فەرمانگەکان کردووە و داوایکردووە لەماوەی ١٥ رۆژدا، بۆیان بگەرێننەوە بۆ ئەنجامدانی کاری پێویست.

فەرماندەیی گشتیی ھێزەکانی ئاسایشی ناوخۆی باکور و ڕۆژھەڵاتی سووریا لە کۆنفرانسێکی رۆژنامەوانیدا کۆتایی ھاتنی ئۆپەراسیۆنی “مرۆیی و ئەمنی” لە کامپی ھۆل ڕاگەیاند و ئاماژەی بۆ ئەوەکرد، ھێزەکانی ئاسایشی ناوخۆ و ھێزەکانی سوریای دیموکرات "ھەسەدە" و یەکینەکانی پاراستنی ژنان "یەپەژە" بە ھاوکاری ھێزەکانی ھاوپەیمانان، قۆناغی سێیەمی ئۆپەراسیۆنی “مرۆیی و ئەمنی”یان کۆتایی پێھێنا.

وتیشی، ئۆپراسیۆنەکە بۆ رێگریکردن بووە لە پیلانەکانی داعش بۆ خۆرێکخستنەوە لە کامپی ھۆل، ھەموو سێکتەرەکانی کامپەکە پشکنینیان بۆ کرا و لە ئەنجامدا توانرا، ئەبو سوفیان لاھیبی لێپرسراوی شانەکانی داعش لەناو کەمپی ھۆل کوژرا، ھەروەھا ژنێکی ئێزدی بە ناوی"کۆڤان ئیدۆ خورتۆ” ڕزگارکرا.

ھەروەھا ٨٥ شەکداری داعش دەستگیرکران و ژمارەیەک چەک و تەقەمەنی و پێداویستی سەربازی و بڕێک ماددەی ھۆشبەر دەستیبەسەرداگیرا و ٥ تونێلیش لەناوبران.

ئەمڕۆ لە دادگای تاوانی یەک لە سلێمانی دانیشتنی تایبەت بە بڕیاردان لەسەر سزادانی تۆمەتبارانی کەیسی شەھیدکردنی نەقیب محەمەد لەتیف بەڕێوەچوو، بەڵام لەسەر داوای بریکاری تۆمەتباران، بڕیاردانی کۆتایی لەسەر دۆسیەکە بۆ سبەینێ دواخرا.

شەوی چواری ١٢ی ساڵی ٢٠٢١ لەکاتی بەھاناوەچوونی ژنێکی ھەڕەشەلێکراو لە ناوچەی تانجەرۆی سلێمانی، نەقیب محەمەد لەتیف و سێ پۆلیسی بەرێوەبەرایەتی ناوبراو لەکاتی ئەنجامدانی کاری بەھاناوەچوون ‌و جێبەجێکردنی بڕیاری دادوەر بەر دەستڕێژی گولـلە کەوتن، بەڵام لە ھەمان شوێن نەقیب محەمەد لەتیف شەھیدبوو.

 

دەقی پەیامەکەی قوباد تاڵەبانی...

بەرێزمامۆستا سەڵاحەدین بەھادین، ئەمینداری گشتیی یەکگرتووی ئیسلامی کوردستان

بەبۆنەی تێپەڕبوونی سی ساڵ بەسەر ڕاگەیاندنی یەکگرتووی ئیسلامی کوردستاندا، پیرۆزبایی لە جەنابتان و سەرکردایەتی و سەرجەم ئۆرگان و ئەندامان و ھەوادارانی یەکگرتوو دەکەم.

ھیواخوازین ساڵیادی یەکگرتوی ئیسلامی کوردستان دەرفەتێک بێت بۆ لێکتێگەیشتنی زیاتری ھەموو ھێز و لایەنەکان لەپێناو تێپەڕاندنی ئاستەنگەکان و باشترکردنی ژیان و گوزەرانی ھاوڵاتییان.

