بۆ دەنگدان لەسەر سێ پرۆژە یاسای گرنگ، ئەمرۆ ئەنجومەنی نوێنەرانی عیراق كۆدەبێتەوە.

پەیامنێری كوردسات نیوز رایگەیاند، كۆبونەوەكە سەعات یەكی نیوەرۆی ئەمڕۆ دەست پێدەكات، بڕگەی یەكەمی كۆبونەوەكەش دەنگدانە لەسەر پرۆژە یاسای گەراندنەوەی خاوەندارێتی زەوی لە ناوچە كێشە لەسەرەكان بۆ خاوەنەكانیان كە پرۆژە یاساكە لەلایەن فراكسیۆنە كوردستانیەكانەوە پێشكەش كراوە، بڕگەی دووەمیش دەنگدانە لەسەر پرۆژە یاسای هەمواری یاسای باری كەسێتی كە لەلایەن شیعەوە پێشكەشكراوە و برگەی سێیەمیش دەنگدانە لەسەر پرۆژە یاسای لێبوردنی گشتی سوننەكان.

ئەو سێ پرۆژە یاسایە زۆرترین مشتومڕیان لەسەرە، بۆیە فراكسیۆنەكانی شیعە و سوننە و كوردیش، بە گرنگییەوە لە دانیشتنەكە دەڕوانن و لە هەوڵدان ئەو سێ پرۆژەیاسایە رێككەوتنی سیاسی لەسەر بكرێت و تێپەڕێنرێت.
 

بڕیارە، ئەمڕۆ لیستی موچە مانگی دە بە ئەلیكترۆنی رەوانەی وەزارەتی دارایی عیراق بكرێت.

سەرچاوەیەك لە وەزارەتی دارایی هەرێم بە كوردسات نیوزی راگەیاند، دوای ئەوەی سەرجەم ئەو كێشە هونەریانەی لە نێو لیستی موچەی مووچەخۆرانی مانگی دە هەبوو چارەسەركراون، بڕیارە ئەمڕۆش لیستی موچە بە ئەلیكترۆنی رەوانەی وەزارەتی دارایی بەغداد بكرێت.

ئەو سەرچاوەیە راشیگەیاند، بڕیارە لە دوو رۆژی داهاتوشدا لیستی موچەی مانگی دە بەدەستی لە لایەن وەفدێكی وەزارەتی دارایی هەرێمەوە رەوانەی بەغداد بكرێت.

راوێژكاری ئاسایشی نیشتمانی عیراق گەیشتە هەولێر و لەگەڵ وەزیری ناوخۆی حكومەتی هەرێم كۆبوەوە.

نووسینگەی راگەیاندنی قاسم ئەعرەجی راوێژكاری ئاسایشی نیشتمانی لە راگەیەندراوێکدا دەڵێت، لەژێر ڕێنمایی فەرماندەی گشتیی هێزە چەكدارەكان، قاسم عەرەجی سەردانی هەولێری كردووە.

بەپێی میدیا عیراقیەكان، سەردانەكە هاوكاتە لەگەڵ پەرەسەندنی ئۆپراسیۆنە سەربازییەكانی توركیا لەناو خاكی هەرێم.

چوارشەممەی رابردو محەمەد شیاع سودانی لەگەڵ ئەنجومەنی وزاری ئاسایشی نیشتمانی بۆ تاوتوێكردنی دۆخی ئەمنی كەرتی سنوری نێوان عیراق و توركیا كۆبوەوە، بەتایبەت دوای هێرشە چەكدارییەكەی ئەنكەرە لەلایەن پەكەكەوە.

لە بەرانبەریشدا فڕۆكەكانی توركیا هێرشەكانیان بۆسەر خاكی هەرێم زیادكردووە بەتایبەت لە ناوچەكانی خواكورك، چیای گارە، قەندیل و شنگال.