نوری مالکی لە چاوپێکەوتنێکدا ئاماژەی بە پرۆسەی سیاسی لە عێراق کردوو رایگەیاند، پرۆسەی سیاسی لە عێراق دەستوەردانی ئاشکرای دەرەکی وەک ئێستای بەخۆیەوە نەبینیوەو ئێستا گۆڕاوە بۆ فەرمانکردن، رونیشیکردەوە، ئەمریکا دژی پرۆژەی پەراوێزخستنی سیاسییەو ھۆشداری داوەتە وڵاتانی ھەرێمی و لایەنەکانی عێراقی دەستوەردانەکانیان رابگرن . 

سەرۆکی ئیتیلافی دەوڵەتی یاسا ئاماژەی بەوەشکرد، حکومەتەکەی کازمی گرێبەستی پێچەوانەی دەستوری کردووەو ھیچ کەسێک بوێری نیە داوای درێژکردنەوەی بکات ، درێژکردنەوەی تەمەنی حکومەتەکەی کازمی راگەیاندنی مەرگە بۆ پەرلەمان و دەستور.

جەختیشی کردەوە، مانگی شەش یەکلاکەرەوە دەبێت بۆ پرۆسەی سیاسی و پەیوەندییەکانیش لەگەڵ موقتەدا سەدر سنوردارەو نەگەیشتۆتە کێشە بنەڕەتییەکان.  بەوتەی مالکی چوارچێوەی ھەماھەنگی پرۆژەیەکی مەترسیداری راگرت و ھەست بە سەرکەوتن دەکەن ، عێراقیش رووبەرووی پرۆژەیەکی نێودەوڵەتی بۆتەوەو  بە خولەک و ژمارە زنیاری لەسەری ھەیە.

لەلایەکی ترەوە عەدنان فەیحان سەرۆکی ھاوپەیمانی سادیقون لە ئەنجومەنی نوێنەرانی عێراق رایگەیاند، پێکھاتەی شیعە لەناو ھاوپەیمانی سێ قۆڵی بۆتە کەمینە، وتیشی، پەیامەکانی رەوتی سەدر بەرامبەر چوارچێوەی ھەماھەنگی پەیامی وەلانان و پەراوێزخستنن.

سەبارەت بە گفتوگۆی لایەنە سیاسییەکانیش لەدوای جەژنی رەمەزان، عائید ھیلالی سەرکردەی چوارچێوەی ھەماھەنگی ئاشکرایکرد، گفتوگۆی راستەقینەی لایەنە سیاسییەکان دوای جەژنی رەمەزان دەستپێدەکات و دوای جەژنی رەمەزان گفتوگۆی چڕ لەنێوان لایەنە سیاسییەکان بەڕێوەدەچێت.

رونیشیکردەوە، لیژنەی پێنج قۆڵی کەلەلایەن چوارچێوەی ھەماھەنگی و ھاوپەیمانەکانیییەوە پێکھێنراوە گفتوگۆ و دانوستانی دەبێت لەگەڵ ھەموو لایەنە سیاسییەکان بەتایبەت رەوتی سەدر لەبەرئەوەی چارەسەری قەیرانەکە بە رێگەی تەوافوق دەبێت لەنێوان چوارچێوەی ھەماھەنگی و رەوتی سەدر.