قوباد تاڵەبانی 
جێگری سەرۆکی ئەنجومەنی وەزیران

 

سەڵاحەدین دەمیرتاش، ھاوسەرۆکی پێشووتری پارتی دیموکراتی گەلان (ھەدەپە) لە زیندانی ئەدیرنە چاوی کەوت بە سیری ساکیک پەرلەمانتاری دەمپارتی و ئەوەشی خستووەتەڕوو، پێویستە دەم پارتی لە ھەڵبژاردنەکەی ٣١ی ئازاری ئەمساڵ قەرەبووی زیانەکانی بکاتەوە و بەباشی خۆی بۆ ھەڵبژاردنەکە ئامادە بکات.

دوای کۆبوونەوەکەشی لەگەڵ دەمیرتاش، سیری ساکیک وتی، دەم پارتی بە کاندیدەکانی خۆیەوە بەشداری ھەڵبژاردنی شارەوانییەکان دەکات و بردنەوە و دۆڕانی ئۆپۆزسیۆنیش لەو ھەڵبژاردنەدا کێشەی ئەوان نییە، ئەوەی بۆ ئەوان گرنگە پەرەپێدانی سیاسەتی دیموکراسییە وەک سیاسەتی ڕێگای سێیەم.

ئەوەش لەکاتێکدایە کە بڕیارە تا ١٠ی شوبات، پارتی یەکسانی و دیموکراسی گەلان (دەم پارتی) ناوی سەرجەم کاندیدەکانی بۆ ھەڵبژاردنی شارەوانییەکانی تورکیا یەکلایی بکاتەوە.

یەکگرتووی ئیسلامیی کوردستان راگەیەنراوێکی بە بۆنەی ٣٠ھەمین ساڵیادی دامەزراندنییەوە بڵاوکردەوە و ئاماژەی بۆ ئەوەکردووە، ھەرێمی کوردستان بە قۆناغێکی سەختی سیاسی و ئابووریدا تێپەڕدەبێت، پەرلەمانی ماوەبەسەرچوو لەکارخراوە، حکومەتیش ھەر ماوەبەسەرچووە، بەوەش شەرعیەتی دەسەڵات لەژێر پرسیاردایە و تائێستاش وادەی ھەڵبژاردنی داھاتووی پەرلەمان دیارنییە.

راشیگەیاندوە، لە ئەنجامی ئیدارەدان و بەرێوەبردنێکی نادروست، کەڵەکەبوونی کێشەکان و خەمساردی لە چارەسەرکردنیان، چەندین قەیرانی دارایی و بنبەستی سیاسی و شڵەژانی ئەمنی و دڵەڕاوکێی کۆمەڵایەتی سەریھەڵداوە، بەھۆی زۆری باج و خەراج خەڵک لە رەوشێکی ئابوری سەخت و دژواردا دەژین.

یەکگرتووی ئیسلامی جەختی لەوەشکردووەتەوە، دابەشنەکردنی سێ موچەی ساڵی رابردوو، ھۆکاری سەرەکی بایکۆتی مامۆستایان و فەرمانبەرانە، بەبێ ئەوەی داوا رەوا و یاساییەکانیان بۆ جێبەجێبکەن، بەوەش باری سەرشانی مامۆستایان و موچەخۆران ئەوەندەی تر قورسبووە، ئەگەر بە خێرایی رێگەچارە نەبێت و ھەڵبژاردن ئەنجامنەدرێت، ئەوا رەوشەکە دژوار و ئاڵۆزتر دەبێت.

داواشدەکات، دەسەڵات و بڕیار بەدەستانی ھەرێم بەوپەڕی جددی و بەرپرسیارانەوە مامەڵەی ئەو رەوشە ھەستیارە بکەن.

 

ڕێکخراوی مافی مرۆڤی ھەنگاو ئاماری پێشێلکارییەکانی مانگی رابردووی دژ بە ژنانی لە ئێران و رۆژھەڵاتی کوردستان بڵاوکردەوە، بەپێی ئامارەکە لە مانگی کانوونی دووەمی ئەمساڵ ژنێکی خەڵکی سەبزاوەر لەسێدارەدراوە، ١٢ چالاکوانی ژنیش دەستبەسەرکراون.

