دەقی پەیامەکە : 

بەبۆنەی ڕۆژی  (یەکی ئایار)  جەژنی کرێکارانی جیھان، پیرۆزبایی گەرم لە سەرجەم  کرێکارانی جیھان دەکەین بە تایبەتی کرێکاران و ڕەنجدەرانی بیروبازووی کوردستان. 
یەکی ئایار جەژنی کرێکاران و ڕۆژی ھاوپشتی کرێکاری و جۆشدانەوەی خەباتی چینایەتی کرێکارانە، ھەموو ساڵێک لەم رۆژەدا کرێکاران لەسەرانسەری جیھاندا ھەڵوەستە لەسەر گوزەران و مافە چینایەتییەکانیان و پێداچوونەوەو دەکردنی یاسای گونجاوی کار دەکەن، کە مافەکانی کرێکاران دەستەبەر بکات. 

 کرێکاران و ڕەنجدەرانی بیروبازوو لە کوردستاندا، لە خەبات بۆ دەستەبەرکردنی مافەکانیان درێغیان نەکردووە. لەگەڵ ئەوەشدا، لەخەباتی ڕزگاریخوازی گەلەکەماندا، بەتایبەتی لە شۆرشی نوێ دا، قارەمانی نێو سەنگەری پێشمەرگایەتی ‌و ئازا و خۆراگری خەباتی نھێنی و چالاکی ‌و ناڕەزایەتیەکانی ناو شارەکان و کەم نین ژمارەی ئەو کرێکارە تێکۆشەرانەی شەھید و بریندار بوون. 


لە دوای ڕاپەرینیش کرێکاران سەرمەشقی  خەباتی مەدەنی قۆناغەکە بوون  بۆ دەرکردنی یاسای کار و دەستەبەری کۆمەڵایەتی لە کەرتی گشتی و تایبەت  وھێنانەدی مافی دیموکراسیەکانیان و ڕەخساندنی ھەلی کار و پاراستنی ژیان و سەلامەتی کرێکاران.


یەکێتیی، وەک حزبێکی سۆشیال دیموکرات پشتیوانی  خەباتی سەندکایی و پیشەیی کرێکارانە و داکۆکی لەمافە پیشەیی و چینایەتی و دیموکراسییەکانی کرێکاران دەکات  ‌و لەرێگای نوێنەرانی لە حکومەت و پەرلەمان و رێکخراو و سەندیکاکانەوە پێداگری دەکات بۆ چەسپاندنی بنەماکانی یاسای کاری ھاوچەرخی کرێکاران، لەعێراق و کوردستان و باشکردنی ژیان و گوزەرانیان. 


جارێکی تر پیرۆزە (یەکی ئایار) جەژنە جیھانی کرێکاران