کوردستان
دادگای فیدراڵی عیراق سێ بڕگە و هەمواری یەكەمی یاسای ئەنجومەنی شورای هەرێمی كوردستانی بە نادەستوری لە قەڵەمدا و هەڵیوەشاندەوە.
ئەمڕۆ دادگای فیدراڵی عیراق لەسەر سكاڵایەك كۆبووەوە كە د. بڕیار رەشید ئەندامی ئەنجومەنی نوێنەران تۆماریكردبوو.
بەپێی بڕیاری دادگاكە، بڕگەی چوار لە ماددەی 13 هەڵوەشاندەوە، كە داواكانی رەگەزنامە لە تایبەتمەندی دادگای دادوەری كارگێڕییە و لە دەسەڵاتی ئەو دادگایە نامێنێت.
هەروەها بڕگەی یەكەم و دووەم لە ماددەی 16 لە یاسای ئەنجومەنی شورای هەرێمی كوردستان بە نادەستوری ناساند و هەڵیوەشاندەوە، كە تایبەتە بەوەی دادگەی دادوەری كارگێڕی تایبەتمەند نییە بە تاوتوێكردنی ئەو تانانەی پەیوەندیدارن بە بڕیارە كارگێڕییەكان، لەگەڵ ئەو بابەتانەی پەیوەندییان بە دەسەڵاتەكان سەرۆكی هەرێمی كوردستان هەیە.
هەروەها بڕیاریدا بەنادەستوریی یاسای ژمارە 17ی ساڵی 2022 یاسای هەمواری یەكەمی یاسای ئەنجومەنی شورای هەرێمی كوردستان، كە لە ساڵی 2022ەوە لە پەرلەمانی كردستان پەسەندكرابوو.
ئەمڕۆ مەكتەبی سیاسی یەكێتیی نیشتمانیی كوردستان بە سەرۆكایەتی بافڵ جەلال تاڵەبانی لە سلێمانی كۆدەبێتەوە و ئەنجامی هەڵبژاردن و قۆناغی دوای هەڵبژاردن تاوتوێدەكات.
سەعدی ئەحمەد پیرە وتەبێژی یەكێتیی نیشتمانیی كوردستان بە كوردسات نیوزی راگەیاند، ئەمڕۆ مەكتەبی سیاسی یەكێتی لە سلێمانی بە سەرۆكایەتی بافڵ جەلال تاڵەبانی كۆدەبێتەوە.
وتیشی، لە كۆبوەنەوەكەدا ئەنجامی هەڵبژاردنی خولی شەشەمی پەرلەمانی كوردستان و قۆناغی دوای هەڵبژاردن و پڕۆسەی سیاسی تاوتوێدەكرێت.
كۆبوونەوەكەی مەكتەبی سیاسی یەكیبَتی لەكاتێكدایە كە رۆژی دووشەممە كۆمیسیۆنی باڵای سەربەخۆی هەڵبژاردنەكانی عیراق، ئەنجامی بەرایی هەڵبژاردنی پەرلەمانی كوردستانی رایگەیاند كە بەپێ ئەنجامە بەراییەكان یەكێتی ٤٠٨ هەزار و ١٤١ دەنگی بەدەستهێناوە.
بەپێی پێشبینییەكانی كەشناسی هەرێم، ئەمشەو لە ناوچە شاخاوییە سنوورییەكان ئەگەری بەفربارین هەیە و لە هەندێك ناوچەش باران دەبارێت.
بەڕێوەبەرایەتی گشتی كەشناسی هەرێم ئاماژەی بەوەكردووە، ئەمڕۆ ئاسمان بە گشتی نیمچەهەور دەبێت، لەشەودا لە لوتكەی ناوچە شاخاوییە سنورییەكان ئەگەری كەمێك بەفربارین هەیە، لە هەندێك ناوچەی سنووریش نمەباران دەبێت.
راشیگەیاند، كاریگەری ئەو كەشوهەوایە لەسەر ناوچە سنورییەكان تا بەرەبەیانی رۆژی چوارشەممە بەشێوەی نمەباران و بەفر لەكاتی جیاجیا بەردەوامی دەبێت.