ھەروەھا ١٧ چالاکوانی تریش لەلایەن دەزگای دادوەرییەوە، سزای بەندکران و لێدانی قامچییان بەسەردا سەپێندراوە، سەرجەمیان سزای ٥٠ ساڵ و ٧ مانگ و ٢٠ رۆژ بەندکردنیان بەسەردا سەپێندراوە، ٩ حاڵەتی ژنکوژی لە شارە جیاوازەکانی ئێرانیش تۆمارکراوە.

قائیمقامیەتی سلێمانی ئاماری کاروچالاکی لیژنە ھاوبەشەکانی خۆی بڵاوکردەوە کە تیایدا ھاتوە، لە ‌مانگی کانونی دوەمی ٢٠٢٤ لیژنە ھاوبەشەکان شەش ھەزار و ٦٨٧ سەردانیان بۆ دوکان و بازاڕ و شوێنە گشتییەکان ئەنجامداوە، لە کۆی ئەو سەردانانە تەنھا ٦١٤ سەرپێچیان تۆمارکردوە لەگەڵ ٢٨٢ ئاگادارکردنەوە بۆ پابەندبوون بە مەرج و رێنماییەکانی کارکردن.

ئەوەشخراوەتەڕوو، بەھۆی پابەندنەبوون بە مەرج و رێنماییەکانی کارکردن بەفەرمانی قائیمقامی سلێمانی شەش شوێنی کارکردن داخراون و یەک شوێنی دیکە رووبەڕووی دادگا کراوەتەوە، ئەوە لە کاتێکدایە ژمارەی داخستنەکان لە مانگی پێشوتردا ٥٢ شوێن بوون. 

لەئاماری لیژنە ھاوبەشەکانی قائیمقامیەتی سلێمانیدا باسلەوەکراوە، بەھۆی خراپبوونیان و نەشیاوی بۆ خواردن و بەکارھێنان لەمانگی رابردودا لیژنەکان دەستیان بەسەر ٣١ تۆن و ٢٦١ کیلۆگرام کاڵاوشمەک و خۆراکی جۆراوجۆردا گرتوە و لەناوچەی دەرەوەی نیشتەجێبون و لەلایەن لیژنەی تایبەتمەەندەوە لەناوبراون.

لە ئاماری کاروچالاکی لیژنەکانی قائیمقامیەتی سلێمانی_دا رونکراوەتەوە، بەھۆی سەرپێچیکرنیان لە مەرج و رێنماییەکانی کارکردن ژمارەیەک شوێنی کارکردن سزای دارایی دراون، لەمانگی رابردوا بڕەکەی ٤٠ ملیۆن دینارە و بەپێی یاسا دەخرێتەوە سەر داھاتی گشتی.

دەقی پەیامەکە...

کۆچی دوایی ساڵح فاروق، پێشمەرگەی ھێزەکانی کۆماندۆی کوردستان لەکاتی مەشق و راھێناندا، لە دڵەوە غەمبار و نیگەرانیکردم.

‎بۆ ئەم خەمە گەورەیە پرسە و ھاوخەمیی قووڵی خۆم ئاڕاستەی بنەماڵە سەربەرزەکەی، ھێزەکانی کۆماندۆ و ھاوڕێیانی دەکەم و ھاوبەشی خەمیانم.

‎کاکە ساڵح فاروق پەروەردەی ھێزە دڵسۆز و پتەوەکەی شەھیدی فەرماندە ئاکام عومەر بوو، گەنجێکی لێھاتوو و خۆنەویست بوو، لەدەستدانی جێگەی نیگەرانیی ھەموولایەکمانە.

‎ لە خوای گەورە داواکارم بە بەھەشتی بەرینی شادبکات و سەبووری بەھەموولایەک ببەخشێت.


