دەقی پەیامەکە : 

بەیاننامەی مەکتەبی سیاسی بۆ یادی (٤٦) ساڵەی دامەزراندنی یەکێتیی نیشتمانیی کوردستان‌و (٤٥) ساڵەی ھەڵگیرسانی  شۆڕشی نوێ
کۆمەڵانی خەڵکی کوردستان ...
کەسوکاری سەربەرزی شەھیدان...
پێشمەرگە قارەمانەکان...
جەماوەری دڵسۆز و ھەڤاڵانی تێکۆشەری یەکێتی... 
 (١) ی حوزەیرانی ساڵی (١٩٧٥)، لەھەلومەرجێکدا، کە کوردایەتی و دۆزی ڕەوای گەلەکەمان لە ئاڵۆزترین ‌و سەخترین دۆخدا بوو، بەھۆی ھەرەسی شۆڕشی ئەیلول‌و پیلانی شوومی (جەزائیر)ەوە، نائومێدی ناخ‌و دەروونی ھەموو کوردێکی دڵسۆز و تێکۆشەری تەنیبوو، ڕژێمی بەعس-یش لە لوتکەی  لەخۆبایبووندا سەرقاڵی  ستراتیژی شۆفێنانەی سڕینەوەی گەلی کوردستان بوو، لە بارودۆخێکی نێودەوڵەتی وا کە زلھێزەکانیش بە ھۆی  پاراستنی بەرژەوەندییان ویژدانیان سڕ ببوو، یەکێتیی نیشتمانیی کوردستان بەڕابەرایەتی ڕابەر و سەرۆکی مێژووییمان جەنابی مام جەلال و پۆڵێک تێکۆشەری دەستەی دامەزرێنەر و سەرکردایەتی ناوەوەی وڵات  دامەزرا و ھاتە کۆڕی خەباتەوە بۆ بەرپەرچدانەوەی ئەو واقیعە داسەپاوە.
ئەم دامەزراندنە وەرچەرخانێکی مێژوویی گەورەش بوو لە مێژووی بزوتنەوەی ڕزگاریخوازی گەلی کوردستان. ڕچەشکێنێکی ناوازەش بوو، لە شێوازی خەباتی پێشمەرگانە ‌و ژیانی حزبایەتی لە کوردستان و بگرە تەواوی ناوچەکەیشدا.
زۆری نەخایاند لە ساڵرۆژی یەکەمدا شاخ ‌و چیا و گوندەکانی کوردستان، بوون بە سەنگەری ئاوەدانی  پێشمەرگە چالاکی ‌و داستانەکانی شۆڕشی نوێ، ورەیان دایەوە بە خەڵک و ئەژنۆی رژێمیشیان شکاند. لەزیندانەکانیشدا جەلادەکان لە خۆراگری و ئازایەتی تێکۆشەرەکانی یەکێتی تاسابوون، کە وانەی (کەم ژیان، کەڵ ژیان)ی رابەرانی سێ کۆچکەی کۆمەڵە بوو بە سەرمەشقی خەبات، کۆچە و کۆڵانی شار و شارۆچکەکان، زانکۆ و ناوەندەکانی خوێندن، سەنگەرێکی تری شۆڕش بوون و دوژمنیان ھەراسان کردبوو.