هاوكات دەستەی كەشناسی عیراق رایگەیاند، بارستە هەوایەكی سارد لە ناوچەكانی رۆژهەڵاتی ئەوروپاوە روو لە عیراق دەكات و پلەی گەرمی لەنێوان سێ بۆ حەوت پلەی دیكە دادەبەزێت، ئەگەری بارانبارینیش لە ناوچەكانی هەرێم و ناوچەكانی دیكەی عێراقیش دەبێت.
كۆمیسیۆنی هەڵبژاردنی عیراق سێ لیژنەی بۆ یەكلاكردنەوەی سكاڵاكان پێكهێنا و بەپێی جۆری سكاڵاكان مامەڵەیان لەگەڵدا دەكرێت.
جومانە غەلای وتەبێژی كۆمیسیۆنی هەڵبژاردنی عیراق رایگەیاند، كۆمیسیۆن سێ لیژنەی بۆ یەكلاكردنەوەی سكاڵاكان پێكهێناوە و لیژنەكان لەلایەن یەكێك لە ئەندامانی ئەنجومەنی كۆمیسیاران و بەڕێوەبەری گشتی كۆمیسیۆن و فەرمانبەری یاسایی كۆمیسیۆنەوە سەرپەرشتی دەكرێت.
دەشڵێت، ئەو لیژنانە سكاڵاكان پۆلێن دەكەن بۆ سكاڵای سەوز و سور، سكاڵای سەوز كاریگەری ناكاتە سەر ئەنجامی هەڵبژاردن و بابەتین بۆ نمونە سكاڵایەك كراوە بەبێ پڕكردنەوەی فۆڕمی سكاڵا یاخود ناوی سكاڵاكار نەنوسراوە و یاخود بەڵگەی پێویست نییە و لە هەمان كاتدا وەڵامدەدرێتەوە.
وتیشی، سكاڵای سور ئەنجامی هەڵبژاردن دەگۆڕێت و پێویستە ئەنجومەنی كۆمیسیاران بڕیاری لەسەر بدەن، ساختەكاری و گۆڕینی فۆڕمی دەنگدان بە سكاڵای سور دادەنرێن.
كۆمیسیۆنی باڵای سەربەخۆی هەڵبژاردنەكان رایگەیاند، ئەمرۆ سەردانی ئەو ناوەندانە دەكات كە تائێستا دەنگەكانی بۆ پەرلەمانی كوردستان هەژمارنەكراون.
كۆمیسیۆنی باڵای سەربەخۆی هەڵبژاردنەكانی عیراق رایگەیاندوە، ئەمرۆ سێشەممە وردبینی لە دەنگی ئەو وێستگانە دەكرێت، كە ئەنجامەكانیان بۆ خولی شەشەمی پەرلەمانی كوردستان رانەگەیەندراون، بەپێی خشتەی كۆمیسیۆن ئەمڕۆ لە پارێزگای دهۆك و رۆژی چوارشەممە 23ی تشرینی یەكەم لە پارێزگای سلێمانی و رۆژی پێجشەممە 24ی تشرینی یەكەم لە پارێزگای هەولێر، وردبینی لە دەنگی ئەو وێستگانە دەكەن، كە دەنگەكانیان هەژمار نەكراون.
لە راگەیەندراوەكەدا ئاماەی بۆ ئەوەشكردوە، هەموو سەردانەكان لە سەعات نۆی سەرلەبەیانی دەبێت، نوێنەری هاوپەیمانی و حزب و پاڵێوراوان و چاودێرانی هەڵبژاردنەكان و راگەیاندنەكان دەتوانن سەردانی ناوەندەكانی وردبینی بكەن.
ئەوەش لە كاتێكدایە ئێستا بۆ هەڵبژاردنی خولی شەشەمی پەرلەمانی كوردستان دەنگی ٢٦ وێستگە هەژمار نەكراون.
نوێنەری گشتی مامۆستایانی گرێبەست رایگەیاند، سبەی مامۆستایانی گرێبەست یەکەم مووچەیان لەگەڵ وەزارەتی پەروەردە وەرناگرن و لەچەند رۆژی داھاتوودا دابەشدەکرێت.
