هادی عامری لە بەرژەوەندی جوتیارانی كورد لە كەركوك بڕیارێكی دەركرد كە لە سەردەمی رژێمی بەعسەوە بێبەشبوون لە بەكارهێنانی زەوییەكانیان.

هادی عامری سەرۆكی لیژنەی باڵای جێبەجێكردنی ماددەی ١٤٠ لە نوسراوێكدا داوای لە وەزارەتی كشتوكاڵ كردووە هەموو ئەو زەویانەی لە چوارچێوەی مادەی ١٤٠ دان، بخاتە نێو پلانی كشتوكاڵیەوە جگە لەو زەویانەی سكاڵایان لەسەرە.

بەپێی نوسراوەكە، جۆری ئەو زەوییە كشتوكاڵیانەی كە لە سەردەمی ڕژێمی پێشوو لەسەر وەزارەتی كشتوكاڵەوە كوژێنراونەتەوە و خراونەتە سەر وەزارەتەكانی تر و جوتیارانی كورد بێبەشبوون لە بەكارهێنانیان، جارێكی تر دەخرێنەوە ناو پلانی كشتوكاڵی و جوتیاران هەمان مافی زەوی ئاساییان دەبێت تیایاندا.

لەلایەن رژێمی بەعسەوە تاپۆی سەدان هەزار دۆنم زەوی جوتیارانی كورد لەسەر وەزارەتی كشتوكاڵەوە كوژێنرانەوەو خرانە سەر وەزارەتەكانی تر، لەوانەش بەرگری، بەوەش ئەو زەوییانە لەناو پلانی كشتوكاڵییەوە دەرهێنران و جوتیاران لە هەموو مافێكی بەكارهێنان و پلانە كشتوكاڵیەكان بێبەش بوون.

زانكۆی پۆلیتەكنیكی سلێمانی ئەو دەنگۆیانە رەتدەكاتەوە كە باس لەوەدەكەن موچەخۆرانی زانكۆكە ئاگاداركرابنەوەی لەوەی فۆرمی هەژماری من پربكەنەوە و دەڵێت، لە 30/10 فۆرمی تەوتین لەزانكۆكەیان پڕكردووەتەوە.

سەرۆكایەتی زانكۆی پۆلیتەكنیكی سلێمانی لە رونكردنەوەیەكدا دەڵێت،  ئاگاداری هەموولایەك دەكەینەوە كە زانكۆمان لە 30/10/2024  پڕۆسەی تەوتینی جێبەجێكردوە بۆ سەرجەم مامۆستایان و فەرمانبەرانمان، دەشڵێت ئەو نوسراوەی بڵاوكراوەتەوە تەنها گشتاندنێكی وەزارەتی خوێندنی باڵا و توێژینەوەی زانستیە و لە ڕووی كارگێڕییەوە گشتاندنی پێكراوە.

ئەوە لە كاتێكدایە ، لە هەندێك میدیا و تۆڕە كۆمەڵایەتییەكان نوسراوێك بڵاوكرایەوە و بەوجۆرە خوێندنەوەی بۆكرا، زانكۆی پۆلیتەكنیكی سلێمانی موچەخۆرانی زانكۆكەی پابەند دەكات بەوەی پڕۆژەی هەژماری من جێبەجێبكەن

دادگای رەسافە لە بەغداد دەستی بەسەر یەك تۆن مادەی هۆشبەردا گرتووە و سزای لەسێدارەدانیشی بۆ ٧٥ بازرگانی ماددەی هۆشبەر دەركرد كە هەشت كەسیان بیانیین .

وەلید ئیبراهیم دادوەری دادگای ناوەندی لێكۆڵینەوە لەدادگای رەسافە رایگەیاندووە، لە ئۆپەراسیۆنەكاندا بە هەماهەنگی لەگەڵ وەزارەتی ناوخۆ، لە سەرەتای ئەمساڵەوە تا ناوەڕاستی مانگی تشرینی یەكەم، دەستیان بەسەر زیاتر لە یەك تۆن ماددەی هۆشبەردا گرتووە.

وتیشی ٧٥ سزای لەسێدارەدان دەركراوە كە شەش بیانی تێدایە و ٢٠ کەسی دیكەش بە زیندانیكردنی هەتاهەتایی سزادراون، پێشتریش شەش کەس لەو ٧٥ کەسە سزای لەسێدارەدانیان بەسەردا جێبەجێکراوە.

دادوەرەكەی دادگای رەسافە ئاماژەی بەوەشداوە، یەكێك لە بازرگانەكان كە لەدایكبووی ساڵی ٢٠٠٢ـە ، لەكاتی وەرگرتنی نزیكەی ٥٧ كیلۆگرام مادەی هۆشبەر كە لە بازرگانانی بیانی وەرگرتووە دەستگیركراوە و سزای لەسێدارەدانی بەسەردا سەپێنراوە.