‎دڵسۆزتان 
‎بافڵ جەلال تاڵەبانی 
‎سەرۆکی یەکێتیی نیشتمانیی کوردستان

لەسەر ڕاسپاردەی بافڵ جەلال تاڵەبانی سەرۆکی یەکێتیی نیشتمانیی کوردستان و ھەڤاڵ قوباد تاڵەبانی سەرپەرشتیاری مەکتەبی سکرتاریەتی سەرۆک مام جەلال، مەکتەبی سکرتارییەتی سەرۆک مام جەلال ھاوڕێ جەبار پێشمەرگەی  مەفرەزە سەرەتاییەکانی یەکێتیی نیشتمانیی کوردستان و گەلی کوردیان بەسەرکردەوە 

لەو بەسەرکردنەوەیەدا  لەنزیکەوە لەدۆخی تەندروستی ھاوڕێ جەبار یان پرسی و ھیوای تەندروست باشیان بۆخواست وەک یەکێک لە پێشمەرگە ئازا و قارەمانەکانی شۆڕشی نوێ کە بەشێکی زۆری تەمەنی پێشکەش بە شۆڕش و خەباتی کورد کردوە و  بەشێکی دانەبڕاو بووە لە سەروەرییەکان .

مەکتەبی سکرتارییەت لەپای ئەو مێژووەو دانەبڕانی لە خەباتی رەوای گەلەکەی چەپکە گوڵی رێزو پێزانینیان پێشکەش بە ھەڤاڵ ھاوڕێ جەبار کرد و تەئکیدیانکردەوە ھەموو تێکۆشەرانی شۆڕشی نوێ و یەکێتی ئاوڕی زیاتریان لێدەدرێتەوە و ھەر پێشمەرگەیەکی دێرین لەھەموو ئاستەکاندا خزمەتکردنیان بە ئەرکی خۆمانی دەزانین  ئەگەر  لە رابردوودا شدا دابڕانێک بووبێت بە دڵنییاوە   بێ مەبەست بووە، چونکە تێکۆشەرەکانمان خاوەن سەرمایەیەکی گرنگ و   شایەنی ھەموو ئاوەڕدانەوەیەکن کە ئەمانەتەوە ئەمە جێبەجێ دەکەین

رێکخراوی مافی مرۆڤی ھەنگاو بڵاویکردەوە، زەینەب جەلالیان سەرەڕایی بەردەوامی لێپرسینەوە، لە مافی وەرگرتنی دەرمان و بینینی پزیشک بێبەشکراوە، بەو ھۆیەشەوە مەترسی لەدەستدانی بینایی ھەیە، ھەروەھا تووشی نەخۆشییەکانی وەک ھەوکردنی دەم و تەنگەنەفەسی و کێشەی گورچیلە و ھەرس بووە.

زەینەب جەلالیان، لە ساڵی ٢٠٠٨ لەسەر رێگای کامێران - کرماشان دەستبەسەرکرا، ساڵێک دواتر لەلایەن لقی یەکی دادگای شۆڕشی کرماشان بە تۆمەتی چوونەدەرەوەی نایاسایی لە ئێران سزای یەک ساڵ بەندکرانی ھەڵپەسێندراو و بەتۆمەتی موحاربە لە ڕێگای ئەندامبوون لە پارتی ژیانی ئازادی کوردستان سزای سێدارەی بەسەردا سەپێندرا، لە ساڵی ٢٠٠٩ ئەو سزایە بەر لێبوردن کەوت و گۆڕدرا بۆ بەندکردنی ھەتاھەتایی.

بەپێی راگەیەنراوێکی سەرۆکایەتی ھەرێمی کوردستان، وەفدێکی سەرۆکایەتیی ھەرێم بە سەردانێک لە ئەمەریکایە و بڕیار چەند دیدار و کۆبوونەوەیەک لەگەڵ بەرپرسانی واشنتۆن ئەنجام بدەن.