عەلی رەئوف نوێنەری گشتی مامۆستایانی گرێبەست بە کوردسات نیوزی راگەیاند، ھەرچەندە بڕیاربوو سبەی مامۆستایانی گرێبەست یەکەم مووچەیان لەگەڵ وەزارەتی پەروەردە وەربگرن، بەڵام بەھۆی نەبوونی پارەی نەختینە لە بانکەکاندا مووچەی مامۆستایانی گرێبەست دابەشناکرێت.
ئەوەشی خستەڕوو، لەچەند رۆژی داھاتوودا مووچەی مانگی ئەیلولی مامۆستایانی گرێبەست دابەشدەکرێت.
رۆژی ١٧ـی ئەم مانگە نوێنەرانی مامۆستایانی گرێبەست رایانگەیاند، شایستە داراییەکانی مامۆستایانی گرێبەست بووەتە مووچە و مووچەی مانگی ئەیلولی مامۆستایانی گرێبەست لە تەواوی پەروەردەکان لەگەڵ وەزارەتی پەروەردە دابەشدەکرێت، دواتریش پێکەوە شایستەی دارایی مانگی تەمموز و ئابی مامۆستایانی گرێبەست دابەشدەکرێت.
لە سلێمانی لەکاتی لێکردنەوەی پۆستەری بانگەشەی لایەنەکان، کەسێک گیانیلەدەستداو دووانی دیکەش برینداربوون.
لەدوای تەواوبونی پرۆسەی ھەڵبژاردن، لایەنەکان دەستیانکردوە بە لێکردنەوەی پۆستەرەکانیان، لە کاتی لێکردنەوەی پۆستەر گەنجێکی تەمەن ٢٢ ساڵان کە بە ئۆتۆمبێلی بەرزکەرەوە ھەوڵیداوە پۆستەر لە ستون و بەرزەپردەکان لێبکاتەوە کەوتووەتە خوارەوە بەھۆیەوە گیانی لەدەستداوە.
ھاوکات، بەڕێوەبەری ئیدارەی نەخۆشخانەی شار بە کوردسات نیوزی راگەیاند، ھەر بەھۆی لێکردنەوەی پۆستەرەکانەوە دوو کەسی دیکە لە دوو شوێنی جیاجیا برینداربوون ، وتیشی، ئەو دوو کەسە دوای وەرگرتنی چارەسەری پێویست، لە ئێستادا نەخۆشخانەیان جێھێشتوە تەندروستیان جێگیرە.
بەپێی رێنماییەکانی کۆمسیۆنی باڵای سەربەخۆی ھەڵبژاردنەکان، لەدوای مانگێک لە تەواوبوونی ھەڵبژاردن پێویستە سەرجەم پۆستەی بانگەشەی لایەنەکان لەسەر شەقامەکان لاببرێن، بە پێچەوانەی سزای دارایی دەدرێن.
قوباد تاڵەبانی جێگری سەرۆکی حکومەتی هەرێمی کوردستان بۆ کۆچیدوایی ئاشتی هەورامی پەیامێکی هاوخەمیی ئاڕاستەی خانەوادەکەی دەکات و رایدەگەیەنێت پرسەو سەرەخۆشی لە بنەماڵە دڵسۆزەکەتان دەکەم و هاوبەشی خەمتانم.
دەقی پرسەنامەکەی قوباد تاڵەبانی...
بەڕێزان خانەوادەی دکتۆر ئاشتی هەورامی
زۆر بەداخەوە هەواڵی کۆچی دوایی (عەبدوڵا عەبدولرەحمان تەوێڵەیی) ناسراو بە(ئاشتی هەورامی)م بیست. هاوبەشی خەمتانم و پرسەو سەرەخۆشی لەبنەماڵە دڵسۆزەکەتان ئەکەم.
خوای گەورە لێی خۆش بێت و جێگەی بەهەشت بێت، سەبوری و دڵنەواییش بەهەموو لایەک ببەخشێت.
انا لله وانا الیه راجعون
ھەڵبژاردنی خولی شەشەمی پەرلەمانی کوردستان کۆتایھات و لیستی ١٢٩ی یەکێتی سەرکەوتنی گەورەی بە دەستھێناوە.
