هەسەدە دەڵێت لە نزیكەوە چاودێری پێشهاتەكانی باكووری ڕۆژئاوای سوریا دەكات و بەپێی پێویست كاردانەوەیان دەبێت.

فەرهاد شامی بەرپرسی ئۆفیسی ڕاگەیاندنی هێزەكانی سوریای دیموكرات لە تویتێكدا ئاماژەی بەوەكرد، پێشهاتەكانی باكووری ڕۆژئاوای سوریا هەستیارن و ڕاستەوخۆ گرنگی بۆ ئەوان هەیە، وتیشی لە نزیكەوە بەدواداچوون دەكەن و هەڵوێست و كاردانەوەیان بەپێی پێویستی بۆ پاراستنی گەل دەبێت.

حەلەب كە ئێستا بەشێكی كەوتووەتە ژێر دەستی گروپە چەكدارەكانەوە، لە ساڵی ٢٠١٦ وە لە ژێر دەسەڵاتی حكومەتی سوریا و هاوپەیمانەكانیدایە، بەڵام لە ناو حەلەبدا دوو گەڕەك بە ناوەكانی شێخ مەقسود و ئەشرفەییە كە كوردنشینن لە ژێر دەستی هێزە كوردییەكاندان.

 

سبەینێ ئەنجومەنی نوێنەرانی عیراق كۆدەبێتەوە و سێ پڕۆژە یاسای جێگەی مشتومڕ دەخاتە دەنگدانەوە، كە یەكێكیان تایبەتە بە هەڵوەشاندنەوەی بڕیارەكانی بەعس بۆ گەڕاندنەوەی خاوەندارێتی زەوییە لەناوچە جێناكۆكەكان بۆ خاوەنەكانیان.

فەرمانگەی راگەیاندنی ئەنجومەنی نوێنەرانی عیراق لە راگەیەنراوێكدا ئاماژەی بەوەكردووە، رۆژی یەكشەممە ئەنجومەنی نوێنەران كۆدەبێتەوە و سێ پرۆژەیاسا دەخاتە دەنگدانەوە و خوێندنەوە بۆ دوو پرۆژەیاساش دەكرێت.

ئەو سێ پڕۆژە یاسایەی دەخرێنە دەەنگدانەوە بریتین لە: هەمواركردنەوەی یاسای باری كەسێتی ساڵی ١٩٥٩ و پرۆژەیاسای گەڕاندنەوەی زەوییەكان بۆ خاوەنەكانیان كە بە چەند بڕیارێكی ئەنجومەنی سەركردایەتیی بەعس دەستیان بەسەردا گیراوە لەگەڵ پرۆژەیاسای هەمواری دووەمی یاسای لێبوردنی گشتی.

ئەو سێ پرۆژە یاسایە زۆرترین مشتومڕیان لەسەرە و پێشتر  فراكسیۆنەكانی شیعە و سوننە و كورد جەختیان كردبووەوە كەتێپەڕاندنی ئەو  پڕۆژە یاسایانە پێوستیان بە رێككەوتنی سیاسییە.

 

هەواڵگری فەڕەنسا و بەریتانیا رایانگەیاند، بەرنامەی ئەتۆمی ئێران هەڕەشەیە لەسەر ئاسایشی جیهان. 

ریچارد مور سەرۆكی هەواڵگری بەریتانیا و نیكۆڵاس لێرنەر سەرۆكی هەواڵگری فەرەنسا لە باڵیۆزخانەی فەڕەنسا لە سویسرا كۆبونەوە. سەرۆكی هەواڵگری بەریتانیا رایگەیاند، خەونی ئێران بۆ بەدەستهێنانی چەكی ئەتۆمی هەڕەشەیە لەسەر ئاسایشی جیهان، هەرچەندە حەماس و حزبوڵای لوبنانی نزیك لە ئێران لەلایەن ئیسرائیلەوە لاواز بوون. 

دەشڵێت، هاوپەیمانانی ئێران لە رۆژهەڵاتی ناوەڕاست دووچاری شكستێكی سەخت بوونەوە، بەڵام خەونی ئێران بۆ بەدەستهێنانی چەكی ئەتۆم هەڕەشەیە بۆ سەر هەموو لایەك. 

هاوكات، سەرۆكی هەواڵگری فەڕەنسا رایگەیاند، هەنگاوە خێراكانی ئێران بۆ دروستكردنی چەكی ئەتۆم هەڕەشەیەكی جددی دەبن لە چەند مانگی داهاتوودا. 

وتیشی، بەیەكەوە لەگەڵ بەریتانیا كاردەكەن بۆ روبەڕوبونەوەی مەترسیەكان و دەزگای هەواڵگری زۆر بەجددی كار لەسەر ئەو بابەتە دەكات بۆ ئەوەی دەسەڵاتداران بڕیارە دروستەكە بدەن و ستراتیژێكی دروست دابنرێت.