سبەینێ ئەنجومەنی نوێنەرانی عیراق كۆدەبێتەوە و سێ پڕۆژە یاسای جێگەی مشتومڕ دەخاتە دەنگدانەوە، كە یەكێكیان تایبەتە بە هەڵوەشاندنەوەی بڕیارەكانی بەعس بۆ گەڕاندنەوەی خاوەندارێتی زەوییە لەناوچە جێناكۆكەكان بۆ خاوەنەكانیان.

فەرمانگەی راگەیاندنی ئەنجومەنی نوێنەرانی عیراق لە راگەیەنراوێكدا ئاماژەی بەوەكردووە، رۆژی یەكشەممە ئەنجومەنی نوێنەران كۆدەبێتەوە و سێ پرۆژەیاسا دەخاتە دەنگدانەوە و خوێندنەوە بۆ دوو پرۆژەیاساش دەكرێت.

ئەو سێ پڕۆژە یاسایەی دەخرێنە دەەنگدانەوە بریتین لە: هەمواركردنەوەی یاسای باری كەسێتی ساڵی ١٩٥٩ و پرۆژەیاسای گەڕاندنەوەی زەوییەكان بۆ خاوەنەكانیان كە بە چەند بڕیارێكی ئەنجومەنی سەركردایەتیی بەعس دەستیان بەسەردا گیراوە لەگەڵ پرۆژەیاسای هەمواری دووەمی یاسای لێبوردنی گشتی.

ئەو سێ پرۆژە یاسایە زۆرترین مشتومڕیان لەسەرە و پێشتر  فراكسیۆنەكانی شیعە و سوننە و كورد جەختیان كردبووەوە كەتێپەڕاندنی ئەو  پڕۆژە یاسایانە پێوستیان بە رێككەوتنی سیاسییە.

 

هەواڵگری فەڕەنسا و بەریتانیا رایانگەیاند، بەرنامەی ئەتۆمی ئێران هەڕەشەیە لەسەر ئاسایشی جیهان. 

ریچارد مور سەرۆكی هەواڵگری بەریتانیا و نیكۆڵاس لێرنەر سەرۆكی هەواڵگری فەرەنسا لە باڵیۆزخانەی فەڕەنسا لە سویسرا كۆبونەوە. سەرۆكی هەواڵگری بەریتانیا رایگەیاند، خەونی ئێران بۆ بەدەستهێنانی چەكی ئەتۆمی هەڕەشەیە لەسەر ئاسایشی جیهان، هەرچەندە حەماس و حزبوڵای لوبنانی نزیك لە ئێران لەلایەن ئیسرائیلەوە لاواز بوون. 

دەشڵێت، هاوپەیمانانی ئێران لە رۆژهەڵاتی ناوەڕاست دووچاری شكستێكی سەخت بوونەوە، بەڵام خەونی ئێران بۆ بەدەستهێنانی چەكی ئەتۆم هەڕەشەیە بۆ سەر هەموو لایەك. 

هاوكات، سەرۆكی هەواڵگری فەڕەنسا رایگەیاند، هەنگاوە خێراكانی ئێران بۆ دروستكردنی چەكی ئەتۆم هەڕەشەیەكی جددی دەبن لە چەند مانگی داهاتوودا. 

وتیشی، بەیەكەوە لەگەڵ بەریتانیا كاردەكەن بۆ روبەڕوبونەوەی مەترسیەكان و دەزگای هەواڵگری زۆر بەجددی كار لەسەر ئەو بابەتە دەكات بۆ ئەوەی دەسەڵاتداران بڕیارە دروستەكە بدەن و ستراتیژێكی دروست دابنرێت. 

 

دانانی قەیوم بۆ شارەوانی میكس لە وان كاردانەوەی لێكەوتەوە و لەسەر داوای دەم پارتی خۆپیشاندان ئەنجامدرا، دەبەپەش دەڵێت سیاسەتی قەیوم نیشانەی دوژمنایەتی گەلی كوردە.

دوای ئەوەی بە بڕیاری وەزارەتی ناوخۆی توركیا قەیووم لە شارەوانی میكسی سەر بە پارێزگای وان دانراو سزای زیندانیش بەسەر سەرۆكی شارەوانیدا سەپێنرا، پارتی یەكسانی و دیموكراسی گەلان(دەم پارتی) داوای لە خەڵك و رێكخراوەكان كرد، خۆپیشاندان و نارەزایەتی ئەنجامبدەن، لە سەدان كەس لە خەڵكی میكس دژی بڕیاری وەزارەتی ناوخۆ و دانانی قەیوم خۆپیشاندانیان ئەنجامدا.

هاوكات لیژنەی بەڕێوەبەریی ناوەندی پارتی هەرێمە دیموكراتیەكان (دەبەپە) سەبارەت بە دەستبەسەراگرتنی شارەوانی میكس لە راگەیەنراوێكدا ئاماژەی بۆ ئەوەكردوە، پێداگری لەسەر سیاسەتی قەیوم نیشانەی دوژمنایەتی گەلی كوردە، دەسەڵاتی ئاكەپە - مەهەپە بەو پێداگرییە هەوڵدەدات گەلی كورد بێ ئیرادە بكات.

ئەوەش لە كاتێكدایە ئایواز حازر، هاوسەرۆكی شارەوانی میكس كە لە هەڵبژاردنی ٣١ی ئاداری ئەمساڵ لەسەر لیستی دەم پارتی سەركەوتنی بەدەستهێنا، رۆژی هەینی بە تۆمەتی ئەندامێتی لە رێكخستن سزای سێ ساڵ و ١١ مانگ زیندانیكردنی بەسەردا سەپێندرا و قەیووم لە شوێنەكەی دانرا.