بەپێی ئەنجامە نا رەسمییەکان و جیاکردنەوەی ٩٢%ی دەنگەکان، لە چواربازنەی ھەرێمی کوردستان، یەکێتیی نیشتمانیی کوردستان ٤٠٨ ھەزار دەنگ و پارتی ٥٧٢ ھەزار و ٣١ دەنگ و نەوەی نوێ ٢٤٠ ھەزار و شەش دەنگ و یەکگرتوی ئیسلامی ٩٤ ھەزار و ٧٥٥ دەنگ و کۆمەڵی دادگەری ٥٨ ھەزار و ٨٣٨ دەنگ و لایەنەکانی تر ٨٨ ھەزار و ٨٧٠ دەنگیان بەدەست ھێناوە.
مەکتەبی ھەڵبژاردنی یەکێتیش رایگەیاند، ژمارەیەکی زۆر دەنگ ماوە جیابکرێنەوە و دەنگی یەکێتی زۆر زیاتر دەبێت لە ئێستا.
دەزگای ئاسایشی ھەرێم داوا لە ھاوڵاتیان دەکات، بەشێوازێکی شارستانیانە گوزارشت لەخۆشییەکانیان بکەن و دووربکەونەوە لە تەقە کردن.
لە راگەیەندراوێکدا دەزگای ئاسایشی ھەرێم داواکارە لە سەرجەم ھاوڵاتیانی ھەرێمی کوردستان لە شار و شارۆچکەکان، دوای کۆتاییھاتنی پرۆسەی دەنگدان و ئاشکراکردنی ئەنجامی ھەڵبژاردنەکان و کەرنەڤاڵی لایەنە سیاسییەکان، بەشێوازێکی شارستانیانە گوزارشت لەخۆشییەکانیان بکەن.
ھەروەھا داوا لە ھاوڵاتیان دەکات نەبنە ھۆی دروستبوونی ئاستەنگی ھاتوچۆ لە شەقام و شوێنە گشتییەکان و دووربکەونەوە لە توندوتیژی و بەکارھێنانی چەک و تەقەکردن، بە پێچەوانەوە سزای یاسایی سەرپێچیکاران دەدرێت و ڕووبەڕوی یاسا دەکرێنەوە.
زۆری تەمەن و نەخۆشی، نەبووە رێگرلەبەردەم ھاوڵاتییان بۆ بەشداریکردنیان لە دەنگدان و لە بەشێکی زۆری بنکەکانی دەنگدان ھاوڵاتییانی بەتەمەن و کەسانی خاوەن پێداویستی تایبەت بە جۆش و خرۆشێکی زۆرەوە بەشداری پرۆسەی دەنگدانی گشتییان کرد.
لە دھۆک و چەمچەماڵ یەکەم دەنگدەر ھاوڵاتی بەتەمەن بوون و لە سنووری چۆمانیش کەسانی خاوەن پێداویستی تایبەت لە بەردەم بنکەکانی دەنگدان نۆرەیان گرتبوو و دەنگیان دەدا، لە حاڵەتێکی دەگمەنی ناو پرۆسەکەشدا، لە سنووری پشدەر، نەخۆشێک لەسەر قەرەوێڵە دەنگیدا.
ڕێژەی بەشداری ھەڵبژاردن لەسەرتاسەری ھەرێمی کوردستان ڕێژەی ٦٢٪ ی تێپەڕاند.
بەپێی ئامارە ناڕەسمییەکان، بەشداری دەنگدەران لە پڕۆسەی ھەڵبژاردنی خولی شەشەمی پەرلەمان لە سلێمانی زیاتر بووە لە لەسەدا ٤٣ لە ھەڵەبجە سەدا ٥٢ بووە،
ھاوکات لە دھۆک و سیمێڵ سەدا ٤٣ و لەزاخۆ سەدا ٤٤ بووە.
ھەروەھا ڕێژەی بەشداری ھەڵبژاردن لە چەمچەماڵ و ئامێدی سەدا ٥٥ بووە و لە ئاکرێ و بەردەڕەش سەدا گەیشتوەتە سەدا ٤٤.
