ڕوانگەی سووری بۆ مافەکانی مرۆڤ بڵاویکردەوە، گرووپە چەکدارەکانی نزیک لە ئێران، بە دەیان مووشەک کێڵگەی نەوتی عومەریان لە دێرەزووری سوریایان بۆردومان کردووە، ئەوەش دوای رۆژێک لە بۆردوومانی سوپای ئەمریکا دێت بۆ سەر بارھەڵگرێکی ئەو گرووپە چەکدارانە لە ناوچەی ئەلبوکەمال لە رۆژھەڵاتی دێرەزوور.

بەپێی ڕوانگەی سووری، ھەفتەی ڕابردوو گرووپە چەکدارییەکان دەستیان کردووە بە بڵاوکردنەوەی ھێزەکانیان لە ناوچەکە ئەوەش بۆ کەمکردنەوەی زیانی بۆردوومانەکانی ئیسرائیل و ئەمریکا لە ناوچەکە.

کێڵگەی نەوتی عومەر بە گەورەترین کێڵگەی نەوتی سوریا ھەژمار دەکرێت لە ڕووی بەرھەمھێنانەوە، دەکەوێتە کەناری ڕۆژھەڵاتی ڕووباری فورات، ناوچەیەکی ناسەقامگیر و پڕ لە ململانێی گرووپە چەکدارەکان بوو لە چەند ساڵی ڕابردوودا، لە کۆتایی مانگی تشرینی یەکەمی ٢٠١٧وە لەلایەن ھەسەدەوە بە پاڵپشتی ھاوپەیمانی نێودەوڵەتی کۆنترۆڵکراوە کە لە ھەمان کاتدا گەورەترین بنکەی ھاوپەیمانی نێودەوڵەتی تێدایە.