ئاژانسی پاراستن و زانیاری/ زانیاری رایدەگەیەنێت، ھەرکەسێک لە ھەر پلە و پایەیەکدا بووبێت تێوەگلابێت لە تاوان و کاری نایاسایی، دەستگیر دەکرێت و راپێچی بەردەم یاسا دەکرێت.
وتەبێژی سەرۆکی ئاژانسی پاراستن و زانیاری/ زانیاری روونکردنەوەیەکی بڵاوکردۆتەوە و رایگەیاندووە، دابینکردنی سەقامگیری و ئاسایش و روبەڕوبوونەوەی مەترسییەکان، پرۆسەیەکی ھەواڵگریی وردە و بە نھێنی و بەشێوەی بەردەوام بەڕێوە دەچێت.
بەڵام چەند رۆژێکە لە پەراوێزی ھەندێ پێشھات، ھەڵمەتێکی میدیایی لە دژی پرۆسەکانی سەقامگیری و ئاسایش دەستی پێکردوە. ھەندێ لایەن بە مەرامی زیان گەیاندن بە ناوبانگی ئاژانسی پاراستن و زانیاری / زانیاری و بەڕێوەبەرایەتی گشتی دژە تیرۆری سەر بە ئاژانس، ھەواڵی بێ بنەما لەسەر ئەفسەر و کارمەندانی ئەم دەزگا تێکۆشەرە بڵاو دەکەنەوە و دەیانلکێنن بە ھەندێک کاری نەکراوەوە. ئەوە دووپات دەکەینەوە ئاژانسی پاراستن و زانیاری / زانیاری، خاوەنی ناوبانگی نیشتمانی و کوردستانییە، جێدەستی لە پاراستنی ئەزموونی حوکمڕانیی ھەرێم و روبەڕوبوونەوەی مەترسییەکانی تیرۆر و سیخوڕی و تاواندا بەرجەستە و باڵایە.
کادر و کارمەندانی ئاژانس ولە ناویشیاندا پێشمەرگە گیان لەسەردەستەکانی دژە تیرۆر، قاڵبووی خەباتی نیشتمانی و پەروەردەکراوی دیسپلینی سەربازین. پابەندن بە یاسا بەرکارەکانی پەرلەمان و حکومەتی ھەرێمی کوردستان. لە چوارچێوەی مافەکانی مرۆڤ و ئیتیکی پیشەییدا رەفتار دەکەن و تەنھا رێ پێدراون ئەو ئەرک و فەرمانانە جێ بەجێ بکەن کە ئاژانسی پاراستن و زانیاری / زانیاری لە پێناو دابین کردنی ئاسایشی نیشتمانیی ھەرێمی کوردستان پێیان دەسپێرێت.
راشیگەیاندووە، بەڕێوەبەرایەتی گشتیی دژە تیرۆر، بەشێکە لە شانازییەکی مێژوویی و بەردەوامی گەلی کوردستان. بەشدارێکی بەھێزی ھاوپەیمانیی نێودەوڵەتییە دژ بە تیرۆر، رۆڵی بەرچاوی ھەبووە لە سەرخستنی جەنگی جیھانیی دژ بە تیرۆر و لە پێناو پاراستنی دیموکراسی و ئازادی و ئارامیی و مرۆڤایەتی قوربانیی داوە، و بە خوێنی شەھید و بریندار و شارەزایی و پشوودرێژیی ئەفسەرەکانی، سەدان نەبەردی مێژوویی پڕ شانازی بۆ گەلەکەمان تۆمار کردووە.
بەم روونکردنەوەیە ئەوە رایدەگەیەنین کە لێکۆڵینەوە لەسەر گومانەکانی خراپ بەکارھێنانی دەسەڵات، یەکێکە لە ئەرکە لە پێشینەکانمان دڵنیابن رێگە نادەین ناوی ئاژانس بۆ مەرام و بەرژەوەندیی تایبەتی ھیچ کەسێک بەکاربێت.
بەڵێنتان پێ دەدەین ھەرکەسێک لە ھەر پلە و پایەیەکدا بووبێت تێوەگلابێت لە تاوان و کاری نایاسایی، دەستگیر دەکرێت، راپێچی بەردەم یاسا دەکرێت و رای گشتییش لە ئەنجامی لێکۆڵینەوە و سزادانی ئاگادار دەکرێتەوە. ھاوکات رێکاری یاسایی دەگیرێتە بەر بەرامبەر ھەر کەس و لایەنێک کە بیەوێت بە بڵاوکردنەوەی ھەواڵی بێ بنەما، ئەرک و ماندوبوونی ئەفسەرانمان بخاتە ژێر پرسیار، و گێرەشێوێنی بکات تا ناو و ناوبانگیان بزڕێنێت.