بەپێی راگەیەنراوەکە، وەفدەکە لە سەردانەکەیاندا لەگەڵ بەرپرسانی ئیدارەی ئەمریکا و کۆنگرێس، دەربارەی پەیوەندییەکانی ئەمریکا لەگەڵ عێراق و ھەرێمی کوردستان و رەوشی ناوچەکە گفتوگۆ دەکەن و بیروڕا دەگۆڕنەوە.

وەزارەتی شارەوانی و گەشتوگوزاری ھەرێم لە راگەیەنراوێکدا ئاماژەی بۆ ئەوەکردووە، لە ساڵی رابردوودا، لەبەر بەرژەوەندیی گشتی و بە ڕەچاوکردنی رەوشی دارایی ھاووڵاتییان، حکوومەتی ھەرێمی بڕیاریدا بە لێخۆشبوون و داشکاندنی ڕێژەی ١٥ی دانەوەی قەرزی ھاوبەشانی ئاو لە ھەرێمی کوردستان بۆ ماوەی سێ مانگ.

راشیگەیاندووە، بڕیارەکە لە ئێستاوە تا ١٠ی ئادار بەردەوامە و ھاوبەشانی ئاو دەتوانن سەردانی بەڕێوەبەرایەتییەکانی ئاو بکەن و مامەڵەی سوودمەندبوون پێشکەش بکەن.

حکومەتی ھەرێمی کوردستان لە کە رۆژ ١٠/١٢/٢٠٢٣ بڕیاری لێخۆشبوون و داشکاندنی رێژەی ١٥٪ی لە دانەوەی قەرزی ھاوبەشانی ئاو بۆ ماوەی سێ مانگ دەرکرد و تا ١٠/٣/٢٠٢٤ بەردەوام دەبێت.

موحسین قەسرۆکەیی بەرپرسی راگەیاندنی نەخۆشخانەی شەقڵاوە، بە کوردسات نیوزی راگەیاند، ھاووڵاتییەکی دانیشتووی شاری ھەولێر بەناوی سەفین کانەبی کە تەمەنی ٣٨ ساڵە و پیشەی پارێزەرە، لەدوای نیوەڕۆی ئەمڕۆوە بە مەبەستی بینینی دیمەنی بەفر بەپێ دەچێتە چیای سەفین و لەکاتی گەرانەوەیدا بەھۆی ناشارەزاییەوە رێگەی لێ ون دەبێت و دواتر لەھۆش خۆی دەچێت.

ئاماژەی بۆ ئەوەشکرد، گەنجێکی گوندی پونگینەی بناری چیای سەفین لە نزیک ناحیەی ھیران ئەو ھاووڵاتییە دەگەنێتە نەخۆشخانەی گشتی شەقلاوە. 

بەرپرسی راگەیاندنی نەخۆشخانەی شەقڵاوە وتیشی، بەھۆی ئەوەی ئەو ھاووڵاتییە چەند سەعاتێک لەناو بەفر ماوەتەوە، کاریگەری لەسەر جەستەی دروستکردووە، لە ئێستادا پزیشکان و کارمەندانی تەندروستی لە ھەوڵدان بۆ ئەوەی چارەسەری پێویستی بۆ بکەن.

پەیامنێری كوردسات نیوز رایگەیاند، لەكۆبوونەوەكەدا دۆخی ئێستای هەرێم و عێراق و ناوچەكە بەگشتی تاوتوێ دەكرێت، هەروەها پرسی پێكهێنانی ئیدارەی نوێی كەركوك و نەینەوا و بەڕێوەچوونی هەڵبژاردنی پەرلەمانی كوردستانیش تەوەری سەرەكی كۆبوونەوەكە دەبن.

پێشتریش سەعدی پیرە وتەبێژی یەكێتی بە كوردسات نیوزی راگەیاندبوو، یەكێتی و پارتی لە ئاستی باڵا كۆدەبنەوەو چەند تەوەرێكی پەیوەست بە هەرێم و عێراق و ناوچەكە تاوتوێ دەكەن.