پڕۆسەی دەنگدانی گشتی بۆ خولی شەشەمی پەرلەمانی كوردستان كۆتایی هات.
سەعات ٧ی بەیانی پڕۆسەی دەنگدان دەستیپێكرد و پڕۆسەكە تا سەعات ٦ی ئێوارە بەردەوامبوو، كە تیایدا دەنگدەرانی هەرێمی كوردستان چونە سەرسندوقەكانی دەنگدان و بۆ هەڵبژاردنی ١٠٠ ئەندامی پەرلەمان دەنگیاندا.
بەگوێرەی ئامارەكانی كۆمسیۆنی باڵای سەربەخۆی هەڵبژاردنەكانی عێراق، هەزار و 266 بنكە بۆ دەنگدانی گشتی دەنگیان تێدا درا و هاوكات، دوو ملیۆن و ٦٨٣ هەزار و ٦١٨ كەس مافی دەنگدانیان هەبوو.
قوباد تاڵەبانی لە شاری سلێمانی بەشداری پرۆسەی دەنگدانی كرد بۆ هەڵبژاردنی پەرلەمانی كوردستان و لە وتەیەكدا بۆ رۆژنامەنوسان رایگەیاند، رێرەوی حكومرانی لە هەرێمی كوردستان راستدەكەنەوە.
قوباد تاڵەبانی ئاماژەی بۆ ئەوەشكرد، ئەم هەڵبژاردنە گۆرانكاری دروست دەكات و كابینەی داهاتووی حكومەت جیاواز دەبێت، ئەمرۆش دەستپێكی پرۆسەی كۆتاییهێنانە بەوانەی غەدریان لە میللەت كردووە، راشیگەیاند هیوادارن هاووڵاتیان بە زوویی بچنە سەر سندوقەكانی دەنگدان و دەنگ بەو لایەنە بدەن كە دەتوانێت گۆڕانكاری بكات.
بافڵ جەلال تاڵەبانی سەرۆكی یەكێتیی نیشتمانیی كوردستان وەكو یەكەم دەنگدەر لە سلێمانی لە خوێندنگەی رەوشەن بەردخان لە سلێمانی دەنگیداو داوا لە هاووڵاتیانیش كرد زوو بچن بۆ دەنگدان.
وتیشی، پەیامیان ئەوەیە كۆتایی بە دەسەڵاتی خۆسەپێن دەهێن و پێویستە هاوڵاتیان دەنگ بدەن بۆ ئەوەی پێكەوە گۆڕانكاری بكەن.
سبەینێ دەنگدانی گشتی بۆ هەڵبژاردنی پەرلەمانی كوردستان بەڕێوەدەچێت و دوو ملیۆن و ٦٨٣هەزار و ٦١٨ كەس مافی دەنگدانیان هەیە.
رۆژی یەكشەممە ٢٠ی تشرینی یەكەمی ٢٠٢٤، دەنگدانی گشتی بۆ هەڵبژاردنی خولی شەشەمی پەرلەمانی كوردستان بەڕێوەدەچێت، بە پێی ئامارەكانی كۆمیسیۆنی باڵای سەربەخۆی هەڵبژاردنەكانی عیراق، لە دوو ملیۆن و ٦٨٣ هەزار و ٦١٨ كەس مافی دەنگدانیان هەیە.
هەر بەپێی ئامارەكە، زۆرترین ژمارەی دەنگدەر لە سنوری پارێزگای سلێمانییە كە یەك ملیۆن و هەشت هەزار و ٤١٢ دەنگدەرە، وە هەولێریش ٩٣٣ هەزار و ١١٥ و لە
دهۆك ٦٨٢ هەزار و ٧٩١ كەس و لە هەڵەبجە ٥٩ هەزار و ٣٠٠ كەس مافی دەنگدانیان هەیە.
هەروەها بۆ بەرێوەچوونی پرۆسەكە هەزار و 266 بنكەی دەنگدان و شەش هەزار و ٣١٨ وێستگەی دەنگدان لە پارێزگاكانی هەرێمی كوردستان كراونەتەوە.