وەزارەتی دەرەوەی ئەمریکا، لە راگەیاندراوێکدا ئاماژەی بەوەکرد، رۆژی پێنجشەممەی ھەفتەی رابردوو، نوێنەرانی ئەمریکا و بەریتانیا و فەڕەنسا و ئەڵمانیا و نەرویژ، لەگەڵ تورکیا و عێَراق و سعودیە و میسر و قەتەر و ئوردن و نوێنەرانی یەکێتیی ئەوروپا و کۆمکاری عەرەبی، لە پاریسی پایتەختی فەڕەنسا، لەبارەی قەیرانی سوریا کۆبوونەتەوە.

روونیشیکردەوە، وڵاتانی بەشدار جەختیان لە بەردەوامی ھاوکارییەکان بۆ ئەو وڵاتانە کردەوە، کە پەنابەری سوورییان لەخۆگرتووە و پاڵپشتیی خۆیان بۆ ھەوڵەکانی نێردەی نەتەوەیەکگرتووەکان بۆ کاروباری سوریا، بۆ کۆتاییھێنان بە قەیرانی ئەو وڵاتە لە رێگەی چارەسەری سیاسییەوە دووپاتکردەوە، پێشیوازیشیان لە رێکخستنی کۆنگرەی شەشەمی برۆکسل کرد، کە بڕیاروایە ٩ی مانگی ئایار لەبارەی داھاتووی سوریا و ناوچەکە بەڕێوەبچێت.