هەواڵگری فەڕەنسا و بەریتانیا رایانگەیاند، بەرنامەی ئەتۆمی ئێران هەڕەشەیە لەسەر ئاسایشی جیهان. 

ریچارد مور سەرۆكی هەواڵگری بەریتانیا و نیكۆڵاس لێرنەر سەرۆكی هەواڵگری فەرەنسا لە باڵیۆزخانەی فەڕەنسا لە سویسرا كۆبونەوە. سەرۆكی هەواڵگری بەریتانیا رایگەیاند، خەونی ئێران بۆ بەدەستهێنانی چەكی ئەتۆمی هەڕەشەیە لەسەر ئاسایشی جیهان، هەرچەندە حەماس و حزبوڵای لوبنانی نزیك لە ئێران لەلایەن ئیسرائیلەوە لاواز بوون. 

دەشڵێت، هاوپەیمانانی ئێران لە رۆژهەڵاتی ناوەڕاست دووچاری شكستێكی سەخت بوونەوە، بەڵام خەونی ئێران بۆ بەدەستهێنانی چەكی ئەتۆم هەڕەشەیە بۆ سەر هەموو لایەك. 

هاوكات، سەرۆكی هەواڵگری فەڕەنسا رایگەیاند، هەنگاوە خێراكانی ئێران بۆ دروستكردنی چەكی ئەتۆم هەڕەشەیەكی جددی دەبن لە چەند مانگی داهاتوودا. 

وتیشی، بەیەكەوە لەگەڵ بەریتانیا كاردەكەن بۆ روبەڕوبونەوەی مەترسیەكان و دەزگای هەواڵگری زۆر بەجددی كار لەسەر ئەو بابەتە دەكات بۆ ئەوەی دەسەڵاتداران بڕیارە دروستەكە بدەن و ستراتیژێكی دروست دابنرێت. 

 

دانانی قەیوم بۆ شارەوانی میكس لە وان كاردانەوەی لێكەوتەوە و لەسەر داوای دەم پارتی خۆپیشاندان ئەنجامدرا، دەبەپەش دەڵێت سیاسەتی قەیوم نیشانەی دوژمنایەتی گەلی كوردە.

دوای ئەوەی بە بڕیاری وەزارەتی ناوخۆی توركیا قەیووم لە شارەوانی میكسی سەر بە پارێزگای وان دانراو سزای زیندانیش بەسەر سەرۆكی شارەوانیدا سەپێنرا، پارتی یەكسانی و دیموكراسی گەلان(دەم پارتی) داوای لە خەڵك و رێكخراوەكان كرد، خۆپیشاندان و نارەزایەتی ئەنجامبدەن، لە سەدان كەس لە خەڵكی میكس دژی بڕیاری وەزارەتی ناوخۆ و دانانی قەیوم خۆپیشاندانیان ئەنجامدا.

هاوكات لیژنەی بەڕێوەبەریی ناوەندی پارتی هەرێمە دیموكراتیەكان (دەبەپە) سەبارەت بە دەستبەسەراگرتنی شارەوانی میكس لە راگەیەنراوێكدا ئاماژەی بۆ ئەوەكردوە، پێداگری لەسەر سیاسەتی قەیوم نیشانەی دوژمنایەتی گەلی كوردە، دەسەڵاتی ئاكەپە - مەهەپە بەو پێداگرییە هەوڵدەدات گەلی كورد بێ ئیرادە بكات.

ئەوەش لە كاتێكدایە ئایواز حازر، هاوسەرۆكی شارەوانی میكس كە لە هەڵبژاردنی ٣١ی ئاداری ئەمساڵ لەسەر لیستی دەم پارتی سەركەوتنی بەدەستهێنا، رۆژی هەینی بە تۆمەتی ئەندامێتی لە رێكخستن سزای سێ ساڵ و ١١ مانگ زیندانیكردنی بەسەردا سەپێندرا و قەیووم لە شوێنەكەی دانرا.

 

لە ماوەی ٢٤ سەعاتی رابردوودا لە غەززە ٣٣ كەس كوژراون، كۆی ژمارەی كوژراوانیش گەیشتووەتە زیاتر لە ٤٤ هەزار كەس.

وەزارەتی تەندروستی لە كەرتی غەززە رایگەیاندووە، لە ماوەی ٢٤ سەعاتی رابردوودا بەهۆی هێرش و بۆردومانە بەردەوامەكانی سوپای ئیسرائیل بۆ سەر ناوچە جیاجیاكانی كەرتی غەززە ٣٣ كەس كوژراون، ١٣٧ كەسی تریش برینداربوون.

ئاماژەی بەوەشكردووە، لە سەرەتای هێرشەكانی ئیسرائیلەوە بۆ سەر كەرتی غەززە لە ٧ـی تشرینی یەكەمی ٢٠٢٣ـەوە تائێستا ٤٤ هەزار و ٣٠٠ كەس كوژران و ١٠٥ هەزار و ٧٠ كەسیش برینداربوون كە زۆربەی كوژراو و بریندارەكانیش ژن و منداڵن.