وەفدێکی باڵای یەکێتیی نیشتمانیی کوردستان بەسەرۆکایەتی قوباد تاڵەبانی لێپرسراوی مەکتەبی سکرتارییەتی سەرۆک مام جەلال، سەردانی کۆمەڵی دادگەری کرد و لەلایەن عەلی باپیر سەرۆكی كۆمەڵی دادگەریی و ژمارەیەک لە ئەندامانی سەرکردایەتی حزبەکە پێشوازییان لێکرا.

مەبەست لە سەردانەكەی وەفدەکەی یەكێتی بۆ لای سەرۆكی كۆمەڵی دادگەری، گفتوگۆکردن بوو لەسەر پێشهات و ئەگەرەكانی داهاتووی هەرێمی كوردستان و یەكەمین كۆبوونەوەی پەرلەمان و كابینەی نوێی حکومەت، هەردوولا هاوڕابوون كە پێویستە خەمی هاووڵاتی و بژێوییان لە پێشینەی كارەكانی هەموو لایەك بێت و حوكمڕانی بە شێوەیەك بێت كە هاووڵاتی لە سایەیدا بەهرەمەند بێت.

هەر لە کۆبوونەوەکەدا پرسی موچە یەكێك بوو لەو بابەتانەی بە گرنگییەوە باسی لێوە كرا و داكۆكی كرا لەسەر ئەوەی پێویستە موچە كە مافی سەرەتایی هەر فەرمانبەرێكە بێ كەم و كورتی خەمی بخورێت و دابەش بكرێت و ستەم لە فەرمانبەران نەكرێت.

ئەنجومەنی وەزیرانی هەرێمی كوردستان لە راگەیەنراوێكدا بڵاوكردەوە، هەوڵەكانیان لەگەڵ حكومەتی فیدراڵ بۆ دابینكردنی موچەی موچەخۆرانی هەرێم بەردەوامە و پێویستە بابەتی موچە تێكەڵی هیچ كێشە و ناكۆكییەكی سیاسی نەكرێت.

ئاماژە بەوەشکراوە، پێویستە بۆ ساڵی دارایی ٢٠٢٥ رێژەی نوێی ژمارەی دانیشتووانی هەرێمی كوردستان بكرێتە بنەما بۆ دیاركردنی پشكی هەرێمی لە گشت شایستە دەستوورییەكان.

نوێ دەکرێتەوە... 

تەنیا لە ماوەی 24 سەعاتدا ژمارەیەك رۆژنامەوان و نوسەری باكوری كوردستان دەستگیركران.

ئاژانسی هەواڵی وڵات بڵاویكردەوە؛ لە چوارچێوەی هەڵمەتێكی فراوانی پۆلیسی توركیا تەنیا لەماوەی ٢٤ سەعاتدا ١٦ رۆژنامەوان و نوسەر و هونەرمەندی كورد لە باكوری كوردستان دەستگیر كران بێ ئەوەی هیچ بەڵگەیەكی تۆمەتباربونیان هەبێت.

ئاشكرایشیكردووە، جگە لەو رۆژنامەوان و نوسەرانە، هاوكات دەیان چالاكوان و ئەندامانی سەر بە پارتە كوردییەكانیش دەستگیركراون.

پارتی یەكسانی و دیموكراسی دەم پارتی و پارتی هەرێمە دیموكراتییەكان دەبەپە لە بەیاننامەیەكی هاوبەشدا ناڕەزایەتییان دژی هەڵمەتی دەستگیركردنەكان دەربڕی و رایانگەیاندووە، دەسەڵاتی توركیا بە تایبەت ئەكەپە و مەهەپە بۆ ئەوەی بەر بە روخانیان بگرن دەستیان بە دەستگیركردن رۆژنامەنوسان و سیاسەتمەدارانی باكوری كوردستان